Abril

Weera nttottele mureerelo erutthu ni ephome ya Yesu, nintthuneya okhalano nroromelo wa yoowoopola. (Aef. 1:7) Atthu ale Yesu aawiitthannaawe okhala “iputtiputthi sikina” khenkhuura epaawu naari khenwura eviinyu vaavo ompakiwaaya muthukumano wa vayaakhani wa eyootxa ya Apwiya. (Yoh. 10:16) Menento, awo ennattottela mureerelo erutthu ni ephome ya Yesu Kristu. Ennapaka eyo yooniheraka ororomela waya mwiitti oraayano yoowoopola ya Yesu. (Yoh. 6:53) Moovirikana ni eyo, ale eneerela eparte ennoonihera weera aavahiwa nivarihano nnyowani ntoko atthu enweherera okhala mooMweneni mwa wiirimu. Nihipwatthaka wakhala weera nneerela eparte ya asinna oothanliwa, hiyo ontthuneya okhalano nroromelo weera nikhaleno ekumi yoohimala. w24.12 epaax. 13 eparag. 14, 16

Vaavo aapakaawe yootxa ya ohiyu ya Apwiya, Yesu aahaavaha arummwa awe epaawu ni aahaaleela weera yaathoonyera erutthu awe. Muhoolo mwaya owo aahaavaha eviinyu ni aahaaleela weera yaathoonyera ‘ephome ya nivarihano.’ (Mar. 14:22-25; Luka 22:20; 1 Akor. 11:24) Nivarihano nnyowani nimpakiwa “ni empa ya Israeli [oomunepani].” Yoowo onrowa okhala ‘Moomweneni mwa Muluku.’ (Aheb. 8:6, 10; 9:15) Vaavo aapakaawe yootxa ya ohiyu ya Apwiya, Yesu annawehexexa “muloko mukhani.” Ekhurupu eyo ekhaanini epatxenre ni arummwa oororomeleya yaawo yaari vamoha ni Yesu emaara aapakaawe yootxa ele. Atthu ene ti yaawo enrowa waakhela nipuro naya wiirimu vamoha ni Yesu. w24.12 epaax. 11 eparag. 9-10

Yesu aaveleeliwa, otthukiwa, oveehiwa, wootheriwa, othorihiwa ni mpaka ohasuliwa. Anakhotto yaamukuxera nipuro aarowaawe wiiviwa ni yaamukhomela vamwirini wa nihaaxero. Vaavo owo aavirihaawe ovoreya iwe moororomeleya, aakhala mutthu mukina aatepa woona ovoreya. Owo aari Yehova Muluku. Owo khaavarihenle muteko ikuru sawe soohimala, weera anvuluxe. Mwaha wa heeni? Mwaha wa etthu emoha, nsivelo. Mukuttho wa Yesu onnoonihera moota Yehova onoosivelaaweni nyuwo. Owo ohiilipihera vantxipale avilelaka ovoreya otokweene weera awoopoleni nyuwo mwa yoottheka ni okhwa. (1 Yoh. 4:9, 10) Aani, owo ontthuna omukhavihera mutthu ori poothe a hiyo owanano yoottheka ni owina! w24.08 epaax. 6 eparag. 13-14

Hiyo pooti wiiwexexa nnene sene moota Yehova onansivelaawe nthokororaka moota yoowoopola yaaraaya yooxupa wa owo. Satana anhima weera khaavo murumeyi a Muluku onrowa ovirelela okhala oororomeleya wa Yehova wakhala weera anooviriha maxupo. Weera avaanyihe eyo, Yehova ohaakhulela weera Yesu ahaawe ahaakunveene okhwa. (Yobi 2:1-5) Yehova annoona vaavo Yesu aavaanyihiwaawe ni ahooleli a ittiini yaawo yaari amwiittani awe, aamaniwaawe ni anakhotto ni mpaka aakhomeliwaawe vamwirini. Nave-tho Yehova aamoona Mwanawe oosiveleya akhwaaka moovoreya. (Math. 27:28-31, 39) Yehova aakhalano owera woomaliha ohaawa wa Mwanawe. (Math. 27:42, 43) Menento waakhanle weera Muluku ampaka eyo, khiyaarowa oliveliwa yoowoopola ni khanaarowa okhalano yooweherera. Mwa yeeyo, Yehova aahaakhulela weera Mwanawe ahaawe mpaka okhwa. w25.01 epaax. 22 eparag. 7

