October

Avwanre cha sa riẹn obo rehẹ ubiudu rẹ ihwo kirobo rẹ Jihova vẹ Jesu ruẹ-ẹ. Dedena, avwanre sa davwẹngba vwọ riẹn iroro vẹ ọdavwẹ rayen. (2 Kọr. 11:29) Vwọ fẹnẹ ihwo re riariẹ avwanre phiyọ ri nenesi rẹ ojevwe romobọ, avwanre “guọnọ erhuvwu rẹ oma [rẹ avwanre] ọvo-o, ẹkẹvuọvo [avwanre] je guọnọ erhuvwu rẹ ihwo efa.” (Fil. 2:4) Ekpako ukoko yen a ma guọnọ nẹ i dje erorokẹ phia. Ayen riẹnre nẹ ayen cha niyẹnrẹn rẹ oborẹ ayen vwẹrote igodẹ ra vwọ kẹ ayen yọnre na. (Hib. 13:17) Ofori nẹ ekpako davwẹngba vwo dje erorokẹ phia rere ayen sa vwọ chọn iniọvo na uko. Ẹkẹvuọvo, mavọ yen ayen se vwo ru ọtiọyen? Ọkpako ro vwo erorokẹ nabọ nene iniọvo na ghwọrọ ọke kuẹgbe. Ọ nọ ayen enọ, ọ me nabọ kerhọ rẹ oborẹ ayen cha ta. Uruemu tiọyena yovwirin dẹn, ma rho siẹrẹ ọvo usun rẹ igegede na da davwẹngba rọ vwọ ta ọdavwẹ rọyen, jẹ eta na gba dje udu. (Isẹ 20:5) Ọkpako da nabọ ghwọrọ ọke vẹ iniọvo na, ọyena che toroba ẹroẹvwọsuọ, ẹguọnọ kugbe uvi rẹ oyerinkugbe rọ vẹ iniọvo na vwori.—Iruo 20:37. w19.03 17 ¶14-17

Ọdavwaro pha kerẹ udemu rọ vwerhan san siẹrẹ e de koko riọ. Kirobo rẹ oma vwerhen avwanre siẹrẹ avwanre da riẹn nẹ ihwo vwo ọdavwaro kpahen oborẹ avwanre ruẹ, eriyin oma je cha vwerhen ihwo efa siẹrẹ avwanre de ji dje ọdavwaro phia kpahen oborẹ ayen ruẹ. Avwanre de dje ọdavwaro phia, ohwo na kọ sa riẹn nẹ obo ro ruru yẹrẹ obo rọ vwọ kẹ avwanre na fierere kẹ avwanre. Ọyena kọ cha nẹrhẹ oyerinkugbe rẹ avwanre vẹ ohwo na ganphiyọ. Eta re vwo dje ọdavwaro phia pha ghanghanre mamọ kirobo rẹ isese ri nonẹna djerephia. Vwẹro roro oborẹ ubi omamọ rẹ apo ra vwẹ oro vẹ idọnọ efuanfon vwo ru che yovwin te! Ji roro obo rọ cha ghanre te! Mavọ oma che ru we siẹrẹ a da vwẹ orọnvwọn tiọyena vwo ruẹse kẹ wẹ? Ọtiọyen eta ru wo vwo dje ọdavwaro phia je hepha. Vwo oniso rẹ ẹkpo nana: Omamọ rẹ apo ra vwẹ oro ru cha nabọ tọn. Eriyin ohwo ru wo dje ọdavwaro phia kẹ je cha karophiyọ eta wẹn vwẹ akpeyeren rọyen eje. w19.02 15 ¶5-6

Adam vẹ Ivi vwọ re omamọ rẹ urhe rẹ erianriẹn rẹ erhuvwu vẹ umiovwo na, ayen de djephia nẹ ayen vwẹroso Jihova vẹ iwan rọye-en. Ayen da vwẹ iwan romobọ rayen vwo mu, kpahen obo ri yovwirin vẹ obo re brare. Ẹkẹvuọvo, roro kpahen obo re va ayen abọ. Ayen ku oyerinkugbe rayen vẹ Jihova kufia, kugbe uphẹn rẹ arhọ rẹ bẹdẹ. Emọ rayen da riuku rẹ umwemwu vẹ ughwu. (Rom 5:12) Roro kpahen oborẹ uruemu rẹ ọshare rẹ Ẹtiopia rẹ Filip ghwoghwo ota kẹ na fẹnẹ ọ rẹ Adam vẹ Ivi. Fikirẹ ọdavwaro rẹ ọshare na vwo kpahen oborẹ Jihova vẹ Jesu ru kẹ, o de brokpakpa bromaphiyame. (Iruo 8:34-38) Kerẹ ọshare rẹ Ẹtiopia na, ọke rẹ avwanre vwọ vwomakpahotọ kẹ Jihova ji bromaphiyame, avwanre de djephia nẹ avwanre vwo ọdavwaro kpahen oborẹ Jihova vẹ Jesu ru kẹ avwanre. Avwanre ji djephia nẹ avwanre vwẹroso Jihova, je mrẹvughe nẹ ọyen fo ohwo ro brorhiẹn rẹ obo ri yovwirin vẹ obo re brare. w19.03 2 ¶1-2

Vwọ kẹ idibo rẹ Jihova, ọyọnregan mudiaphiyọ re vwo vwo ẹguọnọ rẹ Jihova nẹ otọ rẹ ubiudu rhe, te ẹdia ra vwọ vwẹ ẹga kẹ, ji phi ọhọre rọyen phiyọ ẹdia rẹsosuọ vwẹ akpeyeren rẹ avwanre ọkieje. Ubiota rẹ Hibru ra fan phiyọ “ọyọnregan” se mudiaphiyọ ọsoso yẹrẹ jẹ upe evwo. Kerẹ udje, eranvwe re vwo ze izobo kẹ Jihova dia ọ ro jẹ oka evwo. (Liv. 22:21, 22) A rhọnvwe kẹ idibo rẹ Ọghẹnẹ nẹ ayen vwẹ eranvwe rọ muọga vwo ze izobo-o. Jihova guọnọre nẹ eranvwe na dia ọ ro jẹ upe evwo, ro vwo omakpokpọ. (Mal. 1:6-9) Udje rẹ ohwo ro kpo eki ra dẹ orọnvwọn sa nẹrhẹ a riẹn oboresorọ Jihova vwọ vwẹ ẹro ọghanghanre vwo ni omakpokpọ rẹ eranvwe na. Ohwo na cha sa dẹ orọnvwọn kerẹ omamọ, ọbe, yẹrẹ ekuakua re vwo ruiruo ro vwo iphrophro yẹrẹ ro miovwiri-in. Ọ ro shephiyọ yen ọ cha dẹ. Ẹwẹn tiọyena yen ji rhe Jihova kpahen evun-ẹfuọn rẹ avwanre kugbe ẹguọnọ rẹ avwanre vwo kpahọn. Ọ guọnọ ọ rọ dia ọsoso, rẹ upe kanre. w19.02 3 ¶3

