Giuta i to studianti a gaver coraio par servir a Geovà

1-2. (a) Parché che fursi arquanti i ga paura de deventar una Testimònia de Geovà? (b) Cossa che ndaremo imparar in questo stùdio?

TI CHE te sì belche una Testimònia de Geovà, te ghè bio paura de far questa dessision? Pol esser che te gavei paura che i to coleghi de laoro, i to amighi o quei dela to fameia i te vegnesse contra. O fursi te pensei che l’era massa fadiga far quel che Geovà el vol. Alora, te sì bon de capir quando una persona che la stùdia la Bìblia la ga paura de deventar una Testimònia de Geovà.

² Gesù el savea che la paura podaria far una persona tirarse indrio de servir a Geovà. (Mat. 13:20-22) Ma, lu el ga seità a giutar quei che i gavea paura de ndar drio a lu. Gesù el ga mostrà ai so dissìpoli come lori i podaria giutar queste persone a capir quel che l’era drio intrigarle de servir a Geovà e a far pi forte el so amor par Dio. Lu anca ghe ga insegnà come giutar le persone a meter la adorassion a Geovà in primo posto nela so vita e a dàrghene fora quando i altri i ghe vegnesse contra. In questo stùdio, ndaremo veder come el libro Te pol viver felice par sempre! pol giutarte a far quel che Gesù el ga dito e giutar un studiante a servir a Geovà.

GIUTA I TO STUDIANTI A CAPIR COSSA LI INTRIGA DE SERVIR A GEOVÀ

3. Parché che fursi Nicodemo el se gavea tirà indrio de deventar un dissìpolo de Gesù?

³ Intorno de sei mesi dopo che Gesù el gavea scominsià a predicar, un giudeo importante de nome Nicodemo el gavea belche capio che Gesù l’era el Messia. (Gio. 3:1, 2) Ma lu el se gavea tirà indrio de deventar un dissìpolo parché el gavea “paura dei giudei”. Alora, Nicodemo el ga volesto catarse con Gesù sensa che nissuni savesse. (Gio. 7:13; 12:42) Pol esser che lu el gavea paura de perder i so soldi o che i altri i ghe fesse de poco.a

4. Come che Gesù el ga giutà Nicodemo a capir cossa che el gavaria de far par contentar a Geovà?

⁴ Nicodemo el cognossea tanto ben la Lege de Moisè, ma el ga bio bisogno de aiuto par capir cossa el gavea de far par contentar a Geovà. Cossa che Gesù el ga fato? Lu el ga tolto del so tempo par giutar Nicodemo, anca se fusse de note. Gesù el ga parlà de maniera ciara che Nicodemo el gavea de ciamarse gramo dei so pecati, esser batesà e gaver fede nel Fiol de Dio. — Gio. 3:5, 14-21.

5. Cossa che te pol far par capir quel che l’è drio intrigar el to studiante de esser un servo de Geovà?

⁵ Anca se el studiante el cognosse tanto dela Bìblia, lu ancora ghe ocore aiuto par capir cossa lo intriga de servir a Geovà. Pol esser che lu l’è drio laorar massa o che la so fameia no la vol che lu el sìpia una Testimònia de Geovà. Alora, proa torte el tempo par giutarlo. Te pol convidarlo par ndar a spasso o bever un cafè. Se valtri fé robe cossita insieme, fursi lu el gavarà caro de parlarte sora le dificoltà che el ga. Dopo, proa giutarlo a capir come che el pol dàrghene fora cole so dificoltà. Te pol anca ricordarlo che el ga far cambiamenti nela so vita par contentar a Geovà e nò par contentar a ti.

6. Come che podemo giutar i nostri studianti a meter in pràtica quel che i ze drio imparar? (1 Corinti 16:13)

⁶ Quei che stùdia la Bìblia i gavarà coraio de meter in pràtica quel che i ze drio imparar se i ze sicuri che Geovà li giutarà. (Ledi 1 Corinti 16:13.b) Alora, sfòrsate de esser come un bravo maestro nte una scola. Cossa che un bon maestro el fà? Lu el insegna con passiensa e el se fida che i aluni i ze boni de imparar. Dela medèsima maniera, par esser bravi maestri dela Bìblia, noantri ghemo de far de pi che sol insegnar quel che Geovà el vol. Ghemo de insegnar i nostri studianti con passiensa e esser sicuri che i sarà boni de cambiar quel che ghe ocore col aiuto de Geovà. Ma come che podemo farlo?

