Genaro

Gesù “la ga vista” e dopo “ghe ga fato pecà”. (Luc. 7:13) Ma quela mare no ghe ga sol fato pecà a lu. Gesù el ga mostrà amor par ela parché el ga fato qualcossa par giutarla. Lu el ga dito con bontà: “No stà piander.” Dopo, lu el ga ressussità quel toso e “lo ga dato ala so mama”. (Luc. 7:14, 15) Cossa che podemo imparar de questo miràcolo de Gesù? Imparemo che ghemo de mostrar amor a quei che i ze drio sofrir par causa dela morte de qualchedun. Podemo far compagno a Gesù se stemo atenti a quel che i altri i ze drio infrontar. Dopo, podemo sforsarse de dir o far qualcossa par giutarli e consolarli. (Pro. 17:17; 2 Cor. 1:3, 4; 1 Pie. 3:8) Ghemo de ricordarse che anca pìcole robe che femo pol giutarli tanto. w23.04 p. 5, 6 §§ 13-15

Ancora che Gesù el savesse che Làsaro l’era belche morto, lu el ga spetà due giorni par ndar fin Betània. Quando lu l’è rivà lì par giutar i so amighi, fea belche quatro giorni che Làsaro l’era morto. Magari, Gesù el gavea in mente de far una roba de maraveiarse par giutar so amighi e darghe glòria a Geovà. (Gio. 11: 4, 6, 11, 17) L’è vera che Marta e Maria le ga mandà dir a Gesù che so fradel l’era malà, ma no le gavea mia domandà che el fusse visitarli in Betània. (Gio. 11:3) Ancora che Gesù no’l gavea bisogno de far quel viaio par ressussitar Làsaro, lu el volea star insieme le so amighe. Quando pensemo in quel che ga sucedesto, imparemo tanto sora amicìssia. Fursi anca ti te ghè un amigo che l’è sempre pronto par giutarte “quando ghen’è situassion difìcile”, anca se no te ghe domandi. (Pro. 17:17) Ma, anca ti te pol far compagno a Gesù e esser un bon amigo. w23.04 p. 10 §§ 10, 11

Intanto che semo drio tribolar, pol esser che ne par che el novo mondo no’l vegnarà mai. Ma, questo no vol mia dir che la nostra fede la ze fiaca. L’è compagno a quel che pol suceder nel inverno. Se vien massa fredo par tante stimane, fursi par che el caldo no’l vegnarà mai. Ma quando l’è ora, la staion la càmbia e vien anca el istà. L’è cossita che sucede quando semo desanimadi. Pol esser che ne par che el novo mondo no’l vegnarà mai. Ma se la nostra fede la ze forte, noantri savemo che tute le promesse de Geovà le ndarà suceder. (Sal. 94:3, 14, 15; Ebr. 6:17-19) Par quela, se semo sicuri dele promesse de Geovà, servirlo seitarà a esser la roba pi importante dela nostra vita. Anca ghemo bisogno de una forte fede quando ndemo predicar. Parché? Parché tante persone ghe piase dele “bone notìssie”, ma le pensa che quel che Geovà el promete no’l ndarà mai suceder. (Mat. 24:14; Eze. 33:32) Alora, ne ocore gaver una forte fede par mai pensar compagno a lore. w23.04 p. 27 §§ 6, 7; p. 30 § 14

Fursi noantri se ghemo belche domandà: ‘Sarà che Geovà l’è drio risponder ale me orassion?’ Quando semo drio infrontar dificoltà, pol esser ancora pi fadiga veder come Geovà l’è drio risponderne. Par quela, tanti i se ga belche domandà se Geovà l’è drio risponderghe. Parché che podemo esser sicuri che Geovà el risponde ale orassion dei so servi? Geovà el vol che ghe domandemo aiuto quando ghemo de bisogno. (1 Pie. 5:6, 7) Parché? Parché la Bìblia la mostra che Geovà el ne ama tanto e che el ne dà tanto valor. (Ageo 2:7; 1 Gio. 4:10) Geovà anca el vol restar sempre dela nostra banda e giutarne a dàrghene fora cole nostre dificoltà. La Bìblia la mostra che Geovà el ga rispondesto ai so servi tante volte. Ricòrdito de qualche esémpio? w23.05 p. 8 §§ 1-4

