‘Yehova onoorowa onlipiha’ — Moota heeni?

1. Mwaha wa heeni arumeyi akhalayi yaawenraaya okhala oolipa?

BIBLYA onnaahima alopwana oororomeleya akhalayi okhala oowera ni oolipa. Nnaamweera yaari oolipa, ikwaha sikina awo khaisoona hiiho. Mwa ntakihero, emaara ekina mwene Davidi anniisoona okhala oolipa ntoko ‘mwaako’ menento ikwaha sikina owo ‘annariipiwa murima.’ (Nsal. 30:8 [30:7, NM]) Woohima sa Sansoni, owo aahikhalano ikuru sintxipale mwaha wooweera aahivahiwa ni munepa wootteela wa Muluku, nto nnaamweera vareene hiiho, owo aasuwela weera, aahikhaviheriwa ni munepa woottela wa Muluku, ‘ikuru sawe sammuhiya, ni aamukhala oolosowa akhalaka ntoko mulopwana piswa.’ (Aph. 14:5, 6; 16:17) Atthu ala yaari oolipa mwaha wooweera Yehova aahaava ikuru.

2. Mwaha wa heeni Paulo aahimmaawe weera aari oolosowa mwa emaara emoha-moharu okhala oolipa? (2 Akorinto 12:9, 10)

² Nave tho murummwa Paulo annahaawela ikuru sa Yehova. (Mmusome 2 Akorinto 12:9, 10.) Hiihaale ntoko antxipale a hiyo, murummwa Paulo annaviriha maxupo a mweekumini. (Agal. 4:13, 14) Ikwaha sikina, owo annatthuneya wiilipihera vantxipale weera apake ele eri yooreera. (Arom. 7:18, 19) Ni mwa ikwaha sikina owo annoova wa ele yaakela okhumelela. (2 Akor. 1:8, 9) Nnaamweera vareene hiiho, vaavo Paulo aakhalaawe ookhulumuwa, owo anniisoona okhala oolipa. Moota heeni? Yehova annanvaha ikuru aahaawelaawe weera avirihe maxupo.

3. Mpuwa mwa yoosoma ene yeela, ninrowa wiiwa waakhuliwa makoho heeni?

³ Yehova oolaihera weera onrowa onivaha ikuru ninhawelaahu weera nivirelele ovilela. (1 Ped. 5:10) Nto weera naakhele nikhavihero nno nintthuneya opaka eparte ahu. Mwa ntakihero, mutoore ti oneeriha weetta ekaaro, mene vakhala weera motorista khommunyikala acelerador, ekaaro eyo kheneetta. Emoha-moharu, Yehova ontthuna onivaha nikhavihero ninhaawelaahu, mene weera naakhele nikhavihero nno, nintthuneya opaka itthu sikina. Nto Yehova onnivaha eheeni weera anlipihe? Nave heeni nintthuneyaahu opaka weera naakhele ikuru iyo? Ninrowa woona waakhuliwa wa makoho ala vaavo ninrowaahu woona moota Yehova aamulipinhaawe mprofeti Yona, Maria ameyawe Yesu ni murummwa Paulo. Nave tho, nnoorowa woona moota Yehova onvirelelaawe waalipiha arumeyi awe olelo va.

MPHWANYE IKURU MOORWEELA MWA NIVEKELO NI OMUSOMA BIBLYA

4. Moota heeni ninrowaahu waakhela ikuru sa Yehova?

⁴ Hiyo nnoowera waakhela ikuru sa Yehova emaara yeeyo nimmwaattamelaahu moorweela mu nivekelo. Yehova onimwaakhula mavekelo ahu onivahaka ‘owera otokweene.’ (2 Akor. 4:7) Opwaha mwa yeeyo, hiiyo tho pooti waakhela ikuru seiyo ninhaawelaahu emaara yeeyo nimmusoomaahu Biblya ni ophimelela ele ninsomaahu moomaaleleya. (Nsal. 86:11) Mitthenka sa Yehova siri mBiblyani, sookhalano ‘owera.’ (Aheb. 4:12) Emaara yeeyo ninvekelaahu wa Yehova ni ninsomaahu masu awe, hiyo ninnaakhela ikuru ninhaawelaahu weera niwere ovilela, ovirelela okhala oohakalala ni okwanihera yoothanleliwaahu yooxupa. Vano nrowe noone moota Yehova aamulipinhaawe mprofeti Yona.

