Publicassion par pareciarse par la Riunion Vivemo e Insegnemo

Idee par parlar sora la Bìblia

Tiago 1:13

Quando soto prova, che nissuni i diga: “Dio l’è drio provarme.” Parché par robe rugne Dio no’l pol esser provà, gnanca el prova nissuni.

1 Gioani 5:19

Savemo che semo vegnesti de Dio, ma tuto el mondo l’è soto el poder del Perverso.

2-8 DE MAIO

LESSION PRESSIOSE DELA BÌBLIA | 1 SAMUEL 27-29

“Cossa imparemo de Davi?”

Perspicaz vol. 1 pàg. 164 paràg. 8

Achis

Quando Davi l’era drio scampar via de Saul, lu l’è ndà due volte fin le tere del rè Achis. Nela prima volta, Achis el ga pensà che Davi el fusse un nemigo. Ma Davi el ga fato finta de esser mato, e cossita, el rè lo ga assà ndar via. (1 Sam. 21:10-15; Vedi la descrission del scomìnsio del Salmo 34 e del Salmo 56.) Nela seconda volta, Davi l’era insieme a 600 guerieri e le so fameie. El rè Achis el ga dito che lori gavaria de ndar de star a Ziclaghe, ndove i ze restadi par un ano e quatro mesi. In quela època, el rè el ga pensà che Davi e i so òmini i era drio atacar le cità de Giudà. Magari, lori i era drio ciavar i gesuriti, girziti e amalechiti. — 1 Sam. 27:1-12

Sentinela 03/21 pàg. 4 paràg. 8

Gióveno, cossa gheto de far par i altri fidarse de ti?

⁸ Anca se Davi l’era stà scoliesto come rè de Giudà, ghe ga tocà spetar tanto tempo vanti de esser rè. (1 Sam. 16:13; 2 Sam. 2:3, 4) Ma invesse de restar desanimà, lu el ga fato quel che el podea. Par esémpio, intanto che l’era sconto nela tera dei filistei, Davi el ndea contra i nemighi de Israel, e cossita, el ga protegesto le tere de Giudà. — 1 Sam. 27:1-12

Perspicaz vol. 2 pàg. 354 paràg. 6

Busia

La Bìblia la insegna che dir busie l’è sbalià. Ma no vol mia dir che ghemo de parlar tuto quel che savemo a quei che no i ga el dirito. Gesù el ga dito: “No sté darghe ai can quel che l’è santo, gnanca trar ai porchi le vostre pèrole, cossita lori no le peste coi so pié e i se gire par atacarve.” (Mat. 7:6) Arquante volte, Gesù no’l ga rispondesto domande gnanca el ga parlà tute le informassion parché fursi podaria causar un problema a qualchedun. — Mat. 15:1-6; 21:23-27; Gioani 7:3-10

Va in serca de lession pressiose dela Bìblia

Sentinela 01/01/10 pàg. 20 paràg. 5-6

Sarà che i morti i pol giutar i vivi?

Saul e Samuel i savea che Dio el gavea proibio i so servi de proar parlar con spìriti. Tempo indrio, Saul el gavea fin finio fora de Israel la pràtica del spiritismo. — Lev. 19:31

Pénsaghe sora. Se Samuel el fusse deventà un spìrito dopo dela morte, sarà che lu el ndaria contra le orientassion de Geovà par parlar con Saul? Geovà no’l volea mia parlar con Saul. Alora, sarà che una striona la podaria obrigar el Dio Tuto Poderoso a parlar con Saul, par meso de Samuel? Sicuro che nò! Cossita, savemo che quel “Samuel” no l’era mia el profeta de Geovà. Invesse, l’era un demònio rugno che el ga fato finta de esser Samuel.

9-15 DE MAIO

LESSION PRESSIOSE DELA BÌBLIA | 1 SAMUEL 30-31

“Va in serca de Geovà par gaver forsa”

Sentinela 01/08/06 pàg. 28 paràg. 12

Rispeta a Geovà e gàpia alegria!

