“Miyo Kinokhala Ni Nyuwo”

“Atthu anjene anosoma elivuru eyo n’utthokelela, animwinjererya osuwela waya”.​—DAN. 12:4.

MUNNIWERYA WAAKHULA?

Mahiku ahu ala, ‘osuwela’ wekeekhai oniphwanyaneya sai?

Atthu yaale anisiveliwa ekeekhai ‘aninjerereya’ sai?

Moota xeeni osuwela wekeekhai onaaphwanya aya atthu ‘anjene’?

1, 2. (a) Ninsuwela sai wira Yesu onnaakhaliherya atthu awe, ni wira muhoolo onrowa waakhaliherya-tho? (b) Moovarihana ni Daniyeli 12:4, omusoma Biibiliya onrowa oniphwanyiha exeeni?

NKUUPUWELANI muryeene mParayiisu. Khuta nihiku vosiisu, nyuwo munivenya muryeene oohakalala wira nvareke miteko sanyu. Khiivo etthu enooxankihani wala woowereyani. Iretta sotheene saarina anyu soomala. Okhala wira erutthu anyu ti yooloka saana, nyuwo munniwerya woona, wiiwa, woona wunkhela, waapapela, ni woona osiva itthu sinlya anyu. Vano nyuwo muhaana ikuru, muteko onivara anyu onnoosivelani, muhaana apatthani anci ni khiivo etthu enooxankihani. Eyo enoowerya owiiraneelani moMweneni mwa Muluku. Kristu Yesu, Mwene othanliwe, onimwaareeriha atthu awe ni owiixuttiha sooruma sa Yehova.

² Yehova onrowa waakhaliherya arumeyi awe oororomeleya wira yawiixuttihe malamulo awe atthu akina mParayiisu. Nto Muluku vamosa ni mwanawe, annaakhaliherya arumeyi awe oororomeleya okhuma khalai. Ohinatthi owela wiirimu, Yesu aahaalipiherya awiixutti awe wira onimwaakhaliherya. (Mmusome Matheyo 28:19, 20.) Wira nilipihe waamini wahu masu awo, nrowe niwehe saana efrase emosa paahi ya eprofesia ya Muluku yeeyo elempwe khalai oBabilonia, iyaakha sowiiraka 2.500 sivinre. Voohimya sa “mahiku òkiserya” anikhala ahu, profeta Daniyeli olempe wira: “Atthu anjene anosoma elívuru eyo n’utthokelela, animwinjererya osuwela waya’’. (Dan. 12:4) Moolumo ala a eHeeberi ataphuleliwe ‘osoma n’uthokelela’, yaawo anooniwa okhala a ntakiheryo ni anivarihana ni mahiku ahu ala, anitaphulela otokosa saana etthu eyo enisommwa. Tthiri osoma n’uthokelela mmoota owo onookumiherya mireerelo sinci! Nto ale animusoma saana Biibiliya, anoophwanya osuwela wekeekhai, wa Nuulumo na Muluku. Eprofesia ennihimya-tho wira ‘onimunjerereya osuwela’. Eyo enooniherya wira osuweliwa ekeekhai, waamusariheleya. Masu awo yaarowa olaleiwa wa atthu otheene. Vaavo vanivarerya ahu moota eprofesia ela yiirane’ya aya, nnimoona wira olelo va, Yesu onnaakhaliherya awiixutti awe; nave-tho Yehova onnimaliherya sotheene aaleihenrye awe.

‘ATTHU ANOKHALANA OSUWELA’ WEKEEKHAI

3. Exeeni yiiranen’ye ni ‘osuwela [wekekhai]’ nuumala okhwa awiixutti?

³ Vaahihimmwa wira nuumala okhwa awiixutti, eriyari ya maKristau oororomeleya, yamukhumela atthu oovirikanya nto yamuulaana ntoko mooro. (Mit. 20:28-30; 2 aTes. 2:1-3) Nuuvira iseekulu sinci, ‘osuwela [wekekhai]’ waahithowa, ohiya waale yahaamusuwela Biibiliya paahi, masi-tho wa atthu yaihimya okhala maKristau. Nnaamwi ahooleli a Ikerexa yaalavula wira annimukupali Biibiliya, yiixuttiha itthu sa ethiru, “sowixuttiha sa Satana” sinimunyohola Muluku. (1 Tim. 4:1) Atthu khayiixuttihiwa masu a Muluku. Mwiixuttiho weethiru waahela muhina wira Amuluku ari araru, mutthu khanikhwa moomalela, ni wira atthu akina anrowa ohaawaka omooroni.

