Marso

El novo mondo no l’è gnancora vegnesto. Ma pensa nele stele, nele piante, nele bèstie e nele persone. Tute queste robe no esistia mia una volta, ma Geovà le ga creade. (Gén. 1:1, 26, 27) Geovà el ga prometesto che ghen sarà un paradiso ndove viveremo par sempre con salute perfeta. Alora, semo sicuri che el novo mondo el vegnarà nela ora che Geovà el vol. (Isa. 65:17; Apo. 21:3, 4) Intanto che te speti el novo mondo, dopera el to tempo par far pi forte la to fede. Come? Daghe sempre valor al sacrifìssio de Gesù, pensaghe sora el poder de Geovà e fà le robe che te giuta a esser ancora pi amigo de Dio. Cossita, te sarè intrà “de quei che con fede e passiensa i riceve le promesse”. — Ebr. 6:11, 12. w23.04 p. 31 §§ 18, 19.

Gesù el ndaria far una roba de gnanca creder e el volea dar tuta la glòria a Geovà. Par quela, lu el ga vardà su in cielo e el ga pregà. Dopo, Gesù el ga dito: “Làsaro, vien fora!” (Gio. 11:43) Cossita, Làsaro el se ga levà su e l’è ndato fora dela tomba. Questa stòria fà ancora pi forte la nostra fede nela ressuression. Come? Prima, pensa nela promessa che Gesù el ga fato a Marta: “To fradel el tornarà a viver.” (Gio. 11:23) Compagno a so pare, anca Gesù el vol e el pol far quel che el ga prometesto. Quando lu el ga piandesto, el ga mostrà che el vol ressussitar le persone e finir col sofrimento che ghen’è par causa dela morte. Dopo, ghemo visto che Gesù el pol ressussitar i morti parché l’è stà bon de ressussitar Làsaro. Lu el ga dito a Marta quel che dise el testo de ancoi. Sicuro che podemo fidarse che la promessa dela ressuression la ndarà pròpio suceder. w23.04 p. 11, 12 §§ 15, 16

Pol esser che, quando capimo meio cossa che Geovà el vol, ne tocarà cambiar quel che ghe domandemo. Geovà el vol tanto finir fora con tuti i sofrimenti che ghemo ancoi. Par quela, lu el ndarà finir fora cole malatie, cola morte e cole desgràssie dela naturesa. (Dan. 2:44; Apo. 21:3, 4) Ma, quando preghemo a Geovà, ghemo de ricordarse che lu sol el ndarà far quel che el ga prometesto nela ora giusta. Parché? Parché ancoi l’è Sàtana che el governa el mondo. (Gio. 12:31; Apo. 12:9) Par quela, se Geovà el finissesse fora con tuti i problemi che ghemo, tanti i ndaria pensar che Sàtana l’è drio governar ben. Cossita, ne ocore spetar fin che Geovà el fae tuto quel che el ga prometesto. Geovà el ndarà giutarne. w23.05 p. 8 § 4; p. 9, 10 §§ 7, 8

Come che te pol giutar i altri a ndar ala Selebrassion? La prima roba che te ghè de far l’è convidarli. Te pol scriver do el nome dele persone che te vol convidar, come quei dela to fameia, del laoro o dela scola. Anca se no te ghè mia conviti stampadi par tuti, proa mandarghe el link del convite che ghen’è nel site. Fursi te restarè maraveià de veder che tanti i ndarà acetar el convite. (Ecl. 11:6) Noantri ghemo de ricordarse che quei che convidemo par la Selebrassion fursi i ne fae domande. Par quela, podemo pensar nele domande che lori i pol farne e esser pareciadi par risponderghe. Pol esser che quei che i ze ndati ala Selebrassion i gàpia domande de farne. Alora, sfòrsate de doperar del to tempo vanti e anca dopo dela Selebrassion par giutar tute le persone che te pol. — Ati 13:48. w24.01 p. 12 §§ 13, 15; p. 13 § 16

