Geovà l’è la “nostra granda alegria”

1-2. (a) Come che tante persone le se sente ancoi? (b) Cossa che ndaremo imparar in questo stùdio?

QUASI tute le persone ancoi le se sforsa tanto par esser felice. Ancora cossita, par che no le ze mai contente. Tanti i se sente disgustadi e desanimadi. E come semo drio viver nei “ùltimi giorni”, fin noantri che servimo a Geovà podemo sentirse cossita. — 2 Tim. 3:1.

² In questo stùdio, ndaremo capir chi che pol giutarne a gaver alegria. Dopo, ndaremo veder tre robe che le pol finir cola nostra alegria e cossa che podemo far par gaverla nantra volta.

CHI CHE POL GIUTARNE A GAVER ALEGRIA?

3. Cossa che imparemo sora Geovà quando vardemo tuto quel che el ga creà? (Varda anca la ilustrassion.)

³ Geovà l’è felice e el vol che tuti noantri semo felici. In tuto quel che lu el ga fato, vedemo la so alegria. Par esémpio, ghemo alegria quando vedemo che el nostro pianeta l’è tanto bel e con tanti colori difarenti, quando vedemo le bestiolete che le giuga, e quando magnemo tante robe bone. Par quela, semo sicuri che Dio el ne ama e el vol che godemo la vita!

Baby elephant: Image © Romi Gamit/Shutterstock; penguin chicks: Vladimir Seliverstov/500px via Getty Images;baby goats: Rita Kochmarjova/stock.adobe.com; two dolphins: georgeclerk/E+ via Getty Images

4. (a) Parché che Geovà l’è felice anca se el sa che tanti i ze drio sofrir? (b) De acordo con Salmo 16:11, cossa che Geovà el ne dà?

⁴ Geovà el sa che tanti i ze drio sofrir ancoi e el resta disgustà. Ancora cossita, la Bìblia la dise che Geovà l’è el “Dio felice”. (1 Tim. 1:11) Ma parché che Geovà el seita a esser felice? Parché lu el sa che el sofrimento ndarà finirse suito. Intanto che questo giorno no’l riva, Geovà el capisse le nostre dificoltà e el vol giutarne. Come che lu el ne giuta? Lu el ne dà la alegria. (Ledi Salmo 16:11.a) Vedemo adesso come Geovà el ga giutà a Gesù a gaver alegria.

5-6. Parché che Gesù l’è felice?

⁵ Dopo de Geovà, Gesù l’è la persona pi felice che ghen’è. Parché? (1) Parché ‘lu l’è la imàgine’ de so Pare, che l’è el Dio felice. (Col. 1:15; varda la nota “feliz” in 1 Timòteo 6:15 nela Bìblia de Stùdio in portoghese) (2) Parché la alegria la vien de Geovà e no ghen’è nissun che ga passà tanto tempo con Geovà come Gesù.

⁶ Gesù el resta tanto contento parché el fà tuto quel che el so Pare el ghe domanda. (Pro. 8:30, 31; Gio. 8:29) Par quela, Geovà el se stima tanto del so Fiol. — Mat. 3:17.

7. Cossa che ghemo de far par esser felici?

⁷ Compagno a Gesù, anca noantri podemo esser felici. Come? Ghemo de esser amighi de Geovà parché la alegria la vien de lu. Quando imparemo sora Geovà e femo come lu, ghemo pi alegria. E restemo contenti se obedimo a Geovà e lo assemo contento.b (Sal. 33:12) Ma sarà che, quando semo desanimadi, questo vol dir che Geovà no l’è pi contento con noantri? Nò, parché Geovà el ne capisse, el sa che semo imperfeti, e che dele volte ghemo dificoltà, problemi e fin depression. (Sal. 103:14) Adesso, ndemo veder arquante robe che le pol assarne desanimadi e cossa che podemo far par gaver alegria nantra volta.

COSSA CHE POL GIUTARTE A GAVER ALEGRIA?

8. Cossa che pol suceder quando ghemo problemi?

⁸ Robe che le pol assarne desanimadi: I nostri problemi. Pol esser che te sì drio sofrir par causa dela perseghission, de una desgràssia dela naturesa, de una bruta malatia, parché te sì vècio o fin poareto. Robe come queste le pol assarne tanto desanimadi, ancora de pi se no podemo far gnente par cambiar la nostra situassion. La Bìblia la dise che massa pensieri pol assarne disgustadi. (Pro. 15:13) I nostri problemi i pol assarne strachi e tanto desanimadi. Varda quel che ga sucedesto con Babis, un ansiano che, in quatro ani, el ga perso so fradel, so mare e so pare. Lu el ga dito: “Mi me sentia mi mi sol, e me parea che nissuni saria bon de giutarme. Me sentia massa ansioso e disgustà parché no ero stà bon de passar pi tempo col me fradel, me mare e me pare vanti dela so morte.”

