Nuumala ‘Omusuwela Muluku’,—Exeeni Enireerela Opaka?
‘Nto vano, momusuwela Muluku’.—AGAL. 4:9.
WAKHULA WANYU TUUVI?
Xeeni vanikhaliherya aya otokosaka khula okathi omunepani wahu?
Xeeni muKristau owunnuwela omunepani nlelo onitthuneya awe orowa vahoolo?
Xeeni vanireerela aya otokosa waamini wahu ni wiivahererya wahu wa Yehova?
1. Nthowa xeeni piloto oniwehaweha awe eviyau ahinatthi ovenya?
MAPILOTO aneettiha iviyau, etthu emosa eniwiiriha okhumela saana, ori okhapeleliwa wa itthu sa eviyau sinivikana 30 mwaattelo aya. Akhala wira awo khaniwehaweha ipantta iyo ehinatthi ovenya, awo pooti okumiherya ehasara yuulupale. Nyuwo munnisuwela enamuna ya piloto onirummwa olepa elista ya itthu siwehawehiwe vaviyawuni-vo? Ohaana okhala piloto oosuwela oratteene! Mwaha woowi piloto ole onitokosaka ikwaha sikina, owo pooti owuvya oweha khula epantta ya eviyau eyo.
2. Etthu xeeni maKristau anitumereriwa aya owehaweha?
2 Ntoko piloto owiikasoopa, nyuwo muhaana owehawehaka saana nroromelo nanyu wira nihiwuvye okathi wooxankiha. Hata mbatiziwe ene niinano, wala mpacenrye ene khalai omurumeela Muluku, vannitthuneya owehawehaka moota waamini wanyu olimpe aya ni efaita aya omukokhorela wanyu Muluku. Ohiwehaweha khula okathi waamini wanyu, pooti ohonona omunepani wanyu. Biibiliya onninlopola wira: ‘Ole onòna wira orimwemela, aìpasope wira ahimoré’.—1 aKor. 10:12.
3. Etthu xeeni maKristau oGalasia yaatthuneya aya opaka?
3 MaKristau oGalasia, yaatthuneya otokosa moota olimpe aya waamini waya ni ovaha efaita otaphuwa wa omunepani. Nto mukuttho wa Yesu, waahihula ephiro wa yaale yooniherya omwaamini wira emusuwele Muluku mmukhalelo muulupale, wira ekhale anamwane a Muluku! (aGal. 4:9) Wira evikanihe wataana ni Muluku ni waakhela mareeliho, anna oGalasia yaahaana okhootta sowiixuttiha sa aYuda yaale yaathipelela weettela Nlamulo na Moise. Mwaha woowi ale yahaakhanle aYuda eriyari ya mmamilokoni, ni yahainuwihiwe, khiyaatonko weettela Nlamulo nlo! Ayuda ni ale yahaakhanle aYuda, yaanitthuneya wunnuuherya wataana waya ni Muluku. Eyo yaataphulela wira khiyaatthuneya orumeela Nlamulo na Moise wira apake exariya aya.
MAVALO OOPACERYA WIRA EMUSUWELE MULUKU
4, 5. Miruku xeeni Paulo aavanhe awe maKristau oGalasia, nto xeeni siri aya sa efaita wa hiyo?
4 Miruku sa murummwa Paulo wa aGalasia, waari owuupuxerya yoolakela ela: wira aalopole maKristau ekeekhai osyaka otthikela ottuli ehiyaka itthu sa efaita sa mBiibiliyani. Yehova aahimuupuxerya murummwa ola ohiya paahi olipiha muloko wa oGalasia, masi-tho wira arumeyi a Muluku otheene akhaleke oolipa.
5 Otheene ahu ninnuupuwela moota naataphuliwe ahu omunepani wira nikhale Anamoona a Yehova. Wira nipake eyo moone makoho ala manli: Nyuwo munnuupuwela mavalo mpanke anyu wira mphwanelele obatiziwa? Munnuupuwela moota mmusuwenle anyu Muluku ni owo oosuwenlaweni, wira mutteeliweke murima mwaha wa otaphuwa wa omunepani?
6. Elista xeeni yomunepani enrowa ahu othokorerya?
6 Otheene ahu naahitthara mavalo mathanu ni maxexe. Mavalo awo, anlikana ni elista ya owehaweha omunepani wahu, anilavuliwa ekaaxa eni: “Mavalo Animwiiriha Mutthu Obatiziwa ni Ovikaniha Wunnuwa”. Khula okathi nuupuwelelaka mavalo ala 9, anoonikhaliherya olipiha mukhalelo ahu wira nihitthikele ottuli ni itthu sa elapo. Ntoko piloto yoole oosuwela saana oniwehaweha awe elista ya itthu sa eviyau awe wira yeetteke saana, nto nyuwo munrowa okhaliheriwa akhala wira munivikaniha owehaweha mukhalelo anyu womunepani wira nvareke muteko moororomeleya.
