Cossa ghemo de far par Dio scoltar le nostre orassion?

PREGA A GEOVÀ DIO NEL NOME DE GESÙ

“Se domandé al Pare qualcossa nel me nome, lu el ve la darà.” — Gioani 16:23.

Queste parole de Gesù le mostra che Geovà el vol che preghemo a lu nel nome de Gesù Cristo, e no par meso de imàgine, de santi, de àngeli o dei nostri antenati. Quando preghemo a Dio nel nome de Gesù, noantri mostremo che savemo che Dio el scolta le nostre orassion gràssie a quel che Cristo el ga fato par noantri. Gesù el ga dito: “Nissun riva al Pare senò par meso de mi.” — Gioani 14:6.

PARLA DE CUOR

“Pàrlaghe tuto quel che l’è nel to cuor.” — Salmo 62:8.

Ghemo de pregar a Geovà come se fùssino drio parlar con un pare che ne ama. Noantri ghemo de parlar con lu con rispeto e de cuor, e no drio leder de un libro de orassion o drio doperar sempre le medèsime parole.

PREGA DE ACORDO COLA VOLONTÀ DE DIO

“No importa cossa che ghe domandemo de acordo cola so volontà, Dio el ne scolta.” — 1 Gioani 5:14.

Nela Bìblia, Geovà el mostra cossa che el ndarà far par noantri e cossa che lu el vol che femo par lu. Se volemo che Dio el scolte le nostre orassion, ghemo de pregar “de acordo cola so volontà”. E par saver quala ze so volontà, ghemo de cognosser ben a Dio. Par quela, ghemo de studiar la Bìblia. Se femo cossita, Dio el gavarà caro de scoltar le nostre orassion.

SORA COSSA PODEMO PREGAR?

Prega par quel che te ghè de bisogno. Podemo pregar a Dio par domandarghe quel che ne ocore tuti i giorni: magnar, robe de vestir e un posto de star. Podemo anca pregar par domandarghe sabedoria par far bone dessision e domandarghe forsa par darghene fora cole dificoltà. Anca podemo domandarghe de pi fede, el so perdon e el so aiuto. — Luca 11:3, 4, 13; Tiago 1:5, 17.

Prega par i altri. Genitori che i ama i so fioi i ghe piase quando i fioi i ama un al altro. Anca Geovà el vol che i so fioi qua nela Tera i se preocupe un colaltro. Alora noantri podemo pregar par la nostra fameia, el nostro sposo o sposa, i nostri fioi e i nostri amighi. El dissìpolo Tiago el ga scrito: ‘Gavé de pregar un par el altro.’ — Tiago 5:16.

Prega par ringrassiar. Dio l’è el nostro Creador, e la Bìblia la dise sora lu: “Lu el ve ga mostrà la so bontà quando el ve ga dato le piove, bone racolte e tanto de magnar, parché el volea che valtri restessi tanto contenti.” (Ati 14:17) Quando pensemo sora tuto quel che Dio el ga fato par noantri, sentimo la voia de ringrassiar a lu nele nostre orassion. Ghemo anca de mostrar che semo grati a Dio drio obedirghe. — Colossensi 3:15.

GÀPIA PASSIENSA E SEITA PREGAR

Se Dio no’l risponde presto ale to orassion, pol esser che te te senti desanimà. Ma sarà che vol dir che Dio no’l se importa con ti? Sicuro che el se importa! Quel che arquante persone le ga dito mostra che, dele volte, tuto quel che te ghè de far l’è seitar a pregar.

Steve, che ghemo parlà nel primo artìcolo, el ga dito: “Se mi gavesse desistio de pregar, mi gavaria perso tuta la speransa de esser felice.” Cossa lo ga fato cambiar la so maniera de pensar? El ga scominsià a studiar la Bìblia e el ga imparà che l’è importante seitar pregar. Anca el ga dito: “Mi prego a Dio par ringrassiar a lu par tuto el aiuto che go ricevesto dei me cari amighi. Mai son stà felice come son adesso.”

Jenny, che la catea che no la meritea che Dio la scoltesse, la ga dito: “Mi go pregà a Dio de tuto el me cuor par che el me giutesse a capir parché che mi sentia che no gavea valor.” Come che pregar la ga giutada? “Parlar con Dio me ga giutà a veder a mi stessa dela maniera che lu el me vede. Me ga giutà a veder che, anca se el me cuor el me fà sentir in colpa, no l’è mia cossita che Dio el pensa de mi. Pregar me ga anca giutà a no desister de ndar avanti.” De che altre maniere che pregar l’è stà bon par ela? “Far orassion me ga giutà a veder a Geovà pròpio come un Pare, un Dio che el me ama e un Amigo che sempre el restarà dela me banda intanto che me sforso par far la so volontà.”

Varda anca la stòria de Isabel. Quando la era gràvida, i dotori i ghe ga dito che el so fiol ndaria nasser defissiente. Questo l’è stà un bruto colpo par ela. Arquanti fin ghe ga dito che l’era meio far un aborto. Ela la ga dito: “Mi go sentio come se fusse morir de disgusto.” Cossa che la ga fato? “Mi go pregà tante volte a Dio par domandarghe aiuto.” Col tempo ela la ga bio so fiol, Gerard, e lu l’era pròpio defissiente. Sarà che Isabel la ga sentio che Dio el ga rispondesto ale so orassion? Si! Ela la ga dito: “Adesso Gerard el ga 14 ani. Quando mi vedo che el me fiol el ga alegria anca se l’è defissiente, mi capisso che lu l’è la meio risposta ale me orassion, la meio benedission che Geovà el me ga dato.”

Quel che queste persone le ga contà ne fà ricordarse dele parole del Salmo 10:17: “Ma ti te scoltarè la orassion dei ùmili, ò Geovà. Te vè darghe forsa e tanta atension.” Che bei motivi par seitar a pregar!

Nela Bìblia, catemo tante orassion che Gesù el ga fato. La pi cognossesta la ze quela che lu el ga insegnà ai so dissìpoli. Cossa che podemo imparar de questa orassion?