Sìpia sicuro che Geovà el te ama!

1. Parché te ghè scoliesto servir a Geovà par sempre? (Varda anca la ilustrassion.)

TE TE ricordi de quando te ghè fato la to dedicassion a Geovà? Te ghè fato questa dessision parché te lo ghè cognossesto e te ghè scominsià a amarlo. Te ghè prometesto che la roba pi importante dela to vita saria far la volontà de Dio e che te seitarissi a amarlo de tuto el to cuor, ànima, mente e forsa. (Mar. 12:30) Dopo de far questa dessision, el to amor par Geovà l’è restà cada volta pi forte. Alora, se qualchedun te domandesse: “Te ami pròpio a Geovà?” sicuro che te ndarissi dir: “Mi amo a Geovà de pi che qualche persona o de che qualche altra roba!”

2-3. (a) De acordo con Geremia 31:3, de cossa che Geovà el vol che semo sicuri? (b) Cossa che ndaremo imparar in questo stùdio?

² Ma cossa che te ndarissi risponder se qualchedun te domandesse: “E ti, sito sicuro che Geovà el te ama?” Pol esser che te ndarissi domandarte: ‘Sarà che mi mèrito pròpio el amor de Geovà?’ Una sorela che no la ga sentio el amor dela so fameia de picinina la ga dito: “Mi son sicura che mi amo a Geovà, ma tante volte, mi go dubi se Geovà el me ama.” Se te sì drio sentirte cossita, cossa che pol giutarte a esser sicuro che Geovà el te ama?

³ Geovà el vol che te sìpia sicuro che lu el te ama. (Ledi Geremia 31:3.a) L’è stà Geovà che el te ga fato vegner a lu. E quando te te ghè dedicà e batesà, lu el te ga dato una roba de tanto valor, che la ze el so amor leal. Questo vol dir che lu el te ama tanto e che mai el ndarà abandonarte. Par quela che lu el te vede a ti e a tuti i so servi come la so “propietà spessial”. (Mal. 3:17) Geovà el vol che se sentimo compagno al apòstolo Paolo. Lu l’era sicuro che Geovà lo amea. Par quela che lu el ga dito: “Mi son sicuro de che gnanca la morte, gnanca la vita, gnanca àngeli, gnanca governi, gnanca cose adesso, gnanca cose par vegner, gnanca poderi, gnanca altessa, gnanca profondità, gnanca qualche altre creassion podarà spartirne del amor de Dio che l’è in Cristo Gesù, nostro Signor.” (Rom. 8:38, 39) In questo stùdio, ndaremo veder parché che ghemo de esser ancora pi sicuri che Geovà el ne ama e cossa che pol giutarne a sentirse cossita.

PARCHÉ CHE GHEMO DE ESSER SICURI CHE GEOVÀ EL NE AMA?

4. Cossa che podemo far par no cascar nte una dele pedo tràpole del Diaol?

⁴ Se noantri credemo che Geovà el ne ama, podaremo restar firmi contra una dele “tràpole del Diaol”. (Efe. 6:11) El Diaol el vol che se fermemo de servir a Geovà e el proarà de tuto par intrigarne. Una dele so tràpole la ze farne pensar che Geovà no’l ne ama. Ma questa la ze una bruta de una busia. La Bìblia la dise che Sàtana l’è “come un leon”. (1 Pie. 5:8, 9) El leon ghe piase ciapar le bèstie quando lore le ze fiache e no le ze bone de difenderse. El Diaol el fà compagno a questo leon. Lu el ne vien contra quando se ghemo ciapà fiachi, strachi o desanimadi par causa dele dificoltà che ghemo bio, che ghemo adesso o dela paura del futuro. (Pro. 24:10) Quando se ciapemo fiachi, el Diaol el proa farne desister de servir a Geovà. Ma noantri podemo méterse contra el Diaol se femo el meio che podemo par esser sicuri che Geovà el ne ama. — Tia. 4:7.

