Dezembro

Niireke mukhulupale a wEthiyopia aaniphavela tthiri opatisiwa? Nweehe wiira owo ʻaahirowa oYerusalemu wiira amukokhorela Mulukuʼ. (Mit. 8:27) Eyo enooniherya wiira, owo aheemererya etiini ya eyuda. Okhala wiira aanisoma soolempwa sa eheeberi, owo aahiixutta itthu sinceene voohimya sa Yehova. Masi-tho owo aaniphavela wiixutta itthu sinceene. Nto okathi Filipe amphwanye awe iira osomaka eliivuru ya profeta Yesaya. (Mit. 8:28) Tthiri eliivuru ele aasoma awe saari iprofesia soovila wiiwexexa. Mulopwana ole aaniphavela wiixutta itthu sinceeneNto eyo, ti etthu yaamwiirinhe okhuma wEthiyopia orowaka oYerusalemu wiira amukokhorele Muluku mutemplo. Filipe aahimwiixuttiha mulopwana ole ikeekhai sa niinaano sa mbiibiliyani, ohela muhina ti pani aari Mesiya. (Mit. 8:34, 35) Omphenta wawe Yehova ni Yesu waahincerereya. Eyo yaahimwiiriha opaka marukunuxo maalupale, othanlaka opatisiwa ni okhala mutthareli a Yesu Kristu. Nto, Filipe aahoona wiira mulopwana ole aahiilokiherya wiira opatisiwe, nto owo aahimpatisa. w23.03 8-9 itti. 3-6

Khaninrowa owerya omuhakalaliha Yehova nihilavulaka ekeekhai, okhala wira Yehova onninyokha wootha. (Mir. 6:16, 17) Mooriipiha murima atthu anceene olelo-va, anuupuwela wira wootha etthu yaamukhaani paahi. Masi hiyo nintthara moonelo wa Yehova. (Esal. 15:1, 2) Tthiri nihaana osyaka olavula itthu sinikhala wira ti seekeekhai, masi sikhanle oowiiriha atthu akina wuupuwela itthu sikina nahaaphavela ahu ohimya. Niira siiso nnoosyaka waapa. (Mir. 25:23; 2 aTes. 3:11) Okathi munvaanela anyu ni mutthu, nave munoona wira oopacerya waalavula moohiloka atthu akina, muhaana olavula etthu ekina yoolipiha. Ninkhala olumwenku atthu anaamutepa aya orumeela moolumo oohiloka. Nihaana wiimananiha vanceene wira moolumo ahu amusiveleke Yehova. Nikupaliki wira Yehova onoonireeliha akhala wira nnoorumeela moolumo ahu mwa enamuna yoolipiha okathi woolaleerya, mmuthukumanoni, ni okathi ninvaanela ahu ni atthu akina. Muhoolo wamala olumwenku ola wootakhala, vanookhweyaka omuttottopela Yehova ni moolumo ahu. — Yuda 15. w22.04 9 itti. 18-20

Okathi ninthokorerya ahu moota Yehova ni Yesu aniphentale aya, eyo enniniiriha ni hiyo waaphenta. (1 Yoh. 4:10) Nave waaphenta wahu onnitepa olipa, mwaha woosuwela wiira Yesu okhwiiye mwaha wa mureerelo ahu. Nave-tho murummwa Paulo aahooniherya oxukhurela wawe okathi aalepenle awe ekarta agalasia. Owo aahimmye so: ‘Mwaana a Muluku, . . . ookiphenta ni oovahererya okumi awe mwaha wa miyo’. (aGal. 2:20) Mwaha wa mukuttho wowoopola wa Yesu, Yehova onninaattamela wiira nikhale apatthani awe. (Yoh. 6:44) Tthiri ninnimuxukhurela vanceene Yehova, mwaha woowi ooliva esisapo yuulupale wiira nikhale apatthani awe. Nto eyo ennilipiha omphenta wahu Yehova ni Yesu. Masi niikoheke so: ‘Niphento na Yehova ni Yesu nikiiriheke opaka exeeni?’ Omphenta wahu Muluku ni Kristu onniniiriha waaphenta atthu akina. — 2 aKor. 5:14, 15; 6:1, 2. w23.01 28 itti. 6-7

Yehova onnimurumeela Biibiliya wiira aakhaliherye arumeyi awe ʻomurumela ni murima mmosaruʼ. Ipantte sinceene sa mbiibiliyani, silempwale wiira saakhaliheryeke atthu ahisomme aahiiso ahinooneliwa vatthu wiira aweryeke wiiwexexa. (Luka 10:21) Atthu anceene anikhala olumwenku wootheene, annimusoma Biibiliya. Nto ale ari oowiiyeviha anoowerya wiiwexexa ni ovarihela muteko ele Biibiliya onihimya awe. (2 aKor. 3:15, 16) Yookhala enamuna ekina Biibiliya onniixuttiha awe voohimya sa ankhili a Yehova. Nwehe wiira Yehova onnimurumeela Biibiliya wiira owiixuttihe arumeyi awe ntoko ekhurupu, masi-tho owo onnimurumeela wiira omwiixuttihe ni ommaaliha khula mutthu. Tthiri okathi mummusoma anyu Biibiliya, munniwerya woona wiira Yehova onnookhapelelani. (Yes. 30:21) Okathi mwaarina anyu, mixankiho woonasa wene nyuwo mwaahisoma yoolepa emosa ya mbiibiliyani, nuumala-vo khuhimya so: “Yoolepa ela kilepeliwe miyo”. Eyo enniiraneya okhala wiira Biibiliya, olempwale wiira atthu imilyau sinceene aweryeke omwiiwexexa. Masi vaniweryaneya sai Biibiliya okhala oororomeleya ni woovarani murima? Eyo enniweryaneya okhala wiira mwaneene Biibiliya Yehova, toosuwelexa waavikana atthu ootheene anikhala valaponi. — 2 Tim. 3:16, 17. w23.02 4-5 itti. 8-10

