Yehova oonikhavihera wiikhoveleliha ni ohakalala nipuro nri poothe naakhalaahu

Ntheli na Kassholms yaarowela woonela eskola ya oGileadi eyakha ya 1979. Moovira iyaakha yaathanleliwa orowa ovara wIrã, oMaurícia, oMyanmar, oTanzânia, wUganda ni oZaire. Emaara yaaraaya oGileadi, yaavahiwa miruku ni namasomiha mmoha, Jack Redford, yoowo aakhavihenre wiikhoveleliha ni ovirelela okhala oohakalala nipuro nri poothe yaakhalaaya. Awo anonleela yooweereya aya.

Mats, txontte nkanleelani moota muxuttenraanyu ekhaikhai.

Mats: Apapa aka yaakhala oPolonia, emaara yeeyo yaawaniwaaya ekhotto yanaaveeli ya elapo yootheene, etempu eyo, awo yaahoona itthu sintxipale soowootha sa ekereja Católica. Ni awo yannahima ha: “Ettiini yeekhaikhai eri nipuro nikina!” Noovira etempu kaahaakhulela ele yaahimmaaya. Kaathuma iliivuru sintxipale seiyo saahaakhanle inyowani. Mmoha a iliivuru iyo, aari ooripelela oniitthaniwa Conhecimento Que Conduz à Vida Eterna. Muru owo waakivara murima, ni miyo kaamusoma liivuru ootheene nihiku nene nenne ohiyu. Nihiku naattharelana, miyo kaasuwela weera koophwanya ekhaikhai!

Eyaakha ya 1972, mweeri wa Abril, kaasoma ipublikasau sintxipale sa Anamoona a Yehova ni kaaphwanya waakhuliwa wa makoho aka moorweela mwa Biblya. Miyo kaahiisoona ntoko ntakihero Yesu aapankaawe na nanakoso, vaavo aaphwannyaawe nluku nootthuneyaxa, aatumiha itthu sootheene anarowa “othuma.” Miyo ‘kohaatumiha’ apalano aka ootheene oorowa osoma iskola itokweene weera kikhale meediku, koopaka sootheene iya weera kithume “nluku nootthuneyaaxa” nenno nri ekhaikhai kiphwannyaaka. (Math. 13:45, 46) Miyo kipatisiwe nihiku na 10 a Dezembro eyaakha ya 1972.

Evirakaru eyaakha emoha, asipapa aka ni munnaka etthaako yaahaakhulela-tho ekhaikhai ni yaapatisiwa. Mweeri wa Julho, eyaakha ya 1973, kaapatxera ovara muteko wa etempu yootheene. Mpuwa mwa asirokora oororomeleya mapioneira a muloko ahu, aakhala murokora mmoha aakisivenle ni aasiveliwa ni itthu soomunepani, iitthaniwa Ann-Catrin, naasivelana ni naathelana eyaakha ya 1975, ni naaviriha iyaakha 4 soottharelana esidade ya oStrömsund, oSuecia, muttetthe yoowo wooreera, eraayawo atthu antxipale ensiveliwa omuxuttera Biblya.

Ann-Catrin: Apapa aka exuttenre ekhaikhai emalinheene osoma iskola itokweene wEstocolmo. Miyo kaarinono miyeeri miraru etempu ele, menento awo yannakikuxa omithukumanoni ni mmutekoni moolaleera. Amama khayasivelinwe ni yaanahima weera Anamoona a Yehova khiyaaxuttiha itthu seekhaikhai. Menento awo khiyaatthuneya opaka eyo, nto, moovira etempu awo-tho yaapatisiwa. Kireeneno iyaakha 13, kaapatisiwa ni moottharelana kireeneno iyaakha 16 kaapatxera okhavihera ntoko pioneira. Kikhaviherakaru wUmeå, weiwo yaahaweleyaaya anamalaleera a Omwene, kaakhala pioneira oothanleya.

Mats ni miyo nthelanakaru, naahakalala vantxipale waakhavihera atthu oxuttera ekhaikhai. Mpuwa mwa yaawo aakhalamo mwali mmoha iitthaniwa Maivor, yoowo aahiñye onvonya boola ni anvara vamoha ni murokora aka etthaako ntoko mapioneira. Awo yaarowa eskola ya oGileadi eyaakha ya 1984 ni envara ntoko mamisionaariya weEkuador.