¹² Davi el gavea grando rispeto par Geovà. Questo rispeto lo ga giutà tante volte a no far quel che l’era sbalià, a far bone dessision e anca a far quel che l’era giusto ancora che el fusse in brute situassion. Par un ano e quatro mesi, Davi e i so òmini i se ga sconto de Saul in Ziclaghe, la tera dei filistei. (1 Sam. 27:5-7) Una volta, intanto che Davi e so òmini i era fora dela cità, arquanti amalechiti i ze ndati là, i ga brusà la cità e i ga portà via le done, i fioi e le bèstie. Quando i ze tornadi e i ga visto quel che gavea sucedesto, i ze restadi tanto avelidi che i ga piandesto. Suito i òmini i ze restadi cativi e i ga volesto copar Davi a sassade. Ma, lu no’l se ga desesperà ancora che el fusse preocupà. (Pro. 24:10) Par causa del so grando rispeto par Dio, Davi l’è ndà in serca de Geovà par gaver forsa. Col aiuto de Dio, Davi e i so òmini i ze ndati drio i amalechiti e i ga ciapà tuto indrio. — 1 Sam. 30:1-20

Sentinela 15/04/12 pàg. 30 paràg. 14

Geovà el ne protege par la salvassion

¹⁴ Davi el ga passà par bruti colpi nela so vita. (1 Sam. 30:3-6) Quel che lu el ga scrito mostra che Geovà l’era atento ai so sentimenti. (Ledi Salmo 34:18; 56:8.) Dio l’è atento anca ai nostri sentimenti. Quando ghemo el “cuor pien de tristessa” o ‘semo desanimadi’, lu el ne giuta. Ma Geovà el fà de pi che sol veder el nostro sofrimento. Lu el ne dà consolo e el ne incoraia, par esémpio, par meso dele nostre riunion.

Va in serca de lession pressiose dela Bìblia

Sentinela 15/03/05 pàg. 24 paràg. 8

Punti interessanti del libro de Primo Samuel

Primo Samuel 30:23, 24. La dessision che Davi el ga fato la era de acordo con Nùmeri 31:27. Imparemo che Geovà el ghe dà tanto valor a quei che i laora par giutar nela congregassion. Par quela che ‘tute le robe che ndaremo far, ghemo de farle de tuto el cuor e tuta la nostra forsa. Ghemo de farle come par Geovà e nò par òmini’. — Col. 3:23

16-22 DE MAIO

LESSION PRESSIOSE DELA BÌBLIA | 2 SAMUEL 1-3

“Cossa imparemo dela cansion ‘El Arco’?”

Sentinela 15/06/00 pàg. 13 paràg. 9

Daghe onor a quei che i ga autorità

⁹ Dele volte, pol esser che una persona che la ga autorità la te trate mal, anca se no te ghè fato gnente contra ela. Te ga belche sucedesto questo? Davi el ga sofrio tanto par causa de Saul, ma no’l ga mai assà de mostrarghe rispeto. Invesse de restar contento quando Saul l’è morto, Davi el ga fato una cansion par mostrar che ghe ga despiasesto tanto. La cansion la disea che tuti i ghe volea ben a Saul e Gionatan, che lori i era pi svelti che una àghia e i era pi forti che i leoni, e che le fiole de Israel le gavea de piander par Saul. (2 Sam. 1:23, 24) Saul el ga tratà tanto mal a Davi. Ma Davi l’è stà un bel esémpio par noantri, parché lu el ga rispetà quel che Geovà el gavea scoliesto come rè.

Sentinela 15/04/12 pàg. 10 paràg. 8

Tradir l’è una bruta roba par Geovà!