Okhala wira na makristau eekeekhai, ninnimphenta vanceene Yehova. Nimphavela wira muteko nninvarela ahu okhaleke wooreera. Naaphavelaka orumeela saana ikuru sahu ni owerya wahu wira nimuhakalalihe Yehova, nihaana okhalana soolukama soovara miteko sa Muluku sinnikhaliherya olipiha opatthani ahu nuuwo. Nave nihaana okhalana mikhalelo sa ekristau, ophavela wiixutta itthu sikina, ni ohaavya inamuna soowaakhaliherya atthu akina. Xeeni nimphavela ahu okhala arumeyi ooloka a Yehova? Yoopacerya, okhala wira nimphavela omuhakalaliha Tiithi ahu oophenta a wiirimu. Yehova onnihakalala okathi onniweha awe nirumeelaka osuwela wahu, wira nivare miteko sawe. Nave nimphavela orowaka ohoolo ni miteko sa Muluku wira nirumeeliweke vanceene ni anna a mmulokoni. (1 aTes. 4:9, 10) Hata nipatisiwe ene khalai aahiiso niinaano, otheene ahu nihaana orowa ohoolo ni miteko sa Muluku. w22.04 22 itti. 1-2

Mitthenkeso sa epoliitika sa olumwenku ola, moohipisa sinrowa omutuphela Babilonia Muulupale, ori olamulelo wa olumwenku wootheene wa etiini yoowootha. Eyo enimwiiriha opacerya maxakha maalupale. Niireke eyo enoowiiriha atthu anceene ophavela omurumeela Yehova? Nnaari. Wiisuupulula ekapiitulu 6, onooniherya wira okathi owo wooxankiha atthu ahinimurumeela Yehova anrowa ophavelaka okhapeleliwa ni mitthenkeso sa epoliitika ni sa nakoso sa olumwenku ola. Mitthenkeso iyo sinlikanyihiwa ni myaako. Okhala wira atthu awo khanikhaliherya Omwene wa Muluku, Yehova onrowa waathokoreryaka okhala awanani awe. (Luka 11:23; Wiis. 6:15-17) Ekeekhai wira arumeyi oororomeleya a Yehova okathi owo, sinimwaaphwanya mixankiho. Awo paahi tanrowa ohala amurumeelaka Yehova olumwenku wootheene ni akhoottaka okhaliherya “enama yoowali”. — Wiis. 13:14-17. w22.05 16-17 itti. 8-9

Arumeyi a Muluku khahiyo anilaleya ihapari sooreera sa Omwene paahi. (Math. 24:14) Nave annikhaliherya muteko wa malaikha anihimmwa eliivuru ya Wiisuupulula ekapiitulu 8 mpakha 10. Malaikha awo annilaleya ihasara soowoopiha sinaaphwanya atthu anikhootta Omwene wa Muluku. Tivonto, Anamoona a Yehova annilaleya ihapari seiyo sinlikana ni “maralala ni mooro”, alaleyaka ophukeliwa olumwenku wa Satana. (Wiis. 8:7, 13) Atthu ahaana osuwela wira olumwenku ola ohanle omala, nto ahaana opaka marukunuxo mookumini mwaya wira yoopowe nihiku na onanariwa wa Yehova. (Sof. 2:2, 3) Masi ihapari iyo khasinaasivela atthu anceene. Nto nihaana olipa murima wira niwerye waalaleerya. Okathi wa maxakha maalupale, ihapari soophukela sookiserya sinrowa okhala sootepa owereya! — Wiis. 16:21. w22.05 7 itti. 18-19

Nkahaya nwuupuwele anamathelana arina anamwane. Woonasa wene okhuma khalai awo aatoko wiiwa myaha sinceene saatthokiherya moota woowaahuwa anamwane. Masi vano awo ahaana ovarihela muteko malakiheryo awo mookumini mwaya. Maana awo aakhalana muritti woomuhuwa mwaana amuyanre aya. Tthiri owo muritti muulupale. Nto okathi makhalelo ahu aniturukeya aya soolepa sikina sa mBiibiliyani sinnikhalana efaita yinceene mookumini mwahu. Nla ti nthowa ninwiiriha arumeyi a Yehova olelo-va osomaka soolempwa. Nave ti etthu yaamwiirinhe Yehova waaleela mamwene a wisarayeli wa khalai wira yaahaana osomaka ni wuupuwelela soolempwa “nihiku ti nihiku”. (Otum. 17:19) Anamuyari ntoko makristau, aakhalana eparakha yoowiixuttiha anaaya malamulo a Yehova. Nto ohiya paahi owiixuttiha aniinyu awo malamulo a Yehova, nyuwo munniphavela wira yeetteleke. Tthiri nyuwo munniphavela waakhaliherya aniinyu omphentaka Yehova. w22.05 26 itti. 2-3