5. Parché che l’è tanto importante esser sicuri che Geovà el ne ama?

⁵ Se noantri semo sicuri che Geovà el ne ama, la nostra amicìssia con lu la restarà cada volta pi forte. Parché? Parché Geovà el ne ga fato par amar e esser amadi. Quando qualchedun mostra che ne ama, anca noantri gavaremo voia de mostrar el nostro amor par lu. Alora, de pi che sentimo el amor de Geovà par noantri, de pi lo amaremo. (1 Gio. 4:19) E quando Geovà el vede che lo amemo cada volta de pi, lu el ndarà sentir la medèsima roba par noantri. La Bìblia la dise: “Rivé darente de Dio e lu el rivarà darente de valtri.” (Tia. 4:8) Ma come che podemo esser pròpio sicuri che Geovà el ne ama?

COSSA POL GIUTARNE A ESSER SICURI CHE GEOVÀ EL NE AMA?

6. Cossa che te pol domandar a Geovà se no te sì sicuro che lu el te ama?

⁶ Seita a domandar a Geovà che el te giute a capir parché lu el te ama. (Luc. 18:1; Rom. 12:12) Fursi te tocarà pregar tante volte nte un giorno par domandar che Geovà el te giute a vederte come lu el te vede. Pol esser che sìpia fadiga creder che Geovà el te ama parché te te senti sensa valor. Ma ricòrdate che Geovà l’è pi grando che el to cuor. (1 Gio. 3:19, 20) Lu el sa dele bele qualità che te ghè, anca se no te sì bon de vederle. (1 Sam. 16:7; 2 Cró. 6:30) Alora, parla a Geovà “tuto quel che l’è nel to cuor” e domàndaghe che el te giute a creder che el te ama. (Sal. 62:8) Dopo, proa meter in pràtica le robe che ndaremo imparar de qua avanti.

7-8. Come che i Salmi i ne assa sicuri che Geovà el ne ama?

⁷ Te ghè de creder in quel che Geovà el dise. Geovà el ga dato el so spìrito santo par òmini scriver la Bìblia. Alora, quel che lori i ga scrito sora Geovà l’è vero. Varda quel che Davi el ga scrito: “Geovà l’è darente de quei che i ga el cuor pien de tristessa. Lu el salva quei che i ze desanimadi.” (Sal. 34:18) Quando te sì desanimà, fursi te pensi che nissun pol giutarte. Ma Geovà el promete che el sarà darente de ti parché el sa che te ocore del so aiuto. Davi anca el ga scrito: “Meti via le me làgrime nel to odre.” (Sal. 56:8) Questo vol dir che Geovà el vede quando te sì drio tribolar o te sì disgustà. Lu el se preocupa tanto con quel che te sì drio sentir e el òdia vederte sofrir. Lu el dà valor a cada làgrima toa, cossita come una persona che la ze nel deserto la dà tanto valor a cada gossa de àqua che la ga rento el odre. Varda anca quel che dise el Salmo 139:3: “Ti te cognossi ben tuto quel che mi fao.” Questo vol dir che Geovà el vede tuto quel che femo, ma lu el scòlie ricordarse dele robe bone. (Ebr. 6:10) Parché? Parché lu el ghe dà tanto valor a tuto quel che femo par contentarlo.b

⁸ Geovà el dopera bei testi cossita par assarne sicuri che el ne ama tanto e che el dà valor a cada un de noantri. Ma come ghemo belche parlà, Sàtana el vol farne creder che Geovà no’l ne ama. Alora, sempre che te vien questo dùbio in mente, domandate: ‘Ndarò creder nel “pare dela busia” o nel “Dio dela verità”?’ — Gio. 8:44; Sal. 31:5.