Nela Bìblia, ledemo sora oto persone che le ze state ressussitade par viver nela Tera. Alora, te pol torte el tempo par studiar cada una de queste ressuression. Intanto che te sì drio studiarle, proa pensar in quel che te pol imparar. Alora, te sarè ancora pi sicuro che Dio el vol e el pol far i morti viver nantra volta. Ma l’è ancora pi importante pensarghe sora la ressuression de Gesù. Parché? Parché tante persone lo ga visto dopo che l’è stà ressussità, e la so ressuression la ze tanto importante par la nostra speransa. (1 Cor. 15:3-6, 20-22) Semo tanto contenti de cognosser la promessa de Geovà de ressussitar quei che i ze morti. E podemo esser pròpio sicuri che lori i tornarà a viver parché Geovà el vol e el pol far quel che el ga prometesto. Alora, volemo far ancora pi forte la nostra fede in questa bela promessa. Cossita, saremo cada volta pi amighi de Geovà, el Dio che el ga prometesto: ‘Quei che ti te ami i tornarà a viver!’ — Gio. 11:23. w23.04 p. 8 § 2; p. 12 § 17; p. 13 § 20

La umiltà e la modèstia le ze qualità quasi compagne. Una persona modesta no la pensa che la ze meio dei altri e la sa quel che no la ze bona de far. Una persona ùmile la rispeta i altri e la pensa che lori i ze pi importanti. (Fil. 2:3) Quasi sempre una persona modesta anca la ze ùmile. Quando el àngelo de Geovà el ga dito a Gideon che lu el ndaria salvar Israel dei so nemighi tanto poderosi, lu el ghe ga rispondesto: “La me fameia la ze la pi pìcola dela tribo de Manassè, e mi son el manco importante nela casa de me pare.” (Giui. 6:15) Gideon l’era ùmile e modesto e el pensea che no’l podaria salvar Israel. Ma Geovà el savea che lu el saria bon e lo ga giutà. I ansiani i ga de sforsarse tanto par esser ùmili. (Ati 20:18, 19) Par quela, lori no i se spròsia par causa dele so abilità o de quel che i ga fato. Ma, i ansiani gnanca i ga de pensar che i ze poco gnente par causa dei so sbali. w23.06 p. 3 §§ 4, 5

La testa de Sàtana sol la sarà schissada dopo del Governo de Mila Ani de Cristo. (Apo. 20:7-10) Ma la Bìblia la parla de arquante robe che le ndarà suceder vanti. Prima, le nassion le ndarà dir: “Vivemo in pace e sensa paura!” (1 Tes. 5:2, 3) Alora, de colpo, le nassion le vegnarà contra le religion false, e scominsiarà la granda tribolassion. (Apo. 17:16) Dopo, Gesù el ndarà spartir le piégore dele cavre. (Mat. 25:31-33, 46) Ancora cossita, Sàtana el ndarà doperar un grupo de nassion par ndar contra i servi de Dio. La Bìblia la dise che questo grupo de nassion ga nome Goghe de Magoghe. (Eze. 38:2, 10, 11) Alora, i untadi che ancora i ze nela Tera i sarà portadi al cielo par lotar insieme a Gesù e i so àngeli nela guera del Armagedon. (Mat. 24:31; Apo. 16:14, 16) Dopo, el Regno de Dio el ndarà governar qua nela Tera par mila ani. — Apo. 20:6. w23.10 p. 20, 21 §§ 9, 10

Ancoi, tanti fradei che i ze de star in posti ndove i ze proibidi de adorar a Geovà i mostra coraio compagno Obadia. Come? Anca se lori i rispeta i governi, mai i se ferma de servir a Geovà. (Mat. 22:21) Questi fradei i mostra che i ga tanto rispeto par Geovà parché i seita a obedirghe, no importa cossa che i òmini i dise. (Ati 5:29) Par esémpio, lori mai i se ferma de predicar e de far le riunion, anca se ghe toca farlo sconto. (Mat. 10:16, 28) Lori anca i giuta altri fradei e sorele a seitar a gaver una forte fede. Varda el esémpio del fradel Henri. Lu l’è de star nte un posto dela Àfrica ndove, par un tempo, le Testimònie de Geovà no le era lìbere par adorar a Dio. In quela època, lu el ga volesto giutar a portar le publicassion par i fradei. Lu el ga dito: “Mi go sempre bio tanta vergogna de parlar coi altri.. . . Geovà el me ga giutà a mostrar coraio.” Anca ti te pol mostrar coraio compagno a Henri se te temi a Geovà, o sia, se te ghè tanto rispeto par lu. w23.06 p. 15, 16 §§ 9, 11

