YEREMIYA
1 Ala moolumo a Yeremiya,* mwaana a Hilikiya, namukuttho mmosa a wAnatothi,+ elapo ya oBeniyamini. 2 Owo aahisuwelihiwa moolumo a Yehova mahiku a Yosiya,+ mwaana a Amoni,+ mwene a oYuda, eyaakha ya namuloko ni tthaaru ya omwene awe. 3 Nave moolumo awe aahisuwelihiwa mahiku a Yoyakiimi,+ mwaana a Yosiya, mwene a oYuda, mpakha wanikisa wa mwaakha wa namuloko nimosa wa Sedekiya,+ mwaana a Yosiya, mwene a oYuda, nave mpakha atthu a oYerusalemu oroihiwa weepotthani mweeri wa neethanu.+
4 Kaahisuwelihiwa moolumo a Yehova yaahimya wiira:
Kaahookhalihani profeta a maloko”.
6 Masi miyo kaahihimya wiira: “Nnaari, Pwiya Muulupalexa Yehova!
Miyo nkinsuwela olavula,+ okhala wiira nlelo ka mmiravo”.+
7 Vano Yehova aahikileela wiira:
“Muhihimyeke wiira: ‘Miyo nlelo ka mmiravo’.
Tthiri nyuwo muhaana orowa wa atthu ootheene kinrowa aka woorumani,
Nave muhaana ohimya itthu sootheene kinrowa aka woorumani.+
8 Yehova onihimya wiira: Muhiwoove atthu awo,+
Okhala wiira, ‘miyo kiri ni nyuwo wiira kiwoopoleni’”.+
9 Siiso Yehova aahookola ntata nawe, okwannya eyano aka.+ Nto Yehova aahikileela wiira: “Miyo koohela moolumo aka mwaano mwanyu.+ 10 Mwiiwe, miyo kihoothanlani olelo wiira mwaalopole atthu a maloko ni mamwene, wiira mphele ni mpwexakase, wiira mpwetexe ni mmoroxe, wiira muteke ni mphatteye”.+
11 Kaahiiwa-tho moolumo a Yehova, yaahimya wiira: “Yeremiya, muniweha-ni?” Nto kaahaakhula wiira: “Kiniweha eritta ya mwiri wa amentowa”.*
12 Vano Yehova aahikileela wiira: “Muhoona saana, okhala wiira miyo kinniwehaweha wiira kimalelihe moolumo aka”.
13 Nto, kaahiiwa-tho moolumo a Yehova ekwaha ya nenli, yaahimya wiira: “Munoona-ni?” Nto kaahaakhula wiira: “Kinoona epanela enikaphula,* ethetemanenle ene onorti ewehaka osuuli”. 14 Moottharelana Yehova aahikileela wiira:
“Onorti anookhumelela maxakha,
Anrowa waaphwanya atthu ootheene a elapo ela.+
15 Yehova onihimya wiira:+ ‘Miyo kinoothukumanya imusi sootheene sa mamwene a onorti,
Nto awo animoorwa, khula mmosa onrowa okilaathi veehiceni vawe,
Vamukhora wa oYerusalemu,+
Wiira arukurerye ixiri sootheene sa oYerusalemu,
Nave arukurerye ipooma sootheene sa oYuda.+
16 Vano miyo kinrowa waaphukela mwaha wa otakhala waya wootheene,
Okhala wiira aakinyanyala,+
Nave annaavaha mwiixi wa mukuttho woopahiwa amuluku akina,+
Ni annikokhorela itthu apanke aya ni matata aya’.+
17 Masi nyuwo muhaana wiilokiherya,*
Nave muhaana ovenya ni waaleela itthu sootheene kinoorumaakani.
Muhiwoove atthu awo,+
Wiira miyo kihiwiiriheni woova ohoolo waya.
18 Tthiri olelo miyo kihookhalihani epooma yoolipihiwa,
Epilaari ya eyuuma, ni ixiri sa ekoopiri wiira muhiweriwe ni elapo ela yootheene,+
Mamwene a oYuda ni makhulupale aya,
Anamukuttho aya ni atthu a elapo ela.+
19 Tthiri awo anoowana ni nyuwo,
Masi khanrowa wooweryani,
Okhala wiira ‘miyo kiri ni nyuwo,+ wiira kiwoopoleni’. Yehova tonihimya”.
2 Kaahisuwelihiwa moolumo a Yehova yaahimya wiira: 2 “Murowe, mwaaleele* atthu a oYerusalemu wiira: ‘Etthu onihimya awe Yehova, tiila:
“Kinnuupuwela wiivahererya wanyu* okathi mwaari anyu mmiravo,+
Ophenta mooniherya anyu okathi mwaanoivariwa anyu,+
Moota mwaakitthara anyu moothakoni,
Elapo yahaaliwe etthu.+
3 Atthu a Isarayeli yaari oowaarya para Yehova,+ yaari ntoko mihokorokho soopacerya ohemphwa”’.
‘Ole aaphavela waakhuura, aanikhalana mulattu,
Yaanimphwanya maxakha’. Yehova tonihimya”.+
4 Nyuwo atthu a etthoko ya Yakobe, mwiiwe moolumo a Yehova,
Ni nyuwo imusi sootheene sa nloko na Isarayeli.
5 Etthu onihimya awe Yehova, tiila:
“Etthu xeeni yoohiloka amuhavinre anyu akiphwanyanne aya,+
Mpakha okirakamela,
Anakokhorela ilatarato sihirina efaita,+ yiikhalihaka atthu ahirina efaita?+
6 Awo khiyaakonhe wiira: ‘Ori vai Yehova?
Owo tonikuminhe elapo ya wExiitu,+
Toneettinhe moothakoni,
Toneettinhe mapuro ahinikhaliwa+ ni mmalittini,
Elapo yoowuuma+ ni yooriipela,
Elapo ohinivira mutthu oneetta mukwaha,
Ni elapo ehinikhaliwa ni atthu’.
7 Vano miyo kihooruuhani elapo erina miri,
Wiira mulyeeke mihokorokho saya ni mireerelo saya.+
Masi nyuwo muhoorwa ni moonanariha elapo aka,
Muhiiriha okhala yoohiloka etthu koohiyenryaakani.+
8 Nave anamukuttho khiyakonhe wiira: ‘Ori vai Yehova?’+
Ale arina muritti wowiixuttiha Nlamulo khanikisuwela,
Amakampusi aakirukunuwela,+
Maprofeta annilaleya iprofesia ni nsina na Bayaali,+
Nave awo annaatthara ale ahiniwerya waaphwanyiha mureerelo.
9 Yehova onihimya wiira: ‘Tivo miyo nkinihiya woohimyanani itthu,+
Nave kinimwaahimyana itthu anamwane a aniinyu’.
10 ‘Masi mulapuwele isisiro* sa oKitimi,+ mwawehe-wo.
Aayo, mmurume mutthu wiira orowe oKedari+ ni awehawehe oratteene.
Mwawehe vakhala wiira ehiiraneya etthu ntoko ela.
11 Niireke nookhala nloko naaturunke amuluku aya ni ale ahikhanle amuluku?
Masi atthu aka aaturuka ovuwa waka ni etthu yoohiloka.+
12 Nyuwo erimu, nweheke etthu ela mutikinihiwe ene.
Muthukumeleke moovaka’. Yehova tonihimya.
13 ‘Atthu aka aapaka itthu piili sootakhala:
Awo aakinyanyala, miyo kiri maphattuwelo a maasi a ekumi,+
Nave aathipa ihime saya,
Ihime soophweeya, seiyo sihinwerya osuka maasi’.
14 ‘Niireke Isarayeli murumeyi? Aahiiso epottha eyariwe vatthokoni?
Nto xeeni ovariwe awe?
15 Akharamu acikhaani aamoopela murukulu,+
Aamukhuwelela ni nsu naya.
Awo ahiiriha elapo awe okhala etthu yoowoopiha.
Nave ipooma sawe soopahiwa ni mooro, sihinakhaliwa.
16 Atthu a oNofi*+ ni a oDafne,+ ahoolya vamuru vanyu.
17 Kiira nyuwo murina mulattu mwaha wa etthu yookhumelenleni,
Mwaha woomunyanyala Yehova, Muluku anyu,+
Okathi aaweettihaaweni mphironi?
Xeeni muniphavela anyu orowa wAsiiria,
Wiira mwawurye maasi a muro Eufrate?
19 Otakhala wanyu waahaana woottaruxani,
Nave ohiroromeleya wanyu waahaana woopwapwelani.
Mwiiwe ni musuwele moota vari aya vootakhala ni voohaaxa,+
Omunyanyala Yehova Muluku anyu.
Nyuwo khamoonihenrye okittittimiha vanceene’,*+ onihimya Pwiya Muulupalexa, Yehova a anakhotto.
Masi nyuwo mwaahihimya wiira: “Miyo nkinoorumeelani”.
21 Miyo kaahoophatteyani ntoko mwiri wa ewuuva+ woosareya iwuuva sooxeerya, soosareya ipyo sooreerexa.
Vano xeeni muhalaka wiinanariha ohoolo waka, mwiikhalihaka eritta ya mwiri wa ewuuva yoohiloka?’+
22 ‘Hata mwairapinhe ni soota,* mwiihelaka esapawu yinceene,
Nlelo mwaamukhalana mulattu ohoolo waka’,+ onihimya Pwiya Muulupalexa Yehova.
23 Muniwerya sai ohimya wiira: ‘Miyo nkiinanarinhe,
Miyo nkimutthanre Bayaali’?
Nkawehani moota waari aya mweettelo anyu oxepani.*
Nkuupuwelani etthu mpanke anyu.
Nyuwo munlikana ni ekamelo yoothiyana yaamukhaani ni enitthimaka vanceene,
Yeeyo enitthimaka ninno-ninno ehisuwelaka enirowa aya.
24 Nyuwo munlikana ni mwaapuuru oothiyana olimalenle okhala moothakoni,
Yoowo onuumurya epheyo okathi oniphavela awe orupihiwa.
Niireke ookhala mutthu oniwerya omukhoottiherya orupihiwa?
Apuuru ootheene axilopwana khanikhulumuwa omutthara-tthara.
Waphiya mweeri awe, ootheene awo anomphwanya.
25 Muhihiye inawu sanyu seettaka siiso,
Nave muhihiye mmilo anyu ovoliwaka ntthona.
Masi nyuwo munihimya wiira: ‘Nnaari! Khiivo enilipelela aka!+
26 Ntoko siisaale latarau onuuliwa awe muru avariwa vale,
Siiso-tho atthu a Isarayeli ahuuliwa muru:
Awo, mamwene aya ni makhulupale aya,
Anamukuttho aya ni maprofeta aya.+
27 Awo annihimeerya mwiri wiira: ‘Nyuwo mwa paapa aka’,+
Nave annihimeerya nluku wiira: ‘Ti nyuwo mukiyanre’.
Masi ohiya okiweha, awo annikirerya ettuli.+
Nto okathi onrowa aya waakhumelela maxakha, awo anoohimya wiira:
‘Murwe munoopole!’+
28 Vano ari vai amuluku anyu yaawo mwiipakenle anyu?+
Arweeke yaawo wiira awoopoleni okathi ola wa maxakha,
Okhala wiira nyuwo Yuda, amuluku anyu khareere waatta ntoko saattale aya ipooma sanyu.+
29 Yehova onihimya wiira: ‘Xeeni muniixinliha anyu ni miyo?
Xeeni ootheene anyu muhalaka okirukunuwela?’+
30 Miyo kihaahukhumu aniinyu mahala ene.+
Awo khiyeemerenrye ottharuxiwa.+
31 Nyuwo muniirela mpantta atthu a okathi ola, muupuweleke moolumo a Yehova.
Kiireke miyo kihiikhaliha ntoko othako para atthu a Isarayeli,
Aahiiso ntoko elapo yooriipela vanceene?
Xeeni atthu aka, ahimmye aya wiira: ‘Hiyo nneetta vootaphuwa,
Khannootthikelani-tho’?+
32 Niireke muthiyana ohitonko orupa ni mulopwana onoowerya oliyala itthu sinimphwaneliha,
Aahiiso muthiyana onoivariwe onoowerya oliyala ekuwo awe onitthukwelela awe muyuununi?*
Hata vari siiso, aavira mahiku ahinikontareya atthu aka akiliyanle aya.+
33 Nyuwo muthiyana, owerya xeeni orina anyu, wiira mulokiherye ephiro anyu ya omphavela mulopwana wiira oophentekeni?
Nyuwo muhiixutta mmansinyu iphiro sootakhala.+
34 Hata ikuwo sanyu soonanara ni ephome ya alipa-oohaawa ni ale ahitthenke etthu,+
Hata miyo kihiwoonale apwexaka empa anyu.
Ikuwo sanyu sootheene soosareya ephome aya.+
35 Masi nyuwo munihimya wiira: ‘Nkitthenke etthu.
Tthiri, owo khonanariwe ni miyo’.
Vano, kinimoophukelani,
Mwaha woohimya wiira: ‘Nkitthenke etthu’.
36 Xeeni muhinoona anyu ohikhala etthu ohiroromeleya wanyu?
37 Tivonto munrowa anyu okhuma mwiireyale ene* miyoono vamuru,+
Okhala wiira Yehova ohaakhootta ale mwaaroromela anyu.
Awo khanrowa wookhaliheryani”.
3 Atthu annikoha wiira: “Akhala wiira mulopwana onoomoomola mwaarawe, nuumala omuhiya, onatheliwa ni mulopwana mukina, niireke owo onoomutthikela muthiyana owo?”
Niireke elapo ela khenrowa oveehiwa?+
“Nyuwo mooraruwa ni alopwana anceene.+
Nto vano, niireke muhaana otthikela wa miyo?”. Yehova tonihimya.
2 “Mutthukule maitho anyu, nwehe mapuro oottukhuwela osulu ahimenle malaxi.
Opuro xeeni ohirupihiwe anyu ni alopwana?
Nyuwo mwaanikilaathi mukerekhere mwa estaraata mwaalipelelaka,
Ntoko mutthu oneettakasa moothakoni.
Mwaanithipelela onanariha elapo ela,
Ni oraruwa wanyu vamosa ni otakhala wanyu.+
3 Tivo, epula yoowaatta ehinirupa aya,+
Nave epula enirupa nuuvira okathi aya khenirupa.
Owiitho wanyu onlikana ni muthiyana oniraruwa,
Mookhootta wuuliwa muru.+
4 Masi vano, nyuwo munnikikhuwelela muriki:
‘Paapa, nyuwo mwa mpatthani aka okhuma omiravo aka!+
5 Niireke muhaana onanariwa okathi wootheene,
Aahiiso opweha mathowa mahiku ootheene?’
Eyo ti etthu munihimya anyu,
Masi nyuwo munnithipelela opaka itthu sootheene sootakhala muniwerya anyu”.+
6 Mahiku a mwene Yosiya,+ Yehova aahikileela wiira: “‘Niireke mooweha ele atthu a Isarayeli oohiroromeleya apanke aya? Owo oowela khula mwaako woorakamela osulu, nave oophiya vathi wa khula mwiri muulupale wiira oraruwe.+ 7 Hata nuumala owo opaka itthu iya sootheene, miyo nkaahiyale omuhimeerya wiira otthikele wa miyo,+ masi owo khotthinke. Nave Yuda khaahiyale oweha ohiroromeleya wa murokorawe.+ 8 Okathi kaawenhe aka eyo, kaahimoomola Isarayeli oohiroromeleya, ni kaahinvaha etukumento ya omwalana+ mwaha wa oraruwa wawe.+ Masi muhima awe, Yuda oohiroromeleya, khoovale ohukhummwa. Nave-tho owo aahipacerya oraruwa.+ 9 Owo ooraruwa vakhaani, ooveeha elapo ela ni khororomeleyale* okokhorelaka maluku ni miri.+ 10 Nnaamwi siiraneyale ene itthu iya sootheene, murokorawe Yuda oohiroromeleya khotthikenle wa miyo ni murima awe wootheene, orimoothererya paahi’. Yehova tonihimya”.
11 Nto Yehova aahikileela wiira: “Isarayeli oohiroromeleya ohooniherya okhala a xariya onvikana Yuda oohiroromeleya.+ 12 Murowe mwalaleye moolumo ala onorti:+
“‘Yehova onihimya wiira:+ “Mutthikele wa miyo, nyuwo Isarayeli oohiroromeleya”. ‘Yehova onihimya-tho wiira: “Nkinrowa-tho onanariwa ni nyuwo,+ okhala wiira miyo kinniroromeleya. Nkinrowa onanariwa mahiku ootheene. 13 Mweemererye paahi mulattu anyu, okhala wiira monvirikanya Yehova, Muluku anyu. Nyuwo mwaanithipelela orupa ni atthu muhinaasuwela anyu,* vathi va khula mwiri muulupale. Masi nyuwo khimwaaphavenle wiiwelela nsu naka”. Yehova tonihimya’”.
14 Yehova onihimya wiira: “Mutthike, nyuwo anamwane oohiiwelela. Tthiri miyo kihiikhaliha pwiya anyu eekeekhai.* Khula epooma kinoomukuxa mutthu mmosa, nave khula emusi kinimwaakuxa atthu anli wiira kaaroihe oSiyoni.+ 15 Kinimoovahani amakampusi anrowa opakaka ele eniphavela murima aka,+ nto awo animoolyihani arumeelaka osuwela waya ni ankhili aya. 16 Mahiku awo, nyuwo munrowa okhala oowaatta, nave munimuncerereya”. Yehova tonihimya.+ “Nyuwo khamuntthikela-tho ohimya wiira: ‘Nivuku na Nivarihano na Yehova!’ Nivuku nlo khanintthikela-tho okhala vamurimani vanyu, nnakhala khamunrowa wuupuwela aahiiso owunkhelani nivuku nlo, nave khamuntthikela-tho opaka nivuku nlo. 17 Okathi owo, Yerusalemu onrowa wiihaniwaka ehice ya Yehova,+ nave maloko ootheene anoothukumanyiwa oYerusalemu+ wiira avuwihe nsina na Yehova. Khantthikela-tho othipelela otthara murima aya wootakhala”.
18 “Mahiku awo, anrowa weettaka vamosa, nihimo na Yuda vamosa ni nloko na Isarayeli,+ nto ootheene aya anookhuma elapo ya onorti arowaka elapo kaavanhe aka amuhavinre anyu ntoko etthu yoohiyeriwa.+ 19 Miyo kaahuupuwela wiira: ‘Tthiri ti vooreera osuwela wiira kihookhalihani eriyari ya anaaka, nave kihoovahani elapo eniphavelexiwa, yeeyo eri etthu yoohiyeriwa yootepexa oreera eriyari ya maloko!’+ Nave-tho kaahuupuwela wiira nyuwo mwaarowa okiirela “Paapa” nave khimwaarowa ohiya okitthara. 20 ‘Ntoko siisaale muthiyana ohiniroromeleya awe wa iyawe, onamuhiya, siiso-tho, nyuwo atthu a nloko na Isarayeli khamuroromeleyale wa miyo’.+ Yehova tonihimya”.
21 Mapuro oorakamela osulu ahinimela malaxi onniiwanyeya onyakula,
Wunla ni wiikhupanyerya wa atthu a Isarayeli,
Okhala wiira awo aahonona iphiro saya,
Nave aamuliyala Yehova, Muluku aya.+
22 “Mutthikele wa miyo, nyuwo anamwane oohiiwelela.
Kinoomala-maliha ohiiwelela wanyu”.+
“Hiyo nri va! Nihoorwa wa nyuwo
Okhala wiira nyuwo, Yehova, mwa Muluku ahu.+
23 Tthiri, mapuro oorakamela osulu ni onyakula oniiwanyeya omiyaakoni ti woowoothereriwa.+
Mweekeekhai, Yehova, Muluku ahu toniwerya owoopola atthu a Isarayeli.+
24 Masi, okhuma emiravo ahu, etthu yoowuuliha muru ennihonona muteko wa amuhavinre ahu,+
Ipwittipwitthi saya ni ipooyi saya,
Anaaya axilopwana ni anaaya axithiyana.
25 Nrowe nimmaathele wuuliwa wahu muru,
Nave niikhuneele ni ohaawa wahu.
Tthiri, hiyo ni axipaapa ahu, okhuma emiravo ahu mpakha olelo-va,+
Noomutthekela Yehova, Muluku ahu,+
Nave khaniiwelenle nsu na Yehova, Muluku ahu”.
4 Yehova onihimya wiira: “Nyuwo Isarayeli, akhala wiira munootthika,
Akhala wiira munootthikela wa miyo,
Nave akhala wiira munoomala-maliha ilatarato sanyu soohiirya ohoolo waka,
Weeso, khamuntthikela-tho otthyawa.+
2 Akhala wiira munoolapha muriki:
‘Ntoko siisaale Yehova onikhala awe!’, Mulavulaka ni ekeekhai, exariya ni ororomeleya,
Weeso, maloko anooreelihiwa mwaha wa yoowo,*
Nave mwaha wa yoowo awo animwiittottopa”.+
3 Etthu Yehova onaaleela awe alopwana a oYuda ni a oYerusalemu, tiila:
“Mulime ematta ehilimmwale,
Nave muhaaleke vamiiwani.+
4 Mwiireeriheke para Yehova
Nave mukumihe nrapala na murima anyu,+
Nyuwo alopwana a oYuda ni nyuwo munikhala oYerusalemu,
Wiira onanariwa waka ohivarele ntoko mooro,
Ni ohipatte vahinweryaneya aya ottipiheriwa,
Mwaha wa miteko sanyu sootakhala”.+
5 Mulaleye oYuda ni oYerusalemu.
Mukhuwele ni moope nlope elapo yootheene.+
Mukhuwele vanceene ni muhimyeke wiira: “Nithukumane,
Nitthyawele ipooma soolipihiwa.+
6 Mweemexe esinaale enooniherya ephiro enrowa oSiyoni.
Mphavele opuro wootthyawela, muheemele”,
Okhala wiira kinooruuha maxakha anikhuma onorti,+ opwetexiwa wuulupale.
7 Owo ookhumelela ntoko kharamu onikhuma opuro wiiphinthe awe.+
Ole onipwetexa maloko onnoorwa.+
Owo ookhuma opuro onikhala awe wiira iirihe elapo anyu okhala etthu yoowoopiha.
Ipooma sanyu sinoopwetexiwa, nto khuuvo onrowa okhalaka.+
8 Tivo, nware isaakho,+
Munleke ni mwiikhupanyeryeke,
Okhala wiira nlelo, Yehova oonanariwa vanceene ni hiyo.
9 Yehova onihimya wiira: “Nihiku nlo mwene onoohiya olipa murima,+
Nave makhulupale anoohiya olipa murima,
Anamukuttho animoova, nave maprofeta anootikinihiwa”.+
10 Nto, miyo kaahihimya wiira: “Nnaari Pwiya Muulupalexa Yehova! Tthiri, nyuwo muhaawoka atthu ala+ ni oYerusalemu, muhimyaka wiira: ‘Nyuwo munrowa okhalaka ni murettele’.+ Vano, hiyo nihanle wiiviwa ni espaata”.*
11 Okathi owo, munimwaaleela atthu ala ni oYerusalemu:
“Epheyo yooviha enikhuma mapuro oorakamela osulu a woothakoni,
Enoomoopela mwaana mwaamuthiyana* a atthu aka.
Eyo khenrweela ovalaanya ikavava ni etiriku nnakhala otatha ipyo.
12 Epheyo eyo enrwa ni otupa waya wootheene, erummwaka ni miyo.
Vano, miyo kinimwaaphukela atthu awo.
13 Mwiiwe! Owo onrwa ntoko meeku a epula,
Ikaaro sawe sa ekhotto sinlikana ni epheyo yootupa.+
Ikhavalo sawe ti sootepa otthimaka waavikana amurumaasi.+
Nootakhaliwa, okhala wiira noopwetexiwa!
14 Nyuwo Yerusalemu, mureerihe murima anyu wootakhala wiira moopowe.+
Mpakha silini munrowa anyu wuupuwelaka itthu sootakhala?
15 Tthiri, nookhala nsu ninlaleya ihapari sa oDani,+
Nave nsu nlo, ninnilaleya ehasara ya muttetthe wa omiyaakoni wa Efrayimi.
16 Mulaleye eyo, aayo muhimeerye maloko.
Mulaleye munvirikanyaka Yerusalemu”.
“Annoorwa alipa-oowehaweha* akhumaka elapo ya ottaiwene,
Yaawo anrowa okhuwelela ekhotto ipooma sa oYuda.
17 Awo anrwa wiira amurukurerye Yerusalemu ipantta sootheene, ntoko makwarta aniwehaweha ematta,+
Okhala wiira Yerusalemu ookirukunuwela”.+ Yehova tonihimya.
18 “Iphiro sanyu ni miteko sanyu sinimoomorelani.+
Tthiri ehukhumu anyu ti yootepa owereya,
Ookhala wiira enrowa olukama vamurimani vanyu!”
19 Koohaawa,* koohaawa!
Murima aka onnikiwereya vanceene.
Murima aka onnikimana.
20 Sinnilaleiwa ihasara sinittharelana,
Okhala wiira elapo ela yootheene ennipwetexiwa.
21 Mpakha liini kinrowa aka owehereryaka esinaale,
Nlelo kiiwaka oruma wa nlope?+
22 “Atthu aka alolo,+
Khanikicala.
Awo anamwane alolo ahinisuwela etthu.
Awo tootepa osuwela okathi aniphavela aya opaka itthu sootakhala,
Masi khanisuwela moota woopaka etthu yooloka”.
23 Miyo kaahiweha elapo, nto kaahiweha wiira khiyaakhaliwa ni khiyaarina etthu.+
Kaahiweha erimu, nto kaahiweha wiira waarya waya waahimala-mala.+
24 Kaahiweha miyaako, nto kaahoona wiira saanithukumela,
Nave mattumuxa yaanixekexeya.+
25 Kaahiweha, nto kaahoona wiira khaakhanle mutthu,
Nave axipalame ootheene anivava musulu yaahitthyawa.+
26 Miyo kaahiweha, nto kaahoona ematta ya miri ethatunwe ene othako,
Nave ipooma saya sootheene sipwexakasiwe ene.+
Eyo yaahiiraneya
Mwaha wa onanariwa vanceene wa Yehova.
27 Etthu onihimya awe Yehova, tiila: ‘Elapo ela yootheene khenrowa okhaliwaka,+
Masi nkinrowa omala-maliha voomalela.
Eyo enimwiiraneya okhala wiira miyo koolavula, miyo koolakela,
Nave nkinituruka muupuwelo aka, nnakhala nkinitthikela ottuli.+
29 Yiiwaka-ru oruma wa anakhavalo ni wa ale anivonya mattheere,*
Atthu ootheene a mpooma annitthyawa.+
Atthu anniipitha mutakhwani,
Nave anniwela myala.+
Ipooma sootheene soohiiwa,
Nto khuuvo mutthu onikhala-mo”.
30 Vano mpwetexiwa anyu, munrowa opaka exeeni?
Nyuwo mwaamakela owara ikuwo sooreerexa,
Mwaaniireeriha ni itthu sa eweero,
Nave mwaanipintari maitho ni etinta yooriipa.
Masi, mwaireeriha mahala,+
Okhala wiira ale yoophentani ahookhoottani.
Vano aniphavela owiivani.+
31 Kinniiwa wuupulela onlikana ni wuupulela wa muthiyana oniwereiwa,
Kinniiwa okhuwela onlikana ni okhuwela wa muthiyana onimuyara mwanawe oopacerya,
Nsu na mwaana mwaamuthiyana a oSiyoni, onimumula ni muxankiho.
Owo onnookola matata, oriki:+
“Kootakhaliwa, okhala wiira kooxanka mwaha wa anawiive!”
5 Mweetteette iphiro sa oYerusalemu.
Nwehawehe ni nvahe ephoole.
Mwaavye mapuro oowaatta atthu,
Ni moone akhala wiira munomphwanya mulopwana oneettela exariya,+
Oniphavela okhala oororomeleya,
Nto miyo kinoolevelela epooma eyo.
2 Hata awo ahimyaka wiira: “Ntoko siisaale Yehova onikhala awe!”
Nlelo olapha waya ti woowootha.+
3 Yehova, kiira muniwaavya atthu oororomeleya?+
Nyuwo muhaahukhumu masi khiyoonale owereya.
Nyuwo muhaamala-maliha, masi awo aakhootta ottaruxiwa.+
4 Masi, miyo kaahihimya wiira: “Mweekeekhai, awo atthu oohaawa.
Awo annipaka itthu seelolo okhala wiira khansuwela ephiro ya Yehova,
Ophukela wa Muluku aya.
5 Kinrowa waaphavela alopwana oottittimihiwa, wiira kilavulane,
Okhala wiira ahaana osuwela ephiro ya Yehova,
Ophukela wa Muluku aya.+
Masi ootheene aya ahinta mwiri* wa omwiiwelela Muluku,
Nave aakwasa mikhoyi yaatthukwaniwa aya”.
6 Tivonto kharamu a mutakhwani onaatuphela awe,
Mwiici a moothakoni onaapwetexa awe,
Nave havara oniwiipithela awe waattamela ipooma saya.
Ootheene ale anikhuma annikhuuriwa.
Okhala wiira itampi saya ti soowaatta;
Itthu soohiroromeleya anipaka aya khasinkontareya.+
7 Kinrowa owerya sai woolevelelani ni etthu ela?
Aniinyu aakinyanyala,
Nave annilapha ni nsina na amuluku eethiru.+
Miyo kaahaavaha itthu sootheene saathowa
Masi awo yaamakela oraruwa,
Nave yaanirowa ikurupu sene etthoko ya namararuwa.
8 Awo anlikana ni ikhavalo soolopwana simphavela orupihana;
Khula mmosa onnimunlela muthiyana a mukhwaawe.+
9 Yehova onihimya wiira: “Kiireke miyo nkikhanle oowiiriha waakhula ohoolo waka, mwaha wa itthu iya?
Kiireke nkikhanle oowunlela ikuhu nloko ntoko nla?”+
10 “Murowe imatta sa ewuuva sa oYerusalemu mwapwetexe,
Masi muhimala-malihe.+
Mwiikitthe iritta saya sa niinaano,
Okhala wiira khahiyo sa Yehova.
11 Tthiri nloko na Isarayeli ni nihimo na Yuda,
Nootepa ohiroromeleya wa miyo”. Yehova tonihimya.+
12 “Awo aamukhootta Yehova ni animakela ohimya wiira:
13 Moolumo anilavula aya maprofeta teethiru,
Awo kharina moolumo a Muluku.
Ntoko siisaale moolumo aya ari aya eethiru, naawo anrowa okhala siiso!”
14 Etthu onihimya awe Yehova Muluku a anakhotto, tiila:
“Mwaha wa atthu ala anlavula etthu ela,
Kinimwiiriha moolumo aka ari mwaano mwanyu+ okhala ntoko mooro,
Vano atthu awo anrowa olikanaka ni ikhuni,
Nto mooro owo onrowa waapaha”.+
15 “Nyuwo nloko na Isarayeli,+ kinnooruuhelani nloko ninkhuma ottaiwene”. Yehova tonihimya.
“Nloko nlo khahiyo ti na niinaano.
Nloko nlo ti na khalai,
Nenno ninlavula nttaava muhinsuwela anyu,
Nave moolumo aya muhiniwerya anyu wiiwexexa.+
16 Murupa aya oniheliwa mattheere* onlikana ni mahiye oothimpwa;
Ootheene aya anakhotto.
17 Awo anookhuura itthu muhemphe anyu ni eyoolya* anyu.+
Anoowiiva aniinyu axilopwana ni aniinyu axithiyana.
Animwiiva ipooyi sanyu ni ipwittipwitthi sanyu.
Anoohonona miri sanyu sa ewuuva ni sa efiiku.
Anoopwetexa ni espaata ipooma sanyu soolipihiwa seiyo munroromela anyu”.
18 Yehova onihimya wiira: “Masi, hata mahiku awo, nkinrowa woomala-malihani moomalela.+ 19 Okathi anrowa aya wookohani wiira: ‘Xeeni Yehova Muluku ahu ohalaka oniirela itthu iya sootheene?’ Muhaana owaakhula wiira: ‘Ntoko siisaale mukinyanyanle anyu wiira mwaarumeeleke amuluku a amalapo mulaponi mwanyu, siiso-tho munrowa waarumeelaka anamurwa elapo ehikhanle yawinyu’”.+
20 Mulavule moolumo ala etthoko ya Yakobe,
Nave mulaleye etthu ela oYuda muriki:
21 “Nwiriyane etthu ela, nyuwo alolo ni atthu ahirina ankhili:+
22 Yehova onihimya wiira: ‘Niireke khamunikoova?
Khamwaakhanle oothukumela ohoolo waka?
Ti miyo kihenle mihaava ntoko mukano wa ephareya,
Mukano owo ti wa mahiku ootheene ephareya eyo ehinwerya aya otupha.
Hata mawimpi atupaka, ephareya eyo khenwerya otupha.
Hata anyakulaka kheniwerya otupha mukano owo.+
23 Atthu ala arina murima woohiiwelela ni woovirikanya;
Awo aahiya ephiro aka anatthara ephiro aya.+
24 Awo khanihimya vamurimani vaya wiira:
“Nimuttittimiheke vanceene* Yehova, Muluku ahu,
Yoowo onnivaha epula okathi* aya,
Epula enrupa waphiya okathi aya, ni enrupa waavira okathi aya,
Yoowo onnithanlela okathi woohepha.+
25 Itampi sanyu sookhoottiherya itthu iya wiira siiraneye,
Nave soottheka sanyu sihookhoottiheryani etthu yooloka.+
26 Eriyari ya atthu aka aakhala alopwana ootakhala.
Awo anniipitha ntoko alipa anaaxaya axipalame.
Awo annireya muraakho woowiiva;
Nto owo onnaavara atthu.
27 Ntoko ekeelo yoosareya axipalame,
Ipa saya soosareya itthu soowiiyiwa.+
Tivo anikhala aya oowerya ni anithaaciri aya.
28 Awo tooneneva ni erutthu aya ti yooreera.
Awo annipaka itthu sinceene sootakhala.
Nave khaniwaakiha anamwane ahirina apapaya,+
Wiira itthu siweetteleke saana,
Nave annikhootta owiirela exariya atthu oohaawa’”.+
29 Yehova onihimya wiira: “Kiireke miyo nkikhanle oowiiriha waakhula ohoolo waka, mwaha wa itthu iya?
Kiireke nkikhanle oowunlela ikuhu nloko ntoko nla?
30 Etthu yoowoopiha ni yootikiniha enniiraneya elapo ela:
31 Maprofeta anlaleya itthu soowoothiwa,+
Anamukuttho annaahaaxa atthu mwaha wa owerya waya.
Nave atthu aka annisiveliwa ni etthu iyo.+
Masi munrowa opaka exeeni okathi itthu iya sinrowa aya omala?”
6 Nyuwo anamwane a Beniyamini, mwaavye opuro wootthyawela, opuro woorakamela ni oYerusalemu.
Mweemexe esinaale ya mooro oBethi-Hakeremi!
Okhala wiira annaattamela maxakha anikhuma onorti, ehasara yuulupale.+
2 Mwaana mwaamuthiyana a oSiyoni, onlikana ni muthiyana ooreera ni oophwaneliwa.+
3 Animoorwa amakampusi ni inama saya.
Anoothipela itenta* saya amurukureryaka,+
Nto khula mmosa onookuxa ipwittipwitthi sawe okhapeleleke.+
4 “Mwiilokiherye* wiira mwawane nuuwo!
Nvenye, nrowe namutuphele othana eriyari!”
“Nootakhaliwa! Okhala wiira nihiku ninnimala,
Vanniriipa!”
5 “Nvenye, naatuphele ohiyu
Ni napwetexe ipa saya soorakamela osulu soolipihiwa”.+
6 Etthu onihimya awe Yehova a anakhotto, tiila:
“Mwiikitthe matera, ni muteke opuro woorakamela osulu wiira mutuphele oYerusalemu,+
Eyo epooma enireerela ohukhummwa
Okhala wiira yoosareya ohaaxana.+
7 Ntoko siisaale ehime eri aya maphattuwelo a maasi ooriirya,
Siiso-tho, epooma ela ti maphattuwelo a otakhala.
Epooma ela enniiwanyeya otakhala ni opwetexa.+
Etthu kinoona aka paahi iretta ni ihasara.
8 Mwiiwe etthu enlopoliwa anyu, nyuwo Yerusalemu, mwaahiire siiso miyo kinookhuma eriyari anyu kinanariwe ene,+
Nave kinoowiirihani okhala elapo yoonyanyaliwa ni ehinikhaliwa”.+
9 Etthu onihimya awe Yehova a anakhotto, tiila:
“Atthu a Isarayeli ahanle, anlikana ni mihokorokho sookiserya sa ewuuva.
Muhaana waathukumanya ootheene aya ntoko mutthu onithukumanya iwuuva sookiserya muttankani.*
10 “Kilavule naani, nave kimulopole aani?
Tani onrowa owiriyana?
Mooneke! Maaru aya aattiyana, ahinawerya wiiwa.+
Awo annithanya moolumo a Yehova,+
Nave khansiveliwa ni moolumo awe.
11 Tivo, Yehova oonanariwa vanceene,
Nto miyo nkiniwerya-tho omaala.+
“Mwaaleele onanariwa wawe anamwane ari mustaraatani,+
Nave mwaahimerye amiravo athukumanne.
12 Ipa saya anoovahiwa atthu akina,
Vamosa ni imatta saya ni axaaraya.+
Tthiri miyo kinimookola ntata naka, wiira kiwane ni atthu a elapo ela”. Yehova tonihimya.
13 “Okhuma acikhaani mpakha aalupale, ootheene aya anniphwanya mihakhu voohiroromeleya,+
Okhuma maprofeta mpakha anamukuttho, ootheene aya anniiya.+
14 Nave awo anneererya oloola makhwatta a atthu aka, ariki:
‘Wookhala murettele! Wookhala murettele!’
Variki ohikhanle murettele.+
15 Niireke awo ahuuliwa muru mwaha wa itthu soohiloka apanke aya?
Awo khiyuuliwe muru nnakhala vakhaani!
Hata, awo khanuuliwa muru!+
Tivo awo anoopwetexiwa ntoko apwetexiwa aya atthu akina.
Okathi kinrowa aka waahukhumu awo anoomora”. Yehova tonihimya.
16 Etthu onihimya awe Yehova, tiila:
“Mweemele mapuro sinikumana aya iphiro ni mooneke.
Mukohererye iphiro sa khalai,
Nave mukohererye ephiro yooreera, ni mutthareke yeeyo,+
Nto munoophwanya murettele”.
Masi awo yaahihimya wiira: “Hiyo khaninrowa otthara ephiro eyo”.+
17 “Nave miyo kaahaathanla alipa-oowehaweha+ yaawo yaahimya wiira:
‘Nwiriyaneke oruma wa nlope!’”+
Masi awo yaahihimya wiira: “Khaninrowa owiriyana”.+
18 “Nyuwo maloko, nwiriyane!
Nyuwo atthu, musuwele,
Ele enrowa owiiraneela atthu awo.
19 Mwiiwe, nyuwo elapo!
Miyo kinimwaakumiherya ehasara atthu ala,+
Mwaha wa itthu anuupuwela aya,
Okhala wiira khawiriyanne moolumo aka,
Nave aakhootta nlamulo* naka”.
20 “Kintekelani nsenso* muniruuha anyu oXeeba?
Ni muhali* muniruuha anyu elapo yoottaiwene?
Miyo nkineemererya soovaha sanyu para opahiwa,
Nave mikuttho sanyu khasinkisivela”.+
21 Tivo, etthu onihimya awe Yehova, tiila:
“Miyo kinoopweha maluku ammoroxa ohoolo wa atthu ala,
Awo anoomorela maluku awo,
Axipaapa ni anamwane,
Anamwaattamanani ni apatthani aya,
Nto ootheene aya animookhwa”.+
22 Etthu onihimya awe Yehova, tiila:
“Mwiiwe! Annoorwa atthu akhumaka elapo ya onorti,
Nave ninnoorwa nloko nuulupale nikhumaka elapo ya ottaiwene.+
23 Awo anrwa akunxe ene muura ni mavaka.
Awo tootakhala ni khanimoriwa ikharari.
Nsu naya ninniruma ntoko ephareya,
Nave awo anrwa awenle ene ikhavalo.+
Awo anrwa ntoko anakhotto yiilokihenrye owana ekhotto ni nyuwo, mwaana mwaamuthiyana a oSiyoni”.
24 Hiyo nihiiwa ihapari sinlavula mwaha owo.
Nave mapuro ootheene annoopiha.
Mmunleleke mwaninyu mmose ene, mwiikhupanyeryaka vanceene,+
Okhala wiira vootutuxerya mulipa-oopwetexa onoonirweela.+
27 “Miyo kihookhalihani* mutthu onireeriha eweero ni eparatha eriyari ya atthu aka,
Yoowo onireeriha voomalela.
Nyuwo muhaana wuupuwela eyo ni ovarerya ephiro aya.
Awo anlikana ni ekoopiri ni eyuuma,
Nave ootheene aya tootakhala.
29 Mutthu onnikukhumuwa mahala wiira aareerihe,
Mpakha ikaruma sawe ovya.
Masi owo oniikukhumula mahala eereryaka waareeriha,+ okhala wiira ootheene aya tootakhala.+
Etthu enikhuma vaikho exumpu paahi.
30 Atthu anrowa waahimyaka okhala eparatha yookhoottiwa,
Okhala wiira Yehova ohaakhootta”.+
7 Yeremiya aahisuwelihiwa moolumo a Yehova, yaahimya wiira: 2 “Mweemele vamukhora va empa ya Yehova ni mulaleye moolumo ala: ‘Mwiiwe moolumo a Yehova, nyuwo atthu ootheene a oYuda munikela mikhora iya wiira mmukokhorele Yehova. 3 Etthu onihimya awe Yehova a anakhotto, Muluku a Isarayeli, tiila: “Mulokiherye iphiro sanyu ni miteko sanyu, nto miyo kinooweemereryani wiira nlelo mukhaleke opuro ola.+ 4 Muhiroromeleke moolumo oowoothiwa nnakhala muhihimyeke wiira: ‘Ela* etemplo ya Yehova, etemplo ya Yehova, etemplo ya Yehova!’+ 5 Tthiri mwalokiherya iphiro sanyu ni miteko sanyu, mwamwiirela exariya mulopwana orina mulattu ni mukhwaawe,+ 6 mwaahimuhaaxe namurwa, anamwane ahirina apapaya* ni anaamukhweli,+ mwaahimwiive mutthu ohitthenke opuro ola, nave mwahaatthare amuluku eethiru mphavelaka wiikumiherya mixankiho,+ 7 weeso kinooweemereryani nlelo okhala opuro ola, elapo kaavanhe aka amuhavinre anyu mahiku ootheene”’”.
8 Masi nyuwo muniroromela moolumo oowoothiwa,+ nto eyo khenrowa woophwanyihani mureerelo. 9 Niireke nyuwo munoowerya wiiya,+ wiiva, oraruwa, olapha moothaka,+ onvaha mikuttho Bayaali+ ni waatthara amuluku muhinaasuwela anyu, 10 nuumala-vo munarwa weemela ohoolo waka empa ela erina nsina naka ni munahimya wiira: ‘Hiyo nnimoopowa’, nnaamwi mpakaka itthu iya sootheene sootakhala? 11 Niireke empa ela erina nsina naka yookhalihiwa empa ya alatarau vamaithoni vanyu?+ Miyo kinnoona eyo mmansaka”. Yehova tonihimya.
