ALE ANISOMA ILIIVURU SAHU ANNIKOHA . . .

Niireke Yesu Aamuleiherya Mulavilavi, Ophwanya Okumi Wirimu?

Moovarihana ni Bibliya Solempwa Sowarya, Yesu aahimyale so: “Kinohimeryani ekhweli wira: olelo vava munokhala ni miyo wirimu”. (Luka 23:43) Masi, aBiibiliiya akina moolumo a Yesu ataphuleliwe so: ‘Kinoolelani ekhweeli olelo-va, wira munrowa okhala ni miyo mParayiisu. Nto ninsuwela sai wira Yesu khaahimya wira mulavilavi ole aarowa okhalaka ni Yesu, wirimu?

Wanipacerya nrowe niwehe akhala wira mulavilavi ole aaniphwanelela orowa wiirimu. Apinaatamu anilipelela orowa wiirimu, toobatiziwa ni maasi, vamosa ni munepa wootteela, tivonto arya aya awiixutti a Yesu ooyariwa ni munepa. (Yohani 3:3, 5) Yoovekela ekina ori waakhwaniherya sooruma sa Muluku voohimya sa mweettelo wooloka, ni wooniherya mikhalelo ntoko iya; oreera murima, ororomeleya, ni owoonela othunku akina. (1 aKorinto 6:9-11) Ahaana ovikaniha okhala oororomeleya wa Muluku ni Kristu mpakha wanikisa wa okumi aya valaponi. (Luka 22:28-30; 2 Timótheyo 2:12) Nto akhala wira annaakhwaniherya tthiri sooruma iyo, tankhala aya oophwanelela ohihimuxiwa wira yaakhele muteko muulupale onrowa aya ovara wiirimu, eyo piiyo, orumeela ntoko alipa-amukuttho ni mamwene vamosa ni Kristu, yaalamulelaka apinaatamu iyaakha ekonto emosa.​—Wisupulula 20:6.

Moovirikana ni eyo, mulavilavi ole aari nakrime, ni aakhwiiye ntoko nakrime. (Luka 23:32, 39-41) Ekeekhai wira owo ahooniherya omuttittimiha Yesu vaavo aahimyale awe so: “mukùpuwele miyo, mwaphiyà momweneni mwanyu”. (Luka 23:42) Ohiya vo, owo khabatiziwe ntoko mwiixutti a Yesu oyariwe ni munepa wootteela, okumi awe khoonihenrye okhala mweettelo wooloka ni woororomeleya. Niireke vannireerela wuupuwela wira Yesu ammulaiherya orowa wiirimu, vamosa ni atthareli awe oororomeleya, yaawo yoonihenrye tthiri ororomeleya waya?​—aRoma 2:6, 7.

Wira nilikanyiherye: Akhanle wira mutthu mmosa ohoovekelani wira mmulevelele mwaha wa owiiyeryani musurukhu, nyuwo pooti othanla ohimuroiha otribunaali mutthu owo. Masi niireke mwaarowa omuroromela mpakha omweemya wira omweettiheke nakoso anyu wala otthokorerya emusi anyu? Tthiri nyuwo mwaarowa waavahererya miteko iyo, atthu yaale anitepa anyu waaroromela. Mmukhalelo mmosaru, ale avahiwe nlipelelo na okumi wiirimu, ahaana okhala atthu aniroromeleya, wira tthiri anookhaliherya exariya ya Muluku okathi anrowa aya waalamulelaka apinaatamu. (Wisupulula 2:10) Mulavilavi ole, nnaamwi ohalaka vakhaani okhwa oonihenrye oreera murima, khiivo etthu enniiriha ohimya wira aari oororomeleya.

Masi, akina annikoha so: Yesu khaamuleelale mulavilavi ole wira aarowa okhala hoothe wiirimu nihiku nle? Eyo khahiyo etthu yaahimyale awe, okhala wira nihiku nle Yesu khaaronwe wiirimu. Masi owo aari ‘mmahiye’ mahiku mararu. (Matheyo 12:40; Marko 10:34) Hata nuumala ohihimuwa, owo aahikhala valaponi mahiku 40 ohinatthi orowa wiirimu. (Miteko 1:3, 9) Tivonto mulavilavi ole khaawerya orowa wiirimu ni Yesu nihiku nenle.

Nto eParayiisu xeeni yaarowa awe okela? Nuumala ohihimuwa owo onrowa okhala mParayiisu valaponi, yoowo onrowa olamuleliwaka ni Yesu. (Miteko 24:15; Wisupulula 21:3, 4) Wira musuwele itthu sikina sa Parayiisu ni ele Muluku enivekela awe, ninveka wira mulavule ni Anamoona a Yehova.

[Elatarato epaaxina 9]