Mwaakhavihere atthu ‘arino ntthuno’ na omusuwela Muluku moowaakuveya

1. Moota heeni atthu akina enoonelaaya mitthenka sooreera? (Miteko 13:47, 48; 16:14, 15)

ATTHU antxipale a eseekulu yoopatxera yaahaakhulela ekhaikhai vaavo yiiwalaaya mitthenka sa akristu. (Mmusome Miteko 13:47, 48; 16:14, 15.) Mwa mukhalelo mmoharu, olelo atthu akina ennahakalala vaavo eniiwaaya mitthenka sooreera ekwaha yoopatxera. Naari woopatxerani ehooniheraka ntthuno ni mitthenka sa omwene, muhoolo mwaya awo pooti ohula murima aya ni waakhulela mitthenka iyo. Etthu heeni nintthuneyaahu opaka vaavo nnaaphwanyaahu atthu ‘arino ntthuno’ mmutekoni moolaleera?

2. Mwa mukhalelo heeni muteko ahu woowaapaka atthareli onlikanaaya ni wa namalima?

² Moone ntakihero nimoha. Muteko ahu woowaapaka atthareli onlikanxeriwa ni namalima. Wakhala weera soowiima ikina soolikana, namalima owo onnahepha. Nnaamweera vareene haawo owo-tho onnavirelela okosoopa soowiima ikina nlelo sihilikanne. Emoha-moharu, vaavo nnamphwanyaahu mutthu orino ntthuno noowiiwa mitthenka sahu, nintthuneya omukhavihera weera akhale mutthareli a Kristu moowaakuveya. Wa yaale ehikhanle oolikanela nivirelele weerera waakhavihera woona weera ti wooreera wa yaawo oxuttera woohima sa Muluku ni Biblya. (Yoh. 4:35, 36) Nasuwela weera atthu eri oolikanela naari hooye, nnoosuwela etthu yoopaka weera naakhavihere. Mwa yoosoma ene yeela, nnoorowa woona etthu nintthuneyaahu opaka ekwaha yoopatxera weera naakhavihere atthu erino ntthuno noowiiwa mitthenka. Nnoorowa-tho woona moota ninrowaahu waakhavihera ovirelela orowa vahoolo.

VAAVO ATTHU ERAAYA OOLIKANEENE WEERA YAAKHULELE

3. Etthu heeni nintthuneyaahu opaka vaavo nnaaphwanya ahu atthu arino ntthuno mmutekoni moolaleera? (1 Akorinto 9:26)

³ Vaavo nnaaphwanyaahu atthu enoonihera ntthuno mmutekoni moolaleera, nintthuneya waakhavihera oxuttera woohima sa Yehova ni omwaattamela Owo moowaakuveya. Mwa yeeyo, nintthuneya waavaha yoosoma ya Biblya ni waawopa orowela mithukumano sahu vaavo nimpatxeriha ahu otthekula ni atthu awo. — Mmusome 1 Akorinto 9:26.

4. Muhime yooweereya emoha ya mutthu aari oolikaneene opakihiwa yoosoma ya Biblya moowaakuveya.

⁴ Nvaheke yoosoma ya Biblya. Atthu akina nnuulumaahuno eri oolikaneene weera yaakhulele yoosoma ya Biblya. Nihiku nimoha Namaxexe, mwali mmoha a oCanada aahaattamela ekarinha ya ipublikasau ni aakuxa ebroxura Mukhaleno Ekumi Yoohimala! Murokora aari vakarinyani vale aamuleela weera moorweela mwa ebroxuura ele, owo pooti okhalano yoososma ya Biblya yoohiliviwa etthu. Mwali ole aahoonihera ntthuno ni aanvaha nummero nawe murokora. Ewoora yaattharelana mwali ole aamunviyarela mensagem murokora ni aamukoha nihiku heeni yeeraaya esome. Vaavo murokora aivaherenraawe weera yaamurowa osoma okhwipi wa esemana ele, mwali ole aamukoha: “Hayi nisommeene omaalo? Kinookhalano etempu.” Ni yaasoma nihiku naattharelana. Ni mwali ole aarowa woonela mithukumano okhwipi wa esemana ene ele ni aavirelela orowa vahoolo moowaakuveya.

