Febraro

Quando el rè Ezechia el ga domandà che Geovà lo giutesse a dàrghene fora con una bruta malatia, lu l’è stà curà. (2 Rè 20:1-6) Ma, quando Paolo el ga domandà che Geovà el cavesse via el so spin nela carne, Geovà no lo ga curà. (2 Cor. 12:7-9) El rè Erode el ga perseghio i apòstoli Piero e Tiago. Ma intanto che Piero l’è stà molà par meso de un miràcolo, Tiago l’è stà copà. (Ati 12:1-11) Par quela, fursi pensemo: ‘Parché che Geovà el ga salvà Piero ma el ga assà che Tiago el fusse morto?’ La Bìblia no la dise. Ma podemo esser sicuri che Geovà “mai l’è ingiusto”. (Deu. 32:4) Alora, pol esser che gavaremo dificoltà che no spetemo mia e che Geovà no’l ndarà far quel che ghemo domandà a lu. Ma sempre saremo sicuri che lu el ndarà risponderne con amor e dela meio maniera. — Giò 33:13. w23.11 p. 21 § 6

Tiago el ga dito che le persone che le ga sabedoria le ze ‘pronte par obedir’. Questo vol dir che ghemo de esser premosi e gaver la voia de esser obedienti a quei che Geovà el ga dato autorità. Ma, Geovà no’l vol che obedimo a quei che i ne dise de desobedirlo. (Ati 4:18-20) Geovà l’è perfeto, e lu sempre el ne dise la meio roba de far. (Sal. 19:7) Par quela che l’è tanto pi fàcile obedir a lu che a persone imperfete. Ma Geovà el ga dato autorità al pare, ala mare, ai ansiani e ale persone del governo. Alora, se semo obedienti a tuti lori, ndaremo obedir anca a lu. — Pro. 6:20; 1 Tes. 5:12; 1 Pie. 2:13, 14. w23.10 p. 6 §§ 2, 3

Una roba che fà pi forte la nostra fede la ze pensarghe sora el poder che Geovà el ga. Lu el ga prometesto far tante robe che le persone no le saria mai bone de far. Ma Geovà l’è el Dio Tuto Poderoso e el ga el poder de far tuto quel che el ga prometesto. (Giò 42:2; Mar. 10:27; Efe. 3:20) Lu el ga prometesto a Abraon e Sara che lori i gavaria un fiol, ancora che deromai i fusse ben veci. (Gén. 17:15-17) Dio anca el ga dito a Abraon che la tera de Canaan la saria dei so dissendenti. Ma i israeliti, che i era i dissendenti de Abraon, i ze stati schiavi nel Egito par tanti ani. Ancora cossita, Geovà li ga liberadi e el ga fato pròpio quel che el gavea prometesto. Lu el ga prometesto a Maria, una vèrgine, che la saria mare del Fiol de Dio. Cossita, lu el ga fato quel che el gavea prometesto nel giardin del Èden. (Gén. 3:15) Se ghe pensemo sora come Geovà el ga belche fato quel che el ga prometesto, ndaremo veder che lu el ga tanto poder. Cossita, la nostra fede nela promessa del novo mondo la restarà ancora pi forte. — Gios. 23:14; Isa. 55:10, 11. w23.04 p. 28, 29 §§ 10-12

Davi el gavea pregà a Geovà che lo liberesse e Geovà el ga risposto ale orassion. (1 Sam. 19:10, 18-20; 2 Sam. 5:17-25) Anca noantri podemo esser sicuri che Geovà l’è sempre darente dei so servi. (Sal. 145:18) Ma sarà che questo vol dir che Geovà sempre el ne risponde dela maniera che spetemo? Nò. Paolo el ga domandà tre volte che Geovà el cavesse via el so “spin nela carne”, o sia, che el finissesse col so problema. E Geovà ghe ga rispondesto, ma nò dela maniera che Paolo el volea. Invesse de finir fora col so problema, Geovà el ga dato a Paolo la forsa che ghe ocorea par seitar fedele. (2 Cor. 12:7-10) Anca se, dele volte, Geovà no’l ndarà risponderne dela maniera che spetemo, podemo esser sicuri che lu el sa la meio maniera de giutarne. Geovà “el pol far pròpio tanto de pi de tuto quel che ghe domandemo o che podemo imaginar”. (Efe. 3:20) Par quela, pol esser che lu el ndarà risponderne nte una ora e de una maniera che no spetemo mia. w23.05 p. 8, 9 §§ 4-6