5. Mwaha wa heeni mprofeti Yona aahaawelaawe ikuru?

⁵ Mprofeti Yona annahaawela ikuru. Yona aatthawela ottai vaavo Yehova anvanhaawe muritti wootepa oxupa. Mwa yeeyo, owo aahanle vakhaani okhwa vaavo yaakhumelenlaaya epheyo etokweene, nave tho owo aahela veerisani ikumi sa atthu akina. Vaavo ale yaamweettiha barku yanvonyenraaya mmaahini, owo aakela nipuro nenno ahintalaawe ophiya, mmirimani mwa ehopa. Neereke nyuwo munnawera wuupuwela moota Yona iisoonelaawe? Neereke owo uupuwela weera aamukela okhwa? Neereke owo uupuwela weera Yehova oomunyanyala? Moohihovela, Yona aariipiwa murima vantxipale.

6. Moovarihana ni yoolepa ya Yona 2:1,2,7, eheeni yaamulipinhe Yona emaara yeeyo aaraawe mmirimani mwa ehopa?

⁶ Etthu heeni Yona aapankaawe weera aakhele ikuru sa Yehova emaara yeeyo aaraawe meekhaawe mmirimani mwa ehopa? Etthu yoopatxera Yona aapankaawe waari ovekela wa Yehova. (Mmusome Yona 2:1, 2, 7.) Yona khaamwiiwelenle Yehova, nnaamweera vareene hiiho owo annaroromela weera Yehova aamwiiwa nivekelo nawe noowiiyeviha noonihera weera aattharuwa. Owo tho aaphimelela soolepa sa mBiblyani. Ninsuwela moota heeni eyo? Mwaha wooweera, mwa nivekelo nawe nimphwanyaahu va ekapiitulu 2 ya Yona, owo aavarihela masu yaawo nimphwanyaahu va Nsalmu. (Mwa ntakihero, mulikanxere ni Yona 2:2 ni Nsalmu 69:2 [69:1, NM]; 86:7.) Moohihovela, Yona annasuwela nnene sene soolepa. Ni emaara yeeyo aaphimelelaawe iversu iye vaavo eereriwaawe, Yona annaroromela weera Yehova aamurowa omukhavihera. Yehova aavuluxa ekumi ya Yona, ni muhoolo mwaya owo aari oolikaneene weera akwanihere muteko aathanleliwaawe ni Yehova. — Yona 2:10–3:4.

7-8. Eheeni yaamulipinhe Zhiming vaavo aavirihaawe maxupo?

⁷ Ntakihero na Yona pooti onikhavihera vaavo ninvirihaahu maxupo. Mwa ntakihero, munna mmoha onkhala oTaiwan oniitthaniwa Zhimingb annahaawa ni maxupo mantxipale mweekumini mwawe. Opwaha mwa yeeyo, amusi awe akina ennamuthokorora moohixariya mwaha wa nroromelo nawe. Mene mwaha wa nivekelo ni omusoma Biblya, owo onnaphwanya ikuru sa Yehova. Owo ohimme ha, “Ikwaha sikina vaavo ononeyaaya ntoko maxupo aka khemmala, miyo kinnaxupeya mpakana ohiwera wiiwehexexa, nave tho ohiwera opaka yoosomaaka ya omeekha.” Nnaamweera vareene hiiho, Zhiming khakhulumunwe. Owo onnavirelela wuuluma eeraka, “Mwa soothesene, kinnanvekela Yehova, muhoolo mwaya kinnakuxa ifoone kihele owaaru kiniwelela itxipo sa Omwene, ikwaha sikina kinneepa itxipo iyo vathi-vathi mpakana omaaleleya, nto kapaka haawo kinnapatxera omusoma Biblya.”

⁸ Yoosoma ya omeekha yaamukhavihera vantxipale Zhiming. Mwa ntakihero, emaara yeeyo aalamaawe eretta ya wooperariwa, meediku mmoha aamweerela weera wannatthuneya oheliwa ephome mwaha wooweera igloobu sawe sooxeera saayevaxa. Mene ohiyu omoha ahinaaye wooperariwa, Zhiming aasoma woohima sa murokora mmoha aavirihe eretta ene yeeyo, ni murokora ole igloobu sawe saayevaxa opwaha sa Zhiming. Nnaamweera vareene hiiho, murokora ole khaakhulenle oheleliwa ephome ni murokora ole aalama. Menento, yooweereya ele yaamulipiha Zhiming ovirelela okhala oororomeleya.