9. Cossa che pol giutarne a gaver alegria nantra volta? (Geremia 29:4-7, 10)

⁹ Cossa che pol giutarne a gaver alegria nantra volta? Saremo pi felici se stemo atenti ale robe bone che ghemo invesse de pensar in quel che no ghemo mia. El mondo el dise che sol saremo felici se la nostra vita la ze perfeta. Ma no l’è mia cossita. Par esémpio, quando i giudei i era in Babilònia, Geovà ghe ga dito che lori i podaria esser felici se i fesse el so meio par viver ben lì. (Ledi Geremia 29:4-7,c 10.d) Cossa che imparemo? Quando qualcossa nela nostra vita la càmbia, ghemo de esser contenti con quel che ghemo invesse de pensar in quel che no ghemo mia. E ricòrdate che mai te sarè ti ti sol e che Geovà sempre el ndarà giutarte. (Sal. 63:7; 146:5) Una sorela de nome Effie la ga sofrio un assidente e no la ga pi podesto caminar. Effie la ga dito: “Go bio el aiuto de Geovà, dela me fameia e dei me fradei e sorele. Alora, come mi vui mostrar che dao valor a tuto quel che lori i ga fato par mi, proo far el me meio par esser contenta.”

10. Parché che podemo gaver alegria anca quando ghemo dificoltà?

¹⁰ Anca se ghemo problemi o sucede robe brute con noantri o cola nostra fameia, podemo gaver alegria.e (Sal. 126:5) Parché? Parché la alegria no la vien de quel che sucede nela nostra vita. Una pioniera de nome Maria la ga dito: “Se te sì contento anca quando te ghè dificoltà, questo no vol mia dir che no te sì disgustà. Invesse, mostra che te te ricordi dele bele promesse de Geovà. Nostro caro Pare el ne giuta a gaver alegria.” Alora ricòrdate che, anca se adesso te ghè tanti problemi, no sarà sempre cossita. Suito, Geovà el ndarà finir fora con tuto quel che ne fà sofrir.

11. Cossa che te ghè imparà col esémpio del apòstolo Paolo?

¹¹ Ma sarà che gaver tanti problemi mostra che Geovà no l’è mia contento con noantri? Nò! Pensa nei servi de Geovà del passà che i ga bio tante dificoltà. Par esémpio, Gesù el ga dato al apòstolo Paolo el importante laoro de parlar dele bone notìssie “ale nassion, ai rè e ai fioi de Israel”. (Ati 9:15) Ancora cossita, Paolo el ga bio tanti problemi. (2 Cor. 11:23-27) Ma sarà che le dificoltà che Paolo el gavea mostrea che Geovà no l’era mia contento con lu? Sicuro che nò! Invesse, Paolo l’è stà bon de perseverar parché el gavea el aiuto de Geovà. (Rom. 5:3-5) E ti, te seiti a servir a Geovà anca quando te infronti dificoltà? Alora, te pol esser sicuro che lu l’è tanto contento con ti.

12. Cossa che pol suceder se no semo boni de far quel che volarìssino par Geovà?

¹² Robe che le pol assarne desanimadi: Quando no sucede quel che volemo. (Pro. 13:12) Noantri amemo tanto a Geovà e volemo far el nostro meio a lu. Ma se scoliemo far una roba che no semo mia boni, podemo restar tanto desanimadi. (Pro. 17:22) Varda quel che una pioniera de nome Holly la ga dito: “Mi volea tanto far la Scola par Vangelisadori del Regno, predicar in nantro paese, o laorar nela costrussion de Ramapo. Ma la me vita la ga cambià e no son stata bona de far gnanca una de queste robe. Son restada tanto disgustada. L’è fadiga quando te vol far tante robe, ma no te sì bona de far gnente.” Tanti servi de Geovà i se sente cossita quando no i ze boni de far quel che i volaria par Geovà.