Aari 16 a Nisani 33 Kristu awiiyeene. Oohusera a Yesu yaaxupeya vantxipale nave yannoova. Eeli a yaawo yaahikhuma oYerusalemu erowaka wEmawusi. Mulopwana mmoha yahaamusuwelaaya aawaattamela ni aneetta ni yaawo. Oohusera ale yaamuleela oxupeya waya ni etthu yeereñye ni Yesu. Mulopwana ole aapatxera wuuluma naawo etthu yeeyo yaatxentxiye ekumi aya. “[Apatxeraka ni] Mose ni maprofeti othene,” owo aahaaleela weera Mesiya wannatthuneya ohaawa ni okhwa. Emaara alopwana ale araru yaaphiñyaaya wEmawusi, mulopwana ole yahaamusuwelaaya aahiisuwanyeiha weera aari Yesu aavinyererihinwe mookhwani! (Luka 24:13-35) Yesu aahiisoonihera imaara sintxipale wa atthareli awe mpuwa mwa mahiku awe 40 oomalihera valaponi. Mpuwa mwa etempu ene yeeyo, Yesu aahaalipiha atthareli awe yaawo yaari ooxupeya ni oowoova, ni awo yaahihakalala ni yaalipa murima weera elaleereke ni oxuttiha mitthenka sooreera woohima sa Omwene wa Muluku. w24.10 epaax. 12 eparag. 1-3

Mwaana ori ootheene moovira etempu, onninnuwa, mene wunnuwa woomunepani khoneereya meekhaaya. Mwa ntakihero, akristu a wAkorinto yaaxuttera ekhaikhai, yaabatiziwa, yaahaakhela munepa wootteela nave yaaxuttera itthu sintxipale ni murummwa Paulo. (Mit. 18:8-11) Mene antxipale a yaawo nnaamweera saavinre iyaakha sintxipale ebatizinweene, khiyaakhanle oolipa moomunepani. (1 Akor. 3:2) Onoorowa okhala wooxupa okhala mukristu oolipa moomunepani wakhala weera khanaanoono ntthuno noopaka eyo. “Masikini” yaawo ehintthuna orowa vahoolo, khenrowa okhala oolipa. (Mir. 1:22) Hiyo khanintthuna okhala ntoko atthu ale nnaamweera yunnunweene enaaweherera makholo aya weera yaaleele etthu yoopaka. Opwaha mwa yeeyo, hiyo nookhalano muritti woowunnuwa moomunepani ni ikwaha sootheene olipiha onthamwene ahu ni Yehova. Wakhala weera nyuwo munniilipihera weera mukhale mukristu oolipa moomunepani, munvekeleke Yehova weera oovaheeni ntthuno “ni tho opanka, ntoko ontthunaiye.” — Afil. 2:13. w24.04 epaax. 4 eparag. 9-10

Mukhalelo Yehova onaathorihaaweno atthu, ohoonihera moota oniisoonelaawe. (Ez. 33:11) Ekhaikhai ela yoomaaliha, ennanikhavihera osuwela weera Yehova khanaakuva waanyaanya atthu ootheene emaara emoha. Owo toomoriwa ikharari, ni onnoonihera ikharari iyo emaara yootheene. Eheeni nisuwenlaahu woohima sa aatthu ehinrowa ovinyererihiwa? Biblya paahi onvaha matakihero. Yesu ahimme weera Yuda Iskarioti khanrowa ovinyererihiwa. (Mar. 14:21; munwehe-tho Yohani 17:12 ni enoota ya yoosoma) Yuda moomaaleleya aahivara weera amurukunuwele Muluku vamoha ni Mwana awe. (Munwehe-tho Marko 3:29 ni enoota ya yoosoma) Moolikana ni eyo, Yesu aahimme weera ahooleli akina a ittiini yaawo yaamurukunuwela, yaamurowa okhwa ehikhanleno yooweherera ya ovinyererihiwa. (Math. 23:33; munwehe-tho Yohani 19:11 ni enoota ya yoosoma “mulopwana.”) Nave-tho murummwa Paulo aahima weera alipa oowootha khenrowa ovinyererihiwa. — Aheb. 6:4-8; 10:29. w24.05 epaax. 4 eparag. 10-11

Emaara nimmwaattamelaahu Yehova, Satana khonwera opaka etthu ennihooxa mahiku ootheene. (1 Yoh. 3:8) Mu elapo enyowani, Yehova onaavirelele waakosoopa asinthamwene awe oororomeleya ohiya paahi mwa soowoopiha soomunepani mene mookhwaani. (Apok. 21:4) Ekhaikhai weera eparakha etokweene okhala aletto mu ehema ya Yehova ni okhalano onthamwene woolipa ni owo, yoowo onrowa okhala wa mahiku ootheene. (Ez. 37:27) Mene wakhala weera hiyo aletto a Yehova, nintthuneya nikhaleke moota heeni? Wakhala weera mutthu ohoowopani owannyawe, nyuwo mwaamurowa otthunaka osuwela itthu mutthu owo onwehereraawe wa nyuwo weera mpake. Moolikana ni eyo, hiyo-tho onnatthuneya osuwela itthu Yehova ontthunaawe weera aletto awe epakeke. Nsivelo nahu ni Yehova ninnaneeriha opaka sootheene ninweraahu weera ‘nimuhakalalihe.’ (Akol. 1:10) Hiyo nintthuneya omutikhinaka Yehova ikwaha sootheene ni ohittuwalaka omutthu awe. Wuupuwela eyo onoonikhavihera osepa opaka etthu eri poothe ehimmusivela Yehova. Moohihovela, hiyo nintthuna “wetta mowiyeviha” ni Muluku ahu. — Mik. 6:8. w24.06 epaax. 4 eparag. 8-9

