Sìpia pronto par giutar quei che i vol imparar sora Dio

1. Cossa che tante persone le fà quando le scolta le bone notìssie? (Ati 13:47, 48; 16:14, 15)

NEL PRIMO sècolo, tanti i ga acetà deventar dissìpoli de Gesù pena dopo de scoltar le bone notìssie. (Ledi Ati 13:47, 48;a 16:14, 15.b) Anca ancoi, tanti i ga caro de scoltar le bone notìssie. Ma anca quei che no i vol scoltar, dele volte, i càmbia de idea dopo de un tempo. Alora, cossa che podemo far par esser pronti par giutar tuti quei che i vol imparar?

2. Parché che podemo dir che el laoro de predicassion l’è compagno al laoro de un colono?

² Proa pensar nte una ilustrassion. Un colono che l’è drio tender de tuto quel el ga piantà el vede che i fruti de una pianta i ze mauri. Alora, lu el va tirar do questi fruti, ma el seitarà a tender dele altre piante fin che i so fruti i vien mauri. El nostro laoro de predicassion l’è compagno. Come cossita? Pol esser che catemo qualchedun che el vol imparar sora Geovà e sora le bone notìssie. Alora, femo presto visitarlo e insegnarghe. Anca cossita, seitemo a visitar altre persone che ghe piase scoltarne, ma che ancora no le vol studiar la Bìblia. (Gio. 4:35, 36) L’è importante capir se le persone le vol studiar, o nò, par saver come giutarle. In questo stùdio, ndaremo veder cossa che podemo far quando belche nela prima vìsita vedemo che una persona la vol imparar sora Dio. Dopo, ndaremo veder come che podemo giutarla a deventar amiga de Geovà e adorarlo.

COME CHE PODEMO GIUTAR QUEI CHE I VOL IMPARAR SORA LA BÌBLIA?

3. Cossa che podemo far quando vedemo che una persona la vol imparar sora Dio? (1 Corinti 9:26)

³ Quando parlemo con una persona che la vol imparar sora Geovà e esser so amiga, ghemo de giutarla suito. Alora, podemo domandarghe belche nela prima vìsita se la vol studiar la Bìblia o vegner a una dele nostre riunion. — Ledi 1 Corinti 9:26.c

4. Parla de quel che ga sucedesto con una gióvena che suito la ga volesto studiar la Bìblia.

⁴ Domanda se i vol studiar la Bìblia. Arquanti i ze pronti par scominsiar a studiar belche nela prima volta che parlemo con lori. Par esémpio, varda sol quel che ga sucedesto con una gióvena nel Canadà. Nte una dóbia, ela la ga ciapà una revista Te pol viver felice par sempre! nel careto. La sorela che la era nel careto la ghe ga dito che la podaria studiar la Bìblia sensa pagar gnente. Alora, la gióvena la ga dato el nùmero del so telèfono e anca la sorela ghe ga dato el suo. Dopo, in quel medèsimo giorno, la gióvena la ga mandà un messàgio ala sorela par parlar sora el stùdio. La sorela ghe ga dito che podaria visitarla nel fin de stimana, ma la gióvena la ga domandà se la podaria vegner nel giorno dopo. Cossita, nel vendre, lore le ga scominsià a studiar, in quel fin de stimana la ze ndata ala riunion e la ga seità a imparar sora Geovà.

5. Cossa pol giutarne a dessider quando domandar se una persona la vol studiar? (Varda anca la ilustrassion.)

⁵ Ma no podemo mia pensar che tute le persone le ze come quela gióvena. Arquante ghe piase scoltarne, ma ne tocarà visitarle un per de volte fin che le gàpia voia de studiar la Bìblia. Alora, podemo scominsiar a parlar sora quel che ghe piase o che le ga de bisogno. Se seitemo a visitarle e darghe atension, pol esser che le volerà studiar la Bìblia. Ma come che podemo domandar se una persona la vol studiar? Ghemo fato questa domanda a arquanti fradei e sorele che i ze boni de scominsiar tanti studi dela Bìblia. Vedemo cossa che i ne ga rispondesto.

6. Cossa che podemo dir par giutar la persona a veder che l’è bel imparar sora la Bìblia?

⁶ Questi fradei e sorele i ga dito che, in arquanti posti, l’è meio no dir “ndaremo studiar”, “ndaremo far un corso dela Bìblia” o “mi vao insegnarte”. Invesse, lori i ga visto che l’è tanto meio dir che “ndaremo ciacolar”, “ndaremo discorer” o “ndaremo imparar sora la Bìblia insieme”. Alora, te pol dir: “L’è bel veder che la Bìblia la ne giuta a saver tante robe importante,” o “Seto che la Bìblia no la ze mia un libro che parla sol de religion. Ela anca la ne giuta a viver meio”. Dopo te pol dir: “No te ocore torte massa tempo. Se ciacolemo sol 10 o 15 minuti, te ndarè imparar arquante robe che te giutarà tanto.” No te ocore dir che te ndarè tute le stimane o che la gavarà un compromisso. Cossita, la persona no la sentirà che la ga obrigassion de riceverte sempre.

