CAPÌTOLO 35

Come che posso deventar amigo de Dio?

Dopo de gaver sucedesto una desgràssia nela so vita, Jeremy el ga imparà el valor de gaver una amicìssia con Dio. “Quando mi gavea 12 ani, me pare l’è ndato via de casa”, lu el dise. “Una note ero drio far orassion nel leto, suplicando che Geovà el fesse me pare ritornar.”

Desesperà, Jeremy el ga scominsià a leder la Bìblia. Sensa imaginar, el ga catà el Salmo 10:14 e l’è restà tanto emossionà. Questo salmo el dise sora Geovà: “Quel che l’è drio tribular el va fin ti. Ti te sì quel che el giuta el òrfano.” Jeremy el dise: “Go sentio che Geovà l’era drio parlar con mi, el me ga mostrà che lu l’era un aiuto par mi. Lu l’era me Pare. Che pupà meio de lu mi podaria gaver?”

STESSO che te sìpia nte una situassion someiante a quela de Jeremy, o nò, la Bìblia la mostra che Geovà el vol che ti te sìpia amigo de Lu. Questo l’è de acordo cola Bìblia che la dise: “Rivé darente de Dio e lu el rivarà darente de valtri.” (Tiago 4:8) Pensa in cossa che queste parole le ghe vol dir: anca se lu l’è difarente de ti de tante maniere e no te pol véderlo, stesso cossita, Geovà Dio l’è drio convidarte par esser el so amigo!

Ma ghe vol sforso dela to parte par gaver una amicìssia con Dio. Vedi un esémpio: se te ghè una pianta nte un vaso, ti te sè che ela no la vien su ela sola. Parché la vegne su, te ghè sempre de meterghe àqua e assarla nte un posto che la giute a cresser. La stessa roba la sucede cola to amicìssia con Dio. Come che ti te pol far la to parte parché questa amicìssia la devente pi granda?

L’è importante studiar la Bìblia

La amicìssia la depende de due robe: parlar e scoltar. Cossita anca sucede cola nostra amicìssia con Dio. Leder e studiar la Bìblia l’è la maniera che ghemo par poder scoltar quel che Dio el ga da dirne. — Salmo 1:2, 3.

Pol esser che no te piase tanto de studiar. Tanti gióveni i ghe piase de pi de veder television, divertirse con giughi o star insieme coi so amighi. Ma se ti te vol gaver una amicìssia con Dio, ghen’è sol una maniera: te ghè de scoltar quel che el vol dirte studiando la Bìblia.

Ma no stà mia preocuparte. Studiar la Bìblia no’l ga de esser un peso. Te piaserà imparar a studiar, anca se te ghè sempre pensà che no te piase mia. La prima roba che te ghè de far l’è tor el tempo par studiar la Bìblia. “Mi go una programassion”, dise una gióvena che la ga nome Laís. “La prima roba che mi fao tute le matine l’è leder un capìtolo dela Bìblia”. Maria, che la ga 15 ani, la fà difarente. Ela la dise: “Mi ledo un toco dela Bìblia tute le note vanti de dormir.”

Par scominsiar el to programa de stùdio, vedi el quadro “Fà de pi de che sol léderla”. Dopo, scrivi quando che te podarìssi doperar 30 minuti par studiar la Bìblia.

․․․․․

Far la programassion l’è sol la prima roba. Quando ti te scominsi a studiar pol esser che gnanca sempre la letura dela Bìblia la sìpia fàcile. Fursi te sì de acordo con Jezreel, de 11 ani, che el dise: “Par dirlo cossita, arquante parte dela Bìblia le ze difìcile de capir e no le ze mia tanto interessante.” Se anca ti te pensi cossita, no stà desister. Stùdia sempre la Bìblia pensando che questo l’è el tempo che te ghè tolto par scoltar a Dio, el to amigo. Ghe vol sforso parché el to stùdio dela Bìblia el sìpia bel!

La orassion la ze tanto importante

Parlemo con Dio par meso dela orassion. Pensa che maraveioso presente l’è la orassion! Ti te pol parlar con Geovà Dio a qualche ora del giorno o dela note. Lu l’è sempre pronto par scoltar. E ancora de pi, lu el vol scoltar quel che te vol dirghe. L’è par quela che la Bìblia la dà el consìlio: “Domandé el aiuto de Dio in tute le cose par meso de orassion e sùpliche, insieme a ringrassiamento.” — Filipensi 4:6.

De acordo con questo versìcolo, ghen’è tante robe che te pol parlar con Geovà. Pol esser dei to problemi, dele to ansietà e anca dele robe che te vol ringrassiar. Sicuro che te ringrassi i to amighi par le robe bone che lori i fà par ti, mia vera? Alora, ringràssia anca a Geovà che el ga belche fato par ti de pi robe che qualche altro amigo el podaria gaver fato. — Salmo 106:1.

Adesso, scrivi le robe che ti te vol ringrassiar a Geovà.

․․․․․

Sicuro che dele volte te ghè paure e ansietà che le te assa preocupà. El Salmo 55:22 el dise: “Buta la to carga sora Geovà, e lu pròpio el te sostegnerà. Mai el assarà che el giusto el casche.”

Scrivi qua soto le to preocupassion che ti te volarissi parlar nele to orassion.

․․․․․

Proa e vedi

La to amicìssia con Dio la ga bisogno de nantra roba che no te pol assar de banda. El salmista Davi el ga scrito: “Proé e vedé che Geovà l’è bon.” (Salmo 34:8) Davi el ga scrito el Salmo 34 pena dopo che el ga passà par una situassion de spaurarse. Lu l’era drio scampar via del Rè Saul che el volea coparlo. Questa la ze stata una bruta provassion. Ma dopo, el ghe ga tocà sconderse in meso dei so nemighi, i filistei. Pensando che i ndesse coparlo, Davi l’è stà furbo e el ga fato finta esser mato e el ga scampà via. — 1 Samuel 21:10-15.