Maria la gavea una forte fede, la cognossea tanto ben le Scriture e sempre la se tolea tempo par pensarghe sora. (Luc. 2:19, 51) Anca dopo maridada, ela la ga seità a sforsarse par gaver una forte amicìssia con Geovà. Semo sicuri che questa amicìssia la ga giutada a esser una brava dona. Cossa che le done che le ze maridade le pol imparar col esémpio de Maria? Lore le ga de far pi forte la so amicìssia con Geovà. Cossita, so omo el volerà lodarle e amarle cada volta de pi. (Pro. 31:30) Varda quel che ga sucedesto con una sorela de nome Emiko. Ela la ga dito: “Prima de maridarme, mi studiea la Bìblia e le publicassion mi sola. Ma dopo che son maridada, me omo el ga scominsià a pregar par noantri e a far la adorassion in fameia. Alora, son nicorta che sol ndea drio a me omo e no fea pi gnente par far pi forte la me amicìssia con Geovà. Cossita, go visto che me tochea far qualcossa. Adesso, me sforso de torme el tempo par pregar a Geovà, leder la Bìblia e pensarghe sora quel che ledo.” — Gàl. 6:5. w23.05 p. 22 § 6

Noantri ghemo de imparar a gaver tanto rispeto par Geovà. Cossa che pol giutarne? Pensarghe sora tuto quel che Geovà el ga creà. Quando vedemo nela creassion la sabedoria, el poder e el amor de Geovà, lo amemo ancora de pi. (Rom. 1:20) Anca pregar a Geovà ndarà giutarne a gaver tanto rispeto par lu e a cognosserlo ancora meio. Come cossita? Quando domandemo che Geovà el ne dae forsa par dàrghene fora con una dificoltà e lu el ne giuta, vedemo so grando poder. Quando lo ringrassiemo par el sacrifìssio de so Fiol, se ricordemo che lu el ne ama tanto. E quando ghe domandemo aiuto parché no savemo cossa far, se ricordemo dela so sabedoria. Par quela che le orassion le ne giuta a gaver tanto rispeto par Geovà e a far cada volta pi forte la nostra amicìssia con lu. w23.06 p. 15 §§ 6, 7

Sol Geovà el ga el dirito de far lege, e lu sempre le fà de una maniera che l’è fàcile de capir. Par esémpio, el Corpo Governante del passà el ga dito cossa i primi dissìpoli de Gesù i gavaria de far par seitar firmi: (1) adorar sol a Geovà e mai adorar altri dèi, (2) obedir la lege de Geovà sora el sangue, e (3) no far mia imoralità sessual. (Ati 15:28, 29) Come che ancoi podemo seitar firmi e obedir a Geovà anca noantri? Noantri adoremo sol a Geovà e mai adoremo altri dèi. Geovà el ga dito che i israeliti i gavaria de adorar sol a lu. (Deu. 5:6-10) Quando Sàtana el ga proà far Gesù desobedir a Dio, anca Gesù el ga dito che ghemo de adorar sol a Geovà. (Mat. 4:8-10) Par quela, noantri no adoremo mia imàgine gnanca tratemo lìderi religiosi, polìtichi, atleti, cantori o altre persone come se i fusse un dio. Invesse, noantri adoremo sol a Geovà, quel che el ga “creà tute le cose”. — Apo. 4:11. w23.07 p. 14, 15 §§ 3, 4

L’è tanto importante gaver in mente che el mondo de Sàtana el ghe dà tanto valor ala imoralità e ala pornografia. (Efe. 4:19) Par quela, ghemo de temer a Geovà se volemo star distante de queste brute robe. Nel capìtolo 9 de Proverbi, ledemo sora la sabedoria e la stupidìsia come se le fusse due done. Tute due le fà un convite a tuti quei che no i ga mia speriensa. L’è come se lore le disesse: ‘Vegné qua casa magnar.’ (Pro. 9:1, 4-6) Ma, ghemo de ricordarse che dopo che scoliemo che convite ndaremo acetar, podarà vegner fora robe bone o nò. Vedemo prima el convite dela “dona stùpida”. (Pro. 9:13-18) Questa dona no la ga mia vergogna e la convida tuti “quei che no i ga mia giudìssio” a ndar ala so casa far una festa. Ma cossa che sucede? Tuti quei che i va lì i more. Proverbi el parla anca altre volte de done che le fà robe sbaliade e de cossa che sucede con quei che i ghe va drio. Par esémpio, el dise che quei che i ghe va drio ‘la dona slandra’ i ndarà morir. — Pro. 2:11-19; 5:3-10. w23.06 p. 21, 22 §§ 6, 7

