Eheeni Biblya onnixuttihaawe woohima sa Yehova

1. Heeni nyuwo munxukurelaanyu mwaha wa Biblya?

HIYO ninnaxukurela vantxipale mwaha wa Yehova onivaha Biblya. Nto mwaha wa Biblya hiyo ninnawera ovilela maxupo ninkumanaahuno mahikwaano. Nave-tho mwaha wa Biblya Yehova onnanivaha yooweherera yooreera ya muhoolo. Nto etthu yootepa otthuneya, Yehova onnanvarihela muteko Biblya weera anixuttihe mikhalelo sawe. Ophimelela mikhalelo sooreera sa Yehova sinnavara murima ahu, ni onnaneeriha otthuna omwaattamela owo.—Nsal. 25:14.

2. Etthu heeni Yehova ovarenlaawe muteko weera anikhavihere omusuwela?

² Yehova ontthuna weera atthu emusuwele. Khalayi Yehova aavarihela muteko oloha, soowooniheriwa, mpaka aaruma malaika weera yaakhavihere atthu omusuwela owo. (Nam. 12:6; Mit. 10:3, 4) Mene khawaakela owereya osoma sooloha iyo, soowooniheriwa ni mitthenka iyo sahaalempwale mBiblyani. Nto tiyeeyo yaamweerinhe Yehova owuupuxera alopwana olepa sooweereya iyo mBiblyani weera hiyo nisuwele. (Yer. 30:2) Hiyo nnoowera ohima moohihovela, weera ephiro Yehova othanlalaawe weera uulumeke ni hiyo ti yooreera. Mwaha wooweera “Muluku ephiro awe ti yowokowa.”—Nsal. 18:31 [18:30, Tradução do Novo Mundo].

3. Moota heeni Yehova omukosoopalaawe Biblya, mpaka ophiya mahiku ahu ala? (Yesaya 40:8)

³ Mmusome Yesaya 40:8. Osuwela wa Biblya onnaweettiha alopwana ni athiyana oororomeleya mwa iyaakha sintxipale. Enwereya hayi eyo? Biblya opatxenre olempwa khalayi, ni saavareliwa muteko ikaruma soowaakuva onyaanyeya. Tiyeeyo olelo va sihimphwanyeyaaya ikaruma soopatxera aalempwaiyeno Biblya. Mene nto Yehova aaheeriha weera ipakiwe ikoopiya sintxipale sa Biblya, ekhaikhai weera alipa oomukopiyari Biblya yaari oohimalela. Nto awosa yanniilipihera weera ekopiyari moota saaraayano. Namasoma mmoha olempe ha woohima sa soolepa sa eHeberi: “Pooti ohima moohihovela weera khiyaavo yoolepa yakhalayi ekopiyarinwe moororomeleya ntoko Biblya.” Ekhaikhai weera Biblya aalempwale mwa ikaruma soowaakuva onyaanyeya, ni atthu yaamukopiyari yaari oohimalela. Mene nroromeleke etthu emoha, masu ninsomaahu olelo va mBiblyani, miruku sa Yehova.

4. Eheeni ninkelaahu woona mwa yoosomeene yeela?

⁴ Yehova naapwiipwi a “yovaha eri yothene yomalela.” (Yak. 1:17) Biblya yoovaha yooreera naakhenlaahu wa Yehova. Ntoko hiihaale mutthu onisuwenle onsuwelaawe nnene sene etthu yoonivaha, hiyo pooti ohima etthu emoha-moharu wa Biblya. Mwaha wooweera yoovaha eyo ennanixuttiha itthu sintxipale woohima sa Yehova. Moorwela mwa Biblya, hiyo ninnawera woona moota Yehova onisuwenlaawe ni moota osuwenlaawe itthu ninhaawelaahu. Mwa yoosoma ela, nnimoona ele Biblya onxuttihaawe woohima sa mikhalelo miraru sa Yehova. Osuwela wawe, exariya ni nsivelo. Nto ninrowa opatxera woona moota Biblya onooniheraawe osuwela wa Muluku.