L’è importante che tuti noantri ghe pensemo sora la promessa dela ressuression. Parché? Parché de colpo, pol esser che more qualchedun che l’è caro par noantri o ne vegna fora una bruta malatia. (Ecl. 9:11; Tia. 4:13, 14) Magari, la speransa dela ressuression la ne giutarà a dàrghene fora con queste dificoltà. (1 Tes. 4:13) Se una bruta roba la sucede con noantri, ghemo de ricordarse che Geovà el ne cognosse e el ne ama tanto. (Luc. 12:7) Alora, se te mori, te pol esser sicuro che Geovà el te farà viver nantra volta compagno te sì ancoi. Te podarè viver par sempre parché Geovà el te ama tanto! Parché che podemo creder nela promessa dela ressuression? Parché semo sicuri che Quel che el ga fato la promessa el vol e el pol realisarla. w23.04 p. 8, 9 §§ 2-4

Giusepe e Maria i savea che l’era tanto importante adorar a Geovà come fameia. (Luc. 2:22-24; 4:16) Par quela, lori i se ga sforsà insieme par far pi forte la so amicìssia con Geovà. Se valtri gavé fioi compagno a Giusepe e Maria i gavea, fursi l’è fadiga ndar a tute le riunion e torve el tempo par far el stùdio in fameia. E pol esser ancora pi fadiga par valtri due torve el tempo par studiar la Bìblia e pregar insieme. Alora, cossa che podé imparar del bel esémpio de Giusepe e Maria? Ricordeve che quando adoré a Geovà insieme, valtri resté pi unidi e pi amighi de Geovà. Cossita, no sté desmentegarve che la vostra adorassion a Geovà la ga de esser la roba pi importante dela vostra vita. Fursi valtri no gavé mia voia de far el stùdio in fameia parché sì drio infrontar problemi nel vostro matrimònio. Alora cossa che pol giutarve? Proé studiar qualcossa pìcola e che valtri due ve piaserà. Cossita, pin pianeto, ndaré far pi forte el amor intrà de valtri e voleré adorar a Geovà insieme. w23.05 p. 22 §§ 7, 8

Parché che gaver tanto rispeto par Dio ga giutà Obadia? Parché lu l’è deventà una persona de fidarse e l’è stà bon de mostrar tanto coraio. La Bìblia la mostra che Obadia el tendea dela casa del rè. (Varda anca Neemia 7:2.) In quel tempo, el rè l’era Acabe. (1 Rè 16:30) E Gesabel, che la era la dona de Acabe, la odiea tanto a Geovà, no la volea che nissuni lo adoresse e la ga fin copà tanti profeti de Dio. (1 Rè 18:4) Quando Gesabel la ga scominsià a proar copar i profeti de Geovà, Obadia el ga sconto sento de lori nte una caverna e ghe ga portà de magnar e de bever. (1 Rè 18:13) Sicuro che, se Gesabel la savesse cossa Obadia l’era drio far, la ndaria coparlo. Ma lu no’l volea mia morir. Alora, pol esser che lu el gavesse paura. Ancora cossita, lu el ga mostrà che el amea de pi a Geovà e ai so servi che a lu stesso. w23.06 p. 15, 16 §§ 9, 10

Geovà el seita a tender dei so servi compagno el ga fato nel passà. Ancoi, lu el dopera la so Parola, la Bìblia, e el so Fiol, che l’è la ‘autorità dele congregassion’. Sarà che podemo esser sicuri che lu el dopera òmini par tender dele congregassion ancoi? Sicuro che si. Varda par esémpio, quel che ga sucedesto con Charles Russell e altri òmini che i studiea la Bìblia insieme. Dopo del ano 1870, lori i ga capio che el ano de 1914 el saria tanto importante par el Regno de Dio. (Dan. 4:25, 26) E podemo esser sicuri che Geovà li ga giutadi a capir le professie dela Bìblia. Parché? Parché nel ano de 1914, el Regno de Dio el ga scominsià a governar. In quel ano, ga sucedesto la Prima Guera Mondial, e de lì avanti, ghen’è cada volta de pi malatie, teremoti e fame. (Luc. 21:10, 11) Semo sicuri che Geovà el ga doperà bravi òmini par giutar el so pòpolo. w24.02 p. 22 § 11