I ansiani i ga de esser un bel esémpio de cambiar quando ghe ocore e no voler sempre gaver la rason. (1 Tim. 3:2, 3) Lori i sa che Geovà el pol doperar tuti quanti par far una bona dessision. Par quela, un ansiano no’l speta che i altri sempre i acete la so opinion sol parché l’è pi vècio che i altri. E quando quasi tuti i ansiani i ga fato una dessision che no la va contra la Bìblia, i altri ansiani i aceta, anca che no i sìpia mia de acordo. Se semo pronti par cambiar e no volemo sempre gaver la rason, gavaremo tante benedission. Par esémpio, gavaremo una bela amicìssia coi altri, giutaremo che ghen sìpia pace nela congregassion e gavaremo pròpio caro de star in meso de persone che le ga difarente culture e maniere de pensar. Meio ancora, gavaremo alegria de saver che semo drio far compagno al nostro Dio, Geovà. w23.07 p. 25 §§ 16, 17

Daniel el gavea la voia giusta, o sia, el studiea parché el volea saver la verità. Daniel anca el ga mostrà che l’era ùmile parché el se ga fidà nel aiuto de Geovà. (Dan. 2:18) Lu el savea che Geovà el ndaria giutarlo a capir le professie se el ghe obedisse e se el seitesse a esser so amigo. (Dan. 2:27, 28) Daniel anca el studiea ben tute le parte dela Bìblia che ghen’era nela so època. (Ger. 25:11, 12; Dan. 9:2) Come che noantri podemo far compagno a lu? Pensaghe sora parché che te sì drio studiar le professie dela Bìblia. Ancoi, tanti i stùdia le professie par proar mostrar che la Bìblia no la vien de Dio. Lori i pensa che se i ze boni de provar che no la ze la Parola de Dio, i podarà dessider lori stessi cossa che l’è giusto o sbalià. Magari, quando noantri studiemo, ghemo de farlo cola voia de saver la verità. Cossita, Geovà el ndarà giutarne. — Gio. 4:23, 24; 14:16, 17. w23.08 p. 9 §§ 7, 8

Noantri ndaremo restar tanto desanimadi se pensemo che ghemo de far tuto quel che i altri i fà. (Gàl. 6:4) Se seitemo a pensar cossita, deventaremo persone invidiose e volaremo sempre mostrar che semo meio che i altri. (Gàl. 5:26) Se proemo far de pi de quel che semo boni, gavaremo tanti problemi. La Bìblia la dise che sofrimo tanto quando le robe no le sucede nela ora che spetemo. Alora, podemo restar ancora pi desanimadi se volemo far una roba che no saremo mai boni farla. (Pro. 13:12) Se femo cossita, restemo desanimadi e no semo pi boni de ndar avanti nela carera par la vita. (Pro. 24:10) Ricòrdate che Geovà no’l vol che te fai de pi de quel che te sì bon. (2 Cor. 8:12) Sìpia sicuro che Geovà no’l speta che te fè tuto quel che i altri i fà. (Mat. 25:20-23) Geovà el ghe dà tanto valor al laoro che ti te fè, ala fede che ti te ghè, e ala perseveransa che ti te mostri. w23.08 p. 29 §§ 10, 11

