YOOSOMA 37
Biblya onhima eheeni voohima sa muteko ni musurukhu?
Nyuwo munnanto oxupeya mwaha wa muteko ni musurukhu? Pooti okhala wooxupa ophwanya yoowiikhuriha emaara emoharu omukokhorela Yehova ntoko owo ontthunaawe. Nto Biblya onnanivaha miruku soophwanelela seiyo sinkela onikhavihera.
1. Eheeni Biblya onhimaawe voohima sa muteko?
Muluku ontthuna weera nihakalaleke ni muteko nimpakaahu. Biblya oneera “etthu emosaru emuhalenle mutthu t’ila . . . opuha mmitekoni onvaraiye.” (Koheleti 2:24) Yehova onnavara muteko vantxipale. Nintthuneya omutakiha weera nivareke muteko nnene. Napaka eyo, nnoomuhakalaliha Yehova ni hiyo nnoohakalala.
Ovara muteko tiwootthuneya. Mene nto nihihiyeke muteko okhalaka nipuro nootepa ontthuneya opwaha omukokhorela wahu Yehova. (Yohani 6:27) Yehova oolaihera weera wakhala weera nnoohela yootthunaawe nipuro noopatxera onookela onivaha itthu sootthuneya weera nikhale nookumi.
2. Moonelo anyu tuuvi voohima sa musurukhu?
Biblya onhima weera “musurukhu muttuxi.” (Koheleti 7:12) Mene owo onnanleela eeraka musurukhu khomphwanyiha ohakalala. Mwaha wa yeeyo, Biblya onnanooperera ohisiveliwa ni musurukhu, mene nto ‘ohakalala ni itthu nraahuno.’ (Mmusome Aheberi 13:5.) Napaka eyo, khaninkela otteettheya ni khanuupuwelaka weera khanaanono itthu simphiyera. Navetho nneereke osempa okopha. (Miruku 22:7) Ni nnoosepa murakho wootthuna okhalano musurukhu moowaakuveya.
3. Ninkela ovarela hayi muteko musurukhu weera naakhavihere atthu akina?
Yehova Muluku toovaha, ni hiyo ninnamutakiha vaavo “nimpakahu miteko sa phama, ni okhala olikana ovaha ni okawela sawihu.” (1 Timotheyo 6:18) Hiyo pooti opaka eyo nikhaviheraka muloko, waakhavihera atthu antthuna nikhavihero otepaxawene asinnihu oororomela. Yehova khanweha waatta wa etthu ninvahaahu, mene owo onweha moota ninvahaahu eetthu eyo. Wakhala weera ninvaha ni murima wootheene nnookhala oohakalala ni nnoomuhakalaliha Yehova.—Musome Miteko 20:35.
WEERA MUXUTTERE SINTXIPALE
Moone moota woohela muteko nipuro naya ni oohakalala ni itthu nraahuno.
4. Mavarelo anyu muteko pooti onvuwiha Yehova
Onthamwene ahu ni Yehova pooti ovoleela moonelo ahu voohima sa muteko. Moone EVIIDIYU. Avinyaka mutthekule ni ipontu sinttharelana.
Nviidiyuni, eheeni yoovanreni murima voohima sa moota Yohani opankaawe oomutekoni?
Eheeni owo opankaawe weera ahele muteko nipuro naya?
Mmusome Akolosi 3:23, 24. Avinyaka mutthekule ni epontu enttharelana:
Mwaha wa heeni oraaya wootthuneya okhala anamuteko anvara nnene?
Ovara muteko ti etthu yootthuneya. Mene nto nihihiyeke muteko okhalaka nipuro nootepa ontthuneya opwaha omukokhorela wahu Yehova
5. Osiveliwa ni itthu nraahuno onnaniphwanyiha ohakalala
Atthu antxipale anneerera waasasera ophwanya musurukhu muntxipale. Mene Biblya onniruma opaka etthu yoovirikana niiyo. Mmusome 1 Timotheyo 6:6-8. Avinyaka mutthekule ni omutakiha weera:
Etthu eheeni Biblya onnirumaawe opaka?
Nnaamweera nikhalanneene itthu vakhaaneene, nnoowera ophwanya ohakalala. Moone EVIIDIYU. Avinyaka mutthekule ni epontu enttharelana.
Eheeni yaahakalalinhe emusi ela nnaamweera ekhalanneene musukhu vakhaaniini?
Hiyo nookhalano itthu sintxipale, neereke ninnatthuna itthu opwaha seiya nraahuno? Yesu ahoopa niphwanaphwaniho nimoha naahima woopiha waya etthu eyo. Mmusome Luka 12:15-21. Avinyaka mutthekule ni epontu enttharelana
Eheeni ninxutteraahu ni niphwanaphwaniho na Yesu?—Moone eversu 15.
Musome ni mulikanxere Miruku 10:22 ni 1 Timotheyo 6:10. Avinyaka mutthekule ni ipontu sinttharelana:
Eheeni nyuwo munoonaanyu okhala yootthuneya: okhala nthamwwne a Yehova kapena okhalano musurukhu muntxipale? Mwaha wa heeni?
Wakhala weera mutthu onkhala aatxeereraka musurukhu, maxupo heeni onkumanaaweno?
6. Yehova onnakosoopa soohaawela sahu
Oxupeya ni musurukhu ni muteko pooti weerera nroromelo nraahuno ni Yehova. Moone EVIIDIYU weera moone etthu nneeraahu nipake wakhala weera nookhalano maxupo ntoko awo. Avinyaka mutthekule ni ipontu sinttharelana.
Nviidiyuni, maxupo heeni munna aakhalannaawe?
Eheeni owo aapankaawe weera avirihe maxupo awo?
Mmusome Matheyo 6:25-34. Avinyaka mutthekule ni epontu enttharelana:
Eheeni Biblya onaaroromelihaawe atthu ammuhela Yehova nipuro noopatxera?
ATTHU AKINA ANEERA: “Miyo kintthuneya ovara muteko weera kitxihe emusi aka. Nkiwera orowa omithukumanoni isemana sootheene.”
Yoolepa heeni ya mBiblyani yoovanreni murima weera ohela nipuro noopatxera omukokhorela Yehova yoothanla yooreera opaka?
NYAHA SOOTTHUNEYA
Muteko ni musurukhu itthu piili sootthuneya, mene itthu iyo nihihiyeke saakanyeraka muteko nnanvarelaahu Yehova.
Wuuluula
Eheeni enkela wookhaviherani okhalano moonelo wooreera voohima sa muteko?
Mwaha wa heeni oraaya wooreera oohakalala ni itthu nikhalannaahu?
Moota heeni nyuwo munkelaanyu woonihera weera munnaroromela yoolaihera ya Yehova yooweera onimwaakosoopa atthu awe?
WEERA MUSUWELE ITTHU SINTXIPALE
Neereke Biblya onnahima weera okhalano musurukhu ti woonanara?
‘Neereke musurukhu mukakaari wa itthu sootheene soonanara?’ (Mwaha va jw.org)
Moone moota nneeraahu nikhale oovaha weera nimuhakalalihe Muluku.
Neereke omweetta xooku ontxaniwa musurukhu otthekula wooreera?
“Moonelo wa Biblya voohima—Omweetta xooku” (Despertai!, Março a 2015)
Moone etthu yaamukhavihenre mulopwana mmoha ohiyerera omweetta txuuka ni wiiya.
“Miyo wannakisivela weetta ni ikavalu” (A Sentinela, 1.º a Novembro a 2011)