Quando Adon e Eva i ga desobedio a Dio, Sàtana el ga pensà che el saria bon de intrigar Geovà. Alora, sarà che Geovà el saria bon de ancora far la so volontà? Fursi, Sàtana el pensesse che Geovà no’l saria pi bon de far quel che el gavea prometesto. Geovà el podaria finir fora con Adon e Eva e far nantro omo e nantra dona che i fusse boni de gaver fioi perfeti. Ma, se lu el fesse cossita, lu el saria un busier. Parché? Parché in Génesi 1:28, lu el gavea dito che i fioi de Adon e Eva i ndaria impienir la Tera. Pol esser che Sàtana el ga pensà che Geovà el assaria che Adon e Eva i gavesse fioi, ma che mai i saria perfeti. (Ecl. 7:20; Rom. 3:23) Se questo sucedesse, Sàtana el podaria dir che Geovà no l’era mia bon de far quel che el gavea prometesto. Parché? Parché Geovà el gavea dito che la Tera la deventaria un Paradiso e che i fioi perfeti e obedienti de Adon e Eva i viveria lì. w23.11 p. 6 §§ 15, 16

Semo sicuri che Geovà el ne dà tute le orientassion che ne ocore par meso dela so organisassion e dela Bìblia. Alora, mai ndaremo proar far règole par i nostri fradei e sorele. (Pro. 3:5-7) Sàtana el dopera busie e anca tante robe che arquante persone le crede par imbroiarle e farle restar una contra l’altra. (Col. 2:8) Nela època dei apòstoli, ghen’era gente che disea che i dissìpoli de Gesù i gavea de obedir ala lege de Moisè, arquanti i insegnea costumi dei giudei che no ghen’era mia nele Scriture e altri i ndea drio idee dele persone. Cossita, tanti i ze restadi distante de Geovà, quel che el ga la vera sabedoria. Ancoi, Sàtana el dopera la television, ràdio, giornai e la internet par far le persone creder in storiete e in busie che tanti polìtichi i conta. w23.07 16 §§ 11, 12

Sàtana no l’è stà mia bon de pensar cossa che Geovà el ndaria far. Geovà el ga cambià tuto quel che ghe ocorea par far la so volontà. Lu el ga mostrà che no l’è mia un busier parché el ga assà che Adon e Eva i gavesse fioi. Dopo, lu el ga mandà un dissendente par salvar i fioi de Adon e Eva che i fusse obedienti. Cossita, la so volontà la ndarà realisarse. El dissendente che Geovà el gavea prometesto el ga dato la so vita par salvar a tanti. (Gén. 3:15; 22:18) Geovà el ga fato tuto questo par causa del so grando amor. Come Sàtana el pensa sol in lu stesso e no’l ga amor, lu mai el spetea che Geovà el ndaria far una roba cossita. (Mat. 20:28; Gio. 3:16) Alora, cossa che ndarà suceder cole persone? Dopo el Governo de Mila Ani de Gesù, quei che i obedisse a Geovà i sarà perfeti e tuta la Tera la sarà un Paradiso, compagno quel che Geovà el ga dito che ndaria suceder. w23.11 p. 6 § 17

Noantri obedimo ala lege de Geovà de no acetar mia sangue. Parché? Parché Geovà el ga dito che el sangue l’è la vita dela persona, e la vita la ze un presente tanto pressioso che lu el ne ga dato. (Lev. 17:14) La prima volta che Geovà el ga dito che le persone le podaria magnar la carne dele bèstie, lu el ghe ga dito che no le podaria mia magnar el sangue. (Gén. 9:4) Dopo, quando Geovà el ga dato la Lege ai israeliti par meso de Moisè, lu el ga dito nantra volta che no i gavaria mia de magnar el sangue. (Lev. 17:10) E Geovà el ga doperà el Corpo Governante del passà par dirghe ai primi dissìpoli de Gesù che ‘no i gavaria de acetar el sangue’. (Ati 15:28, 29) Anca noantri sempre obedimo a questo comandamento quando ghemo de dessider che tipo de tratamento de salute ndaremo far. Anca vivemo dela maniera che Dio el dise che l’è giusto. El apòstolo Paolo el ga dito che ghemo de sforsarse par finir fora cole voie de far robe sbaliade. Par quela, mai ndaremo vardar o far qualcossa che podaria portarne a far imoralità sessual. — Col. 3:5; Giò 31:1. w23.07 p. 15 §§ 5, 6