A sa sẹro rẹ ubiudu na siẹrẹ a da sen obo ri se miovwon, je rhiabọreyọ obo ri che fierere kẹ. Ọrhẹrotọ bi ẹchẹ rẹ orere na gbe siẹrẹ ọvweghrẹn da cha, o mi rhe rhiephiyọ siẹrẹ e de muẹ emu vẹ erọnvwọn efa cha. Owẹnvwe che hwe ihwo rehẹ orere na ghwu siẹrẹ e rhe rhie ẹchẹ rẹ orere na-a. Vwẹ idjerhe vuọvo na, ofori nẹ avwanre vwẹ ọkieje vwo rhie ubiudu rẹ avwanre phiyọ vwọ kẹ iroro rẹ Jihova. Rọ vwọ dianẹ Baibol na vọnre vẹ iroro rẹ Jihova na, kẹ ofori nẹ avwanre vwẹ uphẹn kẹ nẹ o djobọte iroro, edavwẹ, vẹ iruemu rẹ avwanre kọke kọke rẹ avwanre de se. Mavọ yen avwanre sa vwọ mrẹ erere vọnvọn vwo nẹ isese rẹ Baibol rẹ avwanre? Ẹrhovwo pha ghanghanre mamọ, kidie ọ sa chọn wẹ uko ‘vwọ mrẹ imu rẹ igbunu’ rehẹ Ota rọyen. (Une 119:18) O ji fo nẹ avwanre roro kokodo kpahen oborẹ avwanre se. Avwanre da nẹrhovwo, se Baibol na, ji roro kokodo kpahen oborẹ avwanre seri, Ota rẹ Ọghẹnẹ kọ cha ro “evun rẹ udu [rẹ avwanre],” ọ me nẹrhẹ avwanre vwo ẹguọnọ rẹ iroro rẹ Jihova.—Isẹ 4:20-22. w19.01 18 ¶14-15

Jihova vwo ọdavwaro kpahen izobo rẹ avwanre, kidie ọ riẹnre nẹ ona rẹ avwanre vẹ ẹdia rẹ avwanre hepha fẹnẹ ohwohwo. Di roro kpahen oka rẹ izobo rẹ Jihova rhiabọreyọ vwẹ ọke awanre. Ihwo rẹ Izrẹl evo sa vwẹ omogodẹ yẹrẹ ẹvwe vwo ze izobo kẹ. Ohwo rẹ Izrẹl rọ dia ovwiogbere me rha reyọ “inekuku ivẹ eyẹ erurẹ ivẹ” vwo ze. Ẹkẹvuọvo, ohwo na rhe vwo igho rọ vwọ dẹ emephran ivẹ na-a, Jihova je sa rhiabọreyọ “ẹko ihwe rẹ iputusẹ rẹ eka.” (Liv. 5:7, 11) Dede nẹ eka pha kueku vwẹ oke yena, Jihova je cha rhiabọreyọ siẹrẹ “eka” na da dia emamọ rọyen. Oka rẹ ẹwẹn yena yen ji rhe Jihova te ọke na. Ọ dia a vwọ dia ọwena rẹ ota kerẹ Apolọs yẹrẹ vwo aghẹnghẹn kerẹ Pọl yen Jihova guọnọ mie avwanre siẹrẹ a da kpahanphiyọ enọ vwẹ emẹvwa-a. (Iruo 18:24; 26:28) Oborẹ Jihova guọnọ mie avwanre ọyen a vwọ kpahenphiyọ enọ te asan rẹ ẹgba rẹ avwanre teri. Karophiyọ ayeuku yena ro toro anini ivẹ. Jihova vwẹ ẹro ọghanghanre vwo no kidie o ru oborẹ ẹgba rọyen muru.—Luk 21:1-4. w19.01 8-9 ¶3-5

Kerẹ idibo rẹ Jesu, avwanre riẹnre nẹ e che vwo utuoma kpahen avwanre. Jesu tarọphiyotọ jovwo nẹ e che mukpahen idibo rọyen mamọ vwẹ ọke rẹ oba na. (Mat. 24:9; Jọn 15:20) Aizaya mraro rọyen nẹ, vwọ vrẹ utuoma re che vwo kpahen avwanre, ivwighrẹn je cha reyọ ena sansan vwọ họnre avwanre. Evo usun rẹ ena nana yehẹ ophiẹnvwe, efian, vẹ omukpahen ọgangan. (Mat. 5:11) Jihova cha dobọ rẹ ena nana rẹ ayen vwọ họnre avwanre na ji-i. (Ẹfe. 6:12; Ẹvwọ. 12:17) Jẹ ofori nẹ oshọ mu avwanre-e. Jihova tare nẹ “orọvwọ re duvwu” vwọso avwanre “se yovwi-i.” (Aiz. 54:17) Kirobo rẹ igbẹhẹ sẹro rẹ avwanre nẹ ogiribo ọgangan ye, eriyin Jihova je sẹro rẹ avwanre vwo nẹ “ova rẹ ohwo ogbarogba.” (Aiz. 25:4, 5) Ivwighrẹn cha sa so omaẹwan re bẹdẹ kẹ avwanre-e. (Aiz. 65:17) Ivwighrẹn rẹ Ọghẹnẹ eje cha “ghwọrọ kufia.”—Aiz. 41:11, 12. w19.01 6-7 ¶13-16

Ighene, Jihova vwo ẹguọnọ rẹ egbomọphẹ, ọ je guọnọ nẹ ovwan ru ọtiọyen. Vwọba, ọ guọnọre nẹ ovwan vwẹ egbomọphẹ rẹ ovwan vwo ru obo ri yovwirin rere ọ sa vwọ dia ochọnvwe kẹ ovwan. Ọ sa dianẹ ovwan riẹn ihwo evo ri nẹ ihoho rẹ ihwo re banphiyọ, gbe ọfanrhiẹn, reyọ ihuvwun egangan, da idi vroma, ji heha ri phiẹ arhọ rẹ ohwo phiyọ ẹdia rẹ imuoshọ. Dede nẹ ayen mrẹ omavwerhovwẹn rẹ ọmọke krẹn, umiovwo yen nẹ evun rọyen cha ukuotọ rọyen. Ayen se mu erharhe ega, dia eviẹn kẹ obo re vwerhen ayen na, yẹrẹ tobọ ghwu phiyọ dede. (Gal. 6:7, 8) Ọtiọyena, ka sa tanẹ “egbomọphẹ” rayen na ghwa ophiẹnvwẹ rọ sua omaẹwan. (Taitọs 3:3) Gbe roro, bro ihwo yen wọ mrẹre ri muọga fikirẹ irhi rẹ Baibol rẹ ayen neneri? O phẹnre dẹn nẹ ẹmienyo rẹ Jihova toroba omakpokpọ je kẹ ohwo egbomọphẹ. (Une 19:7-11) Vwọba, ovwan da vwẹ egbomọphẹ ro rhe ovwan asaọkiephana vwo ruiruo vwẹ idjerhe aghwanre womarẹ ẹmienyo rẹ irhi rẹ Ọghẹnẹ, ọyena cha nẹrhẹ Jihova kugbe ọsẹ vẹ oni rẹ ovwan vwẹroso ovwan ji kẹ ovwan egbomọphẹ efa.—Rom 8:21. w18.12 22-23 ¶16-17