⁸ Gionatan l’era el fiol pi vècio de Saul. Alora, lu el saria el pròssimo rè de Israel. Ma Geovà el gavea scoliesto Davi par esser rè, e Gionatan el ga rispetà questa scòlia. Lu no l’è restà geloso de Davi gnanca lo vedea come un nemigo. Invesse, el ga prometesto esser leal a lu. Cossita, ga scominsià una granda amicìssia intrà de lori. Gionatan el ghe ga mostrà onor come se el fusse de una fameia de rè quando el ghe ga dato a Davi le so robe, la so spada, el so arco e el so sinto. (1 Sam. 18:1-4) Gionatan lo ga incoraià e el ga fin riscià la vita par protegerlo de so pare Saul. Lu l’è stà leal e el ga dito a Davi: “Ti te sarè el rè de Israel, e mi sarò el secondo dopo de ti.” (1 Sam. 20:30-34; 23:16, 17) No l’è de farse maraveia che, dopo dela morte de Gionatan, Davi el ga fato una cansion par mostrar che l’era tanto triste e ghe volea tanto ben a lu. — 2 Sam. 1:17, 26

Va in serca de lession pressiose dela Bìblia

Perspicaz vol. 1 pàg. 1248 paràg. 1

Fradel

Pol esser ciamà de “fradel” qualchedun che el vol far le medèsime robe e che el ga i medèsimi ogetivi de quelaltro. Par esémpio, Iron che l’era rè de Tiro, el ga ciamà Salomon de so fradel parché lori due i era rè e anca parché i volea dar legno e altre robe che ghe volea par far su el témpio. (1 Rè 9:13; 5:1-12) Due persone le pol esser in pace e unide anca se no le ze dela medèsima fameia. Davi el ga scrito: “Vardé! Come l’è bon e come l’è agradàbile fradei viver insieme in union!” (Sal. 133:1) Davi el ga ciamà Gionatan de “me fradel” parché i gavea i medèsimi ogetivi e i se volea ben, nò parché i era dela medèsima fameia. — 2 Sam. 1:26

23-29 DE MAIO

LESSION PRESSIOSE DELA BÌBLIA | 2 SAMUEL 4-6

“No volemo mai disgustar Geovà”

Sentinela 15/05/05 pàg. 17 paràg. 8

Punti interessanti del libro de Secondo Samuel

Secondo Samuel 6:1-7. Davi el gavea una bona motivassion. Ma el ga fato una roba contra la lege de Dio. Lu el ga portà la arca nte una careta e cossita ga sucedesto una desgràssia. (Éso. 25:13, 14; Nùm. 4:15, 19; 7:7-9) Uzà el ga tegnesto la arca par no assarla cascar e de colpo l’è morto. Questo mostra che no basta sol gaver bone intension, ma bisogna obedir quel che Dio el dise.

Sentinela 01/02/05 pàg. 27 paràg. 20

Geovà sempre el fà quel che l’è giusto

²⁰ La arca la rapresentea la presensa de Geovà, e la Lege la disea che se qualchedun la tochesse sensa gaver el dirito el saria copà. (Nùm. 4:18-20; 7:89) Par quela, portar la arca sacra l’era una roba tanto importante. Uzà l’era un levita e la arca la ze restada nela casa de so pare par intorno de 70 ani. Alora, Uzà el cognossea la lege sora la arca de quando l’era picinin. (1 Sam. 6:20–7:1) Par quela, quando Davi el ga dessidio portar la arca a nantro posto, Uzà el savea che quel che el ga fato l’era sbalià.

