El Èden l’è stà el primo posto de star dele persone?

Proa imaginarte nte un grando e bel giardin. Te resti tranquilo e in pace parché no te senti el bordel che ghen’è ntele grande cità. Meio ancora, no te ghè pensieri, malatie e gnanca un mal nel to corpo. Te sì gióveno e te sì bon de far tuto: snasar, tastar, vardar e tocar. Te godi tuto quel che ghen’è intorno a ti in questo bel posto.

Te resti tanto contento de veder i colori dei fiori, la rèscia del sol che slusa nela àqua pura del rio e tuti i tipi de piante de diversi colori verdi. Te vien la pel d’oca col frescheto del vento nel to corpo e el bon profumo che vien dele piante. Te senti le foie che se move, la àqua nel rio, i oseleti che canta e i bisseti che i zola. Quando te pensi nte un posto cossita, no te vien voia de esser là?

In tuto el mondo, tanti i crede che le prime persone le ze state creade nte un posto cossita. Par tanto tempo, quei che i fà parte del giudaìsmo, del islamismo e quei che i crede in Cristo i ga imparà sora el giardin del Èden, el posto ndove Dio el ga creà Adon e Eva. La Bìblia la dise che questo casal el vivea tranquilo e felice. Lori i era in pace intrà de lori e cole bèstie e i gavea una bela amicìssia con Dio, che l’è stà tanto bondoso e ghe ga dato la speransa de viver par sempre in quel bel posto. — Génesi 2:15-24.

La religion indu la insegna che una volta ghen’era un paradiso. Quei dela religion budista i crede che i so lìderi religiosi, ciamadi de Buda, i ze vegnesti fora nele èpoche che el mondo l’era come un paradiso. E diverse religion dela Àfrica le conta stòrie che le ze come quela de Adon e Eva.

In quasi tute le religion e le tradission, le persone le crede che ghen’era un paradiso nel scomìnsio del mondo. Un scritor el ga dito: “Tanti pòpoli i credea che ghen’era un paradiso nel scomìnsio che l’era perfeto, con libertà, pace, felicità, pien de magnar par tuti e che no ghen’era guere, violensa e nissuni i se sentia minassadi. . . . Questa idea la ga fato tante persone gaver la medèsima voia de esser in questo paradiso che ghen’era una volta e ndar in serca de una maniera de gaverlo nantra volta.”

Parché che tante persone le crede nela medèsima roba? Sarà che lore le se ricorda de qualcossa che ga pròpio sucedesto? Sarà che ghen’era pròpio Adon, Eva e anca el giardin del Èden?

Arquanti i ride drio quando se parla de questa idea. Altri i crede che el paradiso l’è sol una storieta. Ma, tanti de questi i ze lìderi religiosi che influensia le persone a no creder nel giardin del Èden. Lori i dise che mai ghen’è stà un posto cossita. Anca i dise che, quando la Bìblia la parla del giardin del Èden, la ze sol drio contar una stòria, una fròtola, una ilustrassion o un esémpio.

Nela Bìblia ghen’è tante ilustrassion e Gesù el ga contà tante de queste. Magari, la Bìblia no la parla del giardin del Èden come se fusse una storieta ma come qualcossa che l’è fàcile de capir e che ga pròpio sucedesto. Pensaghe sora: se quel che l’è stà scrito sora el giardin del Èden mai ga sucedesto, sarà che podemo pròpio fidarse nele altre parte dela Bìblia? Ndemo veder parché arquanti no i crede mia nela stòria del giardin del Èden e se lori i ga rason par no creder. Dopo, vedemo parché l’è importante studiar sora questo.

Ghen’era pròpio un giardin del Èden?

COGNÓSSITO la stòria de Adon e Eva, e del giardin del Èden? Tante persone in tuto el mondo le cognosse. Cossa càtito de leder questa stòria nela Bìblia? La ze scrita in Génesi 1:26–3:24. In poche parole, la dise cossita:

Geovà Dioa el ga fato el omo dela polver dela tera, el ghe ga dato el nome de Adon e lo ga metesto nte un giardin nte un posto ciamà de Èden. L’era stà Dio che el gavea fato quel giardin ndove ghen’era tanta àqua e tante piante che le dea boni fruti. In meso de questo giardin ghen’era “la pianta dela cognossensa del ben e del mal”. Dio el ga proibio el omo de magnar el fruto de quela pianta e el ga dito che el omo el ndaria morir se el fusse desobediente. Un giorno, Geovà Dio el ga ciapà una costela de Adon par crear Eva, la prima dona. Dio el ghe ga dito che lori i gavaria de tender de quel giardin, gaver tanti fioi e impienir la Tera.