9. Wakhala weera nyuwo mooxupeya mwaha wa maxupo munvirihaanyu, eheeni nyuwo muntthuneyaanyu opaka? (Nwehe efootu.)

⁹ Neereke mootoko oviriha maxupo mpaka wootxeela omuleela Yehova itthu munvirihaanyu? Neereke mootoko oxupeya mpaka ohoona yooweera mpaka wootxeela omusoma Biblya? Muupuweleke weera Yehova woosuwela nnene ele munvirihaanyu. Nnaamweera nyuwo mpakaka nivekelo nikhaaneene, muroromeleke weera Yehova onimoovahani yeele nyuwo munhaawelaanyu. (Aef. 3:20) Wakhala weera maxupo amweekumini ennooxupihani omusoma Biblya, mweerereke omwiiwelela Biblya oogravariwa, naari irevista sahu sikina. Nave tho nyuwo pooti okhavihereya vaavo muniiwelelaanyu itxipo sa Omwene naari moonelaka iviidiyu va jw.org. Vaavo munanvekelaanyu Yehova ni munaasa waakhuliwa mBiblyani ni mwa irevista sikina, onkhala ntoko nyuwo munanwopa Yehova weera oolipiheni ni owo onoopaka eyo.

MPHWANYE IKURU MOORWEELA MWA ASINNA NI ASIROKORA

10. Asinna ni asirokora ennilipiha moota heeni?

¹⁰ Yehova pooti waavarihela muteko asinna ni asirokora weera enlipihe. Awosa pooti okhala ‘naapwiipwi a nimaaliho’ vaavo ninvirihaahu maxupo naari vaavo nihinweraahu okwanihera yoothanleliwaahu. (Akol. 4:10, 11) Etempu ninxupeyaahu, ninnatthuneya okhalano asinthamwene yaawo enkela onikhavihera ‘etempu ya maxupo.’(Mir. 17:17) Emaara ninkhalaahu ooxupeya, asinna pooti onikhavihera weerutthuni, mmuupuweloni ni moomunepani. Nrowe noone moota Maria ameyawe Yesu, yaalipihinwaaya ni atthu akina.

11. Mwaha wa heeni Maria aatthuneyaawe okhalano ikuru?

¹¹ Maria annatthuneya okhalano ikuru weera akwanihe opaka yootthuna ya Yehova, ni okwanihera yoothanleliwa aavahinwaawe. Nkuupuwelani moota owo aaxupeñyaawe emaara yeeyo nlaika Gabriyeli aamuleelaawe woohima ya yoothanleliwa ele. Maria aari mwali oohitheliwa, menento owo aamurupala. Owo khatonko omukosoopa, naari neere, khatonko omuhuwa mwaana, mene annatthuneya omukosoopa mwaana mmoha yoowo aarowa okhala Mesiya. Okhala weera aari muthiyana oohipatxeriwa, Maria aarowa omwiiwanyeiha moota heeni Yosefe yoowo aakela omuthela? — Luka 1:26-33.

12. Moovarihana ni Luka 1:39-45, Maria aawenre hayi okhalano ikuru seiyo aahaawelaawe?

¹² Maria aawenre moota heeni okwanihera yoothanleliwa ele yootepa oxupa? Owo aahaasaasa nikhavihero naatthu akina. Mwa ntakihero, Maria anvekela nlaika Gabriyeli weera amwiiwanyeihe moota onkelaawe owere okwanihera yoothanleliwa ele. (Luka 1:34) Opwaha mwa yeeyo, Maria aapaka mukwaha “arowaka omwako” muttetthe wa oYuda weera aamuxekure munnawe eeriwa Elizabethi. Mene mukwaha ole waavareleya muteko. Elizabethi aamuttottopela Maria ni aahuupuxeriwa weera uulume sa eprofesiya woohima sa mwaana a Maria. (Mmusome Luka 1:39-45.) Maria aahima weera Yehova aamukhavihera ni ‘moono awe wa ekuru.’ (Luka 1:46-51) Yehova anvarihela muteko Gabriyeli ni Elizabethi weera emulipihe Maria.

