Miruku sa moota wootholathola nyaha

Soopakiwa sinroiheliwa anamwane

Asitiithi aakhalano muritti woowaaxuttiha anamwane aya woohima sa Yehova. (Aef. 6:⁠4) Weera yaakhavihere asitiithi, mareherero a Yehova ennakumihera iliivuru, iviidiyu ni itxipo. Asitiithi enrowa ovarihela moota heeni ikaruma iya weera yaaxuttihe anamwane aya?

• Nvolowe va site JW.ORG. Iwo nyuwo munoophwanya ikaruma ni iviidiyu sootheene sinroiheliwa anamwane.a Weera mphwanye, murowe va ekaixa ya epesquisa ni muttapunye nipuro nneera “Crianças” naari “Adolescentes.”

• Muthanle ele enrowa omusivela mwaninyu. Mpuwa mwa nipuro nno nneera “Crianças” nyuwo pooti othanla iviidiyu, itxipo, ni soopakiwa ikina sinkela waakhavihera anamwane anyu. Weera mphwanye mpesquisari nipuro nneera “Projetos para adoração em família.”

• Mwiihiyere etempu weera mutthekule ni anamwane anyu. Muhivariheleke muteko iviidiyu naari ikaruma sikina weera mwaninyu akhale owaatteliwa. Ohiya opaka eyo, mutthekule nuuwo woohima sa nyaha siri poothe ni simukhavihere okhalano onthamwene ni Yehova.