Cossa che me intriga de esser batesà?

1. Cossa che Adon e Eva i ga perso, e qual che l’è stà el risultà?

NELA to opinion, chi che ga el dirito de dir quel che l’è giusto e quel che l’è sbalià? Adon e Eva i ga dessidio far quel che lori i volea, invesse de fidarse in quel che Dio el gavea dito. Lori i ga mostrà la so dessision quando i ga magnà dela pianta dela cognossensa del ben e del mal. (Gén. 3:22) Ma pensa in quel che lori i ga perso: la amicìssia con Geovà e la oportunità de viver par sempre. El risultà de quel che i ga fato l’è stà che i ga passà el pecato e la morte ai so fioi. (Rom. 5:12) La dessision che lori due i ga fato la ga portà tanto sofrimento.

2-3. (a) Cossa che un omo importante dela Etiòpia el ga fato dopo che Filipe el ga predicà par lu? (b) Cossa che guadagnemo dopo del batésimo, e che domande ndaremo risponder in questo stùdio?

² Un omo importante dela Etiòpia el ga fato difarente de Adon e Eva. Dopo che lu el ga sentio quel che Filipe el ghe ga dito, el ga volesto batesarse in quela medèsima ora. Lu el volea tanto ringrassiar a Geovà e Gesù par quel che i gavea fato par lu. (Ati 8:34-38) Quando femo la dessision de dedicarse a Dio, cossita come quel omo, mostremo che anca noantri ghe demo tanto valor a quel che Geovà e Gesù i ga fato par noantri. Anca mostremo che se fidemo che sol Geovà el pol dir quel che l’è giusto e quel che l’è sbalià.

³ Pensaghe sora tute le bele robe che noantri guadagnemo dopo del batésimo. Par esémpio, ghemo la oportunità de ricever tuto quel che Adon e Eva i ga perso, anca la vita eterna. E quando ghemo fede in Gesù, Geovà el perdona i nostri pecati e podemo gaver una cossiensa neta. (Mat. 20:28; Ati 10:43) Nantra roba l’è che podemo far parte dela fameia de Geovà e gaver una speransa maraveiosa par el futuro. (Gio. 10:14-16; Rom. 8:20, 21) Anca se le benedission le ze tanto bele, arquante persone che belche le cognosse a Geovà le ga paura de far quel che quel omo dela Etiòpia el ga fato. Cossa che intriga arquanti de esser batesadi? Come che i pol vinser le so paure? L’è questo che ndaremo imparar in questo stùdio.

PARCHÉ CHE ARQUANTI NO I SE BATESA?

4-5. Che dificoltà Avery e Hannah i ga infrontà?

⁴ Arquanti no i ga tanta confiansa. Varda el esémpio de un gióveno che el ga nome Avery, de 19 ani. El so pupà e la so mama i ze Testimònie de Geovà. So pupà l’è cognossesto come un pare amoroso e un brao ansiano. Ancora cossita, Avery el gavea paura de batesarse. Parché? Lu el dise: “Mi pensea che mai saria brao come el me pupà. Mi gavea ansietà sol de pensar in far una orassion davanti de tuti, de far discorsi o far una considerassion par la predicassion.” Avery el catea che no’l saria bon de far i laori che fursi el podaria ricever nela congregassion.

⁵ Hannah, de 18 ani, no la gavea confiansa in si stessa. Ela la ze stata slevada par so pupà e so mama che i serve a Geovà. Ma ela la pensea che mai la saria bona de obedir ai comandamenti de Dio. Parché? Parché la catea che no la servia par gnente. Dele volte, la sofria tanto che la ghe fea mal al so pròpio corpo. Ma questo la fea sentirse ancora pedo. Ela la dise: “No go parlà a nissuni quel che mi fea, gnanca al me pupà e me mama. Mi pensea che Geovà mai ndaria voler la me adorassion par causa de quel che era drio far.”

6. Cossa che intrighea Vanessa de batesarse?

⁶ Arquanti i ga amighi che no i ghe giuta. Vanessa, che la ga 22 ani, la dise: “Fea quasi diese ani che mi cognossea la me meio amiga.” Ma quela amiga no la gavea interesse in quel che Vanessa la credea e gnanca la giutea a far de pi par Geovà. Vanessa la savea che se la volesse batesarse, la gavea de fermar cola amicìssia. Ela la dise: “Par mi, far amighi l’è fadiga. Par quela mi gavea paura de fermar cola nostra amicìssia e mai pi catar una amiga cossita.”

