STÙDIO 14
CÀNTICO 8 Geovà l’è el refùgio
Gavé de scòlier se ndaré servir a Geovà
“Mi e la me fameia ndaremo servir a Geovà.” — GIOS. 24:15.
COSSA CHE NDAREMO IMPARAR?
In questo stùdio, ndaremo ricordarse parché che ghemo scoliesto servir a Geovà.
1. Cossa che ghemo de far par esser pròpio felici, e parché? (Isaia 48:17, 18)
EL NOSTRO caro Pare Geovà el ne ama tanto. Lu el vol che semo felici adesso e nel futuro. (Ecl. 3:12, 13) Ma, lu el sa che par esser pròpio felici ghemo de adorarlo e obedirghe. (Ledi Isaia 48:17, 18.a) Parché? Parché anca se Geovà el ne ga creà cola capacità de far tante robe, lu no’l ne ga creà par governarse e dessider quel che l’è giusto o sbalià. — Ecl. 8:9; Ger. 10:23.
2. (a) Cossa che Sàtana el vol che pensemo? (b) Cossa che Geovà el ga fato?
2 Sàtana el vol che pensemo che semo boni de governarse e che podemo esser felici sensa adorar a Geovà. (Gén. 3:4, 5) Par quela, Geovà el ga dato tempo par le persone governarse. E quando vedemo la bruta situassion del mondo de ancoi, capimo che lore no le ze mia bone. E come la ze stata la vita de quei che i ga dessidio servir a Geovà? La Bìblia la parla de òmini e done che i ze stati tanto felici parché i ga dessidio adorarlo. El meio esémpio l’è stà de Gesù Cristo. In questo stùdio, ndaremo veder parché che Gesù el ga scoliesto servir a Geovà e parché che Geovà el mèrita la nostra adorassion. Dopo, ndaremo ricordarse parché che noantri ghemo scoliesto adorarlo.
PARCHÉ CHE GESÙ EL GA SCOLIESTO SERVIR A GEOVÀ?
3. Cossa che Sàtana el ga dito a Gesù, e cossa che Gesù el ghe ga rispondesto?
3 Quando l’era qua nela Tera, Gesù ga bio de scòlier a chi che el ndaria servir. Poco tempo dopo che Gesù l’è stà batesà, Sàtana el ga dito che el ghe daria tuti i governi del mondo se lu lo adoresse sol una volta. Alora, Gesù el ghe ga dito: “Va via, Sàtana! Parché l’è scrito: ‘Te ghè de adorar a Geovà, el to Dio, e te ghè de servir sol a lu.’” (Mat. 4:8-10) Adesso, ndemo veder parché che Gesù el ga fato questa dessision.
4-5. Parché che Gesù el ga scoliesto servir a Geovà?
4 Parché che Gesù el ga scoliesto servir a Geovà? Prima, parché Gesù el ama tanto el so caro Pare. (Gio. 14:31) Gesù anca el sa che servir a Geovà l’è la roba giusta de far. (Gio. 8:28, 29; Apo. 4:11) Geovà sempre el ga parlà la verità a lu, e tute le bele robe che Gesù el ga le vien de Geovà. (Gio. 1:14) Gesù anca el sa che l’è stà Geovà che ga dato la vita a tuti noantri, che lu l’è de fidarse e che el ne dà tante bele robe. (Sal. 33:4; 36:9; Tia. 1:17) Ma Sàtana l’è tanto difarente de Geovà. L’è stà par causa de lu che ghen’è el pecato e la morte. Sàtana l’è un busier, el vol sempre de pi e el pensa sol in lu stesso. (Gio. 8:44) Gesù el cognosse tanto ben a Geovà e a Sàtana e mai el ga pensà de ndar drio a Sàtana. — Fil. 2:5-8.
5 Gesù anca el ga scoliesto adorar a Geovà parché el savea le bele robe che ndaria suceder se el fusse leal. (Ebr. 12:2) Lu el savea che, se el seitesse leal, lu el saria bon de santificar el nome del so Pare e el ndaria finir col pecato e la morte.
PARCHÉ CHE GEOVÀ EL MÈRITA LA NOSTRA ADORASSION?
6-7. (a) Parché che tanti ancoi no i serve a Geovà? (b) Parché che Geovà el mèrita la nostra adorassion?