12 “‘Vano, murowe opuro aka oSilo,+ weiwo kipacenrye aka okhaliha nsina naka,+ moone etthu kiirinhe aka mwaha wa otakhala wa atthu aka aisarayeli.+ 13 Masi nyuwo mwaamakela opaka itthu iya sootheene sootakhala, nave hata kaalavula ni nyuwo ikwaha sinceene,* nyuwo khamwaawiriyana.+ Miyo kaamakela owiihanani, masi nyuwo khamwaakaakhula’.+ Yehova tonihimya. 14 ‘Tivo, empa ela erina nsina naka,+ yeeyo muniroromela anyu,+ ni opuro ola kaavanhe aka amuhavinre anyu, kinimwiiriha etthu emosa-ru kiirinhe aka oSilo.+ 15 Miyo kinoowoomolani ohoolo waka, ntoko siisaale kaawoomonle aka axinninyu, osuulu wootheene wa Efrayimi’.+
16 “Vano nyuwo, muhaavekelele atthu ala. Muhinle nnakhala muhivekele aahiiso muhikixonttele wiira mwaaphwanyihe mureerelo,+ okhala wiira nkinrowa woowiriyanani.+ 17 Kiireke khamunoona etthu anipaka aya atthu a ipooma sa oYuda ni iphiro sa oYerusalemu? 18 Anamwane annithukumanya ikhuni, axipaapa annipattiha mooro ni axaaraya anneetheya otthu* wiira anvahe mukuttho wa iphaawu Pwiyamwene a Osulu.*+ Nave awo annaamwaraxela soovaha siniwuriwa amuluku akina wiira akiveehe.+ 19 Yehova onihimya wiira: ‘Masi niireke ti miyo ankiveeha aya? Kiira aniiveeha mmansaya yiirelaka wuuliwa muru?’+ 20 Tivo etthu onihimya awe Pwiya Muulupalexa Yehova, tiila: ‘Mwiiwe! Miyo kinoonanariwa ni kinooviruwela opuro ola,+ kinoonanariwa ni kinimwaaviruwela atthu ni inama, miri sa mutakhwani ni miri siniima mihokorokho. Onanariwa waka onlikana ni mooro ohinttipiheriwa’.+
21 “Etthu onihimya awe Yehova a anakhotto, Muluku a Isarayeli, tiila: ‘Muthipeleleke wiira siiso, muncereryeke soovaha sanyu para opahiwa ni mikuttho sanyu sikina, nave mukhuureke enama ene.+ 22 Tthiri, nihiku kaakuminhe aka amuhavinre anyu elapo ya wExiitu, nkaalavunle naawo nnakhala nkaarumme ovaha soovaha para opahiwa ni mikuttho.+ 23 Masi yooruma kaavanhe aka, tiila: “Nwiriyaneke nsu naka, nto miyo kinookhala Muluku anyu, nyuwo munookhala atthu aka.+ Muhaana weetta ephiro kinoorumaakani, mwiira siiso itthu sinooweettelani saana”’.+ 24 Masi awo khiyaaphavenle wiiwa nnakhala khiyaatheteyale maaru aya.+ Ohiya-vo, awo yaahitthara miruku saya, yuumihaka mirima saya sootakhala,+ nave yaahitthikela ottuli ohiya orowa ohoolo, 25 okhuma nihiku amuhavinre anyu yaakhumme aya elapo ya wExiitu mpakha olelo-va.+ Tivonto miyo kaamakela wooruuhelani arumeyi aka, maprofeta, khula nihiku, voohihiyererya.*+ 26 Masi awo aakhootta okiwiriyana, nave khaphavenle wiiwa moolumo aka.*+ Ohiya-vo, ahuumiha mirima saya, nave aapaka itthu sootakhala waavikana amuhavinre aya!
27 “Nyuwo munimwaaleela moolumo ala ootheene,+ masi awo khanrowa woowiriyanani. Nyuwo munoowiitthana, masi awo khanrowa owaakhulani. 28 Nto munimwaaleela wiira: ‘Nloko nla khaniiwelenle nsu na Yehova, Muluku aya, nnakhala khaniphavenle ottaruxiwa. Ororomeleya woomala-mala, nave khoniromoliwa eriyari aya’.*+
29 Mmetthe ikharari sanyu murihele ota, nave mwiipeke nsipo na wiikhupanyerya mapuro oorakamela osulu ohimenle malaxi, okhala wiira Yehova ookhootta ni onoonyanyala nloko nla nimwiirinhe onanariwa vanceene. 30 Yehova onihimya wiira: ‘Tthiri atthu a oYuda aapaka etthu yootakhala vamaithoni vaka. Aapweha ilatarato soohiirya empa yeeyo erina nsina naka, yiirelaka ohonona empa eyo.+ 31 Awo aateka mapuro oorakamela osulu a oTofeti, yaawo anikhala oxepani wa Mwaana a Hinomi,*+ wiira yaapaheke anaaya axilopwana ni anaaya axithiyana vamooroni,+ etthu yeeyo kihaarumme aka nnakhala kihitonko aka wuupuwela vamurimani vaka’.+
32 “Yehova onihimya wiira: ‘Mwiiwe, anoophiya mahiku, opuro ola ohinrowa aya-tho wiihaniwaka oTofeti aahiiso oxepani wa Mwaana a Hinomi, masi onrowa wiihaniwaka oxepani wa Wiiva. Awo animwaavitha atthu oTofeti mpakha ohihala opuro.+ 33 Mirutthu sa atthu ala, sinrowa okhala yoolya ya axipalame a musulu ni ya inama sa vathi, nto khuuvo onrowa woomolelaka.+ 34 Miyo kinoomala-maliha okhuwela wootthapa ni okhuwela wootteeliwa murima, nsu na mulipa-oothela ni na mulipa onitheliwa+ ipooma sa oYuda ni iphiro sa oYerusalemu, okhala wiira elapo ela enoopwetexiwa’”.+
8 Yehova onihimya wiira: “Okathi owo, makhuva a mamwene a oYuda, makhuva a makhulupale aya, makhuva a anamukuttho, makhuva a maprofeta ni makhuva a atthu anikhala oYerusalemu anookumihiwa mmahiye. 2 Awo anoomwara-mwariwa vathi va nsuwa, mweeri ni itheneeri sootheene sa osulu, seiyo aniphenta aya, anirumeela aya, anitthara aya, aniphavela aya ni anikokhorela aya.+ Awo khanrowa othukumanyiwa nnakhala ovithiwa. Awo anrowa olikanaka ni eturumu eri vatthayani”.+
3 Yehova a anakhotto onihimya wiira: “Mapuro ootheene kinrowa aka waamwara-mwarya atthu ala ootakhala anrowa ohala, anrowa ophavelaka okhwa, ohiya okhala akumi”.
4 “Nto muhaana waaleela wiira: ‘Etthu onihimya awe Yehova, tiila:
“Niireke awo yamora khanrowa ovenya?
Akhala wiira mmosa onootthika, niireke nave akina khanrowa otthika?
5 Xeeni atthu ala a oYerusalemu anithipelela aya ohiroromeleya?
Awo annivarexexa wootha,
Annikhootta otthikela ottuli.+
6 Miyo kaanaaweha ni kaanaawiriyana, masi moota yaalavula aya khiwaalonke.
Khuuvo aattharunwe mweettelo awe wootakhala ni aakonhe wiira: ‘Kipanke-ni?’+
Khula mmosa aamakela otthara iphiro sa atthu akina, ntoko ikhavalo sinikela okhottoni.
7 Hata napiphi* a musulu onnisuwela okathi awe,
Nave nsiya, nikekesa* ni axipalame akina annisuwela okathi wootthika.
Masi atthu aka khanisuwela ophukela wa Yehova”’.+
8 ‘Muniwerya sai ohimya wiira: “Hiyo nookhalana ankhili nave nookhalana nlamulo na* Yehova”?
Mweekeekhai, ekaneta yoowootha ya alipa-oolepa,*+ enirumeeliwa paahi para olepa itthu soowootha.
9 Alipa ankhili ahuulihihiwa muru.+
Awo annoova ni anoovariwa.
Awo aakhootta moolumo a Yehova,
Nto miruku xeeni arina aya?
10 Siiso, axaaraya kinimwaavahererya alopwana akina,
Nave imatta saya kinimwaavahererya atthu akina,+
Okhala wiira okhuma acikhaani mpakha aalupale, ootheene aya anniphwanya mihakhu voohiroromeleya.+
Okhuma maprofeta mpakha anamukuttho, ootheene aya anniiya.+
11 Awo anneererya oloola makhwatta a mwaana mwaamuthiyana a atthu aka, yiiraka:
“Wookhala murettele! Wookhala murettele!”
Variki ohikhanle murettele.+
12 Niireke awo ahuuliwa muru mwaha wa itthu soohiloka apanke aya?
Awo khiyuuliwe muru nnakhala vakhaani!
Hata, awo khanuuliwa muru!+
Tivo awo anoopwetexiwa ntoko apwetexiwe aya atthu akina.
Okathi kinrowa aka waahukhumu awo anoomora’,+ Yehova tonihimya.
13 Yehova onihimya wiira: ‘Okathi kinrowa aka waathukumanya, kinimwaamala-maliha.
Khenrowa ohala ewuuva mmwirini mwa ewuuva, nnakhala ifiiku mmwirini mwa efiiku, nave makukhu anoonyaala.
Awo anoopweteiwa itthu kaavanhe aka’”.
14 “Xeeni ninkilaathi ahu-va?
Nrowe nithukumane, nrowe ipooma soolipihiwa+ wiira nakhwele weiwo.
Tthiri Yehova Muluku onoonimala-maliha,
Nave onoonivaha maasi ooheliwa eveneno wiira niwurye,+
Okhala wiira noomutthekela Yehova.
15 Naalipelela murettele, masi khiivo etthu yooloka yiiraneyale.
Naalipelela okathi woopenuxiwa, masi nnoona itthu soowoopiha paahi!+
16 Okhuma oDani onniiwanyeya onyakula wa ikhavalo.
Elapo yootheene ennithukumela ni onyakula wa ikhavalo iyo.
Awo annoorwa wiira ahonone elapo eyo,
Ni itthu sootheene siri memmo,
Epooma ni atthu anikhala memmo”.
17 Yehova onihimya wiira: “Miyo kinnooruuhelani inowa,
Inowa soosareya eveneno seiyo sihineepesiwa,
Nto iyo sinimoolumakasani”.
18 Oriipiwa waka murima khonimala,
Nave murima aka onniwereiwa.
19 Mwaana mwaamuthiyana a atthu aka onnikhuwela ovekelaka okhaliheriwa
Ori ene elapo yoottaiwene, iiraka:
“Niireke Yehova khokhanle oSiyoni?
Aahiiso oSiyoni khokhanle-wo mwene?”
“Xeeni awo akiveehale aya ni ilatarato saya soopatthiwa,
Vamosa ni amuluku aya a amalapo ahirina efaita?”
20 “Okathi woohepha woovira, nave elimwe yoovira,
Masi hiyo nlelo khanoopoliwe!”
21 Kooxanka mwaha wa makhwatta a mwaana mwaamuthiyana a atthu aka,+
Nave kooriipiwa murima vanceene.
Woova wookiphwanya.
22 Niireke oXileyaadi+ khokhanle baalsamu?
Niireke khokhanle-wo meetiku?+
Xeeni mwaana mwaamuthiyana a atthu aka ohipenuwaka?+
9 Kaaniphavela wiira muru aka waari ntoko ehime yoosareya maasi,
Nave maitho aka yaari maphattuwelo a maithori!+
Siiso miyo kaamunla othana ni ohiyu,
Kiwunlelaka atthu aka akhwiiye.
2 Kaaniphavela kaarina opuro animaka atthu aneetta mukwaha moothakoni!
Siiso kaamwaahiya atthu aka ni kaamurowa ottaiwene,
Okhala wiira ootheene aya ti anamararuwa,+
Nave ekurupu ya atthu oohiroromeleya.
3 Nlumi naya ninlikana ni nttheere* nookokhiwa.
Mulaponi-mu onnikhala wootha, ohiya ororomeleya.+
Yehova onihimya wiira: “Awo annipaka itthu sootakhala,
Khanikiwiriyana”.+
4 Ootheene anyu mwiipasoopeke ni mukhwiinyu,
Nave muhimuroromeleke munninyu.
5 Khula mutthu onninwoka mukhwaawe,
Khuuvo onilavula ekeekhai.
Awo ahiixuttiha nlumi naya olavula itthu soowoothiwa.+
Nave annikhulumuwa mwaha woopaka itthu soohiloka.
6 Nyuwo munikhala eriyari ya atthu oowootha.
Mwaha wookhala atthu oowootha, awo annikhootta okisuwela”. Yehova tonihimya.
7 Etthu onihimya awe Yehova a anakhotto, tiila:
“Miyo kinimwaareeriha ni kinooweehererya.+
Kimwiirihe-tho exeeni mwaana mwaamuthiyana a atthu aka?
8 Nlumi naya ninlikana ni nttheere nniiva, nenlo ninlavula itthu soowootha.
Arumeelaka iyano saya annihimya okhalana murettele ni akhwaaya,
Masi vamurimani vaya anniwiipithela.
9 Yehova onihimya wiira: “Kiireke miyo nkikhanle oowiiriha waakhula ohoolo waka, mwaha wa itthu iya?
Kiireke nkikhanle oowunlela ikuhu nloko ntoko nla?+
10 Kinimunla ni kinimwiikhupanyerya mwaha wa miyaako,
Kinimwiipa nsipo na wiikhupanyerya mwaha wa mapuro anilyihiwa inama moothakoni,
Okhala wiira aapahiwa ni khuuvo onivira mapuro awo,
Nnakhala khoniiwanyeya wunla wa inama.
Nave axipalame a musulu ni inama sootthyawa, iyo soorowa.+
11 Kinimwiiriha oYerusalemu okhala ntoko maluku oowuukeliwa+ ni opuro oniipitha aya alapwa a mutakhwani.+
Nave kinimwiiriha ipooma sa oYuda okhala milepe,* nto khuuvo onrowa okhalaka-mo.+
12 Ti pani orina ankhili oniwerya wiiwexexa etthu ela?
Ti pani olavulihiwe ni Yehova, wiira olaleye etthu ela?
Xeeni elapo ela epwetexiwe aya?
Xeeni yuumale aya enakhala ntoko othako,
Ohinakhala mutthu onivira?”
13 Yehova aahaakhula wiira: “Mwaha wa okhootta nlamulo naka* kipwenhe aka ohoolo waya, ni mwaha wa ohitthara nlamulo nlo ni wiiwelela nsu naka. 14 Nave-tho, awo aalakela otthara murima aya,+ nave annitthara ilatarato sa Bayaali, ntoko yiixuttihiwa aya ni axipapaya.+ 15 Tivo, etthu onihimya awe Yehova a anakhotto, Muluku a Isarayeli, tiila: ‘Kinoowiiriha atthu ala okhuura mwiri woowaawa ni owurya maasi ooheliwa eveneno.+ 16 Kinimwaamwaarya-mwarya awo ni axipapaya, eriyari ya maloko ahinisuwela aya,+ nave kinimwaaroihela espaata* mpakha waamala-maliha’.+
17 Etthu onihimya awe Yehova a anakhotto, tiila:
‘Mukhaleke ntoko atthu oosuwela.
Nwiihane athiyana aniipa isipo soowiikhupanyerya,+
Nave nwiihanihe athiyana oosuwela,
18 Wiira arwe vowaakuveya wiira aniipele isipo soowiikhupanyerya,
Wiira maitho ahu amoreke maithori,
Nave maitho ahu attonyeke maasi.+
19 Tthiri oSiyoni onniiwanyeya wunla wa wiikhupanyerya:+
“Hiyo noopwetexiwa voomalela!
Khanreere wuuliwa muru!
Hiyo noohiya elapo ahu, nto awo aapwexakasa ipa sahu”.+
20 Nyuwo athiyana, mwiiwe moolumo a Yehova.
Maaru anyu yiiweke moolumo anikhuma mwaano mwawe.
Nwiixuttihe aniinyu axithiyana wiikhupanyerya nno,
21 Tthiri okhwa ori vaxanelani vahu,
Nave wookela ipa sahu soorakamela osulu soolipihiwa,
Wiira waamala-malihe anamwane ari mustaraatani,
Ni amiravo ari mapuro oowaatta atthu’.+
22 Muhimye wiira: ‘Etthu onihimya awe Yehova, tiila:
“Mirutthu sa atthu sinrowa omora ntoko etturumu eri mmatta,
Ntoko mavisi a ipyo siikitthiwe ni mulipa-oohepha,
Sihithukumanyiwa”’”.+
23 Etthu onihimya awe Yehova, tiila:
“Ole orina ankhili ohiittottopeke mwaha wa ankhili awe.+
Ole orina owerya ohiittottopeke mwaha wa owerya wawe.
Nave ole ori thaaciri ohiittottopeke mwaha wa mihakhu sawe”.+
24 Masi ole oniittottopa, iittottopeke mwaha wa etthu ela:
Mwaha wookhalana ankhili ni okisuwela,+
Wiira miyo ka Yehova, yoowo onooniherya ophenta woororomeleya ni exariya valaponi,+
Okhala wiira itthu iya sinnikisivela”.+ Yehova tonihimya .
25 Yehova onihimya wiira: “Mwiiwe! Annaattamela mahiku kinrowa aka waahukhumu atthu ootheene oowiinnuwihiwa, masi nlelo ari oohinnuwihiwa:+ 26 Atthu a wExiitu,+ a oYuda,+ a wEdomi,+ a wAmoni,+ a oMowabi+ ni atthu ootheene yiikhintthe ikharari oponta waya, yaawo anikhala woothakoni.+ Tthiri maloko ootheene toohinnuwihiwa, nave atthu ootheene a nloko na Isarayeli toohinnuwihiwa vamurimani vaya”.+
10 Nyuwo atthu a nloko na Isarayeli, nwiriyane moolumo a Yehova onoolopolaaweni. 2 Etthu onihimya awe Yehova, tiila:
“Muhitthareke iphiro sa maloko,+
Nave muhooveke mwaha wa ithoonyeryo sa wiirimu,
Okhala wiira maloko tanoova itthu iyo.+
3 Soolema sa atthu, ethiru.
Enlikana ni mwiri wa mutakhwani oniikitthiwa,
Onavariheliwa muteko ni mulipa-onivara muteko ni matera orumeelaka ekaruma awe.+
4 Awo annireeriha arumeelaka eparatha ni eweero.+
Nave annilipiha amurumeelaka maritelo ni epereku wiira ehimore.+
5 Iyo sinlikana ni moopopiho opwehiwe mmatta mwa muxiri, khasinwerya olavula,+
Sihaana oteexiwa okhala wiira khasineetta.+
Muhoove ilatarato iyo, okhala wiira khasinwerya owiirihani etthu yootakhala,
Nnakhala khasinwerya owiirelani etthu yooreera”.+
6 Khuuvo onlikana ni nyuwo, Yehova.+
Nyuwo mwa muulupale, nave nsina nanyu ti nuulupale ni noowerya.
7 Atthu ootheene anoowoovakani, nyuwo mwene a maloko.+ Tthiri eyo ti etthu enreerela opakiwa,
Okhala wiira eriyari ya atthu a maloko ootheene arina ankhili ni a omwene wootheene wa mulaponi,
Khuuvo onlikana ni nyuwo.+
8 Ootheene aya khanuupuwela saana ni alolo.+
Wiixuttihiwa ni mwiri ethiru yuulupale.+
9 Eparatha yoohaniwa enikumihiwa oTaarisi,+ nave eweero enikumihiwa wUfazi,
Yeeyo enivareliwa muteko ni alipa-anivara muteko ni matera, yaawo anivara muteko ni eweero.
Ekuwo aya ti yooriipelela ni yooxeerya.
Sootheene iyo sinipakiwa ni anamuteko oosuwela.
10 Masi Yehova ti Muluku eekeekhai.
Owo ti Muluku mukumi+ ni mwene onikhala mahiku ootheene.+
Mwaha wa onanariwa wawe, elapo enoothukumela,+
Nto khanivo nloko ninrowa owerya ovilela oviruwa wawe.
11* Etthu mukhanle anyu oowaahimeerya, tiila:
“Amuluku ahipanke erimu ni elapo,
Anoomala-mala mulaponi vathi va erimu”.+
12 Owo ti yoole opanke elapo ni owerya wawe,
Aatanle etthaya yooruwerya ni miruku sawe,+
Nave ti yoowo aatanle erimu ni osuwela wawe.+
13 Okathi oniiwanyeya aya nsu nawe,
Maasi a wiirimu anninyakula.+
Nave owo onniiriha meeku* owela osulu, akhumaka omalenle elapo.+
14 Alopwana ootheene annipaka itthu voohuupuwela ni voohisuwela.
Alopwana ootheene anivara muteko ni eweero, animuuliwa muru mwaha wa ilatarato saya soopatthiwa,+
Okhala wiira ilatarato saya sa eyuuma ti seethiru,
Nave khasirina iphumu.+
15 Ilatarato iyo ethiru, miteko soothanyiwa.+
Naphiya nihiku Muluku onrowa awe opwetexa ilatarato iyo, sinoomala-mala.
16 Itthu ovahiwa awe Yakobe khasinlikana ni iya,
Okhala wiira Muluku topanke itthu sootheene,
Nave Isarayeli tori ttootto ohiyeriwe awe.+
Nsina nawe ti Yehova a anakhotto.+
17 Mukuxe muritti anyu,
Nyuwo muthiyana munikhala opuro woorukureriwa.
18 Etthu onihimya awe Yehova, tiila:
“Vano, kinimwaavonyerya ottaiwene atthu a elapo ela,+
Nave kinooweemererya atthu awo waakhumelela maxakha”.
19 Kootakhaliwa mwaha wa ehasara aka!+
Nikhwatta naka khaninvola.
Miyo koohimya wiira: “Tthiri, ela eretta aka nto kihaana ovilela,
20 Etenta aka yoohononiwa nave mikhoyi saya sootheene sookwaseyasa.+
Anaaka aakihiya ni khakhanle-tho.+
Khohanle nnakhala mmosa wiira othipele etenta* aka ni ovenxa ipaanu saya.
Tivo, aapaka etthu voohisuwela,
Nto ipwittipwitthi saya sootheene soomwara-mwareya”.+
22 Nwiriyane ihapari!
Onniiwanyeya onyakula wuulupale onikhuma elapo ya onorti,+
Wiira iirihe ipooma sa oYuda, elapo ehinikhaliwa ni opuro aniipitha aya alapwa a mutakhwani.+
23 Yehova, koosuwela oratteene wiira mutthu khonwerya ophwanya ephiro awe mekhawe.
Okathi oneetta awe, owo khonwerya weettiha saana mavalo awe* ohikhaliheriwaka.+
25 Nviruwele maloko ahinoocalani,+
Ni imusi sihinittittimiha nsina nanyu.
11 Yeremiya aahisuwelihiwa moolumo a Yehova yaahimya wiira: 2 “Nyuwo atthu, nwiriyane moolumo a nivarihano nla!
“Mwaaleele* alopwana a oYuda ni atthu anikhala oYerusalemu, 3 wiira: ‘Etthu onihimya awe Yehova, Muluku a Isarayeli, tiila: “Ootakhaliwa mutthu yoole ohinrowa wiiwelela moolumo a nivarihano nla,+ 4 nenlo kaapanke aka ni amuhavinre anyu nihiku kaakuminhe aka elapo ya wExiitu,+ mulittini mwaapatta mooro,+ kiiraka: ‘Mwiiweleleke nsu naka mpakeke itthu sootheene kinoorumaakani, mwiira siiso munrowa okhala atthu aka, nave miyo kinrowa okhala Muluku anyu.+ 5 Miyo kinoomaleliha ele kaaleihenrye aka amuhavinre anyu, wiira kaamwaavaha elapo yoowaatta eleeti ni oravo,+ ntoko eniiraneya aya olelo’”’”.
Nto, kaahaakhula wiira: “Amen,* Yehova”.
6 Yehova aahikileela wiira: “Mulaleye moolumo ala ootheene ipooma sa oYuda ni iphiro sa oYerusalemu muriki: ‘Mwiiwe moolumo a nivarihano nla ni mweetteleke. 7 Miyo kaahaaleela amuhavinre anyu okhuma nihiku kaakuminhe aka elapo ya wExiitu mpakha olelo, kaaleelaka ikwaha sinceene, kiiraka: “Mwiiweleleke nsu naka”.+ 8 Masi awo khiyawiriyanne nnakhala khiyaavanhe ephoole,* ohiya-vo khula mmosa aahithipelela otthara murima awe wootakhala.+ Siiso miyo kahaaroihela moolumo a nivarihano nla, yaawo kaarumme aka wiira yeetteleke, nto awo yaahikhootta’”.
9 Yehova aahikileela wiira: “Alopwana a oYuda ni atthu anikhala oYerusalemu, aakirukunuwela. 10 Awo aatthikela opaka itampi saapakiwa okhuma khalai ni amuhavinre aya, yaawo yaakhoottale wiiwelela moolumo aka.+ Nave ahaatthara amuluku akina anaakokhorela yaawo.+ Atthu a nloko na Isarayeli ni atthu a nihimo na Yuda aahonona nivarihano kipanke aka ni amuhavinre aya.+ 11 Tivonto, etthu onihimya awe Yehova, tiila: ‘Kinimwaakumiherya ehasara+ yeeyo ahinrowa aya woopowa. Okathi anrowa aya okikhuwelela avekelaka nikhaliheryo, miyo nkinrowa waawiriyana.+ 12 Nto atthu anikhala epooma ya oYuda ni atthu anikhala oYerusalemu animwaatthyawela amuluku yaawo anrowa aya waavahaka mikuttho ni anrowa aya waakhuwelelaka avekelaka nikhaliheryo,+ masi awo khanrowa owoopola okathi enrowa aya ophiya ehasara. 13 Nyuwo Yuda, ipooma sanyu khareere waatta amuluku anyu eethiru. Nyuwo muhaateka altaari nave munninvaha mukuttho muluku oowuuliha muru, Bayaali.+ Altaari awo khareere waatta iphiro sa Yerusalemu’.
14 “Nto nyuwo,* muhaavekelele atthu ala. Muhaakhuwelele nnakhala muhaavekelele,+ okhala wiira miyo nkinrowa woowiriyanani okathi munrowa anyu okikhuwelela mwaha wa ehasara enrowa waakhumelela.
15 Etireitu xeeni atthu aka oophentiwa arina aya ya okhala empa aka,
Okathi atthu anceene anuupuwela aya opaka itthu sootakhala?
Niireke enama yoowaarya* enoowerya okhoottiha wiira ehaakhumelele ehasara?
Niireke okathi owo nyuwo munootthapaka?
16 Yehova aanoohimyani okhala mwiri muulupale wa olivera,
Wooreera ni orina mihokorokho sooreera.
Okhuwelaka vanceene, owo orihela vaikho;
Nave ohiikitthasa iritta saya.
17 “Yehova a anakhotto, yoowo owaalaleni,+ oohimya ehasara enrowa wookhumelelani, mwaha wa etthu yootakhala enipakiwa ni atthu a nloko na Isarayeli, ni atthu a etthoko ya Yuda, yaawo akiveehale, mwaha wonvaha mikuttho Bayaali”.+
18 Yehova ookileela wiira kisuwele,
Okathi ole, mookooniherya etthu yaapaka aya.
19 Miyo kaalikana ni epwittipwitthi yoomaala yaarowa wiiviwa.
Nkaasuwela wiira awo yaamukirukunuwela+ ahimyaka wiira:
“Nrowe nipwetexe mwiri ni mihokorokho sawe.
Nrowe nimmala-malihe mulaponi mwa atthu akumi,
Wiira nsina nawe niliyaliwe”.
20 Yehova a anakhotto onniphuka ni exariya,
Owo onnitokosa miyuupuwelo sootepa wiixerya ni murima.+
Miyo kinniphavela woowehani nwunlelaka ikuhu,
Okhala wiira mulattu aka koororomenleni nyuwo.
21 Ela ti etthu onihimya awe Yehova, aahimyaka alopwana a wAnatothi,+ yaawo aniphavela owiivani ni anihimya wiira: “Muhilaleye eprofesia ni nsina na Yehova,+ mwathipelela wiira siiso nnoowiivani”; 22 etthu onihimya awe Yehova a anakhotto, tiila: “Miyo kinoowiiriha waakhula ohoolo waka. Amiravo animwiiviwa ni espaata,*+ nave anaaya axilopwana ni axithiyana animookhwa etala.+ 23 Khuuvo mutthu onrowa ohala okathi kinrowa aka waakumiherya ehasara alopwana a wAnatothi,+ eyaakha anrowa aya waakhula ohoolo waka”.
12 Yehova,+ okathi kinooleelaakani mulattu aka,
Nave okathi kinilavula aka ni nyuwo myaha sa exariya, nyuwo munnooniherya exariya.
Masi xeeni itthu siniweettela aya saana atakhali?+
Xeeni atthu oohiroromeleya anikhala aya ni murettele?
2 Nyuwo moowaala, nto awo aakhuma mitathaari,
Ahinnuwa ni ahiima mihokorokho.
Awo annooromolani ni eyano aya, masi ahoorakamelani ni miyuupuwelo saya sowiixerya.+
3 Masi nyuwo Yehova munnikisuwela oratteene,+ munnikiweha.
Mootokosa murima aka ni muhoona wiira ohiiraana ni nyuwo.+
Munnaavalaanya ntoko epwittipwitthi enrowa ohitiwa,
Munnaathanlela nihiku anrowa aya wiiviwa.
4 Mpakha silini elapo ela enrowa aya ohononeyaka,
Ni malaxi a mmatta anrowa aya wuuma?+
Mwaha wa otakhala wa atthu anikhala elapo ela,
Inama ni axipalame aamala-mala.
Awo anihimya wiira: “Owo khoniweha etthu enrowa oniiraneela”.
5 Akhala wiira munnikhulumuwa mwaatthimakaka ni atthu,
Niireke munoowerya oxintta ikhavalo?+
Hata mwiixoonaka okhala oovareleleya elapo ya murettele,
Munrowa opaka exeeni mwakhala eriyari ya etakhwa eri okerekhere wa oYordani?
Muhaaroromele,
Hata yoohimeeryakani itthu sooloka.
7 “Miyo koohiya empa aka;+ koohiya etthu kaahiyeriwe aka.+
Ole kamphenta aka konvahererya mmatatani mwa awanani awe.+
8 Etthu kihiyeriwe aka yookithatuwela ntoko kharamu ori mutakhwani.
Owo onnikoopela murukulu.
Tivonto kinimunyokha aka.
9 Etthu kihiyeriwe aka eri ntoko mwaapalame onikhuura enama para miyo,
Nave axipalame akina anikhuura enama annimurukurerya anamutuphela.+
Murwe, muthukumane, nyuwo inama sootheene sa mutakhwani,
Murwe mmukhuure.+
10 Amakampusi anceene aahonona ematta aka ya ewuuva.+
Awo aanyakela epantta ya elapo aka.+
Ahiiriha epantta ya elapo aka okhala ntoko othako ohinikhaliwa.
11 Eyo yookhalihiwa othako.
Elapo yootheene khenikhaliwa,
Masi khuuvo mutthu onuupuwela mwaha owo.+
12 Ale anipwetexa anikhuma iphiro sootheene sa woothakoni,
Okhala wiira espaata* ya Yehova enniwiiva atthu a elapo ela yootheene.+
Khuuvo orina murettele.
13 Awo ahaala etiriku, masi ahemphe miiwa.+
Aakukhumuwa, masi khaphwannye etthu.
Ahuuliwa muru ni etthu ephwanye aya,
Mwaha wa onanariwa wuulupale wa Yehova”.
14 Etthu onihimya awe Yehova, aahimyaka atthu ootheene ootakhala akaattamenle, yaawo anikela elapo kaavanhe aka atthu aka aisarayeli ntoko etthu yoohiyeriwa,+ tiila: “Kinimwaakumiha mulaponi mwaya,+ nave kinimwaakumiha eriyari aya atthu a etthoko ya Yuda. 15 Masi nuumala waakumiha, kinootthikela-tho waamorela ikharari ni omuttikiherya khula mmosa etthu ehiyeriwe awe ni muttetthe awe”.
16 “Akhala wiira awo animwiixutta iphiro sa atthu aka ni olapha aromolaka nsina naka, ahimyaka wiira: ‘Ntoko siisaale Yehova onikhala awe!’ Ntoko awiixuttinhe aya atthu aka olapha amuromolaka Bayaali, awo anoovahiwa opuro eriyari ya atthu aka. 17 Masi yakhootta wiiwelela, miyo kinimwaakumiha. Kinimwaakumiha ni kinimwaapwetexa”. Yehova tonihimya.+
13 Etthu Yehova aakilenle awe, tiila: “Murowe, mwathume esintu ya eliinyu nware muyuununi mwanyu, masi muhihele mmaasini”. 2 Nto miyo kaahithuma esintu kittharaka moolumo a Yehova, kiwara muyuununi mwaka. 3 Nave-tho kaahisuwelihiwa moolumo a Yehova ekwaha ya nenli, yaahimya wiira: 4 “Mukuxe esintu muthumme anyu yeeyo muniwara anyu, murowe mpakha muro Eufrate ni mwavithe weiwo mukhukuni mwa mwala”. 5 Nto miyo kaahirowa kivitha esintu eyo omuro Eufrate, ntoko siisaale Yehova aakirumme awe.
6 Nuuvira mahiku manceene, Yehova aahikileela wiira: “Murowe muro Eufrate mwakuxe esintu yeele koorummyaakani ovitha”. 7 Nto kaahirowa omuro Eufrate, kaahikumiha esintu ele opuro kaavinthe aka. Vano kaahoona wiira esintu ele yaahihononeya ni khiyaavareleya muteko.
8 Nuumala-vo kaahisuwelihiwa moolumo a Yehova, yaahimya wiira: 9 “Etthu onihimya awe Yehova, tiila: ‘Ti siiso kinrowa aka omaliha wiixinnuwiha wa atthu a oYuda ni wiixinnuwiha wuulupale wa atthu a oYerusalemu.+ 10 Atthu ala ootakhala anikhootta wiiwelela moolumo aka,+ anuumiha mirima saya+ ni anaatthara amuluku akina, yaarumeelaka ni yaakokhorelaka, anrowa olikanaka ni esintu ela ehinivareleya muteko’. 11 Yehova onihimya wiira ntoko siisaale esintu enlipiha aya eyuunu ya mutthu, siiso, kaahiwiiriha atthu ootheene a nloko na Isarayeli ni atthu ootheene a nihimo na Yuda, okivarexexa, ‘wiira akhale atthu aka,+ ovuwa waka,+ ottottopeliwa waka ni etthu yooreera, masi awo khiyiiwelenle’.+
12 “Nave muhaana waaleela moolumo ala: ‘Etthu onihimya awe Yehova Muluku a Isarayeli, tiila: “Muhaana osariha eviinyu mirinki sootheene suulupale’”. Nto awo anrowa owaakhulani wiira: ‘Niireke hiyo nlelo khaninsuwela moota woosariha mirinki suulupale ni eviinyu?’ 13 Mwaahimeerye atthu awo wiira: ‘Etthu onihimya awe Yehova, tiila: “Kinoowiiriha ohapaliwa atthu ootheene anikhala elapo ela,+ mamwene anikilaathi veehiceni ya Davidi, anamukuttho, maprofeta ni atthu ootheene anikhala oYerusalemu. 14 Kinimwaamala-maliha kiwiirihaka owana yaawo-ru, axipaapa vamosa ni anaaya, nkinrowa waamorela ikharari nnakhala waakhupanyerya, wala owoonela othunku. Khiivo etthu enrowa okikhoottiherya waapwetexa”.+ Yehova tonihimya’.+
15 Mwiiwe ni nvahe ephoole.
Muhiisooneke, okhala wiira Yehova oolavula.
16 Munvuwihe Yehova, Muluku anyu,
Ohinatthi wooruuhelani epiphi,
Nave inawu sanyu sihinatthi woomoroxani omiyaakoni, ohiyu.
Nyuwo munrowa olipelelaka okokola,
Masi owo onookumiherya epiphi yuulupale.
Owo onimwiiriha okokola okhala ewiriphi yuulupale.+
17 Mwakhootta wiiwa,
Miyo kinimunla voohisuweliwa mwaha wa wiixunnuwiha wanyu,
Kinoomoroxa maithori manceene. Mmaithoni mwaka anomora maithori,+
Mwaha wa atthu a Yehova+ akuxiwe aroihiwaka weepotthani.
18 Mmuleele mwene ni pwiyamwene muulupalexa+ wiira: ‘Mukilaathi vathi,
Okhala wiira ekhara anyu yooreera enimoomorani mmuru mwanyu’.
19 Ipooma sa osuuli soowaliwa,* khuuvo oniwerya ohula.
Atthu ootheene a oYuda aaroihiwa weepotthani, tthiri ootheene aya aaroihiwa weepotthani.+
20 Mutthukule maitho ni moone wiira awanani annoorwa akhumaka onorti.+
Siri vai ipwittipwitthi nvahiwe anyu, ipwittipwitthi seiyo sooreera?+
21 Munrowa ohimya exeeni okathi munrowa anyu ohukhummwa ni mpatthani anyu muulupale,
Yoowo mpacenrye anyu opatthani okhuma khalai?+
Niireke khivanrowa otepa woowereyani, ntoko owereya muthiyana onoona awe okathi oniyara awe?+
22 Okathi munrowa anyu ohimya vamurimani vanyu wiira: ‘Xeeni itthu iya sikikhumelenle aya?’+
Musuweleke wiira mooruliwa esaaya anyu mwaha wa otakhala wanyu vanceene,+
Nave maxitta anyu ahiirihiwa* etthu yootakhala.
23 Niireke mutthu a oKuuxi* onoowerya oturuka ekoore ya erutthu awe, aahiiso havara onoowerya oturuka malepa awe?+
Akhala wiira eyo enimwiiraneya, weeso nyuwo mwiixuttihiwe opaka itthu sootakhala,
Munoowerya opaka itthu sooreera.
24 Tivonto, kinimwaamwara-mwarya ntoko malaxi anikuxiwa ni epheyo ya woothakoni.+
25 Ela ti etthu enoophwanelani, epantta yeeyo koophimenlyaakani,
Mwaha wookiliyala+ ni ororomela itthu soowoothiwa”.+ Yehova tonihimya.
26 “Tivonto, kinookhunula esaaya anyu mpakha okhuneela owiitho wanyu,
Nto kinimooniherya wuuliwa wanyu muru,+
27 Oraruwa wanyu,+ osiveliwa wanyu,
Oraruwa wanyu woowuuliha muru.
Miyo kihoona mweettelo anyu woohiirya,
Mapuro oorakamela osulu ni mmatta.+
Mootakhaliwa, nyuwo Yerusalemu!
Munrowa okhalaka oohiloka mpakha silini?”+
14 Ala moolumo a Yehova aasuwelihiwe awe Yeremiya, yaalavula sa ohirupa epula:+
2 Atthu a oYuda anninla,+ nave mikhora saya soohononiwa.
Awo aariipiwa murima, yuuramenle ene vathi,
Nave oYerusalemu onniiwanyeya wunla.
3 Mapatarau annaaruma anamuteko aya wiira arowele maasi.
Awo annirowa mpakha weehimeni* ahinaphwanya maasi.
Nto annitthika ni mirinki* saya soohikhala etthu.
Mwaha woowuuliwa muru ni onyoonyiheya,
Annikhuneela miru saya.
4 Alimi anniikhupanyerya ni aakhuneela miru saya,
Okhala wiira etthaya yoothaleya,+
Mwaha woohirupaka epula mulaponi.
5 Hata naahe ori mutakhwani onnaanyanyala axaana awe aatothonle awe niinaano,
Okhala wiira khakhanle malaxi makithi.
6 Apuuru a mutakhwani anneemela mapuro oorakamela osulu ahimenle malaxi.
Awo annimumula akhulumunwe ene ntoko aniira aya alapwa a mutakhwani,
Maitho aya khanoona saana mwaha woowi kakhanle malaxi.+
7 Nnaamwi itampi sahu siniphukelaka,
Xontte Yehova, mpake etthu mwaha wa nsina nanyu.+
Miteko sahu soohiroromeleya khasireere waatta,+
Nave nihootthekelani.
8 Nyuwo muri nlipelelo na atthu a Isarayeli, nyuwo muniwoopola+ okathi wa maxakha,
Xeeni munikhala anyu ntoko namurwa elapo ela?
Xeeni munikhala anyu ntoko mutthu oneetta mukwaha, yoowo oneemela ophavelaka ophumurya ohiyu paahi?
9 Xeeni munikhala anyu ntoko mulopwana oowoova?
Xeeni munikhala anyu ntoko mulopwana oowerya ohiniwerya woopola?
Muhininyanyale.
10 Etthu onihimya awe Yehova, aahimyaka atthu ala, tiila: “Atthu ala waasivela ovira-vira,+ awo khanikasoopa inawu saya.+ Tivo, Yehova khonisiveliwa naawo.+ Vano, owo onimuupuwela itampi saya, nave onoowiiriha waakhula ohoolo wawe mwaha wa itampi saya”.+
11 Vano Yehova aahikileela wiira: “Muhaavekelele itthu sooreera atthu ala.+ 12 Okathi awo anitthukwa aya, nkiniwiriyana oxonttela waya,+ nave okathi anivaha aya soovaha para opahiwa ni soovaha sa ipyo, khasinkisivela,+ okhala wiira kinimwamala-maliha+ kirumeelaka espaata,* etala ni iretta”.
13 Vano kaahihimya wiira: “Nnaari, Pwiya Muulupalexa Yehova! Maprofeta annaaleela atthu wiira: ‘Opuro ola khenrowa okhumelela ekhotto, nave etala khenrowa woophwanyani, masi munookhalana murettele weekeekhai opuro ola’”.+
14 Yehova aahikileela wiira: “Maprofeta anilaleya iprofesia soowoothiwa ni nsina naka.+ Miyo nkaarumme, nkaavekenle etthu, nnakhala nkaahimenrye etthu.+ Etthu anooleelaayani ti yoowoothiwa ni kherina efaita, nave iwo ti wootha onikhuma vamurimani vaya.+ 15 Masi etthu onihimya awe Yehova aahimyaka maprofeta yaawo anilaleya iprofesia ni nsina naka, nnaamwi kihaarumme, yaawo anihimya wiira elapo ela khenrowa okhumelela ekhotto nnakhala etala, tiila: “Awo animwiiviwa ni espaata ni animookhwa etala.+ 16 Nave, mirutthu sa atthu yaawo anaaleela aya iprofesia sinooriheliwa istaraata sa oYerusalemu mwaha wa etala ni ikhotto, khuuvo onrowa waavitha,+ akhale awo, axaaraya, anaaya axilopwana, aahiiso anaaya axithiyana. Tthiri miyo kinimwaaruuhela ehasara enaaphwanela’.+
17 “Nyuwo muhaana waaleela moolumo ala:
‘Mmaithoni mwaka anoomora maithori manceene othana ni ohiyu, ahimaalaka,+
Okhala wiira mwaana mwaamuthiyana a atthu aka ohitonko orupa ni mulopwana, oonyakattiwa+ vaalupale ni oomala-malihiwa,
Khoreere ovulalihiwa.
18 Karowa oweha imatta,
Kinnaaweha ale yiiviwe ni espaata!+
Nave karowa mpooma,
Kinniweha iretta sikumiheriwe ni etala!+
Profeta ni namukuttho anneetteetta elapo ahinisuwela aya’”.+
19 Niireke moomukhootta voomalela Yuda, aahiiso moonyoonyiwa ni Siyoni?+
Xeeni munikumihenrye anyu ehasara, mpakha nihinawerya okhala saana?+
Naanilipelela murettele, masi khiivo etthu yooloka yiiraneyale.
Naanilipelela okathi woopenuxiwa, masi nnoona itthu soowoopiha paahi!+
20 Khoo Yehova, hiyo ninnisuwela otakhala wahu,
Nave ninnisuwela etampi ya amuhavinre ahu,
Okhala wiira nihootthekelani nyuwo.+
21 Mwaha wa nsina nanyu, muhinikhootte,+
Muhithanye ehice anyu yoovuwa.
Muhiliyale ni muhihonone nivarihano mpanke anyu ni hiyo.+
22 Niireke sookhala ilatarato sihirina efaita sa maloko siniwerya orupiha epula,
Aahiiso niireke erimu enoowerya omoroxa epula mekhaya?
Kiira ti nyuwo paahi Yehova Muluku ahu,+ muniwerya opaka eyo?
Hiyo nnoolipelelani nyuwo,
Okhala wiira nyuwo paahi muniwerya opaka itthu iya sootheene.