Pol esser che Sanson l’era pròpio passionà par Dalila e par quela no l’è mia stà bon de far quel che l’è giusto. Dalila la ga tacà a domandarghe una volta drio man parché lu el gavea tanta forsa fin che lu la ga contada. Lu ghe volea tanto ben e no l’è mia nicorto che la era drio imbroiarlo. Par causa de questo sbàlio, Sanson el ga perso la so forsa e la benedission de Geovà par un tempo. (Giui. 16:16-20) Sanson el ga sofrio tanto parché el se ga fidà in Dalila invesse de fidarse in Geovà. I filistei i lo ga metesto nte una preson in Gaza. Lori anca i lo ga assà orbo e i lo ga fato deventar un schiavo che el schissea i grani. Dopo, i filistei i ga fato una festa par el so dio Dagon e i ga menà Sanson lì. Lori i pensea che i era stati boni de vinser Sanson par causa del so falso dio. Par quela, i ga menà Sanson lì par riderghe drio e diverstirse. — Giui. 16:21-25. w23.09 p. 5 §§ 13, 14

Pol esser che qualchedun nela scola o nel laoro el ne domande parché che obedimo a quel che la Bìblia la dise. Se ne sucede una roba cossita, ndaremo sforsarse de spiegarghe quel che credemo con rispeto. (1 Pie. 3:15) Cossa che pol giutarne? Invesse de pensar che la persona la vol dirne su, ghemo de pensar parché che la ga fato quela domanda. Cossita, pol esser che la càmbie quel che la pensa sora noantri. Varda un esémpio. Se un colega nel laoro el vol saver parché che no ndemo a feste de aniversàrio, podemo domandarse: ‘Sarà che lu l’è drio pensar che no se divertimo mia?’ Podemo dirghe che l’è tanto bel che el se preocupe coi coleghi. Se femo cossita, sarà pi fàcile de spiegarghe quel che la Bìblia la dise sora feste de aniversàrio. w23.09 p. 17 §§ 10, 11

Alora, sicuro che restemo tanto contenti de doperar el tempo che ghemo par predicar ale persone in tuta la Tera. El apòstolo Piero el ga dito che l’è tanto importante ‘gaver ben in mente el giorno de Geovà’. (2 Pie. 3:11, 12) Come che podemo far questo? Tuti i giorni, ghemo de pensarghe sora le benedission che gavaremo nel novo mondo. Alora, proa imaginar come che sarà bel tirar el fià cola ària pura, magnar robe bone sensa velen, catar nantra volta i nostri cari amighi e persone dela fameia che i ze morti e insegnar la Bìblia a persone che le ga vivesto tanto tempo indrio. Se ghe pensemo sora queste benedission, saremo sicuri che suito vien el fin e saremo boni de spetarlo con passiensa. E come savemo dele robe che le ndarà suceder nel futuro, no saremo mia imbroiadi par le busie. w23.09 p. 27 §§ 5, 6

I gióveni i ze in meso a tanta gente che ‘desobedisse ai genitori’. (2 Tim. 3:1, 2) Tanti i fà fadiga obedir a so pare e so mare parché i pensa che lori i dise una roba e i fà nantra. Altri gióveni i pensa che i consili de so genitori i ze de sti ani e che no l’è mia fàcile far quel che i ghe domanda. Par quela, tanti no i ze mia boni far quel che Geovà el ga dito nel testo del giorno de ancoi. Se te sì un gióveno, pol esser che te te ghè belche sentio cossita. Alora, cossa che pol giutarte a esser obediente? Te pol imparar a esser obediente col bel esémpio che Gesù el ga dato. (1 Pie. 2:21-24) Lu l’era perfeto, ma so pare e so mare i sbaliea e tante volte no i era boni capirlo. Stesso cossita, Gesù l’è stà obediente a lori. — Éso. 20:12. w23.10 p. 7 §§ 4, 5

