Mwaakhavihere anamasoma anyu a Biblya okhala oolikaneene waakihera ekhaikhai

1-2. (a) Mwaha wa heeni anamasoma akina a Biblya enoovaaya waakihera ekhaikhai? (b) Eheeni ninrowaahu othokorora mwa yoosoma ene yeela?

NEEREKE sookhala itthu saawootxeelihani nyuwo okhala Namoona a Yehova? Pooti weeraka nyuwo mwannoova weera makoleeka anyu oomutekoni, asinthamwene anyu naari amusi anyu yaamoorukunuwelani, naari apaale muupuwela weera khamwaarowa owera okhala moovarihana ni malamulo a Muluku. Mwa yeeyo, nyuwo pooti owera wiihela nipuro na anamasoma anyu a Biblya yaawo enoova opaka yoothanla yookhala Namoona a Yehova.

² Yesu aasuwela weera woova wammootxeeliha mutthu okela vahoolo mwa mukhalelo woomunepani. (Math. 13:20-22) Mene owo khaahiñye ale yoova omutthara, ohiya opaka eyo owo aahaakhavihera atthareli awe, aakhaviheraka (1) woonelela itthu saawootxeeliha orowa vahoolo, (2) wunnuwihera nsivelo naya ni Yehova, (3) othanlela itthu yaarowaaya ohelaka nipuro noopatxera ni (4) owina maxupo aya. Moota heeni ninrowaahu ovarihela muteko ele Yesu aalenlaawe atthareli awe vaavo ninvarihelaahu muteko eliivuru Mukhaleno Ekumi Yoohimala! weera nimukhavihere namasoma a Biblya waakihera ekhaikhai?

MMUKHAVIHERE NAMASOMA A BIBLYA WOONELELA ITTHU SIMMOOTXEELIHA OROWA VAHOOLO

3. Etthu heeni yaamootxeeliha Nikodemu okhala mutthareli a Yesu?

³ Nikodemu yoowo aari muhooleli aayuda aaviriha maxupo weera akhale mutthareli a Yesu. Sivinreene miyeeri 6 Yesu apatxenreene muteko awe woolaleera, Nikodemu toonelenlaawe weera Yesu aari namathoonyera a Muluku. (Yoh. 3:1, 2) Menento Nikodemu aathanla okumana ni Yesu moowiipithiheya “mwaha woowoova ayuda.” (Yoh. 7:13; 12:42) Pooti weeraka owo uupuwela weera aamuyeleela itthu sintxipale mwaha wookhala mutthareli a Yesu.a

4. Moota heeni Yesu aamukhavihenraawe Nikodemu wiiwexexa etthu Muluku aatthunaawe weera owo apake?

⁴ Nikodemu aasuwela nnene nlamulo, mene owo aatthuneya nikhavihero weera iiwexexe ele Yehova aawehereraawe wa yoowo. Yesu aamukhavihenre moota heeni? Yesu aahiihiyera etempu vaavo Nikodemu aaronwaawe okumana nuuwo ohiyu. Yesu aamuleela moohikhuwa, etthu owo aatthuneyaawe opaka weera akhale mutthareli a Yesu ntoko: ottharuwa soottheka sawe, opatisiwa mmaahini ni woonihera nroromelo wa Mwaana a Muluku. — Yoh. 3:5, 14-21.

5. Moota heeni ninrowaahu waakhavihera anamasoma ahu a Biblya woonelela itthu sinwootxeeliha orowa vahoolo?

⁵ Nnaamweera namasoma a Biblya asuwenleene nnene sene soolepa, owo pooti ohaawela nikhavihero weera oonelele itthu simmootxeeliha orowa vahoolo. Muteko wamulaponi naari otthara-tthariwa ni amusi awe, pooti omootxeeliha okhalano sooluluwanya sa omunepani. Mwa yeeyo, mukhaleke oolikaneene omukhavihera namasoma anyu a Biblya. Nyuwo pooti onwopa weera mwatxe vamoha naari opaseyari. Nyuwo pooti ottottela mureerelo etempu eyo weera mmukhavihere okhala ootaphuwa ahimaka maxupo awe. Mmooperereke namasoma anyu a Biblya opaka matxentxo antthuneya, ohiya weera oosivelihekeni nyuwo, mene weera oonihere nsivelo nawe wa Yehova.