15 Moottharelana Yehova aahikileela wiira: “Hata Moise ni Samuweli yeemelaka ohoolo waka,+ miyo nkinrowa waamorela ikharari atthu ala. Mwaakumihe ohoolo waka. Mwaahiye arooke. 2 Vano yookohani wiira: ‘Ninrowa woowi?’ Nwaakhule wiira: ‘Etthu onihimya awe Yehova, tiila:
“Ole onrowa ophwanyiwa ni epahu eniiva, okhweeke epahu yeeyo!
Ole onrowa ophwanyiwa ni espaata,* okhweeke espaata yeeyo!+
Ole onrowa ophwanyiwa ni etala, okhweeke etala yeeyo!
Nave ole onrowa okuxiwa oroihiwaka weepotthani, oroihiweke weepotthani!’”+
3 “Yehova onihimya wiira: ‘Nave kinimwaaroihela ihasara xexe,*+ kinimwaaroihela espaata wiira ewiive, alapwa wiira apurule mirutthu saya, axipalame a musulu ni inama sa mutakhwani, wiira saakhuure ni saapwetexe.+ 4 Nave miyo kinoowiiriha wooviwa ni omwene wootheene wa mulaponi+ mwaha wa Manase, mwaana a Ezekiya, mwene a oYuda, mwaha wa etthu aapanke awe oYerusalemu.+
5 Ti pani onrowa woomorelani ikharari, nyuwo Yerusalemu?
Ti pani onrowa owoonelani othunku?
Nave ti pani onrowa weemela wiira okohe vakhala wiira mwa mukumi?’
Nto miyo kinimookola ntata naka wiira koovirikanyeni ni koopwetexeni.+
Miyo kookhulumuwa owoonelani othunku.
7 Nave kinimwaamwara-mwarya ntoko sinimwara-mwariwa aya ikavava sa ipyo vamukhora wa elapo ela.
Kinoowiiriha ohikhalana anamwane.+
Kinimwaapwetexa atthu aka,
Okhala wiira aakhootta ohiya iphiro saya.+
8 Anaamukhweli aya anrowa okhala oowaatta ohoolo waka ovikana mihaava sa ophareya.
Nave miyo kinimwaaruuhela mulipa-oopwetexa othana eriyari, wiira aapwetexe aximaama ni amiravo.
Vootutuxerya kinimwaaruuhela othukumela ni woova.
9 Muthiyana aayanre anamwane 7 ookhulumuwa,
Owo onnimumula ni muxankiho.
Nnaamwi nlelo ori ene othana, owo onoona oriipela,
Omwiirihaka wuuliwa muru ni oriipiwa murima’.
Yehova onihimya wiira:+ ‘Mahiku awo vakhaani animuhaleela,
Kinonvahererya wiira iiviwe ni espaata ni awanani awe’”.
10 Maama, kootakhaliwa mwaha wookiyara.+
Atthu a elapo yootheene annikihimya okhala mutthu oovaanyiha ni oohiiwananeya.
Nkikophinhe aahiiso nkikomphe;
Masi hata vari siiso, ootheene annikitakhaliha.
11 Yehova onihimya wiira: “Tthiri, kinimookhaliheryani.
Kinimookhaliheryani okathi wa maxakha,
Okathi wa ehasara mwaha wa awanani anyu.
12 Niireke ookhala onwerya opwexakasa eyuuma,
Eyuuma enikhuma onorti ni opwexakasa ekoopiri?
13 Kinimwaavahererya awanani anyu mireerelo sanyu ni mihakhu sanyu,+
Ohiya mwaha wa eperesu, masi mwaha wa itampi sanyu sootheene mpanke anyu mittetthe sanyu sootheene.
14 Kinimwaavahererya itthu iya awanani anyu,
Wiira aroihe elapo yeeyo nyuwo muhinsuwela anyu.+
Okhala wiira onanariwa waka woopattiha mooro,
Yoowo onipatta woovirikanyakani”.+
15 Khoo Yehova, nyuwo munnisuwela mixankiho saka.
Mukuupuwele ni muhihiye okithokorerya.
Nwunlele ikuhu ale anikilupattha.+
Mwaha wa opisa wanyu onanariwa, muhikihiye kikhwaaka.*
Musuweleke wiira kinnivilela oruwaniwa nno mwaha wa nyuwo.+
16 Okathi kaakhela aka moolumo anyu kaanilya ntoko yoolya.+
Nave moolumo anyu yaanikiiriha otthapa ni otteeliwa murima,
Okhala wiira miyo kaaniitthaneliwa nsina nanyu, khoo Yehova, Muluku a anakhotto.
17 Nkinikilaathi ni atthu ooveeha, nnakhala nkinihakalala naawo.+
Okhala wiira ntata nanyu nri ni miyo, nave kinikilaathi meekhaka.
Nave mookiiriha otikinihiwa mwaha wa itthu sootakhala.+
18 Xeeni owereya waka ohinimala aya, nave nikhwatta naka nihinipenuwa aya?
Nno ninnikhootta ovola.
Niireke nyuwo munoolikana ni opuro oniphattuwa maasi,
Yoowo ohikhanle maasi ni ohiniroromeleya?
19 Tivonto, etthu onihimya awe Yehova, tiila:
“Mwatthikela wa miyo, kinoowaakhelani.
Munrowa weemelaka ohoolo waka.
Mwavalaanya ele erina efaita ni ele ehirina efaita,
Munrowa olikanaka ni eyano aka.
Awo anootthikela wa nyuwo,
Masi nyuwo khamunitthikela wa yaawo”.
20 Yehova onihimya wiira: “Kinnookhalihani exiri yoolipa ya ekoopiri para atthu ala,+
Tthiri ala anoowana ni nyuwo,
Masi awo khanrowa wooxinttani,+
Okhala wiira miyo kiri ni nyuwo wiira kiwaakiheni ni owoopolani.
21 Kinoowaakihani mmatatani mwa atakhali,
Nave kinoowoopolani mmatatani mwa alopwana ootakhala”.
16 Kaahisuwelihiwa-tho moolumo a Yehova yaahimya wiira: 2 “Muhimuthele muthiyana nnakhala muhaayare anamwane axilopwana ni axithiyana opuro ola. 3 Etthu onihimya awe Yehova, aahimyaka anamwane axilopwana ni anamwane axithiyana aniyariwa opuro ola, aahimyaka aximamaya anamwane awo aniyariwa opuro ola ni axipapaya anamwane awo aniyariwa elapo ela, tiila: 4 ‘Awo animookhwa eretta yoowoopiha,+ masi khuuvo onrowa owunlela nnakhala waavitha, awo anrowa okhala ntoko eturumu eri vatthayani.+ Awo anoomala-malihiwa ni espaata* ni etala,+ nave mirutthu saya sinrowa okhala yoolya ya axipalame a musulu ni inama sa vathi’.
5 Etthu onihimya awe Yehova, tiila:
‘Muhikele etthoko eninliwa,
Muhirowe okhupanyerya aahiiso omaaliha’.+
‘Tthiri miyo kookumiha murettele aka eriyari ya atthu ala’, onihimya Yehova,
‘Nave kookumiha ophenta waka woororomeleya ni omoriwa waka ikharari.+
6 Atthu aalupale ni acikhaani animookhwa elapo ela.
Awo khanrowa ovithiwa,
Khuuvo onrowa owunlela,
Nnakhala khuuvo onrowa wiithikila nnakhala omettha ikharari mwaha wa yaawo.*
7 Khuuvo onrowa waavaha yoolya ale aninla,
Wiira aamaalihe mwaha wookhweliwa,
Nave khuuvo onrowa waavaha ekaalisi ya eviinyu,
Wiira yaamaalihe mwaha wookhweliwa paapa aya aahiiso maama aya.
8 Nave muhikele etthoko eri efesta,
Wiira mwakilaathi ni atthu awo mphavelaka olya ni owurya’.
9 “Etthu onihimya awe Yehova a anakhotto, Muluku a Isarayeli, tiila: ‘Mahiku a okumi anyu, nlelo moonaka ni maitho anyu, kinoomala-maliha opuro ola okhuwela wootthapa, otteeliwa murima, nsu na noivu ni nsu na noiva’.+
10 “Okathi munrowa anyu waaleela atthu ala moolumo ala ootheene, awo animookohani wiira: ‘Xeeni Yehova onrowa awe onikumiherya ehasara ela yuulupale? Nimutthekenle-ni Yehova Muluku ahu?’+ 11 Nto muhaana owaakhula wiira: ‘Yehova onihimya wiira: “Mwaha woowi amuhavinre anyu aakinyanyala,+ anaatthara amuluku akina, yaarumeelaka ni yaakokhorelaka yaawo.+ Masi aakinyanyala ni khatthanre nlamulo naka.+ 12 Nyuwo munnipaka itthu sootakhala waavikana amuhavinre anyu,+ khula mmosa a nyuwo onnuumiha murima awe wootakhala, ohiya okiiwelela.+ 13 Tivonto, kinoowoomolani elapo ela, kiwoomolelakani elapo yeeyo nyuwo nnakhala amuhavinre anyu yahaasuwela aya.+ Weiwo munrowa waakokhorelaka amuluku akina othana ni ohiyu,+ okhala wiira miyo nkinrowa woomorelani ikharari”’.
14 “Yehova onihimya wiira: ‘Masi, anoophiya mahiku, ahinrowa aya ohimya-tho wiira: “Ntoko siisaale Yehova onikhala awe, yoowo aakuminhe atthu a Isarayeli elapo ya wExiitu!”+ 15 Masi anoohimya wiira: “Ntoko siisaale Yehova onikhala awe, yoowo aakuminhe atthu a Isarayeli elapo ya onorti ni ilapo sootheene seiyo yaamwara-mwarenye aya!” Kinoowiiriha otthikela elapo aya, yeeyo kaavanhe aka amuhavinre aya’.+
16 Yehova onihimya wiira: ‘Kinoowiihana alipa-oototha anceene,
Nto awo anrowa wootothani.
Nuumala-vo, kinimwaalattula alipa-ooxaya anceene,
Nto awo anrowa wooxayani mmiyaakoni mootheene, mapuro oorakamela osulu,
Ni mphakani mwa myala.
17 Maitho aka anniweha itthu sootheene anipaka aya.*
Awo khaniipitha ohoolo waka,
Nnakhala itampi saya khasinivitheya vamaithoni vaka.
18 Woopaceryani, kinimwaattikiherya voomalela itampi saya ni soottheka saya,+
Okhala wiira awo aananariha elapo aka ni ilatarato saya soohiirya sihirina okumi,
Nave aasariha elapo aka ni itthu saya soohiirya’”.+
19 Khoo Yehova, nyuwo mwa ikuru saka ni nipuro naka noolipihiwa.
Nyuwo mwa ntthyawelo naka nihiku nooxanka.+
Maloko animoorwa wa nyuwo akhumaka omalenle elapo,
Nto awo anoohimya wiira: “Amuhavinre ahu aahiyeriwa etthu yeethiru,
Ehirina efaita, nave ehinivareleya muteko”.+
20 Niireke mutthu onoowerya wiipakela amuluku,
Variki awo ahikhanle amuluku eekeekhai?+
21 “Tivo kinimwaasuweliha,
Ekwaha ela kinimwaasuweliha ikuru saka ni owerya waka,
Nto awo anoosuwela wiira nsina naka ti Yehova”.
17 “Etampi ya Yuda yoolempwa ni ekaneta ya yuuma,
Yoolempwa ni oponta wa etiyamanti vathaapwani va murima aya,
Ni vamanyakani a altaari aya.
2 Hata anaaya anniwuupuwelela altaari aya ni miri saya soowuuma sinikokhoreliwa,*+
Waattamela mwiri muulupale, mapuro oorakamela osulu,+
3 Ni miyaako sirakamenle omuttettheni.
Mireerelo ni mihakhu sanyu sootheene kinoohiya sikuxiwaka.+
Itthu sa mapuro anyu oorakamela osulu, mwaha wa etampi emwarenle mittetthe sanyu.+
4 Nyuwo munoolaleya mmansinyu etthu muhiyeriwe anyu,+ yeeyo koovahalyaakani.
Kinoowiirihani waavarela muteko awanani anyu elapo muhinisuwela anyu,+
Okhala wiira nyuwo muhiiriha onanariwa waka opatta ntoko mooro.*+
Owo onrowa opattaka mahiku ootheene”.
5 Etthu onihimya awe Yehova, tiila:
“Ootakhaliwa mutthu yoole oniroromela wootha wa apinaatamu,+
Ni oniroromela ikuru sa atthu,+
Nave murima awe onimuhiya Yehova.
6 Owo onrowa olikanaka ni mwiri ori woothakoni.
Sakhumelela itthu sooreera owo khonrowa oweha,
Masi onrowa okhalaka mapuro ooviha a woothakoni,
Elapo yoosareya maakha, ehinaweryaneya okhaliwa.
7 Ooreelihiwa mulopwana yoole onimuroromela Yehova,
Yoowo onimulipelela Yehova.+
8 Owo onrowa olikanaka ni mwiri waaliwe waattamela opuro onivira maasi,
Mwiri yoowo mitathaari sawe siniphiya mpakha mmaasini.
Waphiya okathi wooviha owo khonrowa woonaka oviha,
Masi makukhu awe okathi wootheene anrowa okhalaka ooripelela.+
Nave eyaakha ehinrowa aya orupa epula, owo khonrowa oxankaka,
Nnakhala khonrowa ohiya wiima mihokorokho.
9 Murima ti wootepa ohiroromeleya ovikana itthu sootheene, nave ti wootepa otakhala.+
Ti pani oniwerya osuwela murima?
10 Miyo Yehova kiniweha murima,+
Kinnitokosa miyuupuwelelo sootepa wiixerya,
Wiira kimutthuvele khula mutthu moovarihana ni iphiro sawe,
Kittharaka miteko sawe.+
11 Ntoko siisaale ekhwali enuuramela mooce ehirenle aya,
Ti siiso siri awe mutthu oniphwanya mihakhu voohiroromeleya.+
Nuuvira okathi vakhaani owo onoohiya mihakhu iyo,
Nave wookiseryani waya onimooniherya wiira khorina ankhili”.
12 Ehice yoovuwa, yeeyo evuwihiwe okhuma woopaceryani,
Ti opuro ahu woowaarya.+
13 Khoo Yehova, nyuwo mwa nlipelelo na atthu a Isarayeli,
Ootheene ale anoonyanyalani munoowuulihiha muru.
Ale anoovirikanyani masina aya anoolempwa vathi,+
Okhala wiira aamunyanyala Yehova, yoowo ori maphattuwelo a maasi a okumi.+
14 Khoo Yehova, mukipenuxe, nto miyo kinoopenuwa.
Mukoopole, nto miyo kinimoopowa,+
Okhala wiira ti nyuwo kinoottottopelaakani.
15 Mooneke, aakhala atthu anikihimeerya wiira:
“Ari woowi moolumo a Yehova?+
Weeso yiiraneyeke!”
16 Masi miyo nkinahiye woottharani ntoko makampusi,
Nnakhala nkinaphavele ophiya nihiku na ehasara.
Nyuwo munnisuwela itthu sootheene kilavunle aka ni eyano aka,
Moolumo aka ari vamaithoni vanyu!
17 Muhikhale ntoko etthu enikiiriha woova.
Nyuwo mwa ntthyawelo naka nihiku na maxakha.
18 Nwiirihe ale anikilupattha wuuliwa muru,+
Masi muhikiirihe miyo wuuliwa muru.
Nwiirihe yaawo woova,
Masi muhikiirihe miyo woova.
Mwaakumiherye ehasara yaawo,+
Nave mwaamala-malihe ni mwaapwetexe voomalela.
19 Etthu Yehova aakihimenrye awe, tiila: “Murowe mweemele vamukhora wa anamwane a atthu, yoowo mamwene a oYuda anikela aya ni anikhuma aya, nave mweemele mikhora sootheene sikina sa oYerusalemu.+ 20 Mwaahimeerye wiira: ‘Mwiiwe moolumo a Yehova, nyuwo mamwene a oYuda, atthu ootheene a oYuda ni atthu ootheene anikhala oYerusalemu, yaawo anikela mikhora iya. 21 Etthu onihimya awe Yehova, tiila: “Mwiikasoope, nave muhiteexe muritti nihiku na saabadu aahiiso muhiruuhe muritti owo vamikhora sa oYerusalemu.+ 22 Muhikumihe muritti owannyinyu nihiku na saabadu, nnakhala muhivare muteko nihiku na saabadu.+ Nihiku na saabadu mukhaliheke noowaarya, ntoko kaarumme aka amuhavinre anyu.+ 23 Masi awo khiyiiwelenle nnakhala khiyaawiriyanne, nave yaahuumiha mirima saya akhoottaka wiiwelela ni ottaruxiwa.+
24 “‘Yehova onihimya wiira: “Masi, mwakiiwelela oratteene muhiruuhaka muritti vamikhora va epooma ela nihiku na saabadu, nave mwakhaliha noowaarya nihiku na saabadu muhivaraka muteko nihiku nlo,+ 25 weeso mamwene ni makhulupale anikilaathi veehiceni va Davidi,+ anookela epooma ela aviraka vamikhora awenle ene ikaaro sinipuruliwa ni inama ni awenle ene ikhavalo, awo ni makhulupale aya, alopwana a oYuda ni atthu anikhala oYerusalemu.+ Nto epooma ela enrowa okhaliwaka mahiku ootheene. 26 Vano animoorwa atthu akhumaka ipooma sa oYuda, mapuro arukurenrye oYerusalemu, elapo ya oBeniyamini,+ muttetthe woowaataleya,+ muttetthe wa omiyaakoni ni oNegebi,* aruuhaka mpaani mwa Yehova+ soovaha sootheene para opahiwa,+ mikuttho,+ soovaha sa ipyo,+ nsenso* ni mikuttho sa oxukhuru.
27 “‘“Mwaahikiiwelele, muhiirihaka okhala noowaarya nihiku na saabadu, nave mwateexa miritti ni mwaruuha miritti iyo vamukhora va oYerusalemu nihiku na saabadu, miyo kinoopaha mikhora sa oYerusalemu ni mooro, nto mooro owo onoopaha ipa soorakamela osulu sa oYerusalemu+ ni khonrowa ottipha”’”.+
18 Yeremiya aahisuwelihiwa moolumo a Yehova yaahimya wiira: 2 “Nvenye, murowe owannyawe mulipa onuupa oloko,+ weiwo kinimooleelani moolumo aka”.
3 Siiso, kaahirowa owannyawe mulipa onuupa oloko, kimphwanya opakaka evaasu. 4 Masi evaasu eyo aapaka awe mulipa onuupa oloko yaahiphweeya mmatatani mwawe. Vano, mulipa onuupa oloko aahitthikela-tho opaka evaasu ekina ni oloko yoowo, ntoko aaphavela awe.
5 Moottharelana, kaahisuwelihiwa moolumo a Yehova yaahimya wiira: 6 “‘Nyuwo atthu a nloko na Isarayeli, kiireke miyo nkinwerya owiirihani etthu emosa-ru mulipa onuupa oloko owo epanke awe?’ Yehova tonihimya. Mwiiwe! Ntoko oloko ori mmatatani mwa mulipa onuupa oloko, siiso-tho nyuwo muri mmatatani mwaka, nyuwo atthu a nloko na Isarayeli.+ 7 Okathi kinihimya aka wiira kinoophela, ohonona ni opwetexa nloko aahiiso omwene,+ 8 nto nloko nlo nnahiya otakhala waya mwaha wa etthu kihimmye aka, nave-tho miyo kinooturuka muupuwelo aka ni ihasara kaaphavela aka okumiherya nloko nlo.+ 9 Masi, okathi kinihimya aka wiira kinooteka ni kinoophatteya nloko aahiiso omwene, 10 nto nloko nlo nnapaka itthu sootakhala vamaithoni vaka, nave nihiniiwelela nsu naka, miyo kinooturuka muupuwelo aka ni etthu yooloka kaaphavela aka wiirela nloko nlo’.
11 “Vano, xontte, mwaaleele alopwana a oYuda ni atthu anikhala oYerusalemu wiira: ‘Etthu onihimya awe Yehova, tiila: “Kinnilokiherya ehasara ni kinnuupuwela owiirelani etthu yootakhala. Xontte, muhiye iphiro sanyu sootakhala, nave mulokiherye iphiro sanyu ni miteko sanyu”’”.+
12 Masi awo anihimya wiira: “Eyo khenivareleya muteko!+ Hiyo ninrowa ottharaka muupuwelo ahu, nave khula mmosa onrowa opakaka etthu oniphavela awe ottharaka murima awe wootakhala”.+
13 Tivonto, etthu onihimya awe Yehova, tiila:
“Xontte, mukohe eriyari ya maloko wiira:
Ti pani otonko wiiwa etthu ntoko ela?
Muthiyana ohitonko orupa ni mulopwana a wIsarayeli oopaka etthu yoohiirya.+
14 Niireke eneevi ya oLiibano enoolakaseya omiyaakoni waya?
Niireke maasi ooriirya anikhuma ottaiwene anoowelela?
15 Masi atthu aka aakiliyala,+
Okhala wiira annivaha mikuttho etthu ehirina efaita,+
Nave anniwiiriha atthu omora mphironi mwaya, iphiro sa khalai,+
Wiira atthikele iphiro saya soohiloka ni soothipakaseya.
16 Siiso, awo anniiriha elapo aya okhala etthu yoowoopiha,+
Ni etthu enoopeliwa muturi okathi wootheene.+
Khula mutthu onivira onimoova, nave onoottikinya muru awe.+
17 Ntoko epheyo ya mpantta onikhuma nsuwa, miyo kinimwamwara-mwarya ohoolo wa awanani aya.
Kinimwaarukunuwela ohiya waaweha nihiku na ehasara”.+
18 Awo anihimya wiira: “Murwe, muupuwele etthu yootakhala yoomwiiriha Yeremiya,+ okhala wiira nlamulo, anamukuttho ahu, miruku sa asuweli ahu ni moolumo a maprofeta ahu khanimala. Murwe, ninvirikanye Yeremiya nave nihinwiriyane etthu enihimya awe”.
19 Khoo Yehova, mukiwiriyane,
Nave nwiriyane ele awanani aka enihimya aya.
20 Niireke etthu yooloka oliviwa ni etthu yootakhala?
Awo aathipa nlitti wiira akiive.+
Muhiliyale moota keemenle aka ohoolo wanyu wiira kilavule itthu sooloka saahimya yaawo,
Wiira muhinanariwe naawo.
Axaaraya akhweliwe anaaya ni axiiyaya.+
Alopwana aya yiiviwe ni epahu,
Amiravo aya yiiviwe ni espaata okhottoni.+
22 Owannyeya wunliweke
Okathi munrowa anyu waaroihela anawiive.
Okhala wiira awo aathipa nlitti wiira akivare,
Nave aareya muraakho inawu saka.+
23 Masi nyuwo Yehova,
Munnisuwela oratteene itthu sootheene anuupuwela aya opaka wiira akiive.+
Muhaalevelele etampi aya,
Nave muhimala-malihe yoottheka aya ohoolo wanyu.
19 Etthu onihimya awe Yehova, tiila: “Murowe wa mulipa onuupa oloko mwathume murinki wa oloko.+ Mwaakuxe axitokweene akina a atthu ni axitokweene akina a anamukuttho, 2 murowe mpakha oxepani wa mwaana a Hinomi,+ vamukhora wa Mavali. Mwalaleye weiwo moolumo khinrowa aka wooleelani. 3 Mwahimye wiira: ‘Mwiiwe moolumo a Yehova, nyuwo mamwene a oYuda ni atthu anikhala oYerusalemu. Etthu onihimya awe Yehova a anakhotto, Muluku a Isarayeli, tiila:
“‘“Miyo kinookumiherya ehasara opuro ola, khula mutthu onrowa wiiwa eyo onootikinihiwa. 4 Kinoopaka eyo mwaha woowi mookinyanyala,+ nave muhiiriha opuro ola ohisuwanyeya.+ Nyuwo, amuhavinre anyu ni mamwene a oYuda munnaavaha mikuttho opuro ola amuluku akina muhinaasuwela anyu. Nave moosariha opuro ola ni ephome ya atthu ahitthenke etthu.+ 5 Nyuwo mooteka mapuro oorakamela osulu a Bayaali+ wiira mwaapaheke aniinyu axilopwana vamooroni, ntoko soovaha soopahiwa sinivahiwa Bayaali. Miyo nkitonko woorumani nnakhala olavula etthu eyo, nave nkitonko wuupuwela vamurimani vaka”’.+
6 “‘Yehova onihimya wiira: “Mwiiwe, anoophiya mahiku, opuro ola ohinrowaaya-tho wiihaniwaka oTofeti aahiiso oxepani wa Mwaana a Hinomi, masi onrowa wiihaniwaka oxepani wa Wiiva.+ 7 Miyo kinoohonona ipalano sa atthu a oYuda ni sa atthu a oYerusalemu opuro ola, nave kinoowiiriha wiiviwa ni espaata* ohoolo wa awanani aya, ni mmatatani mwa ale aniphavela owiiva. Mirutthu saya kinimwaavaha axipalame a musulu ni inama sa mutakhwani wiira sikhale yoolya aya.+ 8 Nto miyo kinimwiiriha epooma ela okhala etthu yoowoopiha ni enoopeliwa muturi. Khula mutthu onrowa oviraka opuro ola onrowa woovaka ni woopa muturi mwaha wa ipahu saya sootheene.+ 9 Nave, kinoowiiriha okhuura ethayi ya anaaya axilopwana ni anaaya axithiyana, khula mmosa onookhuura ethayi ya mukhwaawe, mwaha wa orukureriwa ni ohoona yoopaka, okathi anrowa aya orukureriwa ni awanani aya, ni ale aniphavela owiiva”’.+
10 “Nuumala-vo, mpwexakase murinki owo ohoolo wa atthu anrowa ni nyuwo, 11 nave mwaahimeerye wiira: ‘Etthu onihimya awe Yehova a anakhotto, tiila: “Kinimwaapwexakasa atthu ala ni epooma ela ntoko simpwexakasiwa aya evaasu ya oloko, vahinaweryaneya olokiheriwa. Nto awo anoovitha mirutthu sa atthu oTofeti, mpakha ohihala opuro woovitha”’.+
12 “Yehova onihimya wiira: ‘Eyo ti etthu kinrowa aka wiiriha opuro ola, nave ti etthu kinrowa aka owiiriha atthu anikhala opuro ola, wiira epooma ela elikaneke ni oTofeti. 13 Ipa sa oYerusalemu ni ipa sa mamwene a oYuda sinrowa okhala soohiloka ntoko opuro ola, oTofeti,+ aayo, ipa sootheene seiyo vasulu vaya sinivaha aya mikuttho itheneeri sootheene sa wiirimu+ ni weiwo anaamwarexela aya amuluku akina soovaha siniwuriwa’”.+
14 Okathi Yeremiya aatthinke awe oTofeti, weiwo Yehova aamurumme awe orowa olaleya eprofesia, aaheemela vanivateni na empa ya Yehova onaaleela atthu ootheene wiira: 15 “Etthu onihimya awe Yehova a anakhotto, Muluku a Isarayeli, tiila: ‘Kinimwaakumiherya ihasara sootheene kihimmye aka, atthu a epooma ela ni mittetthe saya sootheene, okhala wiira aakhootta wiiwelela moolumo aka’”.+
20 Okathi Yeremiya aalavula awe itthu iya, Paxehuri, mwaana a Imeri, yoowo aari namukuttho ni aahoolela empa ya Yehova, aaniiwa. 2 Nuumala-vo Paxehuri aahimmana profeta Yeremiya, omutthukwelela vamwirini+ yoowo waari vamukhora muulupale wa Beniyamini, mpaani mwa Yehova. 3 Masi mmeeloni mwaya, nuumala Paxehuri omutaphula Yeremiya vamwirini, Yeremiya aahimuleela wiira:
“Yehova ooturuka nsina nanyu noowi Paxehuri wiira nikhale Woopiha Omwaramwarenle Mapuro Ootheene.+ 4 Onihimya awe Yehova, tiila: ‘Kinimookhalihani etthu yoowoopiha para nyuwo ni apatthani anyu ootheene. Awo animwiiviwa ni espaata* ni awanani aya, nlelo mwaawehaka ni maitho anyu.+ Atthu ootheene a oYuda kinimwaavahererya mmatatani mwa mwene a oBabiloonia, nto owo onimwaakuxa aaroihaka weepotthani oBabiloonia ni onoowiiva ni espaata.+ 5 Nave, kinoovahererya mihakhu sootheene sa epooma ela, mireerelo saya sootheene, itthu saya sootheene sa efaita ni mihakhu sootheene sa mamwene a oYuda mmatatani mwa awanani aya.+ Awo anoowaakhani itthu sootheene ni anookuxa wiira aroihe oBabiloonia.+ 6 Vano nyuwo Paxehuri, ni atthu ootheene a etthoko anyu, munooroihiwa weepotthani. Munooroihiwa oBabiloonia, munookhwela weiwo ni munoovithiwa ni apatthani anyu ootheene, mwaha woolaleya iprofesia soowoothiwa’”.+
7 Yehova, nyuwo mookiwoka, nto miyo koowokeya.
Moorumeela ikuru sanyu mukivirikanyaka, nto mookixintta.+
Nihiku nootheene kinooniwa okhala etthu yootheiha,
Atthu ootheene annikitheya.+
8 Khula okathi kinilavula aka, kihaana okhuwela ni olaleya wiira:
“Otakhala ni opwetexiwa!”
Moolumo a Yehova aakiiriha oveehiwa ni othanyiwa nihiku nootheene.+
9 Miyo kaahihimya wiira: “Nkintthikela-tho omuromola,
Nnakhala nkintthikela oromola nsina nawe”.+
Masi, vamurimani vaka moolumo awe yaari ntoko mooro waapatta.
Moolumo awe yaari ntoko mooro waavarela mmakhuvani mwaka.
Nto kaahivela omaala, kihinawerya-tho ovilela.+
10 Miyo kihiiwa itthu sootakhala atthu anceene anihimya aya,
Mapuro ootheene annikoopiha.+
“Nimuhimye! Nrowe nimuhimye!”
Atthu ootheene anikiphavelela murettele anniphavela okiweha kimoraka ariki:+
“Woonasa wene, owo onoowokiwa ni onoopaka etampi,
Nto hiyo nnoomuxintta ni nnoomunlela ikuhu”.
11 Masi Yehova aari ni miyo ntoko nakhotto oowoopiha.+
Tivo, ale anikilupattha anoomora ni khanrowa oxintta.+
Animuuliwa muru vaalupale, okhala wiira itthu khasinrowa oweettela saana.
Wuuliwa waya muru ohinimala, khonrowa oliyaliwa.+
12 Khoo Yehova a anakhotto, nyuwo munninweha oratteene naxariya,
Munniweha miyuupuwelo sootepa wiixerya,* ni munniweha murima.+
13 Mmwiipele Yehova! Mmuttottopele Yehova!
Tthiri owo oomoopola mulipa-oohaawa mmatatani mwa atakhali.
14 Nootakhaliwa nihiku kiyariwe aka!
Nihireelihiwe nihiku kiyariwe aka ni amaama!+
15 Ootakhaliwa mulopwana aaruuhenle ihapari sooreera apaapa, oriki:
“Mooyareliwa mwaana, mwaana mwaamulopwana!”
Omutteelihaka murima vanceene paapa aka.
16 Mulopwana owo olikaneke ni ipooma Yehova opwetenxe awe ohimorelaka ikharari.
Owo iiweke wunliwa voosiisu ni okhuweliwa ekhotto othana eriyari.
17 Xeeni ahaakiivela awe mmirimani mwa amaama?
Siiso, mahiye aka yaarowa okhala mmirimani mwa amaama,
Nave amaama yaarowa okhalaka ni erukulu okathi wootheene.+
18 Xeeni kihalaka okhuma mmirimani?
Kiireke kiyareliwe ohaawa ni oriipiwa murima,
Ni omaliha mahiku aka kuuliwaka muru?+
21 Yeremiya aahisuwelihiwa moolumo a Yehova, okathi mwene Sedekiya+ aamurumme awe Paxehuri,+ mwaana a Malikiya, vamosa ni Sefaniya,+ mwaana a Maaseya, yoowo aari namukuttho wiira yanvekele Yeremiya ariki: 2 “Xontte, munikohererye Yehova okhala wiira Nabukodonosori, mwene a oBabiloonia, oniwana ni hiyo.+ Woonasa wene, Yehova onoopaka mwiiriirya awe wiira oniphwanyihe mureerelo, nto mwene a oBabiloonia onoonihiya”.+
3 Yeremiya aahaaleela wiira: “Etthu mukhanle anyu oomuleela Sedekiya, tiila: 4 ‘Etthu onihimya awe Yehova, Muluku a Isarayeli, tiila: “Kinimwiiriha woorukunuwelani ikaruma sanyu mukunxe anyu, seiyo muniwanana anyu ekhotto ni mwene a oBabiloonia+ ni atthu a oKhaldeya, yaawo arukurenrye ota wa exiri anyu. Nave kinimwaathukumanya eriyari ya epooma ela. 5 Miyo mmansaka kinoowana ni nyuwo+ kookonle ene ntata naka ni moono aka woowerya, kinanariwe ene, kivirunwe ene ni kitikinihinwe ene vanceene.+ 6 Kinoowiiva ale anikhala epooma ela. Atthu ni inama animookhwa mwaha wa eretta yuulupale”’.+
7 “‘Yehova onihimya wiira: “Nuumala-vo, kinonvahererya Sedekiya mwene a oYuda mmatatani mwa Nabukodonosori, mwene a oBabiloonia, vamosa ni arumeyi awe ni atthu a epooma ela yaawo ahinrowa okhwa mwaha wa eretta, espaata,* ni etala. Nave kinimwaavahererya mmatatani mwa awanani aya ni mmatatani mwa ale aniphavela owiiva.+ Owo onoowiiva ni espaata. Owo khonrowa waakhupanyerya, nnakhala owoonela othunku hata waamorela ikharari”’.+
8 “Muhaana waaleela atthu ala wiira: ‘Etthu onihimya awe Yehova, tiila: “Kinnipweha ohoolo wanyu ephiro eniroiha wookumini ni ephiro eniroiha wookhwaani. 9 Ale anrowa ohala epooma ela animwiiviwa ni espaata, animookhwa etala ni eretta. Masi ole onrowa okhuma ni wiivahererya wa atthu a oKhaldeya, yaawo yoorukurenryeni onookhala mukumi ni onimoopola okumi awe”’.+
10 “‘“Tthiri miyo kinniweha epooma ela wiira kikumiherye ehasara, ohiya etthu yooreera”.+ Yehova tonihimya. “Epooma ela enoovahereriwa mmatatani mwa mwene a oBabiloonia,+ nto owo onoopaha ni mooro”.+
11 ‘“Nyuwo atthu a etthoko ya mwene a oYuda: Mwiiwe moolumo a Yehova. 12 Nyuwo atthu a etthoko ya Davidi, etthu onihimya awe Yehova, tiila:
“Khula voosiisu mwaakiheryeke exariya,
Nwaakiheryeke ale akuxiwe mmatatani mwa alipa-oohaaxa,+
Wiira onanariwa waka ohipatte ntoko mooro,+
Ohikhalaka mutthu onwerya ottipiherya,
Mwaha wa itthu sootakhala munipaka anyu”’.+
13 Yehova onihimya wiira: ‘Nyuwo atthu munikhala opuro woowaataleya, miyo kinnoovirikanyani,
Nyuwo mwala ori opuro woorakamela osulu’.
‘Nyuwo munihimya wiira: “Ti pani onrowa okhuruwa onirweelaka?
Ti pani onrowa otuphela ipa sahu?”
14 Kinimoohukhumuni
Ntoko muniphwanela anyu+ mwaha wa itthu munipaka anyu.
Kinoorihela mooro etakhwa anyu,
Nto owo onoopaha itthu sootheene siri memmo’.+ Yehova tonihimya”.
22 Etthu onihimya awe Yehova, tiila: “Murowe owannyawe mwene a oYuda, muroihe ihapari iya. 2 Mwahimye wiira: ‘Mwiiwe moolumo a Yehova, nyuwo mwene a oYuda, munikilaathi veehiceni ya Davidi, vamosa ni arumeyi anyu ni atthu anyu, yaawo anikela aviraka mikhora iya. 3 Etthu onihimya awe Yehova, tiila: “Mwaakiherye exariya ni ororomeleya. Nwaakiheryeke mmatatani mwa alipa-oohaaxa ale aniiyeriwa. Muhaahaaxeke anamurwa, nnakhala muhimwiireleke etthu yootakhala mwaana ohirina apapawe* aahiiso muthiyana naamukhweli.+ Nave muhimwiiveke mutthu ohitthenke etthu opuro ola.+ 4 Akhala wiira munimweettela oratteene moolumo ala, weeso, mamwene ankilaathi veehiceni ya Davidi,+ anookela aviraka mikhora sa empa ela, awenle ene ikaaro sinipuruliwa ni inama ni ikhavalo, awo, arumeyi aya ni atthu aya”’.+
5 “Yehova onihimya wiira: ‘Masi, mwaahiiwelele moolumo ala, kinnilapha mmansaka, wiira empa ela enrowa okhala opuro ohinikhaliwa’.+
6 “Etthu onihimya awe Yehova aahimyaka atthu a etthoko ya mwene a oYuda, tiila:
‘Nyuwo muri ntoko Xileyaadi para miyo,
Muri ntoko opuro woorakamela osulu wa oLiibano.
Masi, kinimookhalihani othako,
Khiivo epooma anyu enrowa okhaliwaka.+
7 Miyo kinimoothanlelani alipa-oopwetexa,
Khula mmosa okunxe ene ikaruma sawe sa ekhotto.+
Awo animwiikittha miri sanyu sa eseeturu sootepexa oloka,
Nave anoorihela vamooroni.+
8 “‘Maloko manceene anooviraka epooma ela, ni anookohanaka wiira: “Xeeni Yehova ohalaka wiiriha siisa epooma ela yuulupale?”+ 9 Nto awo animwaakhula wiira: “Mwaha woowi aahiya nivarihano na Yehova, Muluku aya, anaakokhorela amuluku akina yaarumeelaka yaawo”’.+
10 Muhimunlele ole okhwiiye,
Nnakhala muhimoonele othunku.
Ohiya-vo, mmunlele vanceene ole oroihiwe weepotthani,
Okhala wiira owo khontthikela-tho oweha elapo oyariwe awe.
11 “Etthu onihimya awe Yehova omuhimyaka Xalumi,*+ mwaana a Yosiya, mwene a oYuda, yoowo onilamulela opuro wa paapa awe Yosiya,+ ni okuxiwe opuro ola, tiila: ‘Owo khontthikela-tho opuro ola. 12 Tthiri owo onimookhwa opuro oroihiwe awe ntoko epottha, nave khontthikela-tho oweha elapo ela’.+
13 Ootakhaliwa ole oniteka empa awe ohiroromeleyaka,
Oniteka isaala sawe suulupale oheettelaka exariya,
Yoowo onimwiiriha mukhwaawe onvarela muteko mahala,
Ni onikhootta omuliva esalaario awe.+
14 Owo onnihimya wiira: ‘Kinooteka empa aka yuulupale,
Ni isaala suulupale.
Kinohela ixanela,
Kinoovirihela ni matera a eseeturu, nave kinoopintari ni etinta yootepexa oxeerya’.
15 Niireke khamunrowa ohiya olamulela mwaha woowi munnirumeela eseeturu yinceene waavikana atthu akina?
Nave-tho paapa anyu aanilya ni aniwurya,
Masi owo aanaakiherya exariya ni ororomeleya,+
Nto itthu saanimweettela saana.
16 Owo aanaakiherya mulattu wa ale yaahaaxiwa ni oohaawa,
Nto itthu saanimweettela saana.
‘Okisuwela khahiyo ti siiso?’ Yehova tonihimya.
17 ‘Masi maitho anyu ni murima anyu oniphavela paahi ophwanya itthu voohiroromeleya,
Omwiiva mutthu ohitthenke etthu,
Omwiiyerya ni onwoka mutthu’.
18 “Tivo, etthu onihimya awe Yehova omuhimya aka Yoyakiimi,+ mwaana a Yosiya, mwene a oYuda, tiila:
‘Awo khanrowa omunlela ariki:
“Ootakhaliwa munnaka! Ootakhaliwa murokoraka!”
Awo khanrowa omunlela ariki:
“Ootakhaliwa pwiya aka! Ootakhaliwa mukhulupale aka!”
19 Owo onrowa ovithiwa ntoko puuru,+
Onookuxiwa ni onooriheliwa ottaiwene,
Ota wa mikhora sa oYerusalemu’.+
20 Murowe oLiibano ni mukhuwele,
Mukhuweleke ni nsu noowiiwanyeya oBaxani,
Mukhuweleke wa Abarimi,+
Okhala wiira atthu ootheene anoophentani aapwetexiwa.+
21 Miyo koolavula ni nyuwo okathi mwaari anyu ni murettele.
Masi nyuwo mwaahikaakhula wiira: ‘Nkinrowa wiiwelela’.+
Munniira siiso okhuma omiravo anyu,
Okhala wiira khamutonko wiiwelela nsu naka.+
22 Epheyo enimwaaroiha ottaiwene amakampusi anyu ootheene,+
Nave ale anoophentani anooroihiwa weepotthani.
Nto, munimuuliwa muru ni oveeheya mwaha wa ihasara sanyu sootheene.
23 Nyuwo munikhala oLiibano,+
Munipaka epuru anyu vamwiirini va eseeturu,+
Munimuupulela vanceene okathi munrowa anyu woona owereya,
Munooriipiwa murima ntoko muthiyana oniyara”.+
24 “Yehova onihimya wiira: ‘Kinnilaphela okumi aka wiira, hata nyuwo, Koniyahi,+ mwaana a Yoyakiimi,+ mwene a oYuda, mwaari ntoko anela a ntata naka noolopwana, miyo kaamookumihani! 25 Kinimoovahereryani mmatatani mwa ale aniphavela owiivani, mmatatani mwa ale muniwoova anyu, mmatatani mwa Nabukodonosori* mwene a oBabiloonia ni mmatatani mwa atthu a oKhaldeya.+ 26 Nave, kinimooroihani elapo ekina nyuwo vamosa ni maama anyu, yoowo ooyanreni, weiwo ohinrowa anyu oyaraka, nave ti weiwo munrowa anyu okhwa. 27 Nyuwo khamuntthikela-tho okela elapo enrowa owunkhelani.+
28 Kiira mulopwana ola Koniyahi, onlikana ni mwaapu onithanyiwa ni woophweya,
Ntoko evaasu yeeyo ehiniphaveliwa?
Xeeni owo vamosa ni osuulu awe ariheliwa aya vathi,
Ariheliwaka elapo ahinisuwela aya?’+
29 Nyuwo atthu munikhala mulaponi,* mwiiwe moolumo a Yehova.
30 Etthu onihimya awe Yehova, tiila:
‘Mmulepe mulopwana ola ntoko mutthu ohirina anamwane,
Ntoko mutthu sihinrowa omweettelaka saana itthu mookumini mwawe,
Okhala wiira khuuvo mutthu a osuulu awe, itthu sinrowa omweettelaka saana,
Nave onrowa okilaathiki veehiceni ya Davidi ni otthikela olamulela oYuda’”.+
23 Yehova onihimya wiira: “Aatakhaliwa amakampusi anipwetexa ni animwara-mwarya ipwittipwitthi sa munikotoni mwaka!”+
2 Vano, etthu onihimya awe Yehova Muluku a Isarayeli, aahimyaka amakampusi anaakukhula atthu aka, tiila: “Nyuwo moomwara-mwarya ipwittipwitthi saka, moothanya ni khamutthikenle othokorerya”.+
“Tivonto, nkinrowa otthikela woothokoreryani mwaha wa miteko sanyu sootakhala”. Yehova tonihimya.
3 “Nuumala-vo, kinoothukumanya ipwittipwitthi sihanle elapo yootheene simwarenle aya,+ nto kinoottikiherya munikotoni mwaya,+ iyo sinoototholana ni sinimwaatta.+ 4 Nto ipwittipwitthi iyo, kinoomwaaverya makampusi yoowo onrowa okukhulaka oratteene.+ Iyo khasintthikela-tho woova nnakhala othukumela, nave khiivo enrowa orimeela”. Yehova tonihimya.