Khivaniphiyerya paahi ottharuwa mweettelo woohiloka aahiiso itampi mutthu owo opanke awe. Ti vooloka orukunuxa murima, maana Yehova onniweha akhala wira mutthu owo oorukunuxa murima wiira omulevelele. Orukunuxa murima ontaphulela otthikela ottuli, niire so, mutthu owo ohaana ottharuwa mweettelo awe woohiloka ni opacerya okhalana mweettelo Yehova oniphavela awe wira atthu awe akhalaneke. (Yes. 55:7) Mutthu owo ohaana orukunuxa muupuwelo awe wira weettihiweke ni muupuwelo wa Yehova. (aRom. 12:2; aEef. 4:23) Nave mutthu owo ohaana ottharuwa ni murima wootheene itthu soohiloka apaka awe khalai. (aKol. 3:7-9) Tthiri waamini wahu mukuttho wowoopola wa Kristu, tonimwiiriha Yehova onilevelela ni ottipiha itampi sahu. Yehova onoonilevelela orumeelaka mukuttho wowoopola wa Kristu akhala wira onniweha wiimananiha ahu ohiiya mweettelo woohiloka. — 1 Yoh. 1:7. w22.06 6 itti. 16-17

Okhuma okathi Adamu ni Eva yaamutthekenle aya Muluku, apinaatamu annikumiheryana mixankiho sinceene. (Mus. 8:9) Mwa ntakiheryo, atthu anceene annipuherya okhulupale aya, khasireere ikrime, anaxikola annaaveeha anaxikola akhwaaya ni atthu akina annaahasula vootakhala atthu a etthoko aya. Vannooneya wira apinaatamu anniwoova apinaatamu akhwaaya! Satana onirumeela sai owoova atthu wira onihapuxe? Satana onnirumeela owoova atthu wira oniirihe ohiya omwiiwelela Yehova ni ohiya olaleerya. Ikuvernu sikina sineettihiwa ni Satana sinnikhoottiha muteko wahu woolaleerya ni sinninlupattha. (Luka 21:12) Olumwenku ola wootakhala onilamuleliwa ni Satana, onniwootherya itthu sootakhala Anamoona a Yehova. Nto mwaha wa itthu iyo nnootheriwa ahu, atthu anceene annintuphela, anniniveeha ni khanniphavela. (Math. 10:36) Nto niireke itthu iyo sinnintikiniha. Nnaari. Okhuma okathi wa arummwa, Satana onnirumeela itthu iyo sa olavilavi wira owoopopihe makristau eekeekhai. — Mit. 5:27, 28, 40. w22.06 16 itti. 10-11

Tani anrowa wiirela mpantta atthu ale ‘anceene’ anrowa okhaliheriwa ophwanya ephiro ya xariya? Awo anihela muhina ale anirowa ohihimuxiwa ni ale anrowa woopoliwa okathi wa ekhotto ya Harmagedoni ni waahela muhina anamwane anrowa oyariwaka elapo esya. Samala iyaakha ekonto emosa, atthu ootheene anrowa okhalaka valaponi anrowa okhala oohittheka. Nihiliyale wira okhala mutthu oohittheka khontaphulela wira mutthu owo oophwanya okumi woohimala. Nkahaya mmuupuwele Adamu ni Eva. Awo yaari atthu oohittheka masi yaahaana omwiiwelela Yehova Muluku wira aphwanye okumi woohimala. Masi mooriipiha murima awo khiyaamwiiwelenle. (aRom. 5:12) Wanikisa wa iyaakha 1000 atthu ootheene anoophwanya okumi woohimala, niireke ale anrowa okhala oohittheka okathi wootheene anookhaliheryaka olamulela wa Yehova? Aahiiso anrowa waatakiha Adamu ni Eva yaawo yaathanlale ohimwiiwelela Yehova? Makoho ala anooreerelaka waakhuliwa. w22.09 22-23 itti. 12-14

Okathi atthu anceene aniweha aya itthu soohiloka siniiraneya moolumwenkuni, khanikupali wira muhoolo itthu sinooloka. Imusi sinceene khasiniphentana mukina ni mukhwaawe. Nave olelo-va, atthu anceene anootepa okhala oowali, oowiitthuna ni ootakhala murima. Atthu anceene khanaaroromela makhulupale. Itthu iyo soohiloka siniiraneya, sinooniherya wira muhoolo itthu sinooloka. Mwaha wa xeeni? Mwaha woowi ninkhala “mahiku ookiserya”, ntoko Biibiliya aahimmye awe khalai ene. Ti maana aya atthu anceene anitepa aya opaka itthu soohiloka. (2 Tim. 3:1-5) Khula mutthu oniweha ni onivarerya oratteene itthu siniiraneya moolumwenkuni, onimoona wira eprofesia enilavula mahiku ookiserya enniiraneya. Nto eyo ennooniherya wira Yesu Kristu onnilamulela ntoko Mwene a Omwene wa Muluku. Ohiya paahi eprofesia eri 2 Timootheyo 3:1-5, sookhala iprofesia sikina sinilavula Omwene wa Muluku. Iprofesia sinceene sa mBiibiliyani sinninikhaliherya osuwela oratteene opuro niri ahu moovariha ni okathi othanliwe ni Yehova. w22.07 2 itti. 1-2