Yehova aahinvekela Abrahamu, onvaha mwanawe Isakhi ntoko mukuttho. Moohihovela Abrahamu aaxupeya ni etthu ele aavekelinwaawe opaka. Menento owo aahiireherera weera apake eyo. Mene vaavo Abrahamu aahalelaawe omwiiva mwanawe, Muluku aamukhoottihera. Nnaamweera vareene hiiho, ntakihero nna ninnaaxuttiha etthu yootthuneya atthu ootheene erino nroromelo. Yehova aamurowa okhala oolikaneene onvaha mwanawe ammusivelaawe ntoko mukuttho. Yehova annaasivela vantxipale atthu. (Eph. 22:1-18) Sivirakaru iyaakha sintxipale, nlamulo ana a Israeli yaavahinwaaya nannawooperera opaka mikuttho sintxipale weera sileveleliwe soottheka sa atthu a Muluku. (Ona. 4:27-29; 17:11) Mikuttho iyo, soonihera mukuttho mutokweene yoowo waarowa waavuluxa atthu moomalela wa yoottheka. Maprofeti a Muluku yaahuupuxeriwa wiiwanyeiha weera osuulu waalaiheriwe, Mwaana oothanleya a Muluku, aamurowa ohaawa ni okhwa. weera aavuluxe atthu ootheene wa yoottheka ni okhwa woohelani mpuwa nyuwo! — Yes. 53:1-12. w24.08 epaax. 4 eparag. 7-8

Emaara mummusomaanyu Biblya, muhihiye waasaasera mikhalelo sa ovarela muteko ele munsomaanyu. Vaavo munsomaanyu eparte emoha ya mBiblyani, mwiikoheke ha, ‘Moota heeni kinrowaaka ovarihela muteko miruku iya viinaano ni muhoolo?’ Mwa ntakihero, pooti weeraka yoosoma anyu ya Biblya emmuhela mpuwa 1 Atesalonika 5:17, 18. Mwasoma vale iversu iya piili, nyuwo pooti weemela ni wuupuwela imaara ikavi ni moota heeni mumpakaanyu mavekelo. Opwaha mwa yeeyo, nyuwo pooti wuupuwelela itthu munxukurelaanyu. Apaale nyuwo pooti othanla itthu iraru munrowaanyu omuxukurela Yehova vaavo mumpakaanyu mavekelo. Nnaamweera nvirihaka etempu vakhaani mphimelelaka ele munsomaanyu, noovira etempu, nyuwo munookhala mutthu oowiiwa ni ooweettela masu a Muluku. Nkuupuwelani moota munrowaanyu ottottela mureerelo mpakaka eyo mahiku ootheene ni iparte ikina sa mBiblyani munsomaanyu! Aani, nyuwo munookhala mutthu oovarela muteko masu a Muluku. w24.09 epaax. 4-5 eparag. 9-10

Yehova oonipattuxa ni mukhalelo woothanleya. Nnaamweera onisivelaka ovahiwa, ninnahakalala otepaxa wene vaavo nnaavahaahu atthu akina. Ninnahakalala vaavo ninweraahu waakhavihera asinna. Nave ninnahakalala vaavo awo ennixukurelaaya. Menento nnaamweera mutthu ninvanhaahu ooniheraka oxukurela naari hoye, nintthuneya ohakalala mwaha woopaka etthu yooreera. Muhittuwale weera itthu sootheene munvahaanyu, ‘Yehova onoowera woovahani opwaha seiyo.’ (2 Sow. 25:9) Hiyo khaninwera ovaha ompwaha Yehova! Ni etthu enniphwanyiha ohakalala, otthuveliwa ni Yehova. Mwa yeeyo nikhale oolikaneene, ovirelela omutakiha Tiithi ahu a wiirimu yoowo ori oovaha. w24.09 epaax. 31 eparag. 20-21

Yehova toomoriwa ikharari ni oopixa murima. (Nsal. 103:13; Yes. 49:15) Owo onniihela nipuro nahu, ni vaavo hiyo ninxupeyaahu owo-tho onnaxupeya. (Zak. 2:12 [2:8, NM]) Owo onnakhweihera weera niwere omwaattamela ntoko nthamwene awe. (Nsal. 25:14; Mit. 17:27) Owo toowiiyeviha; owo “onùramela vathi, wera awehexexe sa wirimu ni sa elapo ya vathi, onnanvinxa muntthupini mulipa òthoiwa.” (Nsal. 113:6, 7) Moota heeni mutthu ahaarowaawe otthuna onvuwiha Muluku ahu mutokweene? Ninnanvuwiha Yehova mwaha wooweera nintthuna weera atthu akina emusuwele. Atthu antxipale khesuwenle ekhaikhai woohima sa Yehova. Mwaha wa heeni? Mwaha wooweera Satana oowala miyuupuwelo saya amwaramwaraka soowootha woohima sa Yehova. (2 Akor. 4:4) Satana onnaaroromeliha atthu weera Yehova toowali, khannipwattha, ni weera ti yoowo onkumihera maxupo mantxipale a mulaponi. Mene hiyo noosuwela ekhaikhai woohima sa Muluku ahu! Nookhalano eparakha yoomwaakiha ni onvuwiha. — Yes. 43:10. w25.01 epaax. 3 eparag. 6-7

