‘Stà atento e scolta le parole de quei che i ga sabedoria’

1. (a) Parché che fursi qualchedun el ne dae un consìlio? (b) Parché che ghemo de scoltarlo?

TUTI noantri ghemo bisogno de scoltar consili. Pol esser che ghemo belche domandà consili a un bravo fradel. O fursi qualchedun l’è vegnesto darne un consìlio parché el ga visto che ndarìssino far qualcossa sbaliada. (Gàl. 6:1) O pol esser che qualchedun el ne ga dato un consìlio, o una dissiplina, parché ghemo fato qualcossa sbaliada. Cossa che noantri ghemo de far quando qualchedun el ne dà un consìlio? Ghemo sempre de scoltarlo, parché questo podarà salvar la nostra vita! — Pro. 6:23.

2. De acordo con Proverbi 12:15, parché che ghemo de scoltar consili?

² El testo de questo stùdio el dise che ghemo de scoltar le parole de quei che i ga sabedoria. (Pro. 22:17) Parché? Parché nissun sa tuto e sempre ghen sarà qualchedun che el sa de pi che noantri. (Ledi Proverbi 12:15.b) Quando scoltemo un consìlio mostremo che semo ùmili, che capimo che no semo boni de far tuto e che ghemo bisogno del aiuto dei altri. Se femo cossita, sucede quel che el rè Salomon el ga dito: “Ghen sarà boni resultadi se te scolti consili.” — Pro. 15:22.

3. Come che fursi ricevemo consili?

³ Noantri podemo ricever consili de due maniere. Prima, pol esser par meso dela Bìblia e dele publicassion. Quando semo drio leder la Bìblia o una publicassion, fursi se nicordemo de qualcossa che ne toca cambiar. (Ebr. 4:12) Seconda, pol esser che ricevemo un consìlio par meso de un ansiano o de nantro fradel. Fursi lu el ne dise qualcossa che ghemo de cambiar. Se qualche fradel el ne dà un consìlio de acordo con quel che la Bìblia la dise, l’è sicuro che el ne ama tanto. Alora, ghemo de scoltarlo e meter in pràtica quel che el ga dito.

4. De acordo con Eclesiasti 7:9, cossa che no ghemo de far quando qualchedun el ne dà consili?

⁴ Savemo che l’è pi fadiga scoltar e meter in pràtica un consìlio quando qualchedun el ne vien dirlo che quando lo ledemo nela Bìblia o nele publicassion. Anca che savemo che semo imperfeti, no l’è fàcile scoltar quando un fradel el ne dise pròpio quel che ghemo de cambiar. (Ledi Eclesiasti 7:9.c) Pol esser che proemo spiegarghe parché che ghemo fato el sbàlio, che no ne piase la maniera che lu el ga parlà, o che pensemo che el ne ga dato el consìlio parché no’l ne vol mia ben. Fursi anca pensemo: ‘Lu pensa che l’è perfeto par vegner dirme quele robe lì?’ Se pensemo cossita, no ndaremo scoltar el consìlio o ndaremo domandarlo a qualchedun che el ne dirà quel che volemo scoltar.

5. Cossa ndaremo imparar in questo stùdio?

⁵ In questo stùdio, ndaremo imparar sora el esémpio de persone che no le ga scoltà consili e de persone che li ga scoltà. Ndaremo anca imparar cossa pol giutarne a scoltar consili, e parché che l’è bon farlo.

LORI NO I GA SCOLTÀ CONSILI

6. Cossa che imparemo de quel che ga sucedesto col rè Roboan?

⁶ El primo esémpio l’è de Roboan. Quando Roboan l’è deventà rè, i israeliti i ghe ga domandà che li assasse laorar manco. Alora, el rè el ga mostrà sabedoria parché el ga domandà ai òmini pi veci de Israel cossa che el gavea de far. E questi òmini i ghe ga dito che el gavaria de far quel che el pòpolo el gavea domandà. Cossita, el pòpolo el ndaria sempre servirlo. (1 Rè 12:3-7) Ma Roboan no ghe ga piasesto quel che questi òmini ghe ga dito. Alora, l’è ndato domandar consili ai so amighi, che i gavea intorno de 40 ani. Pol esser che lori i savea de arquante robe, ma el consìlio che i ga dato a Roboan l’è stà tanto rugno. (2 Cró. 12:13) Lori i ghe ga dito che el gavea de far el pòpolo laorar ancora de pi. (1 Rè 12:8-11) Dopo de scoltar questi due consili, cossa saria la roba giusta da far? Domandar che Geovà lo giutesse a saver cossa far. Ma, Roboan no lo ga fato. Lu el ga fato quel che i òmini pi gióveni i ghe ga dito, parché l’era quel che el volea scoltar. Ma questa scólia la ze stata bruta par Roboan e par el pòpolo. Cossa che imparemo de questo? Ghemo de scoltar quando qualchedun el ne dà un consìlio de acordo cola Bìblia, anca se no l’è quel che volarìssino scoltar.