Umwemwu rẹ Adam ruru hwarhiẹ ewene evo rhe. Ọvo usun rẹ ewene na yen ughwu, ro djobọte orọnvwe mamọ. A mrẹ ọnana vughe womarẹ eta rẹ ọyinkọn Pọl siri, ro vwo djisẹ rẹ oborẹ Inenikristi wan nẹ otọ rẹ Urhi rẹ Mosis. O djere phephẹn nẹ ohwo rẹ ọrivẹ rọyen ghwuru sa rhoma rọvwọn, kidie ughwu yen phioba phiyọ orọnvwe. (Rom 7:1-3) Urhi rẹ Jihova vwọ kẹ ihwo rẹ Izrẹl vwẹ evuẹ evo phia kpahen orọnvwe. Kerẹ udje, ohwo rẹ Izrẹl sa rọvwọn vrẹ aye ọvo, kirobo rẹ otu evo ruru tavwen Ọghẹnẹ ke tobọ vwẹ Urhi rẹ Mosis na kẹ ayen. Ẹkẹvuọvo, Urhi na sẹro rẹ eya vẹ emọ rehẹ orọnvwe tiọyena vwo nẹ abọ rẹ ojaẹriọ. Kerẹ udje, ọshare rẹ Izrẹl da rọvwọn ọviẹn, ukuko na ọ da rhoma rọvwọn aye ọfa ba, ọ je cha vwẹrote ọdavwẹ rẹ aye rẹsosuọ na kirobo ro ruẹ jovwo. Jihova guọnọre nẹ ọ sẹro rẹ aye na je vwẹrote. (Eyan. 21:9, 10) Dede nẹ avwanre rha hẹ otọ rẹ Urhi rẹ Mosis na-a, jẹ Urhi na sa chọn avwanre uko vwọ riẹn ẹro rẹ Jihova vwo ni orọnvwe. Ọ me je nerhẹ avwanre sa vwẹ ẹro ọghanghanre vwo no. w18.12 10 ¶3; 11 ¶5-6

Ọkiọvo, Habakọk vwẹ ẹwẹn roro oborẹ Jihova cha kpahen kẹ wan, ọke rọ vwọ ta ọdavwẹ rọyen eje kẹ nu. Jihova ghwọku Habakọk fikirẹ enuebro rọyen na-a, kidie ọyen Ọsẹ rẹ arodọnvwẹ rọ je fobọ vwo ẹruọ rẹ ohwo. Ọghẹnẹ riẹnre nẹ odjadja vẹ omaemuophiyọ yen nẹrhẹ Habakọk kperi phia. Vwevunrẹ eta rọ ta kẹ ihwo rẹ Ju ri gbevwọsuọ, Jihova da vuẹ Habakọk obo re cha phia kẹrẹkpẹ. Ọkiọvo, Habakọk yen ohwo rẹsosuọ rẹ Jihova vuẹre nẹ ọke rẹ ọyen cha vwọ ghwọrọ ihwo umwemwu rẹ ọke yena sikẹri re. Jihova vuẹ Habakọk nẹ ọyen choma rọ vwọ kpahenphiyọ oyare rọyen na. Oghwọrọ rẹ ihwo umwemwu ri gbozighi na totọ re. Womarẹ ota na “vwẹ ọke wẹn,” Jihova de djephia nẹ ẹdjọeguo rọyen na cha rhe vwẹ ọke rẹ ọmraro Habakọk, yẹrẹ vwẹ ọke rẹ ihwo rẹ uvwiẹ rọyen. Ẹkpahọnphiyọ rẹ Jihova vwọphia na, ghwa dia oborẹ Habakọk rhẹro rọye-en. Ọnana yen ghini ẹkpahọnphiyọ vwọ kẹ enọ rọyen na? Oborẹ Jihova tare na cha nẹrhẹ ojaẹriọ rẹ ihwo rẹ Juda na rhoma ganphiyọ. w18.11 14-15 ¶7-8

Ẹwẹn vọ yen rhe we kpahen ihwo buebun ri ji rhi riẹn uyota na-a? Dede nẹ ọyinkọn Pọl kpo sinagọg re ghwoghwo ota kẹ ihwo rẹ Ju re riẹn kpahen Jihova nure, ọ je davwẹngba vwo ghwoghwo ota kẹ egẹdjọ. Kerẹ udje, vwẹ oyan rẹ aghwoghwo rẹsosuọ rọyen, ihwo rẹ Laikonia vwẹ Pọl vẹ Banabas vwo roro edjọ rayen re se Zus kugbe Hẹms ri wene oma kpo ihworakpọ. Kẹ, ọnana nẹrhẹ Pọl vẹ Banabas phuoma? Ayen niro nẹ ọnana omaerovwo vwo nẹ omukpahen rẹ ayen rhiẹromrẹ vwẹ irere ivẹ rẹ ayen nu rhe Laikonia? Ayen rorori nẹ ihwo buebun cha kerhọ kẹ aghwoghwo rayen fikirẹ otitivwe nana? Ẹjo, kakaka! Ugege yena, ayen da bẹre iwun rayen, ayen da họrhọ ro ohri rẹ ihwo na, kẹ ayen kperẹ: “Die ovwan vwo ruẹ ọnana? Avwanre je hẹ ihwo rhe kerẹ ovwan.”—Iruo 14:8-15. w18.09 5 ¶8-9