Okathi wa koronaviiru, naahivahiwa malakiheryo a moota woohihiya opaka mithukumano sa mmulokoni ni ohihiya olaleerya. Okathi vakhaani paahi naahipacerya opaka mithukumano sahu, waapaka asembeleya ni akonkresu nirumeelaka videoconferência. Moohipisa naahipacerya olaleerya nimurumeelaka telefoni ni ikarta paahi. Nto Yehova onnireeliha vanceene wiimananiha wahu. Ifiliyaali sinceene sa olumwenku wootheene sinnihimya wuncerereya wa anamalaleerya. Anna ni arokora anceene, anoowerya ohimya itthu sooreera ni soohakalaliha okathi ola wa koronaviru. Atthu akina pooti wuupuwelaka wira mutthenkeso wa Yehova onnitepana ovaha malakiheryo okathi wa koronaviiru. Masi khula okathi, vannooneya oratteene wira mutthenkeso wa Yehova onnivaha malakiheryo a ankhili ni ootepa oloka. Okathi nnuupuwela ahu enamuna yoophenta ni ya ankhili Yesu onaahoolelawe atthu awe, ninnikupali ni murima wootheene wira moohicikha etthu enrowa onikhumelela muhoolo, Yehova ni Yesu anrowa okhala ni hiyo. — aHeeb. 13:5, 6. w22.07 13 itti. 15-16

Ohiya paahi omuttottopela ni onvuwiha Yehova okathi ninvekela ahu, nihaana omuxukhurela mwaha wa itthu sooloka onnivaha awe. Mwa ntakiheryo, hiyo pooti omuxukhurela Yehova mwaha wa ikoore soovirikana sa ifilori ninweha ahu, yoolya yoosiva ni apatthani anniphenta onivanhe awe. Tiithi ahu ophenta onninivaha itthu iyo sootheene, mwaha woowi oniphavela wira nihakalaleke. (Esal. 104:12-15, 24) Nave etthu ya efaita yinceene, nihaana omuxukhurela Yehova mwaha wa malakiheryo onnivaha awe, yaawo annikhaliherya olipiha waamini wahu ni nlipelelo noovara murima na muhoolo. Okathi mukina pooti oliyala omuxukhurela Yehova mwaha wa itthu sooloka onivaha awe. Etthu xeeni mukhanle anyu opaka wira muhiliyale omuxukhurela Yehova? Nyuwo pooti olepa elista ya itthu soovirikana munvekele anyu Yehova, nuuvira okathi pooti oweha moota Yehova aakhunle awe mavekelo anyu. Nuumala-vo, nyuwo pooti onvekela Yehova mmuxukhurelaka mwaha woowookhaliheryani. — aKol. 3:15. w22.07 22 itti. 8-9

Wuncererya ekeekhai niixuntte ahu khivanikhweya. Nave nihaana weettela ekeekhai niire-so, ovarihela muteko itthu nniixutta ahu mookumini mwahu. Napaka eyo nnookhalana ohakalala weekeekhai. (Yak. 1:25) Ninrowa osuwela sai vakhala wira ninneettela ekeekhai? Ntoko munna mmosa ohimmye awe, nihaana wiivarerya oratteene wira nisuwele mapuro ninkhumela ahu saana, ni mapuro ninreerela ahu olokiherya. Murummwa Paulo ohimmye so: “Hata nironwe ene vahoolo, nitepeke weetta ephiro emosa-ru”. (aFil. 3:16) Tthiri ninniphwanya mireerelo sinceene vaavo nihinhiya ahu weettela “ekeekhai!” Nave ohiya paahi oniphwanyiha mureerelo, ninnimuhakalaliha Yehova vamosa ni anna. (Mir. 27:11; 3 Yoh. 4) Moohaanyiherya nookhalana mathowa manceene anniiriha ophenta ekeekhai ni weettela ekeekhai. w22.08 18-19 itti. 16-18

Axitokweene anrowa wooniherya sai wiira annimphenta Yehova ni Yesu? Enamuna emosa ori okhapelela saana ipwittipwitthi sa Yesu. (1 Ped. 5:1, 2) Yesu aahiiwanyeiha eyo okathi aalavula awe ni murummwa Pedru. Nuumala omukhootta Yesu ikwaha tthaaru, Pedru aahilakela wooniherya wiira aanimphenta Yesu. Nuumala Yesu ohihimuxiwa aahimukoha wiira: “Nyuwo Simoni, mwaana a Yohani, munnikiphenta?” Nikupaliki wiira Pedru ampaka sootheene aawerya awe wiira ooniherye omphenta wawe Pwiya awe. Nto Yesu aahimuleela Pedru wiira: “Mukukhuleke ipwittipwitthi saka”. (Yoh. 21:15-17) Pedru ooniheryaka omphenta wawe, owo aahikhapelela ipwittipwitthi sa Yesu okumi awe wootheene. Axitokweene, munrowa wooniherya sai wiira moolumo Yesu aamulenle awe Pedru ta faita? Nyuwo munoowerya wooniherya omphenta wanyu Yehova ni Yesu mukukhulaka ipwittipwitthi, aahiiso waalipiha anna ni arokora ni mwaakhaliheryaka ale ahiyale orowela mithukumano. — Ezek. 34:11, 12. w23.01 29 itti. 10-11