El apòstolo Paolo el ga spiegà che, come i sacrifissi no ghe bastea par pagar i so pecati, no ghe tochea pi obedir a quela Lege. Lu anca li ga giutadi a ricordarse che, par causa del sacrifìssio de Gesù, lori i gavea una speransa ancora meio e i podea deventar amighi de Dio. (Ebr. 7:19) Paolo el ga spiegà a quei fradei parché che la maniera che i era drio adorar a Dio la era tanto meio de quela che i giudei i fea nel passà de acordo cola Lege de Moisè. Lu el ga dito che la religion dei giudei la era sol una ombria de quel che vegnaria dopo de Cristo. (Col. 2:17) Come cossita? Una ombria sol la mostra come che l’è un mestier, ma no l’è mia pròpio el mestier. Alora, la maniera che i giudei i adorea a Geovà la era sol una ombria de come i so servi i gavaria de adorarlo nel so grando témpio spiritual. Par quela, ghemo de capir quel che Paolo el ga dito ai ebrei sora el grando témpio spiritual. Sol cossita saremo boni de saver come che Geovà el vol che lo adoremo e come che podemo gaver el perdon dei nostri pecati. w23.10 p. 25 §§ 4, 5

El capìtolo 11 de Daniel el parla de due rè, o governi, che i va un contra quelaltro par veder chi che l’è pi poderoso. Dopo de vardar altre professie dela Bìblia, capimo che el “rè del nort” l’è la Rùssia e quei che i la giuta e el “rè del sud” l’è la Potensa Anglo-Americana. I servi de Dio che i vive ndove el rè del nort el governa i sofre tanta perseghission. Par causa dela so fede in Geovà, arquanti fradei i ze drio esser metesti in preson e i ze drio ciapar bote. Ma, invesse de restar spauradi, la so fede la resta ancora pi forte. Parché? Lori i cognosse le professie dela Bìblia, come quela de Daniel, e i capisse che le ze belche drio suceder. (Dan. 11:41) Cognosser queste professie giuta anca noantri a gaver una forte speransa e a seitar leai a Geovà. w23.08 p. 11 §§ 15, 16

Geovà el ne ama tanto che ga dito che l’è come se noantri fùssino so òcio. El òcio l’è una parte pròpio importante del corpo, e se va rento qualcossa, sentimo suito. Alora, l’è come se Geovà el gavesse dito: ‘Se qualchedun el ve fà mal, l’è drio farghe mal a una roba tanto importante par mi.’ Par quela, lu el capisse suito quel che sentimo e el ne protege. Lu el resta disgustà quando sofrimo. Alora, podemo esser sicuri che lu el ndarà scoltarne se preghemo: ‘Tendi de mi come se fusse el to òcio.’ (Sal. 17:8) Geovà el vol che te sìpie sicuro che lu el te ama. Ma lu el sa che, par causa dele dificoltà che te ghè adesso o che te ghè bio nel passà, fursi te fè fadiga creder che lu el te ama del bon. Alora, come che te pol esser pròpio sicuro che Geovà el te ama? Te ghè de imparar come Geovà el mostra che el ama a Gesù, i untadi e tuti noantri. w24.01 p. 27 §§ 6, 7

Esdra el ga visto che Geovà el giuta i so servi quando i ze drio tribolar. Vanti de ndar a Gerusalen, Esdra l’era de star in Babilònia insieme de altri giudei. Nel ano 484 vanti de Cristo, el rè Assuero el ga mandà copar tuti i giudei che i era de star nele tere che lu el comandea. (Est. 3:7, 13-15) Esdra e altri giudei i ze restadi pròpio spauradi parché i saria copadi. Alora, lori i se ga fermà de magnar, i ga tacà a piander e a pregar che Geovà li giutesse. (Est. 4:3) Sicuro che Esdra e altri giudei i se ga fidà ancora de pi in Geovà dopo che i ga visto che tuti i so nemighi i ze stati copadi! (Est. 9:1, 2) Tute queste robe che ga sucedesto ga giutà Esdra a far pi forte la confiansa che Geovà el ndaria proteger i so servi. w23.11 p. 17 §§ 12, 13