E che ru ewene vwẹ iroro vẹ uruemu rẹ avwanre tavwen e ki se rhiabọreyọ uyota na, ji yeren akpọ nene iwan rẹ Baibol. Vwo oniso rẹ oborẹ Pita ta kpahen ewene re che ru na: “Kerẹ emọ ri muẹ ọghọ, ovwan rha gba oma vwra urhuru sivwe rẹ ughẹghẹ re awanre-e, ẹkẹvuọvo . . . ovwan gba fon vwẹ oma rẹ ovwan vwẹ uruemu rẹ ovwan ejobi.” (1 Pita 1:14, 15) Vwọ kẹ ihwo re dia orere rẹ Kọrẹnt, ra vwọ dẹ uyota na mudiaphiyọ nẹ ayen cha davwẹngba mamọ vwo ru ewene buebun vwẹ akpeyeren rayen. Eriyin ihwo buebun nonẹna ji siobọnu erharhe uruemu rẹ ayen vwori jovwo. Pita vwẹ ẹkarophiyọ nana kẹ Inenikristi rẹ ọke rọyen: “Ọke rọ wanre na te kẹ eruo rẹ obo ri Keferi guọnọ ruẹ, ri ruẹ fanrhiẹ fanrhiẹ, urhuru sivwe, idi-ẹda, re mrẹ ọre ghọghọ, idi emuo, ẹdjọ ro gbegọ.”—1 Pita 4:3. w18.11 6 ¶13

Mavọ yen e se vwo vughe otu re guọnọ “arhọ ri bẹdẹ” na? A cha vwẹrokere Inenikristi rẹ ẹgbukpe ujorin ẹsosuọ ri womarẹ aghwoghwo vwo vughe ihwo nana. Eriyina, ofori nẹ e ru nene iji rẹ Jesu nana: “Korho korho rẹ ovwan teri, eyẹ orere, ovwan guọnọ ohwo ro fori vwọ.” (Mat. 10:11) Avwanre riẹnre dẹn nẹ ihwo re kparoma che se rhiabọreyọ ovuẹ na-a, eriyin ji te otu jẹ ẹwẹn esiri vẹ ẹguọnọ rẹ Ọghẹnẹ evwo. Avwanre guọnọ ihwo ri vwo urhurusivwe kpahen uyota na, ri vwo ẹwẹn esiri, ri ji vwomakpotọ. A sa vwẹ ẹgbaẹdavwọn rẹ avwanre vwọ vwanvwe oborẹ Jesu ruru kerẹ ọkarirhe. Ọkiọvo ọ nabọ frẹkoto guọnọ irhe sansan ri che yovwin kẹ ẹchẹ, egbara, urhekpe, vẹ erọnvwọn efa tiọyen. Ọ da mrẹ urhe ro shephiyọ kẹ obo rọ guọnọ ruẹ, o mi rhie ekpeti rọ ghwẹ vọn vẹ ekuakua ro vwo ruiruo. Womarẹ ekuakua rehẹ ekpeti na vẹ ona rọyen, ọ me nabọ kare urhe na shephiyọ obo rọ guọnọre nẹ ọ dia. Ọtiọyen avwanre je cha guọnọ ihwo ri fori, ji vwẹ ona rẹ avwanre vwo ru ayen phiyọ idibo rẹ Jesu.—Mat. 28:19, 20. w18.10 12 ¶3-4

Oghwoghwota na re se Filip nabọ phi uvi rẹ udje phiyotọ ro vwo muomaphiyọ iruo rẹ aghwoghwo rọyen ọke rẹ ẹdia rọyen vwo wene. Re vwo hwe Stivin nu, omukpahen ọgangan da vwomaphia vwẹ Jerusalẹm. Ọke yena ji Filip riavwerhen rẹ uphẹn rẹ ẹga kpokpọ ro rhiephiyọ kẹ. (Iruo 6:1-6) Filip vwẹ abọ mu oma ọke rẹ idibo rẹ Jesu vwọ hra ro irere na eje-e. O da yanran re ghwoghwo vwẹ orere rẹ Sameria rọ vọnre vẹ ihwo re guọnọ nyo iyẹnrẹn esiri na. (Mat. 10:5; Iruo 8:1) Kidie nẹ Filip guọnọ kpo kasan kasan rẹ ẹwẹn ọfuanfon na dje kẹ, Jihova de jo kpo ẹkuotọ rẹ iyẹnrẹn esiri na ji rhi te-e. Ihwo rẹ Sameria nabọ vwo ọdavwaro kpahen ẹgbaẹdavwọn rọyen ro vwo ghwoghwo ota kẹ ayen, rẹ ihwo rẹ Ju vwo utuoma kpahen. Kọyensorọ “otu buebu” vwọ nabọ kerhọ kẹ! (Iruo 8:6-8) Filip muomaphiyọ iruo rẹ aghwoghwo rọyen na. Ukuotọ rọyen, ọ vẹ orua rọyen da mrẹ ebruphiyọ rẹ Jihova.—Iruo 21:8, 9. w18.10 30 ¶14-16

Ẹdẹ ọvo rẹ Jesu vwọ hẹ Dikapolis, e de mu “odierhọn ọvo vwo rhe e ji bru awẹrẹnvwe rọye-e.” (Mak 7:31-35) Ukperẹ Jesu vwo sivwon vwẹ azagba, o de “sio nẹ ohri rẹ otu na” re sivwin vwẹ odjahọn. Diesorọ? Ọ sa dianẹ o niroso nẹ oma vo ọshare na fikirẹ ẹdia rọyen. Oniso nana yen nẹrhẹ Jesu muo kpo asan rọ djahenre re sivwin. Vwọrẹ uyota, avwanre che se sivwin ihwo vwọrẹ igbevwunu-u. Jẹ, e se dje erorokẹ phia kpahen ọdavwẹ rẹ iniọvo rẹ avwanre. Jesu dje erorokẹ kẹ ọshare na, kidie o vwo oniso rẹ ọdavwẹ rọyen. Ọtiọyena, gbe dje erorokẹ phia kẹ ihwo re kpakore vẹ otu rẹ oma rayen ganre-e. Ẹguọnọ yen e vwo vughe ukoko rẹ Inenikristi rẹ uyota, ọ dia uvi rẹ ọrhuẹrẹphiyotọ rẹ ayen vwori-i. (Jọn 13:34, 35) Ẹguọnọ yena yen nẹrhẹ avwanre sa vwẹ ukẹcha kẹ ihwo re kpakore kugbe otu rẹ oma rayen ganre-e, vwo kpo uyono vẹ aghwoghwo. Avwanre chọn ayen uko vwo ruẹ te asan rẹ ẹgba rayen teri.—Mat. 13:23. w18.09 29-30 ¶7-8