Intanto che Eva la era ela sola, una bissa la ga influensada. Quela bissa la ga dito che Eva la podea magnar del fruto proibio, che Dio el gavea dito una busia e no’l volea darghe una roba bona, o sia, che ela la deventesse come Lu. Ela la ga desobedio e la ga magnà del fruto proibio. Dopo, anca Adon el ga desobedio a Dio. Alora, Geovà el ga dito el castigo che Adon, Eva e la bissa i gavaria. Dopo el casal l’è stà parà via del giardin e i àngeli no i ga assà che nissuni i ndesse rento el giardin nantra volta.

Nel passà, quei che i studiea la Bìblia e la stòria i disea che quel che l’è scrito nel libro de Génesi l’è vera e che el ga pròpio sucedesto. Ma ancoi, ghen’è tanti che no i crede mia in questa stòria dela Bìblia. Ma parché che le persone no le crede mia in quel che ga sucedesto con Adon, Eva e el giardin del Èden? Vedemo quatro rason.

1. Ghen’era pròpio un giardin del Èden?

Fursi tante persone no le crede in questo par causa dela filosofia. Par tanti ani, i teòloghi i credea che ancora ghen’era el giardin del Èden in qualche posto. Ma tante persone che le credea in Cristo le ze state influensade par le idee dei filòsofi dela Grèssia, come Platon e Aristòtele. Lori i disea che sol nel cielo se podaria catar qualcossa perfeta e nò qua ntela Tera. Alora, i teòloghi i ga scominsià a creder che el paradiso el gavaria de esser nte un posto darente el cielo.b Arquanti i disea che el giardin l’era su nte un monte pròpio alto, un pochetin sora el nostro pianeta, ndove l’è tuto rovinà. Ghen’era altri che i credea che el paradiso el fusse nel Polo Nort o nel Polo Sud. Ancora altri i catea che el giardin el fusse ntela luna o là darente. Cossita, ghen’è tanti che i pensa che questa stòria del giardin del Èden la ze sol una fròtola. Nei di de ancoi, tanti studiosi i dise che ndar in serca de saver el posto giusto ndove l’era el giardin del Èden l’è par gnente, parché mai ghen’è stà questo giardin.

Ma la Bìblia no la parla cossita del giardin del Èden. Nel libro de Génesi 2:8-14 ghen’è diversi detali. El giardin l’era nela banda leste de una region ciamada Èden. In questa region passea un rio pròpio grando e de questo rio vegnea fora altri quatro. Tuti questi rii i gavea un nome e la Bìblia la parla ndove che i passea. Questi detali i ga assà arquanti studiosi pròpio curiosi e tanti de lori i ze ndati in serca par veder se i catea el posto giusto ndove l’era questo giardin. Ma lori no i ze mai intesi sora questo. Alora, sarà che questo vol dir che tuti i detali del Èden, del giardin e dei rii i ze sol una busia?

Pénseghe sora: quel che ga sucedesto nel giardin del Èden l’è stà 6 mila ani indrio. Moisè el ga scrito sora queste robe e fursi lu el ga scrito quel che el gavea scoltà de altre persone o pol esser che el gàpie visto arquanti documenti che ghen’era in quel tempo. La stòria del Èden la era antiga quando Moisè la ga scrita, parché fea belche 2.500 ani che la gavea sucedesto. Sarà che in tuti questi ani la tera, i rii e le piante de quel posto i ga cambià? Quando la grosta dela tera la se move sucede teremoti. Intorno del posto ndove l’era el giardin del Èden sucede 17% dei teremoti pi grandi. Alora, savemo che la tera la ga cambià. Fursi, el Dilùvio dei giorni de Noè ga cambià la strutura dela Tera, cossita pol esser che ndove l’era piano adesso ghen’è montagne, ndove ghen’era montagne adesso l’è piano. Alora, no ghen’è come saver come l’era quela tera in quei ani.c