13. Eheeni yeereñye ni murokora oBolivia vaavo aavekenlaawe nikhavihero naasinna ni asirokora?

¹³ Hiihaale ntoko Maria, hiiyo tho pooti owera okhalano ikuru nikhaviheriwaka ni asinna ni asirokora. Dasuri murokora mmoha yoowo onkhala oBolivia, annatthuna ikuru. Vaavo apapawe yaaphwanyinwaaya ni eretta mpaka obaxari hospitaale, Dasuri aathanla waakosoopa apapawe nnene sene. (1 Tim. 5:4) Mene opaka eyo, khaiyene yaari etthu yookhweya. Owo ohimme ha, “Ikwaha sintxipale, miyo kuupuwela weera nkaarowa owera ovirelela.” Neereke owo aavekela nikhavihero? Woopatxerani hooye. Owo onnahima, “Miyo nkaatthuna waaxupa asinna, miyo kuupuwela weera ‘Yehova paahi ti anrowa okivaha ikuru kinhaawelaaka.’ Mene noovira etempu, miyo kaahoonelela weera ohikhala vamoha ni asinna, waakhala ntoko keerera oreherera maxupo ale meekhaaka.” (Mir. 18:1) Dasuri aalakela waalepela asinthamwene awe aaleelaka maxupo anvirihaawe. Owo ohimme ha, “Miyo nkaano itthu sintxipale soohima sa moota asinna ekilipinhaaya. Awo yannaruuha yootxa hospitaale nave yannasoma iversu sikina sa mBiblya vamoha ni miyo. Ti woohakalaliha vantxipale osuwela weera miyo nkakhanle meekhaaka. Hiyo ninneerela eparte emusi etokweene ya Yehova, emusi yeeyo ennookolela ntata, winla vamoha ni hiyo ni owanano maxupo ahu vamoha.”

14. Mwaha wa heeni ontthuneyaaya waakhulela nikhavihero na asitokweene a mmulokoni?

¹⁴ Moota mukina Yehova onvarihelaawe muteko weera anivahe ikuru, ori moorweela mwa asitokweene a mmulokoni. Awo yoovaha yootepa oreera, mwaha wooweera ennanikhavihera ni ennanimaaliha. (Yes. 32:1, 2) Nto emaara yeeyo munxupeyaanyu muntthuneya waaleela asitokweene a mmulokoni. Ni muhuupuweleke veeli weera mwaakhulele nikhavihero munvahiwaanyu ni asitokweene a mmulokoni. Yehova onnaavarihela asitokweene a mmulokoni weera enlipihe.

MPHWANYE IKURU MOORWEELA MWA YOOWEHERERAAHU YA MUHOOLO

15. Yooweherera heeni Akristu eraayano?

¹⁵ Yoowehereraahu eri mBiblyani pooti onivaha ikuru ni onikhavihera okhala oolipa. (Arom. 4:3, 18-20) Akristu ootheene yaakhalano yooweherera yootepa oreera, yookhala ni ekumi wa mahiku ootheene, naari elapo ela ya vathi naari wiirimu. Yoowehereraahu ennanikhavihera nnaamweera nikumanaka ni maxupo, ni ennanlipiha olaleera mitthenka sooreera ni okwanihera miritti ninvahiwaahu mmulokoni. (1 Ates. 1:3) Ti yooweherera ene yeela yaamulipinhe murummwa Paulo.

16. Mwaha wa heeni murummwa Paulo aahaawelaawe ikuru?

¹⁶ Murummwa Paulo annatthuneya okhalano ikuru sintxipale. Wa ekaartaawe wa Akorinto owo aahiilikanxera ni eyoopwe yoohilipa. Owo ‘annahooxiwa,’ ni ‘annavalavelihiwa’ owo tho ‘annasondiwa’ ni ‘annamorihiwa.’ Ikwaha sintxipale owo aahalela okhwa. (2 Akor. 4:8-10) Paulo aalempe masu ala emaara eettaawe mukwaha wanaararu wa muteko awe wa omisiyonaariyu. Opwaha mwa yeeyo, owo khaasuwela weera muhoolo mwaya anviriha maxupo ootepaxa woopiha opwaha ale aavirinhaawe. Owo aahasuliwa ni egrupu emoha ya atthu, owaleliwa, omiriwa wa nikula aawenlaawe ni oviriha etempu yintxipale awalelinweene mukadeya.

