Janeiro

Nihiku nootepa ohakalaliha mweekumini mwa anamathelana, nihiku emmuyaraaya mwanaya oopatxera. Nnaamweera asitiithi awo emusivelaka vantxipale mwanaya owo, awo khenweherera weera mwaana owo avireleleke okhala mwaana mahiku ootheene. Wakhala weera eyo yaamweereya, asitiithi awo yaamuxupeya vantxipale. Moolikana niiyo, nnaamweera Yehova ahakalalaka vantxipale vaavo nimpatxeraahu oxuttera woohima sa yoowo, owo khontthuna weera nivireleleke okhala ntoko anamwane wa mukhalelo woomunepani mahiku ootheene. (1 Akor. 3:1) Opwaha mwa yeeyo, owo ontthuna weera nikhaleke akristu “òwunnuwa.” MBiblyani nuulumo na ekereku nintaphulela “wunnuwa” pooti otaphulela “olipa,” “omalela,” naari “wunnuwa woomalela.” (1 Akor. 2:6) Ntoko mwaana onvirelelaawe wunnuwa mpaka okhala mutthu mutokweene, hiyo tho nintthuneya ovirelela olipiha onthamwene ahu ni Yehova, napaka eyo nnookhala akristu oolipa. Mene nnaamweera nreene akristu oolipa, nintthuneya ovirelela wiilipihera weera nikhale akristu oolipa. — 1 Tim. 4:15. w24.04 epaax. 2 eparag. 1, 3

Wakhala weera mutthu ohookohani weera Yehova taani, mwaakela waakhula hayi? Apaale nyuwo mwammwaakhula weera, ‘Tiithi aka, Muluku aka ni Nthamwene aka.’ Nave-tho aakhala masina makina a nttittimiho a Yehova. Neereke nyuwo mootoko wuupuwela weera Yehova onnawaakhelani? Uulumaka woohima sa onthamwene ni Yehova, Davidi aamulikanxera Yehova ni mulipa oowaakhela aletto, ni arumeyi awe ntoko aletto. Davidi aakoha eeraka: “Yahvéh, ophwanenle tani ohaya mmukotthani mwanyu? Ophwanenle tani olekela vamwako vanyu vottela?” (Nsal. 15:1) Moorweela mwa eversu ela hiyo ninniiwexexa weera pooti okhala aletto mu ehema ya Yehova, naari neere, pooti okhala asinthamwene awe. Ahinaaye opattuxa itthu, Yehova aari meekhaawe. Mene moottharelana, owo aahimpattuxa Mwanawe oopatxera, waakhala ntoko, Yehova ntoko mulipa oowaakhela aletto aahinwopa muletto awe oopatxera mu ehema awe, ni aahakalala vantxipale mwaha woopaka eyo. Biblya onhima weera Mwana a Yehova ‘aari ohakalala wawe’ nave-tho Mwanawe ‘annahakalala woohihiyerereya.’ — Mir. 8:30. w24.06 epaax. 2 eparag. 1-3

Muupuwelele yooweereya ela. Davidi akhalakaru mwene a wIsraeli wootheene, atthu oophiyeraka 340.000 yaapwexeererana nuuwo. Atthu awo yaamala mahiku mararu ereene omwaako waattamela oHebroni, atthu awo yannahakalala, ni yannatthekula nave yanniipa itxipo sonvuwiha Yehova. (1 Sow. 12:40 [12:39, NM]) Eriyari ya atthu ale, aakhalavo mmiravo mmoha iitthaniwa Zadoki. Mene Yehova oheeriha weera hiyo nsuwele weera owo aari eriyari ele. (1 Sow. 12:23, 27-29 [12:22, 26-28, NM]) Zadoki aari namakeya aavara vamoha ni namakeya mutokweene Ebiyatari. Yehova aahinvaha Zadoki osuwela ni owera woowiiwexexa yootthuna awe. (2 Sam. 15:27) Owo aari mulopwana oolipa murima. Mahiku ala oomalihera, Satana onnapaka ele onweraawe weera aatuphele atthu a Yehova. (1 Ped. 5:8) Niwehereraka Yehova omunyaanya Satana ni elapo ela yoonanara, hiyo onnatthuneya okhala atthu oolipa murima. (Nsal. 31:25 [31:24, NM]) Napaka eyo hiyo nnootakiha mukhalelo wa olipa murima wa Zadoki. w24.07 epaax. 2 eparag. 1-3

Vaavo Yehova ampankaawe mulopwana ni muthiyana oopatxera, aatthuna weera ehakalaleke. Aahaavaha nipuro nooreera, yoovaha ya ntheli, ni muteko woohakalaliha. Awo yaamurowa waayara anamwane yaawo yaakela osareya elapo yootheene ni yaakela weeriha elapo ela okhala eparayiisu ntoko ejardim ya wEdeni. Owo aahaavaha nlamulo nimoha paahi nookhweya. Ni aahaaleela weera, wakhala weera khiyaarowa wiiwelela nlamulo nno emurukunuwelaka yoottheka aya eyo yanweeriha okhwa. Noosuwela etthu yeereñye. Munepa woohooneya yoowo wahaamusivela Muluku ni wahaasivela, waahiweeriha opaka yoottheka ele. Adamu ni Eva yaapaka etthu Satana aatthunaawe. Ehiyaka omuroromela Tiithi aya a nsivelo, yaattheka. Ntoko nisuwenlaahu, wohooneya weera masu a Yehova teekhaikhai. Ovinyera nihiku nne, awo yaapatxera oviriha maxupo ntoko: wuuluvala ni okhwipi waya yaakhwa. — Eph. 1:28, 29; 2:8, 9, 16-18; 3:1-6, 17-19, 24. w24.08 epaax. 3 eparag. 3

