STÙDIO 22
CÀNTICO 15 Loda el Fiol de Dio!
Parché che el nome de Geovà l’era tanto importante par Gesù?
“Mi go fato cognosser el to nome a lori, e lo farò cognosser.” — GIO. 17:26.
COSSA CHE NDAREMO IMPARAR?
In questo stùdio, ndaremo imparar cossa che Gesù el volea dir quando el ga dito che lu el fato cognosser el nome de Geovà ai altri. Anca, ndaremo veder come che el ga mostrà che Geovà l’è santo e che Sàtana l’è un busier.
1-2. (a) Cossa che Gesù el ga fato nela note vanti de morir? (b) Che domande ndaremo risponder in questo stùdio?
PROA pensar in quel che ga sucedesto nel giorno 14 de nisan del ano 33. Gesù el ga fato la Sena del Signor insieme dei so apòstoli fedeli. Gesù el savea che Giuda el ndaria tradirlo, che lu el ciaparia bote e che el saria copà. Par quela, lu el ga dato consili ai so apòstoli par pareciarli par quel che i ndaria infrontar. E vanti de ndar via, Gesù el ga fato una orassion tanto importante. Podemo leder questa orassion in Gioani capìtolo 17.
2 In questo stùdio, ndaremo imparar arquante robe sora questa orassion che Gesù el ga fato. Che preocupassion lu el gavea vanti de morir? Come el ga mostrà quel che l’era pi importante nela so vita?
“MI GO FATO COGNOSSER EL TO NOME A LORI”
3. (a) De acordo con Gioani 17:6, 26, cossa che Gesù el ga parlà? (b) Cossa che Gesù el volea dir?
3 In quela orassion, Gesù anca el ga dito: “Mi go fato cognosser el to nome a lori.” Podemo esser sicuri che el nome de Geovà l’era tanto importante par Gesù, parché lu el ga parlà questo due volte nela orassion. (Ledi Gioani 17:6,a 26.b) Ma i apòstoli belche i savea che el nome de Dio l’è Geovà parché i era giudei e, nele Scriture Ebraiche, ghen’era el nome de Dio tante volte. Alora, cossa che Gesù el volea dir con quele parole? Lu no l’era drio parlar del nome de Dio. Invesse, Gesù l’era drio parlar de come Geovà l’è, dele so bele qualità, de quel che el vol far nel futuro e de quel che el ga belche fato. Sol Gesù el cognossea Geovà tanto ben cossita.
4-5. (a) Come che el nome de una persona pol deventar ancora pi importante par noantri? Parla de un esémpio. (b) Come che Gesù el ga giutà i so dissìpoli a cognosser ancora meio el nome de Geovà?
4 Proa pensar sora questo esémpio. Un ansiano dela to congregassion, che el ga nome Davi, l’è un dotor e fà tanti ani che te lo cognossi. Ma un giorno te te ghè fato tanto mal e te ocore suito ndar al ospedal. Quando te rivi nel ospedal, el fradel Davi el dopera tuto quel che el sa par salvar la to vita. Dopo tuto questo, te ghe vol ancora pi ben a questo fradel, e quando te scolti el so nome, te vien in mente tuto quel che el te ga fato. De lì avanti, lu no l’è pi sol un ansiano che te cognossi, ma un dotor che el ga salvà la to vita.
5 Dela medèsima maniera, i dissìpoli belche i cognossea el nome de Geovà. Ma questo nome l’è deventà ancora pi importante par lori dopo che Gesù li ga giutadi a cognosser meio a Geovà. Come cossita? Gesù el ga parlà e el ga fato tute le robe compagno a Geovà. Alora, quando i dissìpoli i ga scoltà quel che Gesù el insegnea e i ga visto come lu el tratea i altri, lori i ze stati boni de cognosser ancora meio a Geovà. — Gio. 14:9; 17:3.