Par meso de un miràcolo, Geovà el ga verto un buso e el ga fato vegner fora àqua par Sanson. Quando lu “la ga bevesta, lu el ga bio forsa e coraio nantra volta”. (Giui. 15:19) Pol esser che, quando el profeta Samuel el ga scrito el libro dei Giuisi ani dopo, quela fontana de àqua la era ancora là. Cossita, sempre che i israeliti i vedesse quela fontana de àqua, lori i podaria ricordarse che Geovà el ndaria giutarli a dàrghene fora con qualche dificoltà se i se fidesse in lu. Anca se ghemo qualche abilità o se semo boni de far arquante robe, sempre ne ocore ndar in serca del aiuto de Geovà. Ghemo de fidarse in lu, esser ùmili e ricordarse che sol saremo boni de far qualcossa col so aiuto. Cossita come Sanson el ga bio forsa nantra volta dopo bever quela àqua, noantri gavaremo forsa e seitaremo leai se doperemo ben quel che Geovà el ne dà. — Mat. 11:28. w23.09 p. 4 §§ 8-10

Come che te pol seitar calmo quando una persona la parla robe rugne sora Geovà o sora la Bìblia? Prega a Geovà par domandarghe forsa e sabedoria par risponderghe con calma. Magari, se no te sì stà bon de risponderghe dela maniera giusta, prega ancora e pensa cossa che te podarissi parlar la pròssima volta che sucede una roba cossita. Se te te sforsi, te pol esser sicuro che Geovà el te darà spìrito santo e che el te giutarà a controlarse e a seitar calmo. Tanti versìcoli dela Bìblia i pol giutarne a parlar cole bone. Par esémpio, el libro de Proverbi el ga tanti prinsipi che i pol giutarne a esser calmi e el mostra parché che ghemo de esser cossita. (Pro. 15:18; Pro. 10:19; 17:27; 21:23; 25:15) E el spìrito santo el ndarà giutarne a ricordarse de questi testi quando ghe vol. — Gio. 14:26. w23.09 p. 15 §§ 6, 7

El apòstolo Piero el ga servio a Geovà par tanti ani. Lu el ga predicà insieme a Gesù, el ga scominsià a predicar a quei che no i era giudei e el ga fato parte del corpo governante. Ma, poco vanti che Piero el morisse, Geovà el ghe ga dato nantro laoro de far. Intorno dei ani 62 a 64, lu el ga scrito due carte che le ze i libri dela Bìblia de 1 e 2 Piero. (2 Pie. 1:12-15) El apòstolo Piero el ga scrito le so due carte nte una època che i fradei i gavea pròpio de bisogno, parché i era drio “patir diverse provassion”. (1 Pie. 1:6) In quel tempo, ghen’era rento la congregassion òmini rugni che i insegnea busie e i fea robe sbaliade. (2 Pie. 2:1, 2, 14) E i fradei che i era de star in Gerusalen suito i ndaria veder i esèrsiti de Roma finir fora cola cità. (1 Pie. 4:7) Par quela, sicuro che le carte de Piero li ga giutadi a perseverar nele dificoltà che i era drio infrontar e a esser pareciadi par dàrghene fora coi problemi che i vegnaria pi avanti. w23.09 p. 26 §§ 1, 2

Compagno a Gesù, quasi sempre imparemo a esser obedienti quando semo drio infrontar una dificoltà. L’è stà questo che ga sucedesto quando ga scominsià la pandemia del COVID-19. Fursi te ga fato fadiga fermarte de ndar nele riunion nel Salon del Regno e de predicar de casa in casa. Ma te ghè visto che la obediensa la ze importante parché la te protege, la giuta la congregassion a restar unida e la fà Geovà contento. E sicuro che quel che ga sucedesto nela pandemia ne ga giutà a esser pronti par obedir ale istrussion che gavaremo nela granda tribolassion. Se semo obedienti, podaremo salvar la nostra vita. (Giò 36:11) E semo dessididi de esser obedienti parché amemo a Geovà e volemo contentarlo. (1 Gio. 5:3) L’è vera che mai saremo boni de ringrassiar a Geovà par tuto quel che el ne ga fato de bon. (Sal. 116:12) Ma podemo esser obedienti a lu e a quei che lu el ga dato autorità. Cossita, mostremo sabedoria e femo Geovà contento. — Pro. 27:11. w23.10 p. 11 §§ 18, 19

