Le done Testimònie de Geovà le pol esser ministre?

Sì, in tuto el mondo, milioni de done Testimònie de Geovà le laora insieme cola congregassion. Lore le fà parte de un grando grupo che predica le bone notìssie del Regno de Dio. El Salmo 68:11 dise sora le done: “Geovà el comanda. Le done che le proclama le bone notìssie le ze un grando esèrsito.”

Ma no se pol mia dir che quel che le done Testimònie de Geovà le fà l’è compagno al laoro dele done che le ze ministre nele ciese o nele altre religion. Ghen’è diverse difarense in quel che lore le fà. Vedemo arquante.

In arquante religion che le dise che seghe a Cristo, le done le ga tanta autorità e le insegna ale persone che belche le fà parte dela ciesa. Invesse, le done Testimònie de Geovà le insegna ale persone che no le fà parte dela congregassion. Lore le va in serca de queste persone quando le fà la predicassion de casa in casa o in altri posti.

Nantra difarensa intrà le done Testimònie de Geovà e le ministre dele altre religion, l’è quel che le fà nela congregassion. In queste religion, le done le ga autorità sora i altri e anca le insegna quel che i ga de far. Ma, nele congregassion dele Testimònie de Geovà, le done no le insegna quando ghen’è òmini belche batesadi insieme. Sol i òmini scoliesti par esser istrutori i ga de insegnar ai altri. — 1 Timòteo 3:2; Tiago 3:1.

La Bìblia la dise che i òmini i saria responsàbili par tender dela congregassion. Varda quel che Paolo el ga scrito a Tito, che anca l’era superintendente: “Mi te go assà a Creta . . . par far designassion de ansiani de cità in cità.” Anca Paolo el ga dito che tuti i òmini scoliesti i ‘gavaria de esser sensa acusassion, i gavaria de esser maridadi sol con una sposa’. (Tito 1:5, 6) Paolo anca el ga dito a Timòteo: “Se un omo l’è drio sforsarse par esser un superintendente, el vol una roba tanto bona. Par quela, el superintendente el ga de esser un omo giusto, maridà sol con una dona . . . e el ga de saver come insegnar dela maniera giusta.” —1 Timòteo 3:​1, 2.

Parché sol i òmini i ga de ver la responsabilità de tender dela congregassion? Paolo el ga dito: “Mi no asso mia che la dona la insegne o la gàpia autorità sora el omo, ma la ga de restar in silènsio. Parché Adon l’è stà fato prima de Eva.” (1 Timòteo 2:​12, 13) Geovà el ga creà prima el omo e dopo la dona, cossita la responsabilità de tender e de insegnar la ze del omo.

I servi de Geovà i va drio el esémpio del so lìder, Gesù Cristo. El dissìpolo Luca el ga scrito sora el laoro de Gesù: “Poco tempo dopo, lu el ga scominsià a ndar a tute le cità e anca ale pìcole cità par predicar le bone notìssie del Regno de Dio.” Dopo Gesù el ga mandà i so seghidori far el medèsimo laoro: “Lori i ze ndati a tuti posti, ale pìcole cità, par predicar le bone notìssie del Regno de Dio.” — Luca 8:1; 9:2-6.

Ancoi, i servi de Geovà, òmini e done, i laora insieme par far quel che Gesù el ga dito: “E queste bone notìssie del Regno le sarà predicade in tuta la tera abitada in testimònio a tute le nassion, e alora vegnerà el fin.” — Mateo 24:14.