Muhuupuweleke wiira khuuvo onrowa wookhaliheryani oxintta muxankiho anyu. Vakhala wiira munuupuwela siiso woonasa wene nyuwo pooti woonaka wiira, muxankiho anyu khonimala ni khamurina ikuru sooxintta soophavela soohiloka. Masi nwehe etthu Biibiliya onihimya awe: “Okathi enookhumelelaaya-ni etthu yooxankiha, owo onoowooniheryani ephiro wira nwerye ovilela”. Eyo entaphulela wiira hata sooweeha sanyu sikhalaka sooxankiha, munoowerya oxintta. Nikhaliheriwaka ni Yehova, nnoowerya oxintta sooweeha iyo. Muhiliyale ela: Mwaha wookhala atthu oottheka, hiyo pooti owananaka soophavela soohiloka. Masi vakhala wiira munikhalana soophavela soohiloka munoowerya oxintta mmutakihaka Yosefe yoowo aamukhoottale ni khumutthyawa mwaarawe Potifari. (Maph. 39:12) Nto mukhootteke soophavela iyo soohiloka, wiira muhipake etampi. w23.01 12-13 itti. 16-17

Mukhalelo Yehova orina awe exariya. (Otum. 32:4) Exariya ya Yehova ennivarihana ni mukhalelo awe mukina, eyo piiyo, Yehova khonimuthanla mutthu. (Mit. 10:34, 35) Ninniwerya oweha eyo mwa enamuna moota Biibiliya olempwale awe. Nooweha wiira owo olempwale arumeeliwaka mattaava atthu anceene a khalai yaalavula aya. Yehova aahileiherya wiira mahiku ookiserya ʻosuwela wekeekhaiʼ ori mbiibiliyani ʻwaamuncerereyaʼ niire so, atthu anceene yaamwiiwexexaka ikeekhai sa mbiibiliyani. (Dan. 12:4) Eprofesia eyo, enniiraneya olelo-va maana atthu anceene annimwiiwexexa Biibiliya ni iliivuru sinimutthokiherya Biibiliya. Arumeyi a Muluku annaataphulela aBiibiliya oomalela aahiiso oohimalela anivikana mattaava 240 annaakawela atthu mahala. Mwaha woopaka eyo, atthu a maloko ootheene anneemererya ʻihapari sooreera sa Omweneʼ ohinatthi ophiya wanikisa wa olumwenku ola. (Math. 24:14) Okhala wiira Yehova Muluku axariya, oniphavela wiira atthu anceene amusuwele asomaka nuulumo nawe. Nto mwaha woopaka eyo, owo onnooniherya wiira onniniphenta vanceene. w23.02 5 itti. 11-12

Niireke nyuwo munniphenta exariya ntoko Muluku oniphenta awe? Aayo. Masi nihiliyaleke wira naatthu oottheka nto naahikhalane ephoole, hiyo pooti ohapuxiwa ni moonelo wa atthu a mulaponi. (Yes. 5:20) Okathi oniromoliwa awe mutthu a xariya, anamunceene animuupuwela mutthu oowiixinnuuha, onaaphukela atthu akina, aahiiso oniixoona okhala mutthu a xariya waavikana atthu akina. Masi Yehova khonisiveliwa ni atthu siiso. Okathi Yesu aari awe valaponi, aahaapwapwela ahooleli a itiini a okathi awe yaakumiherya malamulo oohixariya. (Mus. 7:16; Luka 16:15) Okhala wene, mutthu a xariya khonixoona okhala oosuwelexa waavikana atthu akina, nave khonikumiherya malamulo awe. Exariya mukhalelo wooloka. Okhala mutthu a xariya onitaphulela opaka itthu sinimusivela Yehova Muluku. Moovarihana ni Biibiliya, okhala mutthu a xariya onitaphulela weettela malamulo a Yehova Muluku. w22.08 27 itti. 3-5

Yesu anaaroromela awiixutti awe, nnaamwi yaari atthu oottheka. (Yoh. 15:16) Nihiku nimosa, Yakobo ni Yohani yaahinvekela Yesu wira yakilaathi moono awe woolopwana aahiiso woothiyana moomweneni mwawe. Hata vari siiso, Yesu khaakonhe etthu yaawiiriha omurumeela Yehova, nnakhala khaahiihale okhala arummwa awe. (Mar. 10:35-40) Muhoolo mwaya, okathi Yesu aatthukiwe awe, arumeyi awe ootheene yaahimutthyawa. (Math. 26:56) Masi hata vari siiso, Yesu khaahiyale waaroromela awiixutti awe. Nnaamwi Yesu aasuwenle wira awiixutti awe yaari oottheka, “owo khaahiyerenrye waaphenta mpakha wookiseryani”. (Yoh. 13:1) Nuumala ohihimuxiwa, Yesu aahaavaha arummwa awe 11 muteko wookhapelela ni ohoolela muteko woolaleerya. (Math. 28:19, 20; Yoh. 21:15-17) Nto Yesu aahikhalana mathowa ooloka oowaaroromela arumeyi awe nnaamwi yaari atthu oottheka. Okhala wira awo yaahiroromeleya mpakha okhwa. Moohaanyiherya Yesu oonivaha ntakiheryo nooloka na waaroromela atthu akina, nnaamwi ari ene atthu oottheka. w22.09 6 etti. 12