Mwa soothanleliwa sanyu ntoko mamisionariyu, etthu heeni yookhavihenreni wiikhoveleliha ni ovirelela okhala oohakalala mwa soothanleliwa sanyu?

Mats: Hiyo ‘nannavahiwa’ ikwaha sintxipale soothanleliwa inyowani. Menento, nanneerera ‘wiikhoveleliha’ nipakaka ele naaweraahu weera nimutakihe Yesu, otepaxa wene wiiyeviha wawe. (Akol. 2:6, 7) Mwa ntakihero ohiya waaweherera asinna ni asirokora a muttetthe ole wiikhoveleliha wa hiyo, nanneerera osuwela mwaha wa heeni awo yaapakaaya itthu mwa mukhalelo woovirikana. Naatthuna wiiwexexa miyuupuwelo saya ni sookhovelela saya. Vaavo naattharaahu ntakihero na Yesu, wannakhala wookhweya wiikhoveleliha ni naari oohakalala wa soothanleliwa sahu ntoko “mwiri ophatteiwe vatthiyani na mahi.” — Nsal. 1:2, 3.

Ann-Catrin: Weera mwiri ophatteiwale winnuwe nnene, nintthuneya-tho nsuwa. Yehova ohoonihera okhala “nsuwa” wa hiyo. (Nsal. 84:12 [84:11, Tradução do Novo Mundo]) Owo oonivaha emusi ya asinna ni asirokora ansivelo oomunepani. Mwa ntakihero, muloko mukhaanini naaraahu oTeerã, wIrã, asinna ni asirokora yaanaakhela nnene ni yaari oovaha. Eyo yaanuupuxera matakihero aatthu a mBiblyani yaawaakhenle akina nnene. Wannanisivela okhala wIrã, mene mweeri wa Julho eyaakha ya 1980, kuvernu aakhoottiha muteko ahu elapo ele ni naaleeliwa weera nannatthuneya okhuma elapo ele mpuwa mwa iwoora 48. Naathanleliwa orowa oZaire (viinaano oniitthaniwa oCongo), wAfrica.

Vaavo kaasuwenlaaka weera naathanleliwa orowa wAfrica, kaahinla. Itthu kaiwalaaka woohima sa inowa ni ireetta sa wAfrica saakoopiha. Mene asinthamwene aka eeli yaavanre iwo mpuwa mwa etempu yintxipale yanleela ha: “Nyuwo khamutonko ophiyawo! Nkarowani munimoona, wAfrica oreerawo.” Ni yaaheereya! Asinna ni asirokora yaari ansivelo ni ooreera murima. Mweekhaikhai emaara naathaamaahu oZaire sivirakaru iyaakha 6 mwaha wa okhoottihiwa wa Anamoona a Yehova elapo naathanlelinwaahu, miyo kanvekela Yehova keeraka: “Txontte nikhaleke wAfrica.”

Mareeliho heeni mwaakhenlaayu mwaha wonvarela Yehova mpuwa mwa iyaakha iya?

Mats: Mwaha wa soothanleliwa sahu nookhalano onthamwene ni mamisonaariyu yaakhumme ilapo soovirikana. Opwaha mwa yeeyo, nannahakalala vantxipale mwaha wookhalano soosoma sa Biblya sintxipale, mutthu ori poothe a hiyo annakhalano soosoma sa Biblya sookwanelaka 20! Ni nkinttiwala-tho nsivelo asinna ni asirokora a wAfrica enoonihenraaya. Mpuwa mwa oxekura wahu miloko sa oTanzania, asinna antxipale yaanaakhela ni “sovaha saya” nnaamweera awo yaari oohaawa. (2 Akor. 8:3) Etthu yoothanleya wa hiyo, etthu nniitthanaahu etempu ya sooweereya. Yaakhala emaara ya okhwipi wa nihiku, miyo ni Ann-Catrin nannakilaathi weera nuulume woohima sa sooweereya sa nihiku ni omuxukurela Yehova mwaha wookhala ni hiyo.

Ann-Catrin: Wa miyo, ohakalala otoko-toko waari waasuwela asinna ni asirokora a elapo yootheene. Kooxuttera moolumo manyowani ntoko nuulumo farsi, efrancês, luganda ni esuaíli, ni naaxuttera sookhovelela soovirikana. Naahaakhavihera naaxuttihaka asinna ni asirokora anyowani, naapaka onthamwene ni wannansivela onvarela Yehova ni awo ‘nikhata nnikhata.’ — Sof. 3:9.