6. Moota heeni nyuwo munrowaanyu omukhavihera namasoma a Biblya okhala oolikaneene waakihera ekhaikhai? (1 Akorinto 16:13)

⁶ Namasoma a Biblya aaroromelaka weera Yehova onoowera omukhavihera okhala moovarihana ni Biblya, owo onnakhala oolipa murima weera avareleke muteko ele onxutteraawe. (Mmusome 1 Akorinto 16:13.) Muteko anyu woomuxuttiha Biblya pooti olikanxeriwa ni muteko wa prusoore. Muupuwelaka mahiku nyuwo mwaasoma anyu, prusoore heeni oosivelanixa? Moohihovela aari prusoore yoole oopixa murima yoole ookhavihenreni nyuwo ororomela itthu munweraanyu. Emoha-moharu, namaxuttiha nnene a Biblya khaiyene paahi animweera oxuttiha ele Muluku ontthunaawe weera owo apake, mene ti yoole-tho ommuroromeliha namasoma awe a Biblya weera akhaviheriwaka ni Yehova onoowera opaka matxentxo mweekumini mwawe. Vanonto, moota heeni nyuwo munkelaanyu opaka eyo?

MMUKHAVIHERE NAMASOMA ANYU A BIBLYA WUNNUWIHERA NSIVELO NAWE NI YEHOVA

7. Moota heeni Yesu aakhavihenraawe ale yaamwiiwa waatxeerera nsivelo naya ni Yehova?

⁷ Yesu aasuwela weera okhalano nsivelo ni Muluku waamwaakhavihera atthareli awe ovarihela muteko ele yaaxuttenraaya. Owo ikwaha sintxipale annaaxuttiha atthareli awe itthu saarowa waakhavihera waatxeerera nsivelo ni Tiithi aya a wiirimu. Mwa ntakihero, owo aamulikanxera Yehova ni tiithi onaavaha itthu sooreera anamwane awe. (Math. 7:9-11) Atthu akina yaamwiiwa Yesu, pooti weeraka khiyaakhanleno tiithi aari a nsivelo. Nkuupuwelani moota awo yiisoonenlaaya vaavo yaamwiiwaaya Yesu avahaka ntakihero na tiithi oopixa murima aamwaakhenle mwanawe aarino mukhalelo woonanara. Awo yannawera woona opixa murima wa Yehova wa anamwane awe a elapo ya vathi. — Luka 15:20-24.

8. Moota heeni munrowaanyu omukhavihera namasoma anyu a Biblya wunnuwihera nsivelo nawe ni Yehova?

⁸ Nyuwo pooti omukhavihera namasoma anyu a Biblya wunnuwihera nsivelo oraaweno ni Yehova muttittimiheraka mikhalelo sa Yehova emaara mummusomihaanyu. Mwa yeele eri yoosoma, mmukhavihereke olikanxera ele onsomaawe ni nsivelo Yehova oraaweno nuuwo. Mwaasomaka woohima sa yoowoopola, mwiiwanyeiheke moota yoowopola eyo envareleyaaya muteko wa yoowo. (Arom. 5:8; 1 Yoh. 4:10) Pooti weeraka namasoma anyu a Biblya onookhalano ntthuno noomusivela Yehova uupuwelaka nsivelo na Yehova wa yoowo meekhaaweru. — Agal. 2:20.

9. Etthu heeni emukhavihenre mulopwana mmoha oneeriwa Michael opaka matxentxo mweekumini mwawe?

⁹ Moone yooweereya ya Michael a wIndonesia yoowo ohuuwale mweekhaikhaini mene khaapatisinwe. Emaara aaraaweno iyaakha 18 owo aarowa elapo ekina weera avareke ntoko motorista ooweettiha ikamiyawu. Muhoolo mwaya aathela, mene aahiya emusi awe anvirelela okhala elapo ele avaraka muteko. Etempu ene yeele, amwaarawe ni mwanawe mwaamuthiyana yaapatxera omusoma Biblya ni yannarowa vahoolo. Amannye Michael ekhwaakaru, owo aalakela otthikela owaani weera aakosoopeke apapawe ni aapatxera omusoma Biblya. Emaara aathokororaawe eparte eneera, “Weera muxuttere sintxipale” ya eliivuru Mukhaleno Ekumi Yoohimala! yoosoma 27, yoosoma eyo yanvara murima Michael. Emaara aaphimelelaawe woohima sa moota Yehova iisoonelaawe vaavo aamoonaawe Mwanawe ahaawaka, Michael aahinla. Owo ohunnuwihera oxukurela wawe yoowoopola ni eyo yoomweeriha otxentxa mukhalelo awe wa ekumi ni opatisiwa.

MMUKHAVIHERE NAMASOMA ANYU A BIBLYA OTHANLELA ITTHU ONROWAAWE OHELA NIPURO NOOPATXERA

10. Moota heeni Yesu aakhavihenraawe atthareli awe oopatxera othanla itthu yaarowaaya ohelaka nipuro noopatxera? (Luka 5:5-11) (Nwehe-tho efootu.)