El apòstolo Paolo l’era drio parlar sora la Lege de Moisè. (Rom. 3:21, 28) In quela època, arquanti dissìpoli de Gesù che i era giudei i pensea che ancora ghe ocorea obedir ala Lege de Moisè. Par quela, Paolo el ga doperà el esémpio de Abraon par spiegarghe che una persona la pol esser giusta par via dela so fede e nò parché la obedisse ala Lege de Moisè. L’è pròpio bel capir ben quel che Paolo el ga dito parché podemo esser giusti anca noantri se ghemo fede! Ma, quando Tiago l’era drio scriver la so carta, lu no l’era drio parlar sora obedir ala Lege de Moisè. (Tia. 2:24) Invesse, Tiago el ga spiegà sora quel che i dissìpoli de Gesù i ga de far par mostrar se i ga fede in Geovà o nò. w23.12 p. 3 § 8; p. 4, 5 §§ 10, 11

Se te vol maridarte, ricòrdate che te gavarè de rispetar la autorità de to omo. Par quela, te toca scòlier un bravo omo. (Rom. 7:2; Efe. 5:33) Alora, proa domandarte: ‘Sarà che lu l’è un bravo servo de Geovà? El laoro par Dio l’è la roba pi importante dela so vita? Lu el fà bone dessision e l’è bon de capir quando el fà qualcossa sbaliada? Lu el rispeta le done? Saralo bon de darme quel che me ocore, a giutarme a gaver una forte amicìssia con Geovà e a esser felice? Ma no stà desmentegarte che sol te sarè bona de catar un bravo omo se ti te sì una brava dona. Una brava dona la ze dela banda de so omo par giutarlo. (Gén. 2:18) E par causa del so amor par Geovà, ela anca la giuta i altri a veder le bele qualità che so omo el ga. (Pro. 31:11, 12; 1 Tim. 3:11) Se te vol esser una brava dona, seita a far pi forte el to amor par Geovà e a giutar i altri nela to fameia e nela to congregassion. w23.12 p. 23 §§ 18, 19

Dio el ga prometesto darne sabedoria par far bone dessision. E ne ocore ancora de pi el so aiuto quando ghemo de far dessision importante. Geovà anca el ne dà forsa par perseverar. Compagno Geovà el ga giutà el apòstolo Paolo, lu el ne dà forsa par dàrghene fora cole dificoltà. (Fil. 4:13) Geovà el ne giuta par meso dei nostri fradei. Nela note vanti de morir, Gesù el ga pregà tanto. Lu el ga domandà che Geovà no’l assesse che i altri pensesse che lu el gavea bestemà contra el nome del so Pare. Alora, cossa che Geovà el ga fato? Lu el ga doperà un àngelo par consolar Gesù. (Luc. 22:42, 43) Ancoi, Geovà el doperà i nostri fradei e sorele par incoraiarne. Lori i ne giuta quando i vien catarne o quando i parla con noantri par telèfono. Magari, tuti noantri ghemo de pensar come podemo giutarse un al altro. — Pro. 12:25. w23.05 p. 10, 11 §§ 9-11

Pol esser che quei che i se ga fermà de vegner ale riunion i gàpia paura che i fradei no li riceva mia ben! Alora, no stà parlar robe che ndaria assarli con vergogna o disgustadi. Questi fradei ancora i ze servi de Geovà e restaremo contenti de tornar a adorarlo insieme nantra volta. (Sal. 119:176; Ati 20:35) Noantri savemo che el sacrifìssio de Gesù l’è tanto importante. Par quela, restemo contenti de far la Selebrassion tuti i ani. (Isa. 48:17, 18) Quando ndemo ala Selebrassion, el nostro amor par Geovà e par Gesù el resta pi forte, mostremo che ghe demo valor a quel che i ga fato, e restemo pi unidi coi nostri fradei. Anca semo boni de giutar i altri a imparar de pi sora el sacrifìssio de Gesù e a gaver la bela speransa che Geovà el ne dà par el futuro. Alora, volemo sforsarse par convidar tute le persone che podemo par la Selebrassion dela Morte de Gesù, che l’è el giorno pi importante del ano! w24.01 p. 14 §§ 18,19