Se un àngelo el vegnesse parlar con ti, ndarìssito scoltarlo? Varda ti se nò! Podemo dir che ancoi ghen’è un àngelo che l’è drio parlar “a cada nassion, tribo, léngua e pòpolo”. Apocalisse 14:6, 7 mostra che questo àngelo l’è drio dir: “Temé a Dio e deghe glòria, gavé de adorar quel che el ga fato el cielo e la tera.” Alora, tuti i gavaria de adorar sol al vero Dio, Geovà. E come che se sentimo de saver che Geovà el ne assa adorarlo? Sicuro che restemo pròpio contenti de adorarlo nel so grando témpio spiritual. Ma cossa elo el témpio spiritual, e cossa che pol giutarne a capir quel che el vol dir? El témpio spiritual no l’è mia un posto fato su de matoni. Invesse, l’è quel che Geovà l’è drio far par meso del sacrifìssio del so fiol Gesù, par giutarne a adorarlo dela maniera giusta. El apòstolo Paolo el ga spiegà sora questo témpio quando el ga scrito una carta ai fradei ebrei che i era de star nela Giudea. w23.10 p. 24 §§ 1, 2

Nel ano 522 vanti de Cristo, i nemighi i ga fato che el rè dela Pèrsia el mandesse fermar la costrussion del témpio. Alora, i giudei ghe ga tocà dàrghene fora anca con perseghission. Ma, Zacaria li ga giutadi a esser sicuri che Geovà el ndaria doperar el so poder par giutarli a far quel laoro. Cossita, nel ano 520 vanti de Cristo, el rè Dario el ga assà che i giudei i seitesse a far su el témpio. Dario el ghe ga dato soldi par far el laoro e el ga fin mandà che i governadori li giutesse. (Esd. 6:1, 6-10) Geovà el ga prometesto una bela roba ai giudei. Se lori i se sforsesse del tuto par far su el témpio, lu el ndaria giutarli. (Ageo 1:8, 13, 14; Zac. 1:3, 16) Alora, nel ano 520 vanti de Cristo, i giudei i ga scominsià nantra volta a far su el témpio e i lo ga finio in manco de sinque ani. Come la costrussion del témpio la era la roba pi importante par i giudei, Geovà li ga giutadi a gaver un forte fede. Cossita, i giudei i ze stati boni de seitar a adorar a Geovà con alegria. — Esd. 6:14-16, 22. w23.11 p. 15 §§ 6, 7

Tanti i ga belche sentio dir sora Abraon, ma pochi i cognosse la stòria dela so vita. Invesse noantri la cognossemo ben. Savemo che lu l’è stà ciamà de ‘pare de quei che i ga fede’. (Rom. 4:11) Alora, fursi te te domandi: ‘Sarà che mi posso gaver una fede forte cossita?’ Sicuro che si! Par causa dela so fede e de quel che el ga fato, Abraon el ga contentà a Geovà e l’è deventà so amigo. (Tia. 2:22, 23) Alora, ti te pol gaver una forte fede cossita se te studi sora la vita de Abraon. Par esémpio, Dio el ghe ga dito de ndar de star nte un posto tanto distante par viver in tende, e Abraon lo ga obedio. Lu anca el ga mostrà che el gavea una forte fede in Geovà quando el ga acetà dar so fiol come sacrifìssio. Geovà el vol che anca ti te sìpia so amigo. Par quela, el ga volesto che Paolo e Tiago i metesse par scrito nela Bìblia el esémpio de Abraon. w23.12 p. 2 §§ 1, 2

Le sorele le pol imparar a scoltar i altri e a parlar con bontà. Una brava dona la ga de imparar a discorer coi altri con bontà. El apòstolo Tiago el ga dato un bel consìlio nel testo de ancoi. Quando te scolti con atension quel che una persona la ze drio dir, te mostri che te ghe vol ben e che te te preocupi con ela. (1 Pie. 3:8) Se te par che no te ghè mia capio polito cossa che la ga dito o come la se sente, proa farghe domande. E prima de tacar a parlar, proa pensa sora quel che la ga dito. (Pro. 15:28) Domandate: ‘Quel che vao dirghe l’è giusto e ndarà incoraiarla? Vao mostrarghe rispeto e bontà?’ Una bela roba che te pol far l’è imparar con sorele che le ze brave de discorer coi altri. (Pro. 31:26) Se te scolti i altri con atension e te ghe parli con bontà, te gavarè boni amighi e te sarè bona de viver in pace con tuti. w23.12 p. 21 § 12