Yehova ni Mwanawe Yesu, entthuna weera nihakalaleke. Nsalmu 119:2, ohimme ha: “Òreriwa yale anasunka onamoona wa Muluku ni anamwàsa ni murima wothene.” Yesu, oororomeliha eeraka: “Òreriwa opwaha ti yale anìwa nsu na Muluku ni anakhapelela.” (Luka 11:28) Hiyo ninnahakalala mwaha wookhala atthu a Yehova emaara nimmusomaahu Biblya mahiku ootheene ni ovarihela muteko ele ninxutteraahu. (Yak. 1:22-25) Eyo ennamuhakalaliha Yehova. (Koh. 12:13) Vaavo ninvarihelaahu muteko ele ninsomaahu mBiblyani, ninnakhala oohakalala veemusini nave ninnalipiha onthamwene ni asinna. Opwaha mwa yeeyo, ninnasepa maxupo yaawo enaakhumelela atthu ehintthara malamulo a Yehova. Mweekhaikhai, hiyo ninnaakhulela ele mwene Davidi ohimmaawe. Vaavo aalepaawe etxipo awe ya malamulo, miruku ni othoriha wa Yehova, owo aamalinhe eeraka: “[Weettela] seiyo ti nlivo ntokotoko.” — Nsal. 19:8-12 [19:7-11, Tradução do Novo Mundo]. w24.09 epaax. 2 eparag. 1-3

Etthu heeni Yehova onoonaawe vaavo onaawehaawe arumeyi awe elapo ya vathi? Owo onnaweha ohakalala wahu ni maxupo ahu. (Nsal. 37:18) Emaara owo onnoonaawe niilipiheraka weera nimukokhoreleke mwa mukhalelo wooreerela nnaamweera nivirihaka maxupo, owo onnahakalala vantxipale! Mene ohiya paahi eyo, owo onnatthuna vantxipale onikhavihera ni onimaaliha. Yoolepa ya Nsalmu 147:3, enhima weera Yehova “onnatthuka makhwatta” a atthu erinono murima woovoreyeya. Eversu ela ennamuhima Yehova weera onnaakosoopa mwa nsivelo ale erinono maxupo a mmuupuweloni. Etthu heeni nintthuneyaahu opaka weera nttottele mureerelo okosoopa wa Yehova? Moone ntakihero nna. Meediku pooti omukhavihera mutthu ovola nikhwatta nawe. Weera attottele mureerelo, mutthu owo avulanle onnatthuneya otthara nnene sene miruku sa meediku owo. Yehova, moorweela mwa Biblya onnaaleela ale erino maxupo a mmuupuweloni, nave onnaavaha miruku sawe sa nsivelo. w24.10 epaax. 6 eparag. 1-2

Khalayi, irevista sahu saahithokorora etthu eneereya ni ale Yehova onaathorihaawe ntoko atthu oohixariya. Naahima weera, atthu khiyaanoono yooweherera ya ovinyerera muhoolo. Soolepa sintxipale sa mBiblyani sinnahima othoriha wa Yehova woohima sa atthu oohixariya ntoko, nummero noohisuwanyeya na atthu yaakhwiiye emaara ya Nowa, ni maloko 7 a elapo yoolaiheriwa vaavo Yehova aakhulenlaawe weera atthu awe etupheliwe, naari anakhotto oophiyeraka 185.000 a w’Asuri yaawo yiivinwe ni nlaika nimoha na Yehova ohiyu omoha. (Ola. 7:1-3; Yes. 37:36, 37) Mwa itthu sene seiya, neereke Biblya onnahima moowiiwanyeya weera Yehova ohaatoloxa atthu ala moomalela ehiwehereraka ovinyerera? Hooye. Mwaha wa heeni ninhimaahu eyo? Hiyo khanisuwenle moota Yehova omuthorinhaawe mutthu ori poothe; naari khanisuwenle waari weera atthu ale yaakhwiiye yaakhalano eparakha yooxuttera woohima sa Yehova ni ottharuwa. w24.05 epaax. 3 eparag. 5-7

Yesu aahima ntakihero na naamukhweli mmoha, yoowo anvekela mphuki weera amweerele exariya. Moohihovela, yooweereya ela yaahaavara murima atthareli antxipale a Yesu, mwaha wooweera etempu ele atthu antxipale yannathokororiwa moohixariya. (Luka 18:1-5) Yooweereya ela ennavareleya muteko mwaha wooweera mahiku ahu ala ninnathokororiwa moohixariya. Olelo-va, mulaponi woosareya nthalu, ovirikana mikhalelo, ni ohaaxiwa, tivawonto nihintikhinaahu wakhala weera ninnathokororiwa moohixariya. (Koh. 5:8) Etthu nihinwehereraahu, othokororiwa moohixariya ni munna naari murokora, menento eyo pooti weereya. Ekhaikhai weera asinna ni asirokora khaiyene anamavaanyiha a ekhaikhai. Mene mwaha wooweera awo toohimalela. Nto, ninnaxuttera itthu sintxipale ni moota Yesu oonelaawe ohixariya wa anamavaanyiha. Wakhala weera ninnaapixera murima anamavaanyiha yaawo ennithokorora moohixariya, tivootthuneya vantxipale waapixera murima asinna! w24.11 epaax. 2 eparag. 1-2