¹⁰ Atthareli oopatxera, moowaakuveya awo yaamusuwela Yesu ntoko Mesiya yoowo aalaiherinwe, menento awo yaatthuneya nikhavihero weera eheleke nipuro noopatxera muteko woolaleera. Pedru ni Andreya yeera ereene atthareli mwa etempu vakhaaniini vaavo Yesu aawompaawe weera emutthareke mwa etempu yootheene. (Math. 4:18, 19) Awosa yeera evaraka muteko aya woototha ihopa yoowo waakhumela nnene, apaale yaavara vamoha ni Yakobe ni Yohani. (Mar. 1:16-20) Emaara Pedru ni Andreya moowaakuveya “[yaahiñyaaya] matthavi aya”, onooneya weera awo yampaka palanu a moota yeeraaya etxiheke emusi aya emaara yeeyo yeeraaya emutthareke Yesu. Etthu heeni yaaweerinhe opaka matxentxo ala? Yooweereya ya Luka ennahima weera Yesu aapaka mwiiriira waalipinhe nroromelo naya weera Yehova ookhalano owera wookosoopa soohaawela saya. — Mmusome Luka 5:5-11.

11. Moota heeni ninrowaahu ovarihela muteko sooweereya sahu sa mweekumini weera nlipihe nroromelo na anamasoma ahu a Biblya?

¹¹ Hiyo khaninwera opaka mwiiriira ntoko Yesu aapakaawe, mene hiyo pooti omuleela namasoma ahu sooweereya sinoonihera moota Yehova onaakhaviheraawe atthu ale eniilipihera ohela Omwene nipuro noopatxera mweekumini mwaya. Mwa ntakihero, neereke nyuwo munnuupuwela moota Yehova ookhavihenraaweni vaavo mwaapatxeraanyu woonela mithukumano? Pooti weeraka nyuwo wannatthuneya wuuluma ni patarawu anyu ni omuleela mwaha wa heeni mwahaarowaanyu ovaraka iwoora sintxipale, wakhala weera eyo apaale yannavoleela moota moonelaanyu mithukumano. Emaara mummuleelaanyu namasoma anyu sooweereya sanyu, mmuleeleke moota nroromelo nanyu naalimpaaya vaavo moonaanyu moota Yehova aakhaviheraawe yoothanla anyu ya ohela nipuro noopatxera mweekumini mwanyu, onvarela.

12. (a) Mwaha wa heeni nintthuneyaahu waavekelaka asinna ni asirokora oovirikana weera enihoole naarowaka opakiha yoosoma ya Biblya? (b) Moota heeni munrowaanyu ovarela muteko iviidiyu weera mmuxuttihe namasoma anyu moophwanelela? Nvahe ntakihero.

¹² Namasoma anyu a Biblya onoottottela-tho mureerelo owiiwa asinna ni asirokora ehimaka moota awo epankaaya matxentxo mweekumini mwaya weera eheleke nipuro noopatxera onvarela Yehova. Mwa yeeyo, mwaawopeke asinna ni asirokora oovirikana weera yoohoolekeni vaavo munrowaanyu opakiha yoosoma ya Biblya. Nave-tho mwaavekeleke weera ehime moota yaakhulenlaaya ekhaikhai ni eheeni epankaaya weera eheleke muteko wa Yehova nipuro noopatxera mweekumini mwaya. Opwaha mwa yeeyo, nyuwo vamoha ni namasoma anyu, mwiihiyereke etempu weera mooneleke iviidiyu sa liivuru Mukhaleno Ekumi Yoohimala! eparte eneera, “Weera muxuttere sintxipale” naari “Weera musuwele itthu sintxipale.” Weera nlikanxere, emaara munkelaanyu osoma yoosoma ya 37, nyuwo pooti ohima iparte sootthuneya sa eviidiyu eneera, Yehova onnakosoopa soohaawela sahu.

MMUKHAVIHEREKE NAMASOMA ANYU OWINA MAXUPO

13. Moota heeni Yesu aareherenraawe atthareli awe wa maxupo ootthara-tthariwa?

¹³ Yesu aahaaleela atthareli awe ikwaha sintxipale weera yaamurowa otthara-tthariwa ni atthu akina waahela mpuwa amusi aya. (Math. 5:11; 10:22, 36) Emaara Yesu aahalelaawe omaliha muteko awe, owo aahaaleela atthareli awe weera yaamurowa oviriha maxupo mpaka wiiviwa. (Math. 24:9; Yoh. 15:20; 16:2) Owo aahaaleela weera ekhaleke oowiikosoopa mmutekoni mwaya woolaleera. Nave-tho aahaaleela weera khiwaatthuneya onyakulihana ni atthu ale yahaakhulela iye yaalaleyaaya ni weera ekhaleke oowiikosoopa weera evireleleke ovara muteko woolaleera.