7. De cossa Makayla la gavea paura, e parché?

⁷ Arquanti i ga paura de far un bruto sbàlio. Quando Makayla la gavea sinque ani, el so fradel el ga assà de esser Testimònia de Geovà. Fin restar granda, Makayla la ga visto so pupà e so mama sofrir par via de quel che el so fradel el gavea fato. Ela la dise: “Mi gavea paura de batesarme parché se mi fesse qualche pecato e assesse de esser Testimònia de Geovà, me pupà e me mama i restaria ancora pi disgustadi.”

8. Qual che l’era la paura de Miles?

⁸ Arquanti i ga paura dela oposission. El pupà e la madrasta de Miles i ze Testimònie de Geovà, ma la so mama nò. Lu el dise: “Go vivesto insieme dela me mama par 18 ani. Mi gavea paura de parlar che mi volea batesarme parché go visto quel che la ga fato quando me pupà l’è deventà Testimònia de Geovà. Par quela, mi gavea paura che la me intrighesse.”

COME CHE TE POL VINSER LE DIFICOLTÀ?

9. Cossa che podarà suceder se te seiti imparar sora el amor e la passiensa de Geovà?

⁹ Adon e Eva no i amea a Geovà de verità. Par quela, i ga scoliesto no servirlo. Ancora cossita, Geovà el ga assà che Adon e Eva i gavesse fioi e li slevesse come che i volea. Ma l’è restà ciaro che viver sensa obedir i comandamenti de Dio l’è stà una bruta scòlia. El fiol pi vècio de Adon e Eva el ga copà el so fradel pi gióveno. Dopo, quasi tute le persone le ga scominsià a esser violente e a pensar sol in lore stesse. (Gén. 4:8; 6:11-13) Ma, Geovà el ga catà una maniera de salvar tuti i fioi de Adon e Eva che i vol servirlo. (Gio. 6:38-40, 57, 58) Se te seiti imparar cada volta de pi sora el amor e la passiensa de Geovà, de pi te vè amarlo. Questo ndarà farte gaver la voia de dedicar la to vita a Geovà invesse de far compagno a Adon e Eva.

10. Come che el Salmo 19:7 el pol giutarte a dedicarte a Geovà?

¹⁰ Seita imparar sora Geovà. Se te impari cada volta de pi sora Dio, te ndarè fidarte che te sarè bon de servirlo. Avery el dise: “Quel che me ga giutà a fidarme de pi in mi stesso l’è stà leder e pensarghe sora nela promessa del Salmo 19:7.”b (Ledi.) Quando Avery el ga visto che Geovà el fà quel che el promete, el so amor par Dio l’è restà pi forte. El amor a Dio ne giuta a vinser le nostre paure, consentrarse in Geovà e in quel che lu speta de noantri. Hannah la dise: “Leder la Bìblia e far el me stùdio personal me ga giutà a veder che quando mi me fea mal al me corpo, anca Geovà el restea disgustà.” (1 Pie. 5:7) Hannah la ga scominsià a meter in pràtica quel che la imparea dela Parola de Dio. (Tiago 1:22) Qual che l’è stà el risultà? Ela la dise: “Quando go visto che obedir a Geovà l’era bon par mi, go scominsià a amarlo ancora de pi. Adesso, son sicura che Geovà sempre el ndarà giutarme quando me ocore.” Ela la se ga fermà de far mal al so pròpio corpo. La se ga dedicà a Geovà e la ze stata batesada.

11. Come che Vanessa la ga fato boni amighi, e cossa che imparemo?

¹¹ Scoli ben i to amighi. Vanessa la ga visto che la so amicìssia con Geovà la era drio ndar mal par via dela so amiga. Alora, Vanessa no la ga pi ndà insieme con quela amiga e la ga fato sforso par gaver boni amighi nela congregassion. Quel che la ga giutada l’è stà el esémpio dela fameia de Noè. Ela la dise: “Nel posto ndove Noè l’era de star, nissuni i adorea a Geovà, ma la fameia de Noè la gavea un al altro.” Vanessa la se ga batesà e la ze deventada pioniera. Ela la seita dir: “Esser pioniera me ga giutà a gaver amighi no sol nela me congregassion, ma anca in altre.” Se ti te meti la predicassion in primo posto nela to vita, anca ti, te gavarè boni amighi. — Mat. 24:14.

12. Che tipo de paura Adon e Eva no i gavea, e qual che l’è stà el risultà?

¹² Gàpia la paura giusta. Ghen’è paure che le ze bone. Par esémpio, la paura de disgustar a Geovà. (Sal. 111:10) Adon e Eva i ga desobedio a Dio parché no i ga bio la paura de disgustarlo. Dopo de pecar, presto i se ga nicorti che i ze deventadi pecadori. La ùnica roba che i podea passar ai so fioi l’era el pecato e la morte. I ga visto che i gavea desobedio ala lege de Dio e i ga sentio vergogna. — Gén. 3:7, 21.