Etempu ya khalayi, epaawu yaari etthu yootepa otthuneya. (Eph. 14:18; Luka 4:4) Mweekhaikhai, yaari yootepa otthuneya mpaka ikwaha ikina Biblya onnavarihela muteko masu ooweera ‘epaawu’ atthunaka ohima eyootxa. (Math. 6:11; Mit. 20:7, enoota ya yoosoma) Nave-tho epaawu yaari yootepa otthuneya mwa miiriira miili sootepa osuweliwa sa Yesu. (Math. 16:9, 10) Ninnaphwanya soohimmwa iyo va Yohani ekapiitulu 6. Arummwa a Yesu emalihakaru muteko aya woolaleera, Yesu aahaakuxa awo mpaarkuni ephareya ya oGalileya weera yiitthuuwe. (Mar. 6:7, 30-32; Luka 9:10) Awo yaaphiya nipuro noomaaleleya na muttetthe wa oBetisaida, menento atthu antxipale yaaphiya. Yesu khaatthanwe, mooreera murima, owo aahiihiyera etempu weera aaxuttihe woohima sa Omwene wa Muluku ni waalamiha. Okhala weera wannaxekuwa, arummwa a Yesu yanniikoha moota heeni atthu ale yaarowaaya otxa, akina a yaawo pooti weeraka yaakuxa yootxa vakhaaniini, menento antxipale yaatthuneya orowa mmuttettheni weera yathume yootxa. — Math. 14:15. w24.12 epaax. 2 eparag. 1-2

Asitiithi ahu oopatxera Adamu ni Eva, yaari oomalela ni yaakhala eparayiisu yooreera. (Eph. 1:27; 2:7-9) Awo yaakhalano ekumi yoohakalaliha ni yoohimala. Mene muhoolo mwaya, itthu saatxentxa. Awo yaayeleela eparayiisu ni yooweherera ya okhalano ekumi yoohimala. Etthu heeni yaahiyenraaya anamwane aya? Biblya oneera: “Vanonto, ntoko mwaha wa mutthu mmosaru [Adamu] yottheka evolonwaya mwelaponi mumu ni mwaha wa yottheka okhwa tho, siso tho okhwa wòhàphiyera atthu othene, wona wi othene aya àttheka.” (Arom. 5:12) Etthu Adamu onihiyenraawe, ti yoottheka yeeyo enkumihera okhwa. Yoottheka nivanlaahu enoolikana ni yookopha etokweene yeeyo nihinweraahu oliva. (Nsal. 49:9 [49:8, Tradução do Novo Mundo]) Yesu oolikanxera yoottheka ni “sookopha.” (Math. 6:12; Luka 11:4) Emaara nintthekaahu onkhala ntoko nimmukophela Yehova. Nto hiyo onnatthuneya oliva yookopha eyo. Wakhala weera khaninliva yookopha eyo, eyo enhiya okhala paahi vaavo ninkhwaahu. — Arom. 6:7. w25.02 epaax. 2-3 eparag. 2-3

Eparakha wa hiyo waaleela atthu akina Omwene wa Muluku! Ni eparakha eyo khaiyene ya mutthu ori poothe. Mwa ntakihero, emaara Yesu aaraawe elapo ya vathi, owo khaakhulenle weera minepa soonanara suulumeke woohima sa Yesu. (Luka 4:41) Nave-tho olelo, mutthu ohaakunveene opatxera olaleya vamoha ni muloko wa Yehova, owo ontthuneya wiirehera wa eparakha eyo. Ni hiyo, ninnoonihera ovaha wahu mwiitti ni ottittimiha wahu olaleera, nivahaka onamoona ikwaha sootheene ninweraahu. Nave hiihaale ntoko Yesu, yootthunaahu ekhaleke waala mmiso wa Omwene vamurimani wa atthu ni waaxuttiha ekhaikhai. (Math. 13:3, 23; 1 Akor. 3:6) Ettharaka ntakihero na Yesu, mareherero a Yehova aapaka yootheene enweraaya weera yaakhavihere atthu osuwela nsina na Muluku. Aapaka eyo, envarelaka muteko Tradução do Novo Mundo da Bíblia Sagrada. Biblya ola onnaphwanyeya mwa muulumo empwaha 270. w24.04 epaax. 9 eparag. 8-9