Noantri savemo che Geovà el ne ama tanto e el vol che semo pròpio felici. (Rom. 8:35-39) Noantri anca semo sicuri che meter in pràtica i consili dela Bìblia ndarà giutarne tanto. (Isa. 48:17, 18) Ma, cossa ghemo de far se vien fora qualche dificoltà de colpo? Par esémpio, pol esser che qualchedun dela nostra fameia el fae qualcossa che ne disgusta o no podemo far de pi par Geovà par causa de un problema de salute. Fursi sucede una desgràssia dela naturesa ndove semo de star o semo perseghidi parché adoremo a Geovà. Se sucede una roba de queste, pol esser che se domandemo: ‘Parché che questo l’è drio suceder con mi? Gonti fato qualcossa de sbalià? Sarà che Geovà no l’è pi drio benedirme?’ Se te ghè belche pensà cossita, no stà restar desanimà. Tanti servi fedeli de Geovà i se ga sentio come ti. — Sal. 22:1, 2; Aba. 1:2, 3. w23.04 p. 14 §§ 1, 2

Se vien voia de far una roba sbaliada, suito cavemo via quel pensamento Ghemo de ‘obedir a Geovà de tuto el cuor’ parché lu el vol. (Rom. 6:17) L’è vera che no podemo mia cambiar una lege de Geovà. Ma podemo esser sicuri che quel che Dio el ne domanda l’è sempre el meio par noantri. (Isa. 48:17, 18; 1 Cor. 6:9, 10) Sàtana el vol finir fora la nostra amicìssia con Geovà e la nostra voia de seitar firmi. (1 Pie. 5:8) Par quela, lu el dopera persone che le vien contra noantri par dirne su e fin par farne mal. Par esémpio, i primi dissìpoli de Gesù i ze stati perseghidi, i ga ciapà bote e arquanti i ze stati copadi parché i era dessididi de seitar a obedir a Geovà. (Ati 5:27, 28, 40; 7:54-60) Anca ancoi, Sàtana el dopera persone che le perseghe i nostri fradei e sorele in arquanti paesi, come nela Rùssia, ndove la perseghission del governo la ze pròpio bruta. Sàtana anca dopera “tràpole” par proar farne desobedir a Geovà. — Efe. 6:11. w23.07 p. 15, 16 §§ 6-9

Intanto che te studi la Bìblia, el to amor par Geovà el resta cada volta pi grando. E par causa de questo amor, te vol meter in pràtica quel che te sì drio imparar. Te fè meio dessision nela vita parché te vè drio a quel che la Bìblia la dise. E te ghè imparà a pensar e a far quel che l’è giusto par contentar a Geovà. Cossita, compagno a un toseto che el proa ndar drio el esémpio de so pare, ti te proi far compagno a Geovà. (Efe. 5:1, 2) Ancora cossita, saria bon che te te domandessi: ‘Sarà che el me amor par Geovà l’è pi grando adesso che quando go imparà la verità? Sarà che ancoi son pi bon de pensar e far le robe compagno a Geovà che dela època che son stà batesà? Son bon de mostrar cada volta pi amor ai me fradei e sorele?’ Ma, se el amor che te gavei prima el se ga sfredà, no stà restar desanimà. Nel passà, ga sucedesto una roba compagna con arquanti dissìpoli de Gesù, e lu li ga giutadi compagno el vol giutarne ancoi. (Apo. 2:4, 7) Gesù el sa che el to amor el pol tornar a esser grando come l’era nel scomìnsio. w23.07 p. 8 §§ 2, 3

El apòstolo Piero el ga fato arquanti bruti sbali. Prima, lu l’è stà massa sicuro de lu stesso e el ga dito che, anca se i altri apòstoli i ndaria abandonar a Gesù, lu mai lo faria. (Mar. 14:27-29) Dopo, Piero el se ga indormensà invesse de seitar atento. (Mar. 14:32, 37-41) E quando una mùcia de gente ga proà ndar contra Gesù, Piero el ga scampà via. (Mar. 14:50) Dopo tuti questi sbali, Piero el ga fato un bruto pecato. Par tre volte, lu el ga dito che no’l cognossea a Gesù e el ga fin giurà. (Mar. 14:66-71) Cossa ga sucedesto quando Piero el ga visto che el gavea fato questo bruto pecato? Lu l’è restà tanto desanimà e el ga sofrio tanto. (Mar. 14:72) Alora, invesse che seitar parlar dei sbali de Piero, Gesù el ga dato al so caro amigo altre responsabilità. (Gio. 21:15-17) Anca se Piero el savesse che el gavea fato un bruto pecato, lu no’l se ga mai fermà de far quel che l’è giusto. Parché? Parché l’era sicuro che el so Signor Gesù ancora lo amea. Cossa che impararemo? Geovà el vol che restemo sicuri che el ne ama e el ne perdona del tuto. — Rom. 8:38, 39. w24.03 p. 18, 19 §§ 13-15

