WAAKHULIWA WA MAKOHO A MBIIBILIYANI
Niireke okumi wookhalana yoolakela?
Niireke munniikoha akhala wira etthu ekhanle mookumini ori othweela, ovara muteko, othela wala otheliwa, okhapelela emusi ni wanikisa waya wuuluvala? (Yobi 14:1, 2) Biibiliya onooniherya wira hata atthu a miruku anniikoha siiso.—Mmusome Musuweli 2:11.
Wira nisuwele akhala wira okumi wookhalana yoolakela, wanipacerya, nihaana osuwela toko moota okumi owo sipacenrye aya. Nuumala othokorerya moota sinivara aya muteko ottoopare vamosa ni erutthu ahu yotheene, anamunceene ahoona wira ookhala Mpattuxa a miruku opanke itthu iyo. (Musome Esalimo 139:14.) Tthiri yookhala etthu emwiirinhe Muluku onipattuxa. Nto osuwela ele emwiirinhe Muluku onipattuxa, pooti wuncererya ohakalala wahu.
Exeeni emwiirinhe Muluku waapattuxa apinaatamu?
Muluku aahaareeliha anamathelana oopacerya ni aavaha muteko woohakalaliha. Yoolakela awe yaari yoowi awo esareye valaponi, epake elapo eyo wira ekhale eparayiisu ni ekhaleke mahiku otheene.—Musome Maphattuwelo 1:28, 31.
Yoolakela ya Muluku yaahihononeya vaavo apinaatamu yahaamwiiwelenle aya. Masi Muluku khoninyanyanle wala oturuka yoolakela awe. Biibiliya onninlipiherya wira Muluku okhuma khalai onnivara muteko wira owoopole atthu oowaamini. Nto yoolakela awe voohimya sa elapo enrowa wiiraneya. Tthiri Muluku oniphavela wira nyuwo mukhalane okumi woolokexa! (Musome Esalimo 37:29.) Biibiliya onnihimya ele ekhanle anyu oopaka wira muttottele mureerelo yoolakela ya Muluku.
Wira musuwele soohimmwa sikina, muwehe muru 3 wa eliivuru ela, yoolaleiwa ni Anamoona a Yehova
Enniphwanyaneya-tho va www.jw.org/vmw