13-14. (a) De acordo con 1 Piero 3:21, parché che no ne ocore mia gaver tanta paura de morir? (b) Che motivi gavemo par amar a Geovà?

¹³ L’è importante gaver paura de disgustar a Dio, ma no vol mia dir che ghe ocore gaver paura dela morte. Geovà el vol darne la vita eterna, par quela che el ne ga dato el risgate. Se se ciamemo grami dei nostri pecati e mostremo fede nel risgate, Geovà el ne perdona. La maniera pi importante de mostrar la nostra fede in Dio l’è dedicarse e batesarse. — Ledi 1 Piero 3:21.c

¹⁴ Ghemo tanti motivi par amar a Geovà. Tuti giorni lu el ne dà robe bone, e el ne insegna sora lu e le so promesse. (Gio. 8:31, 32) Lu el ne dà la congregassion par giutarne e orientarne. El ne giuta a infrontar le dificoltà e el promete una vita perfeta nel futuro. (Sal. 68:19; Apo. 21:3, 4) Quando pensemo in tute le volte che Geovà el ga mostrà el so amor par noantri, anca noantri volemo mostrar che lo amemo. L’è questo amor che el ne giutarà a gaver la paura giusta: la paura de disgustar el Dio che amemo.

15. Cossa che ga giutà Makayla a vinser la paura de far un bruto sbàlio?

¹⁵ Makayla la ze stata bona de vinser la paura de far un bruto sbàlio. Quel che la ga giutada l’è saver che Geovà l’è un Dio che perdona. Ela la dise: “Go capio che tuti noantri semo imperfeti e ndemo sbaliar. Ma anca go capio che Geovà el ne ama e el ne perdona par via del risgate.” Makayla la volea mostrar el so amor par Geovà, par quela la se ga dedicà e batesà.

16. Cossa che ga giutà Miles a vinser la paura de sofrir oposission?

¹⁶ Miles, che gavea paura de batesarse par causa dela so mama, el ga domandà consili al superintendente de sircuito. Lu el gavea passà par una situassion someiante a de Miles. El pupà del superintendente l’era Testimònia de Geovà, ma la so mama nò. Miles el dise: “El fradel el me ga giutà a saver cossa parlar ala me mama e a farghe saver che mi ndaria batesarme parché mi volea e nò parché el me pupà l’era drio obrigarme.” La mama de Miles no ghe ga piasesto e, par fin, lu el ga bio de ndar via de casa. Ancora cossita, lu no’l ga cambià la so dessision. Lu el dise: “Go imparà che Geovà el ga fato tante robe bone par mi e questo ga tocà el me cuor. Quando go scominsià a pensar nel sacrifìssio de Gesù, go visto che Geovà el me ama. Par quela, go dessidio dedicarme e batesarme.”

SEITA COLA TO DESSISION

17. Che oportunità cada un de noantri gavemo?

¹⁷ Quando Eva la ga magnà del fruto dela pianta, la ga rigetà el so Pare. E quando Adon el ga fato compagno Eva, el ga mostrà che lu no’l ghe dea valor a tute le robe che Geovà el gavea fato par lu. Cada un de noantri gavemo la oportunità de mostrar che semo difarente de Adon e Eva e che ghe demo valor a tuto quel che Geovà el fà par noantri. Come? Par meso del batésimo. El batésimo el mostra che credemo che sol Geovà el pol dessider quel che l’è giusto e quel che l’è sbalià. Anca l’è una maniera de mostrar che amemo e se fidemo nel nostro Pare.

18. Come che podemo esser boni de obedir a Geovà?

¹⁸ Dopo del batésimo ghemo de seitar far quel che Geovà el vol e nò quel che volemo. Pol esser fadiga, ma milioni de persone in tuto el mondo le ze bone de far la volontà de Geovà. Anca ti te pol! Par esser bon de obedir, stùdia cada volta de pi la Bìblia, va ntele riunion e parla ai altri cossa che te ghè imparà sora el amoroso Pare Geovà. (Ebr. 10:24, 25) E quando te ghè de far una dessision, scolta quel che Geovà el te dise par meso dei consili dela Bìblia e dela so organisassion. (Isa. 30:21) Cossita, tuto quel che te fè ndarà ben. — Pro. 16:3, 20.

19. Cossa che gavemo de ricordarse, e parché?

¹⁹ Ricòrdate sempre che obedir ale orientassion de Dio l’è par el to ben. Se te fè cossita, te ndarè amar cada volta de pi a Geovà e ale so lege. Gnente che Sàtana el proe far ndarà intrigar la to amicìssia con Geovà. Imagina la to vita mila ani avanti. In quel tempo, quando te vardar indrio te sarè sicuro che la meio dessision che te ghè fato ntela to vita l’è stà batesarte!