GIUTA I TO STUDIANTI A AMAR ANCORA DE PI A GEOVÀ

7. Come che Gesù el ga giutà le persone a amar ancora de pi a Geovà?

⁷ Gesù el savea che, se i so dissìpoli i gavesse un grando amor par Geovà, lori i saria boni de meter in pràtica quel che i era drio imparar. Alora, cossa che lu el ga fato? Gesù ghe ga insegnà sora el so Pare. Par esémpio, lu el ga dito che Geovà l’è compagno a un omo che el dà bei presenti ai so fioi. (Mat. 7:9-11) Pol esser che arquante de quele persone no le gavea un pare che ghe volea ben cossita. Alora, Gesù el ga contà la ilustrassion de un pare che el ga ricevesto tanto ben el so fiol che el gavea fato tante robe sbaliade. Proa pensar come lore le se ga sentio de scoltar quel che Gesù l’era drio dirghe. Sicuro che lu el ga giutà quele persone a veder che Geovà le amea tanto e che el volea giutarle. — Luc. 15:20-24.

8. Come che te pol giutar i to studianti dela Bìblia a amar ancora de pi a Geovà?

⁸ Te pol giutar i to studianti a amar de pi a Geovà se te ghe insegni sora le so qualità. Alora, sempre che te sì drio insegnar un studiante, proa spiegar come quel che lu l’è drio imparar mostra el amor de Geovà. Par esémpio, quando valtri sì drio studiar sora el sacrifìssio de Gesù, te pol spiegarghe come questo mostra el amor che Geovà el ga par le persone, ma anca par lu. (Rom. 5:8; 1 Gio. 4:10) Quando el to studiante el vede el amor che Geovà el ga par lu, sicuro che el ndarà amar a Geovà ancora de pi. — Gàl. 2:20.

9. Cossa che ga giutà Michael a deventar un servo de Geovà?

⁹ Varda quel che ga sucedesto con Michael, dela Indonèsia. De picinin lu el gavea studià la Bìblia par un tempo. Quando el gavea 18 ani, lu l’è ndato de star in nantro paese par laorar come motorista de camignon. Pi tardi, lu el se ga maridà, ma el ga seità a laorar in nantro paese, distante dela so dona e dela so fiola. Dopo de un tempo, lore due le ga scominsià a studiar la Bìblia e a meter in pràtica quel che le era drio imparar. Quando la mare de Michael la ze morta, lu l’è tornà casa par tender del so pare e el ga acetà studiar la Bìblia. Ghe ga piasesto tanto la parte “Impara de pi” nela lession 27 del libro Te pol viver felice par sempre!. Quando Michael el ga pensà sora come Geovà el se ga sentio de veder Gesù sofrir tanto, lu el ga tacà a piander. Capir el grando amor de Geovà e de Gesù lo ga giutà a darghe valor a quel che i ga fato. Alora, Michael el ga metesto in pràtica quel che l’era drio imparar e el se ga batesà.

GIUTA I TO STUDIANTI A METER LA ADORASSION A GEOVÀ IN PRIMO POSTO

10. Come che Gesù el ga giutà i so primi dissìpoli a meter la adorassion a Geovà in primo posto nela so vita? (Luca 5:5-11) (Varda anca la ilustrassion.)

¹⁰ I primi dissìpoli de Gesù presto i ga capio che lu l’era el Messia, ma i ga bio bisogno de aiuto par meterghela tuta nela predicassion. Par esémpio, fea un tempo che Piero e Andrè i era dissìpoli de Gesù quando i ze stati convidadi par doperar la so vita par predicar insieme a lu. (Mat. 4:18, 19) Lori due insieme a Tiago e Gioani i era pescadori e el so laoro el ndea tanto ben. (Mar. 1:16-20) Alora, Piero e Andrè i ga bio de pensar come che i ndaria seitar a darghe quel che ghe ocorea ala so fameia. Anca cossita, lori i ga “assà de banda le so rede e i ze ndati drio” a Gesù. Ma parché che i ze stati boni de far questa dessision? Nel libro de Luca, vedemo che Gesù el ga fato un miràcolo par giutarli a capir che Geovà el ndaria tenderli, no importea quel che sucedesse. Sicuro che fidarse che Geovà el ndaria giutarli ghe ga dato forsa par meter la adorassion a Geovà in primo posto nela so vita. — Ledi Luca 5:5-11.c

11. Come che podemo doperar quel che ga sucedesto con noantri par giutar i nostri studianti?

¹¹ Noantri no podemo mia far miràcoli compagno Gesù el fea. Ancora cossita, te pol giutar i studianti se te ghe conti come Geovà el te ga giutà dopo che ghè metesto la adorassion a lu in primo posto. Par esémpio, ricòrdito come che Geovà el te ga giutà quando te ghè scominsià ndar ale riunion? Fursi te ga tocà dir al to paron che no te ndarissi pi laorar nela ora dele riunion. Alora, parla ai to studianti come la to fede la ze restada pi forte dopo de veder come Geovà te ga giutà.