“PAR CAUSA DEL TO NOME, EL NOME CHE TE ME GHÈ DATO”
6. Gesù el ga dito che Geovà el ghe gavea dato el so nome. Cossa che lu el volea dir? (Gioani 17:11, 12)
6 Nela so orassion, Gesù el ga dito sora i so dissìpoli: “Pare, tendi de lori par causa del to nome, el nome che te me ghè dato.” (Ledi Gioani 17:11, 12.c) Sarà che Gesù l’era drio dir che el gavea de esser ciamà de Geovà? Sicuro che nò. Quando lu l’era drio parlar del nome de Geovà, lu el ga dito “el to nome”. Alora, Geovà no l’è mia el nome de Gesù. Ma, cossa che Gesù el volea dir? Prima, che lu l’era stà mandà in nome de Geovà. Quando l’era qua nela Tera, Gesù el ga fato tanti miràcoli nel nome del so Pare. (Gio. 5:43; 10:25) Seconda, el nome Gesù vol dir “Geovà l’è salvassion”. Par quela che lu el ga dito che Geovà el ghe gavea dato el so nome.
7. Parché che Gesù el podea parlar in nome de Geovà? Parla de un esémpio.
7 Par giutarte a capir meio come Gesù el parlea in nome de Geovà, pensa sora questo esémpio. Un governante el pol mandar una persona fin un posto par parlar in nome de lu. Alora, quel che questa persona la parla l’è tanto importante. L’è come se el governante fusse drio parlar. Dela medèsima maniera, Geovà el ga mandà Gesù qua ala Tera par parlar in So nome. — Mat. 21:9; Luc. 13:35.
8. Parché che Geovà el ga dito che el so nome l’era in Gesù, ancora vanti che el vegnesse ala Tera? (Ésodo 23:20, 21)
8 La Bìblia la dise che Gesù l’è “la Parola”. Parché? Parché Geovà lo ga doperà par dir ai àngeli e ale persone quel che i gavaria de far. (Gio. 1:1-3) Pol esser che Gesù l’è stà el àngelo che Geovà el ga doperà par tender dei israeliti quando i era nel deserto. Quando Geovà el ga parlà che i gavaria de obedir a quel àngelo, lu el ga dito: “Parché el me nome l’è in lu.”d (Ledi Ésodo 23:20, 21.e) Cossita, Geovà el ga mostrà che el gavea scoliesto Gesù par parlar in so nome e par mostrar che el fà tuto polito e che l’è santo.
‘PARE, DAGHE GLÒRIA AL TO NOME’
9. Come che Gesù el ga mostrà che el nome de Geovà l’era la roba pi importante par lu?
9 Come ghemo belche visto, el nome de Geovà l’era la roba pi importante par Gesù ancora prima che el vegnesse ala Tera. E quando l’era qua, tuto quel che el ga fato e che el ga parlà ga mostrà che el nome de Geovà l’era tanto importante par lu. Alora, quando Gesù l’era drio finir el so laoro, lu el ga dito a Geovà: ‘Pare, daghe glòria al to nome.’ Suito Geovà el ghe ga rispondesto con una voce tanto alta: ‘Mi go belche dato glòria al me nome e vao darghe glòria nantra volta.’ — Gio. 12:28.
10-11. (a) Come che Gesù el ga dato glòria al nome de Geovà? (Varda anca la ilustrassion.) (b) Parché che Gesù el gavea de santificar el nome de Geovà e provar che lu el fà tuto polito?
10 Gesù anca el ga dato glòria al nome del so Pare. Come? Prima, lu el ga parlà dele qualità che Geovà el ga e dele bele robe che lu el fà. Ma, Gesù ancora el gavea de provar che Geovà el fà tuto giusto e che el so nome l’è santo. Lu el ga mostrà che far questo l’era tanto importante quando el ga pregà: “Pare nostro che te sì nel cielo, santificà sìpia el to nome.” — Mat. 6:9.
11 Ma parché che Gesù el gavea de santificar el nome de Geovà e provar che lu el fà tuto polito? Parché tante persone le ga scominsià a pensar robe rugne sora Geovà par causa dele busie che Sàtana el ga contà nel giardin del Èden. Sàtana el ga dito che Geovà l’era un busier e che l’era drio tegner le robe bone sol par lu. (Gén. 3:1-5) Lu anca el ga volesto dir che la maniera che Geovà el fà le robe no la ze mia bona. Dopo, nela època de Giò, lu el ga dito che le persone no le amea a Dio, che sol lo servia parché le spetea qualcossa indrio e che no le seitaria leai quando le infrontesse dificoltà. (Giò 1:9-11; 2:4) Ma col tempo, tute le persone le ndaria capir se l’è stà Geovà che el ga contà busie, o se l’è stà Sàtana.