4. Moota xeeni ekrupu ya maKristau iyaakha sa 1870 yaapacenrye aya otokosa wira ‘esuwele’ ekeekhai?

⁴ Masi, mwaakha wa 1870, etthu yowiiraka iyaakha 40 “mahiku ookiserya” ahinatthi opacerya. Ekrupu emosa yaamukhaani ya maKristau oororomeleya, oPennsylvania, E.U.A., yanithukumana wira emusomeke ni omutokosa Biibiliya, ephavelaka ‘osuwela’ ekeekhai. (2 Tim. 3:1) Awo yahiivaha nsina na Alipa-oomusoma Biibiliya. Khahiyo yaari anamiruku ni asuweli yaale yaahimmwe ni Yesu, wira khiyaarowa wooniheriwa ekeekhai. (Math. 11:25) Awo yaari atthu oowiiyeviha nto yaaniphavela weettela otthuna wa Muluku. Awo yaanivekela, yaanisoma saana Soolempwa ni wuupuwelela. Yaanilikanyiha masu yaasoma aya mBiibiliyani ni soolepa sikina sa atthu yaamutokosa Biibiliya. Nto vakhaani-vakhaani, Alipa-oomusoma Biibiliya, yaahipacerya osuwela saana ikeekhai sa mBiibiliyani seiyo sahaasuweliwa iseekulu soovira.

5. Yoolakela xeeni yaarina aya etratato Old Theology?

⁵ Nnaamwi Alipa-oomusoma Biibiliya yaahakalala mwaha wa itthu yiixutta aya, awo khiyiixinnuuha, ni yaanisuwela wira khahiyo yiixuttiha itthu isya. (1 aKor. 8:1) Nto yaahipacerya olepa ni okawela itratato siihaniwa The Old Theology (Sowiixuttiha sa Khalai). Yoolakela aya waari owooniherya atthu ekeekhai eri mBiibiliyani. Etratato yoopacerya yaanivaha “nikhaliheryo nuulupale na moota woomusoma Biibiliya, yaanooniherya sowiixuttiha sa ethiru, ni sowiixuttiha sa Pwiya Yesu ni atthareli awe”.​—The Old Theology, No. 1, Abril 1889, epax. 32.

6, 7. (a) Ikeekhai xeeni nikhaliheriwa ahu osuwela okhuma iyaakha sa 1870? (b) Ankhi nyuwo ikeekhai xeeni soosivenleni?

⁶ Iyaakha 100 sivinre okhuma okathi wa ekrupu ele yaamukhaani, nihiixutta ikeekhai sinceene soohakalaliha!a Ekeekhai eyo khahiyo yoovila, ntoko myaha sa oxikola sinithokoreriwa ni atthu animusoma Teologia paahi. Ikeekhai iyo sinniphwanyiha ohakalala, otaphuwa, olipiha ekumi ahu ni onivaha nlipelelo. Ekeekhai eyo ennikhaliherya omusuwela Yehova, vamosa ni makhalelo awe oophenta ni soolakela sawe. Sinnooniherya saana muteko wa Yesu, etthu yaamwiirinhe orwa valaponi ni okhwa, ni ele enipaka awe vano. Ikeekhai iya, sihooniherya nthowa naya Muluku onihiya awe sootakhala siiraneyaka, mwaha aya hiyo ninkhwa ahu; moota woovekela, ni moota woophwanya ohakalala wekeekhai.