Adesso vedemo arquante robe che savemo sora el giardin. Génesi el assa ciaro che ghen’era pròpio el giardin del Èden. La stòria la parla de quatro rii che ghen’era nel giardin del Èden e due de questi ghen’è fin ancoi. I posti ndove el rio Eufrate e el rio Tigre, o Ìdechel, scomìnsia i ze pròpio darente un del altro. La stòria anca la ne fà saver i posti ndove i rii i passea e quel che ghen’era in quela region. Infati, tuti questi detali i era informassion ben cognosseste par le persone del Israel antigo, che le ze state le prime a leder questa stòria.

Podemo esser sicuri che, se la stòria del giardin del Èden la fusse sol una storieta, no ghen saria tanti detali cossita. Quando una stòria la ze falsa, le informassion importante le resta sempre sconte e cossita no ghen’è come saver se la ze vera o nò. Invesse, quando una stòria la ga pròpio sucedesto la ga tanti detali importanti, come vedemo nela stòria del giardin del Èden.

2. Se pol pròpio creder che Dio el ga fato Adon dela polver e Eva de una dele so costele?

La siensa la dise che nel nostro corpo ghen’è idrogénio, carbono e ossigénio, elementi che se pol catar anca nela tera. Come che questi elementi insieme i deventa una creatura viva?

Sientisti i dise che la vita la ze vegnesta fora del gnente. Lori i dise che la vita la ga scominsià de creature pròpio sémplisse e che dopo de milioni de ani le ze deventade creature complete. Ma, fin una pìcola creatura che no se pol veder e che la ze fata sol de una sèlula, la ze completa e la ze bona de far tante robe. Alora, no ghen’è gnanca una prova che mostra che la vita la ze vegnesta fora del gnente. Invesse, tute le creature che le ze vive ancoi le prova che una persona tanto pi sàbia la ga creà tuto questo.d— Romani 1:20.

Se te vedessi un grupo che el sona istrumenti insieme, una bela pintura o un aparelio eletrónico moderno diserìssito che nissuni li ga fati? Sicuro che nò! Ma queste robe le ze sémplisse se femo una comparassion cola belessa e cola capassità del corpo de una persona. Alora, sarà che nissuni ne ga creà? El libro de Génesi spiega che sol le persone le ze state creade ala imàgine de Dio. (Génesi 1:26) Par quela, sol lore le ga la voia de crear tecnologia e le ze bone de mostrar i so sentimenti par esémpio, par meso dela mùsica e bei ritrati. Sarà che l’è fadiga de creder che Dio l’è bon de crear qualcossa ancora meio che noantri?

Càtito che saria fadiga par Dio crear la dona doperando la costela del omo?e Dio el podaria gaver fato la dona de nantra maniera. Ma, Lu el ga scoliesto farla cossita parché questo volea dir una roba tanto importante. Lu el volea che el omo e la dona i se maridesse e i fusse “una sol carne”. (Génesi 2:24) Sicuro che la forte relassion intrà un omo e la so dona e la maniera che lori i se giuta un al altro le assa ciaro che ghen’è un Creador tanto sàbio e amoroso.

Anca, quei che stùdia le sèlule i crede che tute le persone le ze vegneste de un sol omo e una sol dona. Alora, se pol creder pròpio in quel che l’è scrito in Génesi.

3. La pianta dela cognossensa e la pianta dela vita le par una fròtola.

El libro de Génesi no’l dise che queste piante le gavea qualche poder o le podea far miràcoli. Invesse, le era sol due piante che le rapresentea qualcossa, come Dio el ga dito.

Noantri anca femo questo. Par esémpio, nte un giulgamento, fursi el giuis el dà un aviso forte se qualchedun no’l ga rispeto al tribunal. Ma el giuis no’l fà questo parché la persona no la ga rispeto par le tole, le careghe e quel che ghen’è lì. Invesse, ela la ga de rispetar la lege e la autorità che el tribunal el rapresenta. Anca la corona e el setro i rapresenta la autorità che un rè el ga.