7. Cossa che imparemo col esémpio del rè Uzia?

⁷ El secondo esémpio l’è del rè Uzia. Lu l’è ndato rento una parte del témpio che sol i sasserdoti i podea, e el ga proà brusar insenso. Alora, i sasserdoti i ghe ga dito che sol lori i podea farlo. Ma el rè Uzia l’è restà inrabià e no’l ga scoltà el consìlio. Invesse de esser ùmile, Uzia el ga pensà che el podea far tuto quel che el volea parché l’era el rè. Se lu el gavesse scoltà el consìlio, Geovà fursi lo perdonaria. Ma come Uzia no’l ga scoltà, Geovà lo ga fato gaver lepra fin la so morte. (2 Cró. 26:16-21) Cossa che imparemo? Se volemo far quel che ghe piase a Geovà, ghemo de scoltar quando qualchedun ne dà un consìlio de acordo cola Bìblia.

LORI I GA SCOLTÀ CONSILI

8. Cossa che Giò el ga fato quando Eliù e Geovà i ghe ga dato consili?

⁸ Adesso, ndaremo imparar sora el esémpio de persone che le ga scoltà consili. El primo esémpio l’è de Giò. Lu el amea tanto a Geovà e el volea assarlo contento. Ma Giò no l’era mia perfeto. Par esémpio, quando el ga infrontà un bruto colpo nela so vita, lu el ga parlà arquante robe sensa pensar. Par quela, Eliù e Geovà i ghe ga dato consili. Cossa Giò el ga fato? Lu l’è stà ùmile e el ga scoltà i consili. Giò el ga dito: ‘Mi go parlà, sensa capir ben . . . Par quela, mi domando scusa e me ciamo gramo de quel che go dito.’ Alora, Geovà el ga benedio a Giò parché lu l’è stà tanto ùmile. — Giò 42:3-6, 12-17.

9. (a) Cossa Moisè el ga fato quando Geovà el ghe ga dato un consìlio? (b) Parché che Moisè l’è un bel esémpio par noantri?

⁹ El secondo esémpio l’è de Moisè. Lu no’l ga bio passiensa e el se ga desmentegà de darghe onor a Geovà. Alora, Geovà el ghe ga dito che lu no’l podaria ndar rento la Tera Prometesta. (Nùm. 20:1-13) Quando Moisè el ga domandà a Geovà che lo assasse ndar rento la Tera Prometesta, Geovà el ghe ga dito: “Basta, no stà pi parlarme de questo assunto.” (Deu. 3:23-27) Moisè el ga capio la dessision de Geovà e no l’è restà disgustà. Cossita, Geovà el ga seità a doperarlo par tender del pòpolo de Israel. (Deu. 4:1) Alora, podemo imparar tanto de Moisè e Giò. Giò el ga cambià la so maniera de pensar e no’l ga proà spiegar parché che el gavea sbalià. E Moisè el ga mostrà che el ga scoltà el consìlio de Geovà parché el ga seità leal a lu, anca che el savesse che no’l ndaria pi rento la Tera Prometesta.

10. (a) De acordo con Proverbi 4:10-13, parché che l’è bon scoltar consili? (b) Cossa che arquanti fradei i ga fato quando i ga ricevesto consili?

¹⁰ Quando femo come Giò e Moisè l’è tanto bon par noantri. (Ledi Proverbi 4:10-13.d) Ancoi tanti fradei e sorele i ze drio far come i servi del passà. Varda el esémpio del fradel Emmanuel, che l’è de star nel Congo. Lu el ga dito: “Arquanti bravi fradei i ze nicorti che mi no gavea pi una forte amicìssia con Geovà e i ga proà giutarme. Mi go scoltà i so consili. Cossita, no go fato robe che podaria farme sofrir.”e Una pioniera nel Canadà, che la ga nome Megan, la ga dito: “Dele volte, le persone le me dà consili che no me piase scoltar, ma l’era pròpio quel che mi gavea de bisogno.” E un fradel dela Croàssia, che el ga nome Marco, el ga dito: “Un tempo indrio, la me amicìssia con Geovà no la era pi forte, e no go pi podesto far quel che mi fea nela congregassion. Ma i consili che i me ga dato i me ga giutà a tornar a gaver una amicìssia forte con Geovà.”

11. Cossa che el fradel Karl Klein el ga dito sora scoltar consili?

¹¹ Anca el fradel Karl Klein, che el ga laorà nel Corpo Governante, el ga scoltà consili. Questo l’è stà tanto bon par lu. Nela so stòria de vita, el fradel Klein el ga dito che el ga ricevesto consili del so caro amigo, Rutherford. El fradel Klein el ga dito che nel scomìnsio no ghe ga piasesto scoltar quel che Rutherford el ga dito. El fradel Klein el ga dito: “Quando el fradel Rutherford el me ga visto, el me ga dito pròpio contento: ‘Come che la va Karl?’ Ma come mi ero disgustà con lu, lo go saludà de una maniera un pochetin bruta. Alora, lu el me ga dito: ‘Stà atento Karl, parché el Diaol el vol ciaparte.’ Mi go bio vergogna e ghe go dito: ‘No, no! No l’è gnente fradel Rutherford.’ Ma come el fradel Rutherford el savea che mi ero ancora disgustà, el me ga dito nantra volta: ‘Va ben, ma stà atento parché el Diaol el vol ciaparte.’ L’era pròpio vera quel che el me gavea dito. Quando restemo disgustadi con un fradel che el ne dà un consìlio che gaveino de bisogno, l’è pi fàcile che caschemo nte una tràpola del Diaol.”f (Efe. 4:25-27) El fradel Klein el ga scoltà el consìlio del fradel Rutherford e lori i ga seità a esser boni amighi.