Asinna oothela, ennahakalala mwaha wooweera mahiku ootheene ennapaka itthu sinoonihera weera ennaasivela amwaaraya. (1 Yoh. 3:18) Mulopwana oothela, pooti woonihera weera onnaasivela amwaarawe mwa itthu ikhaanini ntoko, ovarela ntata naya naari waakhupaarela mwa nsivelo. Naari owo pooti waalepela emensagem aweerelaka, “Mookinkhela” naari waakoha ha, “Nihiku nanyu nneetta hayi?” Nave ikwaha ikina, owo pooti woonihera nsivelo nawe aalepelaka masu ooreerela vakartawuni. Vaavo mulopwana oothela ompakaawe itthu iya, onnaattittimiha amwaarawe nave onnalipiha ntheli nawe. Mulopwana onaattittimiha amwaarawe, onnaamaaliha ni waalipiha. Mukhalelo mmoha woopaka eyo, ori waaxukurela mwaha wa itthu sootheene empakaaya weera emukhavihere. (Akol. 3:15) Vaavo mulopwana oothela onaattottopelaawe amwaarawe ni murima awe wootheene, eyo ennaavara murima. Awo enniisoona okhala oovareleleya, oosiveleya ni oottittimiheya. w25.01 epaax. 11 eparag. 15; epaax. 13 eparag. 16

Nsalmu 15 ommalihera ni yoolaihera ela: “Ole onèra siso khanrowa ottikinyeya khuluwi.” Va Davidi onnoonihera weera etthu etokweene emmweeriha Yehova onivekela itthu sintxipale. Yehova ontthuna weera hiyo nikhaleke oohakalala. Mwaha wa yeeyo emaara hiyo nimpakaahu itthu Yehova onnivekelaawe, ninnakhalano ekumi yooreera ni owo onnanikosoopa. Aletto a Yehova aakhalano itthu sootepa oreera enwehereraaya muhoolo. Ale oothanliwa enoorowa okhala “mapuro mantxipale” yaawo Yesu oreherenrawe wiirimu. (Yoh. 14:2) Ni ale erino yooweherera yookhala elapo ya vathi, ennaweherera okwanela wa Apokalise 21:3. Moohihovela, wa hiyo eparakha etokweene owompwa ni Yehova weera nikhale asinthamwene awe ni okhala aletto mu ehema awe mwa mahiku ootheene! — Nsal. 15:1-5. w24.06 epaax. 13 eparag. 19-20

Ovuwa ti heeni? MBiblyani masu ooweera “ovuwa” pooti otaphulela etthu eri poothe emmweeriha mutthu okhala ootikiniha. Yehova aahoonihera ovuwa wawe evirakaru etempu vakhaani vaavo muloko wa ana a Israeli waavuluxiwaaya wookaporoni wExipitu. Nkuupuwelani etthu ela: Ana a Israeli antxipale yaathukumana ohoolo wa omwaako Sinayi weera yaakumane ni Muluku aya. Nihutte nooriipa ninnakhuneela mwaako ole. Mootutuxera mwaako waapatxera ottikinyeya okhumaka mwiixi ni yaakhumelela etari ni okukutteya ni wanniiwanyeya onyakula vantxipale wa ebuzina. (Ott. 19:16-18; 24:17; Nsal. 68:9 [68:8, Tradução do Novo Mundo]) Nkuupuwelani moota ana a Israeli yaatikinihenyaaya vaavo Yehova oonihenraawe ovuwa wawe. Olelo, ninnanvaha ovuwa Yehova naaleelaka atthu akina woohima sa owera wawe wootikiniha ni mikhalelo sawe sooreera ni vaavo nnanvahaahu ovuwa mwaha wa itthu ninweraahu opaka nikhaviheriwaka nuuwo. — Yes. 26:12. w25.01 epaax. 2 eparag. 2-3

Emaara ana a Israeli yeettaaya eyaaka elapo yoolaiheriwa, asilopwana oowiisunnuwiha yannamuuluma Mose moohireerela ni muritti Yehova anvanhaawe. Awosa yanneera: “Muthukumano wothene [ohiya paahi Mose], anyi, atthu othene ari òttela ni Yahvéh ori variyari vaya.” (Nam. 16:1-3) Nnaamweera yaari ekhaikhai weera vamaithoni va Yehova “muthukumano wothene” waari wootteela, Yehova aamuthanla Mose weera aahooleleke atthu awe. Emaara yaamuulumaaya Mose moohireerela, atthu ale yaamuuluma Yehova. Awosa khiyaawehexexa etthu Yehova aatthunaawe, awo yaawehexexa etthu yaatthunaaya, okhala oowera ni amiruku. Yehova aahaanyaanya atthu ale yaamurukunuwela vamoha ni atthu antxipale yaawo yaakhavihera. (Nam. 16:30-35, 41, 49) Olelo hiyo pooti ororomelaka weera Yehova khonwaakhulela ale ehinttittimiha mareherero awe. w24.07 epaax. 11 eparag. 11

Ninkhala etempu yeeyo atthu antxipale ensepaaya ni envaanyaaya itthu Biblya onhimaawe woohima sa omala wa elapo ela yoonanara. (2 Ped. 3:3, 4) Nnaamweera sikhanleene itthu sintxipale nihisuwenlaahu, nintthuneya okhalano nroromelo noolipa weera etempu yooreerela elapo ela enoomala, ni weera Yehova onoorowa onikosoopa. Nave-tho nintthuneya olipiha nroromelo nahu wa atthu ale Yehova onaavarelaawe muteko weera enihooleleke olelo va, “kaporo oororomeleya ni a miruku.” (Math. 24:45) Vaavo maxupo matokweene enrowaaya opatxera, hiyo nnoorowa waakhelaka miruku soowiiwanyeya seiyo sinrowa okosoopa ekumi ahu. Vano, ela etempu weera nlipihe nroromelo nahu wa miruku nnaakhelaahu ni atthu ale enhoolela mareherero a Yehova. Hiyo khaninrowa owera otthara miruku ninrowaahu ovahiwaka mpuwa mwa maxupo matokweene wakhala weera viinaano va khanniiwelela. w24.09 epaax. 11 eparag. 11-12