7. Quando che arquanti i ga capio che i gavea catà la verità? (1 Corinti 14:23-25)

⁷ Domanda se i vol vegner ale riunion. Nela època del apòstolo Paolo, tanti i ga capio che i gavea catà la verità nela prima volta che i ze ndati nte una riunion. (Ledi 1 Corinti 14:23-25.d) Ancoi, l’è tanto importante che le persone che le vol imparar sora la Bìblia le vegna ale riunion parché cossita le fà pi presto gaver una amicìssia con Geovà. Alora, quando che te pol convidar una persona par una riunion? L’è vera che la lession diese del libro Te pol viver felice par sempre! dise par el studiante sforsarse de ndar nte una riunion, ma no te ocore spetar fin questa lession par convidarlo. Ancora nela prima volta che te parli con una persona, te pol convidarla par ndar nela pròssima riunion e dir quel che ndaremo imparar nel discorso e nel stùdio dela Sentinela.

8. Cossa che podemo parlar a quei che convidemo par una riunion? (Isaia 54:13)

⁸ Quando te convidi una persona par vegner ale nostre riunion, te pol spiegarghe che ghen’è tante robe che le ze difarente dele altre ciese. Varda el esémpio de una dona che la studiea la Bìblia e la ga visto come femo el stùdio dela Sentinela! nela prima riunion che la ze ndata. Dopo, ela ga domandà ala sorela che ghe insegnea la Bìblia: “Quel omo che l’è drio far le domande el sa el nome del tuti quei che i ze qua?” La sorela la ga rispondesto che, cossita come cognossemo a tuti dela nostra fameia, noantri se sforsemo de cognosser a tuti i nostri fradei e sorele. Quela studiante la ga dito che nela so ciesa no l’era mia cossita! Che altre bele robe che sucede nele nostre riunion te podarissi spiegar ala persona? Noantri volemo adorar a Geovà, imparar de pi sora lu e incoraiarse un al’altro. (Ledi Isaia 54:13;e Ebr. 2:12; 10:24, 25) Noantri ndemo ale nostre riunion par imparar dela Bìblia, e nò par ndar drio una mùcia de costumi. (1 Cor. 14:40) I nostri Saloni del Regno i ze posti sémplisse, ma i ze fati par giutarne a star atenti e a imparar de quel che scoltemo. Noantri mai parlemo sora polìtica gnanca barufemo par causa de quel che pensemo. Se te mostri el vìdeo Cossa che sucede in un Salon del Regno? a quei che te convidi par una riunion, lori i ndarà capir quel che sucede.

9-10. Cossa che podemo far se qualchedun ga paura de ndar nte una riunion? (Varda anca el ritrato.)

⁹ Arquanti fursi i ga paura de ndar nte una riunion. Parché? Parché pol esser che i pensa che ghe tocarà deventar una Testimònia de Geovà. Alora, spiegaghe che mai obrighemo nissuni a parlar o a far qualcossa gnanca a deventar una Testimònia de Geovà. Nele nostre riunion, ricevemo ben a tuti dela fameia. I toseti i se senta insieme dei so genitori. Cossita, i genitori i resta insieme ai so fioi e i vede quel che i ze drio imparar. (Deu. 31:12) Noantri gnanca no domandemo soldi. Invesse, obedimo a quel che Gesù el ga dito: “Gavé ricevesto sensa pagar gnente, alora gavé de dar sensa cobrar gnente.” (Mat. 10:8) Te pol anca dir che nissun ghe ocore meter su robe che costa tanto, parché Dio el ‘vede el nostro cuor’ e nò le robe che semo drio doperar. — 1 Sam. 16:7.

¹⁰ Cossa che te pol far se qualchedun che te ghè convidà l’è ndato nte una riunion? Sfòrsate par giutarlo a sentirse ben intrà i fradei. Te pol farlo cognosser i ansiani e altri fradei e sorele dela congregassion. Se lu el se sente ben, fursi el gavarà voia de tornar. E se lu no’l ga una Bìblia, te pol mostrar i testi che ledemo, giutarlo a capir meio quel che se dise nel discorso e anca mostrar come che studiemo insieme nele nostre riunion.

COME CHE TE POL GIUTAR QUEI CHE I ZE DRIO STUDIAR LA BÌBLIA?

11. Come che te pol mostrar che te rispeti quel che ti e to studiante gavé combinà?

¹¹ Cossa te pol far quando te sì drio insegnar la Bìblia a qualchedun? Te pol mostrar che te sè che lu l’è drio tor un tempo importante par imparar dela Bìblia e rispetar la ora che gavé combinà. Par esémpio, sfòrsate de rivar sempre nela ora giusta, anca se ndove te sì de star le persone no le ga questo costume. Arquanti fradei i ga dito che, nele prime volte che vè far el stùdio, fursi saria meio farlo un pochetin pi presto, anca se el studiante el volaria studiar un pochetin de pi. E ricòrdate de no parlar massa. Invesse, sìpia pronto par scoltar quel che el to studiante el sente e el pensa. — Pro. 10:19.