Yesu mwaana a Muluku aari oomalela ni annapaka miriira sootikiniha. Mene nnaamweera vareene hiiho satana annaavarihela muteko atthu akina weera emwaramwareke soowootha woohima sa Yesu. Mwa ntakihero, ahooleli a ittiini yannaaleela atthu weera Yesu ‘oomola minepa soonanara mwa nsina na mutokweene a minepa soonanara.’ (Mar. 3:22) Vaavo Yesu aathorihiwaawe, ahooleli a ittiini yaamoothera Yesu weera owo anveeha Muluku ni yanneerera oweeriha atthu ovekela weera iiviwe. (Math. 27:20) Avinyaka vaavo atthareli a Yesu yaalaleeraaya mitthenka sooreera, amwiittani aya “yàtannya ni yànanariha mirima sa amalapo yìttanaka ni asinna.” (Mit 14:2, 19) A Sentinela a 1 a Dezembro a 1998 uulumaka woohima sa yoolepa ya Miteko 14:2, enre: “Ohiya paahi ohaakhulela mitthenka sooreera, anamavaanyiha aYuda, yanneeriha weera atthu ehaattittimiheke asinna yeerihaka weera atthu yaakhaleleke nthalu akristu.” Olelo va Satana nlelo “namotha a elapo yothene.” w24.04 epaax. 11 eparag. 15-16

Mene yooweherera ya mutthu ya muhoolo khenlipa vaavo mutthu onkhwaawe. Yehova Mphuki a xariya, owo onoorowa opaka soothanla mwa xariya. (Nsal. 33:4, 5) Hiyo nroromeleke weera “[Mphuki] a elapo yothene” onoopaka itthu mwa xariya. Nave-tho ti wa miruku ohima weera yooweherera ya mutthu ya muhoolo khenlipa ni mapuro mutthu owo onkhalaawe. Khiwaarowa okhala wa miruku Yehova waathoriha ntoko “ipuri” atthu antxipale yaawo enkhala mapuro yaawo yahaakhanlaayano eparakha yoowiiwa mitthenka sa Omwene. (Math. 25:46) Wakhala weera hiyo ninnaapwattha atthu awo, ankha Mphuki a exariya a elapo yootheene? Moohihovela, owo onnaapwatthaxa atthu awo. Hiyo khanisuwenle moota Yehova onrowaawe weettiha itthu mpuwa mwa maxupo matokweene. Pooti weeraka, atthu akina a yaawo enoorowa okhalano eparakha yooxuttera woohima sa Yehova, wunnuwihera nroromelo naya wa owo ni weemela ohoolo wa Yehova emaara yeeyo onrowaawe othoriha miloko sootheene. — Ez. 38:16. w24.05 epaax.12 eparag. 14-15

Hiyo ntoko atthu a Yehova ninnasiveliwa vantxipale okhaviherana mukina ni mukhwaawe. (2 Akor. 8:4) Mene, ikwaha ikina, ontthuneya okhala oolipa murima weera niwere opaka eyo. Mwa ntakihero, mpuwa mwa ekhotto, asitokweene a mmulokoni onnatthuneya waalipiha asinna a mmulokoni, yaavahaka nikhavihero noomunepani, apaale-tho enoorowa okosoopa soohaawela saya sa weerutthuni. Asitokweene a mmulokoni ennasivela iputtiputthi sa mmulokoni, mwaha wa yeeyo awo ari oolikaneene oviriha yoowoopiha eri poothe weera yaavahe nikhavihero asinna enhaawelaaya. Emaara enkhumelelaaya maxupo oowoopiha, ti wootthuneya vantxipale ovirelela okhala oowiiraana. Nave-tho ti wootthuneya otthara miruku sinkhuma oBetheli. (Aheb. 13:17) Asitokweene a mmulokoni ennatthuneya owuupuxera asinna moohihiyerera otthara miruku sa mareherero a Yehova voohima sa moota woowiireherera emaara sinkhumelelaaya irisa sa ephattu. (1 Akor. 14:33, 40) Mukhale oolipa murima mene oowikosoopa. (Mir. 22:3) Mpatxereke wuupuwela muhinaaye opaka etthu. Muhihiye ekumi anyu veerisani mwa itthu soohitthuneya. Mmuroromeleke Yehova. Yehova onimookhaviherani nyuwo waakhavihera asinna moovareleleya. w24.07 epaax. 4 eparag. 8; epaax. 5 eparag. 11

