Mukhale Oolipiheya—Nave Mwaalipihe Akina
Mwaha wokhala apinaatamu oohimalela, otheene ahu nootoko owereiwa, akina owereiwa vanceene. Okathi sinoophwanyayani mixankiho iyo, munivilela sai?
Nikhaliheryo nuulupale ninwerya onimaaliha pooti orwa wa amusi, apatthani ni maKristau akwhiihu.
Mpatthani ooreera murima, ni masu oophenta pooti olikanaka ni oravo yowo onipenuxa ni oniriiriha. (Mir. 16:24; 18:24; 25:11) Masi maKristau ekeekhai khahiyo aniphavela paahi olipihiwa. Awo aniphavela ‘wahakalaliha mohawani wira ni hiyo niwerye wahakalaliha akhwihu ale ari mohawani mothene, nakawelaka ohakalala omosaru onnivahawe Muluku’. (2 aKor. 1:4; Luka 6:31) Antonio, mutokweene a edistritu oMéxico, aahiweha nikhaliheryo nlo.
Okathi aawehiwe awe wira ookhalana linforma, oretta wa kanser a mphomeni, nto Antonio ahaana oxintta oriipiwa murima. Owo aaniimananiha okasoopa myuupuwelelo sawe soohiloka. Moota xeeni? Owo anuupuwelela masipo a Omwene, aniipa ni wuupuwelela moolumo aya. Ovekela ni moolumo oowiiwanyeya ni omusoma Biibiliya waahimukhaliherya vanceene.
Vano, Antonio onnikupali wira nikhaliheryo nuulupale nikhumme wa maKristau akhwaawe. Owo onihimya so: “Okathi amwaaraka ni miyo naaxanka ahu, naanivekela nikhaliheryo wa mmusi yoowo ori mutokweene mmulokoni wira avekeleke ni hiyo”. Eyo yaaninilipiha ni onimaaliha. Onnilavula-tho so: “Ninnaaxukhuru amusi ni annihu omunepani yaanikhaliherya, okathi naxankiheya ahu naaniwerya oxintta myuupuwelelo soohiloka”. Tthiri aahixukhurela okhalana apatthani oophenta mmoota owo!
Nikhaliheryo nikina okathi wa oxanka ti munepa wootteela. Murummwa Pedru oolavula wira munepa wootteela wa Muluku ori ‘yovaha’ ya mahala. (Mit. 2:38) Eyo yaahiweheya okathi wa woottihiwa wa anamunceene oPentekositi a 33 E.C. Masi yoovaha eyo ennaaphwanya atthu otheene. Nto yoovaha eyo khereere, vano xeeni muhivekelaka ikwaha sinceene?—Yes. 40:28-31.
MWAATHOKORERYEKE VANCEENE ALE ANIHAAWA
Murummwa Paulo aahivilela maxakha manceene, nave okathi mukina aahala okhwa. (2 aKor. 1:8-10) Ekeekhai wira khahiyo Paulo oova okhwa. Owo aahilipihiwa mwaha woosuwela wira Muluku aanimukhaliherya. Olempe so: ‘Nimuttottopele Muluku, Tithi awe Yesu Kristu Pwiyahu, Tithi a ikharari ni Muluku onnihakalaliha inamuna sothene’. (2 aKor. 1:3, 4) Paulo khaisoonela othunku. Masi, mixankiho samphwannye saahimukhaliherya wunnuuherya opatthana ni anna, nto anakhala oolikana wira aalipiheke akina okathi wa oxankiheya.
Nuumala Antonio ole openuwa, aahitthikela muteko wa oxekurya miloko. Owo aanivikaniha waathokorerya axinnawe, nto vano amwaarawe anniilipiha waaxukurya aretta. Mwa ntakiheryo, nuumala omuxukurya munna muKristau aawereiwa eretta yuulupale, Antonio aahiweha wira munna ola khaaphavela orowa omuthukumanoni. Antonio onihimya so: “Khahiyo wira owo aamuhimphenta Yehova, ni anna, masi mwaha wa oretta waanimwiiriha ohiivaha efaita”.
Etthu emosa Antonio aapanke awe wira amulipihe, waari onvekela wira opake nivekelo okathi yaathukumanne aya atthekulaka. Nnaamwi munna ole aawereiwa uupuwela wira khaniphwanela ovekela, owo aaheemya. Antonio onihimya so: “Munna ole aahipaka nivekelo nooloka; nto nuumala vo aahilipiheya. Atthikela wiivaha efaita”.
Aayo, pooti okhala vakhaani wala vanceene, otheene ahu sinniniphwanya mixankiho sa khula enamuna. Ntoko Paulo, eyo pooti onilipiha ni waalipiha akina. Nto, otheene ahu nrowe nikhaleke atthu oopatthaneya ni owoonela othunku maKristau akhwiihu aniwereiwa, nave nimutakiheke Muluku ahu, Yehova, naalipihaka atthu akina.