BIBLYA ONNOONIHERA WEERA YEHOVA TOOSUWELA

5. Biblya onoonihera hayi osuwela wa Muluku?

⁵ Yehova oosuwela vantxipale weera hiyo ninnatthuna miruku sawe sooreera ni yoovahaawe. Biblya oosareya osuwela wa Yehova, nave owo ookhalano owera wootxentxa ikumi saatthu. Vaavo liivuru oopatxera aalempwalaiye, Mose aahaalela ana a Israeli weera: “Khweli ikano seiya kasihiyene masu a ethiru anavira vakhiviru vanyu, hoye, mene ti ekum’anyu.” (Ola. 32:47) Ootheene antthara miruku sa mBiblyani, annakhalano ekumi yooreera ni yoohakalaliha. (Nsal. 1:2, 3) Nnaamweera Biblya alempwaleene khalayi, owo nlelo ookhalano owera wootxentxa ikumi saatthu. Mwa ntakihero, esite ahu jw.org, sookhala nyaha sineera “A Bíblia Muda a Vida das Pessoas” nyuwo munoophwanya sooweereya simpwaha 50 sa atthu, sinoonihera weera Biblya okhalano oowera wootxentxa ikumi sa atthu.—1 Ates. 2:13.

6. Mwaha wa heeni ninhimaahu weera Biblya khanlikana ni iliivuru ikina?

⁶ Khaavo liivuru onlikana ni Biblya. Mwaha wa heeni? Mwaha wooweera Biblya ta Yehova namawera sootheene, wa mahiku ootheene ni mutthu oosuwelaxa waapwaha atthu ootheene. Iliivuru sintxipale ti soosuweliwaxa ni sootthuneya waapwaha anamalepa a iliivuru iyo. Nto miruku sa iliivuru iyo sinnahiiwa ovareliwa muteko yavira etempu. Opwaha mwa yeeyo miruku simpwanyeya mBiblyani tisoovareleya muteko mahiku ootheene. Vaavo ninsomaahu soolepa sa mBiblyani ni nnaphimelela ele ninxutteraahu, Yehova onnavarela muteko munepaawe wootteela weera onikhavihere ovarela muteko mweekumini mwahu miruku nimphwanyaahu mBiblyani. (Nsal. 119:27; Mal. 3:16; Aheb. 4:12) Moohihovela, mwaneene Biblya Yehova, onnatthuna vantxipale wookhaviherani nyuwo. Nto eyo enanooperara weera nimusomeke Biblya mahiku ootheene!

7. Moota heeni Biblya aawiiraaninhaawe atthu a Muluku khalayi?

⁷ Yookhala etthu ekina enoonihera weera Biblya oosareya osuwela wa Muluku. Owo onnakhavihera weera atthu a Muluku ekhaleke oowiiraana. Vaavo ana a Israeli yaavolonwaaya elapo yoolaiheriwa, awo yaamwalamwala erowaka mapuro oovirikana. Akina a yaawo yaakhala alipa oomesera, akina alipa oohuwa inama, ni akina anamalima. Ana a Israeli yaakhala mapuro makina, waari wookhweya waattiwala ni ohiwuupuwelela, alipa yaakhala mapuro makina. Mene Yehova aaweerela weera ethukumaneke etempu yoothanleya, weera yiiwe osommwa ni otaphuleliwa wa malamulo. (Ola. 31:10-13; Neh. 8:2, 8, 18) Nkuupuwelani moota ana a Israeli yaahakalalaaya yaphiya oYerusalemu, apaale vaavo yoonaaya imiliyawu saatthu saakhuma mapuro makina iwaaka omukokhorela Muluku. Mwaha wa yeeyo, Yehova annaakhavihera atthu awe okhala oowiiraana. Muhoolo mwaya sipatxerakaru miloko sa ekristu antxipale a yaawo yaari asilopwana ni asithiyana, yuuluma muulumo oovirikana. Akina a yaawo yaari atthu ootthuneyaxa, amihakhu ni akina yaari oohaawa. Nto ootheene yannasiveliwa ni masu a Muluku, eyo yannaweeriha okhala oowiraana vaavo yaamukokhorelaaya Muluku eekhaikhai Yehova. Ale yaaxuttera masu a Muluku enakhala makristu yanniiwexexa nnene sene, otepaxa wene vaavo yaathukumanaaya ni asinna mwaha wooweera yannaakhela nikhavihero weera yiiwexexe soolepa.—Mit. 2:42; 8:30, 31.