Mwene Davidi aamusuwela vantxipale Yehova ni annamuroromela yoowo. Emaara aatthara-tthariwaawe ni amwiittani awe omuhela mpuwa mwene Sawuli, Davidi aahinvekela Yehova nikhavihero. Vaavo Yehova aakhunlaawe nivekelo nawe ni aamukhavihenraawe, Davidi aaheera: “Yahvéh akhalé!” (Nsal. 18:47 [18:46, NM]) Etthu heeni Davidi aatthunaawe ohima ni masu ala? Ereferensiya emoha ehimme weera, Davidi uuluma moota aaroromelaawe weera Yehova “Muluku mmoha paahi a ekhaikhai ni ikwaha sootheene onnaakhavihera arumeyi awe.” Mwaha wa sookumanano sawe, Davidi annasuwela weera Yehova annamukosoopa ikwaha sootheene ni annaweha itthu aavirihaawe ni aari oolikaneene omukhavihera, tiyeeyo yaamukhavihenre Davidi ovirelela omukokhorela ni onvuwiha Yehova. (Nsal. 18:29, 30, 50 [18:28, 29, 49, NM]) Ororomela weera Yehova Muluku mukumi, etthu enrowa onikhavihera ovirelela onvarela mwa nthiti. Nave-tho enoorowa onivaha ikuru weera nivirihe yooweerera eri poothe, ni ovirelela opaka ele ninweraahu mmutekoni mwa Yehova ni ovirelela omwaattamela. w24.06 epaax. 20-21 eparag. 3-4

Eheeni ninxutteraahu ni masu murummwa Paulo aalepenlaawe Atesalonika? Emaara nniiwaahu etthu ehinvarihana ni etthu nixuttenraahu mBiblyani, naari wiiwa soohimmwa soowootha, hiyo nintthuneya okhala a miruku. União Soviética akhalayi, amwiittani ahu yaakumihera ekaarta yeeyo yaakhala ntoko yaakhuma oSede Mundial. Ekaarta eyo yaawooperera asinna weera epake muloko wookawanyeya weera yiihooleleke. Ekaarta ele yaakhala ntoko yeekhaikhai, mene asinna ale oororomeleya khiyaawokeñye. Asinna ale yaahoonelela weera itthu ekaarta ele yaahimaaya, khiyaavarihana ni etthu asinna ale yaaxuttihinwaaya. Olelo amwiittani ahu enniilipihera weera envariheleke tecnologia weera enihoveliheke naari onikawanya. Ohiya okhala atthu ‘oowaakuva otutuxiwa mmurimani mwahu’ hiyo ontthuneya wiikosoopa niwehexexaka wakhala weera etthu niiwalaahu naari nisommaahu ennavarihanna ni ikhaikhai nixuttenraahu. — 2 Ates. 2:2; 1 Yoh. 4:1. w24.07 epaax. 12 eparag. 14-15

Yoothanla etokweene mutthu ori poothe ontthuneyaawe opaka, yoothanla yoowiivaherera wa Yehova ni weerela eparte emusi awe emmukokhorela. Yehova ontthuna weera ootheene epake yoothanla eyo. Mwaha wa heeni? Owo ontthuna weera ekhaleno onthamwene nuuwo ni ekhaleno ekumi yoohimala. (Ola. 30:19, 20; Agal. 6:7, 8) Mene Yehova khammukhanyerera mutthu weera anvareleke. Owo onnamuhiya mutthu ori poothe othanla etthu onrowaawe opaka. Nankha wakhala weera mukristu oopatisiwa khantthara malamulo a Muluku apakaka yoottheka etokweene? Wakhala weera mutthu owo khanttharuwa, ontthuneya okumihiwa mmulokoni. (1 Akor. 5:13) Mene naari vareene hiiho, Yehova onnaweherera moopixa murima weera namattheka atthikele wa yoowo. Ohima ekhaikhai eyo etthu emweerinhe Yehova ovaha yoowoopola weera owereyeke anamattheka oleveleliwa soottheka saya. Muluku ahu ansivelo onnaaleela mwa nsivelo ale ampaka soottheka, ni onnawooperera weera ettharuwe. — Zak. 1:3; Arom. 2:4; Yak. 4:8. w24.08 epaax. 14 eparag. 1-2

Vaavo murummwa Yohani aalempaawe ekaarta awe ya naararu, atthu akina yannamwara-mwara sooxuttiha soowootha seiyo saakumihera okawanyeya. Menento akristu akina yaavirelela ‘weetta mweekhaikhaini.’ Awo yannamwiiwelela Yehova ni ‘yanneetta mwa mukhalelo onamusiveliha Muluku.’ (2 Yoh. 4, 6) Akristu ala oororomeleya, ohiya paahi yaamuhakalalinhe Yohani, nave-tho yaamuhakalaliha Yehova. (Mir. 27:11) Etthu heeni ninxutteraahu? Wiiwelela onnakumihera ohakalala. (1 Yoh. 5:3) Mwa ntakihero, ninnahakalala vaavo ninsuwelaahu weera ninnamuhakalaliha Yehova. Owo onnahakala vaavo onnoonaawe niwinaka sooweerera sa elapo ela ni naakhulelaka ekhaikhai. Nave-tho malaika wiirimu ennahakalala. (Luka 15:10) Hiyo-tho ninnahakalala vaavo nnaawehaahu asinna akina evirelelaka okhala oororomeleya. (2 Ates. 1:4) Vaavo elapo ela enrowaaya omala, nnoohakalala osuwela weera nohoonihera ororomeleya wahu wa Yehova nnaamweera naareene elapo yeeyo yaalamuleliwa ni Satana. w24.11 epaax. 12 eparag. 17-18

