May

Die yen emiọvwọn se ru vwọ chọn emọ rayen uko vwo vwo ẹguọnọ ri Jihova? Kerẹ Manoa, Yare ukẹcha ri Jihova womarẹ ẹrhovwo. Vwọba, vwẹ udje wẹn vwo yono emọ wẹn. Oborẹ wọ ta se djobọte emọ wẹn, ẹkẹvuọvo uruemu wẹn yen che mẹ te ayen ẹwẹn. O muẹro nẹ Josẹf vẹ Meri phi omamọ rẹ udje phiyotọ kẹ Jesu vẹ emọ rayen ichekọ. Josẹf wianre gangan ọ sa vwọ vwẹrote orua rọyen. Vwọba, o phiuduphiyọ orua rọyen awọ rẹ ayen vwọ ga Jihova. (Urhi 4:9, 10) “Kukpe kukpe” yen Josẹf vwo mu orua rọyen kpo Jerusalẹm vwẹ ọke rẹ orẹ rẹ Ọwanvrẹ na. (Luk 2:41, 42) Esẹ evo vwẹ ọke yena se roro nẹ ọ cha reyọ ọke vẹ igho re vwo mu orua na eje kpo oyan yena. O muẹro nẹ Josẹf vwo ọdavwẹ rẹ Ota rẹ Ọghẹnẹ, o ji yono emọ rọyen vwo ru ọtiọyen. Meri je riẹn isiesi ọfuanfon na dẹn. Ọ je vwẹ eta vẹ uruemu rọyen vwo yono emọ rọyen vwo vwo ẹguọnọ rẹ Ota rẹ Ọghẹnẹ. w19.12 24-25 ¶9-12

Avwanre mrẹ odjephia rẹ ẹguọnọ ri Jihova siẹrẹ avwanre de roro kpahen oborẹ Jihova ruru ọke rẹ Adam vwọ churhi rọyen. Adam vwọ churhi rẹ Ọsẹ rọyen nu, ọ rha dia ẹbẹre ọvo rẹ orua ri Jihova-a, ọtiọyen ji te emọ rọyen. (Rom 5:12) Ẹkẹvuọvo, Jihova jowọ rọ vwọ chọn emọ rẹ Adam uko. Jihova vwẹ oja re Adam, ẹkẹvuọvo o veri nẹ ọyen cha chọn emọ rẹ Adam uko. Ugege yena, Ọghẹnẹ de ve nẹ ọyen che rhiabọreyọ ihworakpọ ri nyupho rọyen ro orua rọyen. (Jẹn. 3:15; Rom 8:20, 21) Jihova ru ọrhuẹrẹphiyotọ nana fikirẹ izobo rẹ ọtanhirhe rẹ ọmọ rọyen ro vwo ẹguọnọ kpahen mamọ na. Jihova dje obo ro vwo ẹguọnọ rẹ avwanre te womarẹ Ọmọ rọyen rọ vwọ kẹ avwanre. (Jọn 3:16) Ọyehẹ Ọsẹ ro me yovwin. O nyo ẹrhovwo rẹ avwanre je vwẹrote ọdavwẹ rẹ ugboma rẹ avwanre kugbe obo ra guọnọre ra sa vwọ fuevun ga. O yono avwanre ji biẹcha avwanre. O ji che ku ebruphiyọ gbidiki ku avwanre vwẹ obaro na. Oma vwerhen avwanre mamọ ra vwọ riẹn nẹ Ọsẹ rẹ avwanre na vwo ẹguọnọ rẹ avwanre je davwerhọn rẹ avwanre eje! w20.02 6 ¶16-17; 7 ¶20

Wọ ro ẹnwan ọgangan jovwo re? Ọkiọvo wo ru ọtiọyen fikirẹ eta yẹrẹ uruemu rẹ ihwo efa, yẹrẹ fikirẹ oborẹ owẹ komobọ ruru yẹrẹ tare. Kerẹ udje, ọ sa dianẹ wo ru umwemwu ọvo jovwo, enẹna ẹwẹn wẹn ko kpokpo uwe nẹ Jihova che se vwo ghovwo uwe-e. Ma bra kparobọ, ẹnwan wẹn na sa nẹrhẹ wo roro nẹ wo rhe vwo esegbuyota-a, nẹ owẹwẹ orharhe rẹ ohwo. E je roro kpahen idje rẹ ihwo evo vwẹ Baibol na. Hanah rọ dia oni rẹ ọmraro Samuẹl, ọyen aye ro vwo esegbuyota ọgangan. Dedena, ẹwẹn rọyen hra totọ ọke rẹ ohwo rẹ orua rọyen ọvo vwọ reyọ vwọ jehwẹ. (1 Sam. 1:7) Ọyinkọn Pọl, ọyen ohwo ro vwo esegbuyota ọgangan, ẹkẹvuọvo, ọ ro “ẹnwan” fikirẹ ukoko na ejobi. (2 Kọr. 11:28) Ovie Devid vwo esegbuyota ọgangan, ọtiọyena, Jihova de vwo ẹguọnọ rọyen mamọ. (Iruo 13:22) Dedena, Devid ru erọnvwọn evo ri kpokpiro ẹwẹn. (Une 38:4) Jihova bru ayen ọvuọvo uche je nẹrhẹ ayen vwo ufuoma. E jẹ avwanre fuẹrẹn obo re se yono vwo nẹ udje rayen. w20.02 20 ¶1-2

Omaẹvwọkpahotọ yen wọ vwọ vuẹ Jihova vwẹ ẹrhovwo ro nẹ otọ udu rhe nẹ ọyen wọ cha ga bẹdẹ. Wọ da vwomakpahotọ kẹ Ọghẹnẹ, kọyen wọ “sen” oma wẹn. Nẹ ọke yena yanran, Jihova kọyen ri vwo we, ọnana okpuphẹn rode. (Rom 14:8) Wo ve kẹ nẹ, ghwe nẹ ọke yena yanran wo che mu ẹwẹn phiyọ eruo rẹ ọhọre rọyen ukperẹ ọ romobọ wẹn. Omaẹvwọkpahotọ wẹn ọyen ive rẹ owẹ komobọ ve kẹ Ọghẹnẹ. Jihova gba ohwo ve ive nana-a. Ẹkẹvuọvo, siẹrẹ e de ve ive nana, ofori nẹ a yanmuo. (Une 116:12, 14) Owẹ vẹ Jihova ọvo yen riẹn kpahen omaẹvwọkpahotọ wẹn. Ẹkẹvuọvo omaebromaphiyame, azagba yen e de ruo vwẹ isikoko yẹrẹ eghwẹkoko. Ẹdẹ ru wo bromaphiyame yen ihwo vwọ riẹn nẹ wọ vwomakpahotọ kẹ Jihova jovwore. Ọtiọyena, omaebrophiyame nẹrhẹ ihwo riẹn nẹ wọ vwẹ udu, iroro vẹ ẹgba wẹn eje vwo vwo ẹguọnọ ri Jihova, nẹ wo ji brorhiẹn wọ vwọ ga bẹdẹ.—Mak 12:30. w20.03 9 ¶4-5