Alora, cossa che quele piante le rapresentea? Tanti i ga proà spiegar de maniere difarente. Ma la verità sora questo la ze sémplisse e importante. Prima, la pianta dela cognossensa del ben e del mal la rapresentea un dirito che sol Dio el ga, dir quel che l’è bon e quel che l’è el mal. (Geremia 10:23) Par quela, ciapar e magnar quel fruto l’era una roba tanto bruta. Secondo, la pianta dela vita la rapresentea un presente che sol Dio el pol dar, la vita eterna. — Romani 6:23.

4. Una bissa che la parla par che sìpia sol una storieta.

Se proemo capir la stòria de Génesi vardando sol questa parte dela Bìblia, no sarà mia fàcile capirla. Ma, con tuta la Bìblia, semo boni de capir pin pianeto questo grando mistero.

Chi che ga fato che quela bissa la parlesse? I israeliti i savea che qualchedun l’era drio doperar quela bissa. Lori i savea che una creatura spiritual la pol doperar una bèstia par far finta che la sìpia drio parlar. Par esémpio, ghen’è la stòria che Moisè el ga scrito sora Balaon. Dio el ga mandà un àngelo par far che la mula de Balaon la parlesse. — Nùmeri 22:26-31; 2 Piero 2:15, 16.

Le creature spirituai che le ze contra Dio, i demoni, anca le ga el poder de far miràcoli. Moisè el ga visto quando i sasserdoti del Egito i ga fato un miràcolo compagno a quel de Geovà, come par esémpio, far un baston deventar una bissa. Alora, l’è sicuro che el poder par far una roba de queste l’è vegnesto dei demoni. — Ésodo 7:8-12.

Moisè el ga anca scrito el libro de Giò. Questo libro el parla tante volte de Sàtana, che l’è el nemigo pi grando de Dio. Questo nemigo el ga parlà una busia e el ga dito che i servi de Dio no i saria mia fedeli a Lu. (Giò 1:6-11; 2:4, 5) Par che i israeliti i credea che Sàtana el ga doperà la bissa par imbroiar Eva e farla desobedir a Dio.

Sarà che l’era pròpio Sàtana che el ga fato quela bissa parlar? Pi tardi, Gesù el ga dito che Sàtana l’è un ‘busier e pare dela busia’. (Gioani 8:44) Alora, el “pare dela busia” l’è quel che el ga dito la prima busia, mia vera? E quel che la bissa la ga parlà a Eva, l’è stà la prima busia. Dio el gavea dito che, se lori i magnesse el fruto, i ndaria morir, ma la bissa la ga dito a Eva che l’era ‘sicuro che lori no i ndaria mia morir’. (Génesi 3:4) Infati, Gesù el savea che Sàtana el gavea doperà quela bissa parché el ga mostrà a Gioani nte una vision che Sàtana l’era quela “prima bissa”. — Apocalisse 1:1; 12:9.

Elo fadiga de creder che una creatura spiritual con tanto poder la saria bona de doperar una bissa e de far finta che la parlesse? Fin le persone, che le ga manco poder che i àngeli o i demoni, le ze bone de doperar un boneco e moverlo par far finta che el parla o doperar la tecnologia par crear robe che no le ze mia vera.

La prova pi ciara

No ghemo motivi par no creder nela stòria de Génesi. Invesse, ghen’è prove ciare che questo ga pròpio sucedesto.

Gesù Cristo l’è la “testimònia fedele e vera”. (Apocalisse 3:14) Lu l’era un omo perfeto, mai el ga dito una busia e no’l proea imbroiar le persone. Vanti del mondo esser stà creà e vanti de vegner ala Tera, Gesù el gavea belche vivesto nel cielo col so Pare, Geovà. (Gioani 17:5) Alora, lu l’era drio veder quando la vita nela Tera la ga scominsià e, par quela, podemo fidarse in lu. Cossa che Gesù el ga dito sora la stòria de Génesi?