Munrowa oviriha itempu ikavi muhinaaye omoonihera mutthu owo weera moosiveliwa? Wakhala weera mohaakuva wuuluma ni mutthu owo, pooti woonihera weera munnatthimaka ephome. (Mir. 29:20) Mene-tho wakhala weera munoopisa vantxipale, pooti woonihera weera khimwaano ntthuno, otepaxa wene wakhala weera mutthu mukina ohoonelela weera moosiveliwa. (Koh. 11:4) Muupuwele weera muhinaaye wuulumano mutthu owo, khontthuneya ororomela weera munoothelana ni mutthu owo. Mene nyuwo muntthuneya ororomela weera muri oolikaneene weera muthele naari mutheliwe ni weera mutthu mukina toophwanelela wa nyuwo. Vanonto, nankha nyuwo moonelela weera mutthu mukina onnoosivelani? Wakhala weera nyuwo khamummusivela, moonihere eyo ni miteko sanyu. Khiwaarowa okhala wa xariya omweeriha mutthu mukina wuupuwela weera munnamutthuna, mene muhimutthunaka. — Aef. 4:25. w24.05 epaax. 22-23 eparag. 9-10

Pahiru akristu oothanliwa ni oororomeleya, enoorowa waakheliwa ni Yesu Moomweneni wa wiirimu. Akristu oothanliwa yaawo ehinvirelela okhala ooweha-weha mwa mukhalelo woomunepani, khenrowa othukumanyiwa vamoha ni yaale eri “òthanliwa.” (Math. 24:31) Mwa yeeyo, atthu ootheene a Muluku, ehipwatthaka yooweherera aya, entthuneya woona etthu enxutteraaya ni masu a Yesu weera evirelele okhala ooweha-weha ni oororomeleya. Hiyo noomusuwela nnene sene Yehova, mwaha wa yeeyo, ninnaroromela othoriha wawe. Hiyo khaninxupeya wakhala weera Yehova onnaathanla asinna oororomeleya mahiku ahu ala. Ninnuupuwelela ntakihero na Yesu woohima sa anamuteko a eviinya yaaphiñye ewoora ya oxekuwa. (Math. 20:1-16) Ale yaaphiñye oxekuwa, yaakhenle musurukhu woolikana ni ale yaapatxenre ophiya. Moolikana ni eyo, nihipwatthaka liini asinna enthanliwaaya, awo enoorowa waakhela yoohiyeriwa aya wiirimu yavirelela okhala oororomeleya. w24.09 epaax. 24 eparag. 15-17

Yesu oonihiyera ntakihero nootepa oreera na moota wooviriha ohixariya. Moone moota aathokororinwaawe moohixariya ni amusi awe vamoha ni atthu akina. Amusi awe oohiroromela yannahima weera Yesu aathatuwa anepa, anamahoolela a ittiini yannahima weera Yesu eettihiwa ni mademoniyu, ni anakhotto a oRoma yannanveeha, yannamuhasula mpaka yaahimwiiva mooriipiha murima. (Mar. 3:21, 22; 14:55; 15:16-20, 35-37) Menento, Yesu aavilela ohixariya wootheene, opwaha mwa yeeyo, owo khaatthikihera isukula. Etthu heeni ninxutteraahu ni ntakihero na Yesu? (1 Pedru 2:21-23) Yesu oonihiyera ntakihero noomalela weera ntthareke emaara yeeyo ninvirihaahu ohixariya. Owo annasuwela emaara yoomaala ni emaara yoowuuluma. (Math. 26:62-64) Owo khaakhula itthu sootheene ootheriwaawe. (Math. 11:19) Emaara uulumaawe, owo khaaveeha atthu yaamutthara-tthara naari khaawoopopiha. w24.11 epaax. 4-5 eparag. 9-10