8. Moota heeni Biblya onwiiraanihaawe atthu a Muluku mahikwaano?

⁸ Yehova onnanvarihela muteko Biblya weera aaxuttihe atthu awe ovirelela wiiraana. Biblya ookhalano ikhaikhai sootheene woohima sa Yehova nintthuneyaahu osuwela. Hiyo mahikwaano ninnathukumana Empa ya Omwene ni ninnathukumana va assembleya ni va kongresu. Weiwo ninxuttihiwaahu soohima sa Yehova siri mBiblyani. Nto ti vaavo ninhimaahu weera Biblya etthu yootepa otthuneyaxa, mwaha wooweera Yehova onnanvarihela muteko weera aakhavihere atthu awe “ni emurumele etexaka ekolope emosaru mmakhatani.”—Sof. 3:9.

9. Mikhalelo heeni nintthuneyaahu okhalano weera niiwexexe mitthenka sa mBiblyani? (Luka 10:21)

⁹ Moone etthu ekina enoonihera osuwela wa Yehova. Iparte sintxipale sa Biblya silempwale weera ale oowiiyeviha yiiwexexeke. (Mmusome Luka 10:21.) Atthu a elapo yootheene pooti omusoma Biblya. Mene namasoma mmoha ohimme ha: “Biblya khaiyene paahi liivuru opatxerinwe osommwa ovinyera khalayi, mene nto liivuru onsommwa moomaaleleya.” Nto atthu oowiiyeviha paahi anamwiiwexexa ni tantthara miruku sawe.—2 Akor. 3:15, 16.

10. Moota heeni mukina nnoonelelaahu osuwela wa Yehova ori mBiblyani?

¹⁰ Biblya onnanixuttiha osuwela wa Yehova wa moota mukina. Ekhaikhai weera Yehova onanvarihela muteko Biblya weera anixuttihe ntoko egrupu, nave owo tho, pooti onivaha miruku ni onimaaliha mutthu ti mutthu a hiyo. Vaavo mummusomaanyu Biblya, neereke munnoonelela weera Yehova onnoopwatthani? Aani! (Yes. 30:21) Ikwaha ikavi nyuwo nvirinhaanyu maxupo munasoma yoolepa ya mBiblyani avinyaka muneera: “Mweekhaikhai eversu ela kilepelinwe yoomi.” Mene Biblya onnalopola imiliyau saatthu. Vano onwereya hayi Biblya okhalano miruku soororomeleya seiyo nyuwo munhaawelaanyu? Ennawereya eyo mwaha wooweera mwaneene Biblya Yehova, mutthu ootepaxa osuwela mwa elapo yootheene.—2 Tim. 3:16, 17.