ALE ASUWELIWE NI MULUKU ANNIVIKANIHA WUNNUWA
7. Malakiheryo xeeni anireerela otthara, nto nthowa xeeni?
7 Elista ya piloto ennimuupuxerya wira khula okathi ahinatthi ovenya, ohaana otokosa eviyau awe. Nave-tho hiyo khula okathi nitokoseke mukhalelo ahu womunepani, niwehaka okhuma okathi yoole obatiziwe ahu. Paulo aahimulepela Timootheyo wira: ‘Mutthareke sana molumo èkekhai mukìwalyanyu, mwettelaka wamini n’uphenta ori mwa Yesu Kristu’. (2 Tim. 1:13) ‘Molumo ekekhai’, aniphwanyaneya mBiibiliyani. (1 Tim. 6:3) Ntoko siisaale elatarato epintariwe enniriha aya wuupuwela etthu ene ekhanle. ‘molumo ekekhai’ anninooniherya itthu sinci wira nisuweleke ni weettela ele Yehova ennivekela awe. Nto nrowe niwehe mavalo animwiiriha mutthu obatiziwa wira noone moota nneettela ahu moolumo ekeekhai.
8, 9. (a) Nthowa xeeni nintthuneya ahu ovikaniha okhalana osuwela ni wunnuuherya waamini? (b) Mutakiherye efaita erina aya wunnuwela womunepani ni ovikaniha orowa vahoolo.
8 Nivalo noopacerya na elista ahu tinla: okhalana osuwela. Nuuvira-vo, ninnuuheryeke waamini. Masi, nihaana ovikaniha wunnuuherya itthu iyo piili. (2 aTes. 1:3) Wunnuwa onitaphulela orowa vahoolo ni opaka marukunuxo. ‘Wunnuwa’, onitaphulela osariheleya wa etthu, wala wuncerereya. Nto nuumala obatiziwa, nihaana wunnuwelaka omunepani wahu khula okathi; ohiya okhala opuro omosa paahi.
9 Nrowe nilikanyihe wunnuwela wahu omunepani ni wunnuwa wa mwiri. Mwiri mmosa, pooti wunnuwa mootikiniha, akhala wira mitathaari saya sihiixerya ni orakama. Mwa ntakiheryo, sookhala miri suulupale siniihaniwa cedros siri oLibano orekama waya pooti olikana ni orekama wa epredio ya 12 andare, masi khukhala woolipa mwiri owo, nave mitathaari saya sinnirukurerya epantta eniphiyerya imeeturu 12. (Nsipo 5:15) Nuumala opacerya wunnuwa, onniphiya okathi onimaala aya, masi owo onnivikaniha wunnuwa, masi ohiya ntoko siira awe waanipacerya. Nto khula mwaakha, iritta saya ni mitathaari saya sinninnuwa vancene, nto mwiri owo onakhala woolipa. Etthu emosaru, pooti olikanyihiwa ni wunnuwela wa muKristau. Okathi yoole onimusoma ahu Biibiliya, waaniheryasa pooti wunnuwela mowaakuveya ni khubatiziwa. Ale ari mmulokoni, annisiveliwa oweha orowa wahu vahoolo. Waaniheryasa hiyo pooti orumeela ntoko pioneero wala ophwanya iparakha sikina. Nto iyaakha sinittharelana khiyapacerya ohisuwanyeya wunnuwela wahu womunepani. Nnaamwi vari siiso, nlelo nihaana wunnuuherya waamini wahu ni osuwela, wira atthu ‘òkhomala, ni okaweliwa munnuwelo womalela wa Kristu’. (aÉf. 4:13) Opaka eyo enoniiriha wunnuwela, ntoko okhuma onamwane wira nikhale muKristau owunnuwela, oolipa ntoko mwiri woolipa.
10. Nthowa xeeni hata muKristau owunnuwela onitthuneya awe orowa vahoolo?
10 Masi wunnuwela wahu khonikotela vaavo. Osuwela wahu onitthuneya wuncerereya ntoko ophuwa wa mwiri, nave waamini wahu wiixeryeke ntoko mitathaari. Eyo enooniiriha okhala oolipa mwa Nuulumo na Muluku. (Mir. 12:3) Mmulokoni mwa eKristau, aakhala anna anceene apanke eyo. Mwa ntakiheryo, munna mmosa ori mutokweene mwa iyaakha sinivikana 30, ooweha wira owo nlelo onnikela vahoolo omunepani. Owo onihimya wira: “Onvaha waka efaita Biibiliya, ohincerereya vanceene. Khula okathi kinniweha mapuro anireerela aya ovarihela muteko malakiheryo a Biibiliya mookumini mwaka. Nave ovaha waka efaita muteko woolaleerya onnirowa vahoolo”.
