Orumeela Moohiikhupanyerya

‘Kinniliyala sihanle ottuli, kitthimakelaka siri oholo’.​—AFIL. 3:13.

MUSUKE IPONTO IYA SUULUPALE:

Exeeni yaamukhalihenrye Paulo oxintta wiivaha nthowa mwaha wa itampi sivinre?

Miruku xeeni sa Muluku sinrowa oniphwanyiha murettele mmuupuweloni mwahu?

Malakiheryo xeeni annikhaliherya omurumeela Muluku moohiikhupanyerya?

1-3. (a) Wiikhupanyerya ontaphulela exeeni, nto onikumiherya exeeni? (b) Etthu xeeni eniixutta ahu mwa ntakiheryo na Paulo sa omurumeela Muluku mohiikhupanyerya?

MULIPA-OOLEPA ipoesia mmosa onihimya so: “Masu ootepexa oriipiha murima a vanlumini wala oolempwa, taala: ‘Vaamureera vaakhanle wira etthu ela khiyiiren’ye!’” Poeta owo ti J. G.  Whittier, owo aahimya itthu seiye siniikhupanyerya ahu sinuupuwela ahu wira khanimphavela-tho otthikela opaka. “Wiikhupanyerya”, ori oxankiheya mmuupuweloni onikumiherya owereya, mwaha wa etthu yiiranen’ye wala ehipanke ahu, nave nuulumo nlo pooti otaphulela-tho “otthikela wunla”. Otheene ahu nootoko opaka etthu vano enuupuwela ahu wira nahaana opaka moota mukina. Itthu xeeni nyuwo siniikhupanyiha anyu?

² Atthu akina aapaka itthu sootakhala, hata itampi suulupale. Akina khapanke itthu sootepa otakhala, masi nlelo anniikoha akhala wira soothanla saya ti sooloka tthiri. Atthu akina aaliyala itthu sa khalai khiyavikaniha okumi aya. Akina anivikaniha wuupuwela itthu sa khalai eriki: “xeeni kahiiraaka etthu ela moota mukina”! (Esal. 51: 5) Nyuwo muri vaavi? Munniphavela omurumeela Yehova moohiikhupanyiha, okhuma olelo vaava orowa muhoolo? Niireke nihaavo ntakiheryo nekeekhai nikhanle ahu ootthara? Aayo nookhala, na murummwa Paulo.

³ Paulo ootoko opaka soothanla soohiloka ni sooloka. Aahiriipiwa murima vanceene mwaha wa itthu soohiloka sa khalai, masi aahiixutta mookumini mwawe okhumela saana amurumeelaka Muluku. Niwehe ele enniixuttiha aya ntakiheryo nawe na omurumeela Muluku mohiikhupanyerya.

WIIKHUPANYERYA WA PAULO NI ITTHU SIVINRE

4. Itthu xeeni Paulo apanke awe khalai saamwiiriha wiikhupanyerya?

⁴ Okhala wira Paulo aari nFarisi mmiravo, owo aahipaka itthu seiyo noovira okathi aikhupanyerya awe. Mwa ntakiheryo aahiipaka ekampaanya ya waalupattha atthareli a Kristu. Biibiliya onnihimya wira nuumala wiiviwa Siteefano, ‘Saulo [muhoolo mwaya iihaniwa Paulo] anìlipiha wira amalihe’ miloko. ‘Owo aniviravira mmatthokoni, anavara alopwana n’athiyana, àrihelaka mukhatteya’. (Mit. 8:3) Prusoore Aalbert Barnes, onihimya wira nuulumo na eGriki noowi “wìlipiha’, nintaphulela oluttuweliwa [Saulo] waarina awe ni onanariwa aalupatthaka maKristau”. Nto Barnes onihimya so: “Saulo aanilupattha igrexa [miloko] ntoko mwaaxinama oowali”. Okhala wira aari muYuda aatepa weettela etiini awe, Saulo uupuwela wira waamala-maliha maKristau waari muteko aavahiwe awe ni Muluku. Nto aahipacerya ‘walupattha [maKristau] avaraka mpakha owiiva . . . avaraka alopwana n’athiyana’ aphavelaka waamala-maliha.—Mit. 9:1, 2; 22:4.a