6 Tanti ancoi no i ga dessidio servir a Geovà parché ancora no i cognosse le so bele qualità e no i sa le bele robe che lu el ga fato par lori. La medèsima roba ga sucedesto quando el apòstolo Paolo el ga insegnà sora Geovà ale persone de Atena. — Ati 17:19, 20, 30, 34.
7 Paolo el ga spiegà ale persone de Atena che el vero Dio ‘el ghe dà a tuti la vita, el fià e tute le robe’, e che ‘par meso de lu ghemo vita, semo boni de moverse e esistimo’. Lu anca el ga insegnà che Dio l’è el Creador parché el ga dito che ‘el ga fato de un sol omo tute le persone dele nassion’. Par quela, Geovà el mèrita la nostra adorassion. — Ati 17:25, 26, 28.
8. Cossa che Geovà mai el ndarà far, e come che lu el mostra che ne ama tanto?
8 Come Geovà l’è el Creador e el Tuto Poderoso, lu el pol far quel che el vol. Ma, lu mai el ndarà obrigarne a adorarlo. Invesse, Geovà el ne giuta a cognosserlo e a capir che el ne ama tanto. Lu el vol che tuti i sìpie so amighi par sempre. (1 Tim. 2:3, 4) Par quela, Geovà el ne parecia par insegnar i altri sora la bela speransa che el ne dà par el futuro. (Mat. 10:11-13; 28:19, 20) Lu anca el ga fato le congregassion, ndove podemo adorarlo insieme coi nostri fradei e sorele e gaver aiuto dei cari ansiani. — Ati 20:28.
9. Come che Geovà el mostra che el ama a tute le persone?
9 Podemo capir el grando amor de Geovà quando pensemo come che el trata le persone che no le crede mia in lu. Par esémpio, romai fà miliari de ani che tante persone le ze drio dessider lore stesse quel che l’è giusto e sbalià e no le ze drio badarghe a Dio. Ancora cossita, lu el ghe mostra bontà, el ghe dà quel che le ga de bisogno par viver e par goderse la vita. (Mat. 5:44, 45; Ati 14:16, 17) Anca se queste persone no le obedisse a Dio, lore le pol gaver una fameia, amighi, fioi e laorar. (Sal. 127:3; Ecl. 2:24) Sicuro che Geovà el ama a tute le persone. (Éso. 34:6) Adesso, ndemo ricordarse parché che ghemo scoliesto servir a Geovà e che benedission lu el ne dà.
PARCHÉ CHE GHEMO DESSIDIO SERVIR A GEOVÀ?
10. (a) De acordo con Mateo 22:37, parché che ghemo dessidio servir a Geovà? (b) Come che Geovà el ga belche mostrà passiensa con ti? (Sal. 103:13, 14)
10 Prima, noantri servimo a Geovà parché lo amemo tanto. (Ledi Mateo 22:37.b) Quanto de pi imparemo sora le qualità de Geovà, pi volemo esser so amighi. Par esémpio, proa pensar nela passiensa e nel perdon de Geovà. Quando i israeliti i ga desobedio a Geovà, lu el ghe ga dito: ‘Torné indrio e fermeve de far quel che l’è sbalià.’ (Ger. 18:11) E Geovà el se ricorda che semo imperfeti e che semo polver. (Ledi Salmo 103:13, 14.c) Quando te pensi nela passiensa, nel perdon e nele altre bele qualità de Geovà, no te ghè ancora pi voia de servirlo par sempre?
11. Che altri motivi ne ga fato scòlier servir a Geovà?
11 Noantri anca volemo servir a Geovà parché savemo che questa la ze la roba giusta de far. (Mat. 4:10) Noantri capimo che, se seitemo leai, tante robe bone ndarà suceder. Par esémpio, giutaremo a santificar el nome de Geovà, mostraremo che Sàtana l’è un busier e saremo boni de contentar el cuor del nostro caro Pare. Se dessidimo servir a Geovà ancoi, podaremo adorarlo par sempre. — Gio. 17:3.
12-13. Cossa che te ghe imparà con quel che ga sucedesto con Jane e Pamela?
12 Anca quei che i ze pròpio gióveni i pol scominsiar a amar a Geovà e far cada volta pi forte questo amor. Varda, par esémpio, quel che ga sucedesto con due gióvene. Jane, che la gavea 11 ani, e Pamela, che la gavea 10, le ga scominsià a studiar la Bìblia.d Anca se i so genitori no i volesse studiar, lori i ga assà che Jane e Pamela le studiesse, ma sol se lore le fusse ala ciesa insieme ala fameia nel fin de stimana. Jane la ga dito: “Quel che go imparà nela Bìblia cole Testimònie de Geovà me ga giutà a no ndar drio ale robe sbaliade che i me coleghi i fea, come doperar droghe e far robe imorai.”
