Mwiri mmoha woorakama

Ohiyu omoha, mwene Nabukodonosori aakhalano yooloha ekina ni aahoova vantxipale. Owo aahaavekela asuweli awe weera emuleele yooloha ele etthu yaataphulelaaya. Mene khaavo a yaawo aawenre. Nto, mwene aalakela wuuluma ni Daniyeli.

Nabukodonosori aamweerenle ha Daniyeli: ‘Miyo koolohera mwiri. Owo waari wootepa orakama mpaka waaphiya wiirimu. Mapuro ootheene a elapo ya vathi, wannoonenya mwiri owo. Owo waakhalano makukhu ooreera ni soowiima sintxipale. Asinama wannaasivela wiitthuuwa vamuutuuxini wa mwiri owo, ni apalame yannapaka ipuru saya mutamphini mwa mwiri owo. Avinyaka, naakhumelela nlaika naakhuma wiirimu ni naaheera: ‘Mùhe mwiri ni mutase itamphi saya. Nto vatthayani ehivinxiwe exá ni mikakari saya, ni mutthuke exaya ni eyuma ni ekhopiri. Murim’aya wàrakamele atthu, ovahiwe murima wa enama yoluwa ni sivire mmuruni mwaya itempu 7. Mpaka akumi othene esuweleke wi Namusulú t’onlamula momweneni mwa atthu: ti yowo onawerya onvaha yole onamutthunaiye.’’

Nto Yehova aamweeriha Daniyeli osuwela etthu yaatthunaaya ohima yooloha ele. Daniyeli iiwexexakaru yooloha ele, aahoova vantxipale. Owo aamweerela mwene: ‘Miyo kaatthuna weera yooloha eyo yuulumeke woohima sa amwiittani anyu, mene eyo enuuluma woohima sa nyuwo pwiya. Mwiri mutokweene wuuhinwe, ti nyuwo pwiya. Nyuwo pwiya munooyeleela omwene anyu ni munoorowa otxaaka malaxi ntoko asinama. Mene, okhala weera nlaika nihimme weera ehiiwe exa ni mikakaari saya, nyuwo pwiya munootthikela okhala mwene.’

Evinreene eyaakha emoha, mwene Nabukodonosori eera eettaka vasulu va empa owannyawe, amutikhinaka Babilonia. Owo aaheera: ‘Nkoonani moota erenraaya esidade ela miyo kipankaaka. Miyo mwene oorerera waapwaha mamwene ootheene!’ Mooriipiha murima, emaara ene yeele naahiiwanyeya nsu naakhuma wiirimu neeraka: ‘Nabukodonosori! Vano weyo wooyeleela omwene aa.’

Emaara ene yeele, Nabukodonosori aathatuwa anepa ni aapatxera opaka itthu ntoko enama. Mwaha wa yeeyo, owo wannatthuneya okhuma owannyawe weera akhaleke ni inama otuphini. Maihi a mwene yaarakama vantxipale enkhala ntoko mapupha a xaaka, ni ikharu sawe saakhala ntoko ikharu sa xaaka.

Sivirakaru itempu 7, Nabukodonosori aatthikela okhala nnene, ni Yehova aamuhiya owo otthikela okhala mwene oBabilonia. Nabukodonosori aaheera: ‘Yehova mwene a wiirimu, ni owo onnaphwanela okokhoreliwa. Vano miyo koosuwela weera Yehova Namalamulela. Owo onnaaxuttiha atthu oowiisunnuwiha okhala oowiiyeviha, ni onnanvaha omwene mutthu ommutthunaawe.’