5. Mutthokiherye moota Saulo aattharunwe awe waalupattha atthareli a Yesu, nto khiyamulaleya Kristu?

⁵ Saulo aaphavela orowa oDamaasiko waavara atthareli a Yesu mmavateni mwaya wira aaroihe oYerusalemu yaphukeliwe moowali oSinedrio. Masi owo aahooceela mwaha woowi aahikhoottiheriwa ni Muhooleli a muloko weeKristau. (aEfe. 5:23) Vaavo Saulo aarowa awe oDamaasiko, Yesu aahimukhoottiherya Saulo khunwala maitho ni waarya waakhumelenle mootikiniha. Nto Yesu aahimuruma Saulo orowa oDamaasiko wira awehereryeke. Nto hiyo noosuwela etthu yiiranen’ye.​—Mit. 9:3-22.

6, 7. Exeeni enooniherya wira Paulo aanisuwela owereya wa sowiira sawe soohiloka sa khalai?

⁶ Mweettelo wa Paulo waahiturukeya mowaakuveya nuumala okhala Mukristau. Ohiya okhala nwanani a eKristau, owo aahipacerya waakiherya eKristau. Owo aahilepa ahimyaka wira: ‘Nyuwo muhiwa ohimmwaka mwettelo aka wa khalai, okathi wettela aka ikano s’Ayuda. Mosuwela wira kanlupattha n’ikuru saka sothene [muloko] wa Muluku kiphavelaka opwetexa’. (aGal. 1:13) Nuuvira okathi, aahiikhupanyera-tho okathi aalepela awe anna a oKorinto, oFilipo, ni aamulepela awe Timótheyo. (Mmusome 1 aKorinto 15:9; aFilipi 3:6; 1 Tim. 1:13) Paulo khaaphavela wiittottopa okathi aalepa awe itthu iya saamwiiranenle, hata khaaphavela wiipithiha wira ahisuweliwe wira itthu iyo saahimwiiraneela. Owo aanisuwela wira aahipaka itampi sinceene.​—Mit. 26:9-11.

⁷ Mulipa oomutokosa Biibiliya Frederic W. Farrar, oolavula wira Saulo “aanaalupattha vootakhalaxa makristau”. Farrar onnincererya oriki wira okathi onuupuwela ahu oriipiwa murima wuulupale Paulo aarina awe; “ninniweha wiittaruxa oonihenrye awe mwaha wa oxankiheya wawe, vaavo owo aaveehiwa awe ni anyokhani awe”. Okathi mukina waaniheryasa Paulo aanivaanela ni anna a miloko sinceene aaxukurya awe, nto anna yaale yaamoona ekwaha yoopacerya woonasa wene, yaanihimya wira: ‘Nyuwo ti Paulo, yoole aanilupattha!’​—Mit. 9:21.

8. Paulo oonela sai omoreliwa wawe ikharari ni Yehova, nto Yesu aamoonihenrye sai, vano nniixutta exeeni?

⁸ Nnaamwi Paulo aavahiwe muteko woolaleerya ihapari, owo aahisuwela wira owo khaaphwanela omoreliwa ikharari ni Muluku. Owo ooromola nuulumo noowi ikharari sa Muluku ikwaha 90 waavikana alipa oomulepa Biibiliya otheene. (Mmusome 1 aKorinto 15:10.) Paulo aanixukhurela vanceene moota amoreliwe awe ikharari ni Muluku, nto khiyavara muteko saana wira ahimoreliwe ikharari mahala. Nto ti maana aya aavara awe muteko mootepana waavikana arumeyi akina. Owo ntakiheryo nooloka wa hiyo akhala wira ninnihimya soottheka sahu ni orukunuxa mweettelo ahu, nto, orweela mwa mukuttho wowoopola wa Yesu, Yehova onkela orapiha itampi sahu hata siryeene suulupale. Nla tthiri ntakiheryo nooloka wa khula mutthu yoole onoona ovila okupali wira mukuttho wa Kristu onnimoopola khula mutthu! (Mmusome 1 Timótheyo 1:15, 16.) Nnaamwi vari siiso, Paulo aari namalupattha muulupale, owo aahilavula wira: ‘Mwana a Muluku: Owo òkiphenta, òhileva wokhwani mwaha wa miyo’. (aGal. 2:20; Mit. 9:5) Tthiri Paulo aahiixutta orumeela moohiikhupanyiha. Nyuwo muhiixutta yeeyo?