9. De acordo con Ésodo 20:5, 6, come che Geovà ne assa sicuri che lu el ne ama?

⁹ Pensa in quel che Geovà el sente par quei che i lo ama. Varda quel che Geovà el ga dito a Moisè e ai israeliti in Ésodo 20:5, 6. (Ledi.c) In questo testo, Geovà el promete che el ndarà mostrar amor leal a quei che i lo ama. Queste parole le mostra che Geovà mai el assaria de amar una persona che lo ama. (Nee. 1:5) Cossita, quando te vien dubi che Geovà el te ama, te pol domandarte: ‘Mi amo a Geovà e son drio far el me meio par contentarlo?’ Se la to risposta la ze “si”, Geovà el te ama. (Dan. 9:4; 1 Cor. 8:3) Alora, se te sì sicuro che te ami a Geovà, parché che te gavarissi dubi che lu el te ama? Ricòrdate che lu sempre el ndarà amarte e mai el ndarà abandonarte.

10-11. De acordo con Gàlati 2:20, cossa che Geovà el vol che pensemo sora el sacrifìssio de Gesù?

¹⁰ Pensa sora el sacrifìssio de Gesù. El pi grando presente che Geovà el ne ga dato l’è stà el sacrifìssio de Gesù. (Gio. 3:16) Ma sarà che questo presente l’è anca par ti? Sicuro che si! Varda el esémpio del apòstolo Paolo. Vanti che Paolo el cognossesse a Geovà, lu el ga fato bruti pecati. Anca dopo che l’è deventà un dissìpolo, lu el ga seità a far sbali. (Rom. 7:24, 25; 1 Tim. 1:12-14) Ma lu el ga imparà a veder el sacrifìssio de Gesù come un presente anca par lu. (Ledi Gàlati 2:20.d) Alora, se Geovà el ga dato spìrito santo a Paolo par scriver queste parole, vol dir che le va ben anca par ti. (Rom. 15:4) Geovà el vol che te credi che el sacrifìssio de Gesù l’è un presente par ti. Quando te sì bon de pensar cossita, te sarè sicuro che Geovà el te ama.

¹¹ Noantri ringrassiemo tanto a Geovà parché el ga mandà so Fiol par morir par noantri. Ma Gesù anca l’è vegnesto ala Tera par insegnar la verità sora Dio. (Gio. 18:37) E una dele verità pi bele che el ne ga insegnà la ze stata che Geovà el ne ama tanto.

GESÙ EL NE GIUTA A ESSER SICURI CHE GEOVÀ EL NE AMA

12. Parché che podemo fidarse in quel che Gesù el ga parlà sora so Pare?

¹² Quando Gesù l’è vegnesto qua ala Tera, ghe piasea parlar ale persone come Geovà l’è. (Luc. 10:22) Noantri podemo fidarse in quel che Gesù el ga dito parché lu el ga vivesto tanto tempo con Geovà nel cielo prima de vegner ala Tera. (Col. 1:15) Gesù el savea che el so Pare lo amea tanto, e lu el ga visto come che Geovà el ga sempre tratà i àngeli fedeli e le persone qua nela Tera con amor. Alora, come che Gesù el pol giutarne a esser sicuri che Geovà el ne ama?

13. Come che Gesù el vol che vedemo a Geovà?

¹³ Gesù el vol che capimo quel che Geovà el sente par noantri. Nei Vangeli, Gesù el ga ciamà Geovà de “Pare” de pi de 160 volte. E quando el parlea coi so dissìpoli, tante volte lu el disea el “vostro Pare”. (Mat. 5:16; 6:26) La nota de stùdio nel testo de Mateo 5:16 dise che, nel passà, i servi de Dio tante volte i ciamea a Geovà de ‘Tuto Poderoso’, ‘el Altìssimo’, el ‘Grandioso Creador’. Ma Gesù lo ga ciamà tante volte de ‘Pare’. Alora, Gesù el vol che vedemo a Geovà come a un caro Pare e che se sentimo darente de lu. Ndemo veder due volte che Gesù el ga doperà la parola “Pare”.

