YOWIIRANEYA YA MUTTHU

“Kaaniwerya Woona, Masi Nkaasuwela Saahimmwa”

Ntoko sihimmwale aya ni Olivier Hamel

Waari mwaakha wa 1975, kaarina iyaakha piili, vaavo amaama yaapacenrya aya ohoverya wira miyo kaahikhalana etthu yahaalonke. Amaama yaakikunxe mmatatani, nto mpatthani aya muthiyana aahimoroxela vathi etthu yootepa olemela, khokumiherya onyakula wuulupale. Nuumala okiweha, amaama yahoona wira onyakula waakhumelenle khiwaakitutunxe. Nuumala iyaakha tthaaru, nlelo nkaawerya olavula. Muhoolo mwaya, emusi aka yahiiwa ihapari soohiloka, meediko aahimyale wira miyo kookhalana oretta wa ohiiwa okhala wene!

Nlelo kiryeene mwaana mukhaani, anamuyari aka yaahimwalana, nto Amaama yahaana okihuwa miyo vamosa ni annaka owunnuwela, axinnaka anli ni murokoraka mmosa. Okathi ole oFrança, anamwane yaarina oretta wa ohiiwa, oxikola khiyaasomihiwa ntoko sinisomihiwa aya mahiku ala, ohiya-vo, inamuna sarumeeliwa ikwaha sikina saanikumiherya ohaawa wuulupale. Hata vaari siiso, okhuma onamwane aka kaahikhalana eparakha waavikana akina yaarina oretta wa ohiiwa. Mukihiye kitthokiherye.

Okathi ole, maprusoore manceene yaakupali wira atthu ahiniiwa yahaana oxuttihiwa erumeeliwa enamuna ya olavula, nto ole ohiniiwa khiyaweha weeteteya wa iyano sa mutthu onilavula. Tthiri oFrança opuro waakhala aka, oxikola wamukhoottihiwa olavula ni matata wa atthu ahiniiwa. Okathi woosoma, anamwane akina yaarina oretta wa ohiiwa, matata aya yamutthukiwa ottuli wira ahithoonyaseke.

Iyaakha vakhaani sa wanipacerya wa okumi aka, kaaniviriha iwoora sinci khuta esumana kiixuttihiwaka moota woosuwela ele iyano saahimya aya. Atthu yaavara iyano saka wala muru khiyakikhanyererya ikwaha sinceene wira kilavuleke masu yahaawerya aka wiiwa. Nkaawerya olavula ni anamwane akina. Tthiri nkireere ohaawa okathi ole.

Nto, kirineene iyaakha 6, kaahiroihiwa exikola yaasomiha anamwane ahiniiwa okhala wene. Owo waari okathi waapacenrye aka okumanana anamwane yahiiwa ntoko miyo. Opuro ole waanikhoottihiwa-tho olavula ni matata. Akhala wira naamulavula ni matata naanisuwela wira matata ahu yammaniwa aahiiso ikharari sahu wala maihi saarowa okokhiwa. Masi, okathi wahooniwa ahu, hiyo naanilavula ni matata nirumeelaka ithoonyeryo saapakale ahu. Nto khupacerya wiiwanana ni anamwane akina. Waari opacerya waka ohakalala wa iyaakha thaaru.

Okathi waarina aka iyaakha 10, kaaroihiwe exikola primaaria ya anamwane aniiwa. Eyo yaahikikhulumula. Koona wira anamwane akina otheene yahiiwa, yaahikhwa nto miyo khuhala ekhaka mulaponi. Mwaha woophavela wiiwelela miruku saavahiwa aya ni doctore, yoowo oona wira miyo kaamuliyala itthu saaxuttihiwa aka ni exikola ele ya olavula ni iyano, amaama khiyaaxuttale elavulelo ya matata, ohiya-vo, kaanikhoottiheriwa othweela ni anamwane yaarina muxankiho wa ohiiwa. Mpakha-va kinnuupuwela nihiku naarowale ahu okumana ni mulipa-oosoma oretta wa ohiiwa. Yoowo aarina eliivuru ya nttaava ninlavuliwa ni matata vameesa vawe. Nuumala woona efootu vakaapani, khahithoonya kihimya so: “Kimphavela eliivuru eyo!” Nto, nananoru doctore aahivitha eliivuru ele.a

MOOTA OXUNTTE AKA ITTHU SOMUNEPANI

Amaama yaanimananiha oniixuttiha weettela sooruma sa eKristau. Naanirowa hoothe omuthukumanoni muloko wa Mérignac wa Anamona a Yehova, waattamela oBordeaux. Mwaha wookhala mwaana kiixutta itthu vakhaani paahi omuthukumanoni. Masi, anna a mmulokoni, yaaniranttelana okilaathi opuro waarya aka, nto khiyalepa itthu saahimmwa wira miyo kisomeke. Okiphenta ni okoonela waya othunku waahikivara murima. Owaani amaama yaanikiixuttiha Biibiliya, masi nkinaiwaxexe saana etthu ene yaaxuttihiwa aka. Kaari nto profeta Daniyeli, nuumala nlaikha omuhimyeerya eprofesia, owo aahimyale so: “Miyo kahìwa molumo awo, masi nkasuwenle sahimyaya”. (Daniyeli 12:8) Moovirikana ni Daniyeli, miyo “kanooona masi nkaasuwela saahimmwa”.