Gesù el ga dito che ghen’era pròpio Adon e Eva. Lu l’era drio parlar de lori quando el ga dito che Geovà el vol che el matrimònio el sìpia sol intrà un omo e una dona. (Mateo 19:3-6) Gesù el saria un busier o el saria sbalià se no ghen fusse stà Adon, Eva e el giardin del Èden. Queste idee no le ze sbaliade, parché Gesù l’era nel cielo quando quela bruta roba la ga sucedesto nel giardin. Sarà che questa no la ze una prova ciara de che questa stòria la ze vera?

Se una persona no la crede in quel che l’è scrito nel libro de Génesi, no la gavarà fede in Gesù. Anca no la ndarà capir el messàgio dela Bìblia e le promesse che Dio el fà.

[Nota]

Parché che el Èden l’è importante par ti?

Tanti studiosi i dise che la Bìblia no la parla del giardin del Èden. Par esémpio, Paul Morris, che el insegna Studi Religiosi nte una università, el ga scrito che no ghen’è altri testi bìblichi che i parla sora el giardin del Èden. Altri “studiosi” anca i pensa cossita, ma questo l’è difarente dele prove che ghemo.

La Bìblia, invesse, la parla tanto sora Adon e Eva, la bissa e el giardin.a Tanti studiosi no i ga la idea giusta sora questo, ma ghen’è nantra roba che la ze ancora pedo. Quando i lìderi religiosi e arquante persone che stùdia la Bìblia i dise che la stòria del giardin del Èden la ze una busia, l’è come se i fusse contra tuta la Bìblia. Parché?

Par capir la Bìblia, ne ocore prima capir quel che ga sucedesto nel Èden. El ogetivo dela Parola de Dio l’è catar risposte ale domande pi importante che ghemo. Saver quel che ga sucedesto nel giardin del Èden ne giuta a catar queste risposte. Varda arquanti esempi.

● Parché che vegnemo veci e morimo? Se Adon e Eva i seitesse obedienti a Geovà lori ndaria viver par sempre. Ma se i fusse desobedienti e i ndesse contra quel che Dio el gavea dito lori ndaria morir. Alora, nel di che i ze stati desobedienti i ga scominsià a vegner veci fin che i ze morti. (Génesi 2:16, 17; 3:19) Adon e Eva no i era pi perfeti, par quela tuti i so fioi i saria pecadori e imperfeti. La Bìblia la dise: “L’è par quela che, par meso de un sol omo el pecato l’è vegnesto al mondo, e la morte par meso del pecato, cossita la morte la se ga spalià a tuti, parché tuti i gavea pecà.” — Romani 5:12.

● Parché che Dio el assa brute robe suceder? Nel giardin del Èden, Sàtana el ga dito che Geovà l’era un busier e no’l volea darghe quel che l’era bon ale so creature. (Génesi 3:3-5) Cossita lu l’è ndà contra el dirito che Geovà el ga de esser governante. Adon e Eva i ze restadi dela banda del Diaol, i volea dessider par lori stessi quel che l’era giusto e quel che l’era sbalià e i catea che no i gavea mia bisogno de Dio. Alora Geovà, che l’è pròpio giusto e sàbio, el savea che la meio maniera de risolver questo problema l’era assar che le persone le proesse comandarse come le volesse. Par quela, el mondo l’è influensà par el Diaol e l’è pien de brute robe. Cossita, pin pianeto la ze vegnesta fora una granda verità: sensa Dio le persone no le ze mia bone de comandarse. — Geremia 10:23.

● Cossa che Dio el vol par la Tera? Nel giardin del Èden, Geovà el ga mostrà come el volea che fusse tuta la Tera. Geovà el ga dito che Adon e Eva i gavaria de impienir la Tera coi so dissendenti e tenderla par assarla come Lu el volesse. (Génesi 1:28) Geovà el vol che la Tera la sìpia un paradiso. Lu anca el vol che i dissendenti de Adon e Eva i sìpia perfeti e unidi come una fameia. La pi granda parte dela Bìblia la parla come Dio el farà che la Tera la devente un paradiso.