14. Moota heeni ninrowaahu omukhavihera namasoma ahu wiireherera wa maxupo ootthara-tthariwa? (2 Timotheyo 3:12)

¹⁴ Hiyo pooti omukhavihera namasoma a Biblya wiireherera weera awere oviriha maxupo ootthara-tthariwa, nimuleelaka etthu owo ontthuneyaawe owehereraka wa makoleeka awe oomutekoni, wa asinthamwene awe naari wa amusi awe. (Mmusome 2 Timotheyo 3:12.) Makoleeka awe makina, pooti omutheyaka mwaha wa makhalelo awe a viinaano a ekumi. Akina pooti othorihiwa ni amusi aya mwaha wa soororomela saya sinvarihana ni Biblya. Wakhala weera hiyo nnimwaakhavihera anamasoma ahu a Biblya wiireherera viinaano maxupo awo ehinaaye, awo enookhala oolikaneene vaavo maxupo awo enrowaaya opatxera.

15. Eheeni enrowa omukhavihera namasoma a Biblya oviriha maxupo ootthara-tthariwa ni amusi awe?

¹⁵ Woohima sa otthara-tthariwa ni emusi, mmukhavihere namasoma anyu a Biblya woonelela mwaha wa heeni apaale amusi awe enrowaaya oxupeya. Pooti weeraka awo enuupuwela weera mwanaya oohapuxiwa, naari pooti weeraka awo erookhalano moonelo woohireerela woohima sa Anamoona a Yehova. Mpaka amusi akina a Yesu yaawo aasivelaawe, khiyaasiveliwa ni ele Yesu aapakaawe yuupuwelaka weera aathatuwa anepa. (Mar. 3:21; Yoh. 7:5) Mmukhavihere namasoma anyu a Biblya okhala oopixa murima ni wuuluma mooreerela ni amusi awe.

16. Moota heeni ninrowaahu omukhavihera namasoma ahu a Biblya wuuluma woohima sa nroromelo nawe mooreerela?

¹⁶ Nnaamweera amusi awe namasoma anyu yooniheraka ntthuno, owo ontthuneya okhala amiruku ahaaleelaka itthu sootheene emaara emoha paahi. Wakhala weera onimwaaleela itthu sootheene emaara emoha paahi, amusi awe pooti woona okhala wooxupa ni ohitthuna-tho otthekula veeli woohima sa mwaha owo. Tivawonto, mmooperereke namasoma anyu a Biblya weera aaleeleke vakhaani-vakhaani soororomela sawe weera awo ekhaleno ntthuno nootthuna-tho wiiwa ekwaha ekina. (Akol. 4:6) Apaale owo pooti opaka eyo aawopaka weera exekure esite ahu jw.org. Eyo enimweeriha weera amusi awe awo yaasuwele Anamoona a Yehova vakhaani-vakhaani.

17. Moota heeni nyuwo munrowaanyu omukhavihera namasoma a Biblya owina miyoonelo soonanara sa atthu woohima sa Anamoona a Yehova? (Nwehe-tho efootu.)

¹⁷ Nyuwo pooti onvarihela muteko jw.org nipuro nneera “Perguntas frequentes” weera mmukhavihere namasoma anyu wiireherera moota woowaakhula mookhweya makoho onrowaawe opakeliwaka ni amusi awe naari ni makoleeka awe oomutekoni. (2 Tim. 2:24, 25) Okhwipi wa yeele eri yoosoma ya eliivuru Mukhaleno Ekumi Yoohimala!, muuluuleke eparte eneera, “Atthu akina aneera.” Mmukhavihereke namasoma anyu a Biblya winsayari moota woowaakhula avarihelaka muteko masu awe. Muhooveleleke onvaha miruku woohima sa moota wooreherera waakhula wawe. Miruku iya soovareleya muteko sinoorowa omukhavihera waakihera nroromelo nawe.