Nkuupuwelani weera nyuwo monvaha mutthu yoovaha yoothanleya ni yooreera. Nyuwo mwaamuxupeya waakhanle weera mutthu owo orimwaasa osunka ni khanuupuwela-tho yoovaha eyo! Mene nyuwo mwaamuhakalala moona weera mutthu owo onnavarihela muteko ni onnavaha mwiitti yoovaha eyo. Nintthuna ohima eheeni? Yehova oonivaha Mwanawe. Owo onnahakalala vaavo nnooniheraahu oxukurela yoovaha ela yootepa otthuneya ni mwaha wa nsivelo nawe nenno nimweerinhe ovaha yoowoopola! (Yoh. 3:16; Arom. 5:7, 8) Moovira etempu, hiyo pooti opatxera oyeleela ovaha wahu mwiitti yoowoopola. Mene wakhala weera nnooyeleela ovaha wahu mwiitti yoowoopola, onrowa okhalaka ntoko yoovaha ya Muluku nihenle nipuro nenno nihinweraahu woona naari nihinuupuwelelaahu. Weera nisepe weereya eyo, nintthuneya wuupuwelelaka veeli-veeli oxukurela wahu mwaha wa ele Muluku ni Kristu enipakenlaaya. w25.01 epaax. 26 eparag. 1-2

Weera akwanihere itthu sinhaaweleya ni okhala mutokweene a mmulokoni, munna khontthuneya okhala ‘oopatisiwa a naanaano.’ Khontthuneya oviriha iyaakha sintxipale apatisinweene, mene ontthuneya oviriha etempu enhaaweleya weera akhale mukristu oolipa moomunepani. Muhaakunveene othanliwa ntoko mutokweene a mmulokoni muntthuneya woonihera weera, hiihaale ntoko Yesu, nyuwo toowiiyeviha ni oopixa murima nwehereraka etempu yooreerela Yehova woovahani soothanleliwa ikina mmulokoni. (Math. 20:23; Afil. 2:5-8) Nyuwo pooti woonihera weera ‘tootteela’ mmwiiwelelaka Yehova ni miruku sawe ohiya paahi otthara miruku sinvahiwa ni mareherero awe. Biblya onnoonihera nnene sene weera asitokweene a mmulokoni entthuneya “òsuwela ohusiha.” Neereke eyo entaphulela weera asitokweene a mmulokoni ootheene entthuneya okhumelaka nnene vaavo empakaaya nyaha? Hooye. Asitokweene a mmulokoni antxipale, nnaamweera ehikhumelaka nnene vaavo empakaaya nyaha, toosuwela oxuttiha mmutekoni moolaleera ni vaavo enaaxekuraaya asinna. w24.11 epaax. 23-24 eparag. 14-15

Vaavo nyuwo mumphwanyaanyu masu muhiniiwexexaanyu nnene, muthola-thole. Avinyaka mphimeleleke nihiku nootheene etthu moonelenlaanyu ni etthu enooxuttihaayani woohima sa Yehova, Mwanawe ni nsivelo naya wa nyuwo. (Nsal. 119:97, enoota) Muhikhulumuwe wakhala weera nyuwo khamumphwanya itthu inyowani soovara murima vaavo munkilaathi anyu weera musome ni othola-thola. Mwa masu makina, naarowa weera nyuwo muri ntoko mutthu onaasa nluku na ouro. Moopixa murima, mutthu owo onnaviriha iwoora nave mahiku ahinaaye ophwanya naari nluku nikhaani na ouro. Nto, owo khonkhulumuwa onnavirelela waasa, mwaha wooweera nluku nikhaani nri poothe ti nootthuneya wa owo. Mihakhu seekhaikhai sa mBiblyani ti sootepa otthuneyaxa. (Mir. 8:10) Nto mukhale oopixa murima mukwanihereke eprograma anyu ya omusoma Biblya. — Nsal. 1:2. w25.01 epaax. 25 eparag. 14-15

Yehova onweherera weera hiyo nikhaleke oolikaneene waalevelela atthu akina yaawo enantthekela. (Nsal. 86:5; Luka 17:4; Aef. 4:32) Hiyo pooti woona ovoreya vantxipale mwaha wa etthu mutthu uulummaawe naari onipakenlaawe, otepaxa wene wakhala weera mutthu owo nthamwene oosiveleya naari mmusi ahu. (Nsal. 55:13-15 [55:12-14, NM]) Imaara ikina, moota nniisoonelaahu vaavo nnoonaahu ovoreya, pooti olikanxera ni ohommwa ni mwaalo. (Mir. 12:18) Pooti weera nnimweerera osepa miyuupuwelo iyo sinnivoreya. Menento opaka eyo onoolikana ohommwa ni mwaalo ni ohiya mwaalo owo weemenleene vanikhwattani vawo. Mwa mukhalelo mmoharu, miyuupuwelo sahu soonyoonyiwa khasinrowa omala wakhala weera ninnasepa. Emaara mutthu onannyoonyihaawe, yootthunaahu yoopatxera ori onyoonyiwa. Biblya onnasuwela weera hiyo ikwaha ikina pooti onyoonyiwa. Menento onnanleela weera nihihiyeke onyoonyiwa iwo oniwinaka. (Nsal. 4:5 [4:4, NM]; Aef. 4:26) Mwaha wa heeni? Mwaha wooweera mutthu anyoonyiwa ti wooxupa opaka itthu sooreera. (Yak. 1:20) Muupuweleke weera onyoonyiwa muupuwelo, mene ovirelela onyoonyiwa ti yoothanla. w25.02 epaax. 15 eparag. 4-6

