STÙDIO 23
CÀNTICO 2 El to nome l’è Geovà
El nome de Dio l’è importante par ti?
“Geovà el dise: ‘Valtri sì le me testimònie.’” — ISA. 43:10.
COSSA CHE NDAREMO IMPARAR?
In questo stùdio, ndaremo veder come che podemo mostrar che el nome de Geovà l’è santo e che Sàtana l’è un busier.
1-2. Come che savemo che el nome de Geovà l’è tanto importante par Gesù?
PAR GESÙ, la roba pi importante che ghen’è l’è el nome de Geovà. E nissun altro se ga sforsà tanto par parlar sora questo nome come Gesù. Nel ùltimo stùdio, ghemo imparà che lu l’era pronto par dar la so vita par mostrar che el nome de Geovà l’è santo e che lu l’è giusto. (Mar. 14:36; Ebr. 10:7-9) E dopo che se finisse el Governo de Mila Ani, Gesù el darà indrio de volentiera tuta la autorità a Geovà parché el vol che so Pare el riceva tuta la glòria. (1 Cor. 15:26-28) Tuto quel che Gesù el ga fato par Geovà mostra che lu lo ama tanto.
2 Gesù l’è vegnesto ala Tera par insegnar ale persone sora quel che Geovà el volea. (Gio. 5:43; 12:13) Lu el ga fato cognosser el nome de Geovà ai so dissìpoli. (Gio. 17:6, 26) Quando lu el ga insegnà le persone e el ga fato miràcoli, lu el ga sempre mostrà che el poder che el gavea vegnea de Geovà. (Gio. 10:25) Gesù anca el ga domandà a Geovà: “Tendi de lori par causa del to nome.” (Gio. 17:11) Sicuro che, par Gesù, el nome de Geovà l’è la roba pi importante che ghen’è. Alora, come che qualchedun pol dir che va drio a Gesù sensa cognosser el nome de Geovà?
3. Cossa che ndaremo imparar in questo stùdio?
3 Come veri dissìpoli de Gesù, ndemo drio al so esémpio. Par quela, amemo e rispetemo tanto el nome del so Pare. (1 Pie. 2:21) In questo stùdio, ndaremo veder parché che podemo dir che anca quei che i proclama le ‘bone notìssie del Regno’ i ga el nome de Geovà. (Mat. 24:14) Dopo, ndaremo veder come che podemo mostrar che el nome de Geovà l’è importante par noantri.
“UN PÒPOLO PAR EL SO NOME”
4. (a) Cossa che Gesù el ga dito che i so dissìpoli i gavaria de far vanti de ndar al cielo? (b) Che domande fursi se femo?
4 Vanti de ndar al cielo, Gesù el ga dito ai so dissìpoli: “Valtri riceveré el spìrito santo, riceveré poder e gavaré de esser testimònie de mi in Gerusalen, in tuta la Giudea e Samaria, e fin la parte pi distante dela tera.” (Ati 1:8) Alora, i dissìpoli de Gesù i ndaria predicar le bone notìssie in Israel e anca in tuto el mondo. Cossita, tute le persone le podaria deventar dissìpoli de Gesù. (Mat. 28:19, 20) Ma parché che Gesù el ga dito: “Gavaré de esser testimònie de mi”? Sarà che gavarìssino de parlar sol sora el nome de Gesù invesse de parlar sora el nome de Geovà? Quel che l’è scrito in Ati capìtolo 15 ne giuta a capir la risposta.
5. Come che i apòstoli e i ansiani in Gerusalen i ga mostrà che le persone le gavaria de cognosser el nome de Dio? (Varda anca la ilustrassion.)
5 Nel ano 49, i apòstoli e i ansiani in Gerusalen i se ga riunio par parlar sora cossa quei che no i era mia giudei i gavaria de far par deventar dissìpoli de Gesù. Nel fin de quela riunion, Tiago, meso fradel de Gesù, el ga dito: ‘Piero el ga contà con tanti detali come Dio, par la prima volta, el ga dato atension ale nassion par tirar fora de lore un pòpolo par el so nome.’ Che nome l’era questo? Lu anca el ga parlà sora la professia de Amòs: “Cossita, le persone che le resta le podarà ndar in serca de Geovà con voia, insieme con persone de tute le nassion, persone ciamade par el me nome, dise Geovà.” (Ati 15:14-18) Quei dissìpoli i ndaria parlar sora el nome de Geovà, ma le persone anca le ndaria ciamarli par questo nome. Questo vol dir che lori i ndaria insegnar sora el nome de Dio e che le persone li vederia come quei che i porta questo nome.