⁷ Nto vano ninnoona vakhaani yootaphulela ya iprofesia ‘saipithihinwe’ okhuma khalaixa, masi sinniiraneya vano mahiku ala ookiserya. (Dan. 12:9) Iprofesia iyo, sinihela muhina myaha suulupale siri mBiibiliyani, vanceenexa Ivanxelyo ni eliivuru ya Wisupulula. Yehova oonikhaliherya osuwela itthu sihiniweryaneya oweha ni maitho ahu, mwa ntakiheryo ovahiwa emwene wa Yesu, ekhotto yaawaniwe wiirimu ni ovonyeriwa vathi wa Satana. (Wis. 12:7-12) Nave-tho, Muluku oonivaha miruku wira nisuweleke yootaphulela ya ele eniweha ahu, ntoko ikhotto, itetere, iretta, othowa soolya vamosa ni otakhala wa atthu a mahiku ala “òxanka”.​—2 Tim. 3:1-5; Luka 21:10, 11.

8. Ti pani oninvuwiha ahu mwaha wa osuwela ni wiiwa ikeekhai sa mBiibiliyani?

⁸ Ti vookhweya oweha ele Yesu aalenle awe awiixutti awe wira: ‘Àreriwa maitho anona itthu sinònanyu. Kinolèlani ti miyo, wira: maprofeta ni mamwene manjene yahiphavela wona itthu sinònanyu, khuhona; yahiphavela wiwa itthu sinìwanyu, khuhìwa’. (Luka 10:23, 24) Ninninvuwiha Yehova Muluku onniiriha wiiwa itthu iya. Tthiri ninnixukhurela mwaha wa ‘namakhaliherya’, munepa wootteela wa Muluku yoowo onirumihiwa ni Yesu wira oweettiheke ‘mwekekhaini mothene’ atthareli a Yesu. (Mmusome Yohani 16:7, 13.) Nto nihaana ovahaka efaita osuwela nno wekeekhai ni waaleelaka atthu akina!

“ATTHU ANJENE” ANNISIVELIWA “OSUWELA” WEKEEKHAI

9. Nlattulo xeeni erevista yaapanke aya mweeri wa Abril eyaakha ya 1881?

⁹ Mweeri wa Abril 1881, iyaakha piili ekumiheriwe ene erevista Owehaweha (Englexi), erevista eyo yaahaalattula anamalaleerya oowiiraka 1.000. Mwaha owo waalempwe so: “Ale anoona wira anoowerya orumeela okathi aya etthu yowiiraka nimeya nimosa wala ovikana-vo avaraka muteko wa Apwiya, pooti wira so:  . . , Nyuwo pooti orowa esidade yuulupale wala yaamukhaani moovarihana ni owerya wanyu, ntoko Makolpotore (mapioneero a khalai) wala Anamalaleya Ihapari, wira muwaavye maKristau ekeekhai; munimoona wira anamunceene annikhalela nthiti omurumeela Muluku, masi kharina osuwela wekeekhai; mwa yaawo nwiixuttihe ikeekhai sa Tiithi Ahu wira yoone oreera wa moolumo Awe”.

10. Moota xeeni atthu yoonenle aya nlattulo na ovara muteko wa opioneero?

¹⁰ Nlattulo nno nooniherya wira Alipa-oomusoma Biibiliya yaanisuwela wira muteko muulupale wa maKristau ekeekhai, waari olaleya ihapari sooreera. Nto, okhala wira yaari atthu vakhaani paahi yaaronwe muthukumano ole wa Alipa-oomusoma Biibiliya, khuuvo aasuwelexa wira yaamukhumelela tthiri mapioneero oowiiraka 1.000. Masi nuumala osoma etratato wala erevista, atthu anceene yaaheemererya nlattulo nne. Mwa ntakiheryo: mulopwana mmosa aakhuma oLondon wInglaterra, nuumala osoma erevista Owehaweha ya 1882 yaalempwe ni Alipa-oomusoma Biibiliya, aalavunle so: “Xontte mukixuttihe moota woolaleerya ni masu ene oorowa olaleerya wira kivare muteko owo wooreera wa Muluku”.

11, 12. (a) Yoolakela xeeni erina ahu vano, enlikana ni yoolakela ya makolportore? (b) Makolportore yaapaka sai ikrupu wala miloko?