12. (a) Parché che l’è bon convidar diversi fradei e sorele par ndar insieme nel stùdio? (b) Come che te pol doperar ben i vìdei par insegnar al to studiante? Parla de un esémpio.

¹² Sarà tanto bon par el to studiante se te convidi diversi fradei e sorele par ndar insieme nel stùdio. Proa domandarghe come i ga imparà la verità e cossa i ga fato par meter la adorassion a Geovà in primo posto nela so vita. Anca podé vardar insieme i vìdei dele parte “Impara de pi” e “Vuto saver de pi” del libro Te pol viver felice par sempre!. Par esémpio, nela lession 37, podé vardar el vìdeo Geovà tende dele nostre nessessità. Dopo, te pol parlar sora el vìdeo e giutar el to studiante a capir che, se el se sforsa par adorar a Geovà, lu el ndarà giutarlo.

GIUTA I TO STUDIANTI A SAVER COSSA FAR QUANDO I ALTRI I GHE VIEN CONTRA

13. Come che Gesù el ga giutà i so dissìpoli a saver cossa far quando i altri i ghe vegnesse contra?

¹³ Gesù el ga dito tante volte ai so dissìpoli che arquante persone e fin la fameia podaria vegnerghe contra. (Mat. 5:11; 10:22, 36) Quando l’era darente dela so morte, Gesù el ghe ga dito che lori i podaria fin esser copadi. (Mat. 24:9; Gio. 15:20; 16:2) Alora, i so dissìpoli i gavaria de star atenti intanto che i predichesse e no i gavaria mia de barufar con quei che i ghe parlesse contra. Invesse, se i parlesse con rispeto, i saria boni de seitar a predicar.

14. Come che podemo giutar i nostri studianti a saver cossa far quando i altri i ghe vien contra? (2 Timòteo 3:12)

¹⁴ Come che te pol giutar el to studiante compagno Gesù el ga fato? Te pol dirghe che fursi i altri i ndarà parlarghe robe rugne sora quel che lu l’è drio imparar. (Ledi 2 Timòteo 3:12.d) Pol esser che, nel laoro, i ghe rida drio parché l’è drio meter in pràtica quel che la Bìblia la dise. Fursi arquanti dela fameia i parla mal de quel che el to studiante l’è drio imparar. Alora, l’è meio che ghe parlemo suito che pol suceder queste robe. Cossita, lu el sarà parecià par dàrghene fora.

15. Cossa che pol giutar un studiante quando arquanti dela so fameia ghe vien contra?

¹⁵ Nantra roba che te pol far la ze giutar el to studiante a capir parché che arquanti dela so fameia no i ze de acordo che el studie la Bìblia. Pol esser che lori i pense che quel che te ghe insegni l’è busia o che no semo persone bone. Ma, ricòrdate che fin arquanti dela fameia de Gesù no i era de acordo con quel che lu el fea e i disea che lu l’era mato. (Mar. 3:21; Gio. 7:5) Alora, giuta el to studiante a portar passiensa e a sempre parlar con bontà con tuti.

16. Come che podemo giutar un studiante a parlar sora quel che l’è drio imparar a qualchedun dela so fameia?

¹⁶ Pol esser che qualchedun dela fameia del to studiante gàpia voia de capir un pochetin de pi sora quel che lu l’è drio imparar. Ma, no saria mia bon se el volesse spiegar tuto de un colpo. Se el to studiante el spiega una roba ala volta, fursi questa persona la volerà parlar ancora sora questo assunto. (Col. 4:6) Nantra roba che el studiante el pol far la ze dirghe de vardar el site jw.org. Cossita, questa persona la pol imparar quel che la vol sora le Testimònie de Geovà.

17. Come che te pol giutar el to studiante a risponder domande che altri i fà sora le Testimònie de Geovà? (Varda anca el ritrato.)