Asitiithi akristu aasuwela weera nroromelo nahu wa Muluku khaiyene etthu mwaana onvalaawe. Moovira etempu, mwaana pooti wiipakelaka makoho ntoko ala: ‘Etthu heeni enkiroromeliha weera Muluku ookhala? Miyo kinnatthuneya ororomela etthu Biblya onhimaawe?’ Mweekhaikhai, Biblya onnanooperera weera ‘nivariheleke muupuwelo ahu’ weera “niwehexexe sothesene.” (Arom. 12:1; 1 Ates. 5:21) Nto moota heeni nyuwo munrowaanyu omukhavihera mwaninyu olipiha nroromelo nawe? Mmukhavihere mwaninyu woonelela mwaneene awe weera oophwanya ekhaikhai. Vaavo mwaninyu onoopakelaaweni makoho, muttotteleke mureerelo eparakha eyo weera mmoonihere moota woophwanya waakhuliwa avarihelaka muteko ikaruma sahu soothola-thola, ntoko Índice das Publicacões da Torre de Vigia ni Liivuru onaakhavihera anamoona a Yehova otholathola nyaha, nipuro nneera “Bíblia” owo pooti waasaasa “Inspirada por Deus” weera aphwanye itthu sinoonihera weera Biblya khaiyene paahi liivuru ooreera alempwale ni atthu. Opwaha mwa yeeyo, ti “nsu na Muluku.” — 1 Ates. 2:13. w24.12 epaax. 14-15 eparag. 4-5

Moota heeni asitokweene a mmulokoni enrowaaya omutakiha Yesu? Awo entthuneya waatxentxeriha ni waakhavihera asinna waahela mpuwa ale eri amiravo, weera ekhale oolikaneene okosoopa miritti sitokweene. Asitokweene a mmulokoni, khentthuneya owehereraka weera ale enaatxentxerihaaya ekhale oomalela. Awo entthuneya waavahaka miruku sa nsivelo weera amiravo awo esuwele itthu sintxipale nave yooneke otthuneya waya okhala oowiiyeviha, oororomeleya ni oolikaneene waakhavihera atthu akina. (1 Tim. 3:1; 1 Ped. 5:5) Yesu aahaavaha yoothanleliwa atthareli awe, ohiya paahi olaleya, mene-tho oxuttiha. Atthareli a Yesu pooti weeraka yoona weera khiyaawera okwanihera yoothanleliwa eyo. Menento Yesu annaroromela weera awo yaamurowa owera ovara muteko owo, ni owo aahaaleela ni nroromelo eeraka: “Ntoko Atithi ekirummaya miyo, siso miyo tho kinnorumani nyuwo.” — Yoh. 20:21. w24.10 epaax. 16 eparag. 15; epaax. 17 eparag. 17

Davidi aari mwene mutokweene. Nave-tho owo aari mulipa oowiipa, oolepa ipoesia, nakhotto ni mprofeti. Owo aaviriha sooweerera sintxipale. Mpuwa mwa iyaakha sintxipale, owo annamutthawa-tthawa mwene Sawuli yoowo aamukhalela nrima. Akhalakaru mwene, Davidi wannatthuneya otthawa weera akosoope ekumi awe mwaha wa mwanawe eeriwa Absaloni yoowo eerera omwiiyera omwene awe. Nnaamweera aaviriha maxupo ala ni opaka soottheka, Davidi aavirelela okhala oororomeleya wa Muluku ekumi awe yootheene. Yehova onnamuhima okhala “mulopwana a vamurimani [vawe].” Mwaha wa yeeyo ti wooreera otthara miruku sa Davidi! (1 Mam. 15:5) Mwa ntakihero, moone miruku Davidi anvanhaawe mwanawe yoowo aarowa omuranttela, Salomoni. Mmiravo ola aathanlinwe ni Yehova weera avirelele oreherera okokhorela weekhaikhai ni opaka etemplu weera akokhoreliwekemo Muluku. (1 Sow. 22:5) Salomoni aamurowa oviriha maxupo. Etthu heeni Davidi aamulenlaawe? Davidi amuleela mwanawe weera aamwiiwelenle Yehova, aamukhumela nnene mweekumini mwawe. — 1 Mam. 2:2, 3. w24.11 epaax. 10 eparag. 9-11