Pol esser che quando semo desanimadi, volemo star sempre noantri soli. Tanti de quei che i infronta dificoltà i se sente cossita. Alora, come che podemo gaver el aiuto de Geovà? Aceta el aiuto dei altri e no stà restar sempre ti ti sol. Se passemo massa tempo noantri soli, scominsiemo a pensar sol in noantri stessi e nei nostri problemi. Alora, no saremo gnanca boni de far le dessision dela maniera giusta. L’è vera che quando passemo bruti colpi, ghemo bisogno de star un pochetin noantri soli. Ma, proa veder la to fameia, i to amighi e i ansiani come el aiuto che Geovà l’è drio darte. — Pro. 17:17; Isa. 32:1, 2. w24.01 p. 24 §§ 12, 13

Par mostrar che el gavea grando rispeto par Geovà, un nasireo no’l podea mia taiarse i cavei. Ma, arquante volte, i israeliti no incoraiea i nasirei a obedir a Geovà. Sicuro che lori ghe ocorea gaver coraio par esser difarenti dei altri e far quel che i gavea prometesto a Geovà. (Amòs 2:12) Come servimo a Geovà, noantri semo tanto difarenti dele persone in volta. Alora, ne ocore coraio par parlar che semo Testimònie de Geovà a quei del laoro o dela scola. E come el mondo l’è drio deventar cada volta pedo, l’è tanto fadiga far quel che l’è giusto e parlar ai altri sora la Bìblia. (2 Tim. 1:8; 3:13) Ma ghemo de ricordarse che Geovà el resta tanto contento con noantri quando ghemo el coraio de esser difarenti de quei che no i lo serve. — Pro. 27:11; Mal. 3:18. w24.02 p. 16 § 7; p. 17 § 9

Proa varda come l’era la congregassion in Roma. Tanti fradei i era giudei e i gavea imparà a obedir la Lege de Moisè. Magari, arquanti i ze stati vegnesti de altre nassion e i gavea costumi difarenti. Altri fradei i era schiavi e ghen’era quei che fursi i era paroni de schiavi. Alora, par giutar questi fradei a far pi forte el so amor un al altro, el apòstolo Paolo ghe ga dato el consìlio de ‘acetarse intrà de lori’. Cossa el ga volesto dir? La parola “acetar” la vol dir ricever ben a qualchedun come se el fusse una persona dela fameia o un caro amigo. E l’è stà pròpio cossita che i fradei i ga fato. Invesse de assar che vegnesse fora problemi parché i era difarenti, lori i ga acetà un al altro. Par esémpio, Paolo el ghe ga dito a Filémon che el ricevesse ben a Onèsimo, che l’era un schiavo suo che l’era scampà via. (Filém. 17) Àchila e Prissila i ga ricevesto ben a Apolo, ancora che el gavesse de imparar de pi sora Gesù. — Ati 18:26. w23.07 p. 6 § 13

Ghemo de dedicarse a Geovà parché lo amemo. Questo amor l’è un sentimento tanto grando che vien de cognosser e capir quala che la ze la volontà de Dio. (Col. 1:9) Dopo che te ghè studià la Bìblia, te sì stà bon de capir (1) che ghen’è pròpio Dio, (2) che la Bìblia la ze la so Parola, e (3) che lu el dopera la so organisassion par far la so volontà. Vanti de dedicarse a Geovà, una persona la ga de capir quel che la Bìblia la dise e meter in pràtica quel che la ga imparà. Anca la ga de sforsarse par parlar ai altri sora la so fede. (Mat. 28:19, 20) Cossita, el so amor par Geovà el restarà cada volta pi grando e la volarà adorar sol a lu. Anca ti te te senti cossita? w24.03 p. 4, 5 §§ 6-8