Davi l’è stà bon de scampar par poco. Ma lu el savea che questo ga sucedesto nò par mèrito suo. Invesse de questo, lu el savea che l’è stà Geovà che lo ga giutà. Nel scomìnsio del salmo che ghemo pena parlà, lu el ga scrito: “Son ndà in serca de Geovà, e lu el me ga rispondesto. Par causa de lu, adesso no go pi paura.” (Salmo 34:4) Lu el podea dir ai altri par ‘proar e veder che Geovà l’è bon’ parché lu stesso el ga proà questo nela so vita.a

Sito bon ricordar qualcossa che gàpia sucedesto con ti che el mostra che Geovà el te ga pròpio tendesto? Se si, scrivilo qua soto. Una idea: quel che te vè scriver no ga de esser una granda roba. Proa pensar nele benedission che te ghè bio durante el giorno, anca se le ze state pìcole robe.

․․․․․

Pol esser che i to genitori i te gàpia insegnà la Bìblia. Se questo ga sucedesto con ti, questa la ze una benedission. Ancora cossita, ti te ghè de gaver la to amicìssia con Dio. Se no te ghè gnancora fato questo, quel che ghemo parlà in questo capìtolo pol giutarte a scominsiar a far questo. Geovà el va benedir i to sforsi. La Bìblia la dise: “Seité a domandar e riceveré, seité a ndar in serca e cataré.” — Mateo 7:7.

[Nota]

TESTO PRINSIPAL

“Felici i ze quei che i ricognosse le so nessessità spirituai.” — Mateo 5:3.

UNA IDEA

Se ti te ledi sol quatro pàgine dela Bìblia al giorno, nte un ano te ndarè léderla tuta.

SAVÉITO QUESTO?

Se te sì drio leder questo e te sì drio meter in pràtica i consili dela Bìblia che te ghè imparà, questo ghe vol dir che Geovà el ga pròpio interesse par ti. — Gioani 6:​44.

COSSA NDARÒ FAR

Par benefissiarme de pi del me stùdio dela Bìblia, mi vao ․․․․․

Par seitar far le me orassion, mi vao ․․․․․

Me piaseria domandarghe questo ai me genitori: ․․․․․

COSSA PÉNSITO?

● Cossa che te pol far par far un stùdio dela Bìblia pi bel?

● Parché che Geovà el ga caro de scoltar le orassion de persone imperfete?

● Come che te pol far meio le to orassion?

[Comentàrio nela pàgina]

“Quando mi ero pìcola, le me orassion le era sempre compagne. Ancoi mi fao orassion sora le robe bone e le robe rugne de cada giorno. Tuti i giorni i ze difarenti, par quela le me orassion le càmbia.” — Eve

[Quadro/Stampa nela pàgina]

Fà de pi de che sol léderla

1. Scoli un relato dela Bìblia che te piaseria leder. Fà orassion domandando sapiensa par capir quel che te vè leder.

2. Stà atento quando te ledi la stòria. Va pin pianeto. Intanto che te ledi, dopera la to imaginassion. Proa pensar che te fè parte dela stòria: proa veder quel che l’è drio suceder, scoltar la voce dele persone, sentir el odor, sentir el gusto del magnar e cossita avanti. Daghe vita a quel che te sì drio leder!

3. Pénsaghe sora in quel che te ghè ledesto. Domandate:

● Parché che Geovà el ga metesto questa stòria nela so Parola?

● Che persone mi posso imitar? E quale che le ze un esémpio rugno?

● Che lession che mi posso imparar de quel che go ledesto?

● Cossa che questa stòria la me insegna sora Geovà e la maniera come che lu el fà le robe?

4. Fà una pìcola orassion a Geovà. Dighe a lu quel che te ghè imparà del stùdio e come che ti te vol méterlo in pràtica nela to vita. Ringràssia sempre a Geovà par el presente che el te ga dato che l’è la so Parola, la Sacra Bìblia!

[Stampa]

“La to parola la ze come una làmpada che la sciara ndove mi son drio caminar e come una luce che la slusa la me strada.” — Salmo 119:105.

[Quadro/Stampa nela pàgina]

Prima le robe pi importante

Te manchelo tempo par pregar parché te ghè tante robe da far? No gheto gnanca tempo par studiar la Bìblia? Questo el depende de quel che l’è pi importante par ti.

Proa far questo: Ciapa una sécia e meteghe rento sassi grandi. Dopo assa la sécia ben piena de areia. Adesso la sécia la ze piena de sassi e areia.

Adesso svoda la sécia e assa de banda i sassi e la areia. Dopo fà el contràrio: impienissi la sécia con areia e dopo meti rento i sassi. No ghen’è pi posto? L’è che adesso te ghè metesto prima la areia.

Cossa che ghemo imparà de questo? La Bìblia la dise: “Che sìpie sicuri de quale che le ze le robe pi importante.” (Filipensi 1:10) Se ti te meti in primo posto ntela to vita le robe pìcole, come la diversion, no te gavarè tempo par le robe pi importante, o sia, le robe spirituai. Ma se ti te fè come che dise el consìlio dela Bìblia, te ndarè veder che te ghè tempo par le robe de Dio e anca par divertirte. L’è sol saver cossa che ghemo de meter prima nela sécia!

[Stampa nela pàgina]

Come una pianta nte un vaso, la amicìssia con Dio la ga de esser coltivada par vegner su