Sicuro che l’è tanto meio scampar via invesse de acetar el convite dela dona stùpida. Parché? Parché quei che i fà imoralità i se sente in vergogna, i sente che no i ga mia valor, i spartisse le so fameie e pol esser che vien fora fioi che no i volea mia. Quei che i fà imoralità anca i ndarà perder la so amicìssia con Geovà, fursi i restarà maladi e i podarà fin morir. (Pro. 7:23) Proverbi 9:18 dise che quei che i ghe va drio el convite dela dona stùpida “no i sa che quei che i ze lì i ze sensa vita, gnanca che quei che i va rento i ze nel fondo del Sepolcro”. (Pro. 9:13-18) Ghemo de star distante dela tràpola dela pornografia. Tanti i dise che no ghen’è mia problema vardar pornografia. Ma questa la ze una roba tanto bruta che la pol deventar un vìssio e fursi la persona no la sarà pi bona desmentegarse quel che la ga visto. La pornografia la fà le persone gaver ancora pi voia de far quel che l’è sbalià e perder el rispeto par lore stesse e par i altri. (Col. 3:5; Tia. 1:14, 15) Par quela, tanti de quei che i vede pornografia i fà bruti pecati. w23.06 p. 23 §§ 10, 11

Ancora che tanti altri governi i vien contra la Potensa Anglo-Americana, no i sarà mia boni de tor el so poder. Parché? Parché la Bìblia la mostra che sarà el Regno de Dio, o sia, “el sasso”, che el ndarà spacar i pié dela stàtua e finir fora la Potensa Anglo-Americana. (Dan. 2:34, 35, 44, 45) Sito sicuro che la professia de Daniel sora i pié de fero e de baro la ze vera? Alora, te ndarè far bone dessision. Come cossita? Ti no te ndarè mia in serca de ciapar pi soldi o far su capital parché te sè che suito questo mondo el sarà finio fora. (Luc. 12:16-21; 1 Gio. 2:15-17) Se te capissi ben questa professia, te saverè che l’è tanto importante predicar e insegnar i altri. (Mat. 6:33; 28:18-20) Alora, dopo che te studi questa professia, proa domandarte: ‘Sarà che le dessision che fao le mostra che son sicuro che el Regno de Dio suito el ndarà finir fora i governi dei òmini?’ w23.08 p. 11 §§ 13, 14

Te ghè de esser ùmile e capir che fursi no te sì mia pi bon de far quel che te volarissi parché te sì belche vècio, te sì malà o par causa de altri problemi. Alora, compagno a Barzilai, dighe de nò quando te vedi che no te sì bon de far un laoro. (2 Sam. 19:35, 36) Fà compagno a Moisè, domanda aiuto ai altri e daghe i laori che no te sarè bon de far. (Éso. 18:21, 22) Se te sì ùmile, te restarè contento con quel che te sì bon de far. Anca, no ghemo mia de sentirse in colpa par causa dele brute dessision dei altri. Noantri no podemo mia far dessision nel posto dei altri gnanca protegerli de quel che vien fora dopo che i fà una bruta dessision. Par esémpio, se un fiol el desside che no’l vol pi servir a Geovà, sicuro che i genitori i ndarà sofrir tanto. Ma, se lori i se sente in colpa par causa dele brute dessision del so fiol, i ndarà portar drio la schena un peso massa fadiga. Geovà no’l vol mia che i porte questo peso. w23.08 p. 29 §§ 11, 12