17. Moovarihana ni 2 Akorinto 4:16-18, eheeni yaamulipinhe Paulo emaara aavirihaawe maxupo?

¹⁷ Paulo aakhalano ikuru aahaawelaawe weera awere oviriha maxupo aakumanaaweno mwaha wooweera annawehexexa yoowehereraawe. (Mmusome 2 Akorinto 4:16-18.) Owo aahaaleela akristu oKorinto weera erutthu awe ‘yannuntta’ mene nnaamweera vareene hiiho khaarowa okhulumuwa. Paulo annwehexexa yoowehereraawe ya muhoolo. Yoowehereraawe yookhano ekumi yoohimala wiirimu, yaari ‘etthu yaamulipiha vantxipale,’ mwa yeeyo owo aathanla oviriha maxupo eri poothe. Paulo annaphimelela yoowehereraawe, ni mwaha woopaka eyo, owo annakhala ‘munyowani nihihu ti nihiku.’

18. Yooweherera ya muhoolo yaalipinhe moota heeni nroromelo na Tihomir ni amusi awe?

¹⁸ Yooweherera ya muhoolo yaamulipiha munna mmoha onkhala oBulgaria, oniitthaniwa Tihomir. Iyaakha sa muttuli, munnawe ommutthara oneeriwa Zdravko, aahimpaka acidente ni aakhwa. Nto mwaha wa yeeyo, Tihomir aaxupeya vantxipale. Nto owo ni amusi awe weera evilele oxupeya waya, yaapatxera wuupuwelela moota ovinyererihiwa wa atthu onrowaaya okhala. Owo ohimme ha: “Mwa ntakihero, hiyo nannuupuwelela woowi neeraahu nimphwanye Zdravko, eyootxa heeni naarowaahu omwaapeela ni atthu heeni naarowaahu waawopa emaara yeeyo naarowaahu opaka efestaahu yoopatxera, ni opwaha mwa yeeyo, sooweereya heeni naakelaahu omuleela seiyo seereñye mmahiku oomalihera.” Tihomir onnavirelela ohimaka weera owehexexa yooweherera ya muhoolo, yaahalipiha amusi awe onweherera Yehova weera ononvinyereriya munnawe mwa etempu yooreerela.

19. Etthu heeni nintthuneyaahu opaka weera nilipihe yoowehereraahu ya muhoolo? (Nwehe efootu.)

¹⁹ Nyuwo munrowa olipiha hayi yoowehereraanyu ya muhoolo? Waari weera yoowehereraanyu okhala elapo ya vathi mahiku ootheene, musomeke soolepa sa mBiblyani sinuuluma moota Eparaisu enrowaaya okhala ni mphimeleleke. (Yes. 25:8; 32:16-18) Muupuweleke moota ekumi enrowaaya okhala mparaisu, nave tho nyuwo mureene weiwo. Mwa ntakihero, nyuwo mummoona taani? Itthu heeni muniiwaanyu? Muniisoonela hayi? Etthu enrowa wookhaviherani wuupuwelela Eparaisu, ori oweha ifootu simphwanyeya mu irevista sahu, ni nwehe iviidiyu sa itxipo ntoko, No Mundo Que Aí Vem,Tthiri Ehaattamela, naari Muupuweleke elapo yoohikhala ohaawa. Wakhala weera ninniihiyera etempu weera nuupuweleleke moota ekumi enroowaaya okhala mparaisu, maxupo ahu enrowa okhalaka ‘ookhweya oviriha.’ (2 Akor. 4:17) Yooweherera Yehova onivanhaawe, ennanlipiha.

20. Ninrowa okhalano hayi ikuru nnaamweera niisoonaka okhala ookhulumuwa?

²⁰ Nnaamweera hiyo nikhulumuwaka, ninnasuwela weera, nikhaviheriwaka ni Yehova ‘nnookhalano ikuru.’ (Nsal. 108:14 [108:13, NM]) Yehova onnanivaha sootheene ninhaawelaahu weera naakheleke ikuru sawe. Nyuwo mwaahaawelaka nikhavihero weera mukwanihere yoothenleliwaanyu, nwere oviriha maxupo nave ovirelela ohakalala, mmuhulele murimaanyu Yehova moorweela mwa nivekelo ni mwaasaase miruku sawe moorweela mwa yoosoma ya Biblya ya omeekha. Mwaakhulele nikhavihero ni nlipiho asinna enoovahaayani. Mwiihiyereke etempu weera mphimeleleke moota ekumi enrowaaya okhala muhoolo. Mwapaka haawo, ntoko Akolosi 1:11 onhimaawe, nyuwo ‘munoolipihiwa ni owera wootheene wa Yehova, weera nwere ovilela ni opixa murima, ni ohakalala.’