BIBLYA ONNOONIHERA WEERA YEHOVA TA EXARIYA

11. Etthu heeni enoonihera weera Yehova khaanoono nthalu vaavo aalempwaawe Biblya?

¹¹ Mukhalelo mukina Yehova oraaweno ti exariya. (Ola. 32:4) Exariya eyo ennavarihana ni mukhalelo mukina wa Yehova, ohikhalano nthalu. (Mit. 10:34, 35; Arom. 2:11) Hiyo ninnoonelela weera Yehova khaiyene a nthalu mwa moota Biblya olempwalaawe. Owo olempwale mwa muulumo atthu antxipale yuulumaaya. Mwa ntakihero, iparte sintxipale sa iliivuru soopatxera 39 sa mBiblyani, saalempwale ni nuulumo na eHeberi, nuulumo yuulumaaya atthu a Muluku etempu ene yeele. Mene etempu ya makristu oopatxera, nuulumo nuulummwaxa yaari eGregu, ti yeeyo-nto iliivuru 27 soomalihera silempwale ni eGregu. Yehova khaavarihenle nuulumo nimoha weera alempwe Biblya. Mahikwaano elapo ela ya vathi aakhala atthu amphiyera ibiliyawu oitu anuuluma muulumo mantxipale oovirikana. Vano moota heeni atthu antxipale mahikwaano yaarowaaya oxuttera woohima sa Yehova?

12. Moota heeni eprofesiya ya Daniyeli 12:4 enkwanelaaya mahikwaahu ala?

¹² Mwa eprofesiya ya Daniyeli ninsomaahu ninnoona weera Yehova aalaihera weera mwa etempu yoomalihera “osuwela wekhaikhai” nimphwanyaahu mBiblyani “onimwìnnuwa” naari neere atthu antxipale yaamwiiwexexa. (Mmusome Daniyeli 12:4.) Moota mukina eprofesiya ela enkwanelaaya olelo va, ori mwaha wa otaphuleliwa wa Biblya ni iliivuru ikina ni okawiwa. Mahikwaano, Biblya eliivuru etaphulelinwexa, ni onkaiwa elapo yootheene. A Biblya ataphulelinwe ni entumihiwa ni empresa, toorika waathuma. Moovirikana ni awo, atthu a Yehova aamutaphulela Biblya ootheene naari eparte vakhaaneene a muulumo ookwana 240. Mahikwaano mutthu ori poothe onoowera okhalano Biblya woohiliva etthu. Yookhumelela aya ti yooweera atthu a mahimo ootheene annaakhulela mitthenka sa Omwene ehinaakuve omala elapo ela. (Math. 24:14) Yehova Muluku ahu a exariya, ontthuna waavaha eparakha atthu ootheene weera emusuwele, moorwela mwa omusoma Biblya. Yehova onnapaka eyo mwaha wooweera onnaasivela vantxipale atthu.

BIBLYA ONNOONIHERA WEERA YEHOVA ONNANISIVELA

13. Mwaha wa heeni nintthuneyaahu ohima weera Biblya, onnoonihera nsivelo na Yehova? (Yohani 21:25)

¹³ Biblya onnanikhavihera wiiwexexa mukhalelo wootepaxa wooneya wa Yehova ori nsivelo. (1 Yohani 4:8) Ninnawera woona eyo nawehexexa masu Yehova othanliyaawe ohela mBiblyani. Mbiblyani sookhala miruku seiyo hiyo nintthunaahu ni seiyo sinnikhavihera olipiha onthamwene ahu ni Yehova, ookhala oohakalala vaanaano vaava ni ekumi yoohimala muhoolo. Mwaha wa nsivelo, owo khanilenle itthu sootheene nintthuneyaahu opaka weera ninvarele muteko.—Mmusome Yohani 21:25.

14. Etthu heeni nimphwanyaahu mBiblyani enoonihera weera Yehova onnanisivela?

¹⁴ Moota Biblya olempwalaawe onnoonihera weera Yehova onnansivela wa moota mukina. Moota heeni? Biblya khannivaha elista weera neettiheke ekumi ahu, opwaha mwa yeeyo, Yehova onnanikhavihera wuupuwelela avarelaka muteko sooweereya sa mweekumini, iprofesiya ni miruku sinvareleya muteko. Mwa mooteene yoowo owo onnanivaha nttittimiho, ni owo ontthuna weera hiyo nimwiiweleleke nimusivelaka ni murima wootheene.