Eshu ruo rere ẹro rẹ Jihova vwo ni emu vwọ chọrọ ihwo ẹro. Iyinkọn rẹ Jesu vwo ghwu nu, ihwo evo ri se oma rayen Inenikristi de yono iyono rẹ efian. (Iruo 20:29, 30) ) Inenikristi rẹ efian nana da nẹrhẹ ọ bẹn rere ihwo vwo vughe Ọghẹnẹ rẹ uyota ọvuọvo na. Kerẹ udje, ayen de si odẹ rẹ Ọghẹnẹ ni Baibol rayen, odova kerẹ “Ọrovwohwo” kọyen ayen si phiyọ. Ọnana da nẹrhẹ ọ bẹn rẹ ihwo ri se Baibol na vwọ mrẹ oborẹ Jihova vwọ fẹnẹ “irivwohwo” efa re djunute vwẹ Baibol na. (1 Kọr. 8:5) “Ọrovwohwo” yen ayen vwo se Jihova vẹ Jesu, rọ nẹrhẹ ọ dia bẹnbẹn ihwo vwọ riẹn nẹ Jihova vẹ Jesu dia ọvuọvo-o. (Jọn 17:3) Otighi nana toroba oboresorọ uyono rẹ Eghẹnẹ Erha ri Kuomagbe Dia Ọvo rọhẹ Baibol na-a, vwọ vwomaphia. Fikirẹ ọyena, ihwo buebun de rhi vwo imuẹro nẹ e che se vughe Ọghẹnẹ-ẹ. Ọyena efian!—Iruo 17:27. w19.06 5 ¶11

Idjerhe ọvo re se vwo ruiruo rẹ aghwoghwo na gba, ọyen re vwo ru ona rẹ aghwoghwo rẹ avwanre yovwẹnphiyọ. (Isẹ 1:5; 1 Tim. 4:13, 15) Ọyen uphẹn oghẹresan rẹ avwanre vẹ Jihova vwọ dia “iruiruo”! (1 Kọr. 3:9) Wo de “vughe obo ri yovwiri” je tẹnrovi iruo rẹ Uvie na, ku wọ sa “ga Ọrovwohwo vẹ evuavwerhe!” (Fil. 1:10; Une 100:2) Kerẹ odibo rẹ Ọghẹnẹ, jo muwẹro nẹ ọ cha kẹ wẹ ogangan wo se vwo ruiruo rẹ aghwoghwo wẹn gba, o toro egbabọse ru wo hirharoku-u. (2 Kọr. 4:1, 7; 6:4) Ọtiọyena, o toro ẹdia ru wọ hepha-a, wọ sa “mrẹ obo [wọ] vwọ yeyan” siẹrẹ wo de muomaphiyọ iruo rẹ aghwoghwo na vọnvọn. (Gal. 6:4) Wọ da nabọ ruiruo rẹ aghwoghwo na gba, ku wo se djephia nẹ wo vwo ẹguọnọ rẹ Jihova kugbe irivẹ wẹn. “Wo de ru ọtiọye ku wo sivwi oma wẹn kugbe ayen otu ri nyo we.”—1 Tim. 4:16. w19.04 6 ¶15; 7 ¶17

Idjerhe ọvo kiriguo rẹ Eshu vẹ emekashe rọyen vwọ phiẹn ihwo yen orhan. Ihwo re vwaren orhan tare nẹ ayen riẹn erọnvwọn, ji ru erọnvwọn rẹ ihworakpọ ghevweghe che se ru-u. Kerẹ udje, evo tare nẹ ayen sa ta oborẹ obaro na cha dia womarẹ epha-ẹbọ yẹrẹ e vwo ni isio. Efa se ru kerẹsiẹ a da mrẹ nẹ ayen vẹ ihwo ri ghwuru ta ota. Evo vwaran orhan yẹrẹ ru imajiki, ayen je davwẹngba vwọ reyọ ẹgba na vwọ ruan ihwo efa. Ehiahiẹ ọvo re ruru vwẹ ẹkuotọ 18 vwẹ Latin America vẹ Caribbean djerephia nẹ asan rẹ ihwo erha hepha, ohwo ọvo vwo esegbuyota kpahen imajiki, orhan ẹvwarọ, kugbe epha-ẹbọ. Uchunu rẹ ihwo ọtiọyena yen ji vwo esegbuyota nẹ avwanre se nene ihwo ri ghwuru ta ota. Ehiahiẹ ọfa re ruru vwẹ ẹkuotọ 18 vwẹ Africa djerephia nẹ, vwẹ asan rẹ ihwo ivẹ hepha, ohwo ọvo vwo esegbuyota kpahen orhan. Vwọrẹ uyota, o toro asan rẹ avwanre dia-a, ofori nẹ avwanre kẹnoma kẹ orhan. w19.04 20-21 ¶3-4

Jihova ọghẹnẹ vwo utuoma kpahen koka koka rẹ umwemwu. (Une 5:4-6) Uruemu re vwo gbe omotete ẹgua yen o me vwo utuoma kpahen! Iseri rẹ Jihova ji vwo utuoma kpahen uruemu nana. Siẹrẹ uruemu nana da vwomaphia vwevunrẹ ukoko na, e che ru emu kpahọn kpakpata. (Rom 12:9) Koka koka rẹ ẹgua re gbe vwọso emọ reyọ vwọso “urhi ri Kristi” na! (Gal. 6:2) E mu urhi rẹ Kristi na, rọ dia kemu kemu rẹ Jesu yonori womarẹ ota vẹ uruemu, kpahen ẹguọnọ, urhi na ji titi orhiẹn-ebro abavo. Inenikristi nene emọ rayen yerẹn vwọrẹ ẹguọnọ kugbe idjerhe rẹ ẹwẹn rayen se vwo totọ kidie ayen ruẹ nene urhi nana. E vwo gbe omotete ẹgua, ọyen orharhe rẹ uruemu rọ brare mamọ, ọ nẹrhẹ ọmọ roro nẹ ohwo ọvuọvo vwo ẹguọnọ rọye-en. Ọ da ohwo mamọ nẹ iniọvo evo dede tobọ vwobọ vwọ re. Diesorọ? Kidie “ihwo umwemwu” buẹnphiyọ, evo davwẹngba rẹ ayen vwọ ro evunrẹ ukoko na. (2 Tim. 3:13) Vwọba, ihwo evo ri se oma rayen iniọvo, rhi vwo urhurusivwe ọgangan kpahen ojevwe rẹ ugboma, ọtiọyena ayen de gbe imitete ẹgua. w19.05 8 ¶1-3

