Impara a dar boni consili

1. Chi che ga de dar consili? Spiega.

TE PIASE dar consili ai altri? Tanti i ga caro de dargheli, invesse altri i ga paura. Ma, ghemo de ricordarse che tuti noantri gavaremo de dar consili a qualchedun una ora o l’altra. Parché? Quando demo un consìlio a un fradel o una sorela, semo drio mostrar che lo amemo. Gesù el ga dito che ghemo de mostrar amor un al altro se volemo esser so dissìpoli. (Gio. 13:35) E la Bìblia anca la dise che quei che i ne dà consili i pol deventar veri amighi par noantri. — Pro. 27:9.

2. Cossa che i ansiani i ga de saver, e parché? (Varda anca el quadro “Consili nele riunion in meso la stimana”.)

² I ansiani i ga de saver come dar boni consili parché Geovà e Gesù li ga scoliesti par tender dei fradei e sorele dela congregassion. (1 Pie. 5:2, 3) I ansiani i pol dar consili quando i fà discorsi, quando i va discorer con un fradel o una sorela che ghe ocore de aiuto o con qualchedun che ga assà de servir a Geovà. Ma come che i ansiani e anca tuti noantri pol imparar a dar boni consili?

3. (a) Come che podemo imparar a dar boni consili? (Isaia 9:6; varda anca el quadro “Fà compagno a Gesù quando te ghè de dar un consìlio”.) (b) Cossa che ndaremo imparar in questo stùdio?

³ Podemo imparar a dar boni consili quando studiemo sora Gesù e altri servi de Geovà del passà. Sicuro che Gesù l’è el meio esémpio che podemo gaver, parché la Bìblia la dise che lu l’è el “Maraveioso Consiliero”. (Ledi Isaia 9:6.a) In questo stùdio, ndaremo veder quel che podemo far quando qualchedun ne domanda un consìlio e cossa far quando ghemo de darghelo a qualchedun che no lo ga domandà. Noantri anca ndaremo veder parché che l’è importante dar el consìlio nela meio ora e dela maniera giusta.

COSSA GHEMO DE FAR QUANDO QUALCHEDUN NE DOMANDA UN CONSÌLIO?

4-5. Che domanda ghemo de farse prima de dar un consìlio a qualchedun? Parla de un esémpio.

⁴ Cossa ne ocore far se qualchedun el vien domandarne un consìlio? Fursi ghemo voia de suito darghe el consìlio o dirghe quel che pensemo. Ma prima saria meio domandarse: ‘Mi sò quel che me ocore par darghe un bon consìlio?’ Dele volte, invesse de suito dar un consìlio, l’è meio dirghe che el domande aiuto a qualchedun che el sa de pi sora el assunto.

⁵ Pensa nte un esémpio. Metemo dir che un caro amigo tuo el ga una bruta malatia. Alora, lu el te dise che l’è drio pensar che tratamento de salute lu el ndarà scòlier e el te domanda cossa che te par meio. Pol esser che te pensi che un tratamento l’è meio che quelaltro, ma te ocore ricordarte che no te sì mia un dotor e che no te ghè studià sora questa malatia. Alora, saria meio che te disessi a questo amigo che el ghe domandesse aiuto a un dotor che el ga studià sora questa malatia.

6. Parché che ghemo de spetar prima de darghe un consìlio a qualchedun?

⁶ Ma anca se pensemo che savemo tuto quel che ne ocore par dar el consìlio, l’è meio spetar prima de darghelo. Proverbi 15:28 dise che ‘el giusto el ghe pensa sora nel cuor vanti de risponder’. Cossa che questo vol dir? Anca se pensemo che savemo come dar un consìlio, ghemo de torse tempo par pensarghe sora, studiar le publicassion e pregar a Geovà. Cossita, el consìlio che ndaremo dar a questo fradel o sorela sarà de acordo con quel che Geovà el pensa. Adesso, ndemo imparar con quel che ga sucedesto col profeta Natan.

7. Cossa che te ghè imparà con quel che ga sucedesto col profeta Natan?

⁷ El rè Davi el ga dito che el volea far su un témpio par Geovà, e Natan suito el ghe ga dito de farlo su. Ma sarà che el profeta Natan el ga dato un bon consìlio? Nò. Saria stà meio che prima el domandesse el aiuto de Geovà, parché lu no’l volea che Davi el fesse su un témpio. (1 Cró. 17:1-4) Cossita, capimo che mostremo sabedoria quando spetemo par darghe un consìlio a qualchedun. — Tia. 1:19.

8. Parché che ghemo de pensarghe ben prima de dar un consìlio?

⁸ Ma ghemo de pensar ben prima de dar un consìlio a qualchedun par causa de nantra roba. Se ghe demo un consìlio che no va mia ben, noantri gavaremo la colpa de quel che sucede dopo. Par quela, l’è tanto importante pensarghe sora prima de dar un consìlio.

COME DAR UN CONSÌLIO QUANDO I ALTRI NO I NE GA DOMANDÀ?

9. De cossa i ansiani i ga de esser sicuri prima de dar un consìlio? (Gàlati 6:1)

⁹ I ansiani i vol che tuti i seite a servir a Geovà e i gàpia la vita eterna. (Tia. 5:19, 20) Alora, dele volte, lori i ga de dar un consìlio a qualchedun che l’è drio far brute scólie che pol portarlo a far un pecato. (Ledi Gàlati 6:1.b) Ma, prima de dar el consìlio, i ansiani i ga de esser sicuri che la persona la ga pròpio fato brute scólie. Lori i ga de ricordarse che una dessision no la ze mia sbaliada sol parché la ze difarente de quel che lori i faria. (Rom. 14:1-4) Ma, se la persona la ze pròpio drio far brute scólie, come che i ansiani i pol darghe consili?