Jihova Ọghẹnẹ vẹ Jesu kristi rọ tan avwanre hirhe na vwẹ ẹro ọghanghanre vwọ nẹ avwanre ohwo vuọvo. (Gal. 2:20) Avwanre vwo ẹguọnọ rẹ iniọvo rẹ avwanre mamọ. Ọtiọyena, avwanre guọnọ dje erorokẹ vẹ ẹguọnọ kẹ ayen. Avwanre da guọnọ dia uvi rẹ ọbọngan kẹ ihwo efa, “e gbe jẹn avwanre nene idjerhe rẹ ufuoma rere avwanre ru esegbuyota rẹ ohwohwo gan.” (Rom 14:19) Avwanre rhẹro rẹ akpọ kpokpọ rẹ avwanre da cha vrabọ rẹ omaemuophiyọ kakare! Ọga, ofovwin, ughwu, omukpahen, ebẹnbẹn rẹ orua, vẹ ofudjevwe rha cha dia-a. Usuon rẹ ẹgbukpe uriorin rẹ Jesu de vwoba nu, ihworakpọ ke cha dia gbagba. Jihova ko rhiabọreyọ otu re wanvrẹ ọdavwini rọ koba na kerẹ emọ rọyen vwẹ otọrakpọ obonẹ. Kẹ ayen “che vwo urinrin rẹ egbemọphẹ rẹ emọ rẹ Ọghẹnẹ.” (Rom 8:21) E gbe jẹ avwanre eje bọn ihwo efa gan vwọrẹ ẹguọnọ, rere a chọn ohwohwo uko vwọ ro akpọ kpokpọ na. w18.09 14 ¶10; 16 ¶18

Eyono rẹ Ota rẹ Ọghẹnẹ ghwa dia isese ghevweghe-e, yẹrẹ re vwo jokaphiyọ ẹkpahọnphiyọ rẹ enọ-ọ. Ọke re de ruẹ uyono, avwanre nabọ frẹkotọ guọnọ oborẹ asan re yono na ta kpahen Jihova komobọ, eriyin ji te obo rọ ta kpahen idjerhe vẹ iroro rọyen. Vwọba, avwanre je cha davwẹngba vwo vwo ẹruọ rẹ oboresorọ Jihova vwọ vuẹ avwanre nẹ e ru erọnvwọn evo, ji kẹnoma kẹ efa. Ukuotọ rọyen, avwanre mi ji roro kpahen ewene re che ru vwẹ iroro vẹ uruemu rẹ avwanre. Dede nẹ ọ dia ọke vuọvo yen e che vwo roro kpahen enana eje-e, jẹ erere herọ siẹrẹ a da vwẹ ubro rẹ ọke ra ghwọrọ phiyọ uyono na, vwọ nabọ roro kokodo kpahen obo re seri. (1 Tim. 4:15) Avwanre da vwẹ ọkieje vwo roro kpahen Ota rẹ Ọghẹnẹ, ọ cha nẹrhẹ ‘o mu avwanre ẹro nẹ’ iroro rẹ Jihova pha gbagba. Ọyena ko che mu avwanre vwo rhiabọreyọ iroro rẹ Jihova, je vwẹ ẹro rẹ Jihova vwo nẹ emu, ji vwo no. Ọke yena, ka sa tanẹ iroro rẹ udu rẹ avwanre ‘weneri,’ kidie avwanre rhi vwo iroro kpokpọ re. (Rom 12:2) Ememerha na, iroro rẹ avwanre vẹ ọ rẹ Jihova me rhe dia ọvo. w18.11 24 ¶5-6

Vwẹ ẹgbukpe ujorin ẹsosuọ, Pọl da tanẹ ọyen vẹ iniọvo evo “iruiruo rẹ Ọghẹnẹ” kidie ayen kọn je kuẹ ame kuẹ ubi rẹ Uvie na. (1 Kọr. 3:6) Avwanre je sa dia “iruiruo rẹ Ọghẹnẹ” nonẹna, siẹrẹ a da vwẹ ẹgba rẹ avwanre vẹ oborẹ avwanre vwori, vwọba ruiruo rẹ Uvie na. Ọyena ghini uphẹn oghẹresan! Oma cha nabọ vwerhen avwanre siẹrẹ a da vwẹ ọke vẹ ẹgba rẹ avwanre vwo ruiruo rẹ aghwoghwo vẹ odibo egbe na. Buebun rẹ iniọvo ri vwẹ Baibol vwo yono ihwo re, sa vuẹ wẹ omavwerhovwẹn rẹ ayen mrẹ vwevunrẹ iruo na. Ọ ghene kẹ ohwo aghọghọ siẹrẹ a da mrẹ oborẹ oma vwerhen ihwo na te, ọke rẹ ayen de rhi vwo ẹruọ rẹ Baibol na, ru esegbuyota rayen gan, ji ton aghwoghwo phiyọ. Ọtiọyen oma je nabọ vwerhen Jesu ọke rẹ idibo 70 ro ji kpo aghwoghwo na vwo “rhivwi rhe vẹ aghọghọ” fikirẹ erere ro nẹ evunrẹ iruo na rhe.—Luk 10:17-21. w18.08 20 ¶11-12

Imuoshọ herọ siẹrẹ avwanre da vwẹroso iroro romobọ rẹ avwanre gan nọ. Ọ je sa nẹrhẹ e roro nẹ a sa vwẹ ọhọ romobọ rẹ avwanre vwọ rhuẹrẹ ẹdia evo phiyọ kpakpata, ọ da tobọ dianẹ avwanre ghwa riẹn uyota na eje-e. Ẹdia ọfa rọ da dia bẹnbẹn re vwo brorhiẹn ro shephiyọ, ọyen siẹrẹ oniọvo de gbe avwanre ku. A da tẹnrovi ogbeku na, ọ cha nẹrhẹ a vwẹ ẹro ọchọchọ vwo ni oniọvo na. Ọke yena, e de ghwe nyo orharhe ikuegbe kpahen oniọvo tiọyena, a rha cha nọ enọ tavwen e ki vwo imuẹro kpahọ-ọn. Die yen ọnana yono avwanre? E de phi iniọvo rẹ avwanre phiyọ evun, ọ sa nẹrhẹ e brorhiẹn hwe ayen siẹrẹ ota de she, dede nẹ a ghwa riẹn uyota na-a. (1 Tim. 6:4, 5) A da kẹnoma kẹ omaẹriọ, ke se bru omamọ orhiẹn. Ukperẹ omaẹriọ, e jẹ avwanre karophiyọ nẹ Jihova vwẹ iji kẹ avwanre nẹ e vwo ẹguọnọ rẹ iniọvo rẹ avwanre, e mi ji vwo ghovwo ayen nẹ otọ rẹ ubiudu rhe.—Kọl. 3:12-14. w18.08 6-7 ¶15, 18