Mulopwana onaahasula amwaarawe weerutthuni ni moorweela mwa masu onuulumaawe, onnatthuneya opaka itthu weera areherere onthamwene awe ni Yehova ni amwaarawe. Yoopatxera, owo ontthuneya waakhulela weera ookhalano maxupo matokweene. Khiyaavo etthu eri yoovitheya ohoolo wa Yehova. (Nsal. 44:22 [44:21, NM]; Koh. 12:14; Aheb. 4:13) Yanaaveeli, owo ontthuneya ohiya waahasula amwaarawe ni ootxentxa mukhalelo awe. (Mir. 28:13) Yanaararu, owo ontthuneya ovekela nlevelelo wa amwaarawe ni wa Yehova. (Mit. 3:19) Owo ontthuneya onvekela Yehova weera anvahe ntthuno nootxentxa ni nikhavihero weera awereke owehexexa miyuupuwelo sawe, moota onuulumaawe ni soopaka sawe. (Nsal. 51:12-14 [51:10-12, NM]; 2 Akor. 10:5; Afil. 2:13) Yanaaxexe, owo ontthuneya opakaka itthu moovarihana ni mavekelo awe ni oxuttera osepa mikhalelo sootheene sa owali ni wuuluma moohireerela. (Nsal. 97:10) Yanaathanu, owo onnaasa nikhavihero na asitokweene ansivelo a mmulokoni. (Yak. 5:14-16) Yanaathanu namosa, owo onnampaka palanu onrowa omukhavihera osepa mukhalelo owo muhoolo. w25.01 epaax. 11 eparag. 14

Neereke nyuwo munnamusivela Yehova Muluku, yoowo oovanheni itthu sooreera ohela mpuwa ekumi? Neereke nyuwo munnatthuna omoonihera omusivela wanyu? Mukhalelo wooreera weera mpake eyo, ori wiivaherera wa yoowo ni woonihera eyo mpatisiwaka. Itthu iya, sinooweerihani nyuwo weerela eparte emusi ya Yehova. Yookhumelelaaya, Tiithi anyu ni nthamwene anyu, onoorowa oweettihani ni wookosoopani mwaha wooweera nyuwo munrowa okhala awawe. (Nsal. 73:24; Yes. 43:1, 2) Wiivaherera ni opatisiwa, onimoovahani-tho yooweherera ya okhalano ekumi yoohimala muhoolo. (1 Ped. 3:21) Yookhala etthu enwootxeelihani opatisiwa? Wakhala weera aani, nyuwo khamukhanle meekhaanyu. Atthu antxipale ohiya paahi nyuwo, yaatthuneya opaka matxentxo mwa makhalelo aya ni moota yuupuwelaaya weera ekhale oolikaneene opatisiwa. Vano awo ennanvarela Yehova moohakalala ni moororomeleya. w25.03 epaax. 2 eparag. 1-2

MBiblyani, soottheka imaara sintxipale sinnalikanxeriwa ni miritti soolemela. Mwene Davidi aahiiwanyeiha soottheka sawe mwa mukhalelo ola: “Sotakhala saka sòpwaha muru aka ni sòkiswanya ntoko muritti wolemela.” (Nsal. 38:5 [38:4, Tradução do Novo Mundo]) Mene Yehova onnalevelela soottheka sa atthu oonanara murima enttharuwa. (Nsal. 25:18; 32:5) Masu a eHeberi etaphulelinwe ntoko ‘nlevelelo’ entaphulela “weemexa” naari “oteexa.” Hiyo pooti omuupuwelela Yehova ntoko mutthu a ikuru, onteexa mwa nthoonyero muritti wa soottheka mmakhatani mwawe anrihela ottayi. Ntakihero nikina ninnoonihera moota Yehova onteexeraawe ottayi soottheka sahu. Nsalmu 103:12 ninnanleela neeraka: “Ntoko ohittó onarakamelaya otá, siso owo onnarakameliha ottai ni hiyo [soottheka] sahu.” Eparte ninkhumaaya nsuwa ti yoorakamelana ni eparte ninneelaaya. Iparte iya piili khasinkumanela. Ni masu makina, Yehova onnateexera ottayi soottheka sahu mwa mukhalelo hiyo nihinweraahu wuupuwelela. Ola mukhalelo woomaaliha wa moota Yehova oniiwanyeihaawe olevelela wawe! w25.02 epaax. 9 eparag. 5-6

Yesu atthikelakaru wiirimu, murummwa Pedru aapaka mwiiriira amulamihaka mulopwana mmoha aayarinwe oorakala ene. (Mit. 1:8, 9; 3:2, 6-8) Onooneya weera atthu antxipale yaatikhiniheya ni ele Pedru aapankaawe. (Mit. 3:11) Menento Pedru khaatthuna wiivuwiha mwaneene awe, nnaamweera owo aahuuwale elapo yeeyo atthu antxipale yiivuwihaaya. Pedru moowiiyeviha, aakhootta ovuwihiwa ni aahinvaha ovuwa wootheene Yehova ni Yesu, eeraka: “Vano ìwelelaka nsina na Yesu, mulopwana ola munamònanyu ni munamusuwelanyu, òlipihiwa niwoko na nsina nene nle.” (Mit. 3:12-16) Hiyo pooti otthara ntakihero na Pedru ni wunnuwihera wiiyeviha. Hiyo ninnaapakela itthu sooreera atthu akina mwaha wooweera ninnamusivela Yehova ni atthu, ohiya weera nintthuna ottottopeliwaka. Hiyo ninnoonihera weera ninniiyeviha mweekhaikhai vaavo nnanvarelaahu Yehova ni asinna moohakalala nnaamweera atthu akina ehoonaka wiilipihera wahu. — Math. 6:1-4. w25.03 epaax. 10-11 eparag. 11-12