Yesu aahuuluma ntakihero na mutthu oniithukumanyera muhakhu mene “vamaithoni va Muluku, owo khahiyono namuhakhu.” (Luka 12:16-21) Khaavo onwera osuwela etthu enrowa weereya muhoolo. (Mir. 23:4, 5; Yak. 4:13-15) Ninnaviriha maxupo a otthara-tthariwa mwaha wookhala atthareli a Kristu. Yesu aahimme weera nintthuneya okhala oolikaneene ‘ohiya’ mireerelo sootheene weera nikhale atthareli awe. (Luka 14:33, enoota) Makristu a eseekulu yoopatxera, yaahaakhulela oyeleela mireerelo saya moohakalala. (Aheb. 10:34) Mahiku ahu ala, asinna antxipale aayeleela muteko aya mwaha wookhootta wiivoleihera ni nyaha sa epoliitika. (Apok. 13:16, 17) Etthu heeni yaakhavihenre opaka eyo? Ennaroromela yoolaihera ya Yehova enhima weera: “Nkirwa wòhiya nari nkirwa wònyanyala.” (Aheb. 13:5) Ninnapaka ele ninweraahu weera niireherere ni soohaawela sahu sa muhoolo, mene wakhala weera enookhumelela etthu nahaawehereraahu, nroromeleke nikhavihero na Yehova. w25.03 epaax. 29 eparag. 13-14

Yehova khonweherera weera nikhale akristu oolipa nihikhaviheriwaka. Ale envara ntoko akukhuli ni ooxuttiha mmulokoni eri oolikaneene weera emukhavihere munna ori poothe okhala ‘oolipa’ moomunepani, ni “mphimelo wa osinku wa Kristu.” (Aef. 4:11-13) Yehova oonivaha tho munepa awe wootteela weera onikhavihere okhalano ‘muupuwelo wa Kristu.’ (1 Akor. 2:14-16) Opwaha mwa yeeyo, Yehova oonivaha tho ivanjelyu 4 seiyo sinnikhavihera woona moota Yesu uupuwelaawe, uulumaawe ni moota aapakaawe itthu emaara aalaleeraawe. Natthara ntakihero na Yesu na moota uulumaawe ni moota aapakaawe itthu, nnoowera okhala akristu oolipa. Mene weera nikhale akristu oolipa moomunepani, nintthuneya osuwela “nihusiho nopatxera na Kristu,” naari neere, itthu soopatxera nixuttenraahu woohima sa Yesu. w24.04 epaax. 4-5 eparag. 11-12

Mahiku ootheene, ninnatthuneya opaka soothanla. Soothanla ikina ti sookhweya opaka, ntoko etthu ninrowaahu omatabixari naari ewoora ninrowaahu okona. Soothanla ikina ti sooxupa opaka. Iyo pooti ovoleela ekumi ahu, ohakalala wahu, emusi ahu naari okokhorela wahu. Nintthuna weera soothanla sahu sinikhavihereke hiyo ni emusi ahu. Opwaha mwa sootheene, nintthuna weera soothanla sahu simusiveliheke Yehova. (Arom. 12:1, 2) Etthu yootthuneya muntthuneyaanyu opaka weera mpake yoothanla yooreera, ori osuwela itthu sinhela mpuwa. Mwaha wa heeni eyo eraaya yootthuneya? Nkuupuwelani weera mutthu onvoreiwa onnanvekela meediku weera amukosoope. Neereke weera meediku aamurowa opaka yoothanla ahinaaye onwehexexa naari ompakela makoho mutthu owo onvoreiwa? Moohihovela hooye. Nyuwo-tho munoopaka soothanla sooreera wakhala weera woopatxerani moothokorora itthu sootheene sinhela mpuwa mwaha owo. w25.01 epaax. 14 eparag. 1-3

Eheeni nisuwenlaahu woohima sa ikharari sa Yehova? Moota heeni owo oonihenraawe weera ‘khantthuna weera mutthu naari mmoha anyaanyiwe’? (2 Ped. 3:9) Moone moota oonihenraawe ikharari sawe ni atthu yaapanke soottheka itokweene. Mwene Davidi aahipaka soottheka itokweene, seiyo saahela mpuwa oraruwa ni wiiva. Menento vaavo Davidi aattharunwaawe, mwa ikharari Yehova aamulevelela. (2 Sam. 12:1-12) Mwene Manase aapaka yoottheka etokweene mweekumini mwawe. Nnaamweera aapanke eyo, Yehova aahaakhulela moomaaleleya ottharuwa wa mulopwana ole, ni aaphwanya eparakha yoowoonihera ikharari sawe ni nlevelelo nawe. (2 Sow. 33:9-16) Matakihero ala ennoonihera weera Yehova onnoonihera ikharari sawe ikwaha sootheene ankhalaaweno eparakha yoopaka eyo. Owo onoorowa waavinyereriha atthu oovirikana, mwaha wooweera yaahoonelela weera yaapaka soottheka itokweene ni yaattharuwa. w24.05 epaax. 4 eparag. 12