Jihova yen ma ihworakpọ, ọtiọyena ọyen vwo avwanre eje. (Une 100:3; Ẹvwọ. 4:11) Ẹkẹvuọvo, Jihova sane ihwo evo nẹ ohri rẹ ihworakpọ eje nẹ ayen dia erọyen vwẹ idjerhe oghẹresan. Kerẹ udje, Une Rẹ Ejiro 135 vwo djisẹ rẹ idibo rẹ Jihova ri fuevun vwẹ ẹgborho rẹ Izrẹl awanre, o de se ayen “emuobọ rọye.” (Une 135:4) A je mraro vwẹ ọbe rẹ Hosia nẹ ihwo evo re dia ihwo rẹ Izrẹ-ẹl cha dia ihwo rẹ Ọghẹnẹ. (Hos. 2:23) Aroẹmrẹ rẹ Hosia na rugba ọke rẹ Jihova vwọ sane ihwo evo re dia ihwo rẹ Ju-u, vwọba ihwo ri che nene Jesu sun. (Iruo 10:45; Rom 9:23-26) “Ẹgborho ọfuanfon” nana, eyen “ihwo robọ rẹ Ọghẹnẹ” vwẹ idjerhe oghẹresan, kidie ẹwẹn ọfuanfon rẹ Ọghẹnẹ yen a vwọ jẹ ayen reyọ nẹ ayen che kpo obo odjuvwu. (1 Pita 2:9, 10) Kẹ Inenikristi ichekọ ri fuevun ri vwo iphiẹrophiyọ rẹ ayen vwọ dia otọrakpọ na vwo? Jihova ji se ayen “ihwo” rọyen, ihwo rọ “jẹreyọ.”—Aiz. 65:22. w18.07 22 ¶1-2

Inenikristi uyota davwẹngba vwọ vwẹrokerẹ udje ogbagba rẹ Jesu kpahen oborẹ ohworakpọ sa vwọ dia ọkokẹ. (Mat. 20:28) E jẹ ohwo vuọvo nọ oma rọyen, ‘Mi se nene udje rẹ Jesu kpẹkpẹkpẹ vwọ vrẹ obo ri jovwo?’ (1 Pita 2:21) Avwanre da davwẹngba vwọ vwẹrokere udje rẹ Jihova vẹ Jesu Kristi, vwo ọdavwẹ rẹ ihwo efa, ji guọnọ idjerhe ra sa vwọ chọn ayen uko, ọ cha nẹrhẹ e se vwo ẹroesiri rẹ Ọghẹnẹ. Jesu kpe itẹ rẹ ohwo rẹ Sameria vwo djephia nẹ ọyen guọnọre nẹ idibo rọyen davwẹngba rayen eje vwọ chọn ihwo efa uko, ji te erhorha dede. (Luk 10:29-37) Wọ je karophiyọ onọ rọ nẹrhẹ Jesu kpe itẹ rẹ ohwo rẹ Sameria na? Ohwo rẹ Ju ọvo nọrọ nẹ, “kono hẹ ọrivẹ mẹ?” Ẹkpahọnphiyọ rẹ Jesu vwọphia, djerephia nẹ siẹrẹ avwanre da guọnọ vwo ẹroesiri rẹ Jihova, kẹ avwanre ruẹse kẹ ihwo kirobo rẹ ohwo rẹ Sameria na ruru. w18.08 19 ¶5-6

Kẹ Meri rọ vwẹrote Jesu vwo? Jihova ji brọghọ phiyọ oma? E. E si eta rọyen vẹ obo ro ruru phiyọ Baibol na. O muẹro nẹ Meri se nene Jesu yan oyan rẹ aghwoghwo rọyen rẹ ẹgbukpe erha gbubro na-a. Ọ sa dianẹ ọ domaji vwẹ Nazarẹt, kidie ayeuku yen o ruẹ. Ẹkẹvuọvo, dede nẹ o rhiẹromrẹ erọnvwọn buebun rẹ Jesu ruru-u, jẹ ọ herọ ọke rẹ Jesu vwo ghwu. (Jọn 19:26) Ukuko na, Meri de ji kuomakugbe idibo na vwẹ Jerusalẹm ọke re vwo ku ẹwẹn ọfuanfon ku ayen vwẹ Pẹntikọst. (Iruo 1:13, 14) Ọ họhọre nẹ Meri jẹ ọvo usun rẹ ihwo ra jẹreyọ ẹdẹ yena. Ọ da dia ọtiọyen, kọyen o vwo uphẹn ro vwo nene Jesu dia obo odjuvwu rhirin bẹdẹ. Ọyena ghene omamọ rẹ osaẹhwa vwọ kẹ evun-ẹfuọn rọyen! w18.07 9 ¶11; 10 ¶14

Jesu vwẹ odjekẹ rẹ Baibol vwo yono idibo rọyen nẹ uruemu rayen sa ghwa erhuvwu yẹrẹ umiovwo rhe. Kerẹ udje, o yono ayen nẹ ophu sa so ozighi, iroro rẹ ọfanrhiẹn sa nẹrhẹ ohwo gbe igberadja. (Mat. 5:21, 22, 27, 28) Rere e se vwo vwo ẹwẹn obrorhiẹn ra riẹn yono, ofori nẹ a yan nene odjekẹ rẹ Jihova, ukuotọ rọyen, ke che brorhiẹn rọ cha ghwa urinrin rhe Jihova. Vwẹ ẹdia evo, Inenikristi ivẹ ri vwo ẹwẹn obrorhiẹn ra vwẹ Baibol yono se brorhiẹn rọ fẹnẹre. E jẹ a fuẹrẹn ota ro shekpahen udi ẹda. Baibol na gha udi ẹda-a, ẹkẹvuọvo, o si avwanre orhọ kpahen udi ẹda vroma. (Isẹ 20:1; 1 Tim. 3:8) Ọyena ko mudiaphiyọ nẹ siẹrẹ Onenikristi rha da udi vroma-a, o rhe fo nẹ o roro kpahen erọnvwọn efa tavwen o ki brorhiẹ-ẹn? Ẹjo, kakaka. Ọ da tobọ dianẹ ẹwẹn obrorhiẹn rọyen kpokpiro-o, o ji fo nẹ o roro kpahen ẹwẹn obrorhiẹn rẹ ihwo efa. w18.06 18 ¶10-11