Akhala wira nnookupali ni murima wootheene wira Yehova onniniphenta, eyo piiyo, Yehova ori ni hiyo, Satana khonrowa owerya onoopopiha. Mwa ntakiheryo, mulipa-oolepa Esalimo 118, aahikhalana mixankiho sookhulumula. Owo aahikhalana awanani oowerya waahela muhina atthu yaarina okhulupale (nwehe eversiikulu 9 ni 10). Okathi mukina, owo aanixankihiwa vanceene (nwehe eversiikulu 13). Nave aahipwapweliwa aahiiso ottaruxiwa ni Yehova (nwehe eversiikulu 18). Hata vaari siiso, owo aalempe wira: “Tivó vahinòvaka etthu”. Aanisuwela wira hata aattaruxiwe, Tiithi awe a wiirimu aanimphenta. Nasalimo ole aanikupali ni murima awe wootheene wira hata aarina mixankiho, Muluku awe oophenta ammukhaliherya. (Esal. 118:29) Nihaana okupali ni murima wootheene wira Yehova onniniphenta. Akhala wira nnookupali eyo, enoonikhaliherya oxintta itthu tthaaru nnoova ahu. Itthu sene tiiya: (1) woova ohiwerya waavaha atthu a etthoko ahu yoolya ni itthu sinaathowa, (2) owoova atthu ni (3) woova okhwa. w22.06 15 itti. 3-4

Nweheke vakhala wira munnipweha opuro woopacerya omukokhorela wanyu Yehova mookumini mwanyu. Okhala wira Yehova tonipattunxe nto owo onnireerela okokhoreliwa. (Wiis. 4:11; 14:6, 7) Masi etthu nikhanle ahu ohela nipuro noopacerya mookumini mwahu ori omukokhorela wahu Yehova mwa enamuna oniphavela awe, eyo piiyo, ‘Neettihiwaka ni munepa ni ekeekhai’. (Yoh. 4:23, 24) Eyo enitaphulela wira omukokhorela wahu Yehova, ohaana weettihiwaka ni munepa woowaarya wa Muluku ni okhala moovarihana ni ikeekhai siri mbiibiliyani. Nave omukokhorela wahu Yehova ohaana okhala opuro woopacerya mookumini mwahu, hata nikhalaka elapo muteko ahu onikhoottihiwa aya. Anna ni arokora anivikana 100, aatthukweliwa mukhatteya mwaha wookhala aNamoona a Yehova paahi. Hata vari siiso, awo annitteeliwa murima apakaka ele aniwerya aya wira amusome Biibiliya, ovekela, ni ovaanela ni atthu akina voohimya sa Omwene wa Muluku. Okathi ninveehiwa ahu aahiiso olupatthiwa, ninnihakalala mwaha woosuwela wira Yehova ori ni hiyo ni onrowa onitthuvela. — 1 Ped. 4:14. w22.10 9 etti. 13

Yehova onninivaha ankhili ooloka yaawo anrowa onikhaliherya khula okathi. Nrowe niwehe matakiheryo manli a ankhili awo. Noopacerya, muhakalaleke ni itthu murina anyu. Miruku 23:4, 5 ohimyaka so: “Muhivelavelé mphavelaka mihakhu . . . Mwaphwanyakaru, sinorimela nananoru; tthiri musurukhu wakuva ovava, khutthyawela ottaiwene ntoko xaka”. Atthu anceene oothaaciri ni oohaawa annixanka aphavela aka okhalana musurukhu munceene. Nave atthu akina ikwaha sinceene annipaka itthu sinihonona nsina naya, etthoko aya ni okumi aya. (Mir. 28:20; 1 Tim. 6:9, 10) Na nenli muupuweleke muhinatthi olavula. Naahiivahe ephoole, pooti okumiherya mixankiho sinceene mwaha wa moolumo ahu. Miruku 12:18 Biibiliya onihimya so: “Okakaruwa mwano tukuthi onvulaliha: nlumi na musuweli ninnivoliha makhwatta”. Ninnikumiherya murettele vaavo ninsyaka ahu omwarya-mwarya soovonya sa atthu akina. — Mir. 20:19. w22.10 21 etti. 14; 22 itti. 16-17

Ezekiyeli aahaana wiiwexexa saana muhupi aarowa awe olaleya. Owo aahaana okupali muhupi ole wira okhalane ikuru woolaleya. Nave yaahiiraneya etthu ekina yootikiniha. Ezekiyeli aahoona wira eroolu ele aakhuura awe ‘yanaya ntoko oravo’. (Ezek. 3:3) Mwaha wa xeeni? Okhala wira Ezekiyeli yoowo aarummwale ni Yehova, aari mutthu aamusiveliha Muluku. (Esal. 19:9-12) Owo aanixukhurela mwaha wa Yehova omurumeela ntoko profeta awe. Nuumala-vo, Yehova aahimuleela Ezekiyeli wira: “Molumo othene anohimeryakani, nwiriyane orattene, musuke mmurimani mwanyu”. (Ezek. 3:10) Ni moolumo ala, Yehova aamuleela Ezekiyeli wira aahaana opweha mmuupuweloni mwawe masu yaalempwale murooluni ni wuupuwelela. Okathi profeta Ezekiyeli aapanke awe eyo, waamini wawe waahilipa. Nave eyo yaahimukhaliherya olaleya muhupi ole moolipa murima. (Ezek. 3:11) Okhala wira moolumo ale yaari vamurimani vawe ni mmuupuweloni mwawe, Ezekiyeli aari oolikaneene wira eemererye ni omalelihe yoothanleliwa awe. w22.11 6 itti. 12-14