Sentinela 01/02/05 pàg. 27 paràg. 21

Geovà sempre el fà quel che l’è giusto

²¹ Come ghemo visto, Geovà el vede quel che ghen’è nel nostro cuor. E la Bìblia la dise che Uzà no’l ga bio rispeto par Geovà. No la dise cossa che Uzà l’era drio pensar, ma pol esser che Geovà el ga visto che lu el gavea una motivassion sbaliada. Sarà che Uzà el gavea el costume de far quel che no’l gavea el dirito? (Pro. 11:2) La so fameia la gavea protegesto la arca. Sarà che lu el se catea meio dei altri parché l’era drio guidarla davanti de tuti? (Pro. 8:13) La arca sacra la rapresentea la presensa de Geovà. Ma sarà che Uzà no’l gavea fede che Geovà el saria bon de tegnerla par no assarla cascar? Ancora che no savemo ben cossa che ga sucedesto, semo sicuri che Geovà el ga fato quel che l’è giusto. Lu el ga visto qualcossa rugna nel cuor de Uzà e cossita el ga fato un giulgamento ben svelto. — Pro. 21:2

Va in serca de lession pressiose dela Bìblia

Sentinela 01/04/96 pàg. 29 paràg. 1

Buta la to carga sora Geovà

Quel che Davi el ga fato dopo dela morte de Uzà ne mostra che anca quei che i ga una forte amicìssia con Geovà i pol far robe sbaliade dopo de una provassion. Prima, Davi l’è restà cativo e dopo con paura. (2 Sam. 6:8, 9) In quela situassion, Davi el ga bio la oportunità de mostrar che se fidea in Geovà. Ma no lo ga fato parché el ga desobedio. Sarà che questo sucede anca con noantri? Sarà che quando desobedimo a Geovà e vien fora qualche problema, ghe demo la colpa a lu? — Pro. 19:3

30 DE MAIO–5 DE GIUGNO

LESSION PRESSIOSE DELA BÌBLIA | 2 SAMUEL 7-8

“Geovà el ga fato un acordo con Davi”

Sentinela 01/04/10 pàg. 20 paràg. 3

“El to Regno el durarà par sempre”

Dio el ga fato un acordo con Davi che dela so fameia vegnaria fora un rè che el seitaria a governar par sempre. Natan el ga parlà a Davi de questa promessa de Dio. Lu el ga dito che Davi, so casa e so regno i seitaria firme par sempre. — 2 Sam. 7:16

Sentinela 01/04/10 pàg. 20 paràg. 4

“El to Regno el durarà par sempre”

Gesù de Nazarè l’era dissendente de Davi. Vanti che Gesù el nassesse, un àngelo el ga dito: “Lu el sarà Rè sora la casa de Giacò par sempre, e el so Regno mai se finirà.” (Luc. 1:32, 33) Cossita, quel che Geovà el gavea prometesto a Davi ga sucedesto con Gesù. Gesù l’è rè parché Geovà el ga fato una promessa, nò parché le persone lo ga scoliesto. Par quela, lu el ga el dirito de governar par sempre. Bisogna tegner ben in mente che Geovà sempre el fà quel che el promete. — Isa. 55:10, 11

Sentinela 15/10/14 pàg. 10 paràg. 14

Gàpia forte fede nel Regno

¹⁴ Varda quel che Geovà el ga prometesto al rè Davi par meso del acordo che el ga fato con lu. (Ledi 2 Samuel 7:12, 16.) Intanto che Davi l’era rè in Gerusalen, Geovà ghe ga prometesto che el Messia el saria so dissendente. (Luc. 1:30-33) Par meso de Gesù, el governo de Davi el restarà firme par sempre. El governo del Messia mai el sarà disonesto e tuto quel che lu el farà durarà par sempre!

Va in serca de lession pressiose dela Bìblia

Perspicaz vol. 2 pàg. 1165 paràg. 1

Ùltimi giorni

Professia de Balaon. Vanti dei israeliti ndar rento la Tera Prometesta, el profeta Balaon el ga parlà con Balache, rè de Moabe. Lu el ga dito che nel futuro Israel ndaria contra el so pòpolo e che una “stela” la vegnaria de Giacò. Un rè el ndaria governar in Israel e el ndaria vinser i moabiti. (Nùm. 24:14-17) El rè Davi l’è stà la “stela” che el ga vinsesto i moabiti, come disea la professia. (2 Sam. 8:2) Quel che ga sucedesto con Davi mostra anca quel che Gesù el farà quando vinser i so nemighi come rè del Regno de Dio. — Isa. 9:7; Sal. 2:8, 9