¹⁷ Te pol doperar i artìcoli dela sèrie “Domande fate de pi” nel jw.org par giutar el to studiante a saver come risponder ale domande dei altri. (2 Tim. 2:24, 25) Te pol anca doperar la parte “Fursi te ghè belche scoltà” nel fin de cada lession del libro Te pol viver felice par sempre!. Giuta el to studiante a saver come spiegar quel che el crede ai altri. E se te vedi che quel el dise no va tanto ben, giùtalo. Cossita, el to studiante el gavarà coraio de spiegar ai altri quel che el crede.

18. Come che te pol incoraiar el to studiante a parlar con coraio sora quel che el crede? (Mateo 10:27)

¹⁸ Gesù el ga dito ai so dissìpoli che lori i gavaria de predicar le bone notìssie ai altri. (Ledi Mateo 10:27.e) Quando un studiante el scomìnsia a ndar ala predicassion, lu el sente el aiuto de Geovà e el impara a fidarse ancora de pi in lu. Alora, cossa che te pol far? Quando te sè che ghen sarà un mese de predicassion spessial, proa incoraiar el to studiante a deventar un predicador. Te pol dirghe che l’è pi fàcile parlar coi altri in queste predicassion spessiai. Lu anca el pol imparar tanto se el scomìnsia a far parte nele riunion in meso la stimana. Cossita, el to studiante el sarà bon de parlar con coraio sora quel che el crede.

MOSTRA CHE TE SÌ SICURO CHE EL TO STUDIANTE EL VOL CONTENTAR A GEOVÀ

19. Come che Gesù el ga mostrà che l’era sicuro che i so dissìpoli i seitaria leai, e come che podemo far compagno a lu?

¹⁹ Vanti de ndar al cielo, Gesù el ga mostrà che l’era sicuro che i so dissìpoli i seitaria leai parché lu el ga dito che lori i saria insieme nantra volta. Lu l’era drio parlar che lori i viveria par sempre in cielo. Quei dissìpoli no i gavea capio quel che Gesù el gavea dito e ghe ga volesto tempo par capir tante robe. Ma Gesù l’era sicuro che lori i era leai a Geovà e che i volea ndarghe drio. (Gio. 14:1-5, 8; 16:12) Dela stessa maniera, noantri ghemo de mostrar ai nostri studianti che semo sicuri che lori i vol contentar a Geovà.

20. Come che una sorela la ga mostrà che la era sicura che la so studiante la ndaria cambiar?

²⁰ Noantri ghemo de esser sicuri che i nostri studianti i vol far quel che l’è giusto. Varda par esémpio quel che ga sucedesto con una sorela del Malauì, de nome Chifundo. Ela la ga scominsià a studiar el libro Te pol viver felice par sempre! con una gióvena catòlica de nome Alinafe. Dopo dela lession 14, Chifundo la ga domandà a Alinafe cossa che la pensea de doperar imàgine nela adorassion a Dio. Ela no ghe ga piasesto e la ga rispondesto: “Se mi vui, posso doperarle si!” Chifundo la ze restada in dùbio se el stùdio ndaria avanti. Ma la era sicura che Alinafe la ndaria capir che no se pol mia doperar imàgine par adorar a Dio. Mesi dopo, nela lession 34, Chifundo la ghe ga domandà: “Come che le robe che te ghè imparà sora la Bìblia e sora Geovà le te ga belche giutà?” Alinafe ghe ga parlà de tante bele robe che la gavea imparà e la ga dito che la gavea capio che le Testimònie de Geovà no le fà mia quel che la Bìblia dise che l’è sbalià. Poco tempo dopo, Alinafe la se ga fermà de doperar imàgine e la ze stata batesada.

21. Come che podemo giutar i nostri studianti a deventar una Testimònia de Geovà?

²¹ Noantri savemo che l’è “Dio che el fà cresser”, ma ancora cossita, podemo giutar i nostri studianti a deventar servi de Geovà. (1 Cor. 3:7) Invesse de sol insegnarghe quel che Geovà el vol che i fae, podemo giutarli a amarlo de cuor. Anca podemo giutarli a far dela adorassion a Geovà la roba pi importante dela so vita e mostrarghe che Geovà el ndarà giutarli se i altri i ghe vien contra. Quando disemo ai nostri studianti che se fidemo che lori i vol servir a Geovà podemo giutarli a gaver la forsa che ghe ocore par deventar una Testimònia de Geovà.