5. Etthu heeni enrowa onikhavihera osuwela nnene sene moota woovaha yoosoma ya Biblya? (Nwehe-tho efootu.)

⁵ Ekhaikhai weera khaninweherera wera atthu ootheene eniiwa mitthenka sahu anoorowa vahoolo moowaakuveya ntoko mwali ole. Atthu akina pooti otthuneyaka oviriha etempu weera ekhale ni ntthuno. Apaale hiyo pooti otthuneya opatxeriha otthekula nuulumaka woohima sa mwaha onaasivela. Nnaamweera vareene hiiho, wakhala weera nnookhalano moonelo wooreera ni ovirelela owoonihera ntthuno atthu awo, mpuwa mwa etempu vakhaani nnoowera opatxeriha yoosoma ya Biblya. Etthu heeni nintthuneyaahu wuuluma vaavo ninvahaahu yoosoma? Nrowe noone etthu heeni asinna ni asirokora akina enkhumela nnene enhimaaya.

6. Etthu heeni nintthuneyaahu ohima weera nimukhavihere mutthu woonelela weera omusoma Biblya onoomukhavihera mweekumini mwawe?

⁶ Anamalaleera ni mapioneiro ekohinwe woohima sa opatxeriha soosoma ehimme weera, ilapo ikina ti wootthuneya osepa masu ntoko “osoma,” “curso a Biblya,” naari “wooxuttihani” muhimaka yoosoma ya Biblya. Awo ahoonelela weera etthu envareleya muteko nnene sene ovarela muteko masu ntoko “otthekula,” “mwaha,” ni “omuxuttera Biblya.” Nyuwo pooti opatxeriha mweeraka: “Ti wootikiniha moota makoho ootthuneya a mweekumini enaakhuliwaaya mBiblyani,” naari “Biblya khaiyene paahi eliivuru ya ettini; eyo ennanikhavihera mwa mikhalelo soovareleya muteko.” Nyuwo pooti waatxeerera mweeraka: “Khenkuxa etempu yintxipale iminuutu 10 naari 15 nyuwo pooti oxuttera etthu enkela wookhaviherani mweekumuni mwanyu.” Nyuwo khamuntthuneya omuleela mutthu owo weera munrowaya osomaka “isemana sootheene,” yeeyo yaarowa omweeriha wiisoona waatteliwa.

7. Etthu heeni muntthuneyaanyu opaka wakhala weera mutthu onnaakhulela ikhaikhai sa mBiblyani otthekula wanyu woopatxera? (1 Akorinto 14:23-25)

⁷ Mwaawope weera erowele mithukumano. Onkhala ntoko, etempu ya murummwa Paulo, akina yaaxuttera ekhaikhai vaavo yoonelaaya mithukumano sa ekristu ekwaha yoopatxera. (Mmusome 1 Akorinto 14:23-25.) Eyo tho enneereya mahiku ala. Atthu antxipale ennarowa vahoolo vaavo enoonelaaya mithukumano sahu ekwaha yoopatxera. Nyuwo munrowa waawopa liini? Muttottele mureerelo eliivuru Mukhaleno Ekumi Yoohimala! Mpatxerihaka ni nwopelo ohela mpuwa yoosoma 10, menento nyuwo khontthuneya oweherera mpaka ophiya eparte ya eliivuru eyo. Ovinyera otthekula woopatxera, nyuwo pooti onwopa mutthu owo orowela mithukumano sa okhwipi wa esemana, apaale muhimaka muru wa mwaha owo naari muru wa Nwehereri onrowa othokororiwa esemana eyo.

