YOOSOMA 46
Mwaha wa heeni ontthuneyaaya wiivaherera wa Yehova ni oBatiziwa?
Etthu yootthuneya opaka ori wiivaherera wa Yehova. Hiyo ninniivaherera wa Yehova moorweela munivekeloni, ni omulaihera weera opaka yootthunaawe enkela okhala nipuro noopatxera mookumini mwahu. (Nsalmu 40:8) Mutthu aivaherera vale pooti okela obatiziwa. Nto vaavo mutthu onbatiziwaawe, onnawoonihera atthu ootheene weera ohivaherera wa Yehova. Yoothanla yoowiivaherera wa Yehova, ennatxentxa ekumi ya mutthu. Mene eheeni emmweeriha mutthu othanla opaka eyo?
1. Eheeni emmweeriha mutthu othanla wiivaherera wa Yehova?
Wiivaherera wahu wa Yehova onrweela mwa nsivelo. (1 Yohani 4:10, 19) Biblya oneera: “Siso wàtthune Apwiya [Yehova] Muluku á ni murim’á wothene, ni munep’á a wothene ni wupuwela wá wothene ni ikuru sá sothene.” (Marko 12:30) Ninnoonihera weera ninnamusivela Yehova ohiya paahi wuulumaru vayanoni, mene-tho ni miteko saya. Mwa ntakihero, atthu eeli annathelana wakhala weera annooniherana nsivelo. Etthu emoha-moharu, omusivela wahu Yehova onnaneeriha oBatiziwa.
2. Mareeliho heeni mutthu onaakhelaawe aBatiziwa vale?
Nyuwo mwa Batiziwa vale munkela opakelaka empari emusi ya Yehova. Nave munkela woona okhala vakhiviru ni yoowo nsivelo muraanyuno ni yoowo nneereke owaattamelihani nuuwo. (Mmusome Malakhiya 3:16-18.) Opwaha mwa yeeyo, nyuwo munkela omoonaka Yehova okhala tiithaanyu, ni munookhalano asinna ni asirokora a elapo yootheene, atthu ammusivela Yehova ni nyuwo. (Mmusome Marko 10:29, 30.) Mene onooneya weera muhinaaye oBatiziwa, nyuwo muntthuneya opaka itthu ikina. Muntthuneya ooxuttera woohima sa Yehova, omusivela ni omuroromela Yesu kristu mwanawe. Omamaliheroni, nyuwo muntthuneya ovaherera okumi anyu wa Yehova. Mwapaka itthu iya ni oBatiziwa, nyuwo munookhalano eparakha yookhalano okumi woohimala. Masu a Muluku aneera: “Obatizo . . . onovuluxani vanano.”—1 Pedru 3:21.
WEERA MUXUTTERE SINTXIPALE
Moone mwaha wa heeni oraaya wootthuneya wiivaherera wa Yehova ni oBatiziwa.
3. Ootheene hiyo ninnitthuneya omuthanla taani nneeraahu nimukokhoreleke
Ana a Israeli khalayi, yuupuwela weera wanwereya onvarela Yehova emaara emoharu omukokhorela Bayaali Muluku a eethiru. Mene Yehova aamuruma mprofeti Eliya weera aaleele weera, ettthu yaapakaaya yaari etthu yoonanara. Mmusome 1 Mamwene 18:21. Avinyaka mutthekule ni epontu enttharelana:
Ana a Israeli yaatthuneya opaka yoothanla heeni?
Ntoko ana a Israeli, hiyo onnatthuneya omuthanla ole nneeraahu ninvareleke muteko. Mmusome Luka 16:13. Avinyaka mutthekule ni ipontu sinttharelana:
Atthu akina anuupuwela weera anoowera omukokhorela Yehova ewoora emoharu okokhorela itthu ikina. Mwaha wa heeni eyo ehinwereyaaya?
Ninkela woonihera hayi weera nohiithanlela onvarela muteko Yehova?
4. Muupuwelele moowiixera moota Yehova onoosivelaaweni
Yehova oonivaha itthu sintxipale sooreera. Eheeni hiyo nneeraahu nimutthikihere? Moone EVIIDIYU.