Sanson el ga fato arquante dessision che le ze state de acordo con quel che Geovà el volea. Par esémpio, una volta, Geovà el ga volesto che lu el se maridesse con una dona filistea. Cossita, Sanson el podaria ndar contra i filistei. Dopo un tempo, lu l’è ndato ala casa de una prostituta, in Gaza nela Filìstia. Savemo che questo l’era de acordo cola volontà de Geovà parché lu el ga giutà Sanson a ndar contra quei filistei e a portar via i portoni de quela cità. (Giui. 14:1-4; 16:1-3) Ma, compagno a noantri, Sanson l’era imperfeto e el ga fato brute dessision. Una dele pedo dessision che el ga fato l’è stà scominsiar a smorosar Dalila, una tosa del Vale de Soreche. Come fursi ela la era israelita, smorosarla no ndaria mia giutar Sanson a ndar contra i filistei. Alora, invesse de far quel che Geovà el volea, Sanson el ga fato quel che el volea lu. I filistei i volea saver parché che Sanson el gavea tuta quela forsa e i ghe ga dato soldi a Dalila par imbroiarlo. w23.09 p. 5 §§ 12, 13

Quando qualchedun el ne fà una domanda sora quel che credemo, ghemo de proar capir parché che ne la ga fata. Se pensemo cossita, saremo boni de controlar quel che parlemo e quel che femo. Quasi sempre la persona no la spiega parché che la ga quel dùbio. Par quela, prima de risponderghe, ghemo de ricordarse che no savemo mia cossa che la ze drio pensar. (Pro. 16:23) Varda quel che ga sucedesto con Gideon. I òmini de Efrain i ze restadi cativi e i ghe ga domandà parché lu no li gavea ciamadi par lotar contra i nemighi de Israel. Pol esser che i se ga ofendesto parché i pensea che ghe tochea esser insieme. Cossa che Gideon el ga fato? Lu el ga proà capir quel che i era drio sentir e el ghe ga rispondesto con calma. Cossita, ‘i òmini de Efrain i se ga calmà’. — Giui. 8:1-3. w23.09 p. 16 §§ 8, 9

Geovà e Gesù i ga el amor e la amicìssia pi forte che ghen’è. Sicuro che Geovà l’è restà tanto disgustà de veder che Gesù el ga ciapà bote, l’è stà odià par le persone e el ga sofrio tanto. Anca se credemo nela ressuression, tuti noantri sofrimo tanto quando perdemo qualchedun che amemo nela morte. Alora, proa pensa el dolor che un pare e una mare i sente se el so caro fiol el more. Pensar sora questo ne giuta a capir quel che Geovà el ga sentio de veder el so caro Fiol sofrir e morir. (Mat. 3:17) De adesso avanti, stùdia de pi sora el sacrifìssio de Gesù quando te ledi la Bìblia o nela to adorassion in fameia. E quando riva el giorno dela Selebrassion, ricòrdate de vardar la Adorassion Matinal Spessial. Se pensemo sora el sacrifìssio de Gesù, semo boni de giutar anca i altri a darghe valor a quel che el ga fato. — Esd. 7:10. w24.01 p. 11 §§ 10-12

Una roba che podemo far par ricever el aiuto de Geovà la ze pregar. Lu el ndarà risponderne e el ne darà “el poder che l’è pi grando del normal”. (2 Cor. 4:7) Nantra roba che podemo far la ze leder la Bìblia e pensarghe sora quel che ghemo ledesto. (Sal. 86:11) Geovà el ga scrito la Bìblia par giutarne, e la so Parola “la ga poder”. (Ebr. 4:12) Alora, se ti te preghi a Geovà e te ledi la Bìblia, te riceverè la forsa che te ocore. Cossita, te sarè bon de seitar a laorar fedele e contento anca se te ghè qualche dificoltà. Varda come che Geovà el ga giutà el profeta Giona. Quando Geovà el ghe ga domandà de far un laoro che no l’era mia fàcile, Giona el ga scampà via. Par quela, lu e altre persone i ze quasi morti par via de una granda tempesta. Dopo, quando i marineri i lo ga butà fora del barco, Giona l’è ndato rento la pansa de un grando pesse. Alora, cossa galo fato par ricever forsa? Prima, lu el ga pregà a Geovà. — Giona 2:1, 2, 7. w23.10 p. 13 §§ 4-6