14. De acordo con Mateo 10:29-31, come che Gesù el ga mostrà che ghemo tanto valor par el nostro Pare? (Varda anca la ilustrassion.)

¹⁴ Prima, ndemo veder le parole de Gesù in Mateo 10:29-31. (Ledi.e) I pardai i ze pìcoli osei che no i ama e no i adora a Geovà. Stesso cossita, Geovà el sa ndove l’è cada un de questi oseleti e anca el vede se qualchedun casca par tera. Alora, pensa se lu no’l dà valor e no’l tende de cada servo suo che lo ama. E sora le parole “fin tuti i cavei dela vostra testa i ze contadi”, la nota de stùdio nel versìcolo 30 dise: ‘Se Geovà el sa robe tanto pìcole cossita sora noantri, l’è sicuro che lu el se preocupa con cada de noantri.’ Alora, Gesù el vol che credemo che ghemo tanto valor par el nostro Pare nel cielo.

15. Cossa che le parole de Gesù in Gioani 6:44 ne insegna sora nostro Pare nel cielo?

¹⁵ Varda nantra maniera che Gesù el ga doperà la parola “Pare” in Gioani 6:44. (Ledi.f) Questo testo el mostra che l’è stà to Pare nel cielo che el te ga giutà a cognosserlo e a amarlo. Parché lu el ga fato questo? Parché el ga visto le to bele qualità. (Ati 13:48) La nota de stùdio de Gioani 6:44 dise che fursi Gesù l’era drio pensar nele parole del testo de questo stùdio, che dise: “Par quela te go fato vegner a mi con amor leal.” (Ger. 31:3; varda anca Oseia 11:4.) Alora, el nostro Pare nel cielo sempre el vede le bele qualità che ghemo, anca se noantri no semo mia boni de vederle.

16. (a) Cossa che Gesù el ne ga insegnà sora Geovà, e parché che podemo fidarse in lu? (b) Cossa che pol assarte sicuro che Geovà l’è el meio Pare che ghen’è? (Varda anca el quadro “El meio Pare che ghen’è”.)

¹⁶ Come ghemo visto, Gesù no’l ga sol insegnà che Geovà l’è el so Pare, ma anca che lu l’è el to Pare. Lu el vol che te sìpia sicuro che Geovà el te ama e che el te dà tanto valor. Alora, quando te scominsi a pensar che Geovà no’l te ama, domandate: ‘Sarà che no saria meio fidarme in Gesù, che el cognosse a Geovà meio che tuti e che sempre el parla la verità?’ — 1 Pie. 2:22.

FÀ EL TO MEIO PAR ESSER SICURO CHE GEOVÀ EL TE AMA

17. Parché che ghemo de esser cada volta pi sicuri che Geovà el ne ama?

¹⁷ Noantri ghemo de far de tuto par esser cada volta pi sicuri che Geovà el ne ama. Come ghemo visto in questo stùdio, Sàtana el vol tanto che se fermemo de servir a Geovà. E una dele tràpole che lu sempre el dopera la ze farne creder che Geovà no’l ne ama. Ma noantri no volemo creder in questa busia! — Giò 27:5.

18. Cossa che te pol far par esser ancora pi sicuro che Geovà el te ama?

¹⁸ In questo stùdio, ghemo visto come che podemo esser sicuri che Geovà el ne ama. Seita a pregar a Geovà par domandarghe che el te giute a veder le bele qualità che lu el vede in ti. Pensa sora i versìcoli che i mostra che Geovà el te dà tanto valor e che el te ama. Ricòrdate che se te ami a Geovà, l’è sicuro che lu el te ama. No stà desmentegarte che lu el ga dato la vita del so Fiol anca par ti. Fìdate che Geovà l’è el to Pare, come che Gesù el ga dito. Cossita, quando qualchedun el te domanda: “Te sì sicuro che Geovà el te ama?” te vè dir: “Si! E mi fao el meio che posso tuti i giorni par mostrar che lo amo!”