Nte una riunion del corpo governante nel primo sècolo, i fradei i ga capio che i dissìpoli de Gesù i ga de esser un pòpolo par el nome de Dio (Varda el paràgrafo 5.)
6-7. (a) Parché che Gesù l’è vegnesto ala Tera? (b) Qual che l’è stà el motivo pi importante par Gesù vegner ala Tera?
6 El nome de Gesù vol dir “Geovà l’è salvassion”. E savemo che questo l’è el meio nome par lu parché Geovà lo ga doperà par salvar quei che i ga fede. Gesù l’è vegnesto ala Tera par dar la so vita par le persone. (Mat. 20:28) Cossita, podemo esser perdonadi dei nostri pecati e ghemo la speransa de viver par sempre. — Gio. 3:16.
7 Ma parché che ghemo bisogno de esser salvi? L’è stà par causa de quel che ga sucedesto nel giardin del Èden. Come ghemo parlà nel ùltimo stùdio, Adon e Eva i ze ndati contra Geovà e i ga perso la vita eterna. (Gén. 3:6, 24) Ma Gesù l’è vegnesto ala Tera par un motivo ancora pi importante che salvarne. Sàtana el gavea contà busie sora el nome de Geovà! (Gén. 3:4, 5) Alora, tute le persone le gavaria de saver che Geovà el fà tuto giusto e che el so nome l’è santo. E Gesù l’è stà la meio persona par far questo parché el ga fato tuto pròpio come Geovà el volea.
Come qualchedun pol dir che va drio a Gesù sensa cognosser o doperar el nome Geovà?
8. Cossa che tuti quei che i ndaria drio a Gesù i gavaria de saver?
8 Tuti quei che i volesse ndar drio a Gesù i gavaria de saver che sol i saria salvi par causa del nome de Geovà. (Gio. 17:3) E compagno a Gesù, lori i saria cognossesti par el nome de Geovà e i gavaria de mostrar che el nome de Dio l’è santo. Sol cossita, lori i saria salvi. (Ati 2:21, 22) Alora, tuti i dissìpoli i gavaria de imparar sora el nome de Gesù e el nome de Geovà. Par quela che, nte una orassion, Gesù el ga dito: “Mi go fato cognosser el to nome a lori e lo farò cognosser. Cossita el amor che ti te me ghè amà el sarà con lori, e mi sarò in union con lori.” — Gio. 17:26.
“VALTRI SÌ LE ME TESTIMÒNIE”
9. Come che podemo mostrar che el nome de Geovà l’è importante par noantri?
9 Quel che ghemo visto fin adesso mostra che i veri dissìpoli de Gesù i ga de sforsarse par mostrar che el nome de Geovà l’è santo. (Mat. 6:9, 10) El nome de Dio el ga de esser la roba pi importante par noantri, e mostremo che l’è pròpio cossita par meso de quel che femo. Ma come che mostremo che el nome de Geovà l’è santo e che tuto quel che Sàtana el ga dito l’è una busia?
10. Sora cossa che ledemo in Isaia 42 a 44? (Isaia 43:9; 44:7-9) (Varda anca la ilustrassion.)
10 In Isaia 42 a 44, imparemo sora quel che podemo far par mostrar che el nome de Geovà l’è santo. In questi capìtoli, Geovà el domanda ale persone che le adora altri dèi che le prove se i ze pròpio veri e se i pol giutarle. Cossita, lore le deventaria come testimònie de questi dèi. Ma come no ghen’è altri dèi, nissun l’è bon de parlar gnente. — Ledi Isaia 43:9;a 44:7-9.b
Noantri semo come testimònie par Geovà, o sia, provemo par meso e quel che femo e parlemo che lu l’è el vero Dio (Varda i paràgrafi 10 e 11.)
11. Cossa che Geovà el ga dito ai so servi in Isaia 43:10-12?
11 Ledi Isaia 43:10-12c. Geovà el ga dito ai so servi: “Valtri sì le me testimònie, e mi son Dio.” Lu anca el ga domandà: “Sarà che ghen’è nantro Dio?” (Isa. 44:8) Noantri ghemo el onor de mostrar che ghen’è sol un vero Dio. Femo questo par meso de quel che parlemo e femo. El so nome l’è el pi importante che ghen’è. Par quela, se sforsemo de mostrar che amemo a Geovà e che volemo sempre obedirghe, anca se Sàtana el proa intrigarne. Cossita, mostremo che el nome de Geovà l’è santo.