Ohwo rẹ ẹwẹn rọyen kuọrọnre se ni oma rọyen nẹ ọyen fo ohwo rọ nẹrhovwo rhe Jihova-a. Avwanre da guọnọ vwẹ uchebro vwọ kẹ ohwo ọtiọyena, avwanre vẹ ohwo na sa nẹrhovwo kugbe, e mi se odẹ rọyen vwẹ ẹrhovwo na. Vwevunrẹ ẹrhovwo na, avwanre se djunute oborẹ ohwo na ghanre te kẹ avwanre vẹ ukoko na. Avwanre sa vuẹ Jihova nẹ o bru ogodẹ rọyen rọ pha ghanghanre na uche. Ẹrhovwo tiọyena sa nẹrhẹ ẹwẹn rẹ ohwo na totọ. Roro te tavwen wọ ke ta ota. Eta re roro te-e so ọmiaovwẹ. Ẹkẹvuọvo, eta esiri sivwin ohwo. (Isẹ 12:18) Ọtiọyena, nẹrhovwo rhe Jihova nẹ ọ chọn wẹ uko vwọ ta eta esiri. Karophiyọ nẹ o vwo ota vuọvo ro vwo ẹgba te eta rẹ Jihova re si phiyọ Baibol na-a. (Hib. 4:12) Siẹrẹ avwanre de bru ihwo efa uche, jẹ avwanre nẹrhẹ ayen karophiyọ nẹ Jihova vwo ẹguọnọ rayen. E jẹ avwanre ji karophiyọ nẹ Jihova ọyen Ọghẹnẹ rẹ orhiẹ-ebro abavo. Jihova riẹn ohwo ọvuọvo re gbe ẹgua. Ọ mrẹ erọnvwọn eje, ọtiọyena o che gboja kẹ irumwemwu re rhọnvwe kurhẹriẹ-ẹ.—Ukeri 14:18. w19.05 18 ¶18; 19 ¶19, 21

Eshu guọnọre nẹ avwanre vwo ẹguọnọ rẹ Jihova-a. Rere o se vwo ru ọnana, kọ davwẹngba ro vwo wene iroro rẹ avwanre, o mi ji suon. Ọ davwẹngba ọ vwọ phiẹn avwanre womarẹ erọnvwọn ri je avwanre. (Kọl. 2:4) Eshu ghene sa phiẹn avwanre? E! Karophiyọ nẹ ọ dia egọẹdjọ yen Pọl si orhọesio rọhẹ Kọlose 2:8 vwo rhe-e. Inenikristi ra vwẹ ẹwẹn ọfuanfuon jẹreyọ nure yen o siro vwo rhe. (Kọl. 1:2, 5) Inenikristi rẹ ọke yena hirharoku imuoshọ rẹ ophiẹnvwe, jẹ ẹdia rẹ avwanre hepha yen ma bra. (1 Kọr. 10:12) Diesorọ? A djẹ Eshu nẹ odjuvwu rhe otọrakpọ na, ọtiọyena ọ davwẹngba rọ sa vwọ phiẹn idibo rẹ Jihova re fuevun. (Ẹvwọ. 12:9, 12, 17) Vwọba, avwanre yerẹn vwẹ ọke rẹ ihwo imwemwu vwo “miovwẹ phihọ.”—2 Tim. 3:1, 13. w19.06 2 ¶1-2

Oshọ mu Ilaija ọke rẹ Aye Ovie Jẹzibẹl vwọ djuguegue muo nẹ o che hwe. Ọ da djẹ kpo Beer-sheba. Ofu de dje te ẹdia rọ vwọ tanẹ “ọye ghwe ghwu siẹvo.” Diesorọ ofu vwo dje? Ilaija gbare-e, ọyen “ohwo kirobo rẹ avwanre epha na.” (Jems 5:17) Ọ sa dianẹ ẹnwan muro rọ, oma je rhọ. Ọhọhọ nẹ Ilaija roro nẹ ẹgbaẹdavwọn ro vwo titi ẹga rẹ uyota ofefe, ihwo ri Izrẹl rhọnvwe ru ewene vuọvo-o. O ji se roro nẹ ọyen ọvo yen je ga Jihova. (1 Ivie 18:3, 4, 13; 19:10, 14) Jihova vwo ẹruọ rẹ ebẹnbẹn rẹ Ilaija hirharoku na ọrha tobọ ghwọkuo rọvwọ ta obo re nẹrhẹ ofu dje phia-a. Ukperẹ ọtiọyen, ọ da bọn gan. (1 Ivie 19:5-7) Ọke vwọ yanran na, Jihova da kpọ iroro rẹ Ilaija vi womarẹ ẹgba rọyen ro dje kẹ. Jihova da je vuẹ nẹ ihwo ri te 7,000, re je ga Baal dẹvo-o, je herọ. (1 Ivie 19:11-18) Vwẹ idjerhe nana yen Jihova vwo djephia nẹ o vwo ẹguọnọ rẹ Ilaija. w19.06 15-16 ¶5-6

Wọ kparoma-a. Avwanre cha kẹnoma kẹ ebẹnbẹn siẹrẹ e de nene odjekẹ rẹ iniọvo ri muwan re vwo mu. Kerẹ udje, vwẹ ẹkuotọ ra da dobọ rẹ aghwoghwo na ji, iniọvo re vwo mu vwẹ odjekẹ kẹ ighwoghwota na nẹ ayen vwẹ ẹbe ra teyenphia vwo ruiruo vwẹ aghwoghwo-o. Ẹkẹvuọvo, oniọvo ọshare ọvo rọ dia ọkobaro rhọnvwe nene odjekẹ na-a, o de phi ẹbe phiyọ ada. Die kọyen phiare? O kriri-i, ọ vẹ iniọvo evo ghwa vwọ dobọ rẹ aghwoghwo ji nu, elọkpa da yọnrọn ayen. Ọ sa dianẹ elọkpa na vwo oniso rẹ ihwo rẹ ayen ghare ẹbe kẹ, ayen da reyọ ẹbe na eje mie ihwo na. Die yen avwanre yono nẹ obo re phiare na? O fori nẹ avwanre nene odjekẹ ọ da tobọ dianẹ o shephiyọ kẹ avwanre-e. Ọkieje yen Jihova che vwo bruba kẹ avwanre siẹrẹ e de nene odjekẹ rẹ iniọvo rẹ vwo mu na.—Hib. 13:7, 17. w19.07 12 ¶17