YOOKHALA ETTHU ENIWIIRIHANI WIIKHUPANYERYA?

9, 10. (a) Nthowa xeeni atthu akina a Yehova aniikhupanyerya aya ni itthu sa khalai? (b) Xeeni vahinloka aya ovikaniha oxankiheya ni soovonya sivinre?

⁹ Mootoko opaka etthu eniwiirihani nenla-va wiikhupanyerya? Mootoko omaliha okathi munceene ni ikuru sanyu mwaha wa ophavela itthu sihirina efaita? Mootoko opaka etthu yaahaaxale akina? Waaniheryasa pooti mutonko okhalana miyuupuwelelo sikina siniwiirihani wiikhupanyiha. Akhala wira enniiraneya, munrowa opakani?

¹⁰ Anamunceene annixanka mwaha wa itthu sakhalai! Oxanka ontaphulela ovikaniha wiivaha nthowa, wiihooxa, ni wiilupattha mmensawe. Opaka eyo ennikumiherya oxankiheya. Niireke oxankiheya ti etthu enimaliha mixankiho? Nnaari! Nkuupuwelani vaakhanle wira muniphavela weetta mukwaha, masi khiyamwiirukurerya opuro omosa, nyuwo mwaarowa ovela muhironwe ottyaawene! Nyuwo mwahiya oxankiheya, nto miteko sanyu sinookumiherya mireerelo. Nyuwo munoowerya onvekela musammaha ole mmutthekenle anyu, vaweryaneya wira mutthikele wataana. Nyuwo munoowerya-tho osyaka itthu sootthekiha, wira sihoophwanyeni mixankiho muhoolo. Pooti nlelo okhalanaka mixankiho saamukhaani sa mookumini. Masi otepexa oxankiheya onnimuhonona mutthu ahinawerya omurumeela saana Muluku. Oxanka khonivaha etthu.

11. (a) Ninkela omoreliwa sai ikharari ni Muluku ni onireerela murima? (b) Miruku xeeni sa Muluku sinrowa oniphwanyiha murettele mmuupuweloni, mwaha wa itampi sa khalai?

¹¹ Akina annikhalana muupuwelo wa wiivaha nthowa mwaha wa itthu sivinre khalai; enuupuwela wira Muluku khanaavaha efaita. Awo anuupuwela wira khaniphwanelela omoreliwa ikharari ni Muluku, okhala wira yaatoko ottheka, wala annaakuva ottheka. Masi, nihaana okupali wira hata nitonko opaka etampi khalai, vanniweryaneya ottharuwa, orukunuxa mweettelo, ni ovekela oleveleliwa. (Mit. 3:19) Yehova onimwaamorela ikharari, hata ekhanle ene akina-tho anitthuneya oleveleliwa. Yehova onomureerela murima ole oniiyeviha, mutthu ekeekhai, ni aittarunxe tthiri. Muluku aahimulevelela Yobi yole aahimyale wira: ‘kottharuwa, kìyevihaka vantthupini ni vatturwani’. (Yobi 42:6) Otheene ahu nihaana otthara miruku iya sa Muluku wira nikhalane murettele wa mmuupuweloni: ‘Onvithavitha sonanara sawe, khankelela oholo: ole onìhimya, attharuwaka, onnimoreliwa ikharari’. (Mir. 28:13; Yak. 5:14-16) Nto, nihaana omuleela Muluku itampi sahu, ovekela oleveleliwa nuuwo, ni wiilipiha ottharuwa itampi iyo. (2 aKor. 7:10, 11) Niira siiso, nnoophwanya ikharari sa Muluku yoowo ‘owakuva olevelela’ vanceene.​—Yes. 55:7.