10-12. Cossa che i ansiani i ga de far quando i dà un consìlio a un fradel? Parla de un esémpio. (Varda anca la ilustrassion.)

¹⁰ No l’è mia fàcile par i ansiani dar un consìlio a qualchedun che no lo ga domandà. Parché? Paolo el ga dito che fursi la persona no la se ga gnanca nicorta che la ga fato un sbàlio. Par quela, i ansiani i ga de prima pareciar questa persona par scoltar el consìlio. Come?

¹¹ Podemo dir che dar un consìlio a qualchedun che no lo ga domandà l’è compagno a semenar nte una tera rugna. Prima, la persona la ga de pareciar la tera e sol dopo la ndarà semenar. Ela anca ghe darà àqua par far le semense butar e vegner su. La medèsima roba la sucede quando un ansiano el ga de darghe un consìlio a un fradel che no lo ga domandà. Prima, lu el ga de pareciar el fradel par scoltar el consìlio. Ma come che lu el pol far questo? Lu el ga de spetar la ora giusta e parlar che el ghe vol ben e che el ga una roba de dirghe. Se questo ansiano sempre el ga mostrà amor e bontà a tuti, sarà pi fàcile che el fradel acete el consìlio.

¹² E quando el ansiano l’è drio parlar col fradel, lu anca el pol giutarlo a acetar el consìlio quando el ghe ricorda che tuti noantri sbaliemo e che ne ocore consili una ora o l’altra. (Rom. 3:23) Lu anca el ga de parlarghe con calma e rispeto e doperar la Bìblia par mostrar el sbàlio che lu el ga fato. Dopo che el fradel el ga capio che el ga fato un sbàlio, el ansiano el pol “semenar”, o sia, spiegarghe come che el pol cambiar quel che ghe ocore. Dopo, el ansiano el ghe “dà àqua” ala semensa quando el loda el fradel par le bele robe che el ga belche fato e quando el prega insieme de lu. — Tia. 5:15.

13. Come che i ansiani i pol esser sicuri che un fradel el ga capio el consìlio?

¹³ Dele volte, pol esser che un ansiano el parla una roba e la persona la capisse nantra. Alora, come che un ansiano el pol esser sicuro che el fradel el ga capio quel che el ga volesto dirghe? Lu el pol farghe domande con bontà par veder se lu el ga capio el consìlio e se el sa quel che el ga de cambiar. — Ecl. 12:11.

GHEMO DE DAR CONSILI NELA ORA GIUSTA E DELA MEIO MANIERA

14. Parché che no ghemo de dar consili quando semo inrabiadi?

¹⁴ Come tuti noantri sbaliemo, dele volte parlemo e femo robe che disgusta un al altro. (Col. 3:13) La Bìblia la dise che dele volte podemo fin restar cativi un coi altri e che “la ràbia del omo no la fà vegner la giustìssia de Dio”. (Efe. 4:26; Tia. 1:20) Alora, l’è meio no dar consili quando semo inrabiadi, parché fursi no ndaremo parlar dela meio maniera e assaremo la disgustada. Questo no vol dir che no podemo mai parlar quel che pensemo o sentimo. Ma saria meio spetar fin che restemo pi calmi par ndar parlar con questa persona. Adesso, ndemo veder cossa che podemo imparar dei consili che Eliù el ga dato a Giò.

15. Cossa che el esémpio de Eliù ne insegna? (Varda anca la ilustrassion.)

¹⁵ Giò el ga proà difenderse de quel che i so falsi amighi i ga parlà sora lu. Giò el ga seità a parlar par un per de giorni. Intanto che el parlea, Eliù lo ga scoltà e el ga bio compassion de lu. Ma, Eliù anca l’è restà cativo parché Giò l’era sol drio pensar in lu stesso e l’era drio parlar robe sbaliade sora Geovà. Anca cossita, Eliù el ga spetà la ora giusta par parlar con Giò, e el ghe ga dato consili con calma e rispeto. (Giò 32:2; 33:1-7) Cossa che imparemo? Ghemo de spetar la ora giusta par dar un consìlio a qualchedun, darghelo con calma e sempre parlar con amor e rispeto. — Ecl. 3:1, 7.

SEITA A DAR E A ACETAR CONSILI

16. Cossa che imparemo de quel che dise in Salmo 32:8?

¹⁶ El testo de questo stùdio el dise che Geovà el ‘dà consili coi so oci atenti a noantri’. (Ledi Salmo 32:8.c) Questo testo el mostra che Geovà el ne dà el consìlio, ma anca el ne giuta a méterlo in pràtica. Noantri ghemo de sforsarse de far compagno a lu. Alora, quando demo un consìlio a un fradel o una sorela, ghemo anca de dar el aiuto che ghe ocore par méterlo in pràtica.

17. Come che se sentimo quando i ansiani i ne dà boni consili? (Isaia 32:1, 2)

¹⁷ Ghemo tanto de bisogno de consili in questi “ùltimi giorni”. (2 Tim. 3:1) I cari ansiani che i dopera la Bìblia par dar consili ai fradei i ze “come tante àque nte una tera suta”. (Ledi Isaia 32:1, 2.d) I amighi che i ne dà consili che ne ocore, anca quando i sa che no ne piaserà scoltarli, i ga tanto valor par noantri e i ze come ‘pomi de oro nte un bel piato fato de argento’. (Pro. 25:11) Sicuro che tuti noantri volemo seitar a imparar a ricever e a dar boni consili.