Vwẹ ason rọ koba tavwen Ọrovwavwanre Jesu ki ghwu, ọ tare nẹ e che vwo utuoma kpahen ihwo re jẹ ojẹ ayen vwọ dia idibo rọyen. (Jọn 17:14) Nẹ ọke yena rhi te ọke nana yen ihwo re vwọso ẹga rẹ uyota vwo muẹkpahan Inenikristi rẹ uyota. Oba rẹ akpọ nana vwo siẹkẹrẹ na, avwanre rhẹro nẹ omukpahen ro che nẹ obọ rẹ ivwighrẹn avwanre rhe cha ganphiyọ. (Mat. 24:9) Die yen fori nẹ e ru asaọkiephana rere e se vwo muegbe hẹrhẹ omukpahen? Ofori nẹ avwanre roro kpahen emu ebrabra eje re sa phia kẹ avwanre-e. Avwanre de ru ọtiọyen, ọ sa nẹrhẹ avwanre ro ẹnwan. Ọ sa nẹrhẹ oshọ mu avwanre te ẹdia ra da dobọ rẹ ẹga ri Jihova ji tavwen omukpahen na ke tobọ rhe. (Isẹ 12:25; 17:22) Oshọ ọyen emu ọvo kiriguo rẹ “Idẹbono” rọ dia “ukọn” na reyọ vwo ruiruo vwọso avwanre. (1 Pita 5:8, 9) Ọtiọyena, ofori nẹ a kpuriẹnphiyọ oyerinkugbe rẹ avwanre vẹ Jihova asaọkiephana. w19.07 2 ¶1-3

Oma vwerhen iyinkọn na mamọ ọke rẹ ayen vwo koko vwẹ enu rẹ ugbenu ọvo. Jesu ru ọrhuẹrẹphiyotọ nẹ ayen vwoma vwẹ etiyin, ọke ra vwọ rhọvwọn nushi nu. (Mat. 28:16) Ọ sa dianẹ ọke yena yen ọ vwọ “vwẹ oma phia kẹ imoni ri bunọ ujori iyori ẹsiẹvo.” (1 Kọr. 15:6) Diesorọ Jesu vwọ vuẹ idibo na nẹ ayen vwoma vwẹ etiyin? Rọ vwọ kẹ ayen iji nana: “Ovwan gba yanran, rere we re gbe idibo rẹ ihworakpọ na ejobi.” (Mat. 28:18-20) Idibo ri Jesu ri nyo eta rọyen ọke yena da rhe dia ẹbẹre ọvo rẹ ukoko rẹ Inenikristi rẹ ẹgbukpe ujorin rẹsosuọ. Ra vwọ chọn ihwo efa uko vwọ dia idibo ri Jesu yen ọdavwẹ rẹsosuọ rẹ ukoko yena. Ukoko rẹ Inenikristi rẹ uyota buebun hẹ akpọeje nonẹna. Ọdavwẹ vuọvo yena yen ji rhe ayen. w19.07 14 ¶1-2

Oniruo okinriariẹ ọvo vwẹ Norway tare nẹ ọke buebun, ihwo re guọnọ ta ota kpahen Ọghẹnẹ-ẹ, vwo owenvwe rẹ ayen vwọ ta ota kpahen obo re phia vwẹ akpọ na. O de yenre ihwo na nu, ọ me ta: “Wo rorori nẹ e se yerin omamọ rẹ akpọ vwẹ obaro na? Iphiẹrophiyọ avwanre hẹ obọ rẹ isun, egbaerianriẹn, gbanẹ ohwo ọfa?” Ọ da nabọ kerhọ nu, ko se, yẹrẹ rionbọ kpo ẹkpo ri Baibol rọ ta ota kpahen omamọ rẹ akpeyeren vwẹ obaro na. Oma vwerhen otu evo ọke rẹ ayen de nyo nẹ Baibol na tare nẹ akpọ na cha dia bẹdẹ, ihwo esiri je cha dia evun rọyen bẹdẹ. (Une 37:29) Ofori nẹ avwanre reyọ ena sansan vwo ghwoghwo ota kẹ ihwo rẹ avwanre mrẹre. Diesorọ? Kidie uyovwinrota rọ vwerhen ohwo ọvo oma, se jẹ ohwo ọfa ẹvwerhọn. Evo guọnọ ta ota kpahen Ọghẹnẹ yẹrẹ Baibol na, ẹkẹvuọvo, efa guọnọ ta ota kpahen erọnvwọn efa tavwen. Obo rọ wanre eje, avwanre davwẹngba vwo ghwoghwo kẹ kohwo kohwo. (Rom 1:14-16.) Jihova yen nẹrhẹ uyota na djẹ vwẹ ubiudu rẹ ihwo ri vwo ẹwẹn esiri.—1 Kọr. 3:6, 7. w19.07 22-23 ¶10-11

Ẹguọnọ rẹ Ọghẹnẹ vwo kpahen avwanre che mu avwanre vwo vwo ẹguọnọ rẹ iniọvo rẹ avwanre. (1 Jọn 4:20, 21) E se roro nẹ ọ pha lọlọhọ re vwo vwo ẹguọnọ rẹ iniọvo rehẹ ukoko na, kidie avwanre eje yen ga Jihova, je davwẹngba vwọ vwẹrokere iruemu rọyen. Avwanre vwẹrokere Jesu rọ vwẹ fikirẹ ẹguọnọ vwọ vwẹ arhọ rọyen kpahotọ kẹ avwanre. Ẹkẹvuọvo, ọ sa dia bẹnbẹn re vwo nene iji rọ tare nẹ avwanre vwo ẹguọnọ rẹ ohwohwo. Eyudia vẹ Sintiki eyen iniọvo eya ri vwo oruru ri nene ọyinkọn Pọl ga “kpẹkpẹkpẹ.” Ẹkẹvuọvo, ọ sa dianẹ ayen vwẹ uphẹn kẹ ẹghwọ nẹ o phi ohra phiyọ oyerinkugbe rayen. Vwẹ ileta ri Pọl si rhe ukoko rẹ iniọvo eya nana hepha, o de djunute odẹ ri Eyudia vẹ Sintiki, je vwẹ uchebro kẹ ayen nẹ ayen “ku evun gbe.” (Fil. 4:2, 3) Pọl niro nẹ o ji fo rọ vwọ vwẹ uchebro nana kẹ ukoko na eje, rọ vwọ ta: “Ovwan ru emu ejobi wẹ guẹ iguegu-un eyẹ a nọ enanọ-ọ.”—Fil. 2:14. w19.08 9 ¶6-7