Gesù el ga insegnà ai so dissìpoli che l’è tanto importante santificar el nome de Dio (Varda el paràgrafo 10.)
‘MI DAO LA ME VITA’
12. Cossa che Gesù l’era pronto par far par causa del so amor a Geovà?
12 Gesù el amea pròpio tanto a so Pare. Alora, lu l’era pronto par far quel che ghe volea, fin dar la so vita, par mostrar che Geovà el fà tuto giusto e che el so nome l’è santo.f Par quela che lu el ga dito: ‘Mi dao la me vita.’ (Gio. 10:17, 18) Adon e Eva i ga desobedio a Geovà e i ga scoliesto ndarghe drio a Sàtana. Invesse, Gesù el ga acetà vegner qua ala Tera e mostrar che el amea tanto a Geovà. Lu el ga obedio a Geovà in tuta la so vita. (Ebr. 4:15; 5:7-10) Lu el ga seità leal fin la so morte nel pal de tortura. (Ebr. 12:2) Cossita, lu el ga mostrà che el amea a Geovà e el so nome.
13. Parché che Gesù l’era la meio persona par provar che Sàtana l’è un busier? (Varda anca la ilustrassion.)
13 Par meso de quel che Gesù el ga fato, lu el ga provà che Sàtana l’è un busier, e nò Geovà. (Gio. 8:44) Come Gesù el cognossea a Geovà meio che tuti, lu el saveria se qualcossa che Sàtana el gavea dito l’era vera. Par quela che Gesù el ga seità a far tuto quel che el podea par mostrar che Geovà l’è bon e che el so nome l’è santo. Anca quando ghe parea che Geovà lo gavea abandonà, lu el ga seità leal e l’era fin pronto par morir. — Mat 27:46.g
Tuto quel che Gesù el ga fato ga provà che Sàtana l’è un busier, e nò Geovà! (Varda el paràgrafo 13.)
“MI GO FINIO EL LAORO CHE TI TE ME GHÈ DATO PAR FAR”
14. Come che Geovà el ga benedio Gesù?
14 Nela orassion che Gesù el ga fato nela note vanti de morir, lu el ga dito: “Mi go finio el laoro che ti te me ghè dato par far.” Come lu el gavea fato tuto quel che Geovà ghe gavea domandà, lu l’era sicuro che el ndaria benedirlo tanto. (Gio. 17:4, 5) E Geovà el ga fato pròpio questo. Prima, lu el ga ressussità Gesù e el ghe ga dato ancora de pi autorità nel cielo. (Ati 2:23, 24; Fil. 2:8, 9) Dopo, Geovà anca lo ga fato deventar Rè del so Regno. E cossa questo Regno el ndarà far? Gesù el ga dato la risposta nela so orassion: “Vegna el to Regno. Sìpia fata la to volontà come nel cielo, anca nela tera.” — Mat. 6:10.
15. Cossa ancora Gesù el ndarà far?
15 Suito, Gesù el ndarà finir fora coi nemighi de Dio e cole persone rugne nel Armagedon. (Apo. 16:14, 16; 19:11-16) Dopo, lu el ndarà butar Sàtana rento el abismo, ndove el restarà come se el fusse morto e no’l podarà far pi gnente. (Apo. 20:1-3) E nel so Governo de Mila Ani, Gesù el ndarà giutar le persone a deventar perfete e a viver in pace. Lu anca el ndarà ressussitar quei che i ze morti e far de tuta la Tera un bel paradiso. Cossita, tuto quel che Geovà el volea par le persone e par la Tera ndarà suceder! — Apo. 21:1-4.
16. Come che sarà la nostra vita dopo che se finisse el Governo de Mila Ani?
16 Come sarà la nostra vita dopo che se finisse el Governo de Mila Ani? Tuti i sarà perfeti, no ghen sarà pi el pecato gnanca ghe ocorerà pi el sacrifìssio de Gesù o sasserdoti par esser amighi de Dio. El nostro “ùltimo nemigo”, la morte, el sarà stà belche finio fora. I sepolcri i sarà vodi, parché tuti quei che i era morti i sarà belche ressussitadi. Pensa come sarà bel quando saremo tuti perfeti! — 1 Cor. 15:25, 26.
17-18. (a) Cossa sucederà nel fin del Governo de Mila Ani de Cristo? (b) Cossa che Gesù el farà dopo che se finisse el so Governo de Mila Ani? (1 Corinti 15:24, 28) (Varda anca la ilustrassion.)
