Parché che ghemo de domandar consili ai altri?

1. Cossa pol giutarne a far bone dessision? (Proverbi 13:10; 15:22)

NOANTRI volemo che tuto vae ben nela nostra vita. Par quela, ghemo de far bone dessision. Ma cossa che pol giutarne? Ndar drio a quel che Dio el ne dise par meso dela Bìblia. — Ledi Proverbi 13:10;a 15:22.b

2. Cossa che Geovà el ne ga prometesto?

² I meio consili che podemo gaver i vien de Geovà. Alora, ghemo de pregar e domandar el so aiuto. E l’è tanto bel saver che lu el ga prometesto: “Mi te darò consili coi me oci atenti in ti.” (Sal. 32:8) Questo testo ne giuta a capir che Geovà el fà de pi che sol darne consili. Lu anca l’è atento a quel che cada un el ga de bisogno e el ne giuta a meter in pràtica i so consili.

3. Cossa che ndaremo imparar in questo stùdio?

³ In questo stùdio, ndaremo doperar la Bìblia par risponder a quatro domande: (1) Che qualità me giutarà a acetar boni consili? (2) Chi che pol darmeli? (3) Come che posso mostrar che vui pròpio ricever boni consili? (4) Parché che no go mia de domandar che i altri i fae dessision par mi?

CHE QUALITÀ NDARÀ GIUTARNE?

4. Che qualità pol giutarne a acetar boni consili?

⁴ Par acetar consili, ghemo de esser ùmili. Par esémpio, se semo nte una situassion che no ghemo mai infrontà e no savemo giusto cossa far, l’è importante capir che ghemo bisogno de aiuto par far la meio dessision. La umiltà ne giuta a capir che ghen’è tante robe che no savemo mia. Alora, se semo ùmili, saremo premosi de scoltar e meter in pràtica i consili che i vien dela Bìblia. Invesse, se no semo ùmili, Geovà no’l ndarà giutarne e, quando catemo un consìlio nela Bìblia, ndaremo pensar che no l’è par noantri. — Mic. 6:8; 1 Pie. 5:5.

5. Parché che Davi fursi el podaria esser deventà orgolioso?

⁵ Varda cossa che podemo imparar col rè Davi. Lu el ga fato tante bele robe, ma no l’è mia deventà orgolioso. Par esémpio, vanti de esser rè, tanti i savea che lu l’era bravo de sonar mùsica. E fin el rè Saul lo ga ciamà par sonar mùsica. (1 Sam. 16:18, 19) Dopo che Geovà lo gavea scoliesto come rè, Davi el ga ricevesto tanto spìrito santo. (1 Sam. 16:11-13) Par quela, lu el ga finio fora col gigante Golia e con tanti nemighi dei israeliti. E, el pòpolo el lodea tanto a Davi. (1 Sam. 17:37, 50; 18:7) Dopo de far tute queste bele robe, Davi el podaria scominsiar a pensar che no’l gavea mia bisogno dei consili dei altri. Ma, lu no’l ga mia fato cossita parché l’era tanto ùmile.

6. Come che savemo che Davi sempre el acetea consili? (Varda anca la ilustrassion.)

⁶ Parché che podemo dir che Davi sempre el acetea consili? Parché la Bìblia la mostra che, ancora vanti de esser rè, lu sempre el ga scoltà consili de òmini e anca de una dona de nome Abigail. Ela la era maridada con Nabal, un omo orgolioso e tanto rugno. Ma, Davi no l’era come Nabal. Come lu el ga acetà el consìlio de Abigail, no’l ga fato un bruto sbàlio. (1 Sam. 25:2, 3, 21-25, 32-34) Podemo anca dir che Davi sempre el scoltea quel che i altri i ghe disea parché el ga scoliesto bravi òmini par darghe consili dopo che lu l’è deventà rè. — 1 Cró. 27:32-34.

7. Cossa che imparemo del esémpio de Davi ? (Eclesiasti 4:13) (Varda anca la ilustrassion.)

⁷ Podemo imparar tanto col esémpio de Davi. Pol esser che semo bravi de far un laoro o che ghemo qualche autorità. Ma ancora cossita, mai ghemo de pensar che savemo tuto e che no ghemo bisogno dei consili dei altri. Invesse, ghemo de far compagno a Davi e esser pronti par acetar boni consili de tuti. (Ledi Eclesiasti 4:13.c) Se femo cossita, no ndaremo far bruti sbali che i pol disgustar a noantri e ai altri.