Moota heeni Yehova onooniheraawe weera onnoosivelani? Musome Nsalmu 104:14, 15 ni 1 Yohani 4:9, 10. Avinyaka mutthekule ni ipontu sinttharelana:
Soovaha heeni Yehova oovahaaweni siri sootthuneya wa nyuwo?
Mwaha woowaakhela soovaha iyo, mummoonela hayi Yehova?
Mootoko ovahiwa etthu yaatempe woohakalalihani? Mweekhaikhai nyuwo munnatthuna omuxukurela mutthu oovanheni. Mmusome Olaleya 16:17. Avinyaka mutthekule ni epontu enttharelana:
Muupuwelaka itthu sootheene Yehova oovanhaaweni, nyuwo muntthuna ompakela heeni?
5. Wiivaherera wa Yehova onnaruuhela mareeliho
Atthu antxipale anroromela weera okhala mutthu oovuwa, okhalano muteko wooreera naari musurukhu mwintxipale onimwaaphwanyiha ohakalala. Neereke eyo ekhaikhai? Moone EVIIDIYU. Avinyaka mutthekule ni ipontu sinttharelana.
Nnaamweera Andrey wamusivela ommana boola, mwaha wa heeni owo aahiyerenraawe?
Owo aahithanlela wiivaherera wa Yehova, ohiya ommana boola. Nyuwo munuupuwela weera owo aapaka yoothanla yooreera? Mwaha wa heeni?
Murummwa Paulo ahaakunve okhala mukristau, owo aakhalano itthu seiyo seera simpakihe okhala oovuwa. Owo aasoma nlamulo na aYuda ni mutthu oovuwa. Owo aakakhela ottuli itthu sootheene iyo weera akhale mukristu. Neereke Paulo aaheera keerenleni? Mmusome Afilipi 3:8. Avinyaka mutthekule ni ipontu sinttharelana:
Mwaha wa heeni Paulo enraawe weera itthu seiye owo aapakaawe ahinaakuve okhala mukristu ‘saari seethiru’?
Paulo aakhenle heeni aramusakaru itthu seiyo seera sinvuwihe?
Nyuwo munoona weera ekumi anyu enookhala yooreera mwathanla onvarela Yehova? Mwaha wa heeni muneeraanyu hiiho?
Mwaha wa Paulo othanla okhala mukristu, yamphwanyiha iparakha opwaha itthu seiye aahiñyaawe ottuli
ATTHU AKINA ANEERA: “Miyo kinnisuwela weera ela ekhaikhai, mene nkintthuna weera kiivahe muritti.”
Mwaha wa heeni nyuwo munoonaanyu weera onnareerela wiivaherera wa Yehova?
NYAHA SOOTTHUNEYA
Nsivelo ninnikhavihera hayi wiivaherera wa Yehova ni oBatiziwa?
Wuuluula
Mwaha wa heeni nintthuneyaahu omusivela Yehova ni omukokhorela?
Mareeliho heeni Yehova onaavahaawe arumeyi awe ooBatiziwa?
Nyuwo munnatthuna wiivaherera wa Yehova?
WEERA MUSUWELE ITTHU SINTXIPALE
Moone mwaha heeni mulipa oowiipa ni ole oommana boola yiithanlenlaaya wiivaherera wa Yehova.
Amiravo annikoha—Kipake heeni mweekumini mwaka?—Wuupuwelela (6:54)
Moone mathowa maxexe ammweeriha mutthu wiivaherera wa Yehova.
“Mwaha wa heeni muntthuneyaanyu wiivaherera wa Yehova?” (A Sentinela, a 15 a Janeiro a 2010)
Mpuwa mwa eviidiyu ela, moone ohakalala amphwanyaaya yaale aniivaherera wa Yehova.
Musome mwaha: “Miyo kanniikoha ‘Mwaha wa heeni kikhanlaka va?’” weera moone etthu yaamweerihe muthiyana mmoha oweha itthu sootthuneya.
“Biblya onnatxentxa ikumi saatthu” (A Sentinela, a 1.º a Novembro a 2012)