Abigail la era maridada con Nabal. La Bìblia la dise che l’era un “omo stùpido e el se comportea mal”. (1 Sam. 25:3) L’era tanto fadiga viver con un omo cossita. Ma Abigail mai la ga proà catar una maniera par finir col so matrimònio. Par esémpio, una volta, Nabal el ga tratà mal Davi e i òmini con lu. Par quela, Davi, el futuro rè de Israel, el volea ndar copar Nabal. (1 Sam. 25:9-13) Abigail la ga savesto de quel che Davi el volea far. Invesse de scampar via e assar che lu el copesse Nabal, ela la ga dito a Davi de no farlo. (1 Sam. 25:23-27) Parché che Abigail la ga fato cossita? Ela la amea a Geovà e la vedea el matrimònio come una roba sacra, compagno a lu. Ela la volea contentar a Dio. Par quela, ela la ga fato presto tuto quel che la podea par no assar che Davi el copesse Nabal e tuti quei nela so casa. w24.03 p. 16 §§ 9, 10

Pol esser che nela to congregassion ghen’è fradei che i ga dessidio viver con manco soldi o manco robe par far de pi par Geovà. O fursi ghen’è gióveni che i ze drio mostrar coraio de esser difarenti dei altri nela scola. Te pol anca incoraiar quei che i ze drio sforsarse par servir a Geovà, anca se la so fameia la ghe vien contra. Cossita, sfòrsate de incoraiarli e mostrarghe che te resti tanto contento de veder el so coraio e el so sforso par adorar a Geovà. (Filém. 4, 5, 7) Geovà el ne assa mostrar che lo amemo, e questo l’è un bel presente che lu el ne ga dato. (Pro. 23:15, 16; Mar. 10:28-30; 1 Gio. 4:19) La promessa che i nasirei i fea anca la mostra che Geovà el dà tanto valor a tuto quel che femo par lu. Alora, volemo sforsarse de seitar a servir a Geovà e a darghe el nostro meio. w24.02 p. 18 § 14; p. 19 § 16

Proa imaginar quel che ga sucedesto nel ano 29, quando Gesù el ga scominsià el so laoro de predicassion. Lu e so mama i ze stati convidadi par una festa de matrimònio in Canà. Maria, so mama de Gesù, fursi la era drio giutar nela festa. Ma el vin se ga finio. Questa la era una bruta roba.. Alora, Maria la ze ndata svelta e la ga dito a Gesù: “Lori no i ga pi vin.” (Gio. 2:1-3) Par quela, Gesù, meso de un miràcolo, el ga fato la àqua deventar un “vin bon”. (Gio. 2:9, 10) Gesù el ga fato tanti altri miràcoli intanto che l’era qua nela Tera. Col so poder, lu el ga giutà tante persone. Par esémpio, con sol due miràcoli lu el ghe ga dato de magnar a nove mila òmini. Ma, ghen’era anca done e tosatei intrà de lori. Alora, pol esser che Gesù el ga dato de magnar a de pi de 27 mila persone. (Mat. 14:15-21; 15:32-38) In quele due volte, lu anca el ga curà tanti maladi. — Mat. 14:14; 15:30, 31. w23.04 p. 2 §§ 1, 2

Pol esser che dopo che infrontemo un bruto colpo nela vita, se sentimo sensa forse e tanto desanimadi. Fursi se sentimo compagno a Elia, che no l’era bon levarse su e che el volea sol dormir. (1 Rè 19:5-7) Pol esser che ne ocore aiuto par seitar a servir a Geovà. Alora, proa ricordarte dela promessa de Geovà che la ze scrita nel testo de ancoi. El rè Davi el ga sentio che Geovà lo ga giutà pròpio cossita. Quando lu l’era drio tribolar par causa dei so nemighi e de altre dificoltà, lu el ga dito a Geovà: ‘La to man drita la me ga tegnesto su.’ (Sal. 18:35) Geovà el pol doperar la nostra fameia, amighi e i ansiani par darne la forsa che ne ocore. Lu el ga fato cossita con tanti dei so servi del passà. Par esémpio, quando Davi l’è restà tanto desanimà, el so caro amigo Gionatan l’è ndato incoraiarlo. (1 Sam. 23:16, 17) Geovà anca el ga doperà Eliseo par incoraiar Elia. — 1 Rè 19:16, 21; 2 Rè 2:2. w24.01 p. 23, 24 §§ 10-12