CHI CHE POL DARNE BONI CONSILI?

8. Parché che Gionatan el podea dar boni consili a Davi?

⁸ Podemo imparar anca altre robe del bel esémpio de Davi. Lu el ga scoltà consili de persone che le gavea una forte amicìssia con Geovà e anca che le capia ben le dificoltà che lu l’era drio infrontar. Par esémpio, quando lu el volea saver se el rè Saul el volea far pace con lu, Davi el ga scoltà i consili de Gionatan, el fiol de Saul. Parché? Parché Gionatan el gavea una forte amicìssia con Geovà e anca el cognossea tanto ben so pare, Saul. (1 Sam. 20:9-13) Cossa che podemo imparar?

9. Chi che pol darne boni consili? Spiega. (Proverbi 13:20)

⁹ Alora, chi che pol darne boni consili? Una persona che gàpia una forte amicìssia con Geovà e che anca la gàpia speriensa nel assunto che ghemo bisogno de aiuto.d (Ledi Proverbi 13:20.e) Par esémpio, metemo dir che un gióveno el vol catar fora una morosa par maridarse. Chi che podaria darghe boni consili? Fursi un fradel che no l’è mia maridà podaria doperar prinsipi dela Bìblia par giutarlo. Ma saria ancora meio se lu el domandesse consili a un fradel e una sorela maridadi fà un per de ani. Lori i podaria spiegarghe come i ga metesto in pràtica i consili dela Bìblia e anca cossa che i ga imparà nela so vita.

10. Cossa che ndaremo imparar adesso?

¹⁰ Fin qua, ghemo visto le qualità che pol giutarne a acetar boni consili e chi che pol darneli. Adesso, ndaremo veder come podemo mostrar che volemo pròpio ricever consili e se l’è bon domandar che i altri i fae dessision par noantri.

COME CHE POSSO MOSTRAR CHE VUI RICEVER CONSILI?

11-12. (a) Cossa che fursi una persona la fà? (b) Cossa che Roboan el ga fato quando el ga bio de far una dessision tanto importante?

¹¹ Dele volte, una persona la pol fin domandar consili ai altri. Ma se la ga belche dessidio quel che la ndarà far prima de domandarli, la ze sol drio proar catar fora qualchedun par dirghe che la so dessision la ze giusta. Una persona che la fà cossita no la vol ricever un consìlio. Adesso, ndaremo imparar con quel che ga sucedesto col rè Roboan.

¹² Roboan l’è deventà rè dopo che so pare, el rè Salomon, l’è morto. Anca se Israel l’era un bel posto de star, i israeliti i pensea che Salomon ghe fea laorar massa. Par quela, lori i ga domandà a Roboan che li assesse laorar manco. Roboan el ga dito che el gavea de pensar vanti de far una dessision. Prima, lu el ga domandà aiuto ai bravi òmini che i gavea dato consili a Salomon. (1 Rè 12:2-7) Questa la ze stata una bela roba. Ma lu no’l ga mia acetà el consìlio de quei bravi òmini. Parché? Pol esser che Roboan el gavea belche dessidio cossa el ndaria far e l’era in serca de persone che saria de acordo cola so dessision. Par quela che lu el ga domandà consili ai so amighi, che i era pi gióveni. (1 Rè 12:8-14) Dopo, Roboan el ga dito al pòpolo pròpio quel che i so amighi i ghe gavea dito. Alora, la nassion la se ga spartio in due e Roboan el ga bio tante brute dificoltà. — 1 Rè 12:16-19.

13. Come che podemo mostrar che volemo ricever un consìlio?

¹³ Cossa che podemo imparar del esémpio de Roboan? No ghemo mia de far una dessision e sol dopo domandar consili ai altri. Invesse, ghemo de sforsarse par scoltar i consili che i altri i ne dà. Come che podemo saver se semo cossita? Podemo domandarse: ‘Sarà che, quando domando un consìlio, no lo aceto sol parché l’è difarente de quel che son drio pensar?’ Vedemo un esémpio.