Come che Geovà el ne insegna e el ne tende ancoi? Lu el dopera la so Parola, la Bìblia, e persone che el ga scoliesto. Par esémpio, lu el dopera el “schiavo fedele e prudente” par giutarne a capir la Bìblia e a far bone dessision. (Mat. 24:45) Geovà anca el dopera altri bravi òmini, come ansiani e superintendenti de sircuito. Lori i ne incoraia e i ne dà bei consili che i ne giuta a dàrghene fora cole dificoltà. Sicuro che ghe demo tanto valor a tuto quel che Geovà l’è drio far par giutarne in questi ùltimi giorni. Tuto quel che lu el fà ne giuta a esser so amighi e a esser felici adesso e par sempre. Ma, dele volte, pol esser fadiga ndar drio ale orientassion de Geovà. Pol esser che anca ne par che i so consili no i ze tanto boni. Ma se ne vien fora sentimenti cossita, ghemo de esser ancora pi sicuri che l’è Geovà che l’è drio tender de noantri e che l’è pròpio importante obedirghe. w24.02 p. 20 §§ 2, 3

Noantri podemo far ancora pi forte el nostro amor par Geovà se seitemo a leder e studiar la Bìblia. Quando te sì drio leder la Bìblia, proa pensarghe sora cossa quela parte la te insegna sora Geovà. Alora, domàndate: ‘Come quel che go ledesto mostra che Geovà el me ama? Come che questo me giuta a amar a Geovà ancora de pi?’ Noantri ghemo anca de pregar a Geovà e parlarghe sora i nostri pensieri e sora quel che sentimo. Cossita, quando vedemo che lu l’è atento e che el ne risponde, el nostro amor par lu el resta ancora pi forte. (Sal. 25:4, 5; 1 Gio. 3:21, 22) Noantri anca ghemo de far pi forte el nostro amor par i nostri fradei e sorele. Varda quel che ga sucedesto col apòstolo Paolo. Lu el ga cognossesto un gióveno de nome Timòteo. Questo gióveno el amea tanto a Geovà e ai fradei. Par quela, Paolo el ga dito ai fradei filipensi: “No go nissun altro cola disposission compagna ala soa. Lu el ve tenderà pròpio ben.” (Fil. 2:20) Paolo l’è restà maraveià de veder che Timòteo el gavea tanto amor ai so fradei e sorele. Sicuro che tuti nele congregassion i era premosi de ricever una vìsita de Timòteo. — 1 Cor. 4:17. w23.07 p. 9 §§ 7-10

Moisè l’è morto prima che i israeliti i ndesse rento la Tera Prometesta. Alora sarà che lori i ze restadi persi e sensa saver cossa far? Nò. Se lori i seitesse leai, Geovà el ndaria tenderli. Come? Tanto tempo prima, Moisè el gavea belche insegnà e parecià Giosuè par tender del pòpolo. (Éso. 33:11; Deu. 34:9) Ghen’era anca bravi òmini che i tendea de grupi pi pìcoli e pi grandi. (Deu. 1:15) Alora, podemo esser sicuri che Geovà l’era drio tender tanto ben del so pòpolo. Noantri anca podemo imparar de quel che ga sucedesto con Elia. Par tanti ani, lu el ga giutà i israeliti a adorar a Geovà dela maniera giusta. Ma ghe ga tocà ndar via quando Geovà el ghe ga dato un laoro in Giudà. (2 Rè 2:1; 2 Cró. 21:12) Ma lu el gavea belche parecià Eliseo par tender dei israeliti. Cossita, vedemo che Geovà el ga doperà òmini fedeli par far quel che el volea e par proteger i so servi. w24.02 p. 5 § 12