Nave-tho nooweha soopattuxiwa sintxipale sooreera sa Yehova. Ikwaha sootheene naakhulelaahu yoothanleliwa enyowani, wakhala ntoko Yehova taaneettiha. Owo oonixuttiha itthu nahaarowaahu osuwela meekhaahu.

Maxupo heeni nvirinhanyu ni etthu heeni yookhavihenreni ovilela?

Mats: Ikwaha ikina nannavoreiwa ni iretta ntoko malária. Ni Ann-Catrin ootoko wooperariwa. Nave-tho ninnaxupeya ni asitiithi ahu yuuluvanle, nto ninnaaxukrela amusi ahu yaakosompe awo mpuwa mwa soothanleliwa sahu. Awo aapaka eyo moopixa murima, moohakalala ni mwa nsivelo. (1 Tim. 5:4) Nnaamweera vareene hiiho, ikwaha ikina ninnaxupeya ni ninnakhala ni ntthuno noowaakhavihera asitiithi ahu vakhiviru ohiya paahi waakhavihera nrakamelanneene ni awo.

Ann-Catrin: Eyaakha ya 1983, vaavo naavaraahu oZaire, kaavoreiwa vantxipale ni eretta ya Cólera. Meediku aamuleela Mats, “Mwaakuxe mwaatthikihereke elapo aya olelo vaava!” Nihiku naattharelana, nanwela aviao yoowo aateexa miritti nirowaka oSuécia.

Mats: Nuupuwela weera muteko ahu wa omisionaariyu waamala, nto naahinla vantxipale. Moovirikana ni ele aanilenlaawe, Ann-Catrin aalama. Ni evirakaru eyaakha emoha naatthikela oZaire, ekwaha ela naarowa muloko mukhaanini wa nuulumo esuaíli, oLubumbashi.

Ann-Catrin: Emaara naakhalaahu oLubumbashi, erukulu aka yaayeeheya. Nnaamweera nahampanke palanu ookhalano mwaana, waakivoreya murima vantxipale omuyeleela mwana aka. Mpuwa mwa etempu eyo kaariipiwaaka murima, naahaakhela yoovaha yoothanleya ya Yehova. Naapatxeriha soosoma sa Biblya sintxipale opwaha khalayi. Ehivinreene eyaakha emoha, muloko naakhaviheraahu anamalaleera yaahaatxeerereya ovinyera 35 mpaka ophiya 70, ni atthu yoonela mithukumano yaahaatxeerereya ovinyera 40 mpaka ophiya 220. Naahaatteliwa vantxipale mmutekoni moolaleera, ni mareeliho a Yehova yaanimaaliha vantxipale. Nnaamweera vareene hiiho, ikwaha sintxipale ninnamuupuwela ni ninnamuuluma mwanihu nimuyelenlaahu. Ninnaweherera weera Yehova onoorowa omaaliha mirima sahu moomalela mparaisu.

Mats: Ekwaha emoha, Ann-Catrin aakhulumuwa vantxipale. Kaaphwanyiwano eretta ya Cancer ni wannatthuneya wooperariwa. Menento olelo kiri nnene, ni Ann-Catrin onnapaka ele onweraawe weera amusivelihe Yehova.

Nohoonelela weera khaiyene ti hiyo nimpatxeriha oviriha maxupo. Ekhotto yaawaniwa oRuanda eyaakha ya 1994, naahaaxekura asinthamwene ahu yaari nipuro naatthaweliwa. Vaavo nonnaahu nroromelo naya, ovilela waya, ni onaakhela waya nnene nnaamweera makhalelo aya yaari ooxupa, aanixuttiha weera Yehova ookhalano owera woowaakhavihera atthu awe mpuwa mwa maxupo. — Nsal. 55:23 [55:22, NM].

Ann-Catrin: Maxupo makina yaakhumelenle vaavo naaronwaahu onvaherera Yehova efiliyaale ya wUganda eyaakha ya 2007. Emalakaru eprokraama, naaheetta ekwaha ni ekurupu ya mamisionaariyu ni maBetelita 25 nirowaka oNairobi, oQuénia. Nihinaaye ophiya ofronteira ya oQuénia. Ekaaro yaawa ohoolo wahu yaanaattamela moowaakuveya ni yaakhumula ekaaro ahu. Motorista ni asinna ookwanelaka 5 yaahikhwa moowaakuveya, murokora mmoha aakhwiiye hospitaale. Ninnaweherera owaakhela asinthamwene ahu veeli! — Yobi 14:13-15.