Capimo che Geovà l’è tanto generoso par via de quel che la “vera sabedoria” la fà. In Proverbi capìtolo 9 dise che questa “dona” la ga parecià una bela tola con carne e vin. (Pro. 9:2) Dopo, nei versìcoli 4 e 5, ledemo: ‘Che i vegna qua tuti quei che no i ga speriensa! Vegné e magné del me pan.’ Parché che saria bon ndar drio el convite dela vera sabedoria e magnar quel che la ga parecià? Parché Geovà el vol darne sabedoria invesse de vederne sofrir e imparar cole brute. Par quela che Geovà el dà sabedoria a quei che i ze giusti. (Pro. 2:7) Quando tememo a Geovà, volemo contentarlo, ndemo drio ai so consili e semo felici de meterli in pràtica. — Tia. 1:25. w23.06 p. 23, 24 §§ 14, 15

Geovà el ga domandà che Zacaria el fesse una corona col oro e argento che i giudei de Babilònia i gavea mandà a quei de Gerusalen. (Zac. 6:11) Questa corona li giutaria a ricordarse de tuto quel che i giudei de Babilònia i ghe gavea mandà de volentiera. (Zac. 6:14) Cossa che imparemo? Anca se no semo mia boni de far tuto quel che volarìssino par Geovà, podemo esser sicuri che ghe piase tanto veder el nostro sforso par contentarlo. Lu mai el ndarà desmentegarse de quel che femo par servirlo, anca quando semo drio tribolar. Sicuro che ancora ndaremo tribolar in questi ùltimi giorni e le robe le deventarà cada volta pedo. (2 Tim. 3:1, 13) Ma no ne ocore mia restar massa preocupadi. Invesse, ne toca ricordarse de quel che Geovà el ga dito ai so servi nei giorni de Ageo: ‘Mi son con valtri. No sté gaver paura.’ (Ageo 2:4, 5) Se femo el nostro meio par contentar a Geovà, podemo fidarse che lu sempre el sarà con noantri. w23.11 p. 19 §§ 20, 21

El apòstolo Piero l’era imperfeto compagno a noantri e el se ga sforsà tanto par far quel che l’è giusto. Cossita, el so esémpio ne assa sicuri che Geovà no’l speta de pi de quel che semo boni. Proa pensa: Geovà el ga volesto che anca i sbali de Piero i fusse stati scriti nela Bìblia par insegnarne. (2 Tim. 3:16, 17) Lu el vol che seitemo perseverar, anca se femo qualche sbali. Parché che perseverar l’è tanto importante? Parché quando seitemo a far una roba, la femo cada volta meio. Alora, anca se se ghemo sforsà tanto par dàrghene fora con un sbàlio che feino, pol esser che ndaremo farlo nantra volta. Ma ghemo de seitar a sforsarse par far quel che l’è giusto. Tuti noantri sbaliemo, ma Geovà el ndarà giutarne se perseveremo. (1 Pie. 5:10) E anca dopo che Piero el ga fato tanti sbali, Gesù el ghe ga mostrà tanto amor. w23.09 p. 20, 21 §§ 2, 3

Gesù el podea gaver curà Làsaro, cossita come Marta la ghe gavea dito. Invesse, lu el gavea in mente de far una roba ancora pi maraveiosa. Lu el ga dito a Marta: “To fradel el tornarà a viver.” E dopo, Gesù el ga dito: “Mi son la ressuression e la vita.” (Gio. 11:23, 25) Geovà el gavea dato a Gesù el poder de far i morti viver nantra volta. Par quela che, un tempo vanti, lu el gavea belche ressussità una gióvena pena dopo che la era morta, e un gióveno, fursi nel stesso giorno che l’era morto. (Luc. 7:11-15; 8:49-55) Magari, fea belche quatro giorni che Làsaro l’era morto e el so corpo deromai l’era drio smarsirse. Sarà che Gesù el saria bon de ressussitarlo? Maria, quel’altra sorela de Làsaro, la ze ndata incontro de Gesù, e la ga dito anca ela: “Signor, se te fussi stà qua, el me fradel el saria ancora vivo.” (Gio. 11:32) Lu el ga visto che Maria e tute le persone che le era insieme le piandea e le era tanto triste. Quela situassion ghe ga fato pecà a Gesù. Alora, anca lu el ga tacà a piander. Gesù el savea che lore le era drio sofrir tanto par causa dela morte de Làsaro. Par quela, lu el volea tanto finir con quel sofrimento! w23.04 p. 10, 11 §§ 12, 13