I fradei efesi i gavea acetà viver de acordo cola verità dela Bìblia. (Sal. 119:105) Lori i gavea assà la religion falsa e la imoralità. Cossita, i fea el so meio par adorar e contentar a Geovà e ‘far compagno a lu’. (Efe. 5:1) La medèsima roba la ga sucedesto con noantri vanti de imparar la verità. Èrino in scuridon par causa dela religion falsa e dele robe sbaliade che feino. Pol esser che arquanti i fea feste dela religion falsa e altri fursi i gavea una vita imoral. Ma dopo che ghemo imparà quel che Geovà el dise che l’è giusto e sbalià, ghemo cambià la nostra vita. Ghemo scominsià a viver de una maniera che ghe piase a Geovà e adesso ghemo tante benedission. (Isa. 48:17) Ma anca se no l’è mia fàcile seitar a far quel che l’è giusto, ghemo de seitar distante dela scuridon e “far le robe come fioi dela luce”. w24.03 p. 21 §§ 6, 7

Pol esser che te pensi che no te sì gnancora pronto par dedicarte e batesarte. Fursi, ancora te ghè de cambiar un per de robe nela to vita o pol esser che la to fede la ga de esser ancora pi forte. (Col. 2:6, 7) Pol esser che te sì drio studiar la Bìblia fà poco tempo o fursi to pare e to mare i te ga insegnà sora Geovà ancora de picinin. Ma ricòrdate che cada persona la ze difarente una del’altra e la ndarà far questa dessision nela ora giusta. Alora, Invesse de far comparassion coi altri, proa star atento a quel che ti te ghè de cambiar e sfòrsate de far questi cambiamenti. (Gàl. 6:4, 5) Ma se te nicordi che no te sì gnancora pronto par dedicar la to vita a Geovà, no stà desister de questa dessision. Alora, te pol pregar che Geovà el te giute a far i cambiamenti che te ocore. (Fil. 2:13) E te pol esser sicuro che lu el ndarà scoltarte e giutarte. — 1 Gio. 5:14. w24.03 p. 5 §§ 9, 10

Abraon el mostrea rispeto a Sara parché sempre la scoltea e el proea capir quel che la sentia. Par esémpio, una volta, Sara la ga contà che la era tanto disgustada par causa de un problema. Ela ghe ga fin dato la colpa a Abraon. Lu la ga scoltada e el ga proà giutarla parché el savea che la era una brava dona. (Gén. 16:5, 6) Cossa che i òmini maridadi i pol imparar? Valtri gavé la autorità de far le dessision par la vostra fameia. (1 Cor. 11:3) Ma podé mostrar amor ala vostra dona quando la scolté con atension prima de farle, ancora de pi se la ze una roba importante par ela. (1 Cor. 13:4, 5) Una volta, arquanti òmini i ze capitadi nela casa de Abraon, e lu li ga convidadi par magnar lì. Abraon el ga domandà che Sara la fesse una mùcia de pan par darghe. (Gén. 18:6) Alora, ela la se ga fermà de far i so laori, e suito la ze ndata far quel che so omo ghe gavea domandà. Cossa che le done le pol imparar? Se valtri rispeté el vostro omo e lo giuté quando el fà una dessision, el vostro matrimònio el sarà ancora pi forte. — 1 Pie. 3:5, 6. w23.05 p. 24, 25 §§ 16, 17

Pena dopo che Gideon l’è stà scoliesto par esser giuis, lu el ga bio de mostrar che l’era obediente e coraioso. Prima, Geovà el ghe ga dato un laoro tanto pericoloso de far. Gideon el gavaria de finir fora col altar de adorassion de Baal che so pare el gavea fato su. (Giui. 6:25, 26) Par obedir a Geovà, due volte Gideon ghe ga tocà far pi pìcolo el so esèrsito. (Giui. 7:2-7) E Geovà anca el ghe ga dito de ndar contra i so nemighi in meso la note. (Giui. 7:9-11) I ansiani i ga de esser ‘pronti par obedir’. Un ansiano che l’è obediente sempre el va drio a quel che dise la Bìblia e la organisassion de Geovà. Cossita, lu el ghe dà un bon esémpio ai altri. Ma, dele volte, pol esser fadiga esser obediente. Parché? Parché fursi le orientassion le càmbia massa svelto e l’è fadiga meterle in pràtica o ghe par che no le ze mia bone. O pol esser che, se el obedisse, el sìpia metesto in preson. Alora, come che i ansiani i pol ndar drio al esémpio de Gideon e sempre esser obedienti? Stà atento ale orientassion e metele in pràtica. w23.06 p. 4, 5 §§ 9-11