18. Moota heeni munrowaanyu omooperera namasoma anyu a Biblya wuuluma woohima sa nroromelo nawe mmutekoni moolaleera? (Matheyo 10:27)

¹⁸ Yesu aawooperera atthareli awe weera elaleyeke mitthenka sooreera woohiipithiha. (Mmusome Matheyo 10:27.) Wakhala weera namasoma anyu a Biblya onimwaakuveya opatxera wuuluma woohima sa nroromelo nawe, owo onimwaakuveya oxuttera omuroromela Yehova. Moota heeni nyuwo munrowaanyu omukhavihera namasoma anyu a Biblya okhalano yooluluwanya ene yeeyo? Wakhala weera muloko anyu yoohimmwa weera enookhala ekampaanya ya muteko woolaleera, mmooperere namasoma anyu wuupuwelela etthu ontthuneyaawe opaka weera akhale namalaleera. Mmuleeleke mwaha wa heeni atthu akina enoonaaya okhala wookhweya opatxera olaleera emaara ya ekampaanya. Owo-tho onoorowa ottottela mureerelo iparte simpakiwa mmithukumanoni sa eriyari ya esemana. Vaavo oniilipiheraawe okwanihera yoolakela awe eyo, owo onooxuttera wuuluma woohima sa soororomela sawe ni nroromelo.

MOONIHERE WEERA MUNNAMUROROMELA NAMASOMA ANYU A BIBLYA

19. Moota heeni Yesu oonihenraawe weera annaaroromela atthareli awe, ni moota heeni ninrowaahu omutakiha?

¹⁹ Yesu ahaakunveene otthikela wiirimu, owo aahaaleela atthareli awe weera aamukhala vamoha naawo. Awo khiyaasuwela weera Yesu aahima orowa waya wiirimu. Nnaamweera vareene hiiho, owo aawehexexa ororomeleya waya ohiya maxupo yaaraayano. (Yoh. 14:1-5, 8) Yesu aasuwela weera atthareli awe yannatthuneya etempu weera yiiwexexe itthu ikina, ohela mpuwa yooweherera aya yoorowa wiirimu. (Yoh. 16:12) Hiyo-tho nintthuneya wooniheraka nroromelo weera anamasoma ahu a Biblya aakhalano ntthuno noomusiveliha Yehova.

20. Moota heeni murokora ooMalawi oonihenraawe weera annamuroromela namasoma awe a Biblya?

²⁰ Nvireleleke ororomela weera anamasoma anyu a Biblya ennatthuna opaka etthu yooreera. Moone ntakihero na murokora Chifundo, ooMalawi. Owo aapatxera omusoma Biblya ni mwali mmoha oneeriwa Alinafe yoowo aavekela okatoolika evarelaka muteko eliivuru Mukhaleno Ekumi Yoohimala!. Emalihakaru yoosoma 14, Chifundo aamukoha Alinafe eheeni oonelaawe woohima sa ovarela muteko ilataratho. Alinafe aaxupeya ni aamwaakhula, “Eyo yoothanla ya mutthu!” Chifundo aaxupeya uupuwelaka weera yoosoma ele yaakela omalela vaavale. Mene moopixa murima, owo aavirelela omusomiha Alinafe, aroromelaka weera moovira etempu owo aamwiiwexexa. Sivirakaru miyeeri vakhaani, Chifundo aapaka nikoho na yoosoma 34 nenno nneera: “Moota heeni itthu muxuttenraanyu sa mBiblyani voohima sa Yehova sinkelaaya wookhaviherani vaanaano va?” Murokora Chifundo onnahima moota Alinafe aakhunlaawe, “Owo aahima ipontu sintxipale sootthuneya. Epontu emoha sa seiyo, yaari ti yooweera, Anamoona a Yehova kheniivoleihera ni itthu sihinvarihana ni Biblya.” Moohipisa, Alinafe aahiya ovarela muteko ilataratho ni aahiireherera weera apatisiwe.

21. Moota heeni ninkelaahu olipiha yoolakela ya namasoma ahu a Biblya yookhala oolikaneene waakihera ekhaikhai?

²¹ Nnaamweera areene Yehova “onùnnuwiha,” hiyo nookhalano muritti woomukhavihera namasoma ahu orowa vahoolo. (1 Akor. 3:7) Ninnapaka itthu ikina ohiya paahi oomuxuttiha itthu Muluku ontthunaawe weera owo apakeke. Hiyo ninnamukhavihera wunnuwihera nsivelo nawe ni Yehova. Nave ninnamooperera weera oonihereke nsivelo nawe ahelaka itthu sootthuneya nipuro noopatxera mweekumini mwawe. Nave ninnamuxuttiha omuroromela Yehova emaara yeeyo onvirihaawe maxupo. Emaara nnooniheraahu weera ninnamuroromela namasoma ahu, ninnalipiha nroromelo nawe weera anoowera okhala moovarihana ni malamulo a Yehova ni okhala oolikaneene waakihera ekhaikhai.