12. (a) Ntakiheryo na Davidi ninniixuttiha exeeni voohimya sa moota wooxintta muupuwelo wa wiivaha nthowa? (b) Yehova onirukunuxa sai moonelo awe wala olevelela, nto osuwela eyo ennikhaliherya sai? (Moone ekaaxa)

¹² Nivekelo nookhalana ikuru; nihaana efaita yuulupale wa Muluku. Masu ari MuSalimo anooniherya wira Davidi aahihimya itthu sotheene saamwiira okathi aavekela awe. (Musome Esalimo 32:1-5) Ntoko saahimmya awe Davidi, weererye ovitha-vitha yoottheka wanimphwanyiha owereya. Waaniheryasa Davidi aahixankiheya mmuupuweloni, ni mwerutthuni mwawe khiyariipiwa murima mwaha wa ohimuleela Muluku itampi sawe. Nto Davidi ooponwe sai ni muxankiho ola? Aahitaphuwa nuumala omuleela muluku itampi sawe. (Esal. 6:2-7) Yehova aahaakhula mavekelo a Davidi, aahimulipiha wira avikaniheke ni okumi awe; nto ahaakhwaniherya etthu ya efaita yuulupale. Nto, akhala wira munonvekela ni murima anyu wotheene, nyuwo mukupaliki wira Yehova onoothokorerya mavekelo anyu. Akhala wira munnixanka mwaha wa itampi sa khalai, murantteliheke muupuwelo owo ni okupali wira Yehova oolipiherya wira owo ohoolevelelani tthiri!​—Esal. 86:5.

NWEHEKE ITTHU SA MUHOOLO

13, 14. (a) Exeeni olelo-va, enitthuneya ahu ovaha efaita? (b) Makoho xeeni annikhaliherya otokosa makhalelo ahu?

¹³ Akina anihimya wira osuwela makhalelo awe, mutthu ohaana oweha ottuli; masi eyo enooloka akhala wira ninweha ohoolo. Nto mmapuro mwa oxanka ni itthu sivinre, nihaana owehexexaka itthu siri vano ni sa muhoolo. Nitokoseke so: exeeni enivara ahu vano, wala ehipakale ahu, yeeyo enuupuwela ahu wira nahaana opaka wala ohipaka? Niireke ninnivikaniha ororomeleya wira muhoolo nihiikhupanyerye mwaha wa mixankiho wa itthu sinipaka ahu vano?

¹⁴ Vaavo maxakha maalupale anaattamela aya, khivanreerela wiivaha nthowa nuupuwelaka so: ‘Xeeni vale kahiimananiha aka ovara saana miteko sa Muluku? Xeeni vale kahaakhala aka pioneero kiriki miyo kaawerya? Exeeni yaakooceeliha okhala murumeyi oorumeela? Niireke kahiimananiha tthiri owara mweettelo musya? Kiireke Yehova onnikoona akhala mutthu yoole onimoona awe oreerela okhala elapo esya?’ Ohiya oxankiyeha paahi ni makoho ala, nihaana orumeela makoho ala wira nitokose makhalelo ahu akhala wira ninninvarela Yehova muteko mmukhalelo wooreerexa. Ohipaka eyo, onooniiriha okhalana okumi yoole muhoolo mwaya onkela ahu wiikhupanyerya.​—2 Tim. 2:15.

MUHIIKHUPANYERE NI MUTEKO ONINVARELA ANYU MULUKU

15, 16. (a) Mirukunuxo xeeni anamunceene apanke aya wira epaceriheke mookumi mwaya onvarela muteko Muluku? (b)  Xeeni vahinloka aya wiikhupanyiha mwaha wa mirukunuxo sahu mwaha woopaceriha miteko sa Muluku?