Akhala wiira marukunuxo anipakiwa mmutthenkesoni anneehererya ororomeleya wanyu, etthu xeeni mukhanle anyu oopaka? Okathi yeetta aya moothakoni, atthu a nloko na Kehathi ti yaatexa nivuku na waataana. (Moth. 3:29, 31; 10:33; Yox. 3:2-4) Eyo yaari eparakha yuulupale. Masi nuumala aisarayeli okela elapo yooleiheriwa itthu saahiturukeya. Okhala wiira nivuku na waataana khinaarowa oteexiwaka, atthu akina na Kehathi yaahivahiwa miteko sikina. (1 Wah. 6:31-33; 26:1, 24) Mbiibiliyani, khanivo nipuro ninhimya wira atthu a nloko na oKehati yaahiixinliha mwaha wohiihiwa iparakha saya. Nto ntakiheryo naya ninniixuttiha exeeni? Okathi anikhumelela aya marukunuxo mmutthenkesoni mwa Yehova, nihaana okhaliherya ni murima ahu wootheene, hata ehelaka muhina ohiya iparakha sahu. Nihaana ohakalala ni khula eparakha nirina ahu. Muhiliyale wira Yehova khonoovahani efaita mwaha wa iparakha sanyu, masi owo onivaha efaita wiiwelela wanyu. w22.11 23 itti. 10-11

Onesiiforo aahimphavelasa murummwa Paulo, nuumala omphwanya aahimukhaliherya onvahaka itthu saarina awe. Mwaha woopaka eyo, Onesiiforo aahileva okumi awe wira omukhaliherye Paulo. Etthu aapanke awe Onesiiforo enniixuttiha-ni? Enniixuttiha wira niheemererye wira woova onihiiheke waakhaliherya anna anilupatthiwa. Ohiya-vo, nihaana owaakiha ni waakhaliherya. (Mir. 17:17) Okhala wira okathi owo awo annireerela ophentiwa ni okhaliheriwa. Nwehe yoowiiraneya ya anna ni arokora a oRússia. Awo khanihiya waakhaliherya anna ni arokora atthukweliwe mukhatteya. Okathi anna aniroihiwa aya otribunaali wira yaphukeliwe anna anceene annipaka sootheene aniwerya aya wira yaakhaliherye. Ntakiheryo naya ninniixuttiha exeeni? Nniixutta wira okathi anna anihoolela mutthenkeso wa Yehova anootheriwa aya, olupatthiwa ni otthukweliwa mukhatteya hiyo nihooveke ni naakhaliheryeke. Nnoowerya opaka itthu iyo, akhala wira nnimwaavekelela, okhaliherya emusi aya ni opaka itthu sootheene ninwerya ahu wira naakhaliherye. — Mit. 12:5; 2 aKor. 1:10, 11. w22.11 17 itti. 11-12

Axitokweene aakhalana muritti woowaalipiha anna, arumeelaka soolepa sa mbiibiliyani ni waamaaliha okathi sinaakhumelela aya mixankiho. (1 Ped. 5:2) Okathi enikhumelela aya ehasara axitokweene ahaana osuwela, vakhala wiira khula munna aahiiso murokora ori opuro woovareleleya, okhalana eyoolya, ikuwo ni opuro wookhala. Nuuvira okathi anna awo yaakhumelenle ehasara, anooreerelaka olipihiwa ni omaalihiwa. (Yoh. 21:15) Munna mmosa oniitthaniwa Harold, onirumeela Ekomisau ya eFiliyaali ni onaasuwela anna anceene yaatonko waakhumelela ehasara, onihimya so: “Onnivira okathi munceene wiira mutthu oliyale itthu saamwiiranenle. Hata makhalelo atthikelaka vakhaani-vakhaani okhala saana, masi khanaaliyala amusi aya akhwiiye, mireerelo saya sirimeelale, aahiiso itthu soowoopiha saakhumelenle. Miyuupuwelo iyo pooti owiirihaka otthikela oriipiwa murima. Nave eyo khentaphulela wiira awo kharina waamini, okhala wiira awo apinaatamu nave”. Axitokweene anniiwelela miruku sini: “Munleke naale aninla”. — aRom. 12:15. w22.12 22 etti. 1; 24-25 itti. 10-11

Yehova onninivaha munepa awe woowaarya, wiira niwerye oxintta soophavela soohiloka. Okathi nimmusoma ahu Biibiliya, ninnooniherya wiira ninniphavela okhaliheriwa ni munepa woowaarya. Nave ninneemererya wiira munepa woowaarya onikhaliheryeke, okathi ninrowela ahu mithukumano. Vaavo ninrowa ahu omuthukumanoni, nihaana oviriha okathi niri ene ni anna ni arokora yaawo aniimananiha opaka itthu sooloka ni annilipiha. (aHeeb. 10:24, 25; 13:7) Nave Yehova, onoonivaha munepa awe woowaarya wiira onlipihe ni wiira nihihiye owanana soophavela soohiloka, okathi nninvekela ahu ni omuxonttela. Itthu iyo khasinrowa omala-maliha moomalela soophavela sahu soohiloka, masi sinrowa onikhaliherya oxintta. Vaavo nniimananiha ahu opaka itthu sinnikhaliherya olipiha waataana wahu ni Yehova, ti vooloka ohihiya opaka eyo. w23.01 11 itti. 13-14