8. Etthu heeni nintthuneyaahu omuleela mutthu vaavo nnanwopaahu woonela mithukumano sahu? (Yesaya 54:13)

⁸ Vaavo munamwopaanyu mutthu orino ntthuno, mmuleele moota mithukumano sahu siraaya soovirikana ni ittiini ikina olimalenlaawe. Vaavo namasoma mmoha a Biblya oonenlaawe muthukumano woopatxera wa Nwehereri, owo aamukoha ole aamusomiha Biblya: “Ole onhoolela yoosoma, oosuwela masina aatthu ootheene?” Murokora ole aamuleela weera hiyo ninnailipihera osuwela masina aatthu ootheene a mmulokoni mwahu, hiihaale ntoko nsuwenlaahu masina aamusi ahu. Namasoma ole aahoona weera eyo yaari yoovirikana ni ekereja awe. Emoha-moharu, hiyo pooti omuleela mutthu moota mithukumano sahu siraaya soovirikana. (Mmusome Yesaya 54:13.) Hiyo ninnathukumana weera nimukokhorele Yehova, nixuttihiwe ni Owo ni nlipihane mukina ni mukhwaawe. (Aheb. 2:12; 10:24, 25) Yookhumelelaaya, mithukumano sahu ti soorehereya, soovareleya muteko, ni khaninxuttera sookhovelela sa ittiini. (1 Akor. 14:40) Mapuro ninthukumanaahu khaiyene impa itokotoko, iyo sinnarehereriwa weera okhweyeke oxuttera. Ni hiyo khanaanono ipartiitu, naari khannuuluma woohima sa nyaha sa ipoliitika, mwaha wooweera khanneerela eparte nyaha iyo. Onookhala wooreera omoonihera namasoma vahinaaye eviidiyu erino muru, Eheeni eneereya empa ya Omwene? Mwa mukhalelo ene yoowo, onoosuwela etthu heeni eneereya mmithukumanoni mwahu.

9-10. Vaavo nnanwopaahu mutthu woonela mithukumano sahu, etthu heeni nintthuneyaahu omuleela weera ahoovelele woonela mithukumano sahu? (Nwehe-tho efootu.)

⁹ Atthu akina ennoovelela woonela mithukumano sahu mwaha wooweera enoova owompwa “weera ekhaleke ettiini ahu.” Mwaaroromeliheke atthu awo weera hiyo onisivela oxekuriwa ni khannaanyeserera atthu okhala ettiini ahu. Ninnawaakhela amusi, waahela mpuwa anamwane akhaanini. Mmithukumanoni mwahu, anamwane khenxuttihiwa meekhaaya erakamelanneene ni asipapaya. Opwaha mwa yeeyo, asipaapa ennakilaathi ni anamwane weera exuttihiwe vamoha. Mwa mukhalelo ene yoola, asipaapa aasuwela taani anamwane aya eraayano ni etthu heeni awo enxuttihiwaaya. (Ola. 31:12) Khaninvekela musurukhu mmithukumanoni mwahu. Opwaha mwa yeeyo, ninnatthara yooruma ya Yesu yeeyo eneera: “Nyuwo mwaakhenle ya mahala nvaheke tho ya mahala.” (Math. 10:8) Nyuwo tho pooti omuleela mutthu owo weera khontthuneya owara ikuwo soorika weera oonele mithukumano sahu. Muluku onweha murima, ohiya mukhalelo wa weerutthuni. — 1 Sam. 16:7.

¹⁰ Wakhala weera mutthu ohoowa woonela mithukumano mpake ele munweraanyu weera isooneke waakheliwa nnene. Mmusuwelihe wa asitokweene a mmulokoni ni wa asinna ni asirokora akina. Wakhala weera owo onimoona waakheliwa nnene, owo pooti otthika veeli. Emaara ya mithukumano, wakhala weera owo khaanono Biblya, munvarihele Biblya anyu vamoha ni owo ni mmoonihereke moota ninttharaahu nyaha ni yoosoma ya Nwehereri.

MOOTA HEENI WOOMUKHAVIHERA MUTTHU VAAVO MUNSOMANYU VAMOHA NUUWO?

