Sarà che Dio el te capisse?

COSSA CHE IMPAREMO DELA MANIERA CHE DIO EL NE GA CREÀ?

Pensa nela amicìssia che ghen’è intrà due fradei gemei. Nancy Segal, che la stùdia sora i fradei gemei nela Califòrnia, la ga dito che fradei che i ze gemei i ze boni de capir del tuto come quelaltro se sente. Una dona che la ga una sorela gemela la ga dito: “Noantri savemo tuto una del’altra.”

Parché che quei che i ze gemei i se cognosse tanto ben cossita? Studiosi i dise che l’è par causa de ndove i vive e dela maniera che i so genitori li sleva su. Ma lori anca i dise che quei che i ze gemei i se capisse tanto ben un al altro parché el so DNA l’è quasi compagno.

PENSAGHE SORA: Geovà Dio el ga creà el DNA. Alora, podemo esser sicuri che lu el ne cognosse meio che tuti. Davi el ga dito: “Te me ghè assà protegesto rento la pansa de me mama. Te ghè visto i me ossi quando son stà fato . . . , anca se nissuni i me vedesse. I to oci i me ga fin visto quando ero sol un embrion. La maniera che son stà fato la era belche scrita nel to libro.” (Salmo 139:13, 15, 16) Lu el sa de tuto quel che infrontemo nela nostra vita e parché che semo cossita. Alora, podemo esser sicuri che Geovà el ne capisse del tuto.

COSSA CHE LA BÌBLIA LA INSEGNA?

Davi el ga pregà: “Ò Geovà, ti te me esamini e te me cognossi. Ti te sè quando me sento do e quando me levo su. De distante, ti te capissi i me pensamenti. Ò Geovà, anca vanti che ghen sìpia una parola nela me léngua, ti belche te la sè ben.” (Salmo 139:1, 2, 4) Geovà el sa de tuto quel che sentimo e el ‘cognosse tuti i nostri pensamenti’. (1 Cróniche 28:9; 1 Samuel 16:6, 7) Cossa che questi testi i ne insegna sora Dio?

Dele volte, noantri no parlemo par Dio sora tuto quel che pensemo e sentimo. Anca cossita, lu el sa tute le robe che femo e el capisse parché che le femo. Lu anca el sa che, dele volte, volemo tanto far una roba, ma no semo boni. Lu el ne ga creà de una maniera che podemo mostrar amor ai altri. Par quela, lu el vol tanto che mostremo amor par i altri par meso de quel che parlemo e de quel che femo. — 1 Gioani 4:7-10.

La Bìblia la dise

• “I oci de Geovà i vede i giusti, e le so récie le scolta le so sùpliche.” — 1 PIERO 3:12.

• Dio el promete: “Farò che te sìpia bon de capir e te insegnarò la strada che te ghè de ndar. Mi te darò consili coi me oci atenti in ti.” — SALMO 32:8.

DIO L’È DELA NOSTRA BANDA

Saver che Dio el ne capisse del tuto e che el sa dele nostre dificoltà ne giuta a ndar avanti. Varda quel che ga sucedesto con Anna, dela Nigèria. Ela la ga dito: “Mi ero drio infrontar un colpo tanto bruto. Par quela, no gavea gnanca pi voia de viver. Mi ero védova e ero drio tender de me fiola che la era in ospedal par causa de una bruta malatia nel sarvel. In quela època, go savesto che gavea el càncaro e che me tocaria far una operassion e tratamenti forti. Mi e me fiola ghemo bio de restar arquanti giorni in ospedal al medèsimo tempo. L’è stà tanto fadiga par mi darghene fora.”

Cossa che ga giutà Anna? Ela la ga dito: “Mi pensea in arquanti testi come Filipensi 4:6, 7 che dise che la ‘pace de Dio, che la ze pi granda de quel che podemo capir, la protegerà el nostro cuor e la nostra mente’. Quando mi pensea sora questo testo, la me amicìssia con Geovà la restea ancora pi forte e me ricordea che lu el me capisse meio che mi stessa. I me cari fradei dela congregassion anca i me ga giutà tanto.

“Ancora go arquanti problemi de salute, ma mi e me fiola stemo tanto meio adesso. Come Geovà l’è dela nostra banda, ghemo imparà a no pensar sol nei nostri problemi. El testo de Tiago 5:11 dise: ‘Quei che i ga perseverà i ze felici. Valtri gavé scoltà sora la perseveransa de Giò e savé dele benedission che Geovà el ghe ga dato. Valtri gavé visto che Geovà el ga tanto amor e misericòrdia.’” Alora, capimo che Geovà el savea de tuto quel che Giò l’era drio infrontar. Quando semo drio tribolar, podemo esser sicuri che Geovà el ne capisse e el sa de tuto quel che semo drio infrontar.