5 Yehova onihimya wiira: “Mwiiwe! Anoophiya mahiku, okathi kinrowa aka omuhela omwene mutthu a xariya, a osuulu wa Davidi.+ Mweekeekhai owo onrowa olamulelaka ntoko mwene.+ Owo onimooniherya osuwela ni onimwaakiherya exariya ni ororomeleya mulaponi.+ 6 Mahiku awe, Yuda onimoopoliwa,+ nave Isarayeli onrowa okhalaka ni murettele.+ Nsina ninkela aya wiihaniwaka tinla: Yehova Tori Exariya Ahu”.+
7 Yehova onihimya wiira: “Masi, anoophiya mahiku, ahinrowa aya ohimya-tho wiira: ‘Ntoko siisaale Yehova onikhala awe, yoowo aakuminhe atthu a Isarayeli elapo ya wExiitu!’+ 8 Masi anoohimya wiira: ‘Ntoko siisaale Yehova onikhala awe, yoowo okuminhe ni ottikinhe osuulu wa nloko na Isarayeli elapo ya onorti ni ilapo sootheene seiyo kaamwara-mwanrye aka’. Nto awo anrowa okhalaka elapo aya”.+
9 Kaahimyaka maprofeta kinaaleela wiira:
Murima aka onnikiriipa.
Makhuva aka ootheene anoothukumela.
Kinlikana ni namuhapaliwa,
Nave kinlikana ni mutthu owunrye eviinyu yinceene,
Mwaha wa Yehova ni moolumo awe oowaarya.
10 Elapo ela yoosareya anamararuwa.+
Itthu sinipaka aya ti sootakhala, awo khanrumeela saana owerya waya.
11 Yehova onihimya wiira: “Maprofeta ni anamukuttho toohiloka.*+
Hata mpaani mwaka koophwanya otakhala waya”.+
12 Yehova onihimya wiira: “Siiso, ephiro aya enrowa okhala yoothererya ni yooriipela,+
Awo anookakhiwa ni anoomora.
Okhala wiira kinimwaakumiherya ehasara,
Eyaakha kinrowa aka owiiriha waakhula.
13 Nave maprofeta a oSamariya+ kihaawehana etthu yoohiirya.
Iprofesia saya sinikhuma wa Bayaali,
Nto awo annaahapuxa atthu aka aisarayeli.
14 Nave maprofeta a oYerusalemu kihaawehana etthu yoohiirya.
Awo anniraruwa+ ni anilavula itthu soowootha.+
Annaalipiha atakhali,
Nave khanihiya otakhala waya.
15 Tivonto, etthu onihimya awe Yehova a anakhotto aahimyaka maprofeta, tiila:
“Kinoowiiriha okhuura mwiri woowaawa,
Ni owurya maasi ooheliwa eveneno,+
Okhala wiira ovirikanya wa maprofeta a oYerusalemu woomwara-mwareya mulaponi”.
16 Etthu onihimya awe Yehova a anakhotto, tiila:
“Muhiwiriyane moolumo a maprofeta anooleelaayani.+
Awo anooleelani nlipelelo neethiru.
17 Khula ekwaha awo annaahimeerya ale ahinikittittimiha,
‘Yehova ohimmye wiira: “Munookhalana murettele”’.+
Nave atthu ootheene anitthara murima aya wootakhala, anihimya wiira:
‘Khiivo etthu yootakhala enrowa wookhumelelani’.+
18 Ti pani iirenle mpantta ekurupu ya atthu yaataanale ni Yehova,
Wiira owehe ni iiwe moolumo awe?
Ti pani ovanhe ephoole moolumo awe ni iiwelenle moolumo awo?
19 Mwiiwe! Epheyo ya Yehova enimoorwa ni owali,
Ntoko munamukhaya, enommorela mutakhali.+
20 Yehova khonihiya onanariwa,
Mpakha owo omaleliha ni opaka itthu siniphavela murima awe.
Mahiku ookiserya, nyuwo munimwiiwexexa oratteene etthu ela.
21 Miyo nkaarumme maprofeta, masi awo aarowa etthimakaka.
Miyo nkilavulanne, masi awo aalaleya eprofesia.+
22 Masi, vaakhanle wiira awo yaahiirela mpantta ekurupu ya atthu yaataanale ni Muluku,
Yanwiiriha atthu aka owiriyana moolumo aka,
Nave yanwiiriha ohiya iphiro saya ni miteko saya sootakhala”.+
23 Yehova onihimya wiira: “Kiireke miyo paahi ka Muluku onikhala vakhiviru, nave nkihiyo-tho Muluku onikhala ottaiwene?”
24 Yehova onihimya wiira: “Kiireke ookhala mutthu oniwerya wiipitha opuro miyo kihinwerya aka onweha?+
Yehova onihimya wiira: “Kiireke miyo nkiniwerya oweha itthu sootheene siri wiirimu ni mulaponi?+
25 “Miyo koowiiwa maprofeta alaleyaka eprofesia yoowootha, aromolaka nsina naka ariki: ‘Kooloha! Kooloha!’+ 26 Mpakha silini maprofeta anrowa aya othipelelaka olavula itthu soowootha? Awo annilaleya itthu soowootha sa vamurimani vaya.+ 27 Awo aniphavela wiira atthu aka aliyale nsina naka mwaha wa sooloha anileelana aya, ntoko siisaale axipapaya aliyanle aya nsina naka mwaha wa Bayaali.+ 28 Profeta olonhe, okontariki itthu olonhe awe, masi ole orina moolumo aka, olavuleke moolumo aka moororomeleya”.
“Malaxi anivarihana sai ni ipyo?” Yehova tonihimya.
29 Yehova onihimya wiira: “Kiira moolumo aka anlikana ni mooro,+ nave anlikana ni maritelo onipwexakasa mwala?”+
30 Yehova onihimya wiira: “Miyo kinimwaahukhumu maprofeta, yaawo anaaroihela moolumo aka maprofeta makina, ni ahinthokorerya”.+
31 Yehova onihimya wiira: “Miyo kinimwaahukhumu maprofeta, yaawo anirumeela nlumi naya wiira ahimye so: ‘Owo tonihimya!’”+
32 Yehova onihimya wiira: “Miyo kinimwaahukhumu mwaha wa sooloha soowootha, yaawo anihimya ni anaahapuxa atthu aka ni wootha waya vamosa ni wiixinnuwiha waya”.+
“Masi miyo nkaavekenle wiira arowe, nnakhala nkaarumme. Tivo, awo khanvareleya-tho muteko para atthu ala”.+ Yehova tonihimya .
33 “Nave okathi atthu ala, maprofeta aahiiso anamukuttho anrowa aya woohiimeeryani wiira: ‘Moolumo ala anlikana ni muritti wa Yehova’, nyuwo muhaana waahimeerya so: ‘“Nyuwo munlikana ni muritti! Miyo kinimoohiyani”.+ Yehova tonihimya’. 34 Okathi profeta, namukuttho aahiiso mutthu, onkela ohimya wiira: ‘Ola muritti wa Yehova!’ Miyo kinoomuhukhumu mutthu owo vamosa ni atthu a etthoko awe. 35 Khula mmosa a nyuwo ohaana omukoha mpatthani awe aahiiso munnawe wiira: ‘Yehova aakhunle exeeni? Yehova ohimmye-ni?’ 36 Masi muhiye ohimya wiira moolumo a Yehova toolemela, okhala wiira muritti, nuulumo na khula mmosa, nave nyuwo mooturuka moolumo a Muluku mukumi, Yehova a anakhotto, Muluku ahu.
37 “Etthu mukhanle anyu oowaakoha maprofeta, tiila: ‘Yehova owaakhunleni exeeni? Etthu xeeni Yehova ohimmye awe? 38 Akhala wiira munoothipelela ohimya wiira: “Moolumo a Yehova toolemela!”, nto etthu onihimya awe Yehova, tiila: “Mwaha woohimya wiira: ‘Moolumo ala a Yehova toolemela’, nuumala woohimeeryani wiira: ‘Muhihimye wiira: “Moolumo a Yehova toolemela!”’, 39 weeso, kinimoovenxani wiira kooriheleni ottaiwene wa miyo, nyuwo vamosa ni epooma koovanhaakani, ni kaavanhe aka amuhavinre anyu. 40 Kinimooruuhelani ehaaya ni wuuliwa muru ohinimala, weiwo ohinrowa oliyaliwa”’”.+
24 Vano Yehova aahikooniherya isestu* piili sa ifiiku saapwehiwe mutemplo mwa Yehova, nuumala mwene Nabukodonosori* a oBabiloonia omuroiha weepotthani Yekoniya,*+ mwaana a Yoyakiimi,+ mwene a oYuda, vamosa ni mukhulupale a oYuda, ale yaavara muteko ni matera ni ale yaavara muteko ni eyuuma.* Owo aahaakuxa oYerusalemu aaroiha oBabiloonia.+ 2 Esestu emosa saahikhala ifiiku sootepa oreera, saalikana ni ifiiku soopacerya ottokottha. Masi esestu ekina saahikhala ifiiku soohiloka, seiyo saari sootepa ohiloka sahaaweryaneya olya.
3 Vano Yehova aahikikoha wiira: “Yeremiya, muniweha-ni?” Nto kaahaakhula wiira: “Kiniweha ifiiku. Ifiiku sooloka ti sootepa oloka, masi ifiiku soohiloka ti sootepa ohiloka, ti sootepa ohiloka vahiniweryaneya aya olya”.+
4 Nuumala-vo kaahisuwelihiwa moolumo a Yehova, yaahimya wiira: 5 “Etthu onihimya awe Yehova Muluku a Isarayeli, tiila: ‘Ntoko siisaale ifiiku iya sooloka, miyo kinimuupuwelela miteko sooloka sa atthu a oYuda aroohiwe weepotthani, yaawo kaakuminhe aka opuro ola kiwoomolelaka elapo ya atthu a oKhaldeya. 6 Miyo kinimwaaweha wiira kaaphwanyihe mureerelo, nave kinoowiiriha otthikela elapo ela.+ Miyo kinimwaalipiha, nkinrowa waapwetexa. Kinoowaala, nkinrowa waaphela.+ 7 Miyo kinimwaavaha murima woophavela okisuwela, wiira miyo ka Yehova.+ Awo anookhala atthu aka, nave miyo kinookhala Muluku aya,+ okhala wiira awo anookitthikela ni murima aya wootheene.+
8 “‘Masi ohimyaka ifiiku soohiloka, seiyo saari soohiloka sahaaweryaneya olya,+ etthu onihimya awe Yehova, tiila: “Vano kinoomuupuwela mwene Sedekiya+ a oYuda, makhulupale awe, yaawo ahanle oYerusalemu akhalaka elapo ela ni ale anikhala elapo ya wExiitu.+ 9 Nave miyo kinoowiiriha woova ehasara kinrowa aka okumiherya omwene wootheene wa mulaponi.+ Atthu anrowa waapwapwelaka, anrowa owoonaka ntoko ntakiheryo na atthu akumiheriwe ehasara, anrowa waatheyaka ni waatakhaliha+ khula opuro kinrowa aka waamwara-mwarya.+ 10 Nave kinimwaaroihela espaata,*+ etala ni eretta,+ mpakha awo omala-mala elapo kaavanhe aka awo ni amuhavinre aya”’”.
25 Eyaakha ya neexexe ya Yoyakiimi,+ mwaana a Yosiya mwene a oYuda, eyo piiyo, eyaakha yoopacerya ya Nabukodonosori,* mwene a oBabiloonia, Yeremiya aahisuwelihiwa moolumo yaahimya atthu ootheene a oYuda. 2 Etthu profeta Yeremiya aalavunle awe aahimyaka atthu ootheene a oYuda ni atthu ootheene anikhala oYerusalemu, tiila:
3 “Okhuma eyaakha ya namuloko ni tthaaru ya Yosiya,+ mwaana a Amoni, mwene a oYuda, mpakha olelo-va, iyaakha iya 23 kinnisuwelihiwa moolumo a Yehova, nave kimmakela wooleelani ikwaha ikwaha sene, masi nyuwo khamuniwiriyana.+ 4 Yehova aahooroihelani ikwaha ikwaha sene arumeyi awe ootheene maprofeta, masi nyuwo khamwaawiriyanne nnakhala khimwaavanhe ephoole.+ 5 Awo yaanihimya wiira: ‘Xontte, khula mmosa a nyuwo ohiye iphiro sawe ni miteko sawe sootakhala.+ Mwiira siiso, munookhalaka okathi munceene elapo Yehova oovanhaaweni khalai, nyuwo ni amuhavinre anyu. 6 Muhaatthare amuluku akina, muhaarumeele, nnakhala muhaakokhorele yaawo, mukiveehaka ni miteko sanyu. Mwiira siiso kinimookumiheryani ehasara’.
7 “Yehova onihimya wiira: ‘Nyuwo khimwaakiwiriyana. Ohiya-vo, mwaanikiveeha ni miteko sanyu, mwiirelaka wiikumiherya maxakha’.+
8 “Tivonto, etthu onihimya awe Yehova a anakhotto, tiila: ‘“Mwaha woohiiwelela moolumo aka, 9 kinoowiihana atthu ootheene a onorti”.+ Yehova tonihimya. “Kinoomwiihana murumeyi aka Nabukodonosori, mwene a oBabiloonia,+ wiira otuphele elapo ela,+ aatuphele atthu anikhala elapo ela, ni maloko ootheene arukurenrye elapo ela.+ Kinimwaavahererya wiira apwetexiwe, akhale etthu yoowoopiha, etthu enoopeliwa muturi ni akhale etthu epwetexiwe voomalela. 10 Miyo kinoomala-maliha okhuwela waya wootthapa ni okhuwela waya wootteeliwa murima,+ nsu na noivu ni nsu na noiva,+ onyakula wa nxilo ni waarya wa muthuko. 11 Nto elapo ela yootheene enoopwetexiwa ni enookhalihiwa yoowoopiha, nto maloko ala anonvarelaka muteko mwene a oBabiloonia iyaakha 70”’.+
12 “Yehova onihimya wiira: ‘Masi saphiya iyaakha 70,+ kinoomuhukhumu mwene a oBabiloonia ni nloko nna mwaha wa itampi saya,+ nave kinimwiiriha elapo ya atthu a oKhaldeya ohikhaliwa mahiku ootheene.+ 13 Kinoomaleliha moolumo ootheene kilavunle aka kihimyaka elapo ela, ni moolumo ootheene Yeremiya olempe awe eliivuru ela olavulaka eprofesia enihimya maloko ootheene. 14 Maloko manceene ni mamwene oowerya+ animwaakhaliha ipottha atthu awo,+ nto miyo kinimwaaliva kittharaka miteko saya ni itthu apanke aya’”.+
15 Etthu Yehova Muluku a Isarayeli aakihimenrye awe, tiila: “Mukuxe ekaalisi ela ya eviinyu ya oviruwa waka eri mmatatani mwaka, nto nwiirihe atthu ootheene a maloko kinrowa aka woorumani owurya eviinyu ela. 16 Awo anoowurya, anoovevereya, ni anrowa opakaka itthu ntoko anamukhwa-anepa,* mwaha wa espaata* kinaaruuhela aka”.+
17 Nto miyo kaahikuxa ekaalisi ele yaari mmatatani mwa Yehova, kiwiiriha owurya atthu a maloko ootheene Yehova aakirumme awe:+ 18 Kaapacenrye oYerusalemu ni ipooma sa oYuda,+ mamwene aya ni makhulupale aya wiira apwetexiwe, akhale etthu yoowoopiha, etthu enoopeliwa muturi, ni etthu yootakhalihiwa,+ ntoko siri aya mpakha olelo-va. 19 Kaahimwiiriha owurya Farawo, mwene a wExiitu, arumeyi awe, makhulupale awe, atthu awe ootheene,+ 20 atthu awe ootheene oovirikana, mamwene ootheene a elapo ya Usi, mamwene ootheene a elapo ya afilisti,+ wAxikeloni,+ oGaza, wEkironi, ale yaahanle wAxidodi, 21 wEdom,+ oMowabi,+ atthu a wAmoni,+ 22 mamwene ootheene a oTiiro, mamwene ootheene a oSiidoni,+ mamwene a esisiro* ya ophareya, 23 oDedani,+ oTema, oBuxi, atthu ootheene yaathikinle ikharari saya oponta,+ 24 mamwene ootheene a wArabia,+ mamwene ootheene oovirikana yaakhala moothakoni, 25 mamwene ootheene a oZinri, mamwene ootheene a wElami,+ mamwene ootheene a oMedia,+ 26 mamwene ootheene a onorti, ale yaakhala ottaiwene ni ale yaakhala vakhiviru, kimwiirihaka owurya mmosa-mmosa. Nave kaahiwiiriha owurya atthu a omwene wootheene wa mulaponi, nuumala-vo kinoomwiiriha owurya mwene a oXexaki.*+
27 “Nave mwaaleele wiira: ‘Etthu onihimya awe Yehova a anakhotto, Muluku a Isarayeli, tiila: “Nwurye, muhapaliwe, murapheye ni mmore mpakha ohiwerya ovenya,+ mwaha wa espaata kinooruuhelaakani”’. 28 Vakhala wiira anookhootta okuxa ekaalisi eri mmatatani mwanyu wiira awurye, mwaaleele wiira: ‘Etthu onihimya awe Yehova a anakhotto, tiila: “Muhaana owurya! 29 Vakhala wiira ehasara kinrowa aka okumiherya enrowa opacerya epooma erina nsina naka,+ kiireke nyuwo khamunrowa ohukhummwa?”’+
“‘Nave nyuwo munoohukhummwa, okhala wiira kinimwaaroihela espaata atthu ootheene anikhala mulaponi’. Yehova a anakhotto tonihimya.
30 “Mwaaleele eprofesia ya moolumo ala ootheene, mwiiraka:
‘Yehova onimoopa murukulu opuro woorakamela osulu,
Nave nsu nawe nnimwiiwanyeya opuro awe woowaarya.
Owo onimoopa murukulu opuro onikhala awe.
Onimwiipa nsipo nooxintta owiipelaka atthu ootheene anikhala mulaponi,
Okhuwelaka ntoko alipa aninyakatta ewuuva ari opuro oninyakattiwa ewuuva’.
31 ‘Nsu nlo nnimwiiwanyeya mpakha omalenle elapo,
Okhala wiira maloko aakhalana mulattu ni Yehova.
Owo mwaneene onimwaaphukela apinaatamu ootheene.+
Nave onimwaavahererya atakhali wiira yiiviwe ni espaata’. Yehova tonihimya.
32 Etthu onihimya awe Yehova a anakhotto, tiila:
‘Mwiiwe! Ennoorwa ehasara evira-viraka nloko ti nloko,+
Nave onootaphuliwa munamukhaya muulupale mpantta wootepexa orakama wa elapo.+
33 “‘Nave ale anrowa wiiviwa ni Yehova anrowa omwara-mwareya mpantta mmosa wa elapo mpakha mpantta mukina wa elapo. Awo khanrowa wunleliwa, nnakhala khanrowa othukumanyiwa wala ovithiwa. Anrowa okhala ntoko eturumu eri vatthayani’.
34 Nyuwo amakampusi, mwiikhupanyeryeke ni munleke!
Nyuwo makhulupale a ipwittipwitthi, mootoroweke,*
Okhala wiira okathi munrowa anyu wiiviwa ni omwarya-mwariwa woophiya.
Nave nyuwo munoomora ntoko evaasu yooreerexa!
35 Amakampusi kharina opuro wootthyawela,
Nave makhulupale a ipwittipwitthi khanoona wootthyawela.
36 Mwiiwe! Amakampusi anninla,
Nave makhulupale a ipwittipwitthi anniikhupanyerya,
Okhala wiira Yehova onnimwara-mwarya makoto aya.
37 Mapuro a murettele khanikhaliwa-tho,
Mwaha wa onanariwa wuulupale wa Yehova.
38 Ntoko kharamu mwaamukhaani onikhuma opuro iipinthe awe,+
Owo onookhuma opuro onikhala awe.
Mwaha wa espaata yoowoopiha ni mwaha wa onanariwa wawe vanceene
Atthu ootheene anooweha elapo aya atikinihiwe ene.
26 Woopaceryani wa olamulelo wa Yoyakiimi,+ mwaana a Yosiya, mwene a oYuda, Yehova aahisuweliha moolumo ala: 2 “Etthu onihimya awe Yehova, tiila: ‘Murowe mweemele va nivateni na empa ya Yehova, mwaaleele atthu ootheene a ipooma sa oYuda yaawo anrwa empa ya Yehova wiira amukokhorele. Mwaahimeerye itthu sootheene kinoorumaakani, muhikumihe nnakhala nuulumo nimosa. 3 Woonasa wene awo anoowiriyana, nto khula mmosa onoohiya ephiro awe yootakhala. Vano miyo kinooturuka muupuwelo aka mwaha wa ehasara kiniphavela aka waakumiherya, mwaha wa miteko saya sootakhala.+ 4 Mwaaleele wiira: “Etthu onihimya awe Yehova, tiila: ‘Mwaahikiwiriyane muttharaka nlamulo naka kipwenhe aka ohoolo wanyu, 5 ni nwiriyanaka moolumo a arumeyi aka maprofeta, yaawo kinooruuhelaakani ikwaha ikwaha sene, masi muhinaawiriyana,+ 6 weeso kinimwiiriha empa ela etthu emosa-ru kiirinhe aka oSilo,+ nave kinimwiiriha maloko ootheene a mulaponi otakhaliha epooma ela’”’”.+
7 Vano anamukuttho, maprofeta ni atthu ootheene yaahimwiiwa Yeremiya olavulaka moolumo ala mpaani mwa Yehova.+ 8 Siiso, Yeremiya aahimaliha olavula moolumo ootheene aarummwale awe ni Yehova waaleela atthu ootheene. Nuumala-vo, anamukuttho, maprofeta ni atthu ootheene, yaahinvara anahimya wiira: “Tthiri nyuwo munimookhwa. 9 Xeeni mulavunle anyu iprofesia ni nsina na Yehova, muriki: ‘Empa ela enrowa okhala ntoko oSilo, nave epooma ela enrowa ohononiwa, ni khenrowa okhaliwaka’?” Vano atthu ootheene yaahithukumana mpaani mwa Yehova amurukurerya Yeremiya.
10 Okathi makhulupale a oYuda yaiwale aya moolumo ala, yaahikhuma empa ya mwene arowa mpakha empa ya Yehova, akilaathi vaari mukhora musya wa empa ya Yehova.+ 11 Anamukuttho ni maprofeta yaahaaleela makhulupale ni atthu ootheene wiira: “Mulopwana ola oniphwanela wiiviwa,+ okhala wiira oolavula eprofesia ohimyaka epooma ela ntoko mwiiwale anyu ni maaru anyu”.+
12 Vano Yeremiya aahiwaakhula makhulupale ootheene ni atthu ootheene wiira: “Yehova tokirumme olavula eprofesia ya moolumo ala ootheene mwiiwale anyu,+ anihimya empa ela ni epooma ela. 13 Vano, mulokiherye iphiro sanyu ni miteko sanyu, nave mwiiweleleke moolumo a Yehova, Muluku anyu. Nto Yehova onooturuka muupuwelo awe wiira ohookumiheryeni ehasara ohimmye awe wiira onimookumiheryani.+ 14 Masi miyo, kiri mmatatani mwanyu. Mukiiriheke etthu enoona anyu oreerela. 15 Masi musuweleke oratteene wiira mwakiiva, munimwiikumiherya mulattu nyuwo, munookumiherya mulattu epooma ela ni munimwaakumiherya mulattu atthu anikhala epooma ela mwaha wa omwiiva mutthu ohitthenke etthu. Mweekeekhai Yehova tokirumme wooleelani moolumo ala ootheene muniiwa anyu va”.
16 Vano makhulupale ni atthu ootheene yaahaahimeerya anamukuttho ni maprofeta wiira: “Mulopwana ola khoniphwanela wiiviwa, okhala wiira oolavula ni hiyo ni nsina na Yehova Muluku ahu”.
17 Nave-tho, axitokweene akina a elapo ele yaahivenya, enapacerya waaleela atthu ootheene yaathukumanne wiira: 18 “Mikeya+ a oMorexethi aahilaleya eprofesia mahiku a mwene Ezekiya+ a oYuda, nave aahaaleela atthu ootheene a oYuda wiira: ‘Etthu onihimya awe Yehova a anakhotto, tiila:
“Siyoni onoolimmwa ntoko ematta,
Yerusalemu onrowa okhala ntoko maluku oowuukeliwa,+
Nave mwaako waatekiwe Empa ya Muluku, onrowa okhala etakhwa yoosareya miri”’.+
19 “Niireke mwene Ezekiya a oYuda ni atthu ootheene a oYuda yaahimwiiva? Kiira owo taamuttittiminhe vanceene Yehova ni taamuxonttenle Yehova, wiira Yehova oturuke muupuwelo awe ni ohaakumiherye ehasara aahimmye awe wiira aamwaakumiherya?+ Nto hiyo nihanle wiikumiherya ehasara yuulupale.
20 “Nave aahikhala mulopwana mukina aalaleya eprofesia ni nsina na Yehova, yoowo aihaniwa Uriya, mwaana a Xemaya a oKiriyathi-Yarimi.+ Owo aahilaleya eprofesia ohimyaka epooma ela ni elapo ela moolumo yaawo yaalikana ni a Yeremiya. 21 Mwene Yoyakiimi+ vamosa ni alopwana awe ootheene oowerya ni makhulupale awe ootheene yaahiiwa moolumo awe, nto mwene aahiphavela omwiiva mulopwana owo.+ Okathi Uriya aiwale awe eyo, aahoova ni aahitthyawela wExiitu. 22 Vano mwene Yoyakiimi aahimuruma Elinataani+ mwaana a Akibori, ni alopwana akina orowa wExiitu. 23 Awo yaahimurowela Uriya wExiitu, amuroiha wa mwene Yoyakiimi, nto owo aahimwiiva ni espaata,*+ vano murutthu awe aahirihela mmahiye yaavithiwa atthu ootheene”.
24 Masi Ahikami+ mwaana a Xafani+ aahimukhaliherya Yeremiya, nto owo khaavahereriwe mmatatani mwa atthu, wiira iiviiwe.+
27 Woopaceryani wa olamulelo wa Yoyakiimi, mwaana a Yosiya, mwene a oYuda, Yeremiya aahisuwelihiwa moolumo a Yehova yaahimya wiira: 2 “Etthu Yehova okilenle awe, tiila: ‘Mwiipakele mikhoyi ni ithaapwa,* nuumala-vo nware muxikoni mwanyu. 3 Vano, mmuroihele mwene a wEdomi,+ mwene a oMowabi,+ mwene a wAmoni,+ mwene a oTiiro+ ni mwene a oSiidoni.+ Mwaarume anamitthaka arwaale oYerusalemu wiira yakumane ni Sedekiya mwene a oYuda. 4 Mwaarume wiira yaaleele makhulupale aya wiira:
“‘“Etthu onihimya awe Yehova a anakhotto, Muluku a Isarayeli, tiila: Etthu mukhanle anyu oowaaleela makhulupale anyu, tiila: 5 ‘Ti miyo kipanke elapo, kaapattunxe apinaatamu, kipanke inama siri mulaponi, kirumeelaka owerya waka wuulupale ni ntata naka noowerya. Nto miyo kinninvaha itthu iyo ole onikisiveliha.+ 6 Vano kinnivahererya ilapo iya sootheene mmatatani mwa murumeyi aka Nabukodonosori,+ mwene a oBabiloonia. Kinninvaha hata inama sa mutakhwani wiira simurumeeleke. 7 Maloko ootheene anoomurumeela yena, mwanawe ni musulwaawe, mpakha ophiya okathi+ wa omwene wa nloko nawe onrowa aya omala. Nto maloko manceene ni mamwene maalupale anookhala ipottha sawe’.+
8 “‘“Yehova onihimya wiira: ‘Nakhala nloko aahiiso omwene onrowa okhootta omurumeela Nabukodonosori, mwene a oBabiloonia, ni akhootta ohela muxikoni mwawe mwiri wa mwene a oBabiloonia, miyo kinoohukhumu nloko nno ni espaata,*+ etala ni ekwerere, mpakha waamala-maliha mmatatani mwawe’.
9 “‘“‘Tivonto, nyuwo muhaawiriyane maprofeta anyu, nnakhala anahako anyu, ale anileiherya itthu ni sooloha, nnakhala anamaxintta anyu, aahiiso akulukhana anyu, yaawo anooleelani wiira: “Nyuwo khamunrowa omurumeela mwene a oBabiloonia”. 10 Awo anooleelani eprofesia yoowootha, mwaha waivaavo, nyuwo munookuxiwa muroihiwaka ottaiwene ni elapo anyu. Kinimoomwara-mwaryani ni munrowa omala-malihiwa.
11 “‘“‘Masi, nloko ninrowa owara muxikoni mwaya mwiri wa mwene a oBabiloonia ni omurumeela, kinoohiya nikhalaka* elapo aya, wiira nilimeke ni nikhaleke memmo’. Yehova tonihimya”’”.
12 Nave-tho kaahimuleela moolumo mamosa-ru Sedekiya,+ mwene a Yuda, kiiraka: “Nware muxikoni mwanyu mwiri wa mwene a oBabiloonia ni mmurumeeleke owo ni atthu awe, wiira mukhaleke akumi.+ 13 Exeeni nyuwo ni atthu anyu mwaakhanle anyu ookhwa ni espaata,+ etala+ ni eretta?+ Ti yeeyo Yehova ohimmye awe enrowa owiiraneela atthu ahinrowa omurumeela mwene a oBabiloonia. 14 Muhiwiriyane moolumo a maprofeta anoohimeeryani wiira: ‘Nyuwo khamunrowa omurumeela mwene a oBabiloonia’.+ Okhala wiira awo annooleelani eprofesia yoowootha.+
15 “Yehova onihimya wiira: ‘Miyo nkaarumme, masi awo annilaleya eprofesia yoowootha ni nsina naka. Nto awo animoomwara-mwaryani ni woomala-malihani ntoko kinrowa aka owiiriha maprofeta anooleelani iprofesia’”.+
16 Anamukuttho ni atthu ala ootheene kinaaleela wiira: “Etthu onihimya awe Yehova, tiila: ‘ Muhiwiriyane moolumo maprofeta anooleelaayani ariki: “Mwiiwe! Moohipisa-va, mireerelo sa empa ya Yehova sinookuxiwa sittikiheriwaka oBabiloobia!”+ Awo anooleelani eprofesia yoowootha.+ 17 Muhaawiriyane. Mmurumeeleke mwene a oBabiloonia wiira mukhaleke akumi.+ Xeeni epooma ela ekhanle aya oopwetexiwa? 18 Masi, vakhala wiira awo maprofeta ni moolumo a Yehova ari ni yaawo, xontte, munvekele Yehova a anakhotto wiira mireerelo sihanle empa ya Yehova, empa ya mwene a oYuda* ni oYerusalemu sihikuxiwe siroihiwaka oBabiloonia’.
19 “Yehova a anakhotto oohimya etthu ohimyaka epilaari,+ epasiya yuulupale ya ekoopiri yaaheliwa+ maasi,*+ ikarinyu ni mireerelo sikina sihanle epooma ela. 20 Itthu iyo mwene Nabukodonosori a oBabiloonia khaakunxe okathi aamukunxe awe Yekoniya mwaana a Yoyakiimi mwene a oYuda omukumihaka oYerusalemu omuroihaka weepotthani oBabiloonia vamosa ni makhulupale ootheene a oYuda ni a Yerusalemu.+ 21 Etthu Yehova a anakhotto, Muluku a Isarayeli onilavula awe, ohimyaka mireerelo sihanle empa ya Yehova, empa ya mwene a oYuda* ni oYerusalemu, tiila: 22 ‘“Iyo* sinookuxiwa siroihiwaka oBabiloonia,+ nave sinrowa okhalaka weiwo mpakha nihiku kinrowa aka otthikela othokorerya. Nto kinookuxa wiira kittikiherye opuro ola”.+ Yehova tonihimya’”.
28 Eyaakha ene yeele, woopaceryani wa olamulelo wa Sedekiya mwene+ a oYuda, mweeri wa neethanu wa eyaakha ya neexexe, profeta Hananiya mwaana a Azuri a oXibeyoni,+ aahikileela moolumo mpaani mwa Yehova, ohoolo wa anamukuttho ni atthu ootheene, yaawo yaahimya wiira: 2 “Etthu onihimya awe Yehova a anakhotto, Muluku a Isarayeli, tiila: ‘Kinoopwexa mwiri* wa mwene a oBabiloonia.+ 3 Mwa iyaakha piili, kinoottikiherya opuro ola mireerelo sootheene sa empa ya Yehova, seiyo Nabukodonosori mwene a oBabiloonia aakunxe awe opuro ola, oroihaka oBabiloonia’”.+ 4 “Yehova onihimya wiira: ‘Nave kinoomuttikiherya opuro ola Yekoniya+ mwaana a Yoyakiimi,+ mwene a oYuda ni atthu ootheene akuxiwe oYuda aroihiwaka weepotthani oBabiloonia,+ okhala wiira kinoopwexa mwiri wa mwene a oBabiloonia’”.
5 Vano, profeta Yeremiya aahimwaakhula profeta Hananiya ohoolo wa anamukuttho ni atthu ootheene yaawo yeemenle empa ya Yehova. 6 Profeta Yeremiya aakhunle so: “Amen!* Yehova opake siiso! Yehova omalelihe moolumo yaawo mulavunle anyu, ottikihaka oBabiloonia mireerelo sa empa ya Yehova ni aattikihaka atthu ootheene akhalihiwe ipottha. 7 Vano, xontte, mwiiwe moolumo ala kinrowa aka wooleelani nyuwo vamosa ni atthu ootheene. 8 Maprofeta yaakhanle khalai kihinatthi miyo ni nyuwo, yaanilaleya iprofesia saahimya ilapo sinceene ni saahimya mamwene maalupale, elaleyaka ekhotto, ehasara ni eretta. 9 Akhala profeta onilaleya eprofesia ohimyaka murettele, nto moolumo a profeta owo aniiraneya, tthiri vanoosuweliwa wiira profeta owo orummwale ni Yehova”.
10 Nto profeta Hananiya aahikumiha mwiri waari muxikoni mwa profeta Yeremiya, wuntakasa mwiri owo.+ 11 Hananiya aahilavula ohoolo wa atthu ootheene oriki: “Etthu onihimya awe Yehova, tiila: ‘Ti siisa kinrowa aka okumiha mwiri wa mwene Nabukodonosori muxikoni mwa maloko ootheene mwa iyaakha piili’”.+ Nuumala-vo profeta Yeremiya aahirowa.
12 Nuumala profeta Hananiya wunta mwiri waari muxikoni mwa profeta Yeremiya, Yeremiya aahisuwelihiwa moolumo a Yehova yaahimya wiira: 13 “Murowe mwamuleele Hananiya wiira: ‘Etthu onihimya awe Yehova, tiila: Muhinta mwiri,*+ masi munoopaka eyuuma wiira muranttelihe”. 14 Etthu onihimya awe Yehova a anakhotto, Muluku a Isarayeli, tiila: “Kinoohela eyuuma muxikoni mwa maloko ala ootheene, wiira amurumeeleke Nabukodonosori mwene a oBabiloonia,+ nto awo ahaana omurumeela. Vano miyo kinonvaha hata inama sa mutakhwani”’”.+
15 Profeta Yeremiya aahimuhimeerya profeta Hananiya+ wiira: “Xontte, mwiiwe nyuwo Hananiya! Yehova khoorummeni, masi nyuwo moowiiriha atthu ala ororomelaka itthu soowootha.+ 16 Masi, etthu onihimya awe Yehova, tiila: ‘Kinimoomala-malihani valaponi. Eyaakha yeela nyuwo munimookhwa, okhala wiira moowiiriha atthu omurukunuwela Yehova’”.+
17 Siiso, mweeri wa neethanu nenli eyaakha yeele, profeta Hananiya aahikhwa.
29 Profeta Yeremiya aahilepa ekarta ori ene oYerusalemu, aaroihela axitokweene yaahanle eriyari ya atthu yaaroihiwe weepotthani, anamukuttho, maprofeta ni atthu ootheene. Atthu awo yaahikuxiwa oYerusalemu ni Nabukodonosori aroihiwa weepotthani oBabiloonia. 2 Eyo yiiraneyale nuumala mwene Yekoniya,+ pwiyamwene muulupalexa,+ makhulupale a opalaasio, makhulupale a oYuda ni a oYerusalemu, ale yaavara muteko ni matera ni ale yaavara muteko ni eyuuma, okhuma oYerusalemu.+ 3 Owo aahiroiha ekarta eyo omurumeelaka Elasa mwaana a Xafani,+ ni Gemariya mwaana a Hilikiya, yaawo Sedekiya mwene+ a oYuda, aaroihale awe wa mwene Nabukodonosori a oBabiloonia. Ekarta eyo yaahimya wiira:
4 “Etthu onihimya awe Yehova a anakhotto, Muluku a Isarayeli, aaleelaka atthu ootheene aroihiwe weepotthani, yaawo kiwiirinhe aka okuxiwa oYerusalemu aroihiwaka weepotthani oBabiloonia, tiila: 5 ‘Mutekeke ipa sanyu ni mukhaleke-mo. Mwaaleke miri ni mulyeeke mihokorokho saya. 6 Mwaatheleke athiyana, mwaayareke anamwane axilopwana ni axithiyana, mwaatheliheke aniinyu axilopwana, nave mwaatheliheke aniinyu axithiyana, wiira naawo yaayareke anamwane axilopwana ni axithiyana. Mukhaleke oowaatta ni muhivukuwe. 7 Mphaveleke wiira murettele okhaleke epooma yeeyo kookhalinhaakani ipottha, nave munvekeleke Yehova nvekelelaka epooma eyo, nto epooma eyo yakhala ni murettele ni nyuwo-tho munookhala ni murettele.+ 8 Etthu onihimya awe Yehova a anakhotto, Muluku a Isarayeli, tiila: “Muhaawiriyane maprofeta anyu ni anahako anyu, yaawo ari eriyari anyu,+ nave muhiwiriyane itthu aniloha aya. 9 ‘Awo anooleelani eprofesia yoowootha ni nsina naka. Miyo nkaarumme’.+ Yehova tonihimya”’”.
10 “Etthu onihimya awe Yehova, tiila: ‘Mwaphiyeriha iyaakha 70 muri ene oBabiloonia, kinootthikela woothokoreryani,+ nave kinoomaleliha ele kileihenrye aka, koottikiheryakani opuro ola’.+
11 “Yehova onihimya wiira: ‘Miyo kinnisuwela oratteene etthu kinuupuwela aka owiirelani. Kiniphavela wiira mukhaleke ni murettele ni ehookhumelelekeni etthu yootakhala.+ Kiniphavela wiira mukhalane nlipelelo ni mwaakhele itthu sooreera ohoolo.+ 12 Nyuwo munookiihana ni munimoorwa wa miyo mukivekelaka, nto miyo kinimoowiriyanani’.+
13 “‘Nyuwo munookiphavela ni munookiphwanya,+ okhala wiira munrowa okiphavelaka ni murima anyu wootheene.+ 14 Miyo kinimweemererya wiira mukiphwanye’.+ Yehova tonihimya. ‘Nave kinoowiihana atthu anyu weepotthani, wiira koothukumanyeni eriyari ya maloko ootheene, ni mapuro yaawo koomwara-mwarenlaakani.+ Nto miyo kinimoottikihani opuro kooroihalyaakani ntoko ipottha’.+ Yehova tonihimya.
15 “Masi nyuwo munihimya wiira: ‘Yehova oonikumiherya maprofeta oBabiloonia’.
16 “Etthu onihimya awe Yehova omuhimyaka mwene okilanthi veehiceni ya Davidi+ ni atthu ootheene anikhala epooma ela, ni axinninyu yaawo yaahaaronwe ni nyuwo weepotthani, tiila: 17 ‘Etthu onihimya awe Yehova a anakhotto, tiila: “Kinimwaaroihela espaata,* etala ni eretta,+ nave kinoowiiriha okhalaka ntoko ifiiku soowuntta,* sootepa ohiloka sihinreerela olya”’.+
18 “‘Kinoowoomola ni espaata,+ etala ni ekwerere. Nave miyo kinoowiiriha wooviwa ni omwene wootheene wa mulaponi.+ Anrowa wooniwaka ntoko atthu ootakhalihiwa, etthu yootikiniha, etthu enoopeliwa muturi+ ni etthu enitheiwa eriyari ya maloko ootheene wa khula opuro kaamwara-mwanrye aka.+ 19 Kinoowiiriha siiso okhala wiira khawiriyanne moolumo aka, yaawo kaaroihenle aka kaarumaka arumeyi aka, maprofeta. Miyo kaanaaruma ikwaha ikwaha sene’.+ Yehova tonihimya.
“Yehova onihimya wiira: ‘Masi nyuwo khamwaawiriyanne’.+
20 “Tivonto, mwiiwe moolumo a Yehova, nyuwo atthu ootheene, kookuminhaakani oYerusalemu kooroihakani weepotthani oBabiloonia. 21 Etthu onihimya awe Yehova a anakhotto, Muluku a Isarayeli, omuhimyaka Akhabi, mwaana a Kolaya, ni Sedekiya, mwaana a Maaseya, yaawo anooleelani eprofesia yoowootha ni nsina naka,+ tiila: ‘Kinimwaavahererya mmatatani mwa Nabukodonosori* mwene a oBabiloonia, nto owo onoowiiva ohoolo wanyu. 22 Ele enrowa owiiraneela enrowa wooniwaka ntoko etthu yootakhaliha yaalavuliwe ni atthu ootheene a oYuda aroihiwe weepotthani oBabiloonia, ahimyaka wiira: “Yehova owiirihe etthu emosa-ru ntoko omwiirinhe awe Sedekiya ni Akhabi, yaawo mwene a oBabiloonia orumme awe oriheliwa vamooroni!” 23 Awo aapaka etthu yoowuuliha muru wIsarayeli,+ araruwaka ni axaaraya akhwaaya, ni yoothaka arumeelaka nsina naka, miyo kihaarumme.+
“‘“Miyo koosuwela ni kookhalela onamoona etthu eyo”.+ Yehova tonihimya’”.
24 “Nave Xemaya,+ a oNehelami mwamuleele wiira: 25 ‘Etthu onihimya awe Yehova a anakhotto, Muluku a Isarayeli, tiila: “Okhala wiira mooroiha ikarta ni nsina nanyu, mwaaroihelaka atthu ootheene ari oYerusalemu, ni namukuttho Sefaniya,+ mwaana a Maaseya, ni anamukuttho ootheene, ikarta seiyo saahimya wiira: 26 ‘Yehova ohoothanlani ntoko namukuttho opuro wa namukuttho Yehoyada, wiira mukhale muhooleli a empa ya Yehova, munwehawehaka khula mulolo onipaka itthu ntoko profeta, wiira mmurihele mukhatteya.+ 27 Xeeni muhinimpwapwela anyu Yeremiya a wAnatothi,+ yoowo onikhala ntoko profeta ohoolo wanyu?+ 28 Owo ooniruuhela ekarta hiyo niri oBabiloonia, yeeyo enihimya so: “Nyuwo munookhala weiwo okathi munceene! Mutekeke ipa sanyu ni mukhaleke. Mwaaleke miri sanyu ni mulyeeke mihokorokho saya,+ . . .”’”’”
29 Okathi namukuttho Sefaniya+ aasomme awe ekarta ela ohoolo wa profeta Yeremiya, 30 Yeremiya aahisuwelihiwa moolumo a Yehova, yaahimya wiira: 31 “Mwaaleele atthu ootheene ari weepotthani wiira: ‘Etthu onihimya awe Yehova omuhimyaka Xemaya a oNehelami, tiila: “Okhala wiira Xemaya ohooleelani eprofesia miyo kihimurumme, ni oheererya wookupalihani itthu soowoothiwa,+ 32 etthu onihimya awe Yehova, tiila: ‘Kinoomuhukhumu Xemaya a oNehelami ni osuulu awe. Khuuvo mmusi awe onrowa woopowa eriyari ya atthu ala, nave owo khonrowa woona etthu yooreera kinrowa aka owirela atthu aka, okhala wiira oowiiriha atthu onvirikanya Yehova’. Yehova tonihimya”’”.