12. Cossa che ghemo de far quando insegnemo la Bìblia a qualchedun?

¹² Sempre che scominsiemo a studiar la Bìblia con qualchedun, quel che volemo l’è giutarlo a cognosser a Geovà, a Gesù e imparar a amarli. Alora, cossa che te pol far? Proa insegnarghe quel che la Bìblia la dise invesse de parlar sora quel che te pensi. (Ati 10:25, 26) El apòstolo Paolo l’è stà un bel esémpio. Lu el savea che Geovà el gavea mandà Gesù par giutarne a cognosserlo e par insegnarne come amarlo. Par quela, lu sempre el parlea sora Gesù quando el insegnea, e nò sora lu stesso. (1 Cor. 2:1, 2) Paolo anca el ga giutà i dissìpoli a capir che ne ocore imparar a mostrar tante bele qualità, che le ze come el oro, el argento e sassi pressiosi. (1 Cor. 3:11-15) Intrà queste qualità ghen’è la fede, la sabedoria, la capacità de capir quel che l’è bon e quel l’è sbalià e el rispeto par Geovà. (Sal. 19:9, 10; Pro. 3:13-15; 1 Pie. 1:7) Alora, proa far compagno a Paolo e giuta i to studianti a gaver una forte amicìssia col nostro caro Pare nel cielo. — 2 Cor. 1:24.

13. Come che podemo insegnar con passiensa sensa esser massa duri? (2 Corinti 10:4, 5) (Varda anca el ritrato.)

¹³ Fà compagno a Gesù e proa insegnar con passiensa e sensa esser massa duro. No stà far domande che ndarà assar la persona con vergogna. E se ghen’è qualcossa che la fà fadiga capir, te pol assar par studiar sora questa verità pi avanti. Cossita, la persona la gavarà tempo par capir quela verità e cambiar la so maniera de pensar. (Gio. 16:12; Col. 2:6, 7) La Bìblia la dise che le robe sbaliade che le persone le ga imparà le ze come “fortalesse”. (Ledi 2 Corinti 10:4, 5.f) Alora, sfòrsate de giutar el to studiante a fidarse in Geovà prima de dir che quel che lu el crede l’è una busia. Cossita, te ndarè giutarlo a far su una nova fortalessa prima de rabaltar quela che lu el ga. — Sal. 91:9.

COME CHE TE POL GIUTAR QUEI CHE I VA ALE NOSTRE RIUNION?

14. Come che ghemo de tratar tuti quei che i vien ale nostre riunion?

¹⁴ Geovà el vol che tratemo a tuti con bontà e rispeto, no importa de ndove i ze, cossa che i crede o quanti soldi i ga. (Tia. 2:1-4, 9) Alora, come che podemo mostrar amor a quei che i vien ale nostre riunion?

15-16. Come che podemo giutar quei che i vien ale nostre riunion a sentirse ben?

¹⁵ Arquanti fursi i vien ale nostre riunion parché i vol saver cossa sucede lì o parché qualchedun li ga convidadi. Alora, come che podemo giutarli? Noantri podemo suito saludarli e parlar con lori, ma sensa farli sentir vergogna. Ghemo de star atenti de no meterse nela so vita e de no farghe massa domande. (1 Pie. 4:15) Te pol convidarli par sentarse insieme de ti e giutarli a catar i testi dela Bìblia e anca darghe la publicassion che sarà doperada nela riunion. Te pol anca pensar in altre robe che te pol far par giutarli a sentirse ben. Varda quel che ga sucedesto con un omo che el ga visità el Salon del Regno par la prima volta. Lu el ga dito al fradel che l’è ndato saludarlo che lu no l’era drio sentirse ben parché no l’era mia ben vestio. Quel fradel ghe ga dito che noantri proemo vestirse ben par ndar ale nostre riunion, ma semo come tute le altre persone. Dopo un tempo, quel omo l’è stà batesà, ma lu mai el se ga desmentegà de quel che el fradel el ghe ga dito.

¹⁶ Quei che i va ale nostre riunion anca i pol sentirse ben quando ghe mostremo rispeto. Alora, stà atento a quel che te disi nele to ciàcole, nei to comentari o in qualche dimostrassion e discorsi che te fè. Mai ghemo de dir qualcossa che podaria intrigar o disgustar i altri. (Tito 2:8; 3:2) Par esémpio, mai ndaremo mancarghe de rispeto quando parlemo de quel che i altri i crede. (2 Cor. 6:3) I fradei che i fà discorsi i ga de star ancora pi atenti. Lori i ga de ricordarse che, nele riunion, ghen’è arquanti che no i ze Testimònie de Geovà, e cossita, spiegar arquante robe che fursi queste persone no le cognosse.

17. Cossa che ghemo de far quando catemo una persona che la vol imparar sora Dio?

¹⁷ Ghemo ancora poco tempo par giutar le persone a imparar la verità. Par quela, la ghe metemo tuta par giutar quei che i vol imparar sora Geovà e “guadagnar la vita eterna”. (Ati 13:48) Alora, convidemo queste persone ale nostre riunion e domandemo se lore le vol imparar sora la Bìblia. Cossita, podaremo giutarle a ndar par “la strada che la mena ala vita”. — Mat. 7:14.