Biibiliya khonihimya itthu ninreerela ahu opaka wiira nikhalane okumi wooloka aahiiso itthu ninreerela ahu olyaaka. Masi hata vari siiso, owo onnooniherya moonelo wa Yehova voohimya sa itthu iyo. Mwa ntakiheryo, Yehova onninlopola ohimyaka so: “Muheteteyaxeké n’itthu [soonanara]” seiyo sikhanle oohonona okumi ahu. (Mus. 11:10) Biibiliya onihimya wiira nihaana osyaka opaka itthu sikhanle oohonona okumi ahu, itthu ntoko olya vanceene ni ohapaliwa. (Mir. 23:20) Nto Yehova omphavela wiira nikhaleke atthu oowiihiiha okathi ninwurya ahu aahiiso olya. (1 aKor. 9:25) Ninrowa opaka sai soothanla sinooniherya wiira ninnivaha efaita okumi? Nnoowerya opaka eyo akhala wiira nnimwaarumeela ankhili. (Esal. 119:99, 100; Mir. 2:11) Mwa ntakiheryo, hiyo nihaana waarumeela ankhili okathi ninthanla ahu etthu nimphavela ahu olya. Nto akhala wiira yookhala eyoolya ennisivela vanceene masi nnoona wiira naalya vale enniniwereya, vaamureerela ottharuwa yoolya eyo. Nave nnimooniherya wiira nookhalana ankhili vakhala wiira ninnirupa okathi wooreerela, ninnipaka esersiisiyo khula nihiku, ninniirattela ni orattela mapuro ninkhala ahu. w23.02 21 itti. 6-7

Munrowa owerya sai wiixutta itthu isya okathi munimusoma anyu Biibiliya? Nrowe niwehe ele onihimya awe 2 Timootheyo 3:16, 17. Yoolepa eyo enihimya wiira: “Soolempwa sootheene. . . . Sinnivareleya muteko” wiira (1) siwiixuttiheke atthu, (2) saattaruxeke atthu, (3) sooniheryeke itthu soohiloka, ni (4) saalakiheryeke atthu ephiro ya xariya. Iponto iya xexe sinnivareleya muteko hata ni iliivuru seiye sa mbiibiliyani muhimmakela anyu osoma. Musomeke ni ephoole iliivuru iyo, mmananiheke oweha malakiheryo anikhuma eliivuru eyo ni etthu muniixutta anyu voohimya sa Yehova ni yoolakela awe. Nave okathi munisoma anyu, mmananiheke oweha moota iliivuru iyo sinoottaruxaayani. Masi eyo enrowa oweryaneya sai? Eyo enoweryaneya okhala wiira Biibiliya pooti onikhaliherya osuwela soophavela ni mikhalelo soohiloka nirina ahu, ni onikhaliherya ohiya mikhalelo iyo wiira nikhale oororomeleya wa Yehova. Nave mmananiheke orumeela yoolepa ela wiira nwooniheryeke itthu soohiloka atthu anipaka aya okathi munilaleerya anyu. Okathi munimusoma anyu Biibiliya muhaavyeke iponto sinrowa woolakiheryani ephiro ya xariya ni okhalana moonelo mmosaru wa Yehova. Nto vakhala wiira munoomusomaka Biibiliya muupuwelelaka itthu iya 4 niixuntte ahu, eyo enimookhaliheryani wiixutta itthu isya, ni osiveliwaka ni yoosoma anyu ya Biibiliya. w23.02 11 etti. 11

Eprofesia eri eliivuru ya Daniyeli yaahihimya khalai ene wira Yesu aarowa opacerya olamulela wanikisa wa okathi 7. Niireke vanniweryaneya osuwela okathi Yesu aakhalihiwe awe mwene? (Dan. 4:10-17) Okathi 7 onithoonyerya iyaakha 2.520. Okathi owo waapacenrye mwaakha wa 607 Kristu Ohinatthi Orwa, okathi yoowo ababilonia yaamukuminhe aya oYerusalemu mwene ookiserya aathanliwe ni Yehova. Okathi owo 7, waamanle silini? Waamanle mwaakha wa 1914, okathi Yehova aamwiirinhe awe Yesu, yoowo ‘omuthanlale awe’ okhala Mwene a Omwene wa Muluku. (Ezek. 21:30-32) Xeeni eprofesia ela eri aya ya efaita yinceene? Osuwela oratteene eprofesia ya okathi 7, enninikhaliherya okupali wira Yehova onoomaliherya itthu sootheene oleihenrye awe okathi wooreerela. Yehova aahithanla okathi wooreerela wira Yesu okhale Mwene. Mwa enamuna emosaru, iprofesia sikina sinimwiiraneya okathi wooreerela othanliwe ni Yehova. Nikupaliki ni murima wootheene wira nihiku na Yehova nnoophiya “tthiri, khivaninteya”. — Hab. 2:3. w22.07 3 itti. 3-5