30 Yeremiya aahisuwelihiwa moolumo a Yehova yaahimya wiira: 2 “Etthu onihimya awe Yehova Muluku a Isarayeli, tiila: ‘Mulepe muliivuruni moolumo ootheene kinooleelaakani. 3 Yehova onihimya wiira: “Anoophiya mahiku, kinrowa aka waathukumanya atthu aka aisarayeli ni ayuda,+ yaawo akhalihiwe ipottha, wiira kaattikiherye elapo kaavanhe aka amuhavinre aya, nto awo anootthikela-tho okuxa elapo eyo”.+ Yehova tonihimya’”.
4 Ala moolumo Yehova aalenle awe atthu a Isarayeli ni a oYuda.
5 Etthu onihimya awe Yehova, tiila:
“Nihiiwa okhuwela wa atthu anoova.
Khokhanle murettele, okhanle woova.
6 Xontte, mukohe vakhala wiira mulopwana onniwerya omuyara mwaana.
Nto, xeeni kiniwoona aka alopwana ootheene oowerya avarenle ene erukulu aya,
Ntoko muthiyana oniyara?+
Xeeni ootheene aya owuumale aya owiitho?
7 Nootakhaliwa! Tthiri nna nihiku noowoopiha vanceene.+
Khanikhanle nihiku ninlikana ni nla,
Ola okathi wooxanka para Yakobe.
Masi miyo kinoomoopola.
8 Yehova a anakhotto onihimya wiira: “Nave nihiku nlo, kinimunta mwiri* ori muxikoni mwanyu, nave kinookwasa mikhoyi mutthukwaniwe anyu. Nyuwo khamuntthikela-tho okhala epottha ya atthu a ilapo sikina. 9 Awo anrowa onvarelaka muteko Yehova, Muluku aya, vamosa ni Davidi, mwene aya, yoowo kinrowa aka omukumiherya”.+
10 Yehova onihimya wiira: “Nave nyuwo, murumeyi aka Yakobe, muhoove,
Muhithukumele, nyuwo Isarayeli.+
Tthiri miyo kinoowoopolani hata muri ene ottaiwene,
Kinimoopola osuulu anyu elapo oroihiwe aya ntoko ipottha.+
Yakobe onootthika, onookhala oomaaleleya ni murettele,
Khuuvo onrowa omoopopihaka”.+
11 Yehova onihimya wiira: “Tthiri miyo kiri ni nyuwo, wiira kiwoopoleni.
Masi kinimwaamala-maliha atthu a maloko ootheene koomwara-mwarenlyaakani.+
Nto, nyuwo nkinrowa woomala-malihani.+
Kinimoottaruxani ntoko vanreerela aya,
Nave nkinrowa woohiyani kihoohukhummuni”.+
12 Etthu onihimya awe Yehova, tiila:
“Makhwatta anyu kharina murette.+
Makhwatta anyu khanivola.
13 Khuuvo onrowa wookhaliheryani mulattu anyu,
Khuuvo onrowa woopenuxani makhwatta anyu maalupale.
Tthiri nyuwo khamurina murette.
14 Ootheene ale mwaaphenta anyu ahooliyalani.+
Awo khanoophavelani-tho.
Miyo kihookumiheryani nikhwatta ni awanani anyu,+
Kihoohukhumuni ni mutthu ootakhala,
Mwaha wa mulattu anyu muulupale ni itampi sanyu sinceene.+
15 Xeeni muninla anyu mwaha wa nikhwatta nanyu?
Owereya munoona anyu khonimala!
Miyo koowiirelani etthu ela,
Mwaha wa mulattu anyu muulupale ni itampi sanyu sinceene.+
16 Masi ootheene ale anoopwetexani anoopwetexiwa,+
Nave awanani anyu ootheene anooroihiwa weepotthani.+
Ale anikuxa mireerelo sanyu, sinookuxiwa mireerelo saya.
Nave ale aniwaakhani mireerelo sanyu, kinoowiiriha waakhiwa mireerelo saya”.+
17 Yehova onihimya wiira: “Masi miyo kinimoopenuxani ni kinoovoliha makhwatta anyu,+
Hata mwaireliwa atthu oonyanyaliwa, vahimmwaka wiira:
‘Ola Siyoni, yoowo ohirina mutthu onimukohererya’”.+
18 Etthu onihimya awe Yehova, tiila:
“Miyo kinimwaathukumanya atthu a itenta* sa Yakobe yaakhalihiwe ipottha,+
Nave kinoowoonela othunku mwaha wa itenta saya sa muthukumano.
Epooma ela enootthikela otekiwa mapuro yaapwexakasiwe aya,+
Nave ipa soorakamela osulu sinimweemexiwa oratteene mapuro aya.
19 Awo anrowa oxukhurelaka ni okhuwela mwaha woohakalala.+
Miyo kinoowuncererya, nto khanrowa okhala vakhaani.+
20 Anaawe anrowa okhala ntoko khalai,
Nave nloko nawe ninrowa okhala noolipa ohoolo waka.+
Miyo kinimwaahukhumu atthu ootheene anaahaaxa.+
21 Muhooleli awe muulupalexa onrowa okhala nuuwo,
Nave namalamulela awe onrowa okhuma eriyari awe.
Miyo kinoomwiiriha owo orwa vakhiviru, nto owo onookaattamela”.
Kaahiire siiso, ti pani oniwerya okaattamela?” Yehova tonihimya.
22 “Nto nyuwo munrowa okhala atthu aka,+ vano miyo kinrowa okhala Muluku anyu”.+
23 Mwiiwe! Epheyo ya Yehova enimoorwa ni owali.+
Epheyo eyo enimwaaphwanya atthu ootakhala.
24 Yehova khonihiya onanariwa vaalupale
Mpakha omaleliha ni opaka itthu sootheene siniphavela murima awe.+
Mahiku ookiserya, nyuwo munimwiiwexexa etthu ela.+
31 Yehova onihimya wiira: “Okathi owo, miyo kinrowa okhala Muluku a imusi sootheene sa Isarayeli, nave awo anrowa okhala atthu aka”.+
2 Etthu onihimya awe Yehova, tiila:
“Atthu yooponwe espaata* aareereliwa murima woothakoni,
Okathi aisarayeli yeetta aya arowaka opuro aya woophumurya”.
3 Yehova ookikhumelela ori ene ottaiwene onahimya wiira:
“Kinnoophentani ni ophenta ohinimala.
Nto mwaha wa ophenta iwo, koowooniheryani ororomeleya.+
4 Miyo kinootthikela-tho wootekani, nto nyuwo munoolipa.+
Nyuwo mwaana mwaamuthiyana a wIsarayeli ohitonko orupa ni mulopwana, munootthikela okuxa malapa anyu macikhaani
Nave munimwiina muhakalanle ene.+
5 Nyuwo munootthikela waala miri sa ewuuva miyaako sa oSamariya.+
Ale anaala miri sa ewuuva tanrowa opacerya olya mihokorokho saya.+
6 Nnoophiya nihiku alipa-oowehaweha a miyaako sa wEfrayimi anrowa ya okhuwela, yiiraka:
‘Nivenye, nrowe oSiyoni, wa Yehova Muluku ahu’”.+
7 Etthu onihimya awe Yehova, tiila:
“Mmukhuweleleke Yakobe ni otteeliwa murima.
Mukhuweleke mwaha woohakalala, okhala wiira ti nyuwo munihoolela maloko.+
Mulaleyeke ehapari eyo, mutthapeke ni muhimyeke wiira:
‘Khoo Yehova, nwoopole atthu anyu, yaawo ahanle wIsarayeli’.+
8 Miyo kinimwaattikiha elapo ya onorti.+
Kinimwaathukumanya okhuma mpantta woorakamexa wa elapo.+
Eriyari aya anookhala alipa-oohoona ni ootuthunya,+
Athiyana oorupala ni ale ahanle oyara, kinimwaathukumanya ootheene aya.
Awo anootthikela opuro ola ntoko muttitthi muulupale wa atthu.+
9 Awo animoorwa yinlaka.+
Miyo kinimwaahoolela okathi anrowa ya okivekela oreereliwa murima.
Kinooweettiha kaaroihaka mapuro aniphattuwa maasi,+
Kaavirihaka ephiro yooreera ehinrowa owiiriha omora.
Tthiri miyo ka paapa a Isarayeli, nave Efrayimi mwanaka oopacerya oyariwa”.+
10 Nyuwo atthu a maloko, mwiiwe moolumo a Yehova,
Nave mulaleye moolumo awo eriyari ya isisiro* siri ottaiwene, mwiiraka:+
“Ole aamwara-mwanrye atthu a Isarayeli onimwaathukumanya.
Owo onimwaawehaweha ntoko makampusi onikhapelela nikoto nawe.+
12 Awo animoorwa ni anookhuwela atteeliwe ene murima opuro woorakamela osulu wa oSiyoni,+
Nave anoohakalala vanceene mwaha wa oreera murima wa Yehova,
Mwaha wa ipyo, eviinyu ya niinaano,+ makhura,
Ni mwaha wa ipwittipwitthi saamukhaani ni ipooyi saamukhaani.+
13 “Okathi owo muthiyana ohitonko orupa ni mulopwana onimwiina otteeliwe ene murima,
Nave amiravo ni atthu oowuuluvala, anootteeliwa murima.+
Miyo kinoowiiriha otthapa ohiya wunla.+
Kinimwaamaaliha ni kinoowiiriha ohakalala ohiya oriipiwa murima.+
14 Kinimwaavaha anamukuttho yoolya yoowaatta,
Nave atthu aka anoohakalala mwaha wa oreera waka murima”.+ Yehova tonihimya.
15 “Etthu onihimya awe Yehova, tiila:
‘Ninniiwanyeya nsu oRama,+ niikhupanyeryaka ni ninlaka vanceene:
Rakeli oniwunlela anaawe.+
Owo onnikhootta omaalihiwa mwaha wa anaawe,
Okhala wiira aapweteya’”.+
16 Etthu onihimya awe Yehova, tiila:
“‘Mmaale wunla ni mpuputthe maithori anyu,
Okhala wiira munootthuveliwa mwaha wa muteko anyu,
Awo anootthika elapo ya awanani aya’.+ Yehova tonihimya.
17 Yehova onihimya wiira: ‘Mulipeleleke etthu yooloka muhoolo+
Aniinyu anootthikela muttetthe aya’”.+
18 Tthiri koomwiiwa Efrayimi anlaka, oriki:
‘Nyuwo mookiixuttiha, nto miyo kihiixutta,
Ntoko epooyi yaamukhaani ehiixuttihiwe.
Mukittikihe, nto miyo kinootthika,
Okhala wiira nyuwo mwa Yehova, Muluku aka.
19 Nuumala otthikela ottuli kihiikhupanyerya.+
Nuumala wiixuttihiwa koomana nikutha naka kooniheryaka oriipiwa murima.
Nkireere wuuliwa muru,+
Okhala wiira koopwapweliwa nlelo kiri ene mmiravo’”.
20 Yehova onihimya wiira:+ “Kiira Efrayimi ti mwaana kinimphentexa aka, orina efaita yinceene?+
Ntoko siisaale kilavulanne aka ikwaha sinceene, siiso-tho kinoomuupuwela.
Tivo kinixanka aka mwaha wa yoowo.+
Mweekeekhai, kinoomoonela othunku”.
21 “Muhele isinaale mustaraatani,
Mweemexe miri.+
Nwehawehe estaraata, ephiro yeeyo munrowa anyu.+
Nyuwo mwaana mwaamuthiyana a wIsarayeli ohitonko orupa ni mulopwana, muhokolowe, muhokolowele ipooma sanyu.
22 Nyuwo mwaana mwaamuthiyana oohiroromeleya, mpakha silini munrowa anyu ohisuwela othanla etthu yoopaka?
Tthiri Yehova oopattuxa etthu esya mulaponi:
Muthiyana onrowa omwaavyaka vanceene mulopwana”.
23 Etthu onihimya awe Yehova a anakhotto, Muluku a Isarayeli, tiila: “Awo anootthikela olavula moolumo ala elapo ya oYuda ni ipooma saya, okathi kinrowa aka waattikiha atthu aya aroihiwe weepotthani, ariki: ‘Nyuwo nipuro na xariya,+ ni nyuwo mwaako woowaarya,+ Yehova ooreeliheni’. 24 Atthu anikhala opooma, alimi ni amakampusi, anrowa okhalaka oYuda, khula mmosa opuro awe.+ 25 Miyo kinimwaahakalaliha ale akhulumunwe ni kinimwaapenuxa* ale anihala okhwa”.+
26 Kaahivenya, kitthukula maitho, ikhove saka saari sootepa oreera.
27 Yehova onihimya wiira: “Mwiiwe! Anoophiya mahiku, kinrowa aka owuncererya atthu a nloko na Isarayeli ni atthu a nihimo na Yuda. Nave-tho, kinimuncererya inama saya sa vate”.+
28 Yehova onihimya wiira: “Ntoko siisaale kaawehawenhe aka wiira kaaphele, kaapwexakase, kaamoroxe, kaahaaxe ni kaapwetexe,+ siiso-tho kinimwaawehaweha wiira kaateke ni kiwaale”.+ 29 “Mahiku awo, awo khantthikela-tho ohimya wiira: ‘Axipaapa takhuurale iwuuva soohittokottha, masi anamwane tanisusumeriwa maino’.+ 30 Masi khula mmosa onimookhwa mwaha wa etampi awe. Ole onrowa okhuura iwuuva soonyuunya, yoowo tonrowa osusumeriwa maino awe”.
31 Yehova onihimya wiira: “Mwiiwe! Anoophiya mahiku, kinrowa aka opaka nivarihano na niinaano+ ni atthu a nloko na Isarayeli, vamosa ni atthu a nihimo na Yuda. 32 Nivarihano nlo khaninrowa olikanaka ni nle kaapanke aka ni amuhavinre aya, nihiku kaavarenle aka ntata wiira kaakumihe elapo ya wExiitu,+ ‘nivarihano naka yaahononne aya,+ nnaamwi miyo kaari pwiya aya eekeekhai’. Yehova tonihimya”.
33 Yehova onihimya wiira: “Nla ti nivarihano kinrowa aka opaka ni atthu a nloko na Isarayeli yavira mahiku awo. Kinoohela nlamulo naka mmuupuweloni mwaya,*+ nave kinoolepa vamurimani vaya.+ Miyo kinrowa okhala Muluku aya, nto awo anrowa okhala atthu aka”.+
34 “Khula mutthu khontthikela omwiixuttiha namwaattamanani awe, nave khula mutthu khontthikela omwiixuttiha munnawe oriki: ‘Mmusuwele Yehova!’,+ okhala wiira ootheene aya anookisuwela, okhuma acikhaani mpakha aalupale.+ Kinimwaalevelela soottheka saya, nave nkinrowa-tho wuupuwela itampi saya”.+ Yehova tonihimya.
35 Yehova, yoowo oniiriha nsuwa waarya othana,
Yoowo onikumiherya malamulo wiira mweeri ni itheneeri saaryeke ohiyu.
Ti yoowo onittikinya ephareya ni oniiriha mawimpi aya onyakula,
Yoowo nsina nawe nri Yehova a anakhotto,+
Onihimya wiira:
36 “‘Ntoko siisaale malamulo ala anivareliwa aya muteko okathi wootheene,
‘Siiso-tho osuulu wa Isarayeli onrowa okhalaka nloko nri ohoolo waka okathi wootheene’.+ Yehova tonihimya”.
37 Etthu onihimya awe Yehova, tiila: “‘Vaakhanle wiira erimu enniweryaneya ophimmwa ni alisenso ari vathi va elapo anniweryaneya wooniwa, weeso miyo kaamukhootta osuulu wootheene wa Isarayeli mwaha wa itthu sootheene apanke aya’. Yehova tonihimya”.+
38 Yehova onihimya wiira: “Mwiiwe! Anoophiya mahiku, enrowa aya otekiwa epooma+ ya Yehova, okhuma Empa Yoorakamela Osulu ya Hananeli+ mpakha Vamukhora wa Vakantu.+ 39 Nave mukhoyi woophima+ onimookoliwa mpakha opuro woorakamela osulu wa oGarebi, nave onrowa orukunuwela oGowa. 40 Mapuro ootheene oowaataleya siniriheliwa mirutthu ni ettuurwa, ni mapuro ootheene oorakamela osulu mpakha oxepani wa oKeduroni,+ orowa mpakha vakantu va Mukhora wa Ikhavalo,+ wa mpantta onikela nsuwa, sinrowa okhala itthu soowaarya para Yehova.+ Epooma eyo khentthikela-tho opheliwa nnakhala opwetexiwa”.
32 Eyaakha ya namuloko ya Sedekiya, mwene a oYuda, eyo piiyo, eyaakha ya namuloko ni thanu ni tthaaru ya Nabukodonosori,*+ Yeremiya aahisuwelihiwa moolumo a Yehova. 2 Okathi ole, anakhotto a mwene a oBabiloonia yaahirukurerya oYerusalemu, nave profeta Yeremiya aahiipitha Vanivateni va Makwarta,+ empa* ya mwene a oYuda. 3 Sedekiya mwene a oYuda, aahimuleela Yeremiya+ oriki: “Xeeni munlaleya anyu eprofesia ntoko ela? Nyuwo munihimya wiira: ‘Etthu onihimya awe Yehova, tiila: “Kinoovahererya epooma ela mmatatani mwa mwene a oBabiloonia, nto owo onrowa okuxa,+ 4 nave Sedekiya, mwene a oYuda, khonrowa woopowa mmatatani mwa atthu a oKhaldeya okhala wiira owo onoovahereriwa mmatatani mwa mwene a oBabiloonia, nto owo onoolavula nuuwo owehanaka niitho nniitho”’.+ 5 Yehova onihimya wiira: ‘Mwene a oBabiloonia onoomukuxa Sedekiya omuroihaka oBabiloonia, nto owo onrowa okhalaka weiwo mpakha miyo omuupuwela. Hata mmakelaka owana ni atthu a oKhaldeya, itthu khasinrowa oweettelani saana’”.+
6 Yeremiya aahihimya wiira: “Yehova ookisuweliha moolumo awe oriki: 7 ‘Hanameli mwaana a tiiyu anyu Xalumi, onimoorwa okumana ni nyuwo ni onimooleelani wiira: “Muthume ematta aka eri wAnatothi,+ okhala wiira ti nyuwo murina etireitu ya woopola”’”.+
8 Siiso Hanameli, mwaana a tiiyu aka Xalumi, aahirowa okumana ni miyo vanivateni va makwarta ntoko Yehova aahimmye awe, onakileela wiira: “Xontte, muthume ematta aka eri wAnatothi, elapo ya Beniyamini, okhala wiira ti nyuwo murina etireitu yoothuma ni ya woopola. Muthume wiira ekhale yawinyu”. Nto kaahisuwela wiira ale yaari moolumo a Yehova.
9 Miyo kaahithuma ematta ya wAnatothi ni Hanameli, mwaana a tiiyu aka. Nto kaahiphima musurukhu,+ ixeekele* 7 ni musurukhu wa eparatha 10 maluku ene. 10 Nuumala-vo, kaahilepa ekarta,+ kihela eseelu, kiwiihana anamoona+ ni kiphima musurukhu mpalansani. 11 Kaahikuxa ekarta yeeyo kaathumanne aka yaaheliwe eseelu, etthariwaka yooruma ni nlamulo, vamosa ni ele yahaaheliwe eseelu, 12 kinvahererya Baruki,+ mwaana a Neriya,+ mwaana a Mahaseya, ekarta eyo yoothumana ohoolo wa Hanameli, mwaana a tiiyu aka, ni ohoolo wa anamoona yaawo yaasinanri ekarta eyo yoothumana, vamosa ni ayuda ootheene yaakilanthi Vanivateni va Makwarta.+
13 Nuumala-vo, kaahimuruma Baruki, ohoolo wa atthu ootheene kiiraka: 14 “Etthu onihimya awe Yehova a anakhotto, Muluku a Isarayeli, tiila: ‘Mukuxe ikarta iya, eyo piiyo, ekarta ela yoothumana erina eseelu ni ela ehirina eseelu, mpwehe nvaasuni mwa oloko, wiira sikhale okathi munceene’. 15 Etthu onihimya awe Yehova a anakhotto, Muluku a Isarayeli, tiila: ‘Elapo ela sinootthikela-tho othummwa ipa, imatta ni imatta sa ewuuva’”.+
16 Nuumala onvahererya Baruki mwaana a Neriya, etukumento ya othumana, kaahinvekela Yehova, kiiraka: 17 “Khoo Pwiya Muulupalexa Yehova! Nyuwo moopaka erimu ni elapo ni owerya wanyu wuulupale+ ni ntata nanyu noowerya. Khiivo etthu muhiniwerya anyu. 18 Nyuwo munniwooniherya ophenta woororomeleya atthu anceene, masi munniwiiriha anamwane oliverya soottheka sa axipaapa aya.+ Nyuwo mwa Muluku eekeekhai, Muluku a ikuru, Muluku Muulupalexa ni Oowerya, yoowo nsina nawe nri Yehova a anakhotto. 19 Miruku sanyu ti suulupalexa* ni miteko sanyu ti sooweerya.+ Maitho anyu anniwehaweha iphiro sootheene sa atthu,+ wiira mmulive khula mutthu muttharaka iphiro sawe ni muttharaka miteko sawe.+ 20 Nyuwo moopaka miteko sootikiniha ni miiriirya elapo ya wExiitu, seiyo sinisuweliwa mpakha olelo-va. Nave muhiiriha nsina nanyu okhala noovuwa wIsarayeli ni eriyari ya apinaatamu,+ ntoko siri aya olelo-va. 21 Nyuwo muhaakumiha atthu anyu aisarayeli elapo ya wExiitu ni ithoonyeryo, miiriirya, ntata nanyu noowerya, moono anyu wa ikuru ni miteko sanyu sootikiniha.+
22 “Nuuvira okathi, nyuwo muhaavaha elapo ela mwaalaphenle anyu waavaha amuhavinre aya,+ elapo yeeyo yoowaatta eleeti ni oravo.+ 23 Awo yaahikela ni yaahikuxa elapo ela, masi khiyiiwelenle moolumo anyu nnakhala khiyeettenle nlamulo nanyu. Awo khiyaapanke etthu mwaarumme anyu, tivo mwaakumihenrye anyu ehasara ela yootheene.+ 24 Mwiiwe! Atthu animoorwa epooma ela+ ni anooteka mapuro oottukhuwa wiira arukurerye ni akuxe epooma ela. Mwaha wa espaata,*+ etala ni eretta,+ epooma ela enoovahereriwa mmatatani mwa atthu a oKhaldeya yaawo aniwana ni atthu a epooma ela. Itthu sootheene muhimmye anyu sihiiraneya, ntoko nnoona ahu vano. 25 Masi nyuwo, Pwiya Muulupalexa Yehova, mookileela wiira kithume ematta ni musurukhu ni kiwiihane anamoona, nnaamwi elapo ela erowaka ovahereriwa mmatatani mwa atthu a oKhaldeya”.
26 Siiso, Yeremiya aahisuwelihiwa moolumo a Yehova, yaahimya wiira: 27 “Miyo ka Yehova, Muluku a apinaatamu ootheene. Kiireke yookhala etthu kihiniwerya aka opaka? 28 Etthu onihimya awe Yehova, tiila: ‘Miyo kinnivahererya epooma ela mmatatani mwa atthu a oKhaldeya ni mmatatani mwa mwene Nabukodonosori* a oBabiloonia, nto owo onookuxa epooma ela.+ 29 Atthu a oKhaldeya yaawo aniwana ni atthu a epooma ela animoorwa ni anoopattiha epooma ela.+ Nto anoopaha epooma ela vamosa ni ipa seiyo vasulu vaya atthu aninvaha aya mukuttho Bayaali ni anaamwarexela aya soovaha siniwuriwa, amuluku akina wiira akiveehe’.+
30 “Yehova onihimya wiira: ‘Atthu a wIsarayeli ni atthu a oYuda anipaka paahi itthu sootakhala vamaithoni vaka okhuma omiravo aya.+ Atthu a wIsarayeli animakela okiveeha ni miteko sinivara aya. 31 Epooma ela, okhuma nihiku etekiwe aya mpakha olelo-va, ennikiiriha onanariwa ni oviruwa,+ tivo enrowa aya omala-malihiwa ohoolo waka,+ 32 mwaha wa itthu sootheene sootakhala atthu a wIsarayeli ni atthu a oYuda anipaka aya wiira akiveehe, eyo piiyo, awo, mamwene aya,+ makhulupale aya,+ anamukuttho aya, maprofeta aya+ ni alopwana a oYuda ni atthu anikhala oYerusalemu. 33 Awo animakela okirukunuwela, ohiya okiweha owiitho.+ Hata keerenrye ene owiixuttiha ikwaha sinceene, khuuvo a yaawo aakiwiriyanne wiira eemererye ottaruxiwa.+ 34 Awo yaahipweha ilatarato soohiirya empa yaarina nsina naka, wiira ahonone empa eyo.+ 35 Nave-tho, awo aateka mapuro oorakamela osulu a Bayaali oxepani wa Mwaana a Hinomi,*+ wiira yaapaheke vamooroni anaaya axilopwana ni anaaya axithiyana ampaheryaka Moloki.+ Awo aapaka etthu eyo yoohiirya kihitonko aka waaruma+ nnakhala kihitonko aka wuupuwela vamurimani vaka, emwiirihaka Yuda ottheka’.
36 “Masi etthu onihimya awe Yehova, Muluku a Isarayeli, ohimyaka epooma ela yeeyo munihimya anyu wiira enoovahereriwa mmatatani mwa mwene a oBabiloonia ni espaata, etala ni eretta, tiila: 37 ‘Miyo kinimwaathukumanya okhuma ilapo sootheene kaamwara-mwanrye aka mwaha wa onanariwa waka, oviruwa waka ni otikinihiwa waka wuulupale,+ nave kinimwaattikiherya opuro ola ni kinimwaahiya akhalaka ni murettele.+ 38 Nto awo anrowa okhala atthu aka, nave miyo kinrowa okhala Muluku aya.+ 39 Miyo kinimwaavaha murima mmosa-ru+ ni ephiro emosa-ru wiira okathi wootheene akittittimiheke vanceene,* yiirelaka mureerelo aya ni mureerelo wa anaaya anrowa oyariwaka.+ 40 Vano kinoopaka naawo nivarihano nihinimala,+ wiira kihihiye owiirela itthu sooreera.+ Kinoowiiriha okittittimiha vanceene* vamurimani vaya, wiira ahihiye okitthara.+ 41 Kinoohakalala owiirela itthu sooreera,+ nave kinoowiiriha okhala voohimala elapo ela,+ ni murima aka wootheene ni okumi aka wootheene’”.
42 “Etthu onihimya awe Yehova, tiila: ‘Ntoko siisaale kaaruuhenle aka atthu ala ehasara ela yootheene yuulupale, siiso-tho kinoowiirela itthu sootheene sooreera kinaaleiherya aka.+ 43 Elapo ela+ enootthikela-tho othummwa imatta, nnaamwi muhimyaka wiira: “Elapo ela khenikhaliwa, kherina atthu nnakhala inama, nave yoovahereriwa mmatatani mwa atthu a oKhaldeya”’.
44 “Yehova onihimya wiira: ‘Imatta sinootthikela othummwa ni musurukhu, sinoolempwa ikarta soothumana ni sinooheliwa iseelu. Nave animwiihaniwa anamoona a elapo ya oBeniyamini,+ mittetthe soowaattamela oYerusalemu, ipooma sa oYuda,+ ipooma sa muttetthe wa omiyaakoni, ipooma sa mapuro oowaataleya+ ni ipooma sa osuuli, okhala wiira kinimwaattikiha atthu aya weepotthani’”.+
33 Yeremiya aahisuwelihiwa moolumo a Yehova ekwaha ya nenli, nlelo otthukweliwe ene Vanivateni va Makwarta,+ yaahimya wiira: 2 “Etthu onihimya awe Yehova, Yehova yoowo opanke elapo ni olipinhe, nave nsina nawe nri Yehova, tiila: 3 ‘Mukiihane, nto miyo kinoowaakhulani ni kinimooleelani itthu suulupale ni sootikiniha muhinisuwela anyu’”.+
4 “Etthu onihimya awe Yehova, Muluku a Isarayeli, ohimyaka ipa sa epooma ela ni ipa sa mamwene a oYuda, seiyo sinipwexakasiwa wiira saakiherye ikaruma sa ikhotto ni espaata.*+ 5 Nave aahimyaka ale anirwa owana ni atthu a oKhaldeya, asarihaka opuro ola ni mirutthu sa atthu kiwiivale aka mwaha wa onanariwa waka ni oviruwa waka, yaawo otakhala waya okiirinhe aya orukunuwela epooma ela, tiila: 6 ‘Kinimwaaloola ni kinimwaavaha ekumi.+ Kinimwaapenuxa ni kinimwaavaha murettele munceene ni ekeekhai.+ 7 Kinimwaattikiha atthu a oYuda ni atthu a Isarayeli yaaroihiwe weepotthani.+ Nave kinimwaalipiha ntoko kiirale aka woopaceryani.+ 8 Kinimwaareeriha mulattu aya wootheene mwaha wa itampi saya aakiirenle aya.+ Kinimwaalevelela mulattu aya wootheene mwaha wa itampi ni soottheka saya akiirenle aya.+ 9 Nave atthu a maloko ootheene a mulaponi anrowa wiiwa itthu sootheene sooreera kiwiirenle aka atthu aka, anookittottopela, anookivuwiha, anookihakalaliha ni anookittittimiha.+ Awo anooxanka ni anoothukumela+ mwaha wa itthu sootheene sooreera kinrowa aka ovaha epooma ela’”.+
10 “Etthu onihimya awe Yehova, tiila: ‘Nyuwo munnihimya wiira opuro ola khonikhaliwa, khorina atthu nnakhala mihuwo, nave ipooma sa oYuda ni istaraata sa oYerusalemu khasiniviriwa ni khakhanle atthu nnakhala inama. Masi kinoohimeeryani wiira atthu anootthikela-tho owiriyana 11 okhuwela woohakalala ni otteeliwa murima,+ nsu na noivu ni na noiva, nsu na atthu anihimya wiira: “Mmuxukhureleke Yehova a anakhotto, okhala wiira Yehova tooreera murima.+ Ophenta wawe woororomeleya onikhala mahiku ootheene!”’+
“Yehova onihimya wiira: ‘Awo anooruuha soovaha sooxukhurela mpaani mwa Yehova,+ okhala wiira kinimwaattikiherya elapo ela atthu yaaroihiwe weepotthani, ntoko woopaceryani’”.
12 “Etthu onihimya awe Yehova a anakhotto, tiila: ‘Opuro ola ohinikhaliwa, ohikhanle atthu nnakhala inama ni ipooma saya sootheene, onootthikela okhala mapuro anilyihiwa inama wiira amakampusi yaphumuriheke inama saya’.+
13 “Yehova onihimya wiira: ‘Ipooma sa muttetthe wa omiyaakoni, ipooma sa mapuro oowaataleya, ipooma sa osuuli, elapo ya oBeniyamini, mittetthe soowaattamela sa oYerusalemu+ ni ipooma sa oYuda,+ amakampusi anootthikela okontari ipwittipwitthi saya’”.
14 “Yehova onihimya wiira: ‘Mwiiwe! Anoophiya mahiku kinrowa aka omaleliha itthu sooreera kaaleihenrye aka atthu a nloko na Isarayeli ni atthu a nihimo na Yuda.+ 15 Mahiku awo ni okathi owo kinimwiiriha ophuwa etthu ya xariya para Davidi,+ nto owo onimwaakiherya exariya ni ororomeleya elapo ela.+ 16 Mahiku awo, Yuda onimoopowa,+ nave Yerusalemu onookhala ni murettele.+ Epooma eyo enrowa wiihaniwaka nsina noowi: Yehova Tori Exariya Ahu’”.+
17 “Etthu onihimya awe Yehova, tiila: ‘Okathi wootheene, osuulu wa Davidi onrowa okilaathiki veehiceni wa atthu a Isarayeli,+ 18 nave okathi wootheene, anamukuttho alevi anrowa weemelaka ohoolo waka wiira avaheke soovaha para opahiwa, soovaha sa ipyo ni mikuttho sikina’”.
19 Yeremiya aahisuwelihiwa-tho moolumo a Yehova, yaahimya wiira: 20 “Etthu onihimya awe Yehova, tiila: ‘Mwaawerya ohonona nivarihano naka na othana ni nivarihano naka na ohiyu, wiira ohikhumeleleke othana ni ohiyu okathi wooreerela,+ 21 siiso mwanwerya ohonona nivarihano naka kipanke aka ni murumeyi aka Davidi,+ wiira ohikhalane mwaana mwaamulopwana aarowa olamulelaka ntoko mwene veehiceni vawe.+ Nave-tho, siiso mwanwerya ohonona nivarihano naka kipanke aka ni anamukuttho alevi, yaawo ari arumeyi aka.+ 22 Ntoko siisaale itheneeri sa wiirimu sihiniweryaneya aya okontariwa ni mihaava sa ophareya sihiniphimmwa aya, siiso-tho kinimuncererya osuulu wa murumeyi aka Davidi ni alevi yaawo anikivarela muteko’”.
23 Yeremiya aahisuwelihiwa-tho moolumo a Yehova, yaahimya wiira: 24 “Khamwiiwale etthu anihimya aya atthu ala, yiiraka: ‘Yehova onookhootta imusi piili aathanlale awe’? Nave awo khanaattittimiha atthu aka ni khaniwoona-tho ntoko nloko.
25 “Etthu onihimya awe Yehova, tiila: ‘Ntoko siisaale kipanke aka nivarihano na othana ni na ohiyu,+ malamulo a erimu ni a elapo,+ 26 siiso-tho nkinikhala-khala kikhoottaka osuulu wa Yakobe ni wa murumeyi aka Davidi. Nto nkinrowa ohiya waathanla anamalamulela a osuulu wa Davidi wiira alamuleleke osuulu wa Abrahamu, Isaakhi ni Yakobe. Mweekeekhai, kinimwaattikiha atthu awe aroihiwe weepotthani+ ni kinoowoonela othunku’”.+
34 Yeremiya aahisuwelihiwa moolumo a Yehova, okathi Nabukodonosori* mwene a oBabiloonia, anakhotto awe ootheene, omwene wootheene wa ilapo aahoolela awe ni atthu ootheene yaawana aya ni Yerusalemu, ni ipooma sootheene saamurukurenrye. Moolumo ene aasuwelihiwe awe taala:+
2 “Etthu onihimya awe Yehova, Muluku a Isarayeli, tiila: ‘Murowe mwalavule ni Sedekiya,+ mwene a oYuda, mwamuleele wiira: “Etthu onihimya awe Yehova, tiila: ‘Kinnivahererya epooma ela mmatatani mwa mwene a oBabiloonia, nto owo onoopaha ni mooro.+ 3 Nyuwo khamunrowa woopowa mmatatani mwawe, okhala wiira munookuxiwa ni munoovahereriwa wa yoowo.+ Nave nyuwo munoowehana ni mwene a oBabiloonia niitho nniitho, nto owo onoowehana ni nyuwo nwehanaka owiitho, nave munooroihiwa oBabiloonia’.+ 4 Masi, nyuwo mwene Sedekiya a oYuda, mwiiwe moolumo a Yehova: ‘Etthu onihimya awe Yehova oohimyakani nyuwo, tiila: “Khamunrowa wiiviwa ni espaata.* 5 Nyuwo munimookhwa ni murettele,+ nave omasikhoni wanyu onoopattihiwa mooro munceene, ntoko siiraneya aya ni axipaapa anyu, mamwene yaawo yaakhanle muhinatthi nyuwo. Atthu anoowunlelani yiiraka: ‘Maai pwiyaka!’ okhala wiira ‘ti miyo kilavunle moolumo ala’. Yehova tonihimya”’”’”.
6 Profeta Yeremiya aahimuleela moolumo ala ootheene Sedekiya mwene a oYuda, oYerusalemu, 7 okathi anakhotto a mwene a oBabiloonia yaawana aya ni Yerusalemu, ni yaawana aya ipooma sootheene saahanle sa oYuda,+ eyo piiyo, oLakixi+ ni wAzeka.+ Iya saari ipooma soolipihiwa saahanle, eriyari ya ipooma sa oYuda.
8 Yeremiya aahisuwelihiwa moolumo a Yehova, nuumala mwene Sedekiya opaka nivarihano ni atthu ootheene a oYerusalemu, wiira olaleye otaphuwa waya.+ 9 Atthu ootheene yaahaana waataphula ale yaakhanle ipottha, eyo piiyo, aheeperi, alopwana ni athiyana, wiira ohikhale muyuda nlelo aarowa ohala ori ene weepotthani. 10 Makhulupale ootheene ni atthu ootheene yaahiiwelela. Awo yaaheemererya nivarihano nle wiira atthu ootheene yaahaana waataphula alopwana ni athiyana yaawo yaari ipottha, ni ohitthikela-tho waakhaliha ipottha. Awo yaahiiwelela ni yaahaahiya arowaka. 11 Masi muhoolo mwaya yaahaattikiha alopwana ni athiyana yaataphunle aya, nave yaahaakhanyereriha-tho okhala ipottha. 12 Yehova aahimusuweliha Yeremiya moolumo a Yehova yaahimya wiira:
13 “Etthu onihimya awe Yehova, Muluku a Isarayeli, tiila: ‘Miyo koopaka nivarihano ni amuhavinre anyu+ nihiku kaakuminhe aka elapo ya wExiitu, weiwo yaari aya ipottha,+ kiiraka: 14 “Samala iyaakha 7, khula mmosa a nyuwo ohaana omutaphula munnawe muheeperi, yoowo mwaatumiheriwe anyu ni oovarelani muteko iyaakha 6. Muhaana omutaphula”.+ Masi amuhavinre anyu khiyaakiwiriyanne nnakhala khiyaavanhe ephoole. 15 Okathi vakhaani ovinre,* nyuwo mwaahirukunuxa murima mwaahipaka etthu yooloka vamaithoni vaka, mulaleyaka otaphuliwa wa akhwiinyu. Moopaka nivarihano ohoolo waka, empa yeeyo erina nsina naka. 16 Masi mwaahirukunuxa murima anyu ni mwaahiveeha nsina naka,+ muttikihaka ipottha sanyu soolopwana ni soothiyana seiyo mwaataphunle anyu, ntoko saaphavela aya. Nave mwaahaakhanyererya-tho okhala ipottha’.
17 “Tivonto, etthu onihimya awe Yehova, tiila: ‘Nyuwo khamukiiwelenle maana khula mutthu kholalenye otaphuwa wa munnawe ni wa mukhwaawe.+ Yehova onihimya wiira: ‘Kinimootaphulani wiira mwiiviwe ni espaata, eretta ni etala,+ nave kinimwiiriha omwene wootheene wa mulaponi woova mwaha wa nyuwo.+ 18 Etthu enrowa owiiraneela alopwana ahononne nivarihano naka, aheettelaka moolumo a nivarihano yaapanke aya ohoolo waka, okathi yaakawanne aya ipetaaso piili sa epooyi yaamukhaani ni avira eriyari aya,+ 19 eyo piiyo, makhulupale a oYuda, makhulupale a oYerusalemu, makhulupale a opalaasio, anamukuttho ni atthu ootheene a elapo ela, avinre eriyari ya ipetaaso iyo piili sa epooyi, tiila: 20 Kinimwaavahererya mmatatani mwa awanani aya ni ale aniphavela owiiva, nave mirutthu saya sinrowa okhala yoolya ya axipalame a musulu ni inama sa vathi.+ 21 Nave kinonvahererya Sedekiya mwene a oYuda ni makhulupale awe mmatatani mwa awanani aya, mmatatani mwa ale aniphavela omwiiva, ni mmatatani mwa anakhotto a mwene a oBabiloonia,+ yaawo anikhuma opuro yoorukurenryaayani’.+
22 “Yehova onihimya wiira: ‘Miyo kinimwaaruma ni kinimwaattikiherya anakhotto epooma ela, nto awo anoowana ni atthu a epooma ela, anookuxa epooma ela ni anoopaha ni mooro.+ Kinimwiiriha epooma ela ya oYuda okhala milepe* ni ohikhala mutthu’”.+
35 Yeremiya aahisuwelihiwa moolumo a Yehova mahiku a Yoyakiimi+ mwaana a Yosiya, mwene a oYuda, yaahimya wiira: 2 “Murowe etthoko ya arekabi,+ mwalavule naawo ni mwaaruuhe mpaani mwa Yehova, osaala onilyiwa. Nuumala-vo mwaavahe eviinyu wiira awurye”.
3 Nto kaahimukuxa Yaazaniya mwaana a Yeremiya, mwaana a Habasiniya, vamosa ni axinnawe, anaawe ootheene ni atthu ootheene a etthoko ya Rekabi, 4 kaaroiha empa ya Yehova. Kaahaakeliha esaala enilyiwa ya anamwane a Hanani, mwaana a Igidaliya, mulopwana a Muluku eekeekhai. Esaala eyo yaattamanne ni esaala ya makhulupale yeeyo yaakhala osulu wa esaala enilyiwa ya Maaseya, mwaana a kwarta a vamukhora a Xalumi. 5 Vano kaahikuxa ikoopho ni ikaalisi sa eweero kisariha eviinyu kipweha ohoolo wa alopwana a etthoko ya arekabi, kaaleela wiira: “Nwuryeke eviinyu ela”.
6 Masi awo yaahihimya wiira: “Hiyo khaninwurya eviinyu ela, okhala wiira Yonadabi+ mwaana a Rekabi, muhavinre ahu, aahiniruma wiira: ‘Nyuwo nnakhala aniinyu muhiwuryeke eviinyu. 7 Nave muhiteke empa, muhaale epyo, wala muhiphatteye mwiri nnakhala muhikhalane ematta ya ewuuva. Ohiya-vo, okathi wootheene mukhaleke mutentani,* wiira mukhaleke mahiku manceene elapo munikhala anyu ntoko anamurwa’. 8 Tivo hiyo khaninhiya wiiwelela moolumo ootheene Yonadabi mwaana a muhavinre ahu Rekabi onirummye awe. Nto hiyo, axaarihu, aniihu axilopwana ni axithiyana, khaninkhala-khala niwuryaka eviinyu hata vakhaani. 9 Nave khaninteka ipa wiira nikhaleke, nnakhala khanrina imatta sa ewuuva aahiiso imatta wala ipyo. 10 Hiyo nlelo ninkhala mutentani, nave ninniiwelela itthu sootheene Yonadabi muhavinre ahu, onirummye awe. 11 Masi okathi mwene Nabukodonosori a oBabiloonia aarwaale awe otuphela elapo ahu,+ naahihimya wiira: ‘Nrowe oYerusalemu wiira naatthyawe anakhotto a oKhaldeya ni a oSiiria’. Tivo ninkhala ahu oYerusalemu”.
12 Yeremiya aahisuwelihiwa moolumo a Yehova, yaahimya wiira: 13 “Etthu onihimya awe Yehova a anakhotto, Muluku a Isarayeli, tiila: ‘Murowe mwaaleele alopwana a oYuda ni atthu anikhala oYerusalemu wiira: “Kiireke khimwaamakela otumereriwa wiiwelela moolumo aka?”+ Yehova tonihimya. 14 “Yonadabi mwaana a Rekabi aahaaruma atthu a osuulu awe wiira ahiwuryeke eviinyu, nto awo anniiwelela moolumo awe ahiwuryaka eviinyu mpakha olelo-va. Siiso anniiwelela yooruma ya muhavinre aya.+ Vano, miyo koolavula ni nyuwo ikwaha sinceene, masi nyuwo khamukiiwelenle.+ 15 Nave miyo kaamakela wooruuhelani arumeyi aka ootheene maprofeta, kooruuhelakani ikwaha sinceene,+ yiiraka: ‘Xontte, khula mmosa a nyuwo ohiye iphiro sawe sootakhala,+ nave opakeke itthu sooreera! Muhaatthareke amuluku akina nave muhaarumeeleke yaawo. Mwiira siiso munrowa okhalaka elapo koovanhaakani nyuwo ni amuhavinre anyu’.+ Masi nyuwo khimwaakivanhe ephoole nnakhala khimwaakiwiriyanne. 16 Osuulu wa Yonadabi mwaana a Rekabi, ahiiwelela yooruma avahiwe aya ni muhavinre aya,+ masi atthu ala khakiwiriyanne”’”.