¹⁵ Ankhi akina a nyuwo apanke mirukunuxo wira envareleke muteko Yehova orummwa wa okathi wotheene? Waaniheryasa nyuwo moohiya muteko wala anakoso anyu yoophwanyihani muhakhu; nto mukhweeherya okumi anyu wira nvareke okathi munceene miteko sa Omwene. Aahiiso nyuwo muhiimananiha okhala muhithenle wala ohitheliwa, aahiiso moothela wala otheliwa. Pooti wira muhiimananiha ohikhalana anamwane wira mukhaliheryeke ovara muteko wa Muluku okathi wotheene, yoowo mwa enamuna ekina wahaarowa anyu owerya. Ntoko orumeela, oBetheli, oteka ipa ni isalau khula elapo, okhaliherya esirkwitu, wala muteko wa omisionaario. Niireke vano vanuuluvala anyu mmuteko wa Yehova munniikhupanyerya ni yoothanla anyu eyo? Niireke vanniloka wuupuwela wira wiilipiha opanke anyu wira mukhaliherye khorina efaita? Nnaari!

¹⁶ Nyuwo moopaka yoothanla eyo mwaha wa etthu emosa yuulupale, omphenta Yehova ni ophavela waakhaliherya akina omurumeela owo. Nto muhupuweleke wira vano muhaana ohiya wala orumeelaka okumi anyu moota mukina. Nyuwo muhakalaleke ni okupali wira etthu epanke anyu ti yooloka mookumini mwanyu. Muhakalaleke mwaha wa omurumeela wanyu saana Yehova. Owo khanrowa oliyala moota nvaherenrye anyu okumi anyu. Ekumi yekeekhai enkela anyu okhalana, owo onimooreelihanai mwa enamuna nyuwo ehinuupuwela anyu!​—Esal. 145:16; 1 Tim. 6:19.

MOOTA WOORUMEELA MOOHIIKHUPANYERYA

17, 18. (a) Etthu xeeni yaamukhalihenrye Paulo orumeela moohiikhupanyerya? (b) Yoolakela xeeni erina anyu voohimya sa, itthu sivinre, sikhanle vano, ni omurumeela wanyu Yehova muhoolo?

¹⁷ Etthu xeeni Paulo aixuntte awe, yaamukhalihenrye omurumeela Muluku mohiikhupanyerya? Ntoko silavuliwe aya ni Biibiliya otaphuleliwe ni J.  B.  Phillips, Paulo aalempe so: “Miyo koohiya itthu iye ottuli, nto ni matata aka kiniimananiha ophwanya itthu sa muhoolo”. (Mmusome aFilipi 3:13, 14.) Paulo khaavikaninhe ovarexexa itthu sa aYuda. Owo aawehexexa ni ikuru sawe sotheene wira aphwanelele waakhela mareeliho a okumi woohimala.

¹⁸ Otheene ahu nnoowerya otthara ntakiheryo na masu a Paulo. Ohiya ovikaniha wuupuwela itthu sivinre seiyo sihinrukunuxeya; masi nivikaniheke oweha sa muhoolo. Ekeekhai wira khivaniweryaneya oliyala moomalela soovonya sa khalai, masi nihaana khula okathi omalamalihaka muupuwelo owo. Tthiri, hiyo pooti owerya ohiya ottuli itthu sivinre, wira nimurumeeleke Muluku saana; niwehexexaka ohakalala woovuwa wa muhoolo!

[Enoota]

[Ekaaxa epaaxina 25]

NIIREKE YEHOVA ONNITTHARUWA WALA WIIKHUPANYERYA?

Ikwaha sinceene, Biibiliya onnihimya wira Yehova ‘ahittharuwa’ wala ohiya oruuha ihukhumu. (Yona 3:10; Maph. 6:6, 7; Makh. 2:18; 1 Sam. 15:11) Okhala wira miteko sa Muluku ti soomalela, nto ottharuwa wawe wala ohiya oruuha ihukhumu, khontaphulela wira aaroovonya. (Moth. 23:19; Otum. 32:4) Nuulumo na eHeeberi noowi: ottharuwa wala wiikhupanyerya, nintaphulela orukunuxa muupuwelo awe wala ohiya ele yaarowa awe opaka. Yehova onnipaka eyo mwaha woowi tooreera murima, oowaakuva olokiherya etthu, ni oomoriwa ikharari; khivanimusivela waakumiherya ehukhumo ale atthenke akhala wira aattharuwa etampi aya.—Yer. 18:7-10.

[Elatarato epaaxina 22]

[Elatarato epaaxina 24]

Paulo aahiixutta omurumeela Muluku moohiikhupanyerya.