12. Come che ga sucedesto quel che l’è scrito in Isaia 40:3, 5?
12 Isaia anca el ga parlà che una persona la ndaria ‘pareciar la strada de Geovà’. (Isa. 40:3) Com che questo ga sucedesto? Gioani Batista el ga parecià la strada par Gesù, quel che l’è vegnesto nel nome de Geovà e el ga parlà sora lu. (Mat. 3:3; Mar. 1:2-4; Luc. 3:3-6) Noantri femo compagno a Gesù quando mostremo che el nome de Geovà l’è santo. La professia de Isaia anca la dise: “Le persone le cognosserà la glòria de Geovà.” (Isa. 40:5) Come questo ga sucedesto? Quando Gesù l’era qua nela Tera, lu el ga fato tuto pròpio compagno Geovà el gavaria fato. — Gio. 12:45.
13. Cossa che podemo far compagno a Gesù?
13 Compagno a Gesù, anca noantri semo testimònie de Geovà. Alora, portemo el nome de Geovà e parlemo a tuti sora le bele robe che el ga fato. Ma anca mostremo che el nome de Geovà l’è santo quando parlemo ale persone sora quel che Gesù el ga fato. (Ati 1:8) Lu l’è la Testimònia de Geovà pi brava che ghen’è! (Apo. 1:5) E come che mostremo che el nome de Dio l’è pròpio importante par noantri?
MOSTRA CHE EL NOME DE GEOVÀ L’È IMPORTANTE PAR TI
14. De acordo col Salmo 105:3, cossa che sentimo par el nome de Geovà?
14 Ghemo orgòlio del nome de Geovà. (Ledi Salmo 105:3.d) Mai ghemo vergogna de parlar che semo Testimònie de Geovà ai nostri coleghi de scola, de laoro, visigni o a tuti quei che i ze intorno a noantri. (Ger. 11:21; Apo. 12:17) Par noantri, l’è un grando onor parlar ai altri che Geovà l’è santo e dirghe che tuto quel che lu el fà l’è giusto. Lu el resta tanto contento quando el vede che ghemo orgòlio del so nome. (Ger. 9:23, 24; 1 Cor. 1:31; 2 Cor. 10:17) Sàtana e quei che lu el dopera par dir busie no i vol che parlemo sora el nome de Geovà. (Ger. 23:26, 27) Ma, par causa del nostro amor al nome de Dio, seitemo a parlar sora lu sempre che podemo. — Sal. 5:11; 89:16.
15. Cossa che vol dir invocar el nome de Geovà?
15 Seitemo a invocar el nome de Geovà. (Gioel 2:32; Rom. 10:13, 14) Invocar el nome de Geovà vol dir de pi che sol doperar el so nome. Ghemo de cognosser a Geovà, fidarse del tuto in lu, domandar el so aiuto e ndar drio ale so orientassion. (Sal. 20:7; 99:6; 116:4; 145:18) Noantri anca invochemo el nome de Geovà quando parlemo ai altri sora le so qualità e li giutemo a cambiar la so vita par contentarlo e esser so amighi. — Isa. 12:4; Ati 2:21, 38.
16. Come che podemo mostrar che Sàtana l’è un busier?
16 Acetemo sofrir par causa del nome de Geovà. (Tia. 5:10, 11) Podemo mostrar che Sàtana l’è un busier quando seitemo leai, anca cole dificoltà. Nei giorni de Giò, Sàtana el ga parlà contra tuti servi de Dio. Lu el ga dito: “El omo el darà tuto quel che el ga par salvar la so vita.” (Giò 2:4) Sàtana el ga volesto dir che le persone sol le saria obediente a Geovà se la so vita la fusse fàcile e intanto che no le infrontesse dificoltà. Ancoi, compagno a Giò, podemo mostrar che semo leai a Geovà se seitemo a obedirghe, anca quando Sàtana el proa intrigarne. E, semo pròpio sicuri che Geovà el seitarà a tenderne par causa del so nome. — Gio. 17:11.
17. De acordo con 1 Piero 2:12 de che nantra maniera podemo dar onor al nome de Geovà?
17 Femo el nostro meio par dar onor al nome de Geovà. (Pro. 30:9; Ger. 7:8-11) Come semo cognossesti come Testimònie de Geovà, quel che femo pol portar onor o far i altri parlar contra questo nome. (Ledi 1 Piero 2:12.e) Par quela, volemo sempre far el nostro meio par lodar a Geovà par meso de quel che parlemo e femo. Cossita, ancora che semo imperfeti, podemo dar onor al nome de Dio.
