Sarà che Dio el resta disgustà de vederne sofrir?

COSSA CHE IMPAREMO DELA MANIERA CHE DIO EL NE GA CREÀ?

Tuti noantri ghemo la capassità de capir quel che nantra persona la sente e de imaginar de esser nel so posto quando la ze drio sofrir. El dotor Rick Hanson el ga dito che semo nassesti con questa capassità.

PENSAGHE SORA: I umani i ga la capassità de sentir quel che i altri i sente. Par quela, i ze difarenti dele bèstie. Noantri ghemo questa capassità parché Dio el ne ga creà cole medèsime qualità de lu. (Génesi 1:26) Alora, quando una persona la capisse quel che nantra la sente, ela la ze drio far compagno al nostro Creador, Geovà Dio. — Proverbi 14:31.

COSSA CHE LA BÌBLIA LA INSEGNA?

Dio el resta disgustà de vederne sofrir. Par esémpio, nel passà, i israeliti i ga patio quando i era schiavi nel Egito. Dopo, lori i ga tribolà tanto quando i ga vivesto 40 ani nel deserto. La Bìblia la dise come che Dio el se ga sentio: “Durante tuto el so sofrimento, anca Lu el ga sofrio.” (Isaia 63:9) Dio el savea quel che lori i era drio infrontar, ma anca l’è restà tanto disgustà de vederli sofrir. Lu el ga dito: ‘Mi sò tanto ben quel che sì drio sofrir.’ (Ésodo 3:7) Lu el ga dito anca: ‘Quel che el ve toca, el toca nel me òcio.’ (Zacaria 2:8) Questo vol dir che quando semo drio sofrir, anca Dio el sofre.

Fursi te pensi che no te mèriti che Dio el se preocupe con ti. Ma la Bìblia la ne dise che “Dio l’è pi grando che el nostro cuor e el sa tute le robe”. (1 Gioani 3:19, 20) Dio el ne cognosse meio che a noantri stessi. Lu el sa de tuto quel che semo drio infrontar, quel che pensemo e quel che sentimo. Dio el se mete nel nostro posto e el sente la medèsima roba che noantri sentimo.

La Bìblia la dise

• ‘Ti te ciamarè, e Geovà el te risponderà. Ti te ndarè suplicar par aiuto e lu el te dirà: “Eco, son qua!”’ — ISAIA 58:9.

• “‘Parché mi sò ben quel che penso par valtri’, el dise Geovà. ‘Vui che gàpie pace, nò desgràssia, e vui darve un futuro e una speransa. E valtri ndaré ciamarme e ndaré pregar a mi, e mi vao scoltarve.’” — GEREMIA 29:11, 12.

• “Te sì sempre insieme de mi ndove mi vao. Meti via le me làgrime nel to odre. Te ghè scrito sora lore nel to libro, mia vera?” — SALMO 56:8.

DIO EL NE CAPISSE E EL RESTA DISGUSTÀ DE VEDERNE SOFRIR

Come ghemo visto, Dio el sente quel che sentimo. Sarà che saver de questo pol giutarne a darghene fora cole dificoltà? Varda quel che ga sucedesto con Maria:

“Me fiol el ga bio el càncaro e dopo de due ani l’è morto con 18 ani. Go scominsià a pensar che ero drio tribolar massa e che no meritea infrontar tuto quel. Mi son restada tanto inrabiada con Geovà parché no’l ga fato gnente par curar me fiol.

“Dopo de sei ani, go contà par una amiga dela congregassion come che ero drio sentirme. Mi ghe go dito che Geovà no’l me amea. Ela la me ga mostrà tanto amor e la capia quel che ero drio sentir. Mi ghe go dito tuto quel che gavea rento el me cuor, e ela la me ga scoltà con passiensa. La me ga mostrà un testo che me ga giutà tanto. L’è stà 1 Gioani 3:19, 20, che dise: ‘Dio l’è pi grando che el nostro cuor e el sa tute le robe.’ Dopo ela la me ga spiegà che Dio el capia quel che ero drio infrontar.

“Ma l’è stà fadiga darghene fora con quela ràbia. Alora, go ledesto Salmo 94:19, che dise: ‘Quando i me pensieri i ze stati massa rento de mi, ti te me ghè consolà e te me ghè cocolà.’ Parea che questo testo l’era pròpio par mi. Col tempo, son stata bona de parlar con Geovà sora quel che ero drio sentir, e l’è stà tanto bon par mi far cossita. Adesso, son sicura che lu el me scolta e el me capisse.”

L’è tanto bel saver che Dio el ne capisse e che el resta disgustà de vederne sofrir. Ma parché che ghen’è tanto sofrimento? Sarà che Dio l’è drio castigarne par causa dei nostri sbali? Sarà che el ndarà far qualcossa par finir col sofrimento? L’è questo che ndaremo veder nei pròssimi artìcoli.