Noantri vivemo nte una època che tante persone le fà robe sbaliade. Par quela, pol esser fadiga servir a Geovà. Anca savemo che suito ndaremo infrontar una granda tribolassion che la sarà pedo de quela che i fradei giudei i ga infrontà. Alora, ancora che el apòstolo Piero el gàpia scrito le due carte par i fradei del primo sècolo, Geovà el ga volesto che le fusse meteste nela Bìblia parché le pol giutar tanto a noantri. (Rom. 15:4) Intorno de noantri, ghen’è tanti che no i crede in quel che la Bìblia la dise sora el futuro. Arquanti i crede che el fin no’l vegnarà mai e i ne ride drio parché fà tanti ani che semo drio spetar el fin. (2 Pie. 3:3, 4) Alora, se scoltemo una roba cossita de qualchedun nela predicassion, nel laoro o nela fameia, pol esser che la nostra fede la reste pi fiaca. Ndemo veder come quel che Piero el ga scrito pol giutarne. Fursi arquanti i pense che Geovà l’è drio meterghe massa par finir fora questo mondo. Ma, quel che Piero el ga scrito ne giuta a spetar con passiensa. Parché? Parché ne fà ricordarse che el tempo de Geovà l’è difarente del nostro. (2 Pie. 3:8, 9) Mila ani par noantri l’è un giorno par lu. E Geovà anca el ga tanta passiensa parché no’l vol che nissuni sìpia finidi fora. Magari, quando riva la ora, Dio el ndarà finir fora questo mondo. w23.09 p. 26, 27 §§ 2-5

Parché che el apòstolo Paolo el ga scrito quela carta ai fradei ebrei? Pol esser che el gavesse due robe in mente. Prima, fursi lu el volea incoraiarli. Tanti de lori i era stati slevadi nela religion dei giudei e dopo che i ze deventadi dissìpoli de Gesù, i lìderi religiosi giudei i ghe ridea drio. Parché? Parché i fradei no i gavea mia un témpio par adorar a Dio, un altar par far sacrifissi gnanca sasserdoti. Par quela, quei fradei i podaria restar desanimadi, la so fede la restaria fiaca e i podaria fin pensar de tornar ala religion dei giudei. (Ebr. 3:12, 14) Seconda, Paolo el ga giutà quei fradei a veder che ghe tochea studiar anca le verità che le era pi fadiga de capir. (Ebr. 5:11-14) Arquanti de lori ancora i ghe ndea drio ala Lege de Moisè. w23.10 p. 24, 25 §§ 3, 4

Arquante done no le vol maridarse. (Mat. 19:10-12) In tuto el mondo ghen’è sorele che no le se ga mia maridà e che le ze un bel esémpio par i altri. Come lore le mostra amor e preocupassion coi altri, le deventa come sorele e mare par tanti nela congregassion. (Mar. 10:29, 30) Arquante de queste done le ga fato de pi par Geovà. Le sorele le dà un bel aiuto nela predicassion in tuto el mondo. (Sal. 68:11) Alora, proa anca ti far de pi par Geovà. Te pol esser una pioniera, giutar nela costrussion o ndar a Betel. Cossa che pol giutarte? Prega a Geovà sora quel che te vol far e parla con fradei che i ze stati boni de far de pi. Dopo, proa pensa cossa che te ghè de cambiar par esser bona de far quel che te ghè pensà. E sìpia sicura che, se te dessidi far de pi par Geovà, to vita la sarà tanto bela. w23.12 p. 22 §§ 16, 17

Come la granda tribolassion la ze pròpio darente, ghemo de sforsarse par far el nostro meio nela predicassion. Magari, pol esser che sìpia fadiga seitar a predicar se ne manca soldi o se semo drio infrontar perseghission. Alora, no ne ocore gaver paura de gnente, parché “Geovà dei esèrsiti” l’è dela nostra banda. Se la roba pi importante dela nostra vita la ze servir a Geovà, podemo esser sicuri che lu el ndarà giutarne. (Ageo 2:4) Ageo el ga dito che Geovà el ndaria benedirli se i se sforsesse de finir la costrussion del témpio. (Ageo 2:18, 19) L’è cossita anca con noantri ancoi. Geovà el vol che el laoro de far dissìpoli el sìpia la roba pi importante dela nostra vita. E se noantri se sforsemo de far questo laoro, Geovà el ndarà benedir anca noantri. w23.11 p. 16 § 8; p. 17 § 11