Jesu si idibo rọyen orhọ kpahen ihwo rẹ Sadiusi. Kidie nẹ a kẹ ihwo rẹ Sadiusi ẹdia ride vwẹ usuon rẹ Rom na, ayen rha guọnọ nẹ ihwo rẹ Ju broma reyọ-ọ. Jesu vwẹ orhọ-esio kẹ idibo rọyen nẹ, ayen kẹnoma kẹ iyono yẹrẹ iphuephu rẹ ẹko erha nana. (Mat. 16:6, 12) Ọ vwerhoma dẹn nẹ Jesu vwẹ orhọ-esio nana phia ọke ro vwo siomareyọ nẹ ohri rẹ ihwo re guọnọ reyọ vwo mu ovie nu. Ozighi yen nẹ obuko rọyen cha kọke kọke rẹ ẹga da vwomaba usuon. Jesu vuẹ idibo rọyen nẹ ayen ka ẹbẹre vuọvo rẹ usuon rẹ akpọ na-a. Ọnana ghwa emuọvo rọ dia oboresorọ ilori rẹ irherẹn na vẹ otu rẹ Farisi na vwọ guọnọ Jesu hwe. Oshọ muẹ ayen nẹ ihwo na cha kerhọ kẹ Jesu, ẹdia rayen me rhe va ayen obọ. Ayen da ta: “Avwanre da yan jovwo enẹ, kohwo kohwo che segbuyota, ihwo ri Rom ke cha rhe rhe guọghọ asan ọfuanfon rẹ avwanre kugbe ẹgborho rẹ avwanre.” (Jọn 11:48) Ọtiọyena, Kaifas rọ dia Orherẹn Rode na da kobaro rẹ iroroẹjẹ re vwo hwe Jesu.—Jọn 11:49-53; 18:14. w18.06 6-7 ¶12-13

Orọnvwọn ọfa rẹ Eshu vwọ kpahen ufi kẹ ihwo yen uruemu rẹ orhan. Womarẹ ẹga rẹ efian kugbe ifimu vẹ uhworo, Eshu kọ nẹrhẹ ihwo vwo urhurusivwe rẹ ayen vwo yono kpahen emekashe rẹ Idẹbono. Obo ra mrẹ vwẹ ifimu, ividio gemu, kugbe uhworo vẹ ekuakua efa tiọyen, nẹrhẹ ihwo roro nẹ erere herọ siẹrẹ e de nene emekashe rẹ Idẹbono ru kugbe. Mavọ yen a sa vwọ kẹnoma kẹ ufi nana? Wo ghwe roro nẹ ukoko rẹ Jihova cha vuẹ avwanre ifimu vẹ uhworo na eje ro fori nẹ a kẹnoma kẹ-ẹ. Ohwo vuọvo yen cha vwẹ Baibol na vwo yono ẹwẹn obrorhiẹn rọyen. (Hib. 5:14) E se brorhiẹn rẹ aghwanre siẹrẹ a da vwẹ uchebro rẹ ọyinkọn Pọl vwọphia vwẹ isese ri nonẹna vwo ruiruo. Nọ oma wẹn: ‘Ughe vẹ uhworo mẹ sa nẹrhẹ a tanẹ ẹguọnọ rẹ unu diodi yen mi vwori? Orivwinbrura mẹ vẹ ihwo mi vwẹ Baibol vwo yono sa ghene rhọnvwe nẹ mi ruẹ nene oborẹ mi ghwoghwo siẹrẹ ayen da mrẹ oka rẹ ughe mi nẹ?’ Avwanre de ruẹ nene oborẹ avwanre ghwoghwo, ọ cha bẹn re vwo she phiyọ ufi rẹ Idẹbono.—1 Jọn 3:18. w18.05 25 ¶13

Mavọ yen a sa vwọ vwẹrokere Pọl? Ẹsosuọ, e jẹ avwanre vwo owenvwe ra vwọ guọnọ ihwo “buebu re ve arhọ ri bẹdẹ na kẹ.” Ọrivẹ, e ja nẹrhovwo rhe Jihova nẹ o rhie ubiudu rẹ ihwo ri vwo ẹwẹn esiri rere ayen se vwo rhiabọreyọ ovuẹ rẹ Uvie na. (Iruo 13:48; 16:14) Silvana rọ ga kerẹ ọkobaro vwẹ ikpe ri joma te 30 re na da ta: “Tavwen mi ki kpo ota eghwoghwo, me nẹrhovwo rhe Jihova nẹ ọ chọn vwẹ uko vwọ vwẹ ẹro abavo vwo ni iruo na.” O ji fo nẹ a nẹrhovwo rhe Ọghẹnẹ nẹ ọ vwẹ emekashe rọyen vwo sun avwanre kpo asan ra da sa mrẹ ihwo re guọnọ vwo arhọ. (Mat. 10:11-13; Ẹvwọ. 14:6) Robert rọ ga kerẹ ọkobaro vwẹ ikpe re vrẹ 30 re, da ta: “Ọ vwerhoma nẹ mẹ vẹ emekashe re riẹn obo re phia vwẹ akpeyeren rẹ ihwo mi brẹ ra na yen wian kuẹgbe.” Ọrerha, ofori nẹ a vwẹ ẹro abavo vwo ni ihwo na. Carl rọ dia ọkpako ukoko, da ta: “Me nabọ frẹkotọ guọnọ obo re cha chọn vwẹ uko vwọ riẹn ẹwẹn ro rhe ihwo na, erọnvwọn kerẹ emehwẹ rẹ ayen hwẹre, oborẹ opharọ rayen sasa te, yẹrẹ oghẹrẹ enọ rẹ ayen nọre, sa chọn vwẹ uko vwọ riẹn ọnana.” Vwọrẹ uyota, avwanre sa mọ ibi vẹ erhiọri kirobo rẹ Pọl ruru. w18.05 15 ¶13; 16 ¶15

Ọ bọn avwanre gan siẹrẹ e de nyo ikuegbe rẹ evun-efuọn rẹ ihwo rẹ avwanre vwẹ uchebro kẹ. Ọyinkọn Jọn rhiẹromrẹ oka rẹ ọbọngan tiọyen, kọyensorọ o vwo si: “O rhe vwo omavwerhe ọfa mi vwo nẹ ọnana-a, ri mi vwo nyo nẹ emọ mẹ nene uyota na.” (3 Jọn 4) Ekobaro buebun sa vuẹ wẹ oborẹ oma vwerhen ayen te, ọke rẹ ayen de nyo ikuegbe rẹ ọyọnregan rẹ ihwo rẹ ayen vwẹ ukẹcha kẹ vwọ mrẹ ukoko na vughe; ọkiọvo evo usun rayen tobọ je ga kerẹ ekobaro. Wọ sa vwẹ ọbọngan kẹ ọkobaro ro muomaphiyọ, siẹrẹ wọ da chọn uko vwọ karophiyọ erọnvwọn evo rọ riavwerhen rọyen vwẹ ọke rọ wanre. Iniruo okinriariẹ buebun tare nẹ oma vwerhen ayen vẹ eya rayen ọke rẹ ayen de se ọbe uyeren rẹ ukoko rẹ ayen kinri si vwo rhe ayen. Ọtiọyen oma ji vwerhen ekpako, imishọnare, ekobaro, kugbe iniọvo re ga vwẹ Bẹtẹl, ọke re de jiri ayen fikirẹ iruo rẹ ayen ruẹ vwẹ ẹga rẹ Jihova. w18.04 23 ¶14-15