MUNNUUHERYEKE WATAANA WANYU NI MULUKU
11. Ninrowa omusuwela sai oratteene Yehova khuta okathi?
11 Wunnuwela wahu onihela muhina wataana ni Yehova ntoko mpatthani ahu. Owo oniphavela wira nisuweleke wira onniniphenta ni osuwela wira onninikhapelela saana. Eyo enilikana ni mwaana ori mmatatani mwa anamuyari wala okathi hiyo ninkhala ahu ni apatthani anniphenta. Ntoko nyuwo munisuwela anyu, wataana nno ni Yehova khoniphwanyiwa paahi nihiku nimosa. Onitthuneya ovira okathi wira nimusuwele ni omphenta Yehova. Nto wira musuwele mukhalelo wa Yehova oratteene, mwiilipihe ophavela okathi osoma nuulumo nawe khuta okathi. Musomeke khula mwaha erevista Owehaweha ni Despertai! ni iliivuru sinimulakiherya Biibiliya.
12. Exeeni enitthuneya opaka wira nisuweliwe ni Yehova?
12 Apatthani a Muluku anninnuwela omunepani mwaha woovekela ni ekeekhai ni okhalana apatthani ooloka. (Mmusome Malakhiya 3:16.) Thiri Yehova ‘onniwelela olompa’ wa atthu awe. (1 Ped. 3:12) Ntoko tiithi oophenta, Yehova onniwiriyana okathi oninla ahu ni oniveka ahu onikhaliherya. Nto, nihaana ‘ovilela nilipiheryaka olompa’. (aRom. 12:12) Khaninwerya ovikaniha wunnuuherya oKristau ahu nihikhalanne nikhaliheryo na Muluku. Sookhanyererya sa mukhalelo ola wa itthu ti sootepa wunnuwa wira nixintte mekhihu paahi. Nahiya ovekela, ontaphulela ottharuwa waavya olipihiwa ni Muluku, yoowo oniphave onivaha. Nyuwo moohakalala ni mukhalelo a mavekelo anyu, wala munniweha mapuro anireerela aya wunnuuherya?—Yer. 16:19.
13. Nthowa xeeni wataana ni maKristau akhwiihu orina aya efaita ya wunnuuherya omunepani wahu?
13 Yehova onnisiveliwa naale ‘antthyawela’ wa yoowo; pooti nuumala omusuwela Muluku, nihaana ovikaniha wataana okathi wotheene naale amusuwenle Muluku. (Nah. 1:7) Okhala wira niri olumwenku ola woosareya soothananiha, ninrowa okhala a miruku naataanaka ni anna ni arokora annilipiha. Mireerelo xeeni sinikhumelela? Munrowa waaphwanya mmulokoni atthu yaawo anrowa owiirihani ‘ovara miteko sorera’. (aHéb. 10:24, 25) Enamuna ya ophenta Paulo aatumerenrye awe anna aHeeberi, ori ophentana weeKristau, ntoko anamakokhorela a mmulokoni. Okhalana muthinto owo wa ophenta, onitaphulela wataana ni maKristau akhwiihu. Khula okathi wa mithukumano sa eKristau, muhaana orowaka ni wiirela mpantta wira mutokose elista ya waamini wanyu.
14. Moota xeeni wiittaruxa ni orukunuwela ottuli oryaaya muteko ohinimala?
14 Wira nipacerihe okhala muKristau, nintthuneya wiittaruxa ni orukunuwela ottuli wala ottharuwa soottheka sahu. Nto wiittaruxa ori muteko onivikaniha wooniheriwa. Hiyo ntoko apinaatamu oohimalela, nlelo ninnittheka, nto yoottheka enlikanaka ni enowa yeeyo ehanle vakhaani onituphela wira enilume. (aRom. 3:9, 10; 6:12-14) Nto nihaana ohula maitho ahu, nihipepheehe soovonya sahu. Ti voohakalaliha, osuwela wira Yehova toopixa murima ni hiyo, vaavo nimphavela ahu wiimananiha osyaka sootteettheiha, wira nivikaniheke orukunuxa makhalelo anitthuneya. (aFil. 2:12; 2 Ped. 3:9) Vannitthuneya nikhaliheryo nuulupale moota onirumeela ahu okathi ahu, ni mihakhu sahu wira nisyake nrima ni ophenta mihakhu. Murokora mmosa oolepa wira: “Kiyariwe etthoko yeettela ekeekhai, masi moonelo aka voohimya sa Yehova waari woovirikana. Kaamoona Yehova okhala ootepexa woopiha, nto kinaapuwela wira nkaawerya omuhakalaliha’’. Nuuvira okathi, murokora ola aahipacerya “okhalana mixankiho omunepani” wawe mwaha wa soovonya sawe. Owo onihimya so: “Khahiyo wira nkamphenta Yehova, masi mwaha woowi nkaamusuwenle saana. Nto, nuumala ovekela vanceene, kaahipacerya orukunuwela ottuli”. Owo onincererya so: “Kaahoona wira Yehova aanikeettiha ntoko mwaana oophentiwa, akikhaliheryaka wa khula muxankiho waakhumelela, aanikireerela murima, akooniheryaka etthu yaareerela miyo opaka”.