11. Moota heeni nyuwo munrowaanyu woonihera weera munnattittimiha etempu nvaanenlaanyu ni mutthu mummusomihaanyu?

¹¹ Itthu heeni muntthuneyanyu wuupuwelela vaavo mumpakihaanyu yoosoma ya Biblya? Muttittimiheke ewoora nvanenlaanyu osoma. Mwa ntakihero, wakhala weera moovanela emaara yoosoma, mwaakuveke ophiya naari atthu a muthethe owo ehipwathaka ophiya emaara yooreerela. Opwaha mwa yeeyo nyuwo pooti ohikuxa etempu yintxipale otthekula wanyu woopatxera. Asinna ni asirokora akina erino soosoma sintxipale sa Biblya, enhima weera ti wooreera ohikuxa etempu yintxipale naari mutthu owo atthunaka wiiwa itthu sintxipale. Ni muhuulumeke vantxipale mmuhiyeke mwaneene vaate wuuluma. — Mir. 10:19.

12. Yoolakela ahu ekhaleke teevi vaavo nimpatxeraahu opakiha yoosoma ya Biblya?

¹² Ovinyera woopatxerani, yoolakelaanyu ekhaleke omukhavihera namasomaanyu omusuwela Yehova ni Yesu ni wunnuwihera nsivelo wa yaawo. Hiyo nintthuneya owoonihera ele Biblya onhimaawe, ohiya miyuupuwelo sahu. (Mit. 10:25, 26) Murummwa Paulo oovaha ntakihero nooreera. Vaavo aaxuttihaawe atthu, owo aakhavihera omusuwela Yesu Kristu yoowo Yehova omuruminhaawe weera anikhavihere omusuwela ni omusivela. (1 Akor. 2:1, 2) Paulo tho, ohoonihera weera tiwootthuneya waakhavihera atthareli anyowani wunnuwihera mikhalelo sooreera seiyo sinlikanxeriwa ni ewooru, epratha ni maluku ootthuneyaxa. (1 Akor. 3:11-15) Mikhalelo iya sootthuneya sinhela mpuwa nroromelo, osuwela, miruku ni omoova Yehova. (Nsal. 19:10, 11 [19:9, 10, Tradução do Novo Mundo]; Mir. 3:13-15; 1 Ped. 1:7) Mutakihe moota Paulo aaxuttihawe, mwaakhaviheraka anamasoma anyu a Biblya wunnuwihera nroromelo noolipa ni onthamwene ya ni Tiithi aya a nsivelo a wiirimu. — 2 Akor. 1:24.

13. Moota heeni ninrowaahu woonihera opixa murima ni owiiwexexa vaavo nnaakhaviheraahu ale erino ntthuno? (2 Akorinto 10:4, 5) (Nwehe-tho efootu.)

¹³ Mutakiheke moota Yesu aaxuttihaawe mooniheraka opixa murima, ni wiiwexexa. Musepeke ompakela makoho yaakela omuxupa. Wakhala weera yookhala epontu emmuxupa, nyuwo khontthuneya ovirelela wuuluma mwaha owo. Opwaha mwa yeeyo, pooti otthikela osoma ipontu ikina, ni muhoolo mwaya pooti otthikela osoma ipontu owo ahaiwexenxaawe. Ohiya weerera omunyeserera waakhulela sooxuttiha sanyu, ahinaaye okhala oolikaneene, munvahe etempu mpaka ekhaikhai okhala vamurimani vawe. (Yoh. 16:12; Akol. 2:6, 7) Biblya onnalikanxera sooxuttiha soowootha ni ikwartelo soolipaxa seiyo hiyo ninwanaahuno weera nnyaanye. (Mmusome 2 Akor 10:4, 5; nwehe enoota “otoloxa ikwartelo soolipaxa.”) Pooti okhala wooxupa naskola ohiya soororomela sawe. Menento, nimukhavihere omoona Yehova okhala ntthawelo nawe. Napaka eyo, onookhala wookhweya wa naskola ahu ohiya soororomela sawe. — Nsal. 91:9.