15. (a) Moota heeni Yehova onooniheraawe weera onnaapwattha ale ansoma masu awe? (b) Va footuni mutthu heeni onromoliwa mBiblyani mwaarusi, munna mmiravo, ni murokora oowuluvala enamphimelelaaya? (Eph. 39:1, 10-12; 2 Mam. 5:1-3; Luka 2:25-38)

¹⁵ Biblya onnoonihera weera Yehova onnanipwattha. Mwaha wa heeni nihimaahu hiiho? Mbiblyani sookhalamo sooweereya sinoonihera emosau ootheene hiyo nnoonaahu. Hiyo pooti wiihela munipuroni mwa atthu anromoliwa mBiblyani, mwaha wooweera yaari atthu “òlikana ni hiyo.” (Yak. 5:17) Etthu yootepaxa oreera ti omoona Yehova moota onaakosoopaaweno atthu anviriha itthu ntoko sawihu. Ti wookhweya wiiwexexa weera “t’òsareya othunku ni òmorela ikharari.”—Yak. 5:11.

16. Ninxuttera eheeni woohima sa Yehova vaavo ninsomaahu sooweereya sa atthu apanke yoottheka? (Yesaya 55:7)

¹⁶ Biblya onnoonihera mwa moota mukina nsivelo Yehova oraaweno wa hiyo. Owo onnanroromeliha weera Muluku khanrowa onnyanyala napaka yoottheka. Ana a Israeli yannamutthekela Yehova imaara sintxipale, naari vareene hiiho vaavo yaattharuwaaya ni murima wootheene, Yehova annaalevelela. (Mmusome Yesaya 55:7.) Akristu oopatxera yaasuwela weera Yehova annaasivela awo vantxipale. Yehova aamupuxera murummwa Paulo owooperera asinna a mmulokoni weera elevelelaneke mooreerelana murima, ni omulipiha mutthu aapanke yoottheka etokotoko ni anattharuwa. (2 Akor. 2:6, 7; 1 Akor. 5:1-5) Ti wooreera wuupuwelela weera Yehova khaanyanyanle arumeyi awe, mwaha wooweera yaapaka soottheka. Opwaha mwa yeeyo, mooreera murima owo aahakhavihera, ahattaruxa, ni aawakhulela weera etthikele okhala asinthamwene awe veeli. Yehova onnaroromeliha weera mahikwaano, onoopaka emoha-moharu wa yaale emutthekenle ni enattharuwa.—Yak. 4:8-10.

NVAHE MWIITTI “YOOVAHA YOOREERA” ERI MASU A MULUKU

17. Mwaha wa heeni Biblya oraawe yoovaha yootepaxa oreera?

¹⁷ Yehova oonivaha etthu yootepaxa oreera ori Biblya. Mwaha wa heeni Biblya oraawe ootepaxa oreera? Ntoko noonalaahu, Biblya onnoonihera weera Muluku toosuwela, ta exariya ni ta nsivelo. Biblya ti ethoonyero enoonihera weera Yehova ontthuna weera hiyo nimusuwele, ni okhala asinthamwene awe.

18. Ninkela woonihera hayi weera ninnavaha mwiitti “yoovaha yooreera” ya Yehova onivanhaawe?

¹⁸ Hiyo khanintthuneya ohiya ohela mwiitti ‘yoovaha eyo yootepaxa oreera’, ari masu a Muluku. (Yak. 1:17) Mwa yeeyo, ti wootthuneya onvaha mwiitti Biblya, hiyo pooti opaka eyo nisomaka masu nimphwanyaahu muliivuruni mmo, ni ophimelela ele ninsomaahu. Nto napaka eyo nroromeleke weera Yehova mwaneene Biblya onooreeliha wiilipihera wahu ni ‘nnoophwanya omusuwela Muluku.’—Mir. 2:5.