13 Un per de ani dopo, Jane e Pamela le ze deventade predicadore e le se ga batesà. Dopo, lore le ga scominsià a laorar come pioniere anca se le gavea de tender dei so genitori che i era belche veci. Varda come Jane la se sente par tuto quel che Geovà ghe ga fato: “Mi go visto che Geovà el tende tanto dei so amighi e che, come dise 2 Timòteo 2:19, lu el cognosse pròpio quei che i ze i so servi.” Semo sicuri che Geovà el tende tanto ben de quei che i scòlie amarlo e servirlo.
14. Come che podemo difender el nome de Geovà par meso de quel che femo e de quel che parlemo? (Varda anca la ilustrassion.)
14 Noantri anca volemo che le persone le sàpia che le brute robe che tanti i dise sora Dio le ze busie. Par esémpio, pensa che te ghè un amigo che l’è tanto bon e che sempre el proa giutar i altri. Ma, un giorno te scolti che una persona la ga dito che questo amigo l’è rugno e che el imbroia i altri. Cossa farìssito? Sicuro che te ndarissi difender el to amigo. Dela stessa maniera, Sàtana e tante persone che lu el dopera i dise busie sora Geovà. Ma noantri femo el nostro meio par difender el nome de Geovà e contar la verità sora lu. (Sal. 34:1; Isa. 43:10) Par meso de quel che femo e de quel che parlemo, mostremo che volemo servir a Geovà del tuto.
Ti te giutarè a difender el nome de Geovà? (Varda el paràgrafo 14.)f
15. Che benedission Paolo el ga bio dopo che el ga cambià la so vita par servir a Geovà? (Filipensi 3:7, 8)
15 Restemo anca tanto contenti de far cambiamenti nela nostra vita par contentar a Geovà e far ancora de pi nela nostra adorassion a lu. L’è questo che el apòstolo Paolo el ga fato. Lu l’era tanto importante intrà i giudei, ma el ga assà tuto indrio par esser un dissìpolo de Cristo e servir a Geovà. (Gàl. 1:14) Par causa de questa dessision, Paolo el ga bio tanta alegria e l’è stà scoliesto par ndar al cielo insieme de Gesù nel Regno de Dio. Paolo mai el se ga ciamà gramo dela dessision de servir a Geovà, e gnanca noantri ndaremo ciamarse grami se dessidimo servirlo. — Ledi Filipensi 3:7, 8.e
16. Cossa che te ghe imparà con quel che ga sucedesto con Julia? (Varda anca la ilustrassion.)
16 Se metemo la nostra adorassion a Geovà in primo posto nela vita, lu el ndarà benedirne adesso e anca nel futuro. Varda par esémpio quel che ga sucedesto con Julia. Da picinina, ela cantea nel coral dela ciesa. Tuti i vedea che ela la cantea tanto ben. E, una persona la ga scominsià a pareciarla par esser una cantora de òpera. Ela anca la ga scominsià a cantar in arquanti posti importanti e tante persone la cognossea. Alora, quando ela la era drio studiar nte una scola de mùsica famosa, una colega la ga parlà con ela sora Dio e la ghe ga dito che el so nome l’è Geovà. Poco tempo dopo, Julia la ga scominsià a studiar la Bìblia due volte ala stimana. Ela la ga dessidio doperar el so tempo e la so forsa par servir a Geovà invesse de esser una cantora de òpera. Ma no l’è stà mia fàcile far questa dessision. Julia la ga dito: “Tanti i me disea che mi ero una bauca. Lori i me disea: ‘Ti te sì drio servir a Geovà invesse de seitar a cantar.’ Ma mi volea far el me meio a lu.” Come che ela la se sente 30 ani dopo de gaver fato questa dessision? Ela la ga dito: “Mi resto tanto contenta parché go dessidio servir a Geovà e son sicura che nel futuro lu el ndarà darme tuto quel che mi vui.” — Sal. 145:16.
Se servir a Geovà l’è la roba pi importante dela nostra vita, semo felici (Varda el paràgrafo 16.)g
SEITA A SERVIR A GEOVÀ!