¹¹ Ovinyerya eyaakha ya 1885, Alipa-oomusoma Biibiliya oowiiraka 300 yaahiivahererya mmuteko wa makolpotore. Arumeyi ala a okathi wotheene yaarina yoolakela emosaru erina ahu vano; waapaka awiixutti a Yesu Kristu. Moota waalaleerya aya waahivirikana ni moota onilaleerya ahu. Olelo-va, nimmusomiha Biibiliya mutthu mmosa khula ekwaha. Nto ninnimulattula orowa omusuweliha muloko yoowo okhumenle khalai ene. Khalai, makolportore yaanikawa iliivuru ni waathukumanya atthu opuro omosa wira yaatthokiherye Biibiliya. Khahiyo yaamusomiha mutthu mmosa paahi, awo yaasomiha ekrupu ntero wala muloko.

¹² Mwa ntakiheryo, eyaakha ya 1907, ekrupu emosa ya makolportore, yaahuulaana esidade ntero yaaphavelaka atthu yaakhenle eliivuru Aurora do Milênio, (yiihaniwa-tho Estudos das Escrituras.) Nto erevista Owehaweha yaalavunle so: “Atthu [yaasiveliwe] ekeekhai yaanithukumana mmawannyeya. Ettiminku emosa, kolportore aanisoma eliivuru A Idade do Plano Divíno, nto ettiminku yoottharelana, anaatumererya wira ekhalaneke mithukumano khula esumana”. Mwaakha wa 1911, anna yaahituruka moota woolaleerya. Arumeyi 58 a vameekhaaya yaaxukurya miloko, yaahilavula myaha oCanada ni wEstados Unidos. Anna ala yaahikuxa masina ni opuro yaakhala aya atthu otheene yaale yaasiveliwe owiriyana mwaha ole, yaatumererya wira ethanleke etthoko wira ethukumaneke ntoko “ekrupu”. Nto 1914, miloko sa Alipa-oomusoma Biibiliya saari 1.200 olumwenku wotheene.

13. Munoonela sai mwaweha mwaattelo wa ale ‘anisuwela’ ekeekhai olelo-va?

¹³ Olelo va, sookhala miloko sowiiraka 109.400, olumwenku wotheene, nave anna ni arokora oowiiraka 895.800 annirumeela ntoko mapioneero. Atthu anitthimakela imilyau 8, ahaakhulela ‘osuwela’ wekeekhai nto anneettela mookumini mwaya. (Mmusome Yesaya 60:22.)b Masi, mwaattelo wa atthu ala ti wootikiniha, nuupuwela ele yaahimyale Yesu wira awiixutti awe yaarowa ‘olupatthiwa’ ni atthu otheene mwaha wa nsina nawe. Owo aahilavula-tho wira atthareli awe yaarowa olupatthiwa, otthukweliwa hata wiiviwa. (Luka 21:12-17) Nnaamwi Satana, malaikha ootakhala, ni atthu awe yaalupatthaka arumeyi a Yehova, muteko ahu wowaapaka awiixutti ohinnuwa saana ovikana khalai. Olelo va, hiyo ninnilaleya “mulaponi mothene”; musidade, mmawaani, mutakhwani, opuro wa myaako, mapuro ooxankiha, oowuuma, ni mapuro ootepexa orakamela. (Math. 24:14) Muteko ola wahaari wa Muluku khiwaakhumela saana siiso.

“OSUWELA” WEKEEKHAI ONROWA ‘WUNJEREREYA’

14. “Osuwela” wekeekhai onincerereya sai orweela mwa iliivuru sinipakiwa?