14. Cossa ghemo de ricordarse quando ricevemo un consìlio? Spiega. (Varda anca la ilustrassion.)

¹⁴ Metemo dir che un fradel el ga ricevesto la oportunità de cambiar de laoro e ciapar de pi soldi. Ma prima de acetarlo, lu el domanda consili a un ansiano. Questo fradel el dise al ansiano che, par far questo laoro, lu el gavaria de restar un bon tempo distante dela so fameia. Alora, el ansiano ghe ricorda che la Bìblia la dise che l’è pi importante giutar la nostra fameia a gaver una forte amicìssia con Geovà che el laoro. (Efe. 6:4; 1 Tim. 5:8) Quel fradel no l’è mia de acordo con quel che el ansiano el ghe ga dito. Alora, lu el seita a domandar consili a altri fradei fin che qualchedun ghe diga che saria bon acetar quel laoro. Sarà che quel fradel l’era pròpio in serca de un consìlio o sol el volea catar una persona che la fusse de acordo cola dessision che lu volea far? Ghemo de ricordarse che no podemo mia fidarse nel nostro cuor. (Ger. 17:9) Par quela, dele volte, el consìlio che no volemo mia scoltar l’è pròpio quel che ghemo de bisogno.

SARÀ CHE L’È BON DOMANDAR AI ALTRI QUEL CHE GO DE FAR?

15. Cossa che no ghemo mia de far, e parché?

¹⁵ Come ghemo visto, una persona che la ga sabedoria la va in serca de consili dela Bìblia e de bravi servi de Geovà vanti de far una dessision. Ma ghemo de star atenti par mai domandar che i altri i ne diga quel che ghemo de far. Arquanti fursi i domanda a un bravo fradel o sorela: ‘Cossa che te farissi se te fussi in questa situassion?’ Arquanti fursi sol i varda le dessision che altri i ga fato e i fà compagno. Ma mai ghemo de far cossita. Parché? Parché Geovà el vol che cada un de noantri fae le so dessision. — Gàl. 6:4, 5. 

16. (a) Che dessision i fradei de Corinto i gavea de far? (b) Chi che gavea de far la dessision? (1 Corinti 8:7; 10:25, 26)

¹⁶ Vedemo quel che ga sucedesto coi dissìpoli de Gesù del primo sècolo nela cità de Corinto. Lori i gavea de dessider se i ndaria magnar carne che fursi la era stata data come sacrifìssio a dèi falsi. Paolo el gavea scrito: “Savemo che el ìdolo no l’è gnente e che ghen’è un sol Dio.” (1 Cor. 8:4) Alora, arquanti fradei i ga dessidio che no ghen’era problema ndar al mercà, comprar quela carne e magnarla. Invesse, altri i ga dessidio no magnarla. (Ledi 1 Corinti 8:7;f 10:25, 26.g) Cada fradel el gavea de far la so dessision. Paolo el ga dito che nissun podea dir quel che i altri i gavaria de far e gnanca ndar drio ale dessision che i altri i fea. Parché? Parché ‘cada fradel o sorela ndaria risponder a Dio par quel che el fà’. — Rom. 14:10-12.

17. Cossa che pol suceder se sol ndemo drio ale dessision che i altri i fà? (Varda anca la ilustrassion.)

¹⁷ Ancoi, pol suceder una roba compagna con noantri. Par esémpio, cada un el ga de dessider se el ndarà acetar le pìcole parte del sangue o nò.h L’è vera che no l’è mia fàcile capir tuto sora questo assunto. Ma, cada un el ga la responsabilità de far la so dessision. (Rom. 14:4) Se sol ndemo drio a quel che i altri i fà, mai gavaremo sabedoria. Ghemo de imparar a doperar i prinsipi dela Bìblia par far le nostre dessision. (Ebr. 5:14) Alora, quando che saria meio domandar un consìlio? Prima, ghemo de studiar sora el assunto nela Bìblia e nele publicassion. Se ancora ne fà fadiga capir un prinsìpio dela Bìblia, podemo domandar aiuto a un bravo fradel o sorela.

SEITA A NDAR IN SERCA DE CONSILI

18. Cossa che Geovà el ga fato par noantri?

¹⁸ Geovà l’è un Pare che el ne tende e el ne ama tanto. (Pro. 3:21-23) Lu el ga mostrà che el se fida in noantri parché el vol che femo le nostre dessision. Lu el ne ga dato la Bìblia e bravi amighi che i pol giutarne a capir meio i so prinsipi. Alora, come che podemo mostrar che ghe demo valor a tuto quel che Geovà el fà par noantri?

19. Come che podemo contentar a Geovà?

¹⁹ Sicuro che i genitori i resta contenti de veder che i so fioi i ze drio vegner grandi e deventar bravi servi de Geovà che i giuta i altri. Dela stessa maniera, Geovà el resta tanto contento de veder che semo drio deventar bravi servi soi, che ndemo in serca de consili e che femo bone dessision.