Hata vaari siiso, vakhani-vakhani ikeekhai suulupale saahikela vamurimani vaka. Kaanivarexexa itthu vakhaani saiwexexa aka saana ni kaanimananiha weettela. Itthu sikina kaniixutta mwaha wooweha mweettelo wa atthu akina. Mwa ntakiheryo, Biibiliya onnixuttiha okhala oopixa murima. (Yakobo 5:7, 8) Miyo nkaasuwela saana ele opixa murima onitaphulela aya. Masi, oweha mweettelo wa anna akina, waanikiiriha osuwela saana yootaphulela aya. Tthiri muloko wa eKristau khoreere okikhaliherya.

OKHUMUWA WUULUPALE NI YOOTUTUXERYA YOOTEPEXA OREERA

Nihiku nimosa, eriyari ya iyaakha 13 mpakha 18, kahaaweha amiravo muruuwa alavulaka nttaava ninlavuliwa ni matata. Kipacerya weetta ni awosa wiiphiini, nto khupacerya wiixutta Nttaava na Matata na oFrança. Kaanivikaniha orowa mithukumano sa eKristau, nto omulokoni mmiravo mmosa Namoona iitthaniwa Stefane aahikoonela othunku. Aanipaka itthu sinci ophavelaka wiiwanana ni miyo, nto eyo yaahikiiriha omoonaka okhala mutthu aakithokorerya saana. Masi, yaamwiiraneya etthu yaarowa okikhulumula. Mwaha woweettela sooruma sa eKristau, Stefane aahikhootta wiirela mpantta ekhotto, nto khuroihiwa mukhatteya. Murima waahitepa okiriipa! Okathi Stefane aaryaawe mukhatteya, kaahitepa otteettheya, mpakha ohiya orowa omuthukumanoni.

Nuumala myeeri 11, aahikumihiwa mukhatteya nto khutthikela owaani. Nkahaya muupuwele moota waahakalanle aka, vaavo Stefane aalavula awe ni miyo orumeelaka Nttaava na Matata na oFrança. Nkaakupali etthu yoona aka! Etthu xeeni yiiranen’ye? Mukhatteya, Stafane aahiixutta Nttaava na Matata na oFrança. Nto vaavo aarumeela awe matata ni owiitho wawe wira olavule ni miyo, murima aka waanitthapa mwaha woowiiwa saana yootaphulela ya khuta etthu yaahimya awe.

NTO VANO KINNIIWEXEXA SAANA IKEEKHAI SA BIIBILIYA

Stefane aahipacerya omusoma Biibiliya ni miyo. Nto ti vaapacenrya aka olupanya ipantte kamosa-kamosa sa ikeekhai sa Biibiliya saaxuttale aka khalai. Kiryeene mwaana, vaanikisivela oweha ifootu sooreera sa iliivuru sahu sa Biibiliya, kaanivarerya saana khuta etthu vafootuni-vo, ni otokosa khuta etthu wira kihiliyale. Nnaamwi kaasuwela sa Abrahamu ni osuulu awe, vamosa ni ‘muttitthi muulupale’, itthu iyo kaahiiwexexe saana, paahi nuumala woona sitthokiheriwaka ni nttaava ninlavuliwa ni matata. (Maphattuwelo 22:15-18; Wisupulula 7:9) Eyo yahikiiriha woona wira tthiri koophwanya nttaava naka, nttaava ninkivara murima.

Vano vaniwerya aka osuwelexa saana itthu sinihimmwa mmuthukumanoni, murima aka woohakalala ni ophavela waka wiixutta ekeekhai ohinnuwa. Kikhaliheriwaka ni Stefane, wiiwexexa waka itthu sa Biibiliya waanirowa vahoolo, nto 1992, kaahivahererya okumi aka wa Yehova Muluku, nto khubatiziwa. Nnaamwi kaapanke mirukunuxo sinceene, mwaha wa itthu saakiiranenle kiryeene anamwane, nlelo kanuuliwa muru, ni vaanivila waatthokiherya saana atthu akina moonelo aka.