¹⁴ Mwaha wa atthu anceene anilaleya ihapari sooreera, “osuwela” wekeekhai ohulaana. Ihapari iyo sihuulaana orweela mwa iliivuru sinipakiwa. Mweeri wa Julyo 1879, Alipa-oomusoma Biibiliya yaahikumiherya erevista yoopacerya A Torre de Vigia de Sião e Arauto da Presença de Cristo (Enkelexi). Erevista eyo ya Julyo, yaampirimiriwe ni empresa mwa nttaava na Enkelexi paahi, waatta waya saari 6.000. Okathi aarina awe iyaakha 27, munna Charles Taze Russell aahithanliwa okhala mutokweene onihimya myaha sinrowa olempwaka, nave, yaahithanliwa-tho Alipa-oomusoma Biibiliya oowiiraka 5 yaawo yaari oororomeleya mmyaha sa Muluku, wira emukhaliheryeke. Vano erevista Owehaweha enniphwanyaneya mattaava 195. Ti erevista yootepa okaiwa olumwenku wotheene, khuta nummuru na erevista sinnimpirimiriwa 42.182,000 ikoopiya sene. Nave Despertai! ti erevista ya nenli enikumiheriwa etthu yowiiraka 41.042,000 mwaattelo aya ni mattaava 84. Ohiya vo khula mwaakha, sinnimpirimiriwa iliivuru sa Biibiliya etthu yowiiraka imilyau 100.

15. Maakina animpirimiri iliivuru sahu, musurukhu ene oniphwanyiwa sai wira evareke muteko?

¹⁵ Muteko ola muulupalexa, onikhaliheriwa ni soovaha soohikhanyereriwa. (Mmusome Matheyo 10:8.) Waatta wa irevista sinipaka ahu, onnaatikiniha vanceene atthu yaale anisuwela wira vanitthuneya musurukhu munceene woothumela maakina animpirimiri, iroolo sa ipaphelo, itinta ni itthu sikina. Munna mmosa muteko awe ori okhapelela itthu soothuma olumwenku wotheene oni: “Atthu animweetta nakoso okathi anixukurya aya maakina ahu maalupale ni oowuupa, animpirimiri iliivuru sahu, annitikiniheya yiiwaka wira muteko wotheene wa wimpirimiri iliivuru onikhaliheriwa ni soovaha soohikhanyereriwa. Nave annitikiniheya waaweha anaamiravo evaraka muteko oBetheli moohakalala”.

OSUWELA WA MULUKU ONOOSARYA VALAPONI

16. Yoolakela xeeni Muluku orina awe vaavo atthu ‘anisuwelihiwa’ aya ekeekhai?

¹⁶ “Osuwela” wekeekhai onniphwanyaneya wira yiiraneye yoolakela ya Muluku. Muluku “owo ontthuna wira atthu othene yopowe, esuwele ekekhai”. (1 Tim. 2:3, 4) Yehova oniphavela wira atthu esuwele ekeekhai ni omukokhorela saana wira ereelihiwe. Orweela mwa ‘waasuweliha’ atthu ekeekhai, Yehova onnaathukumanya maKristau oowoottihiwa owaamini. Awo anikhuma “ilapo sothene ni a maloko othene ni a mahimo othene”; nave Muluku onnithukumanya “muttitthi mulupalexa” yoowo onrowa okhalaka valaponi mahiku otheene.​—Wis. 7:9.

17. Wuulaana wa ‘osuwela’ wekeekhai onrowa okumiherya exeeni?

¹⁷ Etthu yowiiraka iyaakha 130 sivinre okokhorela wekeekhai ohuulaana ni ohooniherya wira Muluku oomuthanla Mwene Yesu Kristu, yoowo onaakhaliherya, waakhapelela, waatthokiha ni owiixuttiha arumeyi a Yehova. Wuulaana waya onooniherya wira tthiri muhoolo anatiri a Yehova anrowa wiiraneya. ‘Tthiri atthu othene a mulaponi anosareya osuwela w’Apwiya [Yehova] ntoko vansareya aya màsi mphareya’. (Yes. 11:9) Tthiri apinaatamu anrowa ophwanya mareeliho manceene!

[Inoota]

[Elatarato epaaxina 14]

Alipa-oomusoma Biibiliya a khalai, yaari atthu oowiiyeviha, yeettela otthuna wa Muluku

[Elatarato epaaxina 15]

Yehova onnivaha efaita wiimananiha wanyu wira ekeekhai ya Muluku ‘esuweliwe’