6-12 DE GIUGNO

LESSION PRESSIOSE DELA BÌBLIA | 2 SAMUEL 9-10

“Davi el ga mostrà amor leal”

Sentinela 15/06/06 pàg. 14 paràg. 6

Te pol esser felice

Davi el ga scrito: “Felice l’è quel che mostra considerassion a quel che l’è poareto.” (Sal. 41:1, 2) Davi el ga mostrà amor a Mefibosete, che l’era el fiol desgrassià del so caro amigo Gionatan. Cossita, Davi el ga dato un bel esémpio de come ghemo de tratar quei che i ga pi dificoltà. — 2 Sam. 9:1-13

Sentinela 15/05/05 pàg. 17 paràg. 12

Punti interessanti del libro de Secondo Samuel

Secondo Samuel 9:1, 6, 7. Davi el ga fato quel che el ga prometesto. Anca noantri ghemo de sforsarse par far compagno.

Sentinela 15/02/02 pàg. 14 paràg. 10

Lori i ga infrontà le so dificoltà

¹⁰ Davi el ga dato a Mefibosete tute le tere che le era de Saul. Lu el ga scoliesto Ziba par tender dele tere. Davi anca el ga dito che sempre el ndaria tender de quel che Mefibosete el gavea de bisogno. (2 Sam. 9:6-10) Davi l’è stà bondoso e el ga dato consolo a Mefibosete. Cossita, lo ga giutà a darghene fora cola so situassion. Che bel esémpio! Anca noantri ghemo de sforsarse par sempre giutar quei che i ga dificoltà.

Va in serca de lession pressiose dela Bìblia

Perspicaz vol. 1 pàg. 291 paràg. 5

Barba

Intrà i israeliti e intrà tanti pòpoli del passà l’era costume assar la barba. Tanti che i adorea falsi dèi la taiea. Par quela, la lege che Dio el ga dato a Israel la proibia taiar i cavei intrà la récia e el òcio e anca la barba. (Lev. 19:27; 21:5) Alora, i òmini che i assesse la barba i saria consideradi de rispeto.

13-19 DE GIUGNO

LESSION PRESSIOSE DELA BÌBLIA | 2 SAMUEL 11-12

“No stà assar voie sbaliade controlarte”

Sentinela 06/21 pàg. 17 paràg. 10

Stà atento par no cascar nele tràpole de Sàtana!

¹⁰ Geovà el gavea dato tante robe a Davi. Par esémpio, lu l’era sior, l’era una persona importante e el gavea vinsesto tante guere. Ma, dopo de un tempo, el se ga desmentegà de quel che Geovà el ghe gavea dato. Lu no l’era pi contento con quel che el gavea e el volea ancora de pi. Anca che Davi el gavesse tante done, el ga scominsià a voler la dona de nantro omo. Questa dona la era Bate Seba e so omo l’era Uria, el itita. Davi el ga scominsià a pensar sol in lu stesso. Alora, lu el ga bio relassion sessual con Bate Seba, e la ze restada gràvida. Dopo de quel bruto pecato, Davi el ga mandà copar Uria. — 2 Sam. 11:2-15

Sentinela 09/19 pàg. 17 paràg. 15

Obedissi suito a Geovà

¹⁵ Davi l’era el rè e el gavea tanta autorità. Ma arquante volte, lu no’l ga mia doperà ben la so autorità, e cossita el ga fato bruti sbali. (2 Sam. 11:14, 15) Ma Davi l’era obediente a Geovà e el ga acetà la so dissiplina. Lu el parlea tuto quel che el sentia in orassion e el fea el so meio par meter in pràtica i consili de Geovà. — Sal. 51:1-4