17 “Tivo, etthu onihimya awe Yehova, Muluku a anakhotto, Muluku a Isarayeli, tiila: ‘Kinimwaaruuhela ihasara sootheene kaaloponle aka atthu a oYuda ni atthu anikhala oYerusalemu, okhala wiira kaahilavula naawo,+ masi awo khiyaakiwiriyanne, nave kaamakela owiihana, masi awo khiyaakaakhunle’”.+
18 Vano Yeremiya aahaahimeerya atthu a osuulu wa arekabi wiira: “Etthu onihimya awe Yehova a anakhotto, Muluku a Isarayeli, tiila: ‘Mwaha wa wiiwelela yooruma ya muhavinre anyu Yonadabi ni ohihiya weettela itthu sootheene oorummyaaweni, mwiiraka siisaale ene oorummyaaweni, 19 nto Yehova a anakhotto, Muluku a Isarayeli, onihimya wiira: “Okathi wootheene onookhalaka mutthu a osuulu wa Yonadabi, mwaana a Rekabi, ovaraka muteko ohoolo waka”’”.
36 Eyaakha ya neexexe ya Yoyakiimi+ mwaana a Yosiya, mwene a oYuda, Yeremiya aahisuwelihiwa moolumo a Yehova, yaahimya wiira: 2 “Mukuxe eroolu ni mulepe moolumo ootheene koohimenryaakani, anaahimya atthu a Isarayeli, atthu a oYuda+ ni maloko ootheene,+ okhuma nihiku noopacerya kilavunle aka ni nyuwo mahiku a Yosiya mpakha olelo-va.+ 3 Nnaamwi atthu ala a etthoko ya Yuda yaiwale ihasara sootheene kaahimmye aka wiira kaamwaakumiherya, awo khiyaahiyale iphiro saya sootakhala, wiira kaalevelele yoottheka aya ni etampi aya”.+
4 Vano Yeremiya aahimwiihana Baruki,+ mwaana a Neriya, nto Yeremiya aahimuleela moolumo ootheene Yehova aamuhimenrye awe. Vano Baruki aahilepa moolumo awo murooluni.*+ 5 Yeremiya aahimuruma Baruki iiraka: “Miyo kookhoottiheriwa okela mpaani mwa Yehova. 6 Tivo nyuwo muhaana okela mpaani mwa Yehova ni osoma moowiiwanyeya moolumo awe koorummyaakani olepa murooluni. Mwasomeke moolumo awo nwiriyaniwaka ni atthu anrowa okhala empa ya Yehova nihiku nootthukwa. Siiso munoosoma moolumo awo ohoolo wa atthu ootheene a oYuda anrowa okhumaka ipooma saya. 7 Woonasa wene, Yehova onimwiiwa oxonttela waya, nave awo anoorukunuwa, khula mutthu ohiyaka iphiro sawe sootakhala, okhala wiira onanariwa ni oviruwa wa Yehova mwaha wa atthu ala ti wuulupale”.
8 Siiso Baruki mwaana a Neriya aahipaka itthu sootheene profeta Yeremiya aamurumme awe. Owo aahisoma voowiiwanyeya eroolu* ya moolumo a Yehova mpaani mwa Yehova.+
9 Vano eyaakha ya neethanu ya Yoyakiimi+ mwaana a Yosiya, mwene a oYuda, mweeri wa neethanu neexexe, atthu ootheene a oYerusalemu ni atthu ootheene yaarwaale oYerusalemu akhumaka ipooma sa oYuda, yaahaaruma atthu ootheene wiira atthukwe ohoolo wa Yehova.+ 10 Nto Baruki aahisoma voowiiwanyeya eroolu ya moolumo a Yeremiya mpaani mwa Yehova, esaala ya Gemariya,+ mwaana a mulipa-oolepa Xafani,+ vanivateni nuulupale, vamukhora wa niinaano wa empa ya Yehova,+ owiriyaniwaka ni atthu ootheene.
11 Okathi Mikaya mwaana a Gemariya mwaana a Xafani aiwale awe moolumo ootheene a Yehova yaari murooluni mme, 12 aahirowa empa ya mwene, esaala ya masekretaario.* Makhulupale ootheene yaakilanthi weiwo. Makhulupale ene taala: Sekretaario Elixama,+ Delaya mwaana a Xemaya, Elinataani+ mwaana a Akibori,+ Gemariya mwaana a Xafani, Sedekiya mwaana a Hananiya, ni makhulupale makina. 13 Nto Mikaya aahaaleela moolumo ootheene aiwale awe okathi Baruki aasoma awe eroolu* owiriyaniwaka ni atthu.
14 Vano makhulupale ootheene yaahimuruma Yehudi mwaana a Netaniya mwaana a Xelemiya mwaana a Kuxi orowa omuleela Baruki wiira: “Murwe, muruuhe eroolu musomme anyu nwiriyaniwaka ni atthu”. Baruki mwaana a Neriya aahikuxa eroolu eyo, onarowa vaari aya. 15 Awo yaahimuhimeerya wiira: “Xontte, mukilaathi ni munisomele eroolu eyo voowiiwanyeya”. Nto Baruki aahaasomela eroolu eyo.
16 Nuumala wiiwa moolumo ale ootheene, awo yaahiwehana mukina ni mukhwaawe athukumelaka, nave yaahimuleela Baruki wiira: “Tthiri nihaana omuleela mwene moolumo ala ootheene”. 17 Vano awo yaahimukoha Baruki wiira: “Xontte, munileele, nwenrye sai olepa moolumo ala ootheene? Niireke Yeremiya toolenleni olepa itthu iya sootheene?” 18 Baruki aahiwaakhula wiira: “Owo taakileela moolumo ala ootheene, nto miyo kinalepa ni etinta murooluni-mu. 19 Makhulupale yaahimuleela Baruki wiira: “Murowe mwaipithe, nyuwo vamosa ni Yeremiya, nave ohikhale onisuwela opuro mwiipinthe anyu”.+
20 Nuumala-vo, awo yaahirowa wa mwene, vanivateni, apweha eroolu esaala ya sekretaario Elixama, nave amuleela mwene itthu sootheene yaiwale aya.
21 Nto mwene aahimuruma Yehudi+ orowa okuxa eroolu eyo, nto owo aahikuxa eroolu eyo yaari esaala ya sekretaario Elixama. Yehudi aahipacerya osoma eroolu eyo owiriyaniwaka ni mwene ni makhulupale ootheene yeemenle vakhiviru ni mwene. 22 Mwene iira okilanthi ene empa aakhala awe okathi wa eyiita, mweeri wa neethanu neexexe, ooraka mooro waapattihiwe. 23 Okathi Yehudi aamaliha awe osoma ipantta tthaaru aahiiso xexe sa iroolu iyo, mwene aanithikila ipantta iyo ni mwaalo wa sekretaario,* onarihela vamooroni, mpakha eroolu yootheene ovya vamooroni . 24 Mwene ni arumeyi awe ootheene yaahiiwa moolumo ale ootheene, masi khiyoovale etthu nnakhala khiyaakhenre malaya aya. 25 Nnaamwi Elinataani,+ Delaya+ ni Gemariya+ yaamuxonttenle mwene wiira ohipahe eroolu eyo, owo khaawiriyanne. 26 Nave-tho, mwene aahimuruma Yerameyeli mwaana a mwene, Seraya mwaana a Aziriyeli ni Xelemiya mwaana a Abideyeli wiira yanvare sekretaario Baruki ni profeta Yeremiya, masi Yehova aahiwiipithiha.+
27 Nuumala mwene opaha eroolu eyo yaarina moolumo Baruki aalempe awe oleeliwaka ni Yeremiya, Yeremiya aahisuwelihiwa-tho moolumo a Yehova+ yaahimya wiira: 28 “Mukuxe eroolu ekina mulepe moolumo ootheene yaari eroolu yoopacerya, yeeyo mwene Yoyakiimi a oYuda opanhe awe.+ 29 Nave muhaana omuleela-tho mwene Yoyakiimi a oYuda wiira: ‘Etthu onihimya awe Yehova, tiila: “Nyuwo moopaha eroolu ela ni moohimya wiira: ‘Xeeni muhalaka olepa murooluni-mmo wiira: “Tthiri mwene a oBabiloonia onimoorwa ni onoopwetexa elapo ela, nave onimwaamala-maliha atthu ni inama”?’+ 30 Etthu onihimya awe Yehova omuhimyaka Yoyakiimi mwene a oYuda, tiila: ‘Owo khonrowa okhalana osuulu wiira okilaathi veehiceni wa Davidi,+ nave murutthu awe onrowa ohiiwa opuro wooviha othana ni opuro wooriirya ohiyu.+ 31 Kinoowiiriha awo, osuulu aya ni arumeyi aya waakhula mwaha wa etampi aya. Nave kinimwaakumiherya awo, atthu anikhala oYerusalemu ni alopwana a oYuda ihasara sootheene kilakenle aka waakumiherya+ mwaha woowi khakiwiriyanne’”’”.+
32 Yeremiya aahirowela eroolu ekina ni aahinvaha sekretaario Baruki,+ mwaana a Neriya. Okathi Yeremiya aalavula awe, Baruki aanilepa murooluni moolumo ootheene a eroolu Yoyakiimi mwene a oYuda aapanhe awe vamooroni.+ Nave yaahincereriwa moolumo manceene yaalikana ni ale oopacerya.
37 Mwene Sedekiya,+ mwaana a Yosiya, aahipacerya olamulela nipuro na Koniyahi+ mwaana a Yoyakiimi, okhala wiira mwene Nabukodonosori* a oBabiloonia aahimukhaliha mwene elapo ya oYuda.+ 2 Masi owo, arumeyi awe ni atthu a elapo ele khiyaawiriyanne moolumo a Yehova yaalavuliwe ni profeta Yeremiya.
3 Vano mwene Sedekiya aahimuruma Yehukali,+ mwaana a Xelemiya, vamosa ni Sefaniya,+ mwaana a namukuttho Maaseya, orowa wa profeta Yeremiya, omuhimeerya wiira: “Xontte, munivekelele Yehova Muluku ahu”. 4 Yeremiya aaneetta mootaphuwa eriyari ya atthu, okhala wiira nlelo khaatthukweliwe mukhatteya.+ 5 Vano, anakhotto a Farawo yaahikhuma wExiitu.+ Okathi atthu a oKhaldeya yaarukurenrye oYerusalemu yaiwale aya ihapari iyo, yaahikhuma oYerusalemu.+ 6 Profeta Yeremiya aahisuwelihiwa-tho moolumo a Yehova, yaahimya wiira: 7 “Etthu onihimya awe Yehova, Muluku a Isarayeli, tiila: ‘Etthu mukhanle anyu oomuleela mwene a oYuda, yoowo oorummeni okikoha, tiila: “Mwiiwe! Anakhotto a Farawo yaawo anirwa wookhaliheryani anootthikela elapo aya, wExiitu.+ 8 Nto atthu a oKhaldeya anootthika, anoowana ni atthu a epooma ela, anookuxa epooma ela ni anoopaha ni mooro”.+ 9 Etthu onihimya awe Yehova, tiila: “Muhiiwoke mmensinyu mwiiraka: ‘Atthu a oKhaldeya anoorowa ni khantthikela-tho onituphela’. Tthiri awo khanrowa. 10 Hata mwaamala-malinhe anakhotto ootheene a oKhaldeya yaawo aniwana ni nyuwo, ahala paahi anakhotto aya oovulala, awo nlelo yaamukhuma mutentani* mwaya ni yampaha epooma ela ni mooro”’”.+
11 Okathi anakhotto a oKhaldeya yaakhumme aya oYerusalemu mwaha wa anakhotto a Farawo,+ 12 Yeremiya aahikhuma oYerusalemu onarowa elapo ya oBeniyamini+ wiira avahiwe epantta awe eriyari ya atthu awe. 13 Masi okathi aaphiyale awe vamukhora wa Beniyamini, mukhulupale aaweherya makwarta, yoowo aihaniwa Iriya mwaana a Xelemiya, mwaana a Hananiya, aahinvara profeta Yeremiya onahimya wiira: “Nyuwo munitthyawela wa anakhotto a oKhaldeya!” 14 Yeremiya aahimwaakhula wiira: “Eyo khahiyo ekeekhai! Miyo nkintthyawela wa anakhotto a oKhaldeya”. Masi Iriya khaamukupanli. Nto Iriya aahinvara Yeremiya onamuroiha wa makhulupale. 15 Makhulupale awo yaahinanariwa vanceene ni Yeremiya,+ nave yaahimmana ni amutthukwela+ empa ya sekretaario Yehonathani, yeeyo yaakhalinhe aya ekhatteya. 16 Yeremiya aahiriheliwa eseela yooriipela yoothimpwa, nto owo aahikhala memmo mahiku manceene.
17 Vano mwene Sedekiya aahiruma oroweliwa Yeremiya, nto mwene aahimukohakoha voohisuweliwa owannyawe.+ Owo aahimukoha wiira: “Niireke Yehova ohooleelani etthu?” Vano Yeremiya aahaakhula oriki: “Aayo!” Nave aahincererya oriki: “Nyuwo munoovahereriwa mmatatani mwa mwene a oBabiloonia!”+
18 Nave-tho Yeremiya aahimukoha mwene Sedekiya oriki: “Kootthekenleni exeeni nyuwo, arumeyi anyu, vamosa ni atthu ala, wiira mukirihele mukhatteya? 19 Ari vai maprofeta anyu anoolaleeryani eprofesia yiiraka: “Mwene a oBabiloonia khonrowa wootuphelani ni otuphela elapo ela’?+ 20 Vano xontte, mukiwiriyane, pwiyaka mwene. Xontte mweemererye etthu kinoovekelaakani. Muhikittikiherye owannyawe sekretaario Yehonathani,+ mwiira siiso kinookhwela weiwo”.+ 21 Vano mwene Sedekiya aahiruma wiira Yeremiya otthukweliwe Vanivateni va Makwarta,+ nave Yeremiya aanivahiwa ephaawu yoovilikeya khula nihiku yaakhuma wa alipa-oowooxa iphaawu+ mpakha iphaawu sootheene omala opooma.+ Nto Yeremiya aahikhala Vanivateni va Makwarta.
38 Vano Xefatiya mwaana a Matani, Gedaliya mwaana a Paxehuri, Yukali+ mwaana a Xelemiya ni Paxehuri+ mwaana a Malikiya, yaahiiwa moolumo Yeremiya aaleela awe atthu ootheene iiraka: 2 “Yehova onihimya wiira: ‘Mutthu yoole onrowa ohala epooma ela onimwiiviwa ni espaata,* etala ni eretta.+ Masi, ole onrowa wiivahererya wa atthu a oKhaldeya, onookhala mukumi. Owo onimoopola okumi awe ni onookhalaka mukumi’.+ 3 Yehova onihimya wiira: ‘Tthiri, epooma ela enoovahereriwa anakhotto a mwene a oBabiloonia, nto owo onookuxa’”.+
4 Makhulupale yaahimuhimeerya mwene wiira: “Xontte, murume wiira mulopwana ola iiviwe,+ okhala wiira ni moolumo ala, owo onnaakhulumula anakhotto ahanle epooma ela ni atthu ootheene. Mulopwana ola khonaaphavelela murettele atthu ala. Masi ola oniphavela waakumiherya maxakha”. 5 Mwene Sedekiya aahaakhula wiira: “Owo ori mmatatani mwanyu, mwene khokhanle oopaka etthu wiira ookhoottiheryeni”.
6 Nto awo yaahinvara Yeremiya amurihela mweehimeni ya Malikiya, mwaana a mwene, yeeyo yaari Vate va Makwarta.+ Awo yaahimutthukwa Yeremiya ni mikhoyi amukuruxela mweehimeni. Ehime eyo khiyaakhanle maasi, masi yaari mattophe. Yeremiya aahipacerya osama mmattopheni-mmo.
7 Ebedi-Meleki+ a wEthiyopia yoowo aari mukhulupale a etthoko ya mwene, aahiiwa wiira Yeremiya ooriheliwa mweehimeni. Mwene iira okilanthi ene vamukhora wa Beniyamini,+ 8 okathi Ebedi-Meleki aakhumme awe mpaani* mwa mwene, onamuleela wiira: 9 “Pwiya aka mwene, etthu alopwana ala amwiirinhe aya profeta Yeremiya ti yootakhala! Awo amurihenle mweehimeni. Owo onimookhwa etala, okhala wiira opooma kekhanle yoolya”.+
10 Nto mwene aahimuruma Ebedi-Meleki a wEthiyopia wiira: “Mwaakuxe alopwana 30 wiira murowe mwamukumihe profeta Yeremiya mweehimeni, owo ohinatthi okhwa”. 11 Ebedi-Meleki aahaakuxa alopwana onarowa mpaani mwa mwene, ekwartu yaari vathi opuro waasukiwa mihakhu.+ Awo yaahikuxa mattapwatta ni ipaanu soowiiswaala, anakhuruwela mweehimeni arumeelaka mikhoyi mpakha opuro aari awe Yeremiya. 12 Moottharelana, Ebedi-Meleki a wEthiyopia aahimuhimeerya Yeremiya wiira: “Muhele mattapwatta awo ni ipaanu iyo mukaphwani mwanyu, nuumala-vo nvirihe mikhoyi”. Nto Yeremiya aahiira siiso. 13 Awo yaahimpurula Yeremiya ni mikhoyi amukumiha mweehimeni. Nto Yeremiya aanikhala Vate va Makwarta.+
14 Mwene Sedekiya aahiruma wiira profeta Yeremiya oroihiwe opuro aari awe, mukhora wa neeraru yoowo waari empa ya Yehova. Nto mwene aahimuhimeerya Yeremiya wiira: “Yookhala kiniphavela aka wookohani, muhikikhuwe etthu”. 15 Nto Yeremiya aahimuleela Sedekiya wiira: “Miyo kooleelani, nyuwo munookiiva. Miyo koovahani miruku, khamunrowa okiwiriyana”. 16 Siiso, mwa mwiitiho mwene Sedekiya aahimulaphela Yeremiya iiraka: “Ntoko siisaale Yehova onikhala awe, yoowo onivanhe okumi, miyo nkinrowa owiivani, nnakhala nkinrowa woovahereryani alopwana ala aniphavela owiivani”.
17 Yeremiya aahimuhimeerya Sedekiya wiira: “Etthu onihimya awe Yehova, Muluku a anakhotto, Muluku a Isarayeli, tiila: ‘Mwaivahererya* wa makhulupale a mwene a oBabiloonia, munookhala mukumi, nave epooma ela khenrowa opahiwa ni mooro. Nyuwo ni atthu a etthoko anyu anookhala akumi.+ 18 Masi mwaahiivahererye wa makhulupale a mwene a oBabiloonia, epooma ela enoovahereriwa atthu a oKhaldeya. Nto awo anoopaha ni mooro,+ nave nyuwo khamunrowa woopowa mmatatani mwaya’”.+
19 Nuumala-vo, mwene Sedekiya aahimuleela Yeremiya wiira: “Kinniwoova ayuda yaawo yiivaherenrye wa atthu a oKhaldeya. Akhala wiira kinoovahereriwa mmatatani mwaya, awo anookiiva”. 20 Masi Yeremiya aahihimya wiira: “Nyuwo khamunrowa ovahereriwa mmatatani mwaya. Xontte, mwiiwelele moolumo a Yehova, mpakaka ele kinooleelaakani, itthu sinooweettelani saana ni munookhalaka mukumi. 21 Masi mwakhootta wiivahererya,* etthu Yehova okoonihenrye awe, tiila: 22 Kinnaaweha athiyana ootheene ahanle empa* ya mwene a oYuda, akuxiwaka aroihiwaka wa makhulupale a mwene a oBabiloonia.+ Awo anihimya wiira:
‘Alopwana mwaaroromela anyu ahoowokani ni ahooxinttani.+
Aawiirihani oriheliwa munttopheni.
Nto awo ahootthyawani’.
23 Axaarinyu ootheene ni aniinyu, anoovahereriwa atthu a oKhaldeya. Nto nyuwo khamunrowa woopowa mmatatani mwaya, masi munoovariwa ni mwene a oBabiloonia.+ Nave mwaha wa nyuwo epooma ela enoopahiwa ni mooro”.+
24 Sedekiya aahimuleela Yeremiya wiira: “Muhimuleele mutthu itthu iya, wiira muhiiviwe. 25 Vakhala wiira makhulupale anoosuwela etthu koolenlyaakani, anarwa anooleelani wiira: ‘Xontte, munleele ele mwene oolenlyaaweni. Muhinikhuwe etthu, nto khaninrowa owiivani.+ Etthu xeeni mwene oohimenryaaweni?’ 26 Muhaana owaakhula wiira: ‘Kanvekela etthu mwene, wiira ohitthikele-tho okiroiha etthoko ya Yehonathani, okhala wiira kinrowa okhwela weiwo’”.+
27 Nuuvira okathi, makhulupale ootheene yaahirowa wa Yeremiya anamukoha. Owo aahaaleela itthu sootheene mwene aamulenle awe. Masi, khuuvo aasuwenle ele mwene ni Yeremiya yaalavula aya. 28 Yeremiya nlelo aakhala Vate va Makwarta+ mpakha nihiku Yerusalemu aakuxiwe awe. Nto owo nlelo aari weiwe okathi Yerusalemu aakuxiwe awe.+
39 Eyaakha ya neethanu neexexe ya Sedekiya mwene a oYuda, mweeri wa namuloko, Nabukodonosori* mwene a oBabiloonia ni anakhotto awe ootheene yaahiphiya oYerusalemu arukurerya epooma ele.+
2 Eyaakha ya namuloko nimosa ya Sedekiya, mweeri wa neexexe, nihiku 9 na mweeri owo, awo yaahipwexa exiri ya epooma.+ 3 Makhulupale ootheene a mwene a oBabiloonia yaahirwa akilaathi Vamukhora wa Eriyari.+ Masina aya taala: Nerigali-Sareseri a oSamikari-Nebu, Sarisekimi a oRabi-Sarixi, Nerigali-Sareseri a oRabi-Maxi, ni makhulupale ootheene a mwene a oBabiloonia.
4 Okathi Sedekiya mwene a oYuda ni anakhotto ootheene yaawenhe aya,+ yaahitthyawa ekhumaka mpooma ohiyu, aviraka ephiro ya exarti ya mwene, mukhora waari eriyari ya ixiri piili. Nto awo yaatthara ephiro yaarowa wAraba.+ 5 Masi anakhotto a oKhaldeya yaahiwoomola anvara Sedekiya opuro woowaataleya wa oYeriko.+ Awo yaahinvara amuroiha wa Nabukodonosori mwene a oBabiloonia, oRibla,+ elapo ya oHamati,+ weiwo yamphukenle aya. 6 Mwene a oBabiloonia aahiruma wiiviwa ohoolo wawe anamwane a Sedekiya oRibla. Nave mwene a oBabiloonia aahiruma wiiviwa athaaciri ootheene a oYuda.+ 7 Moottharelana, owo aahisyoola maitho a Sedekiya, omutthukwa ni ikwirinti sa ekoopiri, omuroiha oBabiloonia.+
8 Atthu a oKhaldeya yaahipaha empa ya mwene,* ipa sa atthu ootheene,+ ni yaahipwexakasa ixiri sa oYerusalemu.+ 9 Nebuzaradani+ xeefi a makwarta, aahaaroiha weepotthani oBabiloonia atthu akina yaahiiwale epooma ele, ale yaamutthyanwe mwene ni atthu akina-tho yaahanle.
10 Masi, Nebuzaradani xeefi a makwarta aahaahiya elapo ya oYuda atthu akina ootepexa ohaawa, yaawo yahaarina etthu. Nihiku nle, aahaavaha imatta sa ewuuva ni imatta wiira avareke muteko.*+
11 Nabukodonosori mwene a oBabiloonia aahinvaha Nebuzaradani xeefi a makwarta, malakiheryo yaamuhimya Yeremiya iiraka: 12 “Mmurowele ni mmukhapelele, muhimwiirihe etthu yootakhala. Mmwiirele itthu sootheene onrowa awe woovekelani”.+
13 Nebuzaradani xeefi a makwarta, Nebuxasibani a oRabi-Sarixi, Nerigali-Sareseri a oRabi-Maxi, ni makhulupale ootheene a mwene a oBabiloonia yaahiruma wiira 14 oroweliwe Yeremiya Vanivateni va Makwarta+ ni anvahererye Gedaliya,+ mwaana a Ahikami,+ mwaana a Xafani,+ wiira amuroihe owannyawe. Siiso Yeremiya aakhala eriyari ya atthu.
15 Nlelo Yeremiya otthukweliwe ene Vanivateni na Makwarta,+ Yeremiya aahisuwelihiwa moolumo a Yehova yaahimya wiira: 16 “Murowe mwamuleele Ebedi-Meleki+ a wEthiyopia wiira: ‘Etthu onihimya awe Yehova a anakhotto, Muluku a Isarayeli, tiila: “Kinoomaleliha moolumo aka kilavunle aka kihimyaka epooma ela, wiira kikumiherye ehasara ohiya etthu yooloka. Nihiku nlo, nyuwo munimoona eyo yiiraneyaka”’.
17 “Yehova onihimya wiira: ‘Miyo kinoowoopolani nihiku nlo, nave khamunrowa ovahereriwa mmatatani mwa atthu muniwoova anyu’.
18 “Yehova onihimya wiira: ‘Tthiri kinoowoopolani, nave khamunrowa wiiviwa ni espaata.* Munimoopola okumi anyu,+ mwaha woowi mookiroromela’”.+
40 Yeremiya aahisuwelihiwa moolumo a Yehova nuumala Nebuzaradani+ xeefi a makwarta, omutaphula oRama.+ Owo aahimukuxa Yeremiya omuroihaka weiwo, omutthunkwe ene, Yeremiya aari eriyari ya atthu ale yaakuxiwe oYerusalemu ni oYuda, yaawo yaaroihiwe oBabiloonia. 2 Xeefi a makwarta aahimukuxa Yeremiya onamuleela wiira: “Yehova, Muluku anyu, ooleiherya ehasara ela ohimyaka opuro ola, 3 Yehova ookumiherya ehasara eyo ntoko siisaale aalavunle awe, okhala wiira nyuwo moomutthekela Yehova nave khamwiiwelenle moolumo awe. Tivonto yookhumelenlyaayani etthu ela.+ 4 Vano kinimootaphulani aliceema mutthukwaniwa anyu mmoononi mwanyu. Moona oreerela orowa ni miyo oBabiloonia, nrowe miyo kinimookhapelelani. Masi mwaahoone oreerela orowa ni miyo oBabiloonia muhikitthare. Moone elapo yootheene ti yawinyu. Muroweke opuro munoona anyu oreerela”.+
5 Yeremiya ohinatthi otthika, Nebuzaradani aahimuleela wiira: “Mutthikele wa Gedaliya,+ mwaana a Ahikami,+ mwaana a Xafani,+ yoowo mwene a oBabiloonia omuthanlale awe wiira oweheryeke ipooma sa oYuda ni mwakhaleke nuuwo eriyari ya atthu, aahiiso muroweke opuro munoona anyu oreerela”.
Nto xeefi a makwarta aahinvaha yoolya ni soovaha sikina, nto aahimuhiya orowaka. 6 Yeremiya aahirowa oMisipa+ ni Gedaliya, mwaana a Ahikami, ni aahikhala nuuwo eriyari ya atthu yaahanle elapo ele.
7 Nuuvira okathi, maxeefi ootheene a anakhotto yaari omatta ni alopwana aya, yaahiiwa wiira mwene a oBabiloonia aahimuthanla Gedaliya, mwaana a Ahikami, wiira oweheryeke elapo ele, ni aaweheryeke alopwana, athiyana, ni anamwane a atthu oohaawa a elapo ele yaawo yahaaroihiwe oBabiloonia.+ 8 Awo yaahirowa wa Gedaliya oMisipa.+ Atthu awo yaari: Iximayeli, mwaana a Netaniya, Yohanani+ ni Yonathani, anamwane a Kareya, Seraya,+ mwaana a Tanihumethi, anamwane a Efayi a oNetofa ni Yezaniya+ mwaana a Maakati, vamosa ni alopwana aya. 9 Gedaliya, mwaana a Ahikami, mwaana a Xafani, aahilapha ohoolo wa atthu ale ni wa alopwana aya, iiraka: “Muhoove waarumeela atthu a oKhaldeya. Mukhaleke elapo ela ni mmurumeeleke mwene a oBabiloonia, nto itthu sootheene sinooweettelani saana.+ 10 Vano miyo nlelo kinookhalaka oMisipa koohoolelakani* ohoolo wa atthu a oKhaldeya anrowa orwa wa hiyo. Masi nyuwo muhaana othukumanyaka eviinyu, mihokorokho sa elimwe ni makhura, muhaana opweha itthu iyo, ni muhaana okhala epooma eyo munrowa anyu okuxa”.+
11 Nave ayuda ootheene yaari oMowabi, wAmoni, ni wEdomi, ni ilapo sootheene, yaahiiwa wiira mwene a oBabiloonia aahaahiya atthu akina akhalaka oYuda, ni aahimuthanla Gedaliya, mwaana a Ahikami, mwaana a Xafani wiira aaweheryeke. 12 Ayuda ootheene yaahipacerya otthika mapuro ootheene yaamwara-mwareliwe aya. Yaahikela elapo ya oYuda ni yaahirowa okumana ni Gedaliya oMisipa. Awo yaahithukumanya eviinyu ni mihokorokho soowaatta sa elimwe.
13 Yohanani, mwaana a Kareya, ni maxeefi ootheene a anakhotto yaari omatta, yaahirowa wa Gedaliya oMisipa. 14 Awo yaahimukoha wiira: “Niireke moosuwela wiira Bayalisi, mwene a wAmoni,+ oomuruma Iximayeli mwaana a Netaniya wiira owiiveeni?”+ Masi Gedaliya mwaana a Ahikami, khaakupanli.
15 Nto Yohanani, mwaana a Kareya, aahimuleela Gedaliya voohisuweliwa, oMisipa wiira: “Kimphavela orowa omwiiva Iximayeli, mwaana a Netaniya. Khaavo onrowa osuwela. Xeeni owo omphavela awe owiivani? Xeeni atthu ootheene a oYuda yaawo atakaahanne ni nyuwo akhanle aya oomwara-mwareya? Nave xeeni atthu ahanle oYuda akhanle aya oomala-malihiwa?” 16 Masi Gedaliya,+ mwaana a Ahikami, aahimuleela Yohanani, mwaana a Kareya, iiraka: “Muhipake eyo, okhala wiira etthu munimuhimyana anyu Iximayeli, ti yoowoothiwa”.
41 Mweeri wa neethanu nenli, Iximayeli+ mwaana a Netaniya, mwaana a Elixama, yoowo aari a nloko na mamwene,* aahirowa ni alopwana 10 wa Gedaliya, mwaana a Ahikami, oMisipa.+ Okathi yaalya aya vamosa oMisipa, 2 Iximayeli mwaana a Netaniya, ni alopwana 10 yaari nuuwo, yaahivenya ni yaahimwiiva Gedaliya mwaana a Ahikami, mwaana a Xafani, ni espaata.* Nto owo aahimwiiva ole aathanliwe ni mwene a oBabiloonia wiira oweheryeke elapo. 3 Nave-tho Iximayeli aahiwiiva ayuda ootheene yaari ni Gedaliya oMisipa, vamosa ni atoropa a oKhaldeya yaari weiwo.
4 Nihiku na nenli, okathi ahaakhanle awe mutthu aasuwenle wiira Gedaliya ohiiviwa, 5 yaahiphiya alopwana 80 a oSikhemi,+ a oSilo+ ni a oSamariya.+ Awo yaahimettha ereru aya, yaahikherasa ikuwo saya ni yaahithikilasa erutthu aya.+ Awo yaahiruuha soovaha sa ipyo, sa oLiibano,+ wiira aroihe empa ya Yehova. 6 Nto Iximayeli, mwaana a Netaniya, aahikhuma oMisipa, wiira akumane naawo, okathi eetta awe owo aaninla. Nuumala okumana naawo aahaaleela wiira: “Murwe wa Gedaliya mwaana a Ahikami”. 7 Masi okathi yaaphiyale aya mpooma, Iximayeli mwaana a Netaniya ni alopwana awe, yaahiwiiva yaarihela mweehimeni.
8 Masi alopwana 10 yaari naawo, yaahimuleela Iximayeli yiiraka: “Muhiniive, okhala wiira noovitha mmatta etiriku, esevaata, makhura ni oravo”. Tivonto awo khiyaawiivale ntoko yaawiivale aya axinnaya. 9 Iximayeli aahirihela ehime yuulupale, mirutthu sootheene sa alopwana aawiivale awe. Ehime eyo yaari ya mwene Asa yeeyo aathimpe awe mwaha wa Bayexa mwene a wIsarayeli.+ Nave ehime yeeyo Iximayeli mwaana a Netaniya aasarinhe awe mirutthu sa atthu okhwa.
10 Iximayeli aahaaroiha weepotthani atthu ootheene yaahanle oMisipa,+ waahela muhina anamwane axithiyana a mwene, ni atthu ootheene yaahanle oMisipa, yaawo Nebuzaradani xeefi a makwarta, anvaherenrye awe Gedaliya+ mwaana a Ahikami wiira aakhapeleleke. Iximayeli mwaana a Netaniya, aahaaroiha weepotthani, aavirihaka elapo ya wAmoni.+
11 Okathi Yohanani,+ mwaana a Kareya, ni maxeefi ootheene a anakhotto yaari nuuwo, yaiwale aya itthu sootheene sootakhala Iximayeli mwaana a Netaniya aapanke awe, 12 yaahaathukumanya alopwana ootheene ni yaahikhuma wiira yawane ni Iximayeli, mwaana a Netaniya, nto yaahimphwanya Iximayeli opuro woowaatta maasi* oXibeyoni.
13 Atthu ootheene yaari ni Iximayeli yaahitteeliwa murima okathi yanwenhe aya Yohanani, mwaana a Kareya, ni maxeefi ootheene a anakhotto yaari nuuwo. 14 Nto atthu ootheene yaawo Iximayeli aakunxe awe oMisipa aaroihaka weepotthani,+ yaahitthika anamutthara Yohanani, mwaana a Kareya. 15 Iximayeli mwaana a Netaniya ni alopwana awe 8 yaahoopowa mmatatani mwa Yohanani, anarowa elapo ya wAmoni.
16 Yohanani, mwaana a Kareya, ni maxeefi ootheene a anakhotto yaari nuuwo yaahaakuxa atthu yaahanle oMisipa, yaawo yaawooponle aya mmatatani mwa Iximayeli, mwaana a Netaniya, nuumala owo omwiiva Gedaliya,+ mwaana a Ahikami. Awo yaahaakuxa oXibeyoni alopwana, anakhotto, athiyana, anamwane ni makhulupale a opalaasio. 17 Awo yaahikhuma, ni yaahimaka oKimihami, waattamela oBetelehemu,+ aphavelaka orowa wExiitu,+ 18 mwaha wa atthu a oKhaldeya. Awo yaaniwoova, okhala wiira Iximayeli mwaana a Netaniya, aahimwiiva Gedaliya mwaana a Ahikami, yoowo mwene a oBabiloonia aamuthanlale awe wiira oweheryeke elapo.+
42 Maxeefi ootheene a anakhotto, omuhela muhina Yohanani+ mwaana a Kareya, Yezaniya mwaana a Hoxaya ni atthu ootheene, okhuma acikhaani mpakha aalupale, yaahimwaattamela 2 ni yaahimuhimeerya profeta Yeremiya wiira: “Xontte, mwiiwe yooveka ahu, munivekelele wa Yehova Muluku anyu, mwaha wa atthu ootheene ahanle, okhala wiira ntoko munniweha anyu, khinaareere waatta masi nihanle vakhaani.+ 3 Yehova Muluku anyu, onileele ephiro nikhanle ahu ootthara ni etthu nikhanle ahu oopaka”.
4 Profeta Yeremiya aahiwaakhula wiira: “Kihiiwa. Kinonvekela Yehova Muluku anyu, ntoko nvenke anyu, kinimooleelani khula nuulumo Yehova onrowa awe okileela. Nkinrowa ovitha nnakhala nuulumo nimosa”.
5 Awo yaahimuleela Yeremiya wiira: “Yehova okhale namoona ahu eekeekhai ni oororomeleya, akhala wiira khaninrowa opaka siisaale ntoko Yehova Muluku anyu onrowa awe oniruma oorumeelakani nyuwo. 6 Hata moolumo awe akhalaka ooreera aahiiso ootakhala, nnimwiiwelela moolumo a Yehova Muluku ahu, yoowo noovekenlaahuni onikohererya. Niira siiso, itthu sinooneettela saana, okhala wiira ninniiwelela moolumo a Yehova Muluku ahu”.
7 Vano nuumala mahiku 10, Yeremiya aahisuwelihiwa moolumo a Yehova. 8 Nto aahimwiihana Yohanani, mwaana a Kareya, ni maxeefi ootheene a anakhotto yaari nuuwo ni atthu ootheene, okhuma acikhaani mpakha aalupale.+ 9 Owo aahaaleela wiira: “Etthu onihimya awe Yehova Muluku a Isarayeli, yoowo mwaakirumme anyu wiira kamukohe, tiila: 10 ‘Akhala wiira khamunrowa okhuma elapo ela, kinimoolipihani ni nkinrowa woopwetexani, kinoowaalani ni nkinrowa woophelani, okhala wiira kinimwiikhupanyerya mwaha wa ehasara kookumihenryaakani.+ 11 Muhimoove mwene a oBabiloonia, yoowo munimoova anyu’.+
“Yehova onihimya wiira: ‘Muhimoove, okhala wiira miyo kiri ni nyuwo wiira kiwoopoleni ni kiwaakiheryeni mmatatani mwawe. 12 Miyo kinimoomorelani ikharari+ nave owo onimoomorelani ikharari ni onoowiirihani otthikela elapo anyu.
13 “‘Masi mwahimya wiira: “Nnaari, khaninrowa okhalaka elapo ela!” nave mwaahiiwelele moolumo a Yehova, Muluku anyu, 14 mwiiraka: “Nnaari, ninrowa elapo ya wExiitu toko,+ weiwo nihinrowa ahu woonaka ikhotto, nihinrowa ahu wiiwaka oruma wa nlope, nihinrowa ahu ovoliwaka etala, nave ninrowa okhalaka weiwo”, 15 weeso mwiiwe moolumo a Yehova, nyuwo atthu ahanle a oYuda. Etthu onihimya awe Yehova a anakhotto, Muluku a Isarayeli, tiila: “Mwalakela orowa elapo ya wExiitu wiira mwakhaleke weiwo, 16 espaata yeeyo munoova anyu enimoophwanyani* elapo ya wExiitu, nave etala yeeyo munoova anyu enimoottharani mpakha wExiitu, nto munrowa okhwela weiwo.+ 17 Nave atthu ootheene anrowa olakela orowa okhalaka wExiitu, animookhwa ni espaata, etala ni eretta. Khuuvo a yaawo onrowa okhala mukumi nnakhala woopowa ehasara kinrowa aka waakumiherya”’.
18 “Etthu onihimya awe Yehova a anakhotto, Muluku a Isarayeli, tiila: ‘Ntoko siisaale kaananariwe aka ni kaaviruwenle aka atthu a oYerusalemu,+ siiso-tho kinimooviruwelani mwarowa wExiitu nave kinoowiirihani okhala etthu yootakhalihiwa, etthu yoowoopiha, etthu enithanyiwa ni eniveehiwa,+ nto khamuntthikela-tho oweha opuro ola’.
19 “Yehova oolavula etthu oohimyakani nyuwo, atthu muhanle oYuda. Muhirowe wExiitu. Muhiliyale wiira olelo kihoolopolani, 20 wiira yoottheka anyu enooxankiha okumi anyu. Ti nyuwo mwaakirumme wa Yehova Muluku anyu mwiiraka: ‘Munivekelele wa Yehova, Muluku ahu, nave munileele itthu sootheene Yehova, Muluku ahu, onrowa awe onileela, nto hiyo nnoopaka yeeyo’.+ 21 Olelo miyo kihooleelani moolumo ala, masi nyuwo khamunrowa wiiwelela moolumo a Yehova, Muluku anyu, nnakhala khamunrowa opaka ele owo okirumme awe wooleelani.+ 22 Tivonto, mukupaliki wiira munimookhwa espaata, etala aahiiso eretta, opuro yoowo oniphavela anyu orowa okhalaka”.+
43 Nuumala Yeremiya waaleela atthu ootheene moolumo ootheene a Yehova, Muluku aya, aaleelaka khula nuulumo na Yehova Muluku aya, aamurumme awe wiira aaleele, 2 Azariya mwaana a Hoxaya, Yohanani+ mwaana a Kareya ni alopwana ootheene oowiisoona yaahimuleela Yeremiya wiira: “Etthu munihimya anyu khahiyo yeekeekhai! Yehova, Muluku ahu, khoorummeni onileela wiira: ‘Muhirowe okhala wExiitu’. 3 Masi Baruki+ mwaana a Neriya, tonootumereryani olavula moota owo, wiira nivahereriwe mmatatani mwa atthu a oKhaldeya, wiira niiviwe aahiiso niroihiwe weepotthani oBabiloonia”.+
4 Yohanani mwaana a Kareya, maxeefi ootheene a anakhotto ni atthu ootheene khiyaiwelenle yooruma ya Yehova yaahimya wiira yaahaana ohala elapo ya oYuda. 5 Ohiya-vo, Yohanani mwaana a Kareya ni maxeefi ootheene a anakhotto yaahaakuxa atthu ootheene yaahanle oYuda, yaawo yaatthinke wiira akhaleke elapo ya oYuda, akhumaka maloko ootheene yaawo yaamwareenle aya.+ 6 Awo yaahaakuxa alopwana, athiyana, anamwane, anamwane axithiyana a mwene ni atthu ootheene yaawo Nebuzaradani,+ xeefi a makwarta, aahiyale awe ni Gedaliya,+ mwaana a Ahikami,+ mwaana a Xafani.+ Nave yaahimukuxa-tho profeta Yeremiya ni Baruki, mwaana a Neriya. 7 Nto awo yaahirowa elapo ya wExiitu, okhala wiira khiyiiwelenle moolumo a Yehova. Nave yaahirowa mpakha oDafne.+
8 Ori ene oDafne, Yeremiya aahisuwelihiwa moolumo a Yehova yaahimya wiira: 9 “Mukuxe maluku maalupale, mooniwaka ni ayuda, muthipele vathi va empa yoorakamela osulu eri vamukhora wa empa ya Farawo, oDafne. Nuumala-vo, nvirihele alukamasa vasulu vaya. 10 Mwaahimeerye wiira: ‘Etthu onihimya awe Yehova a anakhotto, Muluku a Isarayeli, tiila: “Kinoomuruma murumeyi aka Nabukodonosori* mwene a oBabiloonia,+ nave kinoopweha ehice awe vamosa ni maluku ala kivinthe aka, nto owo onimweemexa etenta* awe ya omwene vasulu va maluku awo.+ 11 Owo onimoorwa ni onootuphela elapo ya wExiitu.+ Ole onrowa ophwanyiwa ni ehasara eniiva, onimookhwa ehasara yeeyo, ole onrowa okuxiwa oroihiwaka weepotthani onooroihiwa weepotthani weiwo, ole onrowa ophwanyiwa ni espaata* onimookhwa espaata yeeyo.+ 12 Miyo kinoorihela mooro ipa* sa amuluku a wExiitu,+ nto owo onoopaha ni onimwaaroiha weepotthani. Ntoko siisaale makampusi oniikhuneela awe ni malaya awe, siiso-tho owo onookuxa elapo yootheene ya wExiitu ni onookhuma ni murettele. 13 Owo onoopwexakasa ipilaari sa oBethi-Xemexi, elapo ya wExiitu ni onoopaha ni mooro ipa* sa amuluku a wExiitu”’”.
