Nikoho 1: Kiireke Okumi Aka Wookhala Yoolakela Aya?
ROSALINDA, yoowo onikhala wInglaterra, onniimananiha ophavela osuwela itthu sinceene. Onniphavela-tho waakhaliherya atthu akina. Nuumala ograduari oxikola, mwali ola aahiphwanya muteko woottittimiheya; waakhaliherya atthu oohikhalana enupa, anaakhaliherya-tho ale ahiniwerya ni arina muxankiho wowaavila osoma. Nnaamwi aarina muteko woohakalaliha ni okhalana itthu sooreera sa werutthuni, ehaavo etthu yaamuxankiha, owo onihimya so: “Mwa iyaakha sinceene kaamakela okoha wira: ‘Nikhalenleni valaponi-va’ ni ‘Exeeni ekhanle yoolakela ya okumi?’”
Exeeni enimwiiriha mutthu okohaka siiso? Apinaatamu khanikhala ntoko axinama ahirina miruku. Apinaatamu anniwerya wiixutta etthu mwa itthu siiranen’ye, ni olokiherya itthu sa muhoolo, ni okhalana yoolakela.
Nto atthu akina anaakhula sai? Anceene anuupuwela wira etthu yootepexa otthuneya wa khuta mutthu ori ophwanya mihakhu, ovuwa ni ohakalala.
Nto waakhula mmoota owo onikumiherya exeeni? Onniwiiriha ohinvaha efaita Muluku, khiyoona wira hiyo mekhihu nithanleke ele enoona ahu okhala yootepexa otthuneya.
Nto Biibiliya Oniixuttiha Exeeni? Mwene Salomoni aahiithukumanyerya mihakhu sinceene ni aahiphwanya itthu soohakalaliha, masi wuukiseryani waya ahoona wira itthu iyo khisaakumiherya ohakalala woohimala. Owo ahooniherya etthu enikumiherya ohakalala wekeekhai mookumini nto khulepa so: ‘Mwa itthu sothene silepiwe-mu, omaliherya waya ti nno: Mmuttittimihe Muluku ni omova, mwìweleleke soruma sawe. Mutthu òpattuxeriwe yeyo’. (Musuweli 12:13) Onitaphulela exeeni wiiwelela sooruma sa Muluku?
Mpuwa mwa soolakela sawe, Muluku oniphavela wira hiyo nihakalaleke. Salomoni aalempe so: ‘Etthu yorera . . ., olya n’uwurya n’upuha ni sorera siphwanyalyawe. Vano kosuwela wira . . . itthu iya sinikhuma wa Muluku”.—Musuweli 2:24.
Muluku oniphavela-tho wira niphenteke ni othokorerya emusi ahu. Nkawehani malakiheryo ookhweya ni oovareleya muteko anivahiwa khuta mutthu vatthokoni.
“Ole othenle ohana omphenta mwar’awe ntoko erutthu awe”.—aÉfeso 5:28.
“Muthiyana amuttittimihe iy’awe”.—aÉfeso 5:33.
“Nyuwo anamwane! Nwiweleleke atith’inyu n’ame anyu”.—aÉfeso 6:1.
Akhala wira ninnivarela muteko sooruma iya suulupale, vanooweryaneyaka ophwanya ohakalala woreerela. Masi etthu yootepexa otthuneya ori wiimananiha wiixutta itthu sotheene siniwerya ahu voohimya sa Mpattuxa ni omwaattamela ntoko mpatthani ahu. Tthiri Biibiliya onnitumererya ‘omwattamela Muluku’. Nuumala-vo onnilaiherya wira: ‘Muluku onowattamelani’. (Yakobo 4:8) Akhala wira munimweemya nlattulo nlo, okumi anyu onookhala ni yoolakela yootepexa oreera.
Rosalinda ohimmwale wanipacerya, vano onnoona wira oophwanya etthu eniiriha okumi awe okhalana yoolakela yooloka.
Wira musuwele itthu sikina sa moota woomuhakalaliha Muluku, xontte nwehe-tho muru 12 wa eliivuru Biibiliya Oniixuttiha Exeeni Tthiri? Mutthu onniwerya obaxari elivuru eyo orumeelaka www.jw.org
[Elegenda eri epaaxina 5]
Yesu Aahimyale Exeeni sa Yoolakela ya Okumi Ahu?
Yesu aanisuwela saana yoolakela ya okumi ahu. Owo aahimyale so: ‘Miyo koyariwa, kihorwa mulaponi, wira kilaleye ekekhai. Othene ale anettela ekekhai, annìwelela molumo aka’. (Yohani 18:37) Yesu aahirumeela okumi awe wira olaleye ekeekhai voohimya sa Muluku ni soolakela sawe.
Nto okumi ahu onoophwanya ohakalala wekeekhai akhala wira nimmutakiha Yesu. Tthiri Yesu oonilattula wira nimutakiheke. (Matheyo 11:29) Nrowe nithokorerye inamuna piili sikhanle ahu oomutakiha Yesu.
Yesu aahiixuttiha oriki: wira nikhale oohakalala nihaana osuwela sootthuneya sahu sa omunepani. (Matheyo 5:3) Nnoowerya okhala saana omunepani akhala wira ninrowa omusuwela ‘Muluku mmosaru a ekeekhai, ni Yesu Kristu, yoowo [Muluku] omurumme awe’.—Yohani 17:3.
Yesu aahaaruma atthareli awe wira awiixuttiheke akina itthu saaxuttale aya. Owo aahimyale so: ‘Vano, murowé, mwawixuttiheke atthu a maloko otheene, mwabatizaka ni nsina n’Atithi ni na Mwana ni na eroho yowarya. Mwawixuttiheke wettela sothene sòrumalyakani. Vano miyo kinokhala ni nyuwo mahiku othene, mpakha elapo omala’.—Matheyo 28:19, 20.
Ale aniphavela osuwela itthu sa omunepani amusomaka Biibiliya ni weettela ele enisoma aya, annoona wira ekumi aya enniturukeya khukhala yooreera. Nto vaavo vanipacerya aya waakhaliherya atthu akina wira amusuwele-tho Muluku, awo anoona wira okumi aya wookhalana tthiri etthu yoolokexa.