17. (a) Cossa che quei che ancora no i ga dessidio servir a Geovà i ga de far? (b) De cossa quei che i ga dessidio servir a Geovà i pol esser sicuri?
17 Semo pròpio darente del fin de questo mondo. El apòstolo Paolo el ga scrito: “Parché, ancora ‘nantro pochetin’, e ‘quel che el vien el rivarà, sensa tardigar’.” (Ebr. 10:37) Cossa che questo vol dir? Ghen’è poco tempo par quei che ancora no i adora a Geovà dessider servirlo. Par quela, lori i ga de far la so dessision pi presto che se pol. (1 Cor. 7:29) E se la nostra dessision la ze servir a Geovà, podemo esser sicuri che tute le dificoltà che infrontaremo le sarà sol par un “pochetin”.
18. Cossa che Geovà e Gesù i vol che noantri femo?
18 Gesù el ga dito ai so dissìpoli che lori i gavaria de far de pi che sol ndarghe drio. Lori i gavaria de seitar a far questo. (Mat. 16:24) Se te sì drio servir a Geovà fà tanti ani, no stà mia desister. Tuti noantri ghemo de sforsarse tanto par seitar a adorar a Dio. Ma anca se questo no l’è mia fàcile, belche adesso ghemo tanta alegria e tante benedission! — Sal. 35:27.
19. Cossa che te ghe imparà con quel che ghe sucedesto con Gean?
19 Arquanti i pensa che le Testimònie de Geovà no le pol far gnente de bon. Un gióveno de nome Gean el pensea cossita. Lu el ga dito: “Me parea che le Testimònie de Geovà no le fea gnente par divertirse. Mi vedea che i me coleghi sempre i ndea a feste, smorosea, giughea giughi tanto violenti, e mi, sol ndea ale riunion e ala predicassion.” Cossa che ga sucedesto con Gean? Lu el ga dito: “Go tacà a far arquante robe sbaliade de scondon. Prima me parea bon, ma dopo, no gavea pi alegria. Mi go scominsià a pensar in quel che gavea imparà nela Bìblia e che gavea assà de banda. Alora, go dessidio tornar a servir a Geovà de tuto el me cuor. De lì avanti, go visto che Geovà sempre el ga rispondesto ale me orassion.”
20. Cossa che volemo sforsarse de far?
20 El salmista el ga cantà a Geovà: ‘Felice l’è quel che ti te scoli e che te porti darente de ti, par esser de star nei to cortivi.’ (Sal. 65:4) Volemo sforsarse de servir a Geovà par sempre e dir compagno a Giosuè: “Mi e la me fameia ndaremo servir a Geovà.” — Gios. 24:15.
CÀNTICO 28 Come esser amigo de Geovà
a (Isaia 48:17, 18) Questo l’è quel che dise Geovà, el to Risgatador, el Santo de Israel: “Mi, Geovà, son el to Dio, quel che el te insegna par el to benefìssio, quel che el te guida nela strada che te ghè de ndar. 18 Come che saria bon se ti te fussi atento ai me comandamenti! Alora la to pace la deventaria come un rio, e la to giustìssia come le onde del mar.
b (Mateo 22:37) El ghe ga dito: “‘Te ghè de amar a Geovà el to Dio con tuto el to cuor, con tuta la to ànima e con tuta la to mente.’
c (Salmo 103:13, 14) Cossita come el pare l’è misericordioso coi so fioi, Geovà l’è misericordioso con quei che i lo teme. 14 Parché lu el cognosse ben come semo stati fati, el se ricorda che semo polver.
d Arquanti nomi i ze stati cambiadi.
e (Filipensi 3:7, 8) Le robe che par mi le parea esser de grando valor, go considerà come se no le valesse gnente, par causa del Cristo. 8 E ancora de pi, mi go dessidio abandonar tute queste robe, parché la cognossensa sora Gesù Cristo, el me Signor, la ga tanto pi valor. Par causa de lu go acetà perder tute queste robe e le vedo come sporchìssie, par ricever la aprovassion del Cristo.
f ILUSTRASSION: Una dona la ze davanti el posto de un congresso e la scolta una mùcia de gente dirghe su ai nostri fradei. Dopo, quela dona la riva darente un careto e la scolta quel che una sorela la parla sora la Bìblia.
g ILUSTRASSION: Questi ritrati i mostra quel che Julia la ga cambià nela so vita par far de pi par Geovà.