44 Yeremiya aahisuwelihiwa moolumo a Muluku wiira aaleele ayuda ootheene yaakhala elapo ya wExiitu,+ eyo piiyo, oMigdoli,+ oDafne,+ oNofi,*+ ni elapo ya oPathiro,+ yaahimya wiira: 2 “Etthu onihimya awe Yehova a anakhotto, Muluku a Isarayeli, tiila: ‘Nyuwo mooweha ihasara sootheene kikumihenrye aka oYerusalemu+ ni ipooma sootheene sa oYuda. Olelo-va ipooma iyo soopwetexiwa ni khuuvo onikhala.+ 3 Eyo ehiiraneya mwaha wa itthu sootakhala awo apanke aya akiveehaka, avahaka mikuttho soopahiwa+ ni yaarumeelaka amuluku akina yaawo nyuwo ni amuhavinre anyu muhinaasuwela anyu.+ 4 Miyo kaanaaruma arumeyi aka, maprofeta, kaanooruuhelani ikwaha sinceene, kiiraka: “Xontte, muhipakeke itthu iya sootakhala seiyo kininyokha aka”.+ 5 Masi awo khiyaawiriyanne nnakhala khiyaavanhe ephoole, wiira ahiye miteko saya sootakhala ni waavaha mikuttho amuluku akina.+ 6 Tivonto, kaahaaviruwela ni kaahinanariwa naawo, nave kaahipaha ipooma sa oYuda ni istaraata sa oYerusalemu. Nto iyo milepe* ni khasinikhaliwa ntoko siri aya olelo-va’.+
7 “Etthu onihimya awe Yehova, Muluku a anakhotto, Muluku a Isarayeli, tiila: ‘Xeeni munikikumiherya anyu maxakha maalupale wiira amala-malihiwe ayuda ootheene alopwana ni athiyana, amiravo, anamwane, ohihalaka nnakhala mutthu mmosa? 8 Xeeni mwaakhanle anyu ookiveeha ni miteko sa matata anyu, mwaavahaka mikuttho amuluku akina a elapo ya wExiitu, elapo yeeyo muronwe anyu okhala? Nyuwo munimookhwa ni munrowa okhala etthu yootakhalihiwa, etthu eniveehiwa eriyari ya maloko ootheene a mulaponi.+ 9 Muhiliyale miteko sootakhala sa amuhavinre anyu, sa mamwene a oYuda,+ sa axaaraya,+ vamosa ni miteko sanyu sootakhala ni sa axaarinyu,+ seiyo sipakiwe elapo ya oYuda ni istaraata sa oYerusalemu. 10 Mpakha olelo-va, awo khiyaiyevihale, khakittittiminhe,+ nnakhala khiyeettenle nlamulo naka ni sooruma saka, nenlo kipwenhe aka ohoolo wanyu ni ohoolo wa amuhavinre anyu’.+
11 Etthu onihimya awe Yehova a anakhotto, Muluku a Isarayeli, tiila: ‘Miyo koolakela wookumiheryani ehasara, wiira kipwetexe oYuda wootheene. 12 Miyo kinimwaakuxa atthu ahanle oYuda yaawo yaalakenle orowa okhalaka elapo ya wExiitu, nto ootheene aya anrowa okhwela elapo ya wExiitu.+ Animookhwa espaata ni etala, okhuma acikhaani mpakha aalupale, animookhwa espaata* ni etala. Awo anookhala etthu yootakhalihiwa, etthu yoowoopiha, etthu enithanyiwa ni eniveehiwa.+ 13 Miyo kinimwaahukhumu atthu anikhala elapo ya wExiitu, ntoko kaahukhummu aka atthu anikhala oYerusalemu ni espaata, etala ni ekwerere.+ 14 Nave ale yooponwe oYuda aronwe okhala elapo ya wExiitu khanrowa okhala akumi nnakhala khanrowa woopowa, wiira atthikele elapo ya oYuda. Awo anoophavelaka vanceene otthikela okhala oYuda, masi khanrowa otthika, ahikhanle ale vakhaani yooponwe’”.
15 Alopwana ootheene yaasuwenle wiira axaaraya yaahaavaha mikuttho amuluku akina ni axaaraya ootheene yaari weiwo, yaawo yaathukumanne ekurupu yuulupale, vamosa ni atthu ootheene yaakhala elapo ya wExiitu,+ oPathiro,+ yaahimwaakhula Yeremiya yiiraka: 16 “Hiyo khaninrowa owiriyana moolumo munilenle anyu mwa nsina na Yehova. 17 Tthiri, hiyo nnimweettela moolumo ootheene nlavunle ahu ni eyano ahu, nnonvaha mikuttho Pwiyamwene a Osulu* nave nnommwarexela soovaha siniwuriwa,+ hiyo, amuhavinre ahu, mamwene ahu ni makhulupale ahu nipanke ahu ipooma sa oYuda ni istaraata sa oYerusalemu, okathi naarina ahu eyoolya yoowaatta ni yahaanithowa aya etthu ni okathi yahaaniphwanya aya nnakhala ehasara emosa. 18 Nuumala ohiya onvaha mikuttho Pwiyamwene a Osulu ni ommwarexela soovaha siniwuriwa, aahipacerya onileela itthu sootheene, nave naahimala-malihiwa ni espaata ni etala”.
19 Axithiyana yaahincererya ariki: “Okathi nanvaha ahu mikuttho Pwiyamwene a Osulu ni nammwarexela ahu soovaha siniwuriwa, kiira axiiyahu tiyaanirumme wiira nipake epoolu enlikana ni elatarato awe ni nimmwarexele soovaha siniwuriwa?”
20 Yeremiya aahaaleela atthu ootheene, eyo piiyo, alopwana, axaaraya ni ootheene ale yaalavula nuuwo, iiraka: 21 “Nlavulaka sa mikuttho seiyo nyuwo, amuhavinre anyu, mamwene anyu, makhulupale anyu ni atthu a elapo nvanhe anyu ipooma sa oYuda ni istaraata sa oYerusalemu,+ Yehova ohuupuwelela, owo kholiyanle! 22 Vano Yehova khoniwerya-tho ovilela miteko sanyu sootakhala, ni itthu soohiirya mwaapaka anyu. Nave, elapo anyu yookhalihiwa opuro ohinikhaliwa, etthu yoowoopiha ni yootakhalihiwa, ohinakhala mutthu ntoko siri aya olelo-va.+ 23 Okhala wiira moovaha mikuttho iya ni moomutthekela Yehova, muhiyaka wiiwelela moolumo a Yehova ni otthara nlamulo nawe, sooruma sawe ni moolumo awe oowuupuxerya, ehookhumelelani ehasara ela, ntoko muniweha anyu olelo-va”.+
24 Yeremiya aahitthikela-tho waaleela atthu ootheene waahela muhina athiyana iiraka: “Mwiiwe moolumo a Yehova, nyuwo atthu ootheene a oYuda muri elapo ya wExiitu. 25 Etthu onihimya awe Yehova a anakhotto, Muluku a Isarayeli, tiila: ‘Etthu nyuwo ni axaarinyu muhimmye anyu, moomaleliha ni matata anyu, okhala wiira mwaahihimya wiira: “Tthiri nnimwaamaleliha anatiri ahu ninvahaka mikuttho Pwiyamwene a Osulu ni nimmwarexelaka soovaha siniwuriwa”.+ Tthiri nyuwo athiyana nlelo munnaamaliherya anatiri anyu, mpakaka ele muleihenrye anyu’.
26 Tivonto, mwiiwe moolumo a Yehova, nyuwo atthu ootheene a oYuda munikhala elapo ya wExiitu: ‘Yehova onihimya wiira: “Miyo kinnilapha ni nsina naka nuulupale, wiira elapo yootheene ya wExiitu, khuuvo mulopwana a oYuda+ onrowa otthikela olapha ni nsina naka, iiraka: ‘Ntoko siisaale Pwiya Muulupalexa Yehova onikhala awe!’+ 27 Miyo kinnaawehaweha wiira kaakumiherye ehasara, ohiya etthu yooloka.+ Atthu ootheene a oYuda, yaawo ari elapo ya wExiitu, animwiiviwa ni espaata ni etala, mpakha omala-mala.+ 28 Atthu vakhaani paahi tahinrowa wiiviwa ni espaata, nave anootthika elapo ya wExiitu arowaka elapo ya oYuda.+ Atthu ootheene ahanle oYuda yaawo arwaale okhala elapo ya wExiitu, anoosuwela moolumo xeeni yiiraneyale, akhala wiira moolumo aka aahiiso moolumo aya!”’”
29 “Yehova onihimya wiira: ‘Esinaale kinoovahaakani tiila: Miyo kinimoohukhumuni opuro ola, para musuwele wiira ele kileihenrye aka wiira kinimookumiheryani ehasara, tthiri enimwiiraneya. 30 Etthu onihimya awe Yehova, tiila: “Kinonvahererya Farawo Hoofara mwene a wExiitu, mmatatani mwa awanani awe ni mmatatani mwa ale aniphavela omwiiva, ntoko siisaale kanvaherenrye aka Sedekiya mwene a oYuda, mmatatani mwa Nabukodonosori* mwene a oBabiloonia, yoowo aari nwanani awe ni aaphavela omwiiva”’”.+
45 Eyaakha ya neexexe ya Yoyakiimi,+ mwaana a Yosiya mwene a oYuda, Baruki+ mwaana a Neriya, aahilepa muliivuruni moolumo aaleeliwa awe ni profeta Yeremiya.+ Moolumo ene taala:
2 “Etthu onihimya awe Yehova, Muluku a Isarayeli oohimyakani nyuwo, Baruki, tiila: 3 ‘Nyuwo moohimya wiira: “Kootakhaliwa, okhala wiira kinnoona owereya, nave-tho Yehova ookiiriha oriipiwa murima. Kookhulumuwa vanceene mwaha woowoova, nave nkinwerya-tho ophumurya”’.
4 “Mwamuhimeerye wiira: ‘Etthu onihimya awe Yehova, tiila: “Kinoopwexa ele kilipinhe aka, nave kinoophela ele kaalale aka, eyo piiyo, elapo ela yootheene.+ 5 Masi nyuwo muniphavela itthu suulupale. Muhiye ophavela itthu iyo”’.
“Yehova onihimya wiira: ‘Miyo kihanle waakumiherya ehasara atthu ootheene,+ nave khula opuro onirowa anyu, miyo kinimoopola okumi anyu’”.+
46 Yehova aahimuleela profeta Yeremiya moolumo yaahimya maloko iiraka:+ 2 Muluku aahilavula ohimyaka wExiitu,+ aahimyaka anakhotto a Farawo Neko,+ mwene a wExiitu, yoowo aari omuro Eufrate, oKarkemixi, okathi aaxinttiwe awe ni Nabukodonosori* mwene a oBabiloonia, eyaakha ya neexexe ya Yoyakiimi+ mwaana a Yosiya mwene a oYuda. Moolumo aalavunle awe taala:
3 “Mulokiherye makula anyu oowiixaakiha,* macikhaani ni maalupale,
Nave murowe okhottoni.
4 Nyuwo anakhavalo, mulokiherye ikhavalo ni mulikanyihe.
Mweemele opuro anyu ni nware ikapaseeti sanyu.
Munone mavaka ni nware ikuleti sanyu sa yuuma.
5 Yehova onihimya wiira: ‘Xeeni kinaaweha aka axankale ene?
Anakhotto aya aaxinttiwa, nto awo aatthika.
Annitthyawa yoovaka, anakhotto aya nnakhala khaniweha ottuli.
Mpantta wootheene onnoopiha’.
6 ‘Alipa-ootthimaka khaniwerya otthimaka, nnakhala anakhotto khaniwerya woopowa.
Onorti, mukerekhere wa muro Eufrate,
Awo annikwattuliwa anamora’.+
7 Ti pani ola oniwela onlikana ni muro Niilo,
Onlikana ni miro sirina maasi ootupa?
8 Exiitu onniwela ntoko muro Niilo,+
Ntoko miro sirina maasi ootupa,
Onahimya wiira: ‘Kinoowela ni kinookhuneela elapo.
Kinoopwetexa epooma ni atthu aya anikhala memmo’.
9 Nyuwo anakhavalo, murowe okhottoni,
Nyuwo muneettiha ikaaro, mweettiheke ntoko alolo!
Mwaahiye anakhotto aroweke,
Alopwana a oKuuxi ni a oPuthi, yaawo anirumeela nikula na wiixaakiha,+
10 Nihiku nlo, ti na Pwiya Muulupalexa Yehova a anakhotto, nave nihiku noowunlela ikuhu awanani awe. Espaata enoowiiva, enoovona ni enoomala-maliha* ntthona ni ephome aya, okhala wiira Pwiya Muulupalexa Yehova a anakhotto, oolokiherya mukuttho elapo ya onorti, omuro Eufrate.+
11 Nyuwo mwaana mwaamuthiyana a wExiitu, ohitonko orupa ni mulopwana,
Murowe oXileyaadi, mwamukuxe baalsamu.+
Mirette sanyu sootheene khasinvara muteko,
Okhala wiira khokhanle murette wiira mpenuxiwe.+
12 Maloko ahiiwa wuuliwa wanyu muru,+
Nave okhuwela wanyu woosareya mulaponi.
Nakhotto onnimmoroxa nakhotto mukhwaawe,
Nto oowanli aya annimora”.
13 Moolumo a Yehova aamulenle awe profeta Yeremiya ohimyaka orwa wa Nabukodonosori mwene a oBabiloonia, wiira otuphele elapo ya wExiitu,+ taala:
Mwiiraka: ‘Mweemele mapuro anyu ni mwiilokiherye,
Okhala wiira espaata enimwaamala-maliha atthu ootheene yoorukurenryeni.
15 Xeeni anakhotto anyu ootupa yiivakasiwe aya?
Awo khiyaawenrye wiisaakiha,
Tivo Yehova aaxinttale awe.
16 Anakhotto anceene annikwattuliwa anamora.
Annileelana wiira:
“Nvenye! Nrowe naatthikele moowaakuveya atthu ahu ni elapo ahu,
Mwaha wa espaata yootakhala”’.
17 Weiwo, awo annilaleya wiira:
18 Mwene, yoowo nsina nawe nri Yehova a anakhotto, onihimya: ‘Kinnilaphela okumi aka wiira,
Owo* onimoorwa ntoko Tabori+ ori eriyari ya miyaako,
Nave ntoko Karmelo+ ori waattamela ophareya.
19 Nyuwo mwaana mwaamuthiyana munikhala wExiitu,
Mulokiherye muritti anyu para weepotthani.
20 Exiitu onlikana ni epooyi yooreera,
Masi anoomurweela apwilimwithi akhumaka onorti ni anoomuluma.
21 Hata anakhotto awe oothummwa anlikana ni ipooyi saamukhaani sooneneva eriyari awe,
Nave-tho awo aatthika ni aatthyawa vamosa.
22 ‘Oruma wawe onlikana ni oruma wa enowa eniipurula,
Okhala wiira awo ammurweela ni ikuru ni amaxatto,
Ntoko alopwana aniikitthasa miri.*
23 Awanani animwiikittha miri sa etakhwa awe, nnaamwi etakhwa eyo yooniwa wiira khenivireya.
Awo toowaatta ovikana isoope ni khanikontareya’. Yehova tonihimya.
24 Nave-tho, onnihimya wiira: ‘Mwaana mwaamuthiyana a wExiitu onimuulihihiwa muru.
Owo onoovahereriwa mmatatani mwa atthu a onorti’.+
25 “Etthu onihimya awe Yehova a anakhotto, Muluku a Isarayeli, tiila: ‘Vano, miyo kinoomuhukhumu Amoni,+ Muluku a No.*+ Nave-tho kinoomuhukhumu Exiitu, amuluku awe,+ mamwene awe, Farawo ni ale ootheene animuroromela’.+
26 “Yehova onihimya wiira:+ ‘Kinonvahererya mmatatani mwa ale aniphavela omwiiva, Nabukodonosori* mwene a oBabiloonia+ ni arumeyi awe. Masi nuumala-vo, owo* onootthikela-tho okhala ntoko khalai’.
27 ‘Masi nyuwo, murumeyi aka Yakobe, muhoove,
Nave nyuwo Isarayeli, muhithukumele.+
Muri ene ottaiwene, miyo kinoowoopolani,
Nave kinimoopola osuulu anyu elapo onrowa aya okhalihiwa ipottha.+
Yakobe onootthika, onookhalaka oomaaleleya ni murettele,
Khuuvo onrowa omoopopihaka.+
28 Muhoove, murumeyi aka Yakobe, okhala wiira miyo kiri ni nyuwo.
Kinimoottaruxani ntoko vanreerela aya,+
Nave nkinrowa woohiyani kihoohukhummuni’. Yehova tonihimya”.
47 Ala moolumo a Yehova aasuwelihiwe awe profeta Yeremiya, yaahimya afilisti,+ Farawo ohinatthi otuphela oGaza. 2 Etthu onihimya awe Yehova, tiila:
“Mwiiwe! Annoorwa maasi anikhuma onorti,
Yaawo anrowa okhala ootupa.
Maasi awo anookhuneela elapo ni itthu sootheene siri memmo,
Anookhuneela epooma ni atthu anikhala memmo.
Alopwana animunla,
Nave atthu ootheene anikhala mulaponi animwiikhupanyerya.
3 Okathi anrowa aya wiiwa oruma wa ikhavalo sinitthimaka,
Oruma wa ikaaro sa ekhotto,
Ni onyakula wa maroota aya,
Axipaapa khanrowa waatthikela anaaya wiira awoopole,
Okhala wiira matata aya anrowa otteettheya.
4 Nihiku na opwetexiwa afilisti ootheene ninnaattamela,+
Nave onoopwetexiwa oTiiro,+ oSiidoni+ ni atthu ootheene ahanle yaawo yaataanne naawo.
5 Atthu a oGaza anooriipiwa murima.*
WAxikeloni onoomaaliwa.+
Nyuwo muhanle opuro woowaataleya,
Munrowa othipelelaka wiivulaliha mpakha silini?+
Munrowa omaala liini?
Mutthikele opuro munikhala anyu.
Mphumuryeke ni mmaaleleyeke.
7 Enrowa omaala sai,
Erummwale ene ni Yehova?
Owo othanlenle yeeyo,+
Wiira etuphele ipantte sa ophareya sa wAxikeloni”.
48 Etthu onihimya awe Yehova a anakhotto, Muluku a Isarayeli, ohimyaka oMowabi,+ tiila:
“Ootakhaliwa Nebo+ okhala wiira oopwetexiwa!
Kiriyatayimi+ ohuulihihiwa muru ni ookuxiwa.
Nipuro nootthyawela noororomeleya* nihuulihihiwa muru ni noopwexakasiwa.+
2 Awo khanttottopela-tho oMowabi.
oHexeboni,+ annuupuwela opwetexa yiiraka:
‘Murwe, nrowe nimala-malihe nloko nla’.
Masi nyuwo Madimeni, mmaale siiso,
Okhala wiira espaata ennoottharani.*
3 OHoronayimi onniiwanyeya okhuwela,+
Oruma wa ehasara yuulupale ni opwetexiwa waaphwannye.
4 Mowabi oopwetexiwa.
Anaawe anninla.
5 Atthu anninla voohimaala okathi aniwela aya ephiro ya oLuhithi.
Ephiro ya oHoronayimi onniiwanyeya okhuwela wooxanka mwaha wa ehasara.+
6 Mutthyawe! Moopole ikumi sanyu!
Mulikaneke ni mwiri wa xuniiperu ori woothakoni.
7 Okhala wiira muroromenle miteko sanyu ni mihakhu sanyu,
Nyuwo munoovariwa.
Kemoxi+ onooroihiwa weepotthani,
Vamosa ni anamukuttho awe ni makhulupale awe.
8 Mulipa-oopwetexa onootuphela ipooma sootheene,
Khiivo epooma enrowa woopowa.+
Oxepani onoopwetexiwa,
Nave opuro woowaataleya onoomala-malihiwa, ntoko Yehova ohimmye awe.
9 Muhele isinaale oMowabi,
Okhala wiira owo onootthyawa okathi onrowa aya opwetexiwa,
Nave ipooma sawe sinrowa okhala etthu yoowoopiha.
Khuuvo onrowa okhalaka.+
10 Ootakhaliwa ole ohinluttuweliwa ovara miteko sa Yehova!
Ootakhaliwa ole ohinirumeela espaata awe wiira iive aahiiso otakhalihe.
11 Atthu a oMowabi toomaaleleya okhuma omiravo aya,
Anlikana ni eviinyu eri mmwaapuni.
Awo khatonko wiitthiwa mmurinkini aheliwaka murinki mukina,
Nave khatonko oroihiwa weepotthani.
Tivonto osiva waya ohinturukeya aya,
Nave wunkhela waya ohiturukeyale aya.
12 “Etthu onihimya awe Yehova, tiila: ‘Anoophiya mahiku, kinrowa aka waaruma alopwana wiira amwarexe. Awo anoomwarexa mpakha ohihala etthu, nuumala-vo anoopwexakasa mirinki saya suulupale. 13 Atthu a oMowabi animuuliwa muru mwaha wa muluku aya Kemoxi, ntoko siisaale atthu a nloko na Isarayeli yuuliwe aya muru mwaha wa itthu yaavara aya oBeteli, weiwo yaaroromela aya.+
14 Xeeni munihimya anyu wiira: “Hiyo na anakhotto ootupa, niri oolikana ene owana ekhotto”?’+
15 Mwene yoowo nsina nawe nri Yehova a anakhotto,+ onihimya wiira:
16 Atthu a oMowabi ehanle waaphwanya ehasara,
Nave opwetexiwa waya ohaattamela.+
17 Atthu ootheene amurukurenrye anoomoonela othunku,
Ootheene ale anisuwela nsina nawe.
Mwaaleele wiira: ‘Vaweryaneyale sai ekopo yoowerya, ttootto ooreera, wunteya?’
18 Mukhuruwe nipuro nanyu noovuwa,
Ni mukilaathi vathi,* nyuwo mwaana mwaamuthiyana munikhala oDiboni,+
Okhala wiira mulipa-oopwetexa a oMowabi ohoorweelani,
Nto owo onoopwetexa mapuro anyu oolipihiwa.+
19 Mweemele mustaraatani ni nwehaweheke, nyuwo atthu anikhala wAroweri.+
Mmukohe mulopwana onitthyawa ni muthiyana ooponwe wiira: ‘Exeeni ekhumelenle?’
20 OMowabi ohuulihihiwa muru ni woopwetexiwa.
Mmunleleke ni mmukhupanyeryeke.
Mulaleye wArinoni+ wiira oMowabi woopwetexiwa.
21 “Ophukeliwa wawe woophiya opuro woowaataleya,+ oHoloni, oYahasa,+ oMefaathi,+ 22 oDiboni,+ oNebo,+ oBethi-Dibilatayimi, 23 oKiriyatayimi,+ oBethi-Gamuli, oBethi-Mewoni,+ 24 oKeriyothi,+ oBosira ni ipooma sootheene sa elapo ya oMowabi, iye sirakamenle ni iye saattamenle.
25 Yehova onihimya wiira: ‘Owerya* wa Mowabi woomala,
Moono awe ohintiwa’.
26 ‘Mmuhapalihe,+ okhala wiira owo ohiittottopa ohoolo wa Yehova.+
Mowabi ohimmaathela marapheyo awe,
Nave owo ookhalihiwa etthu eniveehiwa.
27 Kiira ti nyuwo mwaamoona Isarayeli okhala etthu eniveehiwa?+
Owo aahiphwanyiwa eriyari ya alatarau,
Nto nyuwo mwaahimuttikinyerya muru ni mwaahimulavula voohiloka.
28 Nyuwo atthu a oMowabi, mukhume mpooma ni mwakhaleke munikhukuni.
Mukhaleke ntoko epompa* eniteka epuuru aya oneri’”.
29 “Nihiiwa olavuliwaka wiixinnuwiha wa Mowabi, owo tootepa wiisoona.
Nihiiwa olavuliwaka sa wiisoona wawe, wiixinnuwiha wawe, wiikompela wawe ni wuumiha wawe murima”.+
30 “Yehova onihimya wiira:
‘Miyo kinnisuwela oviruwa wawe,
Nave moolumo awe khankumiherya etthu, awo khanrowa opaka etthu.
31 Tivo kinrowa aka omukhupanyerya Mowabi,
Kinoowunlela atthu ootheene a oMowabi,
Nave kinoowunlela alopwana a oKiri-Heresi.+
Iritta sanyu sirina ithutu soolapuwa ephareya,
Iritta iyo soophiya ophareya mpakha oYazeri.
Okathi mwaahepha anyu mihokorokho sanyu sa elimwe ni ewuuva anyu,
Aahikhumelela mulipa-oopwetexa.+
33 Otteeliwa murima ni ohakalala woomala-mala opuro onaaliwa miri,
Ni elapo ya oMowabi.+
Kihuumiha opuro oninyakattiwa ewuuva.
Khuuvo onrowa otthikela onyakatta ewuuva okhuwelaka mwaha woohakalala.
Okhuwela waya onrowa okhala woovirikana ni okhuwela woohakalala’”.+
34 ‘“Onniiwanyeya okhuwela onikhuma oHexeboni,+ mpakha wEleyale.+
Hata maasi a oNimirimi anoowelela.+
35 Miyo kinommala-maliha oMowabi,
Ole onivaha mikuttho opuro woorakamela osulu,
Ni ole oninvaha mikuttho muluku awe’. Yehova tonihimya.
36 ‘Tivo murima aka onrowa awe omukhupanyerya Mowabi ntoko ephivi,*+
Nave murima aka onrowa aya waakhupanyerya alopwana a oKiri-Heresi, ntoko ephivi.
Mweekeekhai mihakhu siithukumanyenrye awe sinoomala.
37 Atthu ootheene aamettha ikharari,+
Atthu ootheene aamettha ireru saya.
38 “Yehova onihimya wiira:
‘Vasulu va ipa sootheene sa oMowabi,
Opuro awe wootheene woowaatta atthu
Khekhanle etthu ohikhanle paahi wiikhupanyerya,
Kompwexakasa Mowabi ntoko murinki ohinivareliwa muteko’.
39 ‘Owo onnoova! Onniikhupanyerya!
Mowabi oorukunuwa wuulinwe ene muru!
Mowabi ookhalihiwa etthu eniveehiwa,
Etthu enooviwa ni atthu ootheene amurukurenrye’”.
40 “Etthu onihimya awe Yehova, tiila:
‘Mwiiwe! Ntoko siisaale murumaasi onivavela awe etthu yookhuura,+
Owo onoomutapuruxela mapupha awe Mowabi.+
41 Ipooma saya sinookuxiwa,
Nave opuro aya woolipihiwa onookuxiwa.
Nihiku nlo murima wa anakhotto a oMowabi,
Onrowa olikanaka ni murima wa muthiyana oniyara’”.
42 “‘OMowabi onoomala-malihiwa wiira ohikhaleke atthu,+
Okhala wiira atthu a elapo eyo ahiittottopa ohoolo wa Yehova.+
43 Nyuwo atthu a oMowabi,
Woova, nlitti ni muraakho siri ohoolo wanyu’. Yehova tonihimya.
44 ‘Ole onrowa otthyawa mwaha wa woova onoomorela munlittini,
Nave ootheene ale anrowa okhuma munlittini anoovariwa ni muraakho’.
‘Tthiri enoophiya eyaakha Mowabi onrowa awe ohukhummwa’. Yehova tonihimya.
45 ‘Ale anrowa otthyawa animweemela akhulumunwe ene vamuuttutthini wa oHexeboni.
Tthiri, oHexeboni onookhuma mooro,
Nave eriyari ya oSihoni nnookhuma nlumi na mooro.+
Mooro owo onoopaha eyuuci ya Mowabi,
Nave onoopaha muru ohanle makhuva-ru wa anamwane ootakhala’.+
46 ‘Mootakhaliwa nyuwo atthu a oMowabi!
Atthu a oKemoxi+ aamala-malihiwa.
Aniinyu axilopwana aakuxiwa,
Nave aniinyu axithiyana aaroihiwa weepotthani.+
47 Masi mahiku ookiserya kinimwaathukumanya atthu aroihiwe weepotthani a oMowabi.
Ti siiso sinrowa aya omala ophukeliwa wa Mowabi’.+ Yehova tonihimya”.
49 Etthu onihimya awe Yehova aahimyaka atthu a wAmoni,+ tiila:
“Niireke Isarayeli khorina anamwane?
Niireke owo khorina mulipa-oohalana itthu?
Nto xeeni Malikomi+ okunxe awe muttetthe wa oGadi?+
Nave xeeni atthu awe anikhala aya ipooma sa Isarayeli?”
2 “Yehova onihimya wiira: ‘Vano mwiiwe! Anoophiya mahiku,
Kinrowa aka owiiriha wiiwa oruma wa ikhotto* atthu a oRaba+ wa wAmoni.+
Owo onookhala opuro opwetexiwe ni ohinikhaliwa,
Nave mittetthe sawe saamukhaani* sinoopahiwa ni mooro’.
‘Isarayeli onookuxa elapo ya atthu yaale akunxe elapo awe’. Yehova tonihimya.+
3 ‘Mwiikhupanyeryeke, nyuwo munikhala oHexeboni, okhala wiira wAiyati woopwetexiwa
Mukhuweleke, nyuwo munikhala mittetthe saamukhaani sa oRaba.
Nware isaakho.
Munleke ni mutthimakeke mukhumaka mpantta mmosa murowaka mpantta mukina, eriyari ya masisi a maluku,*
Okhala wiira Malikomi onooroihiwa weepotthani,
Vamosa ni anamukuttho awe ni makhulupale awe.+
4 Xeeni muniittottopa anyu mwaha wa mapuro anyu oowaataleya,
Mapuro oowaataleya yaawo arina maasi, nyuwo mwaana mwaamuthiyana oohiroromeleya?
Nyuwo munroromela mihakhu sanyu,
Nave munihimya wiira: “Khuuvo onrowa okituphela”’”.
5 “Pwiya Muulupalexa, Yehova a anakhotto, onihimya wiira: ‘kinimooruuhelani etthu yoowoopiha,
Ipantte sootheene soorukurenryeni.
Munoomwara-mwariwa ipantta sootheene,
Nto khuuvo onrowa waathukumanya ale anitthyawa”’.
6 “Yehova onihimya wiira: ‘Wookiseryani, kinimwaathukumanya atthu akhalihiwe ipottha a wAmoni’”.
7 Etthu onihimya awe Yehova, ohimyaka wEdomi, tiila:
“Niireke khasikhanle miruku oTemaani?+
Siroomala-mala miruku sooreera sa ale arina osuwela?
Niireke miruku saya khasinvareleya-tho muteko?
8 Mutthikele ottuli ni mutthyawe!
Nyuwo atthu anikhala oDedani,+ mwiipithe mukhukuni moowiixerya!
Okhala wiira kinoomukumiherya ehasara Esawu,
Waphiya okathi kinrowa aka omuhukhumu.
9 Vaakhanle wiira alipa-oowuurula ewuuva yaamoorweelani,
Niireke khiyaarowa woohiyeryani iwuuva sikina wiira muttotteke?
Vakhanle wiira alatarau yaamoorweelani ohiyu,
Niireke khiyaarowa okuxa paahi etthu aniphavela aya?+
10 Masi, miyo kinoomukuxa Esawu.
Kinimooniherya mapuro awe aniipitha awe,
Wiira owo ohiipithe-tho.
Anaawe, axinnawe ni ale yaattamanne awe, ootheene aya anoopwetexiwa,+
Nto owo khontthikela-tho okhala mukumi.+
11 Mukihiyerye aniinyu ahirina apapaya.
Nto miyo kinimwaakhapelela wiira akhaleke akumi.
Nave anaamukhweli anyu anookiroromelaka”.
12 Etthu onihimya awe Yehova, tiila: “Mwiiwe! Hata ale ahilamuliwe owurerya ekaalisi ya oviruwa waka, anoowurerya. Nto niireke nyuwo khimwaakhanle oohukhummwa moomalela? Khamunrowa ohukhummwa, okhala wiira muhaana owurya”.+
13 Yehova onihimya wiira: “Miyo koolapha mmansaka, wiira oBosira onookhala opuro woowoopiha,+ etthu enitheiwa, opuro woopwetexiwa ni wootakhalihiwa. Nto ipooma sawe sootheene, sinookhala milepe”.*+
14 Miyo kihiiwa ihapari sinikhuma wa Yehova,
Oorummwa namuhupi wiira ohimeerye maloko wiira:
15 “Moone! Miyo kihookhalihani etthu yoohisuwanyeya eriyari ya maloko,
Muthanyiwaka eriyari ya atthu.+
16 Nyuwo munikhala mmakhukuni mwa myala,
Munikhala mattumuxa ootepexa orakamela osulu,
Moowokiwa okhala wiira atthu anniwoovani,
Ni mwaha wa murima anyu woowiisoona.
Hata mutekaka ipuru sanyu opuro woorakamela osulu, ntoko murumaasi,
Miyo kinimoothomolani”. Yehova tonihimya.
17 “WEdomi onrowa okhala opuro woowoopiha.+ Khula mutthu onrowa oviraka onooweha oovaka, nave onimoopaka muturi mwaha wa ihukhumu sootheene simukhumelenle. 18 Yehova onihimya wiira: “Ntoko siisaale siiraneyale aya ni opwetexiwa wa oSodoma ni oGomora ni ipooma saamwaattamenle,+ khuuvo onrowa okhalaka-wo, nave khuuvo mulopwana onrowa omaka weiwo.+
19 “Mwiiwe! Mapuro oovareleleya anilyihiwa inama, onimoorwa mutthu onlikana ni kharamu,+ onikhuma etakhwa yooriipela, mukerekhere mwa muro Yordani. Masi moowaakuveya, kinoomoomolela ottaiwene wa Edomi. Nto, miyo kinoomuthanlela ole othanliwe. Ti pani onlikana ni miyo? Ti pani onwerya owana ni miyo? Makampusi xeeni oniwerya weemela ohoolo waka?+ 20 Tivonto, nyuwo atthu, mwiiwe etthu Yehova olakenle awe wiiriha wEdomi, ni owiiriha ale anikhala oTemaani:+
Tthiri makoto macikhaani a ipwittipwitthi anooroihiwa ottaiwene.
Owo onimwiiriha mapuro aya anikhaliwa ohikhaliwa, mwaha wa yaawo.+
21 Oruma wa omora wa Edomi, elapo yoothukumela.
Onniiwanyeya wunla!
Oruma wawe ohiiwanyeya mpakha ephareya Yooxeerya.+
22 Mwiiwe! Ntoko murumaasi, owo onoowela ni onimookola mapupha awe,+
Owo onimookolela mapupha awe oBosira.+
Nihiku nlo, murima wa anakhotto a wEdomi,
Onrowa olikanaka ni murima wa muthiyana oniyara”.
23 Moolumo yaahimmwa oDamaasiko:+
“Hamati+ ni Arpadi ohuulihihiwa muru,
Mwaha wa ihapari sootakhala yiiwale aya.
Awo annithuluwa mwaha wa woova.
Ephareya yoonanariwa, khivanweryaneya omaaliha.
24 Atthu a oDamaasiko aayeleela olipa murima.
Awo aniphavela otthyawa, masi annoova.
Owereya ni maxakha ahaaphwanya,
Ntoko muthiyana oniyara.
25 Xeeni epooma enivuwihiwa ehinyanyaliwe aya,
Yeeyo eri epooma enittottopeliwa?
26 Amiravo awe animookhwa mapuro oowaatta atthu,
Nave anakhotto awe ootheene animookhwa nihiku nlo”. Yehova a anakhotto tonihimya.
27 “Miyo kinoorihela mooro exiri ya oDamaasiko,
Yoowo onrowa opaha ipa soorakamela osulu soolipihiwa sa Beni-Hadadi”.+
28 Etthu onihimya awe Yehova ohimyaka oKedari,+ omwene wa oHasori, yoowo okuxiwe ni Nabukodonosori mwene a oBabiloonia, tiila:
“Nvenye, murowe oKedari,
Wiira mwaapwetexe ale anikhala mpantta onikhuma nsuwa.
29 Mwakuxe itenta* saya ni ipwittipwitthi saya,
Ipaanu sa itenta saya ni mireerelo saya sootheene.
Mwakuxe ikamelo saya,
Atthu anookhuwela yiiraka: ‘Ipantta sootheene sinninoopiha!’”
30 Yehova onihimya wiira: “Mutthyawe, murowe ottaiwene!
Mwiipithe mapuro oowaataleya, nyuwo atthu a oHasori.
Nabukodonosori* mwene a oBabiloonia, onnuupuwela owiirelani etthu,
Owo ompaka palano a moota woowootuphelani”.
31 “Nvenye, murowe mwatuphele maloko yaawo ari ni murettele,
Anikhala oovareleleya!” Yehova tonihimya.
“Awo kharina mikhora nnakhala itaranka, nave anikhala mekhaya.
32 Ikamelo saya sinookuxiwa,
Nave inama saya soowaatta sinookuxiwa.
Kinimwaamwara-mwarela ipantta sootheene,
Ale anithikila ikharari mukerekhere,+
Nave kinimwaaroihela ehasara ipantta sootheene”. Yehova tonihimya.
33 OHasori onoopakeya opuro oniipitha alapwa a mutakhwani,
Onookhala milepe okathi wootheene.
Khuuvo onrowa okhalaka-wo,
Nnakhala khuuvo mulopwana onrowa omaka”.
34 Moolumo a Yehova, yaasuwelihiwe awe profeta Yeremiya, yaahimya wElami,+ woopaceryani wa olamulelo wa Sedekiya mwene+ a oYuda, taala: 35 “Etthu onihimya awe Yehova a anakhotto, tiila: ‘Kinimunta muura wa wElami,+ yoowo ori maphattuwelo* a owerya waya. 36 Kinoomuroihela Elami ipheyo xexe,* sa ipantta ixexe sa erimu, nave atthu awe kinimwaamwara-mwarela ipantta sootheene sa epheyo eyo. Atthu a wElami anrowa omwara-mwariwa anoorowa wa khula nloko’”.
37 Yehova onihimya wiira: “Miyo kinoowiiriha atthu a wElami woova ohoolo wa awanani aya ni ale aniphavela owiiva, kinimwaaroihela ehasara ni oviruwa waka wuulupale. Nave kinimwaaroihela espaata* mpakha waamala-maliha”.
38 Yehova onihimya wiira: “Miyo kinoopweha ehice aka wElami,+ nave kinompwetexa mwene ni makhulupale”.
39 “Yehova onihimya wiira: “Masi, mahiku ookiserya, miyo kinimwaathukumanya atthu akhalihiwe ipottha a wElami”.
50 Moolumo Yehova aalavunle awe ohimyaka oBabiloonia,+ ohimyaka elapo ya atthu a oKhaldeya, omurumeelaka profeta Yeremiya, taala:
2 “Muhimye etthu ela eriyari ya maloko ni mulaleye.
Mooniherye esinaale ni mulaleye.
Muhivithe nnakhala etthu emosa!
Muhimye wiira: ‘Babiloonia ookuxiwa.+
Beli ohuulihihiwa muru.+
Merodaki onnoova.
Ilatarato sawe sihuulihihiwa muru.
Ilatarato sawe soohiirya* sinnithukumela’.
3 Tthiri nihoorwa nloko nikhumaka onorti wiira nimutuphele.+
Nloko nlo nihiiriha elapo awe okhala etthu yoowoopiha,
Khuuvo onikhala-mo.
Atthu ni inama aatthyawa,
Awo aarowa”.
4 Yehova onihimya wiira: “Mahiku awo ni okathi owo atthu a Isarayeli ni atthu a oYuda animoorwa vamosa.+ Awo anrowa wunlaka yeettaka,+ nave ootheene aya anomphavela Yehova Muluku aya.+ 5 Awo anrowa okohererya ephiro ya oSiyoni, awehaka weiwo,+ ariki: ‘Murwe, nitthikele okhala atthu a Yehova nipakaka nivarihano nihinimala, nenlo nihinrowa oliyaliwa’.+ 6 Atthu aka aakhalihiwa nikoto na ipwittipwitthi soorimeela.+ Amakampusi aya ti yaahapunxe.+ Awo ahaaroiha omiyaakoni, aawiiriha weettakasa omiyaakoni ni mmattumuxani. Awo aaliyala opuro aya woophumurya. 7 Ootheene ale anaaphwanya annaakhuura,+ nave awanani aya annihimya wiira: ‘Hiyo khanrina mulattu, okhala wiira awo aamutthekela Yehova. Tthiri Yehova owo tori opuro wa xariya ni nlipelelo na amuhavinre aya’”.
8 “Mutthyawe eriyari ya oBabiloonia,
Mukhume elapo ya atthu a oKhaldeya,+
Nave mukhaleke ntoko ipuri aahiiso ipwittipwitthi sinihoolela nikoto.
9 Tthiri miyo kinookumiherya ni kinooroiha oBabiloonia
Muttitthi muulupale wa maloko anikhuma elapo ya onorti.+
Awo animoorwa ni anootuphela oBabiloonia yiilokihenrye ene owana ekhotto.
Okhuma nihiku nlo Babiloonia onookuxiwa.
Awo khantthika ahivanre muteko aya.
10 OKhaldeya onookuxiwa.+
Ootheene ale anrowa okuxa mireerelo sa oKhaldeya anookhalana mireerelo soowaatta”.+ Yehova tonihimya.
11 “Tthiri nyuwo mwaamakela otteeliwa murima,+
Mwaamakela otthapa okathi mwaakuxa anyu etthu kihiyeriwe aka.+
Nyuwo mwaamakela otupha ntoko epooyi yaamukhaani eri mmalaxini,
Nave mwaamakela onyakula ntoko ikhavalo siniira aya.
12 Maama anyu ohuulihihiwa muru.+
Ole ooyanreni ooveeheya.
Moone! Owo tootepexa oyeva eriyari ya maloko,
Nave ti othako ohirina maasi.+
13 Mwaha wa onanariwa wa Yehova, oBabiloonia khonrowa okhala mutthu,+
Onrowa okhala opuro ohinikhaliwa.+
Khula mutthu onrowa oviraka oBabiloonia onrowa woovaka,
Nave onrowa woopaka muturi mwaha wa ihukhumu sootheene simukhumelenle.+
14 Mmutuphele Babiloonia mwiilokihenrye ene owana ekhotto mapuro ootheene,
Nyuwo ootheene mukonkhe muura.
15 Mmukhuwelele owana ekhotto mapuro ootheene.
Owo ohiivahererya.*
Nave nyuwo mmunlele ikuhu.
Mmwiirihe etthu emosa-ru opanke awe.+
16 Mummala-malihe oBabiloonia mulipa-oowaala,
Mwaha wa espaata yootakhala,* khula mutthu onootthikela wa atthu awe,
Nave khula mutthu onootthyawela elapo awe.+
17 “Atthu a Isarayeli anlikana ni ipwittipwitthi simwara-mwareyale.+ Iyo soomwara-mwariwa ni akharamu.+ Mwene a wAsiiria topacenrye okhuura,+ nuumala-vo mwene Nabukodonosori* a oBabiloonia onamaliherya makhuva aya.+ 18 Vano, etthu onihimya awe Yehova a anakhotto, Muluku a Isarayeli, tiila: ‘Miyo kinoomwiiriha mwene a oBabiloonia ni elapo awe, etthu emosa-ru kimwiirinhe aka mwene a wAsiiria.+ 19 Nto miyo kinoomuttikiherya Isarayeli opuro awe onilya awe,+ nave owo onimoolya malaxi a oKarmelo ni a oBaxani.+ Owo onoovona omiyaakoni wa Efrayimi+ ni oXileyaadi’”.+
20 Yehova onihimya wiira: “Mahiku awo ni okathi owo,
Onimwaaviwa mulattu wa atthu a Isarayeli,
Masi khonrowa ophwanyiwa.