Sentinela 06/18 pàg. 17 paràg. 7

Assa le lege e i prinsipi de Dio trenar la to cossiensa

⁷ La meio istrussion che podemo gaver la vien de Dio. Lu el ne insegna quando ledemo e pensemo sora i esempi dei so servi che catemo nela Bìblia. Par esémpio, pensa in quel che Davi el ga sentio dopo che el ga desobedio a Geovà e el ga fato relassion sessual con Bate Seba, che la era maridada con nantro omo. (2 Sam. 12:7-14) Intanto che te ledi la stòria de Davi, pensaghe sora queste domande: ‘Cossa che Davi el podaria gaver fato par no pecar con Bate Seba, e cossita no gaver tuti quei problemi? Se questo sucedesse con mi, sarà che mi gavaria forsa de scampar via come Giusepe? O sarà che mi ndaria far un bruto pecato come Davi?’ (Gén. 39:11-15) Pensar in situassion come queste ne giutarà a “odiar quel che l’è rugno”.

Va in serca de lession pressiose dela Bìblia

Perspicaz vol. 1 pàg. 653 paràg. 3

Davi

Geovà el ga giulgà el pecato de Davi. Ma lu el ghe ga mostrà misericòrdia par causa del acordo par el Regno che el gavea fato con lu. (2 Sam. 7:11-16) Nantro motivo l’è parché Davi el gavea mostrà misericòrdia tante volte. (1 Sam. 24:4-7; fà la comparassion con Tiago 2:13) Geovà anca el ga visto che Davi e Bate Seba i se gavea ciamà grami. (Sal. 51:1-4) Ancora cossita, par meso de Natan, Geovà el ga dito che lori i gavaria tanti problemi rento dela so casa par causa del so pecato. — 2 Sam. 12:1-12

20-26 DE GIUGNO

LESSION PRESSIOSE DELA BÌBLIA | 2 SAMUEL 13-14

“Amnon el pensea sol in lu stesso e el ga bio problemi”

Perspicaz vol. 1 pàg. 31 paràg. 7

Absalon

Amnon l’è stà copà. Tamar, so sorela de Absalon, la era tanto bela. Par quela Amnon, meso fradel de Absalon, el se ga passionà par ela. Un giorno, Amnon el ga fato finta de esser malà. Lu el ga mandà dirghe a Tamar che la vegnesse ala so casa par farghe de magnar. Alora, lu la ga violentada e la ga mandada via. El amor sbalià che Amnon el sentia par so sorela l’è deventà òdio.

Sentinela 09/17 pàg. 5 paràg. 11

Gàpia autocontrolo

¹¹ La Bìblia la parla de tante persone che no le ga controlà le so voie sessuai e le ga patio tanto par quel. Stùdia la stòria de Amnon e pensa nele brute consequense de far una dessision sbaliada. (2 Sam. 13:1, 2, 10-15, 28-32) I genitori i pol studiar coi so fioi nela adorassion in fameia questi esempi dela Bìblia. Cossita, i podarà giutarli a gaver sabedoria, autocontrolo e forsa par scampar via dele robe sbaliade.

Perspicaz vol. 1 pàg. 31 paràg. 10

Absalon

Due ani dopo, nela època de tosar la lana dele piégore, Absalon el ga fato una festa. Lu el ga convidà el rè Davi e so fioi. Ma Davi el ga dito che no’l podaria mia ndar. Alora, Absalon el ga seità domandarghe che el mandesse so fiol pi vècio, Amnon, nel so posto. (Pro. 10:18) Intanto che i era nela festa, Amnon l’era contento parché el gavea bevesto vin. Alora, Absalon el ga mandà che i so servi i copesse Amnon.