OWANANA MUXANKIHO WA WUULIWA MURU

Nuuvira okathi, egrupu ele ekhaani yaarya aka, ya atthu ahiniiwa yaahitakaahiwa ni muloko wa Pessac, oxerexere wa ebairo ya Bordeaux. Eyo yaahikikhaliherya vanci, nto kaahivikaniha orowa vahoolo omunepani. Hata kaawanana muxankiho aka wa wuuliwa muru, apatthani aka aniiwa yaanikikhaliherya ephavelaka wira ehikhale etthu ehiniiwa aka saana. Emusi emosa; Gilles ni Elodie, yahiimananiha vanci wira ekitthokiheryeke itthu saana. Ikwaha sikina yaanikilattula orowa olya hoothe wala onwurya café hothe nuumala mithukumano, nto khukhala apatthani aka. Tthiri ti voohakalaliha okhala eriyari ya atthu anitthara iphiro soophenta sa Muluku!

Muloko wa Pessac, kaahimoona murokora oreera oniitthaniwa Vanessa. Oreera wawe murima ni ophavela wawe weettela exariya, wahikiiriha osiveliwa ni yena. Vanessa khoona muxankiho aka okhala ntoko etthu enikhoottiherya wiiwanana, masi onoona okhala eparakha ya wiixutta olavula ni atthu ahiniiwa. Tivonto, Vanessa aahikuxa murima aka, nto khuthelana mwaakha wa 2005. Nnaamwi kirine ene muxankiho wa wuuliwa muru, Vanessa onnikikhaliherya owanana muxankiho owo, nto khiyawerya otthokiherya saana moonelo aka. Ohimya ekeekhai kinnimuxukhurela vanci okikhaliherya wawe vaavo vanithokorerya aka miritti saka.

YOOVAHA EKINA ENIKHUMA WA YEHOVA

Mwaakha othelanne ahu, efiliyaali ya oFrança ya Anamoona a Yehova oLouviers, yaahikilattula orowa mweeri mmosa ofiliyaali oxutta muteko wootaphulela. Mahiku ala efiliyaali ennivara muteko munceene wira akumiheriwe aDVD a iliivuru sa Nttaava na Matata na oFrança. Nto okhala wira muteko waanincerereya, anamataphulela yahaana wuncereriwa-tho.

Miyo ni Vanessa, noona wira miyo orowa orumeela ofiliyaali yaari eparakha yuulupale ni yoovaha enikhuma wa Yehova Muluku, masi, kihaana ohimya wira nanoovelela. Nuupuwela so: Egrupu ahu ya atthu ahiniiwa enrowa okhala sai? Empa ahu enrowa okhala sai? Niireke Vanessa amphwanya muteko muttetthe owo? Masi wa khuta muxankiho Yehova aahinooniherya etthu yoopaka. Tthiri ninniweha moota Yehova onniphenta awe hiyo ni atthu akina ahiniiwa.

OKHALIHERIWA NI ATTHU OWURAANA

Mwaha woovaraka muteko wootaphulela, ninnoona saana itthu sinceene sinitthuneya wira akhaliheriwe momunepani atthu ahiniiwa. Ni moota onikihakalaliha aya waaweha anna anivarana aka muteko yiimananihaka olavula ni miyo. Ithoonyeryo vakhaani sixunntte aya ni sinirumeela aya wira alavule ni miyo sinnivara murima aka. Nkinoona hata vakhaani wira koohala ottuli. Ophenta wotheene iwo wa anna onooniherya ophenta wuupale wa arumeyi a Yehova.​—Esalimo 133:1.

Kinnimuxukhurela Yehova, mwaha wa muloko awe weKristau, maana khuta okathi mmulokoni, aanikhala mutthu aakikhaliherya. Kinnixukhurela-tho eparakha erina aka vakhaani ya waakhaliherya alipa-ahiniiwa akhwa aka omusuwela Mpattuxa oophenta ni omwaattamela. Kinnilipelela nihiku ninrowa aya okumihiwa itthu sotheene sinikhoottiherya wiiwanana saana, ni okathi atthu otheene anrowa aya olavulaka nttaava nootteela, eyo piiyo, ekeekhai voohimya sa Yehova Muluku vamosa ni soolakela sawe, sowuryaanyiha emusi yotheene ya apinaatamu.​—Sofoniya 3:9.

[Enoota]

[Elatarato epaaxina 10]

Okathi waarina aka iyaakha 5

[Elatarato epaaxina 11]

Stefane ookikhaliherya omwiiwexexa Biibiliya

[Elatarato epaaxina 12]

Kilavulaka mwaha ni Nttaava na Matata na oFrança

[Elatarato epaaxina 12]

Mwaaraka, Vanessa, ori nikhaliheryo nuulupale

[Elatarato epaaxina 12]

Kivaraka muteko wootaphulelea oskritoorio wa efiliyaale.