Ọ vwerhoma nẹ ikoko buebun vẹ iniọvo ọvuọvo davwẹngba rayen eje vwọ vwẹ ukẹcha kẹ iniọvo rehẹ ẹga ọkieje rere ayen sa vwọ daji iruo na. Ayen ru ọnana womarẹ uchebro vẹ ekuakua rẹ ugboma rẹ ayen vwọ kẹ iniọvo nana. Ayen je vwẹ ukẹcha vwọ kẹ ihwo rẹ orua rẹ iniọvo nana ri dia awusheri. E de ji iniọvo rehẹ ẹga ọkieje rhe ukoko wẹn, wo roro nẹ orọnvwọn ọvo ayen ru chọ yẹrẹ umwemwu ayen ruru yen sorọ-ọ. Ukperẹ ọtiọyen, vwẹ ukẹcha kẹ ayen rere ewene na sa vwọ lọhọ kẹ ayen. Nabọ dede ayen, ji kpẹvwẹ ayen fikirẹ iruo rẹ ayen ru re, ọ da tobọ dianẹ jẹ omakpokpọ evwo cha sa nẹrhẹ ayen ru te oborẹ ayen ruẹ jovwo-o. Sikẹrẹ ayen. Yono vwo nẹ udje, erianriẹn vẹ oborẹ ayen rhiẹromrẹ re. Iniọvo re wene iruo rayen sa guọnọ ukẹcha wẹn vwọ mrẹ asan rayen cha dia, oborẹ ayen cha fa oma wan, iruo rẹ ayen che ru, yẹrẹ erọnvwọn efa. w19.08 23-24 ¶12-13

Gọg cha vwẹroso “ugbobọ” rọyen yẹrẹ ituofovwin rọyen. (2 Ikun 32:8) Avwanre cha vwẹroso Jihova, rọ sa dia emu rẹ ẹkpa vwẹ ẹro rẹ ihwo rẹ ẹgborho na. Kidie Babilọn Rode vwo ẹgba, jẹ eghẹnẹ rọyen na se sivwon nẹ abọ rẹ “eranvwe ọvwavware” na vẹ “ighoro ihwe” rọyen na-a! (Ẹvwọ. 17:16) Gọg che roro nẹ ọ cha lọhọ vwọ kẹ ọyen ro vwo phi idibo rẹ Ọghẹnẹ kparobọ. Ọtiọyena, kọ cha vwọso idibo ri Jihova “kerẹsiẹ rẹ egho . . . de rhurhu otọ na.” Ẹkẹvuọvo, Gọg kọ cha rhe mrẹvughe nẹ ufi yen ọyen she ro na. Kọ je cha mrẹvughe nẹ kerẹ Fero vwẹ Abadi Ọvwavware na, Jihova yen ọyen họnra vwọsua na. (Eyan. 14:1-4; Izi. 38:3, 4, 18, 21-23) Jesu vẹ ituofovwin rẹ odjuvwu rọyen cha họnre vwọ kẹ ihwo rẹ Ọghẹnẹ, je ghwọrọ ituofovwin ri Gọg. (Ẹvwọ. 19:11, 14, 15) Ẹkẹvuọvo, die yen cha phia kẹ Eshu rọ dia ọvweghrẹn rẹsosuọ ri Jihova, rọ reyọ efian rọyen vwọ phiẹn ẹgborho na vwo kpo ofovwin rẹ Amagidọn? Jesu che do vẹ emekashe rọyen phiyọ ukpotọ ro jẹ oba evwo, etiyin kọyen a cha kanre ayen phiyọ ẹgbukpe uriorin.—Ẹvwọ. 20:1-3. w19.09 11-12 ¶14-15

Avwanre rhẹro rẹ erọnvwọn iyoyovwin ri Jihova ve kẹ avwanre. Ẹkẹvuọvo, obo re rhẹro rọyen na rha fobọ phia-a, ọ sa nẹrhẹ oruru avwanre shekpotọ. Ẹwẹn avwanre sa tobọ kuọrọn dede. (Isẹ 13:12) Ọnana yen ghwa obo re phia kẹ iniọvo rẹ avwanre vwẹ ukpe ri 1914. Vwẹ ọke yena, buebun rẹ Inenikristi ra vwẹ ẹwẹn ọfuanfon jẹreyọ rhẹro rọyen nẹ ayen che kpo odjuvwu vwẹ ukpe ri 1914. Ẹkẹvuọvo, oborẹ ayen rhẹro rọyen na rha phia na-a, die kọyen iniọvo ri fuevun na ruru? Ayen vwẹ erhiorin djonẹ rẹ arhọ, na kidie oborẹ ayen tẹnrovi ọyen ayen vwọ fuevun ru ọhọre rẹ Ọghẹnẹ, ọ dia re vwo kpo odjuvwu-u. Ayen brorhiẹn ayen vwọ vwẹ erhiorin djonẹ na te oba. Aphro herọ-ọ, wo rhẹro rẹ ọke ri Jihova che vwo ru odẹ rọyen fon, kpare ọrho rọyen kpenu, ji ru ive rọyen eje gba. Jẹ o muwẹro nẹ erọnvwọn nana eje che rugba re kpai vwẹ ọke ri Jihova veri. Bẹsiẹ ọke yena vwo te, muomaphiyọ ẹga ri Jihova, e jẹ obo re rhẹro rọyen rọ je phia-a nẹrhẹ ẹwẹn rẹ avwanre kuọrọ-ọn. w19.08 4-5 ¶9-10

Nọ oma wẹn: ‘A riẹn vwẹ phiyọ ohwo ro ruẹ dẹndẹn, rọ je vwomakpotọ? Mi vwomakpotọ ruiruo ri ihwo ni fiemu-u? Mi ruẹse kẹ ihwo?’ Oma vwerhen Jesu ro vwo yono idibo rọyen, o ji ruo vwẹ idjerhe rẹ ẹwẹn rayen vwo totọ. (Luk 10:1, 19-21) Ọ vwẹ uphẹn kẹ ayen nẹ ayen nọ enọ, ọ je guọnọ riẹn obo rehẹ ẹwẹn rayen. (Mat. 16:13-16) Kirobo rẹ oma fuẹn ekankọn ra sẹro rọyen vwo nẹ aruọke ro shephiyọ-ọ ye, ọtiọyen oma ji fun idibo ri Jesu. Ayen nabọ vwo ẹruọ rẹ iyono rọyen, ji mọ emamọ womarẹ iruo esiri. A vwẹ ogangan rẹ usuon vwọ kẹ wẹ? Ọ da dia ọtiọyen gba nọ oma wẹn: ‘Mavọ yen me vẹ ihwo yerẹn wan vwẹ obi iruo yẹrẹ uwevwin? Mẹvwẹ ohwo rẹ ufuoma? Mi vwẹ uphẹn kẹ ihwo nẹ ayen nọ enọ? Me kerhọ rẹ iroroẹjẹ rayen?’ Avwanre guọnọ dia kerẹ ihwo ri Farisi na re rhọnvwa nẹ ihwo nọ ayen enọ-ọ, ri ji muẹkpahen ihwo ri vwo iroro rọ fẹnẹ ọrayen.—Mak 3:1-6; Jọn 9:29-34. w19.09 20 ¶1; 23 ¶9-11

Isun rẹ akpọ na reyọ eta tiọyena vwo ruiruo siẹrẹ ayen da ta ota kpahen oborẹ ẹkuotọ sansan se vwo ru kugbe. Ẹkẹvuọvo, ukperi rẹ “ufuoma kugbe ofuvwegbe” ri Baibol djisẹ rọyen na fẹnẹre. Diesorọ? Ọnana da rhe phia, ihwo che roro nẹ isun rẹ akpọ na ghene hwarhiẹ ufuoma rhire. Ẹkẹvuọvo, “ukpokpogho” rode na me rhe tonphiyọ “siẹvuọvo na ughwu mi rhi she teye ayen kpregede. (Mat. 24:21) Avwanre riẹn obo re cha nẹrhẹ isun rẹ akpọ na kperi ukperi yena yẹrẹ oborẹ ayen che kpere wa-an. Avwanre je riẹn sẹ e che kperi ukperi nana ọke sansan yẹrẹ ofuọvo goi-i. Otoro obo re phiare-e, e jẹ avwanre gbe ughẹnghẹn roro nẹ isun rẹ akpọ na sa ghwa ufuoma rhe akpọeje-e. Ukperẹ ọtiọyen, ọnana yen oka nẹ “ẹdẹ rẹ Ọrovwohwo” na cha tonphiyọ re.—1 Tẹsa. 5:2. w19.10 8-9 ¶3-4

Ofovwin rẹ Amagidọn kọyen che phi oba phiyọ eyeren nana kare kare. Ẹkẹvuọvo, e jẹ oshọ mu avwanre-e. Diesorọ? Kidie, Jihova yen che phi ofovwin na. (Isẹ 1:33; Izi. 38:18-20; Zek. 14:3) Jihova da ghwa vwẹ iji na kẹ Jesu nu, Jesu ko che sun isodje rẹ obodjuvwu kpo ofovwin na. Ihwo 144,000 na vẹ buebun rẹ emekashe ke cha vwomaba Jesu. Ayen che koko họnre vwọso Eshu, emekashe rọyen kugbe ivwighrẹn rẹ Ọghẹnẹ rehẹ otọrakpọ na. (Ẹvwọ. 6:2; 17:14) Jihova vwẹ imuẹro nana kẹ avwanre: “Orọvwọ re duvwu vwọ so owẹ se yovwi-i.” (Aiz. 54:17) “Urogho rẹ ihwo” ri fuevun ga Jihova che sivwin wan “ukpokpogho rode na!” Ayen cha fuevun ga Jihova ọkieje. (Ẹvwọ. 7:9, 13-17) Baibol na kẹ avwanre imuẹro nẹ e che vwo usivwin vwẹ obaro na! Avwanre riẹnre nẹ “Ọrovwohwo na sẹro rẹ ihwo ri sere gbuyota.” (Une 31:23) Oma cha vwerhen ihwo ri vwo ẹguọnọ ri Jihova ri ji jiro, ọke ri Jihova da cha kpare odẹ ọfuanfon rọyen na kpenu.—Izi. 38:23. w19.10 18-19 ¶17-18

Avwanre vwọ ro “oba rẹ ẹdẹ” na kodophiyọ na, e se hirharoku edavwini egangan. (2 Tim. 3:1) Kerẹ udje, ọke re vwo votu nu vwẹ ẹkuotọ ọvo vwẹ Africa, ozighi vẹ ofovwin da rhe vwomaphia. Ọ vrẹ emeranvwe esan soso rẹ iniọvo na vwọ dia uwevwin fikirẹ ofovwin na. Die yen chọn ayen uko vwẹ ọke ọgangan yena? Iniọvo evo da djẹ kpo iwevwin rẹ iniọvo efa rẹ ofovwin na te ekogho raye-en. Oniọvo ọvo da ta: “Ọke rẹ emu na vwọphia, me da rhe mrẹ ọghanrovwẹ re vwo vwo igbeyan. Avwanre bọn ohwohwo gan vwẹ uvwre ọke yena.” Ọke rẹ “ukpokpogho rode” na da rhe tonphiyọ, avwanre cha riẹn ọghanrovwẹ rẹ uvi rẹ igbeyan. (Ẹvwọ. 7:14) Ọtiọyena, ọnana emu okpakpa ra vwọ bọn uvi rẹ oyerinkugbe vẹ iniọvo avwanre enẹna. (1 Pita 4:7, 8) Diesorọ? Kidie ivwighrẹn rẹ avwanre cha davwẹngba vwọ so ohẹriẹ phiyọ uvwre rẹ avwanre womarẹ evuẹ rẹ efian. Ayen cha davwẹngba vwọ nẹrhẹ avwanre reyọ vwọso ohwohwo. Ẹkẹvuọvo, ayen che se phikparobọ-ọ. Ayen cha sa guọghọ oyerinkugbe rẹ ẹguọnọ rọhẹ uvwre rẹ avwanre-e. w19.11 2 ¶1-2; 7 ¶19

Eshu rọ dia “ọsẹ rẹ ofian” na reyọ ihwo rehẹ otọ rọyen vwọ hrahra efian kpahen Jihova vẹ iniọvo rẹ avwanre. (Jọn 8:44) Kerẹ udje, ihwo ri she nẹ ukoko na re vwọsuọ hrahra efian kpahen ukoko ri Jihova vwẹ intanẹti, ekpeti rẹ ughe vẹ erọnvwọn efa re ghwa iyẹnrẹn. Efian tiọyena je usun rẹ “ibiri rẹ erhanre” rẹ Idẹbono. Die yen e ru siẹrẹ ohwo da ta eta rẹ ofian tiọyen kẹ avwanre? Avwanre cha kerhọ-ọ! Diesorọ? Kidie avwanre vwo esegbuyota kpahen Jihova je vwẹroso iniọvo rẹ avwanre. Vwọrẹ uyota, avwanre kẹnoma kẹ ihwo tiọyena. O vwo erọnvwọn vuọvo rọ cha nẹrhẹ avwanre nene ayen phraphro-o, yẹrẹ nẹrhẹ esegbuyota wẹn kuọrọn. Wọ kẹnoma kẹ ji kuerhọ kufia kẹ efian rẹ ihwo ri she nẹ ukoko na re vwọsuọ hrahra? Ọyena shephiyọ. Ẹkẹvuọvo, ofori nẹ e nomaso kidie Eshu ji vwo erọnvwọn efa rọ vwọ họnre avwanre. w19.11 15 ¶8; 16 ¶11

Fuẹrẹn iroro ro mu we vwo brorhiẹn. Jihova guọnọre nẹ avwanre fuevun vwẹ kemu kemu. Ọtiọyena e de che brorhiẹn, ofori nẹ avwanre sianro ta uyota kẹ oma rẹ avwanre vẹ ihwo efa kpahen iroro ro mu avwanre vwo brorhiẹn na. Ọ rha dia ọtiọye-en, ọ sa bẹn re vwo ru nene orhiẹn ebro rẹ avwanre. Kerẹ udje, eghene ọshare se brorhiẹn rọ vwọ dia ọkobaro. Jẹ ọke evo vwọ wan nu, kọ phara ro vwo ru inọke rọyen gba, ọtiọyena ọ rha mrẹ aghọghọ vwẹ iruo aghwoghwo na-a. Ọkiọvo, o se roro nẹ owenvwe rọ vwọ nẹrhẹ oma vwerhen Jihova yen muro vwọ dia ọkobaro. Ẹkẹvuọvo, ọ sa dianẹ obo ri muro vwọ dia ọkobaro yen ọ vwọ nẹrhẹ oma vwerhen oni vẹ ọsẹ rọyen yẹrẹ ihwo efa. Roro kpahen ohwo ra vwẹ Baibol yono ro brorhiẹn nẹ ọyen cha dobọ rẹ isigati ephopho ji. Dede nẹ ọlọhọre-e, ọ kẹnoma kẹ omarẹ udughwrẹn ọvo fi ivẹ, ẹkẹvuọvo, ọ da rhoma she ruọ. Ukuko rọyen, o da rhe dobọ rẹ isigati ephopho na ji! Ẹguọnọ ro vwo kpahen Jihova vẹ owenvwe ro vwo ru ọhọre rọyen yen chọn rọ uko vwo phi orharhe uruemu yena kparobọ.—Kọl. 1:10; 3:23. w19.11 27 ¶9; 29 ¶10

Ọyinkọn Pọl vwo imuẹro nẹ ọyen cha djonẹ rẹ arhọ na te oba. Kerẹ ọvo usun rẹ ihwo ra jẹreyọ, o vwo iphiẹrophiyọ rẹ “osa” rẹ use rẹ obo odjuvwu na. Ẹkẹvuọvo, ọ mrẹvughe nẹ ofori nẹ ọyen “pharha” o se vwo vwo osa na. (Fil. 3:14) Pọl vwẹ udje ọvwevwerhen ọvo vwọ vwẹ ukẹcha kẹ iniọvo rehẹ Filipae vwọ tẹnrovi osa na. Pọl karophiyọ iniọvo rehẹ Filipae nẹ ayen emotọ rẹ odjuvwu. (Fil. 3:20) Diesorọ ayen vwọ karophiyọ ọyena? Vwẹ ọke yena, ra vwọ dia ọmotọ ri Rom pha ghanghanre mamọ. Ẹkẹvuọvo, Inenikristi ra vwẹ ẹwẹn ọfuanfon jẹreyọ emotọ rẹ usuon ro me yovwin kparobọ, rọ cha nẹrhẹ ayen mrẹ ebruphiyọ gbidiki. A cha sa vwẹ ẹdia rẹ ọmotọ ri Rom vwọ vwanvwẹ ọ rẹ odjuvwu! Inenikristi ra jẹreyọ eyen emamọ rẹ udje ri ihwo re pharha vwọ kẹ osa rẹ arhọ ri bẹdẹ vwẹ odjuvwu. w19.08 6 ¶14-15

Ugbomọphẹ nana rho nọ ọ ro te ihwo obọ vwẹ ukpe rẹ Aghọghọ na! (Liv. 25:8-12) Kerẹ udje, ọviẹn ro hirhiephiyọ ọmuvwiẹ vwẹ ukpe Aghọghọ na je sa rhoma dia ọviẹn ji ghwu dede. Vwẹ Pẹntikọst 33 C.E., Jihova de ku ẹwẹn ọfuanfon ku iyinkọn na kugbe eya vẹ eshare efa ri fuevun. Ọ da dẹ ayen reyọ kerẹ emọ hẹrhẹ ọke rọ cha vwọ rhọvwọn ayen nushi kpo odjuvwu re nene Jesu sun. (Rom 8:2, 15-17) Enana yen ihwo ẹsosuọ re mrẹ erere vwo nẹ aghwoghwo yena ri Jesu ghwoghwori vwẹ sinagọg vwẹ Nazarẹt na. (Luk 4:16-19, 21) Ihwo nana rha dia eviẹn kẹ iyono vẹ irueru rẹ efian rẹ ilori ẹga ri Ju yono-o. Ọghẹnẹ ji si ayen vwo nẹ ọviẹn rẹ umwemwu ro suẹn kpo ughwu na. Ọrhuẹrẹphiyotọ ri Jihova ruru rọ vwọ kẹ ihwo ọmuvwiẹ rọ tonphiyọ vwẹ ọke ro vwo ku ẹwẹn ọfuanfon ku idibo na vwẹ 33 C.E., che vwoba vwẹ okuphiyọ rẹ Usuon rẹ Ẹgbukpe Uriorin ri Jesu na. w19.12 11 ¶11-12