Nela so carta ai romani, el apòstolo Paolo el ga dito che tuti noantri sbaliemo. Alora, par giutarne a capir come che podemo esser giusti ndemo veder quel che Paolo el ga parlà sora Abraon. Quando Abraon l’era de star nela tera de Canaan, Geovà el ga dito che lu l’era un omo giusto. Ma sarà che Geovà el ga dito cossita parché Abraon el obedia ala Lege de Moisè de maniera perfeta? Nò. (Rom. 4:13) Questa lege sol la ze stata data ai israeliti de pi de 400 ani dopo che Geovà el gavea dito che Abraon l’era giusto. Invesse, Geovà el ga mostrà bontà a Abraon e el ga dito che lu l’era giusto par causa dela fede che el gavea. — Rom. 4:2-4. w23.12 p. 3 §§ 4, 5

Nte una note, Geovà el ga dito al profeta Natan che Davi no’l ndaria mia far su el témpio. (1 Cró. 17:3, 4, 11, 12) Alora, cossa che Davi el ga fato quando el profeta Natan ghe ga dito questo? Davi el ga scominsià a imuciar su soldi e robe che Salomon ghe ocoreria par far su el témpio. (1 Cró. 29:1-5) Pena dopo che Davi el ga savesto che no’l ndaria mia far su el témpio, Geovà el ghe ga prometesto che un dei so dissendenti el saria rè par sempre. (2 Sam. 7:16) Alora, pensa come Davi el restarà contento de saver che el Rè Gesù l’è un dei so dissendenti. Quel che ga sucedesto con Davi ne insegna che, anca se no podemo far tuto quel che volemo, Geovà el ndarà benedirne de altre maniere che fursi no ghemo mai pensà. w23.04 p. 15, 16 §§ 8-10

Arquanti testi dela Bìblia i pol darte tanto consolo. Par esémpio, i libri de Giò, Salmo, Proverbi e le parole de Gesù in Mateo capìtolo 6 pol giutarte tanto. Cossita, se te preghi a Geovà e te ledi la so Parola, te gavarè el consolo che te ocore. Noantri podemo esser sicuri che Geovà mai el assarà noantri soli e sempre el ndarà giutarne a infrontar le dificoltà nela nostra vita. (Sal. 23:4) Geovà anca el promete che el ndarà giutarne a pensar dela maniera giusta e darne pace, forsa e consolo. Isaia 26:3 dise: “Te ndarè proteger quei che i se fida del tuto in ti. Ti te ndarè darghe pace par sempre parché i se fida in ti.” Alora, fìdate in Geovà e aceta el aiuto che lu el vol darte. Cossita, te gavarè la forsa che te ocore par dàrghene fora con tute le dificoltà. w24.01 p. 25 §§ 16, 17

Semo belche drio veder questa professia realisarse, mia vera? La Bìblia anca la dise che ‘Geovà el insegnarà tuti i to fioi, e lori i gavarà tanta pace. Ti te sarè pròpio firme parché te fè quel che l’è giusto. Ti no te gavarè gnanca una paura.’ (Isa. 54:13, 14) Podemo esser sicuri che gnanca Sàtana, che l’è el “dio de questo mondo”, el pol intrigarne de insegnar le persone sora Geovà. (2 Cor. 4:4) Noantri semo drio adorar a Geovà dela maniera giusta ancoi e seitaremo a adorarlo cossita par sempre. Gnanca una roba la podarà finir coi servi de Geovà! w24.02 p. 4 § 10

Tuti noantri savemo che la nostra dedicassion a Geovà la ze tanto importante. Par quela che, in tute le dessision che femo nela vita, noantri se sforsemo de far quel che Geovà el vol. Par esémpio, anca se femo tuto quel che podemo par tender ben dela nostra fameia, ela mai la sarà pi importante che Geovà. (Mat. 10:35-36; 1 Tim. 5:8) Alora, pol esser che, par obedir a Geovà, dele volte ndaremo fin far qualcossa che la nostra fameia no la ghe piase mia. Lu el ga creà la fameia e el vol che tute le sìpia felice. (Efe. 3:14, 15) Ma se volemo esser pròpio felici, ghemo de obedir a Geovà e far tuto come lu el vol. Alora, sìpia sicuro che Geovà el resta tanto contento quando te proi far el to meio par servirlo e par tratar la to fameia con amor e rispeto. — Rom. 12:10. w24.02 p. 18 §§ 11, 13