● Parché che Gesù Cristo l’è vegnesto ala Tera? Dopo che Adon e Eva i se ga rebelà nel giardin del Èden, lori e tuti i so fioi i ze stati condanadi ala morte. Ma Dio l’è stà amoroso e el ne ga dato una speransa quando el ga mandà el so Fiol ala Tera come risgate. (Mateo 20:28) Cossa che questo vol dir? Gesù l’è stà el “ùltimo Adon” parché el ga fato quel che Adon el gavaria de ver fato. Difarente de lu, Gesù el ga seità perfeto parché l’è sempre stà obediente a Geovà. Alora, de volentiera, lu el ga dato la so vita come sacrifìssio, o risgate, par dar la oportunità a tute le persone fedele de esser perdonade dei so pecati e gaver la vita perfeta che Adon e Eva i gavea perso. (1 Corinti 15:22, 45; Gioani 3:16) Par causa de quel che Gesù el ga fato, l’è sicuro che Geovà el farà dela Tera un paradiso come el Èden.b

Quel che Dio el vol par le persone e par la Tera l’è una idea che tuti i pol capir. Cossita come l’era vera el giardin del Èden con persone e bèstie, anca la volontà de Dio la ze una verità. Se te vol, anca ti te podarà gaver questo bel futuro. Dio el vol che tute le persone le sìpie nel Paradiso, anca quele che ancora no le fà quel che l’è giusto. — 1 Timòteo 2:3, 4.

Quando l’era quasi drio morir, Gesù el ga parlà con un omo che gavea fato tanti sbali. Quel omo l’era pròpio un bandido e el savea che el meritea morir. Ma lu el ga parlà con Gesù in serca de consolo e speransa. Cossa che Gesù el ga fato? Lu el ga prometesto: “Te sarè con mi nel Paradiso.” (Luca 23:43) Se Gesù el vol che quel omo, che l’era un bandido, el viva nantra volta e el sìpia nel paradiso, sicuro che lu e Geovà i vol vederte anca a ti nte un bel paradiso compagno el Èden. Alora, se anca ti te vol questo bel futuro, sfòrsate par imparar ancora de pi sora el Dio che el ga creà el giardin del Èden.

[Nota]

[Quadro/Stampa]

LA PRINSIPAL PROFESSIA DELA BÌBLIA

“E mi farò che ti [la bissa] e la dona sìpie nemighi, e anca el to dissendente e el so dissendente. Lu el te schissarà la to testa, e ti te farè mal al so calcagno.” — Génesi 3:15.

Questa la ze la prima professia che Dio el ga fato nel Èden. Chi che i ze la dona, el dissendente dela dona, la bissa, e el dissendente dela bissa? Come che lori i ze deventadi “nemighi”?

LA BISSA

Sàtana, el Diaol. — Apocalisse 12:9.

LA DONA

La parte dela organisassion de Geovà nel cielo con creature spirituai. (Gàlati 4:26, 27) Isaia el ga parlà che una nassion spiritual la saria nassesta dela “dona”. — Isaia 54:1; 66:8.

EL DISSENDENTE DELA BISSA

Quei che i desside far la volontà de Sàtana. — Gioani 8:44.

EL DISSENDENTE DELA DONA

Gesù l’è parte prinsipal. Lu el vien dela parte dela organisassion de Geovà nel cielo. I fradei spirituai de Gesù, che i ndarà governar con lu nel cielo, anca i fà parte del “dissendente” dela dona. Questi fradei untadi i ze una nassion spiritual, “el Israel de Dio”. — Gàlati 3:16, 29; 6:16; Génesi 22:18.

TE FARÀ MAL AL SO CALCAGNO

Quando Gesù l’era nela Tera, Sàtana l’è stà bon de far che lu el fusse copà. Infati, l’è stà un bruto colpo, ma sol par un tempo, parché dopo Gesù l’è tornà a viver.

TE SCHISSARÀ LA TO TESTA

Gesù el ndarà finir fora con Sàtana par sempre. Ma vanti de questo, lu el ndarà finir fora con tuto el mal che el Diaol el ga scominsià a far nel Èden. — 1 Gioani 3:8; Apocalisse 20:10.

Par imparar de pi sora el assunto prinsipal dela Bìblia, varda la revista A Bíblia — Qual É a sua Mensagem?, che le Testimònie de Geovà le fà.

[Stampa]

Adon e Eva i ga patio le brute consequense del pecato