Makhwatta aka aavola. Mene Mats ni miyo neerela eparte ya mapasageiro naahaawa oxupeya mmuupuweloni mwaha wa acidente. Wa miyo, oxupeya wa mmuupuweloni wannakiphwanya ohiyu, kannavinya okitthimakaka murima. Mene opaka mavekelo ntoko ntheli ni osoma iversu saanisivela, saanikhavihera oviriha maxupo awo. Nave-tho naarowa wa mameediku, yaawo yaasuwela moota woomukosoopa mutthu onviriha maxupo a mmuupuweloni, eyo-tho yaanikhavihera. Viinaano, oxupeya wahu wa mmuupuweloni woovukuwa, ni ninnanvekela Yehova weera anikhavihereke waamaaliha atthu akina anwanano ni maxupo mamoharu nivirinhaahu.

Vaavo muhimmaanyu moota nvirinhaanyu maxupo anyu, nyuwo muhimme weera Yehova ohooteexani ntoko “mootxe oohaapeiwa.” Muntthuna ohima eheeni ni masu awo?

Mats: Masu awo ennavariheliwa muteko vantxipale ni e esuaíli ni enhima ha: “Tumebebwa kama mayai mabichi,” naari neere “nooteexiwa ntoko mootxe oohaapeiwa.” Hiihaale mutthu onteexaawe nnenesene mootxe oohaapeiwa weera ehiphweeye, Yehova oonikhaviihera nnene sene mwa yoothanleliwa ahu eri poothe. Imaara soothesene naakhalano itthu naahawelaahu, ni opwaha itthu naahaawelaahu. Mukhalelo mmoha nonnaahu nsivelo ni nikhavihero na Yehova, mwaha wa okhaviheriwa wahu ni mukuttula woolamulela.

Ann-Catrin: Kintthuna wooleelani ntakihero nimoha na moota Yehova oonikhavihenraawe. Nihiku nimoha kaalikareliwa kileeliwaka weera apapa aka, oSuécia, yaari hospitaale ni yannavoreiwa vantxipale. Mats eera ariki olamaru eretta yanvoreya ya malaria. Khinaakhanleno musurukhu wa epasage wootthikela owaani. Nto naalakela otumiha ekaaru ahu, ni moottharelana naalikareliwa ni atthu eeli. Noopatxera, naari ntheli nenno niiwale maxupo naavirihaahu ni naatthuna onivaha musurukhu wa epasage. Ni mukina mukina aari murokora oowuuluvala, yoowo iiyaathi musurukhu mukoofirini yeeyo aalempaawe “Atthu enhawela nikhavihero.” Mwa etempu vakhaani, Yehova aanikhavihera! — Aheb. 13:6.

Vaavo munuupuwelelaanyu iyaakha 50 sa muteko wa etempu yootheene, etthu heeni muxuttenraanyu?

Ann-Catrin: Miyo kohoonelela weera wakhala weera nnookhala ‘oomaaleleya ni oororomela,’ nnookhala oolipa. Vaavo nimmuroromelaahu Yehova, Owo onnanikhavihera ni itthu ninwanaahuno. (Yes. 30:15; 2 Sow. 20:15, 17) Mwaha wa ovanrela wahu Yehova mooreerela mwa soothanleliwa sahu, noohaakhela mareeliho mantxipale opwaha naarowaahu waakhela mwa mukhalelo mukina.

Mats: Etthu etokweene kixuttenraaka ori omuroromela Yehova mwa itthu soothesene ni woona moota Owo onnikhaviheraawe. (Nsal. 37:5) Owo khantale ohiya okwanihera yoolaihera awe. Nlelo ninnoona weera eyo ekhaikhai mwa yoothanleliwa ahu ninvaraahu vano, eBeteeli ya oMyanmar.

Ninnaweherera weera amiravo antxipale entthuna wunnuwihera muteko aya, yoone nsivelo nimoharu na Yehova, nenno hiyo nonnaahu. Ninnaroromela weera awo anoowera wakhala weera anoomuhiya Yehova waavarihela muteko nipuru nri poothe enthanleliwaaya.