13. Che altre robe te pol far nel to laoro a Geovà?

¹³ Cossa che pol giutarne a gaver alegria nantra volta? Ricòrdate che Geovà no’l te domanda de far de pi de quel che te pol e che el te dà tanto valor, anca se no te sì bon de far tuto quel che i altri i fà. Lu el vol che femo quel che semo boni e che seitemo fedeli. (Mic. 6:8; 1 Cor. 4:2) Geovà el dà pi valor ale nostre qualità che ai laori che femo nela so organisassion. Se Geovà no’l speta che femo de pi de quel che podemo, noantri ghemo de pensar compagno a lu.f Alora, se no te pol far quel che te piaseria nel to laoro a Geovà, pensa in altre robe che te pol far. Par esémpio, te pol giutar un gióveno a esser un servo de Geovà ancora pi bravo o incoraiar i fradei e sorele pi veci. Te pol anca visitar qualchedun, telefonarghe o scriverghe qualcossa. Geovà el resta contento quando el vede che te sì drio far quel che te pol e lu el ndarà benedirte con alegria. No stà desmentegarte che, in Paradiso, te podarè servir a Geovà de una maniera che no te ghè mai pensà. Holly, che ghemo parlà prima, la ga dito: “Quando scomìnsio a restar desanimada, me ricordo che ndarò viver par sempre e che, col aiuto de Geovà, mi podarò far tuto quel che mi vui par lu.”

14. Che nantra roba pol assarne desanimadi?

¹⁴ Robe che le pol assarne desanimadi: Pensar sol in divertirse. Nela internet, vedemo che tante persone le par de esser felice parché le fà tuto quel che le vol. Anca noantri podemo scominsiar a pensar che sol saremo felici se sempre femo quel che ne piase, compremo quel che volemo o viaiemo par bei posti. L’è vera che no l’è sbalià far robe cossita parché Geovà el vol che godemo la vita. Ma tante persone che le ga fato sol queste robe le ga capio che no l’è mia ben cossita. Invesse de restar pi contente, le ze restade desanimade. Una pioniera de nome Eva la ga dito: “Se sol pensemo in divertirse o far robe che ne piase, no saremo mai contenti.” Alora, se sol pensemo in divertirse, restaremo desanimadi e disgustadi.

15. Cossa che imparemo con quel che ga sucedesto col rè Salomon?

¹⁵ Podemo imparar tanto con quel che ga sucedesto col rè Salomon. Lu el ga proà esser felice cole robe bone che el magnea, cole bele mùsiche che el scoltea e con tuto quel che el podea comprar. Ma lu el se ga nicorto che queste robe no ghe ga dato alegria. Lu el ga dito: ‘No’l ghe basta ai oci quel che i vede, e la récia no la resta piena con quel che la scolta.’ (Ecl. 1:8; 2:1-11) Cossa che imparemo? Ancoi, tanti i pensa che gaver una mùcia de soldi e far tuto quel che i vol ghe darà alegria. Ma questo l’è una busia parché queste robe mai le podarà giutarne a esser felici del bon.

16. Parché che saremo pi felici se giutemo i altri? (Varda anca la ilustrassion.)

¹⁶ Cossa che pol giutarne a gaver alegria nantra volta? Gesù el ga insegnà che “ghen’è de pi felicità in dar che in ricever”. (Ati 20:35) Un ansiano de nome Alekos el ga dito: “Mi proo far robe sémplisse par giutar i altri. Quanto de pi mi fao par i altri, manco mi penso nele me dificoltà e resto pi contento.” Alora, proa anca ti far qualcossa par quei che i ze desanimadi o che i ga bisogno de aiuto. Ma cossa che ti te pol far par i altri? Fursi no te pol finir fora con un problema de un amigo, ma te pol darghe consolo, scoltarghe con atension e ricordarghe che lu el pol contar i so problemi par Geovà e domandarghe aiuto. (Sal. 55:22; 68:19) Te pol ricordarghe che Geovà no lo ga abandonà. (Sal. 37:28; Isa. 59:1) Te pol anca far una roba sémplisse, come far qualcossa par magnar insieme, convidarlo par far un esersìssio, o par ndar ala predicassion. Cossita, lu el restarà pi contento. Alora, assa che Geovà el te dopere par giutar i altri. Sicuro che quando doperemo el nostro tempo par giutar i altri, se sentimo pi felici! — Pro. 11:25.

17. Cossa ghemo de far se volemo gaver la vera alegria? (Salmo 43:4)

¹⁷ La Bìblia la dise che Geovà l’è la nostra “granda alegria”. (Ledi Salmo 43:4.g) Alora, saremo felici se seitemo a imparar sora Geovà e a obedirghe. Anca se ghemo problemi, no restaremo ansiosi e gnanca con paura. Parché? Parché Geovà l’è el nostro meio Amigo e lu el pol giutarne a gaver alegria par sempre! — Sal. 144:15.