15. Exeeni Yesu ni Atithawe aniweha aya wa hiyo?
15 “Mwalaléryeke atthu” ehapari yoreera. Nlaikha na Muluku naahimuleela masu ala Pedru ni atthareli akina masu ala nuumala wiiraneya mutikiniho wa woopoliwa mukhatteya. (Mit. 5:19-21) Nto wiirela mpantta olaleerya khula esumana onlikana ni oweha elista ahu ya waamini wahu. Yesu ni Atithawe anniweha waamini wahu ni muteko ahu woolaleerya. (Wis. 2:19) Ntoko silavunle awe mutokweene yoole oromoliwe wanipacerya, owo olavunle so: “Nto olaleerya tori muteko ahu muulupale”.
16. Nthowa xeeni vanitthuneya aya wuupuwelela wiivahererya wahu wa Yehova?
16 Mweetteleke wiivahererya wanyu. Eyo teri etthu ya efaita yuulupale enniiriha wataana ni Yehova. Owo ohaasuwela atthu awe. (Mmusome Yesaya 44:5.) Munvekelaka Yehova, wira mutokose moota olimpe aya wataana wanyu nuuwo. Nto ela enimookhaliheryani wuupuwela wira obatiziwa eri yoolakela yuulupale mpanke anyu.
MWATAANE NI YEHOVA ORWEELA MWA OVILELA
17. Xeeni vanitthuneya ahu ovilela wira nimwaattamele Yehova?
17 Aalepelaka maKristau oGalasia, Paulo aahiwooniherya otthuneya waya ovilela. (aGal. 6:9) Olelo-va, ti wootthuneya-tho maKristau ovilela. Sinimoophwanyani soweeha, masi Yehova onimookhaliheryani. Nvikaniheke ovekela munepa wootteela. Nyuwo munookhala okathi onrowa aya oranttelihiwa wunla ni ohakalala, othunku ni murettele. (Math. 7:7-11) Muhaana wuupuwelaka ela: Akhala wira Yehova onnikhapelela ipalame, nto khaniwerya waakhapelela vanceenexa yaale animphenta ni yiivaherenrye wa yoowo? (Math. 10:29-31) Moohithokorerya enamuna ya sookhanyererya siniwanana anyu, muhikhalakhale mutthikelaka ottuli. Tthiri mareeliho manceene anaakhela ahu mwaha wa osuweliwa ni Yehova!
18. Nuumala ‘omusuwela Muluku’ nto exeeni enireerela ahu opakaka vano?
18 Nto, akhala wira nyuwo mmusuwenle niinano Muluku nto khubatiziwa, nto exeeni enrowa anyu opaka vano? Nvikaniheke omusuwela saana Yehova wira munnuweleke omunepani. Akhala wira mbatiziwe khalai, nto exeeni enrowa anyu opaka vano? Nyuwo muhaana ovikaniha wiixeriha ni wunnuuherya omusuwela wanyu Yehova. Nto nihiirottele wataana wahu ni Yehova. Ohiya-vo, khula okathi nihaana otokosaka elista ahu mmukhalelo womunepani wira noone naavikanihaka wunnuuherya wataana wahu ni Tiithi ahu oophenta, Mpatthani ahu ni Muluku ahu—Yehova.—Mmusome 2 aKorinto 13:5, 6.
[Elatarato epaaxina 13]
[Elatarato epaaxina 15]
Ntoko mwiri, nave muKristau avikaniheke wunnuwela
[Ekaaxa epaaxina 17]
AVALO ANIMWIIRIHA MUTTHU OBATIZIWA NI OVIKANIHA WUNNUWELA OMUNEPANI
1 Nimpacerya ni ‘omusuwela’ Yehova ni Mwanawe, Yesu Kristu.—Yoh. 17:3.
2 Waamini wahu onninnuwa, vaavo osuwela wahu onincerereya aya.—Yoh. 3:16
3 Ninvekeleke Yehova khula okathi.—Mit. 2:21
4 Ninnivaha efaita wataana khula okathi ni axinnahu arina ahu waamini omosa.—aHéb. 10:24, 25
5 Hiyo nihiittaruxa soottheka sahu.—Mit. 17:30
6 Nootthikela ottuli, nikhoottaka soowiira soohiloka.—Mit. 3:19
7 Waamini wahu onniniiriha olavulaka wala waalaleerya akina.—2 aKor. 4:13
8 Hiