March

“Igodẹ” re djunute vwẹ itẹ rọhẹ Matiu 25:​31-36 na mudiaphiyọ evwata rẹ ihwo vwẹ ọke oba na ri vwo iphiẹrophiyọ ayen cha vwọ dia otọrakpọ na, e ji se ayen igodẹ efa na. Ayen fuevun bicha iniọvo ri Jesu ra jẹreyọ na womarẹ ayen vwọ chọn ayen uko vwo ruiruo rẹ aghwoghwo rẹ Uvie na kugbe odibo egbe na. (Mat. 24:14; 28:​19, 20) Kukpe kukpe, udughwrẹn evo tavwen e ki ruẹ Ẹkarophiyọ na, igodẹ efa na djephia nẹ ayen biẹcha iniọvo ri Jesu na womarẹ ayen vwo vwobọ vwẹ egbada-ẹdjẹ re vwo durhie ihwo vwo kpo Ẹkarophiyọ na. Ayen je davwẹngba vwo muegbe erọnvwọn eje phiyotọ hẹrhẹ Ẹkarophiyọ na. Oma vwerhen igodẹ efa na rẹ ayen vwo biẹcha iniọvo ri Kristi na vwẹ idjerhe ọtiọna. Igodẹ nana riẹnre nẹ Jesu nẹ oborẹ ayen ruẹ kẹ iniọvo rọyen na kerẹsiẹ a da mrẹ nẹ ọyen yen ayen ruro kẹ.​—Mat. 25:​37-40. w22.01 22 ¶11-12

A sa vwẹrokere iruemu ri Jesu vẹ obo ro nene ihwo yerin wan. Kerẹ udje, o gbe arodọnvwẹ kẹ ọhọnvwoti ọvo, o dje erorokẹ kẹ aye ọvo rọ họnvwa okpọga, o de ji dje ẹguọnọ kẹ ihwo ri muomaphiyọ fikirẹ ohwo rayen ro ghwuru. Avwanre da vwẹrokere Jesu, jẹ avwanre vwẹrokere Jihova. (Mak 1:​40, 41; 5:​25-34; Jọn 11:​33-35) Avwanre vwọ vwẹrokere Jihova ye, jẹ avwanre siẹkẹrẹ phiyọ. E de nene ichiyin ri Jesu, akpọ ọbrabra nana rhe che se si ẹwẹn rẹ avwanre nẹ ẹga ri Jihova-a. Vwẹ ason rọ koba o ki ghwu, Jesu da ta: “Mi phi akpọ na kpare obọ nure.” (Jọn 16:33) Ọnana mudiaphiyọ nẹ ọ vwẹ uphẹn kẹ uruemu rẹ ihwo, oborẹ ayen vwọ tua, kugbe iroro rayen nẹ i sun ọye-en. Jesu kpairoro vrẹ obo ri muro rhe akpọ na-a, rọ dia orufon rẹ odẹ ri Jihova. Kẹ avwanre vwo? Vwẹ akpọ nana, erọnvwọn buebun herọ ri se si ẹwẹn rẹ avwanre nẹ ẹga ri Jihova. Ẹkẹvuọvo, avwanre da tẹnrovi eruo rẹ ọhọre ri Jihova kirobo rẹ Jesu ruru, kẹ avwanre ji se “phi akpọ na kparobọ.”​—1 Jọn 5:5. w21.04 3-4 ¶7-8

Ọyinkọn Pọl nabọ riẹn ive ri Jesu nana: “Ohwo kohwo ro sere [Jesus] gbuyota . . . ko vwo arhọ ri bẹdẹ.” (Jọn 3:16; Rom 6:23) O muẹro dẹn nẹ Pọl jẹ ọvo usun rẹ ihwo ri vwo esegbuyota kpahen ọtanhirhe na. Ọ nabọ vwo imuẹro nẹ Jihova muegbe ro vwo ghovwo ihwo re tobọ ru umwemwu egangan siẹrẹ ayen de kurhẹriẹ. (Une 86:5) Pọl ji vwo esegbuyota nẹ Ọghẹnẹ vwo ẹguọnọ rọyen mamọ, kidie o ji ọmọ rọyen rhi ghwu kẹ. Vwo oniso rẹ eta rẹ uduephiophiyawọ re vwo ku Galesha 2:20 phiyọ. Pọl da ta: “Ọmọ rẹ Ọghẹnẹ . . . guọnọ ovwẹ rọ da vwẹ oma rọye kẹ vwẹ.” Pọl vwẹ ọke vuọvo vwo roro nẹ ọyen bra te asan rẹ Ọghẹnẹ vwo jẹ ẹguọnọ rọyen evwo-o, kerẹ asan ra da mrẹ nẹ ọ guọnọ tanẹ, ‘Me riẹn oboresorọ rẹ Jihova vwo vwo ẹguọnọ rẹ iniọvo mẹ, ẹkẹvuọvo o che se vwo ẹguọnọ mẹ-ẹ.’ Pọl karophiyọ Inenikristi ri Rom nẹ, “Ọke rẹ avwanre vwọ hẹ iruimwemwu Kristi de rhi ghwu kẹ avwanre.” (Rom 5:8) Ẹguọnọ rẹ Ọghẹnẹ basa-an! Pọl nabọ riẹn oborẹ ẹguọnọ rẹ Ọghẹnẹ gan te. Pọl riẹn oborẹ Jihova nene ihwo rẹ Izrẹl yerin vẹ odirin. w21.04 22 ¶8-10

Wo de ru yono ri Baibol, chọn ohwo wo yono uko vwo vwo ẹguọnọ ri Jihova. Vwẹ idjerhe vọ? Reyọ kuphẹn kuphẹn ro rhiephiyọ vwo yono kpahen iruemu ri Jihova. Chọn uko vwọ mrẹ Jihova kerẹ Ọghẹnẹ rẹ oma vwerhan, ro biẹcha otu ri vwo ẹguọnọ rọyen. (1 Tim. 1:11; Hib. 11:6) Vuẹ nẹ erere che te obọ siẹrẹ ọ da vwẹ obo ro yonori vwo ruiruo, je vuẹ nẹ erere tiọyena ọyen odjephia rẹ ẹguọnọ rẹ Jihova vwo kpahọn. (Aiz. 48:​17, 18) Ẹguọnọ ro vwo kpahen Jihova vwọ ganphiyọ ye, o mi rhi vwo owenvwe ro vwo ru ewene sansan. Ohwo wo yono na cha vwẹ ekuakua sansan vwo ze tavwen o ki se muwan vwọkẹ omaebrophiyame. Ihwo evo re yono cha vwẹ ekuakua rẹ akpeyeren vwo ze. Ihwo buebun che sioma nẹ igbeyan ri jẹ ẹguọnọ rẹ Ọghẹnẹ evwo. Ihwo rẹ orua ri vwo utuoma kpahen Iseri ri Jihova me rha sen efa. Jesu veri nẹ ọyen che ku idibo rọyen phiyotọ-ọ. Ayen che vwo orua rẹ idibo rẹ Ọghẹnẹ ri che dje ẹguọnọ kẹ ayen.​—Mak 10:​29, 30. w21.06 4 ¶8-9

Ọyinkọn Pọl vwẹ iruo rẹ odibo egbe na vwo dje owian ra vwọ kọn ekankọn, o de djunute emu ọfa re ji che ru. Ọ vwẹ ẹkarophiyọ nana kẹ iniọvo rehẹ Kọrẹnt: “Me kọnre, Apolọs ku ame ku . . . ovwan hẹ udju rẹ Ọghẹnẹ.” (1 Kọr. 3:​6-9) Kerẹ ewiowian re wian vwẹ “udju rẹ Ọghẹnẹ,” avwanre kọn ibi, ku ame kuẹ, je vwo oniso rẹ oborẹ ekankọn na djẹ wan. Dedena, avwanre riẹnre nẹ Ọghẹnẹ yen nẹrhẹ ekankọn na djẹ. Avwanare vwo okpuphẹn re vwo ghwoghwo ota ji yono ihwo efa uyota na! Ihwo na kẹ avwanre uvi rẹ omavwerhovwẹn. Ọyinkọn Pọl rọ chọn buebun rẹ ihwo ri Tẹsalonaika uko vwọ dia idibo ri Jesu, dje oborẹ oma nabọ vwerhọn te, rọ vwọ ta: “Kidie hẹ iphiẹrohọ rẹ avwanre, eyẹ aghọghọ rẹ avwanre eyẹ erhu rẹ uvie rẹ avwanre vwọ yan eyan vwẹ obara rẹ Ọrovwavwanre Jesu vwẹ ẹcha rọye? Ọ rha dia ovwan na-a? Kidie ovwan na hẹ eyan rẹ avwanre vẹ aghọghọ rẹ avwanre.”​—1 Tẹsa. 2:​19, 20; Iruo 17:​1-4. w21.07 3 ¶5; 7 ¶17

Jihova si avwanre ohwo vuọvo te oma. (Jọn 6:44) Roro kpahen oborẹ ọyena mudiaphiyọ. Jihova vwọ fuẹrẹn oduduima buebun rẹ ihwo rehẹ akpọ na, ọ da mrẹ orọnvwọn ọghanghanre ọvo vwẹ oma wẹn. Ọ mrẹvughe nẹ wo vwo ẹwẹn esiri. Ọ je riẹn nẹ wo se vwo ẹguọnọ rọyen. (1 Ikun 28:9) Jihova vughe uwe, o vwo ẹruọ wẹ, o ji vwo ẹguọnọ wẹ. O muẹro dẹn nẹ ọyena vwerhen owẹ oma! Jihova vwo ọdavwẹ wẹ, o ji vwo ọdavwẹ rẹ iniọvo na eje rehẹ ukoko na. Kerẹ udje, Jesu vwẹ Jihova vwo dje osuigegedẹ. Die yen osuigegede che ru siẹrẹ ọvo usun rẹ igegede ujorin ro vwori de ghwru? O che “gbobọnyẹ ọvo nuro ujori na, rọ da yan ro evun rẹ aghwa ra guọnọ ọ ro ghwruru.” Ọ da mrẹ, ọ cha ghwọ kuo kidie nẹ ọ yan ghwru-u. Ukperẹ ọtiọyen, ọ cha ghọghọ. Die yen ọyena mudiaphiyọ? Igegede na eje ghanre kẹ Jihova. Jesu da ta: “Ọ dia ẹguọnọ rẹ Ọsẹ rẹ ovwan rọ hẹ obo odjuvwu rere ọvo rẹ imitete na ghwru-u.”​—Mat. 18:​12-14. w21.06 20 ¶1-2

Ọke re de roro kpahen ẹguọnọ ro jẹ rhẹriẹ rẹ Ọghẹnẹ djephia vwọ kẹ avwanre, ọnana nẹrhẹ oyerinkugbe avwanre vẹ eguọnọ re vwo kpahọn ganphiyọ. (Rom 8:​38, 39) Avwanre vwẹrokere udje ri Jesu. (1 Pita 2:21) Tavwen ẹdẹ rẹ Ẹkarophiyọ na ki te, avwanre se ikuegbe ri Baibol re ta ota kpahen udughwrẹn rọ koba ri Jesu vwẹ otọrakpọ na, ughwu kugbe evrẹnushi rọyen. Ota ra cha ta vwẹ ovwọnvwọn rẹ ẹdẹ rẹ Ẹkarophiyọ na, nẹrhẹ avwanre karophiyọ ẹguọnọ rẹ Jesu dje kẹ avwanre. (Ẹfe. 5:2; 1 Jọn 3:16) E de se ji roro kokodo kpahen udje rẹ omaevwoze ri Jesu, o che mu avwanre vwọ “yan kirobo rẹ ekpuyovwi rọye yanre.” (1 Jọn 2:6) Avwanre muegbe a vwọ dia evunrẹ ẹguọnọ rẹ Ọghẹnẹ ọkieje. (Jud 20, 21) Avwanre da davwẹngba avwanre eje vwo nyupho rẹ Ọghẹnẹ, ru ọdẹ rọyen fon, ji ru obo re vwerhọn oma, ka sa dia evunrẹ ẹguọnọ rọyen. (Isẹ 27:11; Mat. 6:9; 1 Jọn 5:3) Ẹkarophiyọ na nẹrhẹ e vwo owenvwe ra vwọ vuẹ Jihova womarẹ akpeyeren ri kẹdẹ kẹdẹ rẹ avwanre nẹ, ‘Me guọnọ dia evunrẹ ẹguọnọ wẹn bẹdẹ!’ w22.01 23 ¶17; 25 ¶18-19

Jihova kẹ avwanre ugbomọphẹ. Avwanre sa jẹ oka rẹ akpọ rẹ avwanre che yerin. Oma vwerhen Jihova siẹrẹ avwanre de brorhiẹn avwanre vwọ ga. (Une 84:11; Isẹ 27:11) Avwanre sa reyọ ugbomọphẹ rẹ avwanre vwo bru omamọ rẹ orhiẹn sansan. Avwanre sa vwẹrokere Jesu siẹrẹ avwanre da vwẹ ọdavwẹ rẹ ihwo efa vwọ kobaro kẹ ọ rẹ avwanre. O vwo ọke ọvo rẹ oma vwọ bẹn Jesu vẹ idibo rọyen, ayen de kpo asan rọ fọre de re rovwoma. Ẹkẹvuọvo ayen se rovwoma-a. Otu buebun de nene ayen, kidie ayen guọnọre nẹ Jesu yono ayen. Dedena, ivun miovwo Jesu-u. Ukperẹ ọtiọyen, aro rẹ ihwo na da dọn. Kẹ die yen o ruru? “O de yono ayen emu buebu.” (Mak 6:​30-34) Avwanre da vwẹrokere Jesu vwọ vwẹ ọke vẹ ẹgba rẹ avwanre vwọ chọn ihwo efa uko, jẹ avwanre vwẹ ujiri vwo rhe ọsẹ rẹ avwanre rọhẹ obo odjuvwu.​—Mat. 5:​14-16. w21.08 3 ¶7-8

Jihova vwo ẹguọnọ rẹ ofẹnẹ. A mrẹ ọnana vughe womarẹ igbevwunu rẹ emama rọyen, ji te ihworakpọ. Avwanre eje fẹnẹre. Ọtiọyena, Jihova reyọ owẹ vwọ vwanvwe ihwo efa-a. Ọ riẹn oka rẹ ohwo wọ ghene hepha, ọ mrẹ ubiudu wẹn. (1 Sam. 16:7) Ọ je riẹn oborẹ wo se ru, vẹ oborẹ wo che se ru-u; ọ riẹn asan wọ dia ghwanre. Ọ vuẹ wẹ nẹ wo ru obo re vrẹ wẹ oma-a. Ofori nẹ avwanre vwẹrokere Jihova, rere e ni oma rẹ avwanre kirobo ro nẹ avwanre. Ọke yena, ka sa vwẹ “oma kpotọ dẹndẹn,” e rhe che ni oma rhuarho yẹrẹ hanvwe nọ-ọ. (Rom 12:3) Vwọrẹ uyota, e se yono vwo nẹ omamọ rẹ udje rẹ iniọvo re tẹn ona rẹ iruo rẹ aghwoghwo na. (Hib. 13:7) Ọ me nẹrhẹ avwanre se ru yovwinphiyọ vwẹ iruo rẹ aghwoghwo rẹ avwanre. (Fil. 3:17) Ẹkẹvuọvo, a vwọ vwẹrokere omamọ rẹ udje rẹ ohwo fẹnẹ ra vwọ vwẹ oma vwanvwe ohwo na. w21.07 20 ¶1-2

Wọ sa bọn esegbuyota wẹn gan kpahen Ọmemama na siẹrẹ wọ da fuẹrẹn eranvwe, ekankọn, kugbe isio. (Une 19:1) Wo vwo yono kpahen erọnvwọn nana, jẹ imuẹro wo vwo kaphen Jihova rọ dia Ọmemama na ganphiyọ. Ọke wọ da fuẹrẹn emama, vwo oniso rẹ erọnvwọn ru wo se yono kpahen Ọmemama rẹ avwanre. (Rom 1:20) Kerẹ udje, ọnre na vwẹ oheri vẹ elo vwọphia re chọn avwanre uko vwẹ akpọ na, ẹkẹvuọvo elo evo rẹ ọnre na vwọphia sa so imuoshọ. Ofori nẹ a sẹro rẹ ihworakpọ vwo nẹ elo rẹ ọnre nana. Vwẹ idjerhe vọ? Akpọ na vwẹ obo re se ozone layer rọ sẹro rọyen vwo nẹ elo re sa so imuoshọ vwẹ akpọ na. Elo ro nẹ ọnre na cha vwọ ganphiyọ na, jẹ ozone layer na rhuaphiyọ. Enana eje rhe nẹrhẹ o mu avwanre ẹro nẹ Ọmemama ọvo ro vwo aghwanre herọ rọ ma erọnvwọn eje? w21.08 17 ¶9-10

Ohwo de bromaphiyame nu, e jẹ avwanre ji dje ẹguọnọ kẹ, ji brọghọ phiyọ oma. (1 Jọn 4:20) Die yen ọnana churobọsi? O mudiaphiyọ nẹ avwanre cha vwẹrosuọ. Kerẹ udje, avwanre che vwo ẹwẹn ivivẹ kpahen erọnvwọn ro ruru-u. Ukperẹ ọtiọyen, e che muọghọ kẹ oniọvo rẹ avwanre, ji no nẹ o yovwin nọ avwanre. (Rom 12:10; Fil. 2:3) Ofori nẹ e gbe arodọnvwẹ ji dje uruemuesiri kẹ ihwo. Avwanre da guọnọ dia usun rẹ ihwo ri se se Jihova Ọsẹ rayen, kẹ avwanre vwẹ Ota rẹ Ọghẹnẹ vwo ruiruo. Kerẹ udje, Jesu yonori nẹ e dje uruemuesiri vẹ ẹguọnọ phia, ji ruẹse kẹ ihwo efa, ọtiọyen ji te ivwighrẹn rẹ avwanre. (Luk 6:​32-36) Ọnana sa bẹn avwanre eruo ọkievo. Ọ da dia ọtiọyen, kọyen e che yono obo ra sa vwọ dia kerẹ Jesu. Avwanre da davwẹngba vwo nyo upho ri Jihova je vwẹrokere Jesu, ọyena che djephia nẹ avwanre guọnọ dia ẹbẹre ọvo rẹ orua rọyen bẹdẹ. w21.08 6 ¶14-15

Vwẹroso Jihova. O veri nẹ o che bruba kẹ avwanre a da vwẹrosuọ ji ru asan ẹgba rẹ avwanre teri. Baibol na vọnre vẹ idje rẹ ihwo re nabọ wian gan vwẹ ẹga ri Jihova. Vwẹ ọke buebun, ayen jowọ tavwen ayen ke mrẹ ebruphiyọ rọyen. Kerẹ udje, Ebraham vrẹ nẹ uwevwin rọyen tavwen Jihova ki bruba kẹ jẹ ọ “riẹn obo ro vwo gbe-e.” (Hib. 11:8) Jekọp nene amakashe na muabọ tavwen ebruphiyọ rẹ oghẹresan ki te obọ. (Jẹn. 32:​24-30) Ọke rẹ ẹgborho rẹ Izrẹl vwọ guọnọ ro Otọ rẹ Ive na, awọ rẹ irherẹn na te Urhie ri Jọdan nu tavwen ihwo na ke sa shariẹ urhie na vrẹ. (Jos. 3:​14-16) Wọ je sa mrẹ erere vwo nẹ udje rẹ Iseri ri Jihova vwẹ ọke rẹ avwanre na re vwẹroso Jihova ji ru bunphiyọ vwẹ iruo rẹ ẹga na. w21.08 29-30 ¶12-14

Ovwan ihwo re ghwore na, rhiẹromrẹ obo re ruẹ erọnvwọn wan jovwo vwẹ ọke rẹ awanre, ẹkẹvuọvo ovwan je mrẹ nẹ ofori ovwan vwo ru ewene vwo nene obo rẹ erọnvwọn hepha enẹna. Ovwan ihwo re ghworo tavwen ovwan ki bromaphiyame ji vwo idjerhe buebun rẹ ovwan sa vwọ chọn ihwo efa uko. Ọ cha vwerhen ighene na oma rẹ ayen vwo nyo oborẹ wo rhiẹromrẹ vẹ obo wo yono nẹ ayen rhe. Wo de vwo uruemu ra vwọ “kẹ” okẹ womarẹ wọ vwọ vwẹ obo wo yonore vwẹ akpeyeren vwo yono ihwo efa, Jihova che bruba kẹ wẹ gbidiki. (Luk 6:38) Siẹrẹ ovwan ihwo re ghwore de siẹkẹrẹ ighene na, kẹ ovwan se bicha ohwohwo. (Rom 1:12) Ohwo ọvuọvo vwo emu ọvo yoyovwin rẹ ohwo ro chekọ vwori-i. Ihwo re ghwore vwo aghwanre rẹ ayen yonori vwẹ uchọkẹ rẹ ayen hẹ akpọ re. Ighene vwo ẹgba vẹ uriẹn rẹ owian. Ọke rẹ ighene vẹ emare da wian kuẹgbe, ayen hwarhiẹ ujiri brẹ Ọsẹ rẹ avwanre rọhẹ obo djuvwu ro vwo ẹguọnọ rẹ avwanre na ra, ọyen jẹ ebruphiyọ vwọ kẹ ukoko na eje. w21.09 8 ¶3; 13 ¶17-18

Diesorọ obo re hwe Jesu wan vwọ dia ekprowọ kẹ ihwo ri Ju buebun? Kidie nẹ a kanre Jesu mu urhe rẹ oja, kẹ ayen niro nẹ orumwemwu yen o ruẹ, ọ dia Mesaya na-a. (Urhi 21:​22, 23) Ihwo ri Ju ri sen Jesu riẹnre nẹ e mu kpahọn ji shenyẹ ekueku-u. Ihwo ri vwẹ Jesu vwo guẹdjọ vwẹ ẹro phovwin vwo ni orhiẹn-abavo. Aguare rẹ ihwo ri Ju rọ marho kparobọ brokpakpa siomakoko vwo guẹdjọ na obo ri je ayen. (Luk 22:54; Jọn 18:24) Ukperẹ ayen vwo rhievun kerhọ rẹ obo ra ta kpahen Jesu vẹ iseri re herọ, iguẹdjọ na ke “guọnọ iseri rẹ eku kpahe Jesu, rere ayen mrasan hwe.” (Mat. 26:59; Mak 14:​55-64) A vwọ kpare Jesu nushi nu, erharhe iguẹdjọ yena da vwẹ idọnọ efuanfon buebun vwọ “jẹ udi” kẹ isodje ri Rom re rhẹrẹ ushi rọyen rere ayen hrahra efian nene asan eje kpahen oboresorọ ushi na vwọ dia ofefe.​—Mat. 28:​11-15. w21.05 11 ¶12-13

Jihova se phioba phiyọ akpọ ọbrabra nana vwẹ ọke rọ guọnọre. Ẹkẹvuọvo, odirin rọyen fierere kẹ avwanre eje! Emọ na eje rẹ Adam vẹ Ivi vwiẹre gbare-e. Dedena Jihova vwo ẹguọnọ rayen, ọ je vwẹrote ayen, o ki rhe vephiyọ nẹ ọyen che phioba phiyọ ojaẹriọ rẹ emọ rọyen eje. (1 Jọn 4:19) O bru ọke phiyotọ ro che vwo ru ọnana. E jẹ ẹguọnọ ri Jihova mu avwanre vwo nene chirakon te asan ro fori. Jihova yen djudje rẹ akoechiron gbagba. Jesu vwẹrokere udje rẹ akoechiron rẹ ọsẹ rọyen. Ọke rọ vwọ hẹ otọrakpọ na, Jesu chirakon rẹ eta ebrabra, ophọphọvwe kugbe ughwu vwẹ urhe oja fikirẹ avwanre. (Hib. 12:​2, 3) O muẹro nẹ udje rẹ akoechiron ri Jihova yen chọn rọ uko. Ọ je sa chọn avwanre uko. w21.07 12-13 ¶15-17

Ọkieje yen Jihova vwo gbe arodọnvwẹ kẹ avwanre ji vwo ghovwo avwanre. (Une 103:​10-14) Idibo ri Jesu gbare-e, dedena o gbe arodọnvwẹ kẹ ayen ji vwo ghovwo ayen. Ọ je choma rọ vwọ vwẹ arhọ rọyen vwọ kpahotọ fikirẹ imwemwu rẹ avwanre. (1 Jọn 2:​1, 2) Avwanre kpuriẹn phiyọ ẹguọnọ rọhẹ evunrẹ orua ri Jihova siẹrẹ avwanre de “vwo ghovwo ohwohwo” ọphọphẹ. (Ẹfe. 4:32) Ẹkẹvuọvo ọ dia ọkieje yen ọ vwọ lọhọ ra vwọ reyọ vwo ghovwo iniọvo rẹ avwanre-e, ọtiọyena ofori nẹ avwanre davwẹngba. Oniọvo aye ọvo mrẹvughe nẹ Uwevwin orhẹrẹ ro vwo uyovwinrota na “Forgive One Another Freely” chọn rọ uko vwo ru ọtiọyen. O de si: “Uyono na djere fiotọ nẹ ọ dia wo de vwo ghovwo, kọ nana mudiaphiyọ nẹ oborẹ ayen ruru na shephiyọ yẹrẹ ivun rhe miovwo uwe kpahọ-ọn. Ẹkẹvuọvo evwoghovwo mudiaphiyọ wọ vwọ kpairoro vrẹ oruchọ na, ọna mi nẹrhẹ wo vwo ufuoma wẹ rhivwin.” Ọke rẹ avwanre de vwo ghovwo iniọvo rẹ avwanre, jẹ e djephia nẹ e vwo ẹguọnọ rayen, nẹ avwanre je guọnọ vwẹrokere Ọsẹ rẹ avwanre Jihova. w21.09 23-24 ¶15-16

Jesu vwo ẹguọnọ rẹ uyota na rọ dia uyota kpahen Ọghẹnẹ kugbe ọhọre rọyen. Akpeyeren ri Jesu djerephia nẹ ọ riẹn uyota na, ọtiọyena ọ da je vuẹ ihwo efa kpahọn. (Jọn 18:37) Idibo ri Jesu ruyota ji vwo ẹguọnọ rẹ uyota na dẹn. (Jọn 4:23) Ọyinkọn Pita se ẹga rẹ Ọghẹnẹ “idjerhe rẹ uyota na.” (2 Pita 2:2) Kidie nẹ ayen vwo ẹguọnọ rẹ uyota na, Inenikristi rẹ ẹgbukpe ujorin rẹsosuọ sen iyono rẹ ẹga, iruemu rẹ ẹkuotọ, kugbe iroro romobọ re vwọ so uyota na. (Kọl. 2:8) Ọtiọyen ọ je hepha nonẹna, Inenikristi ruyota davwẹngba vwo “nene uyota na” womarẹ ayen vwo muẹ oborẹ ayen segbuyota kugbe oborẹ ayen yerẹn akpọ wan kpahen Ota rẹ Ọghẹnẹ. (3 Jọn 3, 4) Iseri ri Jihova vuẹ ihwo nẹ ayen vwo eruọ rẹ obo rehẹ Baibol na eje-e. Vwẹ ọkiọvo, ayen ru erọnvwọn evo chọ jovwore kerẹ odjefiotọ rẹ iyono ri Baibol evo yẹrẹ vwẹ ọrhuẹrẹphiyotọ rẹ ukoko na. Ayen da mrẹvughe nẹ ofori re vwo ru ewene phiyọ ẹruọ evo rẹ avwanre vwori jovwo, kẹ ayen ghwa rhuẹrẹphiyọ. w21.10 21-22 ¶11-12

Kirobo rẹ igbẹhẹn sẹro rẹ ihwo re dia irere ride vwẹ ọke awanre yen, ọtiọyen ẹguọnọ ro jẹ rhẹriẹ ri Jihova sẹro avwanre vwo nẹ kemu kemu ro se miovwo oyerinkugbe rẹ avwanre vẹ ọ rọyen. Vwọba, ẹguọnọ ro jẹ rhẹriẹ ri Jihova na ji muo vwo siẹ avwanre toma. (Jer. 31:3) Ọbuine Devid je vwẹ idjerhe ọfa vwo djudje rẹ oborẹ Jihova wan sẹro rẹ ihwo rọyen. O de si: “Ọghẹnẹ, wẹ hẹ odjahọ mẹ, Ọghẹnẹ ro dje ẹguọnọ ro jẹ rhẹriẹ rọye kẹ vwẹ.” Devid da je ta kpahen Jihova nẹ ọyen hẹ “oragha mẹ, kugbe ogba ọgangan mẹ, asan ọgangan mẹ kugbe osivwi mẹ, ekpọfia mẹ evun wẹn mi de si oma nu.” (Une 59:17; 144:2) Diesorọ Devid vwọ vwẹ ẹguọnọ ro jẹ rhẹriẹ ri Jihova vwo dje asan ọgangan kugbe ogba ọgangan? O toro asan rẹ avwanre dia vwẹ akpọ na-a, rọ vwọ dia nẹ avwanre idibo rọyen na, Jihova cha kẹ avwanre ekpọfia rẹ avwanre guọnọre ejobi rere a sa vwọ sẹro rẹ oyerinkugbe rẹ avwanre vẹ ọyen. w21.11 6 ¶14-15

Ọke aphopho rode vwo ke Jesu vẹ idibo rọyen phiyọ vwẹ urhie rode ọvo, Jesu da vwẹ uphẹn yena vwọ chọn idibo rọyen uko vwọ mrẹvughe nẹ ofori ayen vwọ kpuriẹnphiyọ esegbuyota rayen. (Mat. 8:​23-26) Aphopho na gan te asan rẹ ame kọ muavwan rua okọ rayen hepha na, vwẹ ọke yena Jesu jọ vwerhẹn. Ọke rẹ idibo rọyen rẹ oshọ muẹ vwọ ra rhọvwọn nẹ ọ rhe chọn ayen uko, Jesu da vwẹ ọkpọvi vwọ kẹ ayen: “Die ovwan vwọ djẹ oshọ, ovwan ri vwo esegbuyota tutuno na?” Wo hirharokuẹ “aphopho ọgangan” vwẹ akpeyeren wẹn? Ọ sa dia uweren ọgangan fikirẹ oghwọrọ ri kpregede rọ phiare. Yẹrẹ ọ sa dia ebẹnbẹn rẹ akpeyeren, kerẹ jẹ omakpokpọ e vwo rọ nẹrhẹ wo she ọkuọrọn, wọ rha riẹn obo wo che ru-u. Ọ je sa dianẹ wọ ruẹ ẹnwan ọkievo, ẹkẹvuọvo wo jẹ ẹnwan da wẹ obọ jẹ wo vwo jẹ ẹroẹvwọsuọ Jihova-a. Sikẹrẹ womarẹ ẹrhovwo ẹnẹ. Bọn esegbuyota wẹn gan womarẹ wo vwo roro kpahen oborẹ Jihova vwọ vwẹ ukẹcha kẹ wẹ wanre. (Une 77:11) Jo muwẹro nẹ Jihova cha sa kpairoro vrẹ wẹn bẹdẹ bẹdẹ-ẹ. w21.11 22 ¶7, 10

Ohwo sa tanẹ, ọyen rha reyọ emu rọ dia ọrọye-en, jẹ ọyen yan nene iji nana. Dedena, ọ sa dianẹ o cho uji vwẹ idjerhe efa. Kerẹ udje, ọneki rọ reyọ ovwanvwọn rọ gbare-e vwọ vwanvwan emu vwọ kẹ ineki rọyen rere ọ sa vwọ ghwa ayen re, ọyen uji rẹ ona. Livitikọs 19:13 churu uji echo vwo si ekiẹchuọ rẹ ọghware rọ vwọ ta: “Ovwan shenyẹ ọrivẹ rẹ ovwa-an.” Kọyen ohwo ro shenyẹ ihwo ọke rọ da chueki, jẹ o chuji. Rọ vwọ dianẹ iji rẹ ẹrenren na tare nẹ a kẹnoma kẹ uji echo na, odjekẹ rehẹ Livitikọs na chọn ohwo uko vwọ riẹn obo ra vwẹ irhi nana vwo ruiruo wan. A sa mrẹ erere vwo nẹ ẹro rẹ Jihova vwo ni ekiẹchuọ rẹ ọghware kugbe uji echo siẹrẹ e de yono kpahen ayen. A sa nọ oma rẹ avwanre, kirobo re yonori vwẹ Livitikọs 19:​11-13, o vwo ẹdia evo vwẹ akpeyeren mẹ ro fori nẹ me fuẹrẹn ni, marho kẹ obo ri mi nene ihwo chueki wan? w21.12 9-10 ¶6-8

Vwẹ ẹrhovwo romobọ wẹn, vuẹ Jihova kpahen erọnvwọn evo re chọ wẹ obọ vwẹ ẹdẹ yena, wọ me jẹ rẹ nẹ o vwo ghovwo uwe. Ẹkẹvuọvo, wo de ru umwemwu ọgangan, ofori nẹ wọ nokpẹn rẹ ukẹcha mie ekpako na. Ayen cha kerhọ wẹn, je vwẹ uchebro kẹ wẹ vwo nẹ Baibol na rhe. Ayen che nene uwe nẹrhovwo vwọ kẹ evwoghovwo, rere Jihova se vwo “sivwi” uwe yẹrẹ rhoma si we te oma. (Jems 5:​14-16) O ji che yovwin siẹrẹ e de roro kokodo kpahen ọtanhirhe na. Ọ je cha da wẹ siẹrẹ wo de roro kpahen oja ra vwọ re Ọmọ rẹ Ọghẹnẹ. Wo vwo roro kpahen izobo ri Jesu kokodo ye, ẹguọnọ wo vwo kpahen Jesu kugbe Ọsẹ rọyen kọ cha ganphiyọ. Kukpe kukpe yen ọdavwaro rẹ avwanre vwọ ganphiyọ ọke re de kpo Ẹkarophiyọ rẹ ughwu ri Jesu, ji durhie ihwo vwo kpo irueru na. Jihova kẹ avwanre uphẹn rode re vwo yono ihwo efa kpahen Ọmọ rọyen! w21.04 18-19 ¶13-16

Vwẹ ẹwẹn roro oborẹ Jesu ruru ọke rẹ ihwo buebun vwo bro rhe vwẹ asan rọ kẹrẹ ugbenu. Jesu ghwọrọ ason na eje vwọ nẹrhovwo. Aphro herọ-ọ nẹ oma bruro ku, ẹkẹvuọvo ọke rọ vwọ mrẹ otu na, o de gbe arodọnvwẹ kẹ ivwiogbere vẹ ihwo re muọga rehẹ ohri rayen. Ọ dia o di sivwin ayen ọvo-o, ọ je ta ota rotu ro me kperusi vwẹ ikuegbe rẹ ihworakpọ; ọyehẹ Ota ri Jesu vwẹ enu Ugbenu. (Luk 6:​12-20) Jesu vwo ọke kẹ ihwo efa dede nẹ ọ guọnọ ọke ro vwo rovwoma. Wọ sa vwẹ ẹwẹn roro oborẹ oma ru Jesu ro vwo nyo nẹ e hwe ugbeyan rọyen Jọn ro brẹ ihwo phiyame? Baibol na da ta: “Ọke ri Jesu vwo nyo [kpahen ughwu ri Jọn], ọ da ro okọ; o de sioma reyọ kpo evun rẹ aton.” (Mat. 14:​10-13) Ẹkẹvuọvo, otu buebun karerọ te asan na. (Mak 6:​31-33) Jesu mrẹvughe nẹ ayen guọnọ ukẹcha vẹ uchebro rẹ Ota rẹ Ọghẹnẹ, ọtiọyena Jesu da chọn ayen uko.​—Luk 9:​10, 11. w22.02 21 ¶4, 6

Die yen ofori nẹ avwanre ru e de noso nẹ avwanre gbe oniọvo rẹ avwanre ọvo ku? E jẹ avwanre nẹrhovwo rhe Jihova nẹ otọ rẹ ubiudu rhe. A sa vuẹ nẹ ọ chọn avwanre uko rere a vẹ oniọvo rẹ avwanre na sa vwọ rhuẹrẹ kugbe. Ofori nẹ a je ghwọrọ ọke vwo roro kpahen obo ra cha ta vẹ obo ra cha ta wan. A sa nọ oma rẹ avwanre onọ kerẹ: ‘Mi muegbe me vwọ rhọnvwe nẹ omẹvwẹ yen ruchọ, ji yovwunu rere mẹ vẹ ọyen sa vwọ rhuẹrẹ kugbe? Oma cha vwerhen Jihova vẹ Jesu siẹrẹ me da jowọ mẹ vẹ oniọvo mẹ rẹ ọshare yẹrẹ ọ rẹ aye vwọ rhuẹre kugbe?’ Ẹkpahọnphiyọ rẹ avwanre che mu avwanre vwo nyupho ri Jesu je jowọ rere a vẹ oniọvo rẹ avwanre vwọ rhuẹrẹ kugbe. E de re nene oniọvo rẹ avwanre rhuẹrẹ kugbe, ofori nẹ a vwomakpotọ. (Ẹfe. 4:​2, 3) Ofori nẹ e bru ohwo re gbeku na ra vẹ ẹwẹn ra vẹ ọyen vwọ rhuẹrẹ kugbe. Karophiyọ nẹ wẹ vẹ oniọvo wẹn vwọ rhuẹrẹ kugbe ghanre vrẹ re vwo vughe ohwo rọ riase yẹrẹ ọ rọ riabe.​—1 Kọr. 6:7. w21.12 26 ¶13-16

Ọ ghene da Jesu mamọ kidie ọ riẹnre nẹ buebun rẹ ihwo ri Ju cha sen ovuẹ rẹ Uvie na. Ukuotọ rọyen ka cha ghwọrọ Jerusalẹm, ohwo ri Ju ro sivwinrhọ kọ dia ọviẹn. (Luk 21:​20-24) Ọ da ohwo mamọ nẹ buebun rayen senrọ kirobo ri Jesu tare. Ẹro vọ yen ihwo buebun ji vwo no ovuẹ rẹ Uvie na vwẹ asan wọ dia? Ọ da dianẹ buebun ihwo je rhọnvwa kerhọ kẹ ovuẹ ru wo ghwoghwo nonẹna-a, die yen wo se yono nẹ oviẹ ri Jesu viẹre? Jihova vwo ọdavwẹ rẹ ihwo. Oviẹ ri Jesu na je karophiyọ avwanre kpahen obo ri Jihova vwo ọdavwẹ rẹ ihwo te. “Ọ guọnọre nẹ ohwo ọvuọvo ghwru-u ẹkẹvuọvo nẹ ihwo ejobi kurhẹriẹ.” (2 Pita 3:9) Nonẹna e se djephia nẹ e vwo ẹguọnọ rẹ ihwo re ghwoghwo ota kẹ siẹrẹ a da davwẹngba vwo yono ayen iyẹnrẹn esiri rẹ Uvie na.​—Mat. 22:39. w22.01 16 ¶10-12

Esegbuyota wẹn cha ganphiyọ siẹrẹ wo de roro kokodo kpahen oborẹ Jihova ru kẹ ihwo rọyen vwẹ ọke re wanre vẹ obo ro ru kẹ wẹ re komobọ. Ọ rọ ma ghanre kparobọ yen, ẹguọnọ wo vwo kpahen Jihova ko che kodophiyọ. Vwọ vrẹ iwan efa, ẹguọnọ che mu we vwo nyupho ri Jihova, vwọ vwẹ erọnvwọn vwo ze rere oma vwọ vwerhọn, ji chirakon rẹ edavwini. (Mat. 22:​37-39; 1 Kọr. 13:​4, 7; 1 Jọn 5:3) O vwo emu ọfa ro ghanre vwọ vrẹ oyerinkugbe rọ kpẹkpẹre vẹ Jihova-a! (Une 63:​1-7) Karophiyọ nẹ ẹrhovwo, eyono kugbe eroro kodo eyen ẹbẹre ọvo rẹ ẹga avwanre. Kerẹ Jesu, guọnọ asan rọ fọre riẹin wọ vẹ Jihova da sa ghwọrọ ọke kugbe. Kẹnoma kẹ erọnvwọn ri se gbowọphiyọ erhọ ẹka wẹn. Rẹ Jihova nẹ ọ chọn wẹ uko vwo mu ẹwẹn phiyọ irueru ri churobọ si ẹga rọyen. Wọ da nabọ reyọ ọke wẹn vwo ruiruo vwẹ idjerhe rẹ aghwanre, Jihova ko che bruba kẹ wẹ gbidiki, kẹ wọ je cha dia bẹdẹ vwẹ akpọ kpokpọ rẹ Ọghẹnẹ veri na.​—Mak 4:24. w22.01 31 ¶18-20

Iroro rẹ avwanre yen suẹn oborẹ avwanre ruẹ. Ọna yen sorọ Jesu vwo yono avwanre nẹ a sen iroro eje re sa nẹrhẹ e ru umwemwu ọgangan. (Mat. 5:​21, 22, 28, 29) Aphro herọ-ọ nẹ avwanre guọnọ ru obo re vwerhen Ọsẹ avwanre rọhẹ obodjuvwu oma. Ọtiọyena, ọyen obo re ghanre mamọ a vwọ sen erharhe rẹ iroro re dje ro ẹwẹn rẹ avwanre ugugege re ghwa vwọ djẹ ruọ ye. Jesu da ta: “Obo ri nẹ unu rhe, otọ rẹ udu o nẹ cha.” (Mat. 15:18) Vwọrẹ uyota, eta rẹ avwanre djephia oka rẹ ohwo rẹ avwanre ghene hepha vwẹ obevun. Ọtiọyena, gba nọ oma wẹn: ‘Me ta uyota ọkieje, ọ da tobọ dianẹ uyota na sa so okpetu kẹ vwẹ? Kerẹ ohwo rọ rọvwọnre, me davwẹngba vwọ kẹnoma kẹ uruemu ra vwọ frẹfrẹ nene ohwo rọ dia ọrivẹ rẹ orọnvwe mẹ-ẹ? Me kẹnoma kẹ erharhe eta ri churobọ si ọfanrhiẹn kare kare? Me davwẹngba vwo hwe oma muẹ ọke rẹ ohwo da kpare ovwẹ ophu?’ Ẹfuẹrẹn rẹ enọ nana cha chọn wẹ uko. Wọ da davwẹngba vwọ sen eta rẹ ekan, efian, kugbe eta rẹ ọfanrhiẹn, kọyen ọ sa lọhọ vwọ kẹ wẹ wo vwo siobọnu ohwo rẹ awanre na. w22.03 5 ¶12-14

Ihwo re nokpẹn rẹ uchebro ukperẹ ayen vwọ hẹrhẹ nẹ ihwo bru ayen rhe yen me vwo aghwanre vrẹ ihwo re nokpẹn rẹ uchebro-o. Ọtiọyena wọ me rha nokpẹn rẹ uchebro. Ọke vọ yen o vwo fo ra vwọ nokpẹn rẹ uchebro mie iniọvo rẹ avwanre? Roro kpahen ẹdia evo. (1) Oniọvo aye ọvo vuẹ oghwoghwota ọvo rọ tẹn ona nẹ ọ vwomaba ọyen vwo ru uyono ri Baibol, ayen vwo ru nu, oniọvo aye na da nọ mie oniọvo aye rọ tẹn ona na kpahen asan ro fori nẹ ọyen de ru yovwinphiyọ. (2) Oniọvo aye ọvo rọ je rọvwọ-on guọnọ dẹ iwun, ọ da vuẹ oniọvo aye ọvo rọ ghwanrire nẹ ọ nabọ nẹ iwun rọ sanere na sẹ iyovwirin. (3) Oniọvo ọshare ọvo de rhe vwo ota rotu obọ rẹsosuọ. Ọ da vuẹ oniọvo ọvo rọ tẹn ona rẹ ota ẹta nẹ ọ nabọ kerhọ kẹ ota rọyen na rere ọ sa vuẹ asan ro fori ro de ru yovwinphiyọ. Ọ da tobọ dianẹ oniọvo ọvo ta ota ikpe buebun re, o ji fo nẹ ọ nokpẹn asan ro de ru yovwinphiyọ mie iniọvo efa re tẹn ona rere o nene uchebro rẹ ayen vwọ kẹ.​—Isẹ 19:20. w22.02 13 ¶15-17

Jihova dje ẹguọnọ rọyen kẹ avwanre kirobo ro dje ẹguọnọ kẹ Jesu ọke rọ vwọ hẹ otọrakpọ na. (Jọn 5:20) Ọ chọn Jesu uko vwo ru esegbuyota rọyen gan, o phi udu phiyọ awọ ọke rẹ udu vwo no awọ, ọ je kẹ emu eje rọ guọnọre ro vwo yeren akpọ. Jihova vuẹ ọmọ rọyen nẹ ọyen vwo ẹguọnọ rọyen nẹ oma rọyen je vwerhan ọyen. (Mat. 3:​16, 17) Kidie nẹ Jesu vwẹroso Ọsẹ rọyen, ọnana chọn rọ uko vwọ riẹn nẹ ọ vẹ ọyen herọ ọkieje. Kerẹ Jesu avwanre eje rhiẹromrẹ idjerhe sansan rẹ Jihova vwo dje ẹguọnọ rọyen kẹ avwanre re. Gbe di roro: Jihova kẹ avwanre uphẹn ra vwọ dia ugbeyan rọyen, ọ je kẹ avwanre iniọvo ri vwo ẹguọnọ rẹ avwanre re kẹ avwanre omavwerhovwẹn re je bọn avwanre gan vwẹ ọke rẹ ukpokpogho. (Jọn 6:44) Jihova je kẹ avwanre oborẹ a guọnọre eje rẹ avwanre sa vwọ sẹro rẹ esegbuyota rọ ghwotọ. Ọ je chọn avwanre uko vwọ vwẹrote ọdavwẹ rẹ ugboma rẹ avwanre. (Mat. 6:​31, 32) Avwanre de roro kpahen ẹguọnọ rẹ Jihova vwo kpahen avwanre, ẹguọnọ rẹ avwanre vwo kpahọn ko che kodophiyo. w21.09 22 ¶8-9

Mavọ yen akpeyeren wẹn hepha jovwo wọ ke ton uyono ri Baibol vẹ Iseri ri Jihova phiyọ? Buebun avwanre guọnọ roro kpahọ-ọn. Ọka rẹ ẹro rẹ akpọ nana vwo nẹ obo re brare vẹ obo ri yoma, yen avwanre ji vwo no jovwo. Ọtiọyena, avwanre ke rhe dia ihwo “ri vwo iphiẹrohọ-ọ, ri vwo Ọghẹnẹ vwẹ akpọ na-a.” (Ẹfe. 2:12) Wo vwo yono Baibol na, ku wọ rhe mrẹvughe nẹ wo vwo Ọsẹ vwẹ obodjuvwu ro vwo ẹguọnọ wẹn mamọ. Wọ rhe mrẹvughe nẹ wọ da guọnọ ru obo re vwerhen Jihova oma je dia ẹbẹre ọvo rẹ orua rọ vwẹ ẹga kẹ, ko fori nẹ wo ru ewene evo kiriguo vwẹ oborẹ wo yeren akpọ wan, ẹro wo vwo ni emu, kugbe iroro wẹn. Ku wọ cha davwẹngba vwo yeren akpọ wẹn vwo nene iwan rẹ Jihova phiyotọ. (Ẹfe. 5:​3-5) Ọmemama kugbe Ọsẹ rẹ avwanre rọhẹ obodjuvwu Jihova vwo uturhi ro vwo brorhiẹn rẹ oborẹ ihwo rẹ orua rọyen che yeren akpọ wan. Ọ guọnọre nẹ a davwẹngba vwo “siobọ nẹ ohwo rẹ awanre na vẹ uruemu rọye ejobi” tavwen e ki bromaphiyamẹ. w22.03 2 ¶1-3

Oma vwerhen igodẹ efa na vwo kpo Ẹkarophiyọ rẹ ughwu ri Jesu na ji roro kpahen iphiẹrophiyọ rayen. Ayen nẹ kiọkiọkiọ kpo ọke a cha vwọ ta ota rẹ Ẹkarophiyọ rẹ ughwu ri Jesu na, kidie ẹkpo sansan vwevunrẹ ota na karunumu erọnvwọn evo rẹ ihwo 144,000 na ri che nene Jesu sun ẹgbukpe uriorin na che ru vwọ kẹ ihworakpọ re fuevun vwẹ ọke yena. Vwẹ otọ rẹ usuon rẹ Ovie rayen Jesu Kristi, ihwo ri che nene sun vwẹ odjuvwu na cha vwẹ ukẹcha phia vwọ rhẹriẹ otọrakpọ na phiyọ iparadaisi ji ru ihwo ri nyẹme phiyọ ihwo re gbare. Oma nabọ vwerhen iduduru ri ihwo ri kpo Ẹkarophiyọ na ọke rẹ ayen de roro kpahen oborẹ aroẹmrẹ rọhẹ Aizaya 35:​5, 6; 65:​21-23; kugbe Ẹvwọphia 21:​3, 4 che rugba wan vwẹ obaro na. Ayen da vwẹ ẹwẹn roro oborẹ ayen vẹ ihwo rẹ ayen vwo ẹguọnọ kpahen che yerin wan vwẹ akpọ kpokpọ na, ọnana kpuriẹnphiyọ iphiẹrophiyọ rayen kpahen obaro na, ọ je kẹ ayen owenvwe rẹ ayen vwo vwobọ vwẹ ẹga ri Jihova ọkieje.​—Mat. 24:13; Gal. 6:9. w22.01 21 ¶5-7

Die yen ọtanhirhe na? Ọtanhirhe na ọyen osa rẹ Jesu hware rọ vwọ dẹ oborẹ Adam kpare kufia hirhe. (1 Kor. 15:22) Diesorọ a vwọ guọnọ ọtanhirhe na? Kidie arhọ yen a vwọ hwosa rẹ arhọ, kirobọ rẹ Urhi na djephia kpahen orhiẹn-abavo ri Jihova. (Ẹyan. 21:​23, 24) Adam kpare arhọ ọgbagba rọyen kufia. Vwo nene orhiẹn-abavo ri Jihova, Jesu da vwẹ arhọ ọgbagba rọyen vwọ kpahotọ. (Rom 5:17) Ọ da rhe dia “Ọsẹ ri Bẹdẹ” vwọ kẹ ihwo ejobi ri dje esegbuyota phia kpahen ọtanhirhe na. (Aiz. 9:6; Rom 3:​23, 24) Jesu vwo owenvwe rọ vwọ vwẹ arhọ rọyen kpahotọ fikirẹ ẹguọnọ ro vwo kpahen Jihova kugbe avwanre. (Jọn 14:31; 15:13) Ẹguọnọ yena yen muro vwọ sẹro rẹ ọyọnregan rọyen toba, ji ru ọhọre rẹ Ọsẹ rọyen gba. Jesu ru ọtiọyen rọ vwọ fuevun te ẹdẹ ughwu rọyen. Ọtiọyena, ọhọre ri Jihova kpahen otọrakpọ na kugbe ihworakpọ ko se rugba. w21.04 14 ¶2-3