Nave itampi sa atthu a oYuda khasinrowa ophwanyiwa,
Okhala wiira kinimwaalevelela ale kinrowa aka waahiya”.+
21 Yehova onihimya wiira: “Murowe mwatuphele elapo ya oMaratayimi ni mwaatuphele atthu a oPekodi.+
Mwawiivakase ni mwaapwetexe voomalela.
Mwapake itthu sootheene koorummyaakani.
22 Onniiwanyeya oruma wa ikhotto mulaponi,
Enniiwanyeya ehasara yuulupale.
23 Mooneke moota ophwatakasiwe awe ni opwexakasiwe awe maritelo aapwexakasa maloko ootheene a mulaponi!+
Mooneke moota Babiloonia okhalihiwe awe etthu yoowoopiha eriyari ya maloko!+
24 Nyuwo Babiloonia, miyo kihooreyani muraakho,
Nave moovariwa, muhisuwelaka.
Nyuwo moophwanyiwa ni mookuxiwa,+
Okhala wiira monvirikanya Yehova.
25 Yehova oohula opuro onisuka awe ikaruma sawe sa ekhotto,
Nave onookumiherya ota ikaruma sawe sa ekhotto onanariwe ene.+
Tthiri, Pwiya Muulupalexa, Yehova a anakhotto, ookhalana muteko woovara
Elapo ya atthu a oKhaldeya.
26 Murwe mmutuphele mukhumaka mapuro ottaiwene.+
Muhule opuro awe onisuka awe yoolya.+
Mmuthukumanye ntoko sinithukumanyiwa aya mavisi a ipyo.
Mumpwetexe voomalela.+
Nto owo ohihalane etthu.
27 Mwiivakase ipooyi sawe sootheene saamukhaani.+
Muroihe opuro sinrowa aya wiiviwa.
Sootakhaliwa ipooyi iyo, okhala wiira noophiya nihiku naya,
Okathi aya woophukeliwa!
28 Onniiwanyeya onyakula wa atthu anitthyawa,
Ale anoopowa elapo ya oBabiloonia,
Wiira yalaleye oSiyoni wunla ikuhu wa Yehova, Muluku ahu,
Wunla ikuhu mwaha wa etemplo awe.+
29 Nwiihane alipa ootheene anivonya mattheere wiira arowe oBabiloonia.
Ootheene ale anikokha muura,+
Amurukurerye Babiloonia, ohikhale onoopowa.
Mmulive muttharaka miteko sawe.+
Mmwiirihe etthu emosa-ru opanke awe.+
Owo oomwiisoonela Yehova,
Onvirikanyaka Muluku Oowaarya a Isarayeli.+
30 Amiravo awe anoomora mapuro oowaatta atthu,+
Nave anakhotto awe ootheene animookhwa nihiku nlo”. Yehova tonihimya.
31 Pwiya Muulupalexa, Yehova a anakhotto, onihimya wiira: “Mwiiwe! Miyo kinnoovirikanyani nyuwo,+ mulipa-oowiisoona.+
Tthiri nihiku nanyu nnoophiya, okathi kinrowa aka woohukhumuni.
Vano miyo kinoopattiha mooro ipooma sanyu,
Nto mooro owo onoopaha itthu sootheene soorukurenryeni”.
33 Etthu onihimya awe Yehova a anakhotto, tiila:
“Atthu a Isarayeli ni atthu a oYuda annihaaxiwa,
Ale yaakunxe ntoko ipottha annaasuka.+
Awo khaniphavela waahiya arowaka.+
34 Masi Moopoli aya ta ikuru.+
Nsina nawe ti Yehova a anakhotto.+
Tthiri owo onoowaakiherya mulattu aya,+
Wiira yaphumurye elapo aya,+
Ni onoowiiriha othukumela atthu a oBabiloonia”.+
35 Yehova onihimya wiira: “Enookhumelela espaata enrowa waapwetexa atthu a oKhaldeya,
Atthu a oBabiloonia, makhulupale aya ni asuweli aya.+
36 Enookhumelela espaata enrowa waapwetexa maprofeta oowootha, nto awo anrowa okhalaka ntoko alolo.
Enookhumelela espaata enrowa waapwetexa anakhotto aya, nto awo anrowa othukumelaka.+
37 Enookhumelela espaata enrowa opwetexa ikhavalo saya ni ikaaro saya sa ekhotto,
Enookhumelela espaata enrowa waapwetexa atthu ari eriyari aya,
Nto awo anrowa okhalaka ntoko athiyana.+
Enookhumelela espaata enrowa ohonona mihakhu saya, nto iyo sinookuxiwa.+
38 Maasi aya anoohononiwa, nto awo animuuma.+
Mwaha wookhala elapo ya ilatarato soopatthiwa,+
Ni mwaha wa wooniheriwa itthu sootikiniha, awo animakela opaka itthu ntoko alolo.
39 Tivo, inama sa moothakoni sinrowa okhalaka vamosa ni alapwa a mutakhwani,
OBabiloonia khonrowa okhaliwaka,
Nave khuuvo onrowa okhalaka-wo mpakha maloko anrowa okhumelela ohoolo”.+
40 Yehova onihimya wiira: “Ntoko siisaale siiraneyale aya okathi Muluku aapwetenxe awe oSodoma ni oGomora+ ni ipooma saya soowaattamela,+ khuuvo onrowa okhalaka oBabiloonia, nave khuuvo mulopwana onrowa omaka weiwo.+
41 Mwiiwe! Atthu annoorwa akhumaka onorti,
Nloko nuulupale ni mamwene oowerya+ anoovenya
Akhumaka ipantta soorakamela sa mulaponi.+
42 Awo aakokha muura ni mattheere.+
Awo tootakhala ni khanimoriwa ikharari.+
Onyakula waya onlikana ni onyakula wa ephareya,+
Okathi aneettiha aya ikhavalo saya.
Nyuwo mwaana mwaamuthiyana a oBabiloonia, okathi aniilokiherya aya owana ekhotto ni nyuwo, awo anniiraana ntoko mutthu mmosa.+
Owo onnihaawa,
Onnoona owereya ntoko muthiyana oniyara.
44 “Mwiiwe! Mapuro oovareleleya anilyihiwa inama, onimoorwa mutthu onlikana ni kharamu, onikhuma etakhwa yooriipela, mukerekhere mwa muro Yordani. Masi moowaakuveya, kinoowoomolela ottaiwene wa elapo aya. Nto, miyo kinoomuthanlela ole othanliwe.+ Ti pani onlikana ni miyo? Ti pani onwerya owana ni miyo? Makampusi xeeni oniwerya weemela ohoolo waka?+ 45 Tivonto, nyuwo atthu, mwiiwe etthu Yehova olakenle awe owiiriha atthu anikhala oBabiloonia,+ naale anikhala elapo ya atthu a oKhaldeya.
Tthiri makoto macikhaani a ipwittipwitthi anooroihiwa ottaiwene.
Owo onimwiiriha mapuro aya anikhaliwa ohikhaliwa, mwaha wa yaawo.+
46 Mwaha wa onyakula okathi Babiloonia onrowa awe okuxiwa, elapo enoothukumela,
Nave onimwiiwanyeya wunliwa eriyari ya maloko”.+
51 Etthu onihimya awe Yehova, tiila:
“Kinookumiherya epheyo enipwetexa,
Yeeyo enrowa opwetexa oBabiloonia+ ni atthu anikhala oLebo-kamayi.*
2 Kinimwaaruma atthu wiira yakwese oBabiloonia,
Ntoko siisaale epheyo enivaviha aya malaxi,
Awo anoorukurerya ipantte sootheene nihiku na ehasara.+
3 Ole onivonya mattheere* ohikokhe muura awe.
Ohikhale onivenya ni ekuleti awe ya yuuma.
Muhaamorele ikharari amiravo awe,+
Mwaavahererye anakhotto awe ootheene wiira apwetexiwe.
4 Awo animookhwa elapo ya atthu a oKhaldeya,
Ahommwaka mustaraatani mwa oBabiloonia.+
5 Isarayeli ni Yuda khahiiwale* ni Muluku aya, Yehova a anakhotto.+
Masi elapo aya* yoosareya mulattu vamaithoni va Muluku a Isarayeli.
6 Mutthyawe eriyari ya oBabiloonia,
Ni moopole okumi anyu.+
Muhiiviwe mwaha wa etampi awe.
Okhala wiira owo okathi Yehova onrowa awe wunla ikuhu.
Owo onoomuliva moovarihana ni etthu opanke awe.+
7 Babiloonia oopakeya ekaalisi ya eweero mmatatani mwa Yehova,
Owo oohapaliha elapo yootheene.
8 Vootutuxerya Babiloonia oomora ni oophweeya.+
Mmukhupanyeryeke!+
Mmuruuhe baalsamu wiira oheliwe opuro onoona awe owereya, woonasa wene onoopenuwa”.
9 “Niheererya ompenuxa Babiloonia, masi owo khonipenuwa.
Mmuhiye, nrowe, khula mutthu otthikeleke elapo awe.+
Tthiri ophukeliwa wawe woophiya wiirimu,
Woophiya osulu ntoko meeku.+
10 Yehova oonikumiherya exariya.+
Murwe, nilaleye oSiyoni miteko sa Yehova Muluku ahu”.+
11 “Munone mattheere,+ ni mukuxe makula oowiixaakiha* oovilikeya.
Yehova ohiiriha mirima sa mamwene a oMedia,+ ophavela orowa okhottoni,
Okhala wiira oniphavela ompwetexa Babiloonia.
Iwo wunla ikuhu wa Yehova, wunla ikuhu mwaha wa etemplo awe.
12 Mweemexe esinaale+ ixiri sa oBabiloonia.
Nwuncererye makwarta ni mwaapwehe alipa-oowehaweha opuro aya.
Mwaalokiherye ale anrowa wiipithela.
Yehova ompaka palano a moota woowana,
Nave owo onoomaleliha ele elakenle awe owiiriha atthu a oBabiloonia”.+
13 “Nyuwo muthiyana munikhala mapuro ari maasi manceene,+
Murina mihakhu sinceene,+
Okathi anyu woomala, mihakhu sanyu soomala.+
14 Yehova a anakhotto oolapha mmansawe, oriki:
‘Kinimooruuhelani alopwana anceene, oowaatta ntoko nasope,
Nto awo anookhuwela atthapaka mwaha wa nyuwo’.+
15 Owo ti yoole opanke elapo ni owerya wawe,
Aatanle etthaya yooruwerya ni miruku sawe,+
Nave ti yoowo aatanle erimu ni osuwela wawe.+
16 Okathi oniiwanyeya aya nsu nawe,
Maasi a wiirimu anninyakula.
Nave owo onniiriha meeku* owela osulu, akhumaka omalenle elapo.
17 Alopwana ootheene annipaka itthu voohuupuwela ni voohisuwela.
Alopwana ootheene anivara muteko ni eweero, animuuliwa muru mwaha wa ilatarato saya soopatthiwa,+
Okhala wiira ilatarato saya sa eyuuma ti seethiru,
Nave khasirina iphumu.+
18 Ilatarato iyo ethiru,+ miteko soothanyiwa.
Naphiya nihiku Muluku onrowa awe opwetexa ilatarato iyo, sinoomala-mala.
19 Itthu ovahiwa awe Yakobe khasinlikana ni iya,
Okhala wiira Muluku topanke itthu sootheene,
Hata ttootto awe ohiyeriwe awe.+
Nsina nawe ti Yehova a anakhotto”.+
20 “Nyuwo mwa enyutto* ya okhottoni eri mmatatani mwaka, nyuwo mwa ekaruma ya ekhotto,
Okhala wiira koorumeelakani nyuwo kinoomala-maliha maloko.
Nave koorumeelakani nyuwo kinoopwetexa omwene wootheene.
21 Koorumeelakani nyuwo kinoomala-maliha ikhavalo ni ale aneettiha.
Nave koorumeelakani nyuwo kinoomala-maliha ikaaro sa ekhotto ni alipa aneettiha.
22 Koorumeelakani nyuwo kinimwaamala-maliha alopwana ni athiyana.
Koorumeelakani nyuwo kinimwaamala-maliha alopwana oowuuluvala ni anamwane.
Koorumeelakani nyuwo kinimwaamala-maliha amiravo ni aximwali.
23 Koorumeelakani nyuwo kinimwaamala-maliha amakampusi ni ipwittipwitthi saya.
Koorumeelakani nyuwo kinimwaamala-maliha alimi ni ikurupu saya sa inama.
Koorumeelakani nyuwo kinimwaamala-maliha makuvernatoro ni anamalamulela.
24 Nto miyo kinoomuliva Babiloonia ni atthu ootheene anikhala oKhaldeya,
Mwaha wa itthu sootheene sootakhala apanke aya oSiyoni ohoolo waka”.+ Yehova tonihimya.
25 Yehova onihimya wiira: “Nyuwo mwaako woopwetexa,+
Miyo kinimooruuhelani mulipa onipwetexa elapo yootheene.+
Kinimookola ntata naka wiira kiwane ni nyuwo, kinimoopirikixani vamwala,
Nave kinoowiirihani okhala mwaako woovya”.
26 Yehova onihimya wiira: “Atthu khanrwa wa nyuwo arweelaka nluku nuulupale aahiiso nluku na alisenso,
Okhala wiira kinimookhalihani opuro ohinikhaliwa mahiku ootheene”.+
27 “Mweemexe esinaale elapo eyo.+
Moope nlope eriyari ya maloko.
Muthanle* maloko wiira yamutuphele.
Mmwiihanele omwene wootheene a wArarati,+ oMini ni wAxikenazi.+
Mmwiihanele makhulupale a anakhotto
Mmuruuhele ikhavalo, soowaatta ntoko isoope saamukhaani.
28 Muthanle maloko wiira amutuphele,
Mamwene a oMedia,+ makuvernatoro ni anamalamulela aya ootheene,
Vamosa ni ilapo sootheene anilamulela aya.
29 Elapo ennittikinyeya ni ennithukumela,
Okhala wiira etthu Yehova onuupuwela awe omwiirela Babiloonia enimwiiraneya,
Wiira iirihe elapo ya oBabiloonia okhala etthu yoowoopiha ni ohiye ehikhaliwaka.+
30 Anakhotto a oBabiloonia aahiya owana.
Awo aakilaathi mapuro aya oolipihiwa.
Sihaamalela ikuru.+
Awo anlikana ni athiyana.+
Ipa saya soopahiwa ni mooro.
Itaranka saya soopwexakasiwa.+
31 Nave namuhupi onnimutthimakela namuhupi mukhwaawe,
Mulipa-oorummwa onnimutthimakela mulipa-oorummwa mukina
Wiira amuleele mwene a oBabiloonia wiira epooma awe enookuxiwa ipantta sootheene,+
32 Ni wiira mapuro anilapuuwa miro, aakuxiwa,+
Apakiti aapahiwa ni mooro,
Nave anakhotto annoova”.
33 Etthu onihimya awe Yehova a anakhotto, Muluku a Isarayeli, tiila:
“Mwaana mwaamuthiyana a oBabiloonia onlikana ni opuro oninyakattiwa ewuuva.
Onoophiya okathi onrowa awe onyakeliwa vanceene.
Moohipisa-va, onoophiya okathi awe woohemphwa”.
Owo ookirihela vathi ntoko evaasu ehirina etthu.
Owo ookimirya ntoko enowa yuulupale,+
Oosariha erukulu awe ni itthu saka sooreera.
Owo ookirihela ota.
35 ‘Itthu sootakhala kiireliwe aka ni siireliwe aya erutthu aka simorele oBabiloonia!’ onihimya tuule onikhala oSiyoni.+
‘Nave ephome aka yaamorele atthu anikhala oKhaldeya!’, onihimya Yerusalemu”.
36 Tivonto, etthu onihimya awe Yehova, tiila:
Kinimuumiha ephareya awe ni ihime sawe.+
37 OBabiloonia onrowa okhala ntoko maluku oowuukeliwa+
Ni opuro oniipitha alapwa a mutakhwani,+
Onrowa okhala etthu yoowoopiha ni etthu enoopeliwa muturi,
Weiwo ohinrowa okhaliwaka.+
38 Ootheene aya animoopa murukulu ntoko akharamu acikhaani.
Animunla ntoko axaana a kharamu”.
39 Yehova onihimya wiira: “Okathi anrowa aya otthapaka,
Kinimwaalokiherya yoolya ni kinimwaahapaliha,
Wiira atteeliweke murima.+
Nuumala-vo, awo anoorupa vanceene vahinrowaaya-tho owerya ovenya”.+
40 “Kinoowiiva ntoko ipwittipwitthi saamukhaani sinrowa ohitiwa,
Ntoko ipwittipwitthi soolopwana ni ipuri”.
41 “Nyuwo Xexaki,* nvariwe sai?+
Mooneke moota evariwe aya epooma yaattottopeliwa ni atthu ootheene!+
Moota Babiloonia okhanle awe etthu yoowoopiha eriyari ya maloko!
42 Ephareya yoophiya oBabiloonia.
Yookhuneela ni mawimpi aya oowaatta.
43 Ipooma sawe sookhalihiwa etthu yoowoopiha, elapo yoowuuma ni ya othako.
Elapo ehinrowa okhaliwaka ni ehinrowa oviraka mutthu.+
Maloko khanrowa okhuma-tho wa yoowo.
Exiri ya oBabiloonia enoomora.+
45 Atthu aka, mukhume eriyari awe!+
Moopole ikumi sanyu+ mutthyawaka onanariwa wa Yehova!+
46 Muhikhulumuwe nnakhala muhoove mwaha wa ihapari sinrowa anyu wiiwaka mulaponi.
Mwaakha mmosa paahi, sinimoorwa ihapari,
Nave mwaakha mukina, sinimoorwa ihapari sikina,
Sa otakhala wa elapo, namalamulela onvirikanyaka namalamulela mukina.
47 Tivonto, Mwiiwe! Anoophiya mahiku,
Kinrowa aka opwetexa ilatarato soopatthiwa sa oBabiloonia.
Elapo awe yootheene enimuulihihiwa muru,
Nave atthu awe ootheene yiivakasiwe anoomorela eriyari awe.+
48 Erimu, elapo ni itthu sootheene siri memmo,
Sinootthapa voohakalala mwaha wa Babiloonia,+
Okhala wiira alipa-oopwetexa anoomurweela akhumaka onorti”.+ Yehova tonihimya.
49 “Khahiyo paahi atthu ookhwa a Isarayeli amorenle oBabiloonia,+
Masi-tho anoomorela oBabiloonia atthu ookhwa a elapo yootheene.
50 Nyuwo mooponwe espaata,* muroweke, muheemele!+
Muri ene ottaiwene, mmuupuweleke Yehova,
Nave mmuupuweleke Yerusalemu”.+
51 “Nihuulihihiwa muru, okhala wiira nihiiwa oruwaniwa.
Wuuliwa muru wookhuneela owiitho wahu,
Okhala wiira anamurwa* ahoorwa mapuro oowaarya a empa ya Yehova”.+
52 Yehova onihimya wiira: “Tivonto, mwiiwe, anoophiya mahiku,
Kinrowa aka opwetexa ilatarato soopatthiwa,
Nave elapo yootheene, ale avulalihiwe anrowa aya wunla”.+
53 Yehova onihimya wiira: “Hata Babiloonia orowaka mpakha osulu,+
Hata mapuro awe oolipihiwa alipihiwaka-tho,
Alipa-oopwetexa kinrowa aka waaruma anoophiya”.+
54 “Mwiiwe! Onniiwanyeya okhuwela onikhuma oBabiloonia,+
Oruma wa ehasara yuulupale onikhuma elapo ya atthu a oKhaldeya,+
55 Okhala wiira Yehova onimpwetexa Babiloonia,
Owo onoomaaliha nsu nawe nuulupale.
Mawimpi awe anninyakula ntoko maasi oowaatta,
Onimwiiwanyeya oruma wa nsu naya.
Miyuura saya sinimuntakasiwa,
Okhala wiira Yehova ti Muluku onihukhumu.+
Tthiri, owo onoohukhumu.+
57 Miyo kinimwaahapaliha makhulupale awe, asuweli awe,+
Anamalamulela awe, makhulupale awe a nenli ni anakhotto awe.
Nto awo anoorupa vanceene,
Ahinrowa aya owerya ovenya”.+ Mwene yoowo nsina nawe nri Yehova a anakhotto, tonihimya.
58 Etthu onihimya awe Yehova a anakhotto, tiila:
“Nnaamwi exiri ya oBabiloonia eri ene yuulupale, enoopwexakasiwa moomalela.+
Mikhora saya nnaamwi siri ene soorakama, sinoopahiwa ni mooro.
Atthu enavara muteko mahala,
Nave maloko anookhulumuwa wiira yincererye mooro”.+
59 Ela yooruma ya profeta Yeremiya anvanhe awe Seraya, mwaana a Neriya,+ mwaana a Mahaseya, okathi owo aarowa awe oBabiloonia ni Sedekiya, mwene a oYuda eyaakha ya neexexe ya olamulelo awe. Seraya aaweherya itthu sa mwene. 60 Yeremiya aahilepa muliivuruni ihasara sootheene saarowa omukhumelela Babiloonia, moolumo ala ootheene yaalempwale ohimmwaka Babiloonia. 61 Ohiya-vo, Yeremiya aahimuleela Seraya wiira: “Okathi munrowa anyu ophiya oBabiloonia, nweha muttetthe owo, musome ni nsu noowiiwanyeya moolumo ala ootheene. 62 Muhimye wiira: ‘Yehova, nyuwo moohimya wiira opuro ola onoopwetexiwa ni wiira khonrowa okhaliwaka nnakhala ni atthu aahiiso inama. Moohimya-tho wiira opuro ola onrowa okhala milepe* mahiku ootheene’.+ 63 Nto okathi munrowa anyu omaliha osoma eliivuru ela, mutthukwelele nluku nuumala-vo murihele omuro Eufrate. 64 Moottharelana muhimye wiira: ‘Ti siisa Babiloonia onrowa awe omoroxiwa ni khontthikela-tho ovenya,+ mwaha wa ehasara kinrowa aka omukumiherya. Nto, atthu awe anookhulumuwa’”.+
Moolumo a Yeremiya animalela vaava.
52 Sedekiya+ aarina iyaakha 21 okathi aakhanle awe mwene, nave aahilamulela iyaakha 11 oYerusalemu. Maama awe aihaniwa Hamutali,+ mwaana mwaamuthiyana a Yeremiya, a oLiibina. 2 Owo khaahiyale opaka itthu sootakhala vamaithoni va Yehova, ottharaka itthu sootheene Yoyakiimi aapanke awe.+ 3 Itthu iya saahakhumelela atthu a oYerusalemu ni a oYuda, mwaha wa onanariwa wa Yehova, mpakha owoomola atthu awe ohoolo wawe.+ Vano Sedekiya aahimurukunuwela mwene a oBabiloonia.+ 4 Eyaakha ya neethanu neexexe ya olamulela wa Sedekiya, mweeri wa namuloko, nihiku 10 na mweeri owo, mwene Nabukodonosori a oBabiloonia, aahirowa oYerusalemu ni anakhotto awe ootheene. Awo yaahimaka opuro owo wiira atuphele, ni yaahiteka exiri yaarukurerya epooma yootheene.+ 5 Nto, epooma ele yaahirukureriwa mpakha eyaakha ya namuloko ni mmosa ya mwene Sedekiya.
6 Mweeri wa neexexe, nihiku 9 na mweeri owo,+ yaahikhumelela etala yuulupale epooma ele, nto atthu a elapo ele khiyaarina yoolya.+ 7 Wookiseryani waya, ixiri sa epooma saahiphweeya nto anakhotto ootheene yaahitthyawa mpooma ohiyu aviraka mukhora waari eriyari ya ixiri piili, waattamela exarti ya mwene, nlelo atthu a oKhaldeya arukurenrye ene epooma. Nto awo yaatthara ephiro yaarowa wAraba.+ 8 Masi, anakhotto a oKhaldeya yaahimoomola mwene Sedekiya,+ anvara opuro woowaataleya wa woothakoni wa oYeriko. Nto atoropa awe ootheene yaahimwara-mwareya. 9 Moottharelana, yaahimukuxa mwene amuroiha wa mwene a oBabiloonia, oRibla, elapo ya oHamati, nto owo aahimulamula. 10 Vano mwene a oBabiloonia aahiwiiva anamwane a Sedekiya ohoolo wawe. Nave owo aahiwiiva makhulupale ootheene a oYuda, oRibla weiwo. 11 Nuumala-vo, mwene a oBabiloonia aahisyoola maitho a Sedekiya,+ omutthukwa ni ikwirinti sa ekoopiri, omuroiha oBabiloonia. Nto aahimutthukwela mukhatteya mpakha nihiku aakhwiiye awe.
12 Mweeri wa neethanu, nihiku 10 na mweeri owo, eyo piiyo, eyaakha ya namuloko ni thanu neexexe ya mwene Nabukodonosori a oBabiloonia, Nebuzaradani xeefi a makwarta, murumeyi a mwene a oBabiloonia, aahiphiya oYerusalemu.+ 13 Owo aahipaha empa ya Yehova,+ empa ya mwene ni ipa sootheene sa oYerusalemu. Nave-tho, aahipaha ipa sootheene suulupale. 14 Vano, ixiri saarukurenrye oYerusalemu saahipwexakasiwa ni anakhotto ootheene a oKhaldeya, yaawo yaari ni xeefi a makwarta.+
15 Nebuzaradani xeefi a makwarta, aahaaroiha weepotthani ale yaarina murima wooloka, ni ale yaahiiwale epooma ele. Nave-tho, owo aahaakuxa ale yaamutthyanwe mwene a oBabiloonia, vamosa ni ale yaahanle yaavara muteko ni matera.+ 16 Masi, Nebuzaradani xeefi a makwarta aahaahiya atthu akina ootepexa ohaawa a elapo ele, wiira avareke miteko imatta sa ewuuva ni avareke miteko sookhanyereriwa.+
17 Atthu a oKhaldeya yaahipwexakasa ipilaari sa ekoopiri+ sa empa ya Yehova, vamosa ni ikarinyu,+ epasiya yuulupale ya ekoopiri+ yaaheliwa maasi, yeeyo yaakhala empa ya Yehova, akuxa ekoopiri yootheene aroiha oBabiloonia.+ 18 Nave-tho, awo yaahikuxa itthu saaheliwa ettuurwa, ipoxolo, itisora saathikilaniwa ntthampo noovya, itixela,+ ikoopho+ ni mireerelo sootheene sa ekoopiri saavareliwa muteko mutemplo. 19 Xeefi a makwarta aahikuxa ipasiya,+ ixamaniiya, itixela, ikaruma sootheene saarumeeliwa, mithuko,+ ikoopho ni itixela saari sa eweero yooreera ni eparatha yooreera.+ 20 Ekoopiri ya ipilaari piili, epasiya yuulupale ya ekoopiri yaaheliwa maasi, ipooyi 12 sa ekoopiri+ saari vathi va epasiya eyo, ni ikarinyu seiyo mwene Salomooni aapanke awe wiira sirumeeliweke empa ya Yehova, khivaaweryaneya osuweliwa olemela waya.
21 Khula epilaari orakama waya yaari etthu yoowiiraka imeeturu 8,* nave mukhoyi woophimana waarina imeeturu soowiiraka thanu* waaniwerya orukurerya.+ Munnuwelo aya waari etthu yoowiiraka isentiimeturu 7,* nave eyo khiyaarina etthu muhina mwaya. 22 Nave vasulu vaya naahikhala nlipiheryo na ekoopiri. Orakama wa nlipiheryo nimosa waari etthu yoowiiraka imeeturu piili,*+ nave areeti ni ilatarato sa muhokorokho oniitthaniwa roma saarukurenrye nlipiheryo nlo, sootheene saari sa ekoopiri. Epilaari ya nenli, yaamulikana ni ekhwaaya, nave-tho ilatarato sa muhokorokho oniihaniwa roma saamulikana. 23 Mukerekhere mwaya saahikhala ilatarato sa mihokorokho siniihaniwa roma 96. Otakaaha sootheene, saahikhala ilatarato 100 sa mihokorokho siniihaniwa roma saamurukurenrye reeti.+
24 Nave-tho, xeefi a makwarta aahimukuxa mukhulupale a anamukuttho Seraya,+ namukuttho a nenli Sefaniya+ ni makwarta mararu.+ 25 Aahimukuxa-tho mukhulupale a epooma yoowo aari kumantanti a atoropa, atthu 7 yanvaha miruku mwene yaawo yaari opooma, sekretaario a xeefi a anakhotto yoowo aakeliha etoropa atthu a elapo ele ni alopwana 60 a elapo ele yaawo nlelo yaari opooma. 26 Nebuzaradani xeefi a makwarta, aahaakuxa atthu awo aaroiha wa mwene a oBabiloonia, oRibla. 27 Mwene a oBabiloonia aahiwiiva atthu awo, oRibla,+ elapo ya oHamati. Siiso, atthu a oYuda yaahikuxiwa elapo aya aroihiwaka weepotthani.+
28 Nummeru na atthu Nabukodonosori* aaroihale awe weepotthani, tinla: Eyaakha ya neethanu nenli, yaari ayuda 3.023.+
29 Eyaakha ya namuloko ni thanu na tthaaru ya Nabukodonosori,*+ yaahikuxiwa atthu 832 oYerusalemu.
30 Eyaakha ya namuloko miili ni miraru ya Nabukodonosori,* Nebuzaradani xeefi a makwarta aahaakuxa ayuda aaroihaka weepotthani, atthu 745.+
Waatakaaha atthu ootheene yaakuxiwe aroihiwaka weepotthani, yaari 4.600.
31 Eyaakha ya namuloko miraru ni thanu na piili, Yoyakiini mwene+ a oYuda ori ene weepotthani, mweeri wa namuloko ni piili, nihiku 25 na mweeri owo, eyaakha yeeyo Evili-Merodaki aakhanle awe mwene a oBabiloonia, aahimutaphula Yoyakiini, mwene a oYuda, omukumiha mukhatteya.+ 32 Owo aanilavulana saana ni aahimuhela opuro wootepaxa ottittimiheya, waavikana mamwene makina yaari ni yena oBabiloonia. 33 Yoyakiini aahirula ikuwo sawe sa okhatteya, onalya vameesa va mwene mahiku ootheene a okumi awe. 34 Okathi wootheene, owo aanaakhela yoolya aavahiwa awe ni mwene a oBabiloonia, nihiku ti nihiku, eyo piiyo, mahiku ootheene a okumi awe, mpakha nihiku aakhwiiye awe.
Woonasa wene, nsina nintaphulela “Yehova onnitthapa”.
Eheeperi aahiiso, “kaahoothanlani”.
Eheeperi, “muhinatthi okhuma mmirimani”.
Aahiiso, “kaahoovalaanyani”.
Eheeperi, “ole onivenya”.
Eheeperi “enivekhuleliwa”, yooniheryaka wiira mooro waari vathi va epanela eyo wanvekhuleliwa.
Eheeperi, “mphitele eyuunu anyu”.
Aahiiso, “mwaaleele owaruni”.
Aahiiso, “ophenta wanyu woororomeleya”.
Aahiiso, “ikisirwa”.
Aahiiso, “oMenfi”.
Eyo piiyo, mpantta mmosa wa muro Niilo.
Eheeperi, “okoova”.
Aahiiso, “exuuku”.
Aahiiso, “muthiikila; mitathi; ettuurwa”.
Aahiiso, “nipuro noowaataleya”.
Aahiiso, “xoowa”.
Aahiiso, “musako”.
Aahiiso, “mwiipwexenrye ene; mwiiteexenrye ene”.
Aahiiso, “ooraruwa”.
Aahiiso, “amuluku a amalapo”.
Aahiiso, woonasa wene: “iyanyu”.
Eyo piiyo, Yehova.
Aahiiso, “xoowa”.
Moolumo a epoesia anirumeeliwa ophavelaka ohimmwa mutthu onooneliwa otthunku aahiiso onimoreliwa ikharari.
Eyo piiyo, ale yaawehaweha epooma wiira asuwele okathi wooreerela otuphela.
Eheeperi, “Marupo aka”.
Aahiiso, woonasa wene: “Okhuweleliwa ekhotto”.
Aahiiso, “iheema”.
Aahiiso, “mareetthe”.
Eheeperi, “ahuumiha owiitho waya, ovikana mwala”.
Aahiiso, “exuuku”.
Aahiiso, woonasa wene: “Owo khokhanle”.
Aahiiso, “xoowa”.
Aahiiso, “mareetthe”.
Aahiiso, “ephaawu”.
Eheeperi, “nimooveke”.
Eheeperi, “onithanla isumana”.
Aahiiso, “iheema”.
Eheeperi, “Mwiireerihe”.
Aahiiso, “musestuni”.
Eheeperi, “ale arina iyaakha sinceene”.
Aahiiso, “malakiheryo”.
Aahiiso, “erupani”.
Onihimmwa enamuna ya muhali woowunkhela.
Aahiiso, “xoowa”.
Aahiiso, “muupuruweke”.
Eyo piiyo, Yeremiya.
Eheeperi, “iya”, sihimmwaka ipa sootheene siirela mpantta etemplo.
Aahiiso, “ikwaasuni”.
Eheeperi, “kivenyaka voosiisu ni kilavulaka”.
Aahiiso, “ephepa”.
Mwiihaneliwo onihimmwa muluku muthiyana ni aakokhoreliwa ni anaisarayeli anamavirikanya. Woonasa wene, muluku muthiyana aakhaliherya atthu oyara.
Eheeperi, “khula nihiku kivenyaka voosiisu ni kooruuhelakani”.
Eheeperi, “okitheteerya maaru anyu”.
Eheeperi, “ohiikitthiwa mwaano mwaya”.
Nwehe Moolumo Ootthokiheriwa ani: “oGehena”.
Aahiiso, “naphipi; xalulu”.
Aahiiso, “neekesa”.
Aahiiso, “malakiheryo a”.
Aahiiso, “masekretaario”.
Aahiiso, “nreetthe”.
Aahiiso, “opuro ohinikhaliwa”.
Aahiiso, “malakiheryo aka”.
Aahiiso, “xoowa”.
Aahiiso, “nsipo na wunla”.
Eversiikulu 11 opacerya wene elempwale ni Aramaiko.
Aahiiso, “etthapwe”.
Aahiiso, woonasa wene: “Onnipaka iphaka para”.
Aahiiso, “eheema”.
Aahiiso, “ipaasu sawe”.
Vanikhala wiira aaleeliwa Yeremiya.
Aahiiso, “Yiireye siiso!”
Eheeperi, “khiyaatheteyale maaru aya”.
Eyo piiyo, Yeremiya.
Eyo piiyo, mikuttho sinivahiwa mutemplo.
Aahiiso, “xoowa”.
Aahiiso, woonasa wene: “enninla”.
Aahiiso, “xoowa”.
Aahiiso, “soorukureriwa”.
Aahiiso, “itthetteeri sanyu sihiirihiwa”.
Aahiiso, “a wEtiopia”.
Aahiiso, “opuusu”.
Aahiiso, “ixaaro”.
Aahiiso, “xoowa”.
Aahiiso, “xoowa”.
Aahiiso, woonasa wene: “inamuna xexe sa ophukela”. Eheeperi, “imusi xexe”.
Aahiiso, woonasa wene: “munimakela weeta mutthikelaka ottuli”.
Eheeperi, “muhikikumihe”.
Aahiiso, “xoowa”.
Yoolema ya epakau ya omunlela namukhwa, yaatthariwa ni aisarayeli anamavirikanya.
Eheeperi, “iphiro saya sootheene”.
Nwehe Moolumo Ootthokiheriwa.
Aahiiso, woonasa wene: “ntoko mooro, nyuwo moopattiha onanariwa waka”.
Aahiiso, “osuuli”.
Aahiiso, “erupani”.
Aahiiso, “xoowa”.
Aahiiso, “xoowa”.
Aahiiso, “xoowa”.
Eheeperi, “isyo”.
Aahiiso, “xoowa”.
Aahiiso, “ekwaasuni”.
Nave-tho onniihaniwa Yowakhaasi.
Eheeperi, “Nabukodorosori”, elepeliwo yoovirikana.
Eheeperi, “khoo elapo, elapo, elapo”.
Aahiiso, “anamavirikanya”.
Aahiiso, “ittanka”.
Eheeperi, “Nabukodorosori”, elepeliwo ekina.
Nave-tho onniihaniwa Yehoyakimi ni Koniyahi.
Aahiiso, woonasa wene: “ale anivara muteko woolipiha itthu sitekiwe”.
Aahiiso, “xoowa”.
Eheeperi, “Nabukodorosori”, elepeliwo yoovirikana.
Aahiiso, “namukhwa-onepa”.
Aahiiso, “xoowa”.
Aahiiso, “ekisirwa”.
Woonasa wene, ela enamuna ekina yaalempwa aya nsina noowi Babeli (Babiloonia).
Aahiiso, “muupuruweke”.
Aahiiso, “xoowa”.
Aahiiso, “exuuku ya mwiri”.
Aahiiso, “xoowa”.
Eheeperi, “nimumulaka”.
Aahiiso, “epalaasio”.
Eyo piiyo, ephareya ya ekoopiri ya etemplo.
Aahiiso, “epalaasio”.
Aahiiso, woonasa wene: “Awo”.
Aahiiso, “exuuku”.
Aahiiso, “Yiireye siiso”.
Aahiiso, “exuuku”.
Aahiiso, “xoowa”.
Aahiiso, woonasa wene: “soophuleya”.
Eheeperi, “Nabukudurosori”, elepeliwo ekina.
Aahiiso, “exuuku”.
Aahiiso, “iheema”.
Aahiiso, woonasa wene: “oottittimihiwa”.
Aahiiso, “xoowa”.
Aahiiso, “ikisirwa”, eyo piiyo, mittetthe sinikhala eriyari ya ephareya.
Aahiiso, “kinimwaavoniha”.
Eheeperi, “muhina mwaya”.
Eheeperi, “Nabukudorosori”, elepeliwo ekina.
Aahiiso, “epalaasio”.
Exeekele emosa yaalemela ikarama 11.4. Munwehe Apentise B14.
Aahiiso, “Itthu munilakela anyu ti suulupalexa”.
Aahiiso, “xoowa”.
Eheeperi, “Nabukodorosori”, elepeliwo ekina.
Nwehe Moolumo Ootthokiheriwa ani: “oGehena”.
Eheeperi, “akooveke”.
Eheeperi, “okoova”.
Aahiiso, “xoowa”.
Eheeperi, “Nabukudurosori”, elepeliwo ekina.
Aahiiso, “xoowa”.
Eheeperi, “Olelo”.
Aahiiso, “opuro ohinikhaliwa”.
Aahiiso, “muheemani”.
Eheeperi, “murooluni mwa eliivuru”.
Aahiiso “eliivuru”.
Aahiiso, “alipa-oolepa”.
Aahiiso, “eliivuru”.
Aahiiso, “mulipa-oolepa”.
Eheeperi, “Nabukudorosori”, elepeliwo ekina.
Aahiiso, “muheemani”.
Aahiiso, “xoowa”.
Aahiiso, “epalaasio”.
Eheeperi, “onrowa okhuma”.
Eheeperi, “okhuma”.
Aahiiso, “epalaasio”.
Eheeperi, “Nabukodorosori”, elepeliwo ekina.
Aahiiso, “epalaasio”.
Aahiiso, woonasa wene: “miteko sookhanyereriwa”.
Aahiiso, “xoowa”.
Eheeperi, “keemenle ene”.
Eheeperi, “osuulu wa mamwene”.
Aahiiso, “xoowa”.
Aahiiso, woonasa wene: “ntthiya nuulupale”.
Aahiiso, “xoowa yoowo munimoova anyu onimoophwanyani”.
Eheeperi, “Nabukudurosori”, elepeliwo ekina.
Aahiiso, “eheema”.
Aahiiso, “xoowa”.
Aahiiso, “itemplo”.
Aahiiso, “itemplo”.
Aahiiso, “oMenfi”.
Aahiiso, “owo opuro ohinikhaliwa”.
Aahiiso, “xoowa”.
Mwiihaneliwo onihimmwa muluku muthiyana ni aakokhoreliwa ni aisarayeli anamavirikanya. Woonasa wene, muluku muthiyana aakhaliherya atthu oyara.
Eheeperi, “Nabukodorosori”, elepeliwo ekina.
Eheeperi, “Nabukodorosori”, elepeliwo ekina.
Aahiiso, “iskuutu”.
Aahiiso, “Xoowa onoowiiva, onoovona ni onoomala-maliha”.
Aahiiso, “oMenfi”.
Eheeperi, “okathi waatthanliwe”.
Eyo piiyo, ole onrowa okuxa wExiitu.
Aahiiso, “oMenfi”.
Aahiiso, woonasa wene: “Onookhalihiwa othako”.
Aahiiso, “anithaya ikhuni”.
Eyo piiyo, Teebesi.
Eheeperi, “Nabukodorosori”, elepeliwo ekina.
Eyo piiyo, nloko na Exiitu.
Aahiiso, “ikisirwa”.
Eyo piiyo, oKereta.
Eyo piiyo, awo anoomettha muru aya yooniheryaka oriipiwa murima ni wuuliwa muru.
Aahiiso, “Xoowa a”.
Aahiiso, “Nipuro nootthyawela niri vasulu”.
Aahiiso, “xoowa onnoottharani”.
Aahiiso, woonasa wene: “mukilaathi vathi voowuuma”.
Eheeperi, “Nnyaka”.
Aahiiso, “ekhuntta”.
Aahiiso, “eflauta”.
Aahiiso, woonasa wene: “oruma wa okhuweliwa ekhotto”.
Aahiiso, “saarukurenrye”.
Aahiiso, “masisi a ipwittipwitthi”.
Aahiiso, “onookhala opuro ohinikhaliwa”.
Eyo piiyo, Edomi.
Aahiiso, “iheema”.
Eheeperi, “Nabukodorosori”, elepeliwo ekina.
Eheeperi, “mapacereryo”.
Eheeperi, “ipantta xexe”.
Aahiiso, “xoowa”.
Woonasa wene, nuulumo nna na eheeperi ninvarihana ni nuulumo noowi “mavi a inama”, ninrumeeliwa para wooniherya wiira etthu eyo ti yoothanyeya.
Aahiiso, “Mareetthe”.
Aahiiso, “nreetthe”.
Eheeperi, “oovaha ntata nawe”.
Aahiiso, “efoise”.
Aahiiso, “xoowa ootakhala”.
Eheeperi “Nabukodorosori”, elepeliwo ekina.
Aahiiso, “munookwathula”.
Mwaapalame, yoowo nttaava na ekunya oniihaniwa avestruz.
Vanikhala wiira nla nsina na oKhaldeya.
Aahiiso, “mareetthe”.
Eheeperi, “khahiyo-tho anaamukhweli”.
Eyo piiyo, elapo ya atthu a oKhaldeya.
Aahiiso, “iskuutu”.
Aahiiso, “etthapwe”.
Aahiiso, woonasa wene: “onnipaka iphaka para”.
Ekaruma enlikana ni maritelo yaarumeeliwa okhottoni.
Eheeperi, “Mureerihe”.
Eheeperi, “Nabukodorosori”, elepeliwo ekina.
Eyo piiyo, Siyoni aahiiso Yerusalemu.
Woonasa wene, ela enamuna ekina yaalempwa aya nsina noowi Babeli (Babiloonia).
Aahiiso, “xoowa”.
Aahiiso, “atthu nihinaasuwela ahu”.
Aahiiso, “opuro ohinikhaliwa”.
Eheeperi, “ikoovatu 18”. Ekoovatu emosa yaarina isentiimeturu 44.5. Munwehe Apentise B14.
Eheeperi, “ikoovatu 12”.
Eheeperi, “ikatha xexe”. Ekatha emosa yaarina esentiimeturu 1.85. Munwehe Apentise B14.
Eheeperi, “ikoovatu thanu”.
Eheeperi, “Nabukodorosori”, elepeliwo ekina.
Eheeperi, “Nabukodorosori”, elepeliwo ekina.
Eheeperi, “Nabukodorosori”, elepeliwo ekina.