MUWIIXUTTIHE ANIINYU

Pedru ni Ananiya Yahootha—Etthu Xeeni Eniixutta Ahu?

NTOKO sinisuwela anyu, wootha ori ohimya etthu enisuwela anyu wira khahiyo ekeekhai. Niireke mootoko wootha?​—a Hata atthu yaale yinnuwale amphentaka Muluku ikwaha sikina yahootha. Pooti wira munnimusuwela mutthu mBiibiliyani aatonko wootha. Nsina nawe ti Pedru, iirela mpantta egrupu ya arummwa 12 a Yesu. Nrowe noone etthu yaamwiirinhe wootha.

Nuumala Yesu ovariwa, onniroihiwa owannya awe muulupale aanamukuttho. Vano woovira ohiyu eriyari. Pedru onnivolowa vate va empa ya mukhulupale anamukuttho voohisuweliwa ni atthu akina. Mooro waavarela waahimwiiriha mwali aari murumeyi a muulupale aanamukuttho omoona Pedru, khuhimya so: “Nyuwo-tho mwari ni Yesu”. Mwaha wa woova Pedru onniruna.

Biibiliya onihimya wira muhoolo mwaya, mwali “mukina ahimona” khuhimya so: “Ola-tho ari ni Yesu”. Pedru khukhootta-tho. Nuuvira okathi vakhaani akina yaahimwaattamela Pedru khuhimya so: “Tthiri nyuwo-tho mwá mmosá a yawo”.

Vano Pedru onnoova vanci. Tivonto onnootha ekwaha ya neeraru oriki: “Nkinimusuwela mulopwan’ole”. Muthupi onniipa. Yesu onninweha Pedru, nto Pedru onnuupuwela wira iwoora vakhaani ottuli Yesu aahihimya wira: “Muthupi ohinati wipa, munokiruna imara ttharú”. Nananoru Pedru onnikelela wunla. Owo oriipiwa murima!

Niireke etthu ntoko eyo enoowerya owiiraneelani?— Pooti okhala oxikola, okathi anaxikola akina onipacerya aya olavula sa Anamoona a Yehova. Mmosa oriki so: “awosa khanttittimiha ebandeira ahu”, mukina khiyahimya so: “anokhootta etoropa, khanaakiherya elapo ahu”. Nlelo, mukina khuhimya so: “Kinoona wira khahiyo maKristau, maana khanipaka efesta ya Natali”. Mmosa khiyoowehani nto khuhimya so: “Kiira nyuwo mwa Namoona a Yehova?” Munrowa opaka exeeni?​—

Nyuwo muhaana wuupuwela saana moota wowaakhula, eyo ehinatthi wiiraneya. Pedru khailokihenrye. Nto nuumala okhumelela yowoopiha, owo ahootha! Masi Pedru ahiriipiwa murima mwaha wa etthu ele, nto Muluku khumulevelela.

Ananiya, mutthareli a Yesu a eseekulu yoopacerya, ahootha-tho. Masi Muluku khaamulevelenle owo ni Safira, mwaara awe. Safira aahimwaakhulela iyawe ohimya itthu sowootha. Nrowe niwehe etthu yaamwiirinhe Muluku ohimulevelela Ananiya ni Safira.

Nuumala Yesu waahiya arummwa khutthikela wa Muluku wiirimu, atthu owiiraka 3.000 annibatiziwa oYerusalemu. Anamunceene anikhuma ilapo soorakamela wira yiire iFesta sa Pentekosti, nto nuumala okhala maKristau, awo yahaana ovikaniha okhala opuro ole wiira yiixutte itthu sikina voohimya sa waamini waya wa niinano. Tivonto awiixutti akina a Yesu, yaarumeela musurukhu aya wira yaakhaliherye aletto ale.

Ananiya vamosa ni mwaara awe yaahitumiha epantte emosa ya ematta aya wira musurukhu ene akhaliheriwe ale yaabatiziwe niinaano. Okathi Ananiya aaruuhale awe musurukhu khwavahererya arummwa, aahimyale wira musurukhu wotheene aahiruuha. Masi amootha! Maana aahivukulanya khwiisukerya! Muluku aahimwiiriha Pedru osuwela etthu yiiranen’ye, tivonto Pedru aahimyale awe wa Ananiya: “Khanwotonthe atthu, mmotonthe Muluku”. Okathi ene yoowo Ananiya aahimora, khukhwa! Nuuvira iwoora tthaaru, aahivolowa mwaara awe. Ohisuwela aka etthu yaamwiiranenle iyawe, aahihimya itthu sowootha, khumora nto khukhwa.

Etthu xeeni eniixutta ahu mwa sowiiraneya iya? Olavula ekeekhai ti vootthuneya! Aayo, otheene sahu nihaana wiixutta olavula ekeekhai! Masi, ikwaha sikina hiyo pooti opaka etthu yoohiloka, vanceenexa okathi wa omiravo. Niireke khamunihakalala osuwela wira Yehova onnoophentani ni wira onimoolevelelani ntoko siirale awe ni Pedru?​—Masi, muupuweleke, nihaana olavula ekeekhai. Akhala wira noopaka etthu eyo yootepa ohiloka, wootha; nihaana oveka, aayo, omuxonttelela Muluku wira onilevelele. Woonasa wene, eyo ti etthu Pedru yaapakale awe, nto khuleveleliwa. Akhala wira ninnimananiha ohootha-tho, Muluku onrowa onilevelela-tho!

Musome Mbiibiliyani Mwanyu

Matheyo 26:69-75

Miteko 2:38-42; 4:32-37; 5:1-11

[Enoota]

[Elatarato epaaxina 14]

[Elatarato epaaxina 14]

[Elatarato epaaxina 15]