Va in serca de lession pressiose dela Bìblia

Despertai! 22/12/04 pàg. 8 paràg. 5 e pàg. 9 paràg. 1

El tipo de belessa che l’è pi importante

Absalon, un dei fioi de Davi, l’era tanto bel che tuti i lo lodea. Magari l’era un omo pròpio rugno che nissuni ghe volea ben. Absalon l’era mai contento con quel che el gavea. L’è ndà contra so pare Davi e el ga proà esser rè nel so posto. Absalon el ga fin violentà le concubine de so pare. Par quela, Geovà el se ga inrabià e lu l’è morto de una maniera pròpio bruta. — 2 Sam. 15:10-14; 16:13-22; 17:14; 18:9, 15

Absalon l’era pròpio schifoso. No ga giovà gnente esser bel parché l’era tanto orgolioso, no l’era mia leal e par quela, el ga bio brute consequense. Nela Bìblia, catemo tanti esempi de persone che le ga mostrà sabedoria e le era bona gente. No savemo se i era bei, parché el pi importante l’è che le gavea un bon cuor e bele qualità.

27 DE GIUGNO–3 DE LÙLIO

LESSION PRESSIOSE DELA BÌBLIA | 2 SAMUEL 15-17

“Absalon el se ga rebelà parché l’era orgolioso”

Perspicaz vol. 2 pàg. 692 paràg. 7

Coredori

Nel Oriente l’era costume che òmini i ndesse de carera davanti dela careta del rè par pareciar le robe vanti che lu el rivesse. Lori anca i anunsiea quando el rè l’era drio rivar e lo giutea in quel che lu el gavea de bisogno. (1 Sam. 8:11) Absalon e Adonia i volea ricever el onor come se i fusse rè, par quela i ga metesto 50 òmini par corer davanti dele so carete. Lori i se sprosiea dela so rebelion e i volea che le persone le catesse che tuto l’era drio ndar ben. — 2 Sam. 15:1; 1 Rè 1:5; vedi CORREDORES (BATEDORES).

Sentinela 15/07/12 pàg. 13 paràg. 5

Sirva al Dio de libertà

⁵ Absalon l’era un omo pròpio bel. Ma col tempo, l’è deventà una persona che la volea sempre de pi. Lu el ga volesto una roba che no’l gavea el dirito, governar nel posto de so pare. Absalon el ga scominsià a far finta de giutar i israeliti par farghe pensar che el se preocupea con lori. Lu el parlea mal de so pare parché el volea che i israeliti i pensesse che Davi el ghe fea de poco. — 2 Sam. 15:1-5

Perspicaz vol. 1 pàg. 1138 paràg. 1

Ebron

Dopo un tempo, Absalon, fiol de Davi, l’è tornà a Ebron. Lì la ga scominsià una rebelion contra el governo de so pare. (2 Sam. 15:7-10) Pol esser che Absalon el gàpia scoliesto questa cità parché lu l’era nassesto lì. Anca, Ebron la era una cità tanto importante parché una volta la era la capital de Giudà.

Va in serca de lession pressiose dela Bìblia

Sentinela 08/18 pàg. 6 paràg. 11

Seto pròpio de tuto quel che ga sucedesto?

¹¹ Varda cossa ga sucedesto intrà Davi e Mefibosete, neto de Saul. Davi l’è stà tanto bondoso e generoso con Mefibosete. Lu el ghe ga dato indrio tute le tere che le era de Saul. (2 Sam. 9:6, 7) Ma dopo un tempo, i ga parlà mal de Mefibosete a Davi. Invesse de veder se quel che lu el gavea sentio l’era pròpio giusto, Davi el ga ciapà indrio le tere che el gavea dato a Mefibosete. (2 Sam. 16:1-4) Quando el ga parlà con Mefibosete nantra volta, Davi el ga visto che el gavea sbalià. Alora, el ghe ga dato indrio parte dele so tere. (2 Sam. 19:24-29) Davi el ga credesto nte una roba che no la era mia vera. Se lu el fusse ndato in serca de saver se l’era pròpio cossita, lu no’l gavaria fato una ingiustìssia con Mefibosete. Se parlemo una informassion de qualchedun che no la ze mia tuto vera o no la ze ben ciara, podemo rovinar la so reputassion.