Niireke Vannikhalela Omukoha Etthu Muluku?

AKINA anihimya wira khivanloka omukoha Muluku. Awo anoona wira khahiyo ottittimiha omukoha Muluku so: xeeni onipaka awe etthu ela, wala ohineemya awe itthu sikina wira siinareye. Niireke owo tori moonelo anyu?

Akhala wira ti siiso, woonasa wene vanimoosivelani osuwela wira yaahikhala atthu ooloka yaamukoha itthu Muluku. Nwehe matakiheryo mwa itthu saakohale aya.

Yobi yoowo aari oororomeleya aakohale so: ‘Xeni Muluku onahiyawe atakhali ekhalaka? Xeni onahiyawe yuluvalaka n’ ikuru n’ ureriwa?’​—Yobi 21:7.

Habakuki yoowo-tho aari oororomeleya aakohale so: ‘Masi nyuwo munwerya sai wavilela atthu òtakhalexa? Muniwerya sai omála nwonaka atakhali awo yapwetexaka atthu èxariya?’​—Habakuki 1:13.

Yesu Kristu aakohale so: “Muluku aka, Muluku aka! Mukinyanyalenleni?”—Matheyo 27:46.

Okathi onisoma anyu masu awo arina aspas, nyuwo munimoona wira Yehovaa Muluku khaanyemenle atthu ale yaakoha aphavelaka osuwela ekeekhai. Oweemya wawe atthu opaka makoho khonnitikiniha, maana Muluku khivanimunyoonya okathi oniveka ahu wira onikhaliherya ophwanya itthu sa werutthuni, sinitthuneya wira nikhalane ekumi. Owo moohakalala onninivaha ele ennithowa. (Matheyo 6:11, 33) Nave-tho owo onninleela itthu sinihakalaliha muupuwelo, ni okumi ahu. (aFilipi 4:6, 7) Tthiri, Yesu ahaaleela awiixutti wira: ‘Nvekele munovahiwa’. (Matheyo 7:7) Masu ala a yoolaiherya ya Yesu, anooniherya wira itthu Muluku sinrowa awe onivaha sinihela mpuwa waakhuliwa wa makoho anipaka ahu, ohiya itthu sa werutthuni paahi.

Vaakhanle wira vanniweryaneya, nikoho xeeni naarowa anyu omukoha Muluku?

● Kiireke okumi aka wookhalana etthu yoreera?

● Exeeni enrowa okhumelela okathi onrowa aka okhwa?

● Xeeni nyuwo munikihiya anyu kihaawaka?

Okhala wira “Solempwa sothene supuxeriwe ni Muluku”, nyuwo munimoona moota Biibiliya onaakhula awe makoho ala. (2 Timótheyo 3:16) Muhaana ovarerya-tho etthu ewiirihale akina opaka makoho awo ni moota Biibliya onaakhula awe.

[Enoota]