Sofrimento — Sarà che l’è un castigo de Dio?

LUZIA LA ZE SÒTA. Par causa de una bruta malatia che la ga ciapà quando la era picinina, la ze restada sòta. Quando la gavea 16 ani, una dona la ghe ga dito: “Dio el te ga castigà con questa bruta malatia parché te sì stata dispetosa cola to mare.” Tanto tempo dopo, Luzia ancora la se ricorda come la se ga sentio mal de scoltar questo.

QUANDO DAMARIS LA GA SAVESTO CHE LA GAVEA UN CÀNCARO NEL SARVEL, so pare el ghe ga dito: “Cossa gheto fato? Dio l’è drio castigarte parché te ghè fato qualcossa de bruto.” Damaris la ze restada tanto disgustada.

Fà tanto tempo che le persone le pensa che le malatie le ze un castigo de Dio. El libro Hábitos e Costumes das Terras Bíblicas, in inglese, dise che nel tempo de Gesù tanti i credea che una persona la restea malada par causa de un pecato che ela o qualchedun dela fameia gavea fato. E el libro Medicina Medieval e a Peste, in inglese, dise che tanto tempo dopo de Cristo le persone ancora le pensea che Dio le castighea par meso de malatie. Ma pensaghe sora: De pi de 600 ani indrio, milioni de persone le ze morte par causa dela Peste Negra. Sarà che l’era un castigo de Dio o l’era sol una malatia che la ze vegnesta fora? Pol esser che arquanti i se domande: ‘Sarà che Dio el dopera malatie par castigar le persone che le ga fato bruti pecati?’a

PENSAGHE SORA: Metemo dir che Dio el doperesse malatie e sofrimento par castigar le persone. Alora, sarà che Gesù el ndaria curar tanti maladi quando l’era qua nela Tera? Se fusse cossita, sarà che Gesù no’l saria drio ndar contra i giulgamenti de Dio? (Mateo 4:23, 24) Gesù mai el faria una roba de questa. Lu el ga dito: “Mi sempre fao quel che ghe piase” a Dio e “fao come el Pare el me ga mandà”. — Gioani 8:29; 14:31.

La Bìblia la insegna che Geovà Dio “mai l’è ingiusto”. (Deuteronómio 32:4) Par esémpio, Geovà mai el ndaria far che un avion caschesse e copar tanta gente sol par castigar una de quele persone. Un servo de Dio del passà che el gavea nome Abraon el savea ben che Dio l’è giusto. Abraon el ga dito che Geovà mai el ndaria “finir fora coi giusti insieme coi rugni”. (Génesi 18:23, 25) La Bìblia anca la dise che Dio “mai el fà robe rugne” o “robe sbaliade”. — Giò 34:10-12.

COSSA CHE LA BÌBLIA LA INSEGNA?

Quando sofrimo, mai ghemo de pensar che Dio l’è drio castigarne par una roba sbaliada che ghemo fato. Quando Gesù l’era qua nela Tera, lu el ga insegnà che Dio no’l fà cossita. Una volta, Gesù e i so dissìpoli i ga visto un omo che l’era nassesto orbo. I so dissìpoli i ghe ga domandà: “Istrutor, parché che questo omo l’è nassesto orbo? L’è stà par via de un pecato suo, o de so pare e so mare?” Gesù el ghe ga rispondesto: “Gnanca de lu, gnanca de so pare e so mare. Ma ga sucedesto questo con lu par mostrar quel che Dio el pol far.” — Gioani 9:1-3.

In quel tempo, tanti i pensea che Dio el castighea le persone par meso dele malatie e del sofrimento. Anca i dissìpoli de Gesù i pensea cossita. Alora, Gesù el ghe ga dito che gnanca quel omo gnanca i so genitori i gavea la colpa che lu l’era nassesto orbo. Dopo, Gesù el ga curà quel omo orbo. Cossita, lu el ga insegnà che Dio no’l castiga le persone con malatie e sofrimento. (Gioani 9:6, 7) Alora, quei che i ze drio infrontar bruti problemi de salute i pol restar tranquili parché Dio no’l ga la colpa del so sofrimento.

La Bìblia la dise

• “Par robe rugne Dio no’l pol esser provà, gnanca el prova nissuni.” (TIAGO 1:13) Questo vol dir che Dio no’l castiga le persone con robe rugne. Suito, Dio el ndarà finir con tuto quel che fà le persone sofrir fà tanto tempo, come le malatie, el dolor e la morte.

• Gesù Cristo “el ga curà tuti quei che i era maladi”. (MATEO 8:16) Lu el ga fato cossita par mostrarne che nel futuro lu el ndarà curar tuti i maladi quando el sarà Rè del Regno de Dio.

• Dio “el sugarà tute le làgrime dei so oci, e no ghen sarà pi la morte, gnanca pi tristessa, gnanca piander, gnanca dolor. Le robe che ghen’era vanti no ghen’è pi”. — APOCALISSE 21:3-5.

ELO DE CHI LA COLPA?

Alora, parché che patimo tanto? Fà tanti ani che le persone le proa saverlo. Se Dio no’l ga la colpa del nostro sofrimento, alora, elo de chi la colpa? Ndaremo saver la risposta a queste domande nel pròssimo artìcolo.