Emiọvwon, vwẹ ukẹcha vwọ kẹ emọ wẹn vwọ sane emamọ rẹ igbeyan. Ofori nẹ emiọvwọn riẹn igbeyan rẹ emọ rayen vẹ oborẹ ayen ruẹ. Ọtiọyen ji te igbeyan rẹ ayen nene ta ota vwẹ ifonu. Uruemu rẹ igbeyan tiọyena sa phoriẹn mu emọ na. Emiọvwọn buebun davwẹngba vwo ru ọrhuẹrẹphiyotọ rere emọ rayen sa vwọ ghwọrọ ọke vẹ iniọvo re nabọ yerin tedje vwevunrẹ ukoko na. Kerẹ udje, ọkieje yen N’Déni vẹ aye rọyen Bomine re dia Côte d’Ivoire vwo durhie oniruo okinriariẹ nẹ e rhe dia uwevwin rayen. N’Déni da ta: “Udje rayen na djobọte ọmọshare avwanre kpako mamọ. Ọ tuẹn iruo rẹ ọkobaro phiyọ, enẹna ọ rhe dia ọchuko oniruo okinriariẹ re.” O che yovwin siẹrẹ emiọvwọn da fọbọ ton uyono rẹ emọ na phiyọ. (Isẹ 22:6) Roro kpahen Timoti. Oni ri Timoti otete re se Lọis kugbe oni rọyen rode re se Yunaisi yono Timoti “nẹ ọke emọ” rhe.—2 Tim. 1:5; 3:15. w19.12 25 ¶14; 26 ¶16-17

Dia ugbeyan ra sa vwẹrosua. Kerẹ udje, avwanre de ve ive ra vwọ chọn iniọvo rẹ avwanre uko, ofori nẹ a yanmuo. (Mat. 5:37; Luk 16:10) Ẹwẹn rẹ iniọvo avwanre che totọ siẹrẹ ayen da riẹn nẹ ayen sa vwẹroso avwanre. Oniọvo aye ọvo dje oboresorọ. Ọ da ta: “Udu rhe che bru we kakaka-a, kidie wọ riẹnre nẹ oniọvo na cha yanmu ive ro veri rọ vwọ vwẹ ukẹcha kẹ wẹ.” Ẹwẹn rẹ ihwo ri hirharokuẹ edavwini yẹrẹ i re kuphiyotọ se totọ siẹrẹ ayen da ta evun kẹ ohwo rẹ ayen vwẹroso. Ihwo ke sa vwẹroso avwanre, ofori nẹ e vwo uruemu rẹ odirin. Ọke rẹ ọshare ri Zhanna vwọ yan jovwo, igbeyan rọ vwẹroso rọ ta ẹwẹn rọyen kẹ yen bruro uche ẹwẹn rọyen vwo totọ. Ọ da ta: “Ayen nabọ frẹkotọ kerhọ mẹ dede nẹ mi dje eta evo ẹvwẹvwanriẹ.” Wọ je sa dia uvi rẹ ugbeyan siẹrẹ wọ da nabo kerhọ. w20.01 10-11 ¶9-11

Vwevunrẹ Baibol na, a mrẹ idibo ri Jihova buebun ro ku ẹwẹn ọfuanfon rọyen ku jẹ ayen vwo iphiẹrophiyọ rẹ odjuvwu-u. Ẹwẹn ọfuanfon yen suẹn Devid. (1 Sam. 16:13) Ẹwẹn ọfuanfon chọn rọ uko vwo vwo ẹruọ rẹ erọnvwọn ikokodo kpahen Jihova, o ji muo vwo si ẹbe evo vwẹ Baibol na. (Mak 12:36) Dedena, ọyinkọn Pita je tanẹ Devid “kpo idjuvwu-u.” (Iruo 2:34) Jọn ro Bru Ihwo Phiyame je “vọn vẹ [“ẹwẹn,” NW] ọfuanfon” na. (Luk 1:13-16) Jesu tare nẹ ohwo rọ rho nọ Jọn herọ-ọ, ẹkẹvuọvo ọ da je tanẹ Jọn dia ọvo usun rẹ ihwo ri che sun vwẹ Uvie rẹ odjuvwu na-a. (Mat. 11:10, 11) Jihova vwẹ ẹwẹn ọfuanfon vwọ chọn eshare nana uko vwo ru erọnvwọn sansan, jẹ ọ dia ọyen ayen che vwo kpo odjuvwu-u. Ọnana ko mudiaphiyọ nẹ ayen fuevun te-e? Ẹjo. O mudiaphiyọ nẹ Jihova cha rhọvwọn ayen rhe otọrakpọ na vwẹ Iparadaisi.—Jọn 5:28, 29; Iruo 24:15. w20.01 25 ¶15

Jihova durhie avwanre rhe dia ẹbẹre ọvo rẹ orua rẹ ihwo re vwẹ ẹga kẹ. Orua nana vọnre vẹ ihwo re vwomakpahotọ kẹ Ọghẹnẹ ri ji vwo esegbuyota kpahen izobo ọtanhirhe rẹ Ọmọ rọyen. Oma vwerhen ihwo rehẹ orua rẹ avwanre na. Avwanre yeren omamọ rẹ akpọ enẹna je rhẹro rẹ arhọ ri bẹdẹ vwẹ obaro na, owenẹ ọ dia obodjuvwu yẹrẹ otọrakpọ na. Ẹguọnọ yen mu Jihova vwo ru ọrhuẹrẹphiyoto nana, ọ dia uku rẹ erọnvwọn yen o vwo ze rere avwanre se vwo vwo arhọ na-a. (Jọn 3:16) O “vwo unuigho ra dẹ” avwanre. (1 Kọr. 6:20) Womarẹ ọtanhirhe na, Jihova ruro rere avwanre vẹ ọyen se vwo vwo uvi rẹ oyerinkugbe. Avwanre vwo okpuphẹn re vwo se Ohwo rọ ma rho vwẹ akpọ vẹ odjuvwu, Ọsẹ rẹ avwanre. Jihova yen Ọsẹ ro me yovwin. Avwanre se vwo ọkpọ rẹ ẹwẹn ro rhe ọbuine na rọ vwọ so: “Kidie me kẹ Ọrovwohwo na fiki rẹ ẹse buebu ro ru kẹ vwẹ?” (Une 116:12) Ra vwọ kpahenphiyọ onọ yena, avwanre cha sa hwa osa rhe Ọsẹ rẹ avwanre rọhẹ obodjuvwu na-a. Ẹkẹvuọvo ẹguọnọ rọyen na yen mu avwanre vwo vwo ẹguọnọ rọyen rhivwin.. w20.02 8 ¶1-3