VAAVO ATTHU ANYOWANI ENOONELAAYA MITHUKUMANO SAHU

14. Naathokororeke hayi ale empatxera woonela mithukumano sahu?

¹⁴ Yehova ontthuna weera nihaakhaleleke nthalu atthu empatxera woonela mithukumano sahu. Hiyo khanimpwatha mapuro enkhumaaya, sookhovelela saya, yaareene oothoiwa naari a muhakhu. (Yak. 2:1-4, 9) Vanonto, moota heeni ninrowaahu owoonihera nsivelo ale enwa woonela mithukumano sahu?

15-16. Moota heeni ninrowaahu waakhavihera ale empatxera woonela mithukumano sahu wiisoona weera ahaakheliwa nnene?

¹⁵ Atthu akina ennaweela woonela mithukumano sahu weera yoone paahi moota simpakiwaaya. Naari pooti weeraka erimoopereriwa ni mutthu onkhala nipuro nikina weera erowele mithukumano sahu. Mwa yeeyo, hiyo khontthuneya woovelela owaattamela atthu awo enwa woonela mithukumano sahu. Nwaakheleke nnene, mene woohaaxupiha. Mwaawopeke okilaathi vamoha. Nvareleke vamoha ni awo ipublikasau ni Biblya anyu, naari pooti waavaha ipublikasau sahu. Ni muttittimiheke miyuupuwelo saya. Opwaha mwa yeeyo muupuwelele mikhalelo mikina munrowaanyu oweeriha awo okhala nnene. Mulopwana aaxekunre empa ya Omwene aamuleela munna mmoha aamwaakhelenle weera aanyoonyiheya mwaha woowara ikuwo soohiphwanelela. Munna ole aamweeriha owo okhala ootaphuwa amuleelaka weera Anamoona a Yehova enoolikana ni atthu ootheene. Mulopwana ole aarowa vahoolo mpaka opatisiwa ni khatonko otthuwala waakhula wa munna ole. Menento vaavo nnooniheraahu weera ninnaapwatha atthu anyowani, nintthuneya wiikosoopa weera nihaapakele makoho yaarowa oweeriha woona wuuliwa muru, naari makoho a omutthu aya. — 1 Ped. 4:15.

¹⁶ Hiyo tho pooti oweeriha ale ennixekura wiisoona waakheliwa nnene, naattittimihaka vaavo nnuulumaahu naawo, ninvahaahu ikomentaariu mmithukumanoni ni vaavo nnuulumaahu soororomela sa atthu ehikhanle Anamoona a Yehova mmithukumanoni. Nsepeke wuuluma masu yaakela oweeriha ale empatxera oweela mithukumano sahu wiisoona okhala ooveeheya. Naari oweeriha awo ohitthikela veeli woonela mithukumano sahu. (Tito 2:8; 3:2) Mwa ntakihero, hiyo khanintthuneya wuuluma wa mukhalelo ohinoonihera nttittimiho soororomela sa atthu akina. (2 Akor. 6:3) Asinna empaka nyaha onnatthuneya owuupuwelela ale ehikhanle Anamoona a Yehova etaphulelaka masu ooxupa wiiwexexa.

17. Yoolakela ahu ekhaleke eheeni vaavo nnamphwanyaahu mutthu ‘orino ntthuno’ mmutekoni moolaleera?

¹⁷ Muteko ahu woowaapaka atthareli onnatthuneya okhala woowaakuveya nenne nri nihiku. Nivireleleke waaphwanya atthu erinono ‘ntthuno na ophwanya ekumi yoohimala.’ (Mit. 13:48) Vaavo nimpakaahu eyo khontthuneya woovelela waavaha yoosoma ya Biblya ni waawopa weera erowele mithukumano sahu. Wakhala weera nnoopaka eyo, nnoorowa wakhavihera ophwanya iphiro soopatxera sa “musewe onroiha weekumini.” — Math. 7:14.