17 Come ghemo visto, nel giardin del Èden, Sàtana el ga dito che Geovà l’è un busier e che lu no’l sa mia governar le persone con amor. Servi fedeli i ga mostrà tante volte che la maniera che Geovà el governa la ze la meio e che el so nome l’è santo. Cossita, lori i ga provà che Geovà l’è un Pare che el ne ama tanto. Ma nel fin del Governo de Mila Ani de Cristo, una roba ancora meio ndarà suceder. Nissun pi ndarà gaver dubi che Geovà l’è santo e che el fà tuto dela maniera giusta e con amor.
18 Nel fin del Governo de Mila Ani, tuti i saverà che quel che Sàtana el ga dito sora Geovà l’è una busia. Alora, cossa che Gesù el farà? Sarà che el farà compagno a Sàtana e ndar contra Geovà? Sicuro che nò! (Ledi 1 Corinti 15:24,h 28i.) Gesù el darà indrio el Regno a so Pare e el seitarà a obedirghe. De volentiera, lu el darà a so Pare tuto el poder e autorità, parché lo ama tanto.
Gesù el darà el Regno indrio a so Pare nel fin dei mila ani (Varda el paràgrafo 18.)
19. Cossa che Gesù el pensa sora el nome de Geovà?
19 Geovà el ga volesto dar el so nome a Gesù. E so Fiol l’è stà bravo de insegnar a tuti come so Pare l’è. Par Gesù, el nome del so Pare l’è la roba pi importante che ghen’è. Lu el ga dato la so vita par causa de questo nome. E nel fin del so Governo de Mila Ani, lu el darà indrio a Geovà tuta la autorità e poder. Nel pròssimo stùdio, ndaremo imparar come che podemo ndar drio el esémpio de Gesù.
CÀNTICO 16 Geovà el ga scoliesto el Rè
a (Gioani 17:6) Mi go fato cognosser el to nome ai òmini che ti te me ghè dato del mondo. Lori i era toi, e ti te ghè dato lori a mi, e lori i ga obedio ala to parola.
b (Gioani 17:26) E mi go fato cognosser el to nome a lori e lo farò cognosser. Cossita el amor che ti te me ghè amà el sarà con lori, e mi sarò in union con lori.”
c (Gioani 17:11, 12) “No son pi nel mondo, ma lori i ze nel mondo e mi vao tornar a ti. Santo Pare, tendi de lori par causa del to nome, el nome che te me ghè dato. Cossita lori i sarà unidi, come mi e ti semo unidi. 12 Quando ero insieme con lori, mi li tendea par causa del to nome, el nome che te me ghè dato. Mi li go protegesti e gnanca un l’è stà perso, sol el fiol dela destrussion par realisarse quel che la Scritura la disea.
d Anca i àngeli i ga parlà in nome de Geovà. Par quela che, dele volte, la Bìblia la dise che Geovà el ga parlà con qualchedun, anca se l’è stà un àngelo. (Gén. 18:1-33) Par esémpio, la Bìblia la dise che Geovà el ga dato la Lege a Moisè, ma altri versìcoli i mostra che Geovà el ga doperà àngeli par far questo. — Lev. 27:34; Ati 7:38, 53; Gàl. 3:19; Ebr. 2:2-4.
e (Ésodo 23:20, 21) “Mi mandarò el me àngelo vanti de ti par protegerte nela strada e par farlo ndar rento del posto che te go parecià. 21 Stà atento a lu e obedisse ala so voce. No stà rebelarte contra lu, parché lu no’l perdonarà le to ofense, parché el me nome l’è in lu.
f Par causa dela morte de Gesù, le persone le pol gaver la speransa de viver par sempre.
g Varda “Domande dei letori” nela Sentinela de april de 2021, pàg. 30 e 31.
h (1 Corinti 15:24) Dopo, nela fin, lu el ghe darà el Regno al so Dio e Pare, dopo che el ga finio fora con tuti i governi e tute le autorità e poderi.
i (1 Corinti 15:28) E quando tute le robe le sarà meteste soto de lu, alora anca el pròpio Fiol el se meterà soto de quel che ga metesto soto de lu tute le robe, cossita Dio el sarà tute le robe par tuti.