COSSA POL GIUTARNE A SCOLTAR CONSILI?

12. Come esser ùmili ndarà giutarne a scoltar consili? (Salmo 141:5)

¹² Cossa pol giutarne a scoltar consili? Esser ùmili e ricordarse che semo imperfeti e che sbaliemo tante volte. Se semo ùmili, ndaremo scoltar el consìlio anca se lo ghemo ricevesto de qualchedun pi gióveno che noantri o che no semo de acordo col consìlio. Giò el ga fato pròpio questo. Lu no l’era drio pensar dela maniera giusta e Eliù, che l’era tanto pi gióveno che lu, ghe ga dato un consìlio. Giò l’è stà ùmile e el ga cambià la so maniera de pensar, e Geovà lo ga benedio. (Giò 32:6, 7) Varda cossa che un ansiano del Canadà el ga dito: “Dele volte, i altri i ze boni de veder qualcossa che ghemo de cambiar che no semo mia boni de veder. Alora, come saremo boni de cambiar se nissun el ne dise?” Podemo dir che tuti ghemo de imparar qualcossa de pi. Par esémpio, podemo sforsarse par gaver le qualità del fruto del spìrito e par esser meio predicadori. — Ledi Salmo 141:5.g

13. Cossa ghemo de pensar quando ricevemo un consìlio?

¹³ Pensar che el consìlio l’è una prova del amor de Dio. Geovà el vol che sempre vae tuto ben nela nostra vita. (Pro. 4:20-22) Lu el mostra che el ne ama quando el ne dà consili. Par esémpio, lu el pol darne un consìlio par meso dela Bìblia, dele publicassion o de un bravo fradel. Ebrei 12:9, 10 dise che Geovà lo fà parché el vol giutarne.

14. Cossa ghemo de pensar quando una persona la ne dà un consìlio?

¹⁴ Pensar nel consìlio, e nò nela maniera che la persona lo ga dato. L’è vera che la persona che la ne dà un consìlio la ga de farlo con bontà.h (Gàl. 6:1) Ma cossa ghemo de far se no ne ga piasesto la maniera che la ne ga dato el consìlio? Ghemo de pensar nel consìlio e cossa che podemo imparar con lu. Podarìssino pensar cossita: ‘Anca che no me ga piasesto la maniera che la me ga parlà, posso imparar qualcossa e meterla in pràtica? Sarà che son bon de fermarme de pensar nei sbali che la persona la fà e imparar con quel che la ga dito?’ Quando se sforsemo de imparar qualcossa dei consili che ricevemo, mostremo sabedoria. — Pro. 15:31.

DOMANDAR CONSILI POL GIUTARNE TANTO

15. Parché che ghemo de domandar consili?

¹⁵ La Bìblia la dise che ghemo de domandar consili. In Proverbi 13:10 dise che quei che i fà questo i mostra sabedoria. Semo pròpio de acordo con questo. Quei che i domanda consili i fà meio dessision e i deventa pi bravi servi de Geovà che quei che no i lo fà. Alora, ghemo de sforsarse par domandar consili ai altri.

16. Quando che fursi podarìssino domandar consili?

¹⁶ Quando che fursi podarìssino domandar consili ai altri? Varda arquanti esempi: (1) Una sorela la domanda a una brava predicadora che la vae insieme con ela nte un stùdio. Dopo, la ghe domanda come che la podaria insegnar meio. (2) Una sorela gióvena la domanda a nantra pi vècia che robe de meter su saria meio che la compresse. (3) Un fradel el ndarà far el so primo discorso. Alora, lu el domanda a un fradel che el fà bei discorsi che lo scolte e che ghe dae consili. Ma anca i fradei che belche i fà bei discorsi i ga de domandar consili ai altri. Cossita, lori i sarà boni de insegnar cada volta meio.

17. Cossa sucede quando scoltemo consili?

¹⁷ Tuti noantri ghemo bisogno dei consili che ghen’è nela Bìblia, nele publicassion e che i fradei i ne dà. Quando qualchedun el vien darne un consìlio, ghemo de ricordarse de quel che ghemo imparà in questo stùdio. Ghemo de esser ùmili, pensar nei consili e nò nela maniera che la persona li ga dato e meterli in pràtica. L’è vera che nissun sa de tute le robe, ma la Bìblia la dise: ‘Se scoltemo i consili e acetemo la dissiplina, gavaremo cada volta de pi sabedoria. — Pro. 19:20.