Solomọn nyẹme-e, ọ da rọvwọn eya 700. Vwọba, o de ji vwo esen 300. (1 Ivie 11:3) Buebun rẹ eya na egọedjọ re dia ihwo rẹ Izrẹ-ẹl. Ọtiọyena, Solomọn de churhi rẹ Ọghẹnẹ rọ vwọ rọvwọn eya erhorha. (Urhi 7:3, 4) Ememerha na, jẹ ẹmienyo da rhe nẹrhẹ Solomọn ru imwemwu egangan. Ọ da bọn agbada kẹ ẹdjọ rẹ aye re se Ashtarọt vẹ ẹdjọ ọfa re se Shemosh. O de nene eya rọyen ga edjọ. Ugbenu ọvo ro hirharoku Jerusalẹm rọ dia orere rẹ uwevwin rẹ ẹga rẹ Jihova hepha na yen ọ bọn egbada na phiyọ! (1 Ivie 11:5-8; 2 Ivie 23:13) Ọkiọvo Solomọn phiẹn oma rọyen vwo roro nẹ Jihova che kuẹrofia kẹ oruchọ rọyen kidie nẹ o ji ze izobo vwẹ uwevwin rẹ ẹga na. Ẹkẹvuọvo, Jihova kuẹrofia kẹ oruchọ-ọ. w18.07 18-19 ¶7-9

Evo usun rẹ “ibiri rẹ erhanre” rẹ Eshu sa vwo rhe avwanre yen efian rọ hra nene asan eje nẹ Jihova davwerhọ rẹ avwanre-e. Ida rọ dia ọmọtẹ rẹ ẹgbukpe ihwe gbẹ irhinrin, nẹ oma rọyen kueku. Ọ da ta: “Kọke kọke yen mi vwo roro nẹ Jihova sherabọ kẹ vwẹ, ọ cha sa dia ugbeyan mẹ-ẹ.” Kẹ, die yen chọn rọ uko vwo phi iroro ọchọchọ nana kparobọ? “Uyono ẹra nabọ bọn esegbuyota mẹ gan. Ọke ri jovwo, mi ghwe chidia ọrobọ mẹ, me kpahanphiyo enọ-ọ, kidie mi niro nẹ iniọvo na che se vwo omavwerhovwẹn rẹ ayen vwo nyo obo me cha ta-a. Jẹ enẹna, me nabọ muegbe mi ki kpo uyono, me je davwẹngba vwọ kpahanphiyọ enọ te omarẹ abọ ivẹ yẹrẹ erha.” Ikuegbe rẹ Ida na chọn avwanre uko vwọ mrẹ ẹkpo ọghanghanre ọvo vughe: O ghwe vwo asan rẹ ekpọfia rẹ isodje hẹrẹ te, jẹ ekpọfia rẹ esegbuyota rẹ avwanre dia ọtiọye-en. Onenikristi ọvuọvo vwo ẹgba ro vwo ru ekpọfia rọyen hẹrephiyọ yẹrẹ ruo hanvwephiyọ. (Mat. 14:31; 2 Tẹsa. 1:3) Eriyina, e jẹ ohwo vuọvo ru esegbuyota rọyen ganphiyọ! w18.05 29-30 ¶12-14

Noso nẹ otọ na kpogho nu tavwen ọshare rọ vwẹrote uwodi na ki wene ẹwẹn, ji nokpẹn rẹ ukẹcha. (Iruo 16:25-34) Vwẹ idjerhe vuọvo na, ihwo buebun re rhọnvwa kerhọ kẹ ovuẹ rẹ Baibol na jovwo-o ruẹ ọtiọyen enẹna, fikirẹ emu rẹ kpregede rẹ ayen rhiẹromrẹ vwẹ akpeyeren. Ọkiọvo, itu evo muomaphiyọ fikirẹ iruo ro ghwru va ayen abọ. Efa muomaphiyọ fikirẹ emiavwe ọgangan ro mu ayen kpregede, yẹrẹ ohwo rẹ ayen vwo ẹguọnọ kpahen ro ghwuru. Emu ebrabra tiọyena nẹrhẹ ihwo evo nọ enọ ri shekpahen akpeyeren, dede nẹ ayen ji rhi mu ẹwẹn kpahen enọ tiọyen dẹvo-o. Ọkiọvo ayen se roro, ‘Kidie mi ru me vwọ rhọ?’ Ọnana sa nẹrhẹ ayen kerhọ kẹ ovuẹ rẹ iphiẹrophiyọ rẹ avwanre ghwa bru ayen ra, vwẹ obọ rẹsosuọ vwẹ akpeyeren rayen. Ọtiọyena, a da fuevun ruiruo na, ka sa vwẹ ovuẹ rẹ onẹrhẹvwe na kẹ ayen vwẹ ọke rẹ ayen ma vwọ guọnọ.—Aiz. 61:1. w18.05 19-20 ¶10-12

Nonẹna, Idẹbono rhuẹro rẹ ihwo buebun, ayen tobọ riẹn nẹ ayen eviẹn vwọ kẹ ẹga rẹ efian, ẹvwọtua rẹ ekuakua rẹ akpeyeren, kugbe usuon rẹ akpọ na-a. (2 Kọr. 4:4) Avwanre vwo okpuphẹn ra vwọ vwẹrokere Jesu vwọ chọn ihwo uko vwọ riẹn Jihova rọ dia Ọghẹnẹ rẹ egbomọphẹ, ji vwẹ ẹga vwọ kẹ. (Mat. 28:19, 20) Iruo nana ghwa lọhọ-ọ, ọ vọnre vẹ egbabọse buebun. Vwẹ ẹkuotọ evo, ihwo rhọnvwa kerhọ-ọ, evo tobọ djoma. Ọtiọyena, e jẹ avwanre ohwo vuọvo nọ oma rọyen onọ nana: ‘Me sa vwẹ egbomọphẹ mẹ vwọ nabọ bicha iruo rẹ Uvie na?’ Ọ vwerhoma ra vwọ mrẹ idibo rẹ Ọghẹnẹ buebun ri ruẹ akpeyeren rayen lọhọ rere ayen sa vwọ ga kerẹ ekobaro. (1 Kọr. 9:19, 23) Evo ga kerẹ ekobaro vwẹ ukoko rayen, efa kpo asan ra da ma guọnọ ukẹcha. Ọnana djerephia nẹ ihwo buebun vwẹ egbomọphẹ rayen vwọ ga Jihova vwẹ idjerhe rẹ aghwanre!—Une 110:3. w18.04 11-12 ¶13-14