18. De che nantra maniera podemo mostrar che el nome de Dio l’è importante par noantri? (Varda anca la nota.)
18 El nome de Dio l’è pi importante che quel che le persone le pensa sora noantri. (Sal. 138:2) Parché che ghemo de pensar cossita? Parché pol esser che, par contentar a Geovà, gavaremo de far qualcossa che disguste ai altri.f L’è stà pròpio questo che ga sucedesto con Gesù. Quando lu l’è morto, le persone lo ga visto come un criminoso. Ma, lu el ga acetà morir de quela maniera parché el volea dar onor al nome de Geovà. Gesù ‘no’l ga badà la vergogna’ e no’l se ga preocupà tanto con quel che i altri i pensea sora lu. (Ebr. 12:2-4) La roba pi importante par Gesù l’era far la volontà de Geovà. — Mat. 26:39.
19. Cossa che te pensi sora el nome de Geovà, e parché?
19 Ghemo orgòlio del nome de Geovà e restemo contenti de esser so testimònie. Par quela, seitaremo a lodarlo anca se i altri i ne vegna contra. Pensemo che el nome de Dio l’è pi importante che quel che i altri i pensa sora noantri. Alora, anca se Sàtana el proa intrigarne, seitaremo a servir a Geovà. Cossita, compagno a Gesù, ndaremo mostrar che el nome de Geovà l’è la roba pi importante par noantri!
CÀNTICO 10 A Geovà mi vao ringrassiar!
a (Isaia 43:9) Che tute le nassion le sìpie meteste insieme nte un posto, che tute le persone le sìpie meteste insieme. Chi intrà de lori pol parlarne sora le robe prima che le suceda? Chi che pol dirne sora queste robe? Che le so testimònie ne mostre che lori i ze giusti o che so testimònie le scolte e parle: ‘L’è vero!’”
b (Isaia 44:7-9) Chi che l’è compagno a mi? Che el parle in alta voce e che el mostre che l’è come mi! Che el diga le robe che no le ga gnancora sucedesto e quel che sucederà, cossita come mi sempre go fato de quando go scoliesto el me pòpolo tanto tempo indrio. 8 No sté mia restar spauradi gnanca sensa saver cossa far. No lo go dito a cada un de valtri vanti che sucedesse? No ve go contà? Valtri sì le me testimònie. Sarà che ghen’è nantro Dio? Nò, e no ghen’è nantro che pol protegerve. No ghen cognosso nantro.’” 9 Tuti quei che i fà imàgine de dèi no i ze gnente, Lori i ama i so dèi, ma no i li giutarà mia. Queste imàgine le ze so testimònie che no le vede gnente e no le sa gnente. Par quela, quei che le ga fato i restarà invergognadi.
c (Isaia 43:10-12) Geovà el dise: “Valtri sì le me testimònie, si, valtri sì el servo che mi go scoliesto. Cossita, valtri ndaré cognosserme e gaver fede in mi, e ndaré capir che son el medèsimo. Vanti de mi no ghen’era gnanca un Dio e dopo de mi no ghen’è stà nantro Dio. 11 Mi son Geovà, e no ghen’è altro che el pol salvarve.” 12 “E mi lo go anunsià, salvà e lo go fato saver intanto che no ghen’era gnanca un dio straniero intrà de valtri. Alora, valtri sì le me testimònie e mi son Dio”, dise Geovà.
d (Salmo 105:3) Parlé con orgòlio del So santo nome. Che el cuor de quei che i va in serca de Geovà el gàpia alegria.
e (1 Piero 2:12) Seité a gaver un bon comportamento intrà le persone dele nassion. Alora, quando le ve acusa de far el mal, lore le ndarà veder le bone òpere che valtri fé e, cossita, lore le ndarà lodar a Dio nel giorno del so giulgamento.
f Anca Giò, che l’era un omo fedele, el se ga preocupà massa con quel che i altri i pensea de lu. Par esémpio, questo ga sucedesto dopo che tre òmini i ga dito che el gavea fato robe sbaliade. Quando tuti i so fioi i ze morti e lu el ga perso tuto quel che el gavea, “Giò no’l ga pecà e gnanca el ga acusà Dio de far qualcossa de sbalià”. (Giò 1:22; 2:10) Ma, quando quei tre òmini i ga dito che lu el gavea fato robe sbaliade, lu el ga scominsià a ‘parlar sensa pensar’. In quela ora, par Giò, quel che i altri i pensea de lu l’era pi importante che santificar el nome de Geovà. — Giò 6:3; 13:4, 5; 32:2; 34:5.