Nsivelo nahu wa Yehova ni atthu ninnakhavihera waatxeerera ohakalala wahu mmutekoni moolaleera. (Math. 22:37-39) Nkuupuwelani moota Yehova onhakalalaawe vaavo onniwehaawe nivaraka muteko woolaleera ni moota atthu enhakalalaaya vaavo empatxeraaya omusoma Biblya! Muupuwele tho ovuluxiwa wa atthu ale enaakhulela mitthenka ninlaleyaahu. (Yoh. 6:40) Ankhanto wakhala weera nyuwo khamunwera okhuma owannyinyu? Wakhala weera eyo enimweereya, nwehexexeke etthu muntthuneyaanyu opaka weera moonihere nsivelo nanyu wa Yehova ni wa atthu. Mpuwa mwa eretta ya COVID-19, Samuel ni Dania khiyaawera okhuma owannyaya. Mpuwa mwa etempu ele yooxupa, awo yannalaleera envarihelaka muteko telefooni, elepaka ikaarta ni yannapakiha soosoma sa Biblya envarihelaka Zoom. Mwaha wa makhalelo aya, Samuel ni Dania khiyaawera opaka itthu ntoko yaapakaaya khalayi, mene nnaamweera vareene hiiho awo yannapaka ele yaaweraaya ni yannahakalala ni itthu saakhumelela mwaha wa wiilipihera waya. w24.04 epaax. 18 eparag. 15-16

Nnaamweera othela ehikhanle etthu etokweene enkumihera ohakalala, akristu antxipale oohithela, amiravo ni oowunnuwela, ennatthuna vantxipale omphwanya mutthu weera ethelaneno. Ekhaikhai weera nyuwo muhaakunve opatxera onamorari, muntthuneya okhalano itthu sa weerutthuni, soomunepani ni sa mmuupuweloni weera mukhale oolikaneene weera muthele naari otheliwa. (1 Akor. 7:36) Nave tho waamukhala wooreera osuwela etthu munaasaanyu wa mutthu owo muhaakunve opatxera onamorari. Wakhala weera khampanke etthu eyo, nyuwo pooti omukhootta mutthu ori oophwanelela wa nyuwo naari omwaakhulela mutthu ohikhanle oophwanelela wa nyuwo. Ekhaikhai ti yooweera, mutthu oophwanelela ontthuneya akhaleke mukristu oobatiziwa. (1 Akor. 7:39) Mene khaiyene mukristu ootheene obatizinwe onoorowa okhala oophwanelela weera muthelaneno. Nto waamureerela nyuwo wiipakela makoho ntoko ala: ‘Sooluluwanya heeni kiraakano mweekumini mwaka? Mikhalelo heeni kinoonaaka okhala sootepa otthuneya wa mutthu ole kintthunaaka othelanano? Mikhalelo saka tisooreerela?’ w24.05 epaax. 20 eparag. 1; epaax. 21 eparag. 3

Ntoko atthu ennamorari moota heeni nyuwo munrowaanyu owera oviriha maxupo ni ohiiwanana wakhala weera nyuwo ikwaha sintxipale munnanyakulihana? Neereke onoonihera weera onamorari wanyu khonkhumela nnene? Khaiyene ti yeeyo, atthu ootheene ennamorari ennakhalano maxupo. Ntheli noolipa ti naatthu eeli oovirikana envara vamoha ni envilelana. Vanonto moota nyuwo munvirihaanyu maxupo viinaano va ennoonihera wakhala weera ntheli nanyu nnookhumela nnene naari hooye. Ntoko atthu ennamorari, mwiikoheke ha: ‘Neereke nnoowera omaliha ohiiwanana moomaaleleya ni mwa nttittimiho? Ninnaakhulela soottheka ni ninneerera oreherera? Emaara nintthekelanaahu, ninnavekelana nlevelelo ni ninnalevelelana?’ (Aef. 4:31) Vanonto wakhala weera nyuwo khamunaakhulela ni munnanyakulihana veeli-veeli vaavo munnamoraraanyu, khamunrowa owera oreherera itthu iya mwathelana vale. Wakhala weera nyuwo mohoonelela weera mutthu owo khaiyene toophwanelela wa nyuwo, etthu yooreera opaka ori ooweeli nyuwo omaliha onamorari. w24.05 epaax. 29 eparag. 12

Wakhala weera ninnamwiiwelela Yehova mwa itthu sootheene nave ninnapaka soothanla moovarihana ni miruku sa mBiblyani, nnookhala ntakihero nooreera wa atthu akina. Vaavo nimmusomaahu Biblya ni olipiha nroromelo nahu wa Yehova, hiyo nnoorowa okhala oororomeleya wa Yehova ni malamulo awe. Hiyo khaninrowa ovoleeliwa ni sooxuttiha sa ethiru naari ni miyuupuwelo sihinvarihana ni ele Yehova onnixuttihaawe moorweela mBiblyani. (Aef. 4:14; Yak. 1:6-8) Ninnaakhavihera tho atthu akina yaawo enviriha maxupo ni sooweereriwa. (1 Ates. 3:2, 3) Asitokweene a mmulokoni entthuneya ekhalekeno mikhalelo sooreera, a miruku, oorehereya ni oowiiyeviha. Asitokweene tho ennaakhavihera atthu akina okhala oomaaleleya ni okhalano nroromelo noolipa ni Yehova mwaha ‘woovarexexa nsu noororomeleya.’ (Tito 1:9; 1 Tim. 3:1-3) Mwaha wa ntakihero naya, ni mwaha wa oxekura waya, asitokweene ennaakhavihera anamalaleera a mmulokoni woonelaka mithukumano voohihiyerereya, orowela muteko woolaleera ni opaka yoosoma aya ya omeekha. Emaara yeeyo asinna envirihaaya maxupo naari okhulumuwa, asitokweene ennawuupuxera otthuneya waya omuroromela Yehova ni owehexexa soolaihera sawe. w24.06 epaax. 31 eparag. 16-18

Mpuwa mwa muteko awe woolaleera, Yesu aahaaxuttiha atthu yaamwiiwelela woohima sa mukhalelo wa nlevelelo wa Tiithi awe. Nkoonani ntakihero na mwaana aakhumme vaate va apapawe. Mwaana ole aathanla okhalano ekumi yoohireera. Menento owo “àttantta othoiwa” ni aatthikela owaani. Apapawe yoonenle hayi? Yesu ohimme weera mwaana ole “nlelo [areene] ottaiwene, atith’awe yàmòna . . . , ni [emuthikireraka, yaamukhupaarela ni yampexari].” Mwaana ole, aatthuna waavekela apapawe weera akhale kaporo vaate vaya, menento apapawe yaamwiitthana “mwan’aka ola” ni yaamutthikihera nipuro nawe na veemusini. Apapawe yenre: “Ola àriheya, vano òphwanyeya tho.” (Luka 15:11-32) Vaavo Yesu aaraawe wiirimu ahinaaye owa elapo ya vathi, moohihovela, owo annaaweha Atiithi awe yaapixeraka murima vantxipale anamattheka antxipale yaattharuwa. Yesu ohoonihera mukhalelo wooreera ni woomaaliha wa Tiithi ahu a ikharari, Yehova! w24.08 epaax. 11 eparag. 11-12

Mukristu amiruku onnapaka ele onweraawe weera apake soothanla sooreera sinoonihera moota Yehova onuupuwelaawe. Mukristu ntoko owo, onnasuwela weera khiyaavo etthu yootepa otthuneya mweekumini mwawe opwaha onthamwene awe ni Yehova. Owo onnakhalano moonelo weeriyari-neeriyari woohima sa mwaneene, asuwelaka weera khasuwenle itthu sootheene. Nave-tho owo onnoonihera omuroromela wawe Muluku amwaattamelaka ikwaha sintxipale moorweela mwa nivekelo avekaka miruku. Nintthuneya ovirelela onvekela Yehova nihipwatthaka itthu ninweraahu opaka. Vaavo nintthunaahu opaka soothanla sootthuneya, ninvekeleke Yehova nivekaka miruku, nroromelaka weera owo oosuwela etthu yooreera wa hiyo. Hiyo ninnamuxukurela Yehova mwaha woonipaka mwa mukhalelo yoowo nnooniheraahu mikhalelo sawe. (Eph. 1:26) Ekhaikhai weera khaninwera omutakiha Yehova moomalela. — Yes. 55:9. w25.03 epaax. 11 eparag. 13; 13 eparag. 17-18

Musepeke waavaha mathowa atthu akina. Wakhala weera atthu akina khennixukurela naapakela etthu, hiyo pooti wiikoha ha: ‘Neereke awo mweekhaikhai toohixukurela, naari aroottiwala onxukurela?’ Pooti weera aakhala mathowa mantxipale enweeriha ohoonihera oxukurela. Akina pooti oxukurela vantxipale, mene onnaaxupa woonihera oxukurela waya iwo. Awo pooti woona wuuliha muru okhaviheriwa, otepaxa wene wakhala weera khalayi awo ti yaakhavihera atthu akina. Nihipwatthaka etthu, nsivelo nnooneeriha waavaha asinna ni ovirelela ohakalala mwaha woovaha. (Aef. 4:2) Mpixeke murima. Uulumaka woohima sa ovaha, mwene oosuwela Salomoni olempe ha: “Ovonyere mukatthe vasulú va mahini, niwoko evinrene mahiku mantxipale, onophwanya tho.” (Koh. 11:1) Ntoko enooniheraaya masu ala, atthu akina pooti onxukurela mwaha wa etthu nipankaahu, “evinrene mahiku mantxipale.” w24.09 epaax. 30 eparag. 18-19

Ikwaha ikina muloko onnaleeliwa weera munna oottaruxiwa. Yeereya eyo, hiyo pooti ovirelela wiiraana nuuwo, wakhala weera owo oottharuwa ni oohiya mukhalelo awe woonanara. Owo nlelo onneerela eparte ya muloko nave onnahaawela nikhavihero nenno ninvahiwa ni asinna. (Aheb. 10:24, 25) Menento eyo ti yoovirikana vantxipale ni mutthu enre okumihiwa mmulokoni. Hiyo ‘khanniipwexeerera’ ni mutthu owo ‘naari khanintxano vamoha.’ (1 Akor. 5:11) Neereke eyo entaphulela weera nnoorowa omusepaka moomalela? Hooye. Ekhaikhai weera hiyo, khaninkela wiiraana ni mutthu owo. Mene akristu pooti ovarihela muteko yoowuupuxera ya murima aya yootxentxerihiwa ni Biblya weera ethanle wakhala weera enonwopa mutthu okumihinwe mmulokoni, apaale mmusi aya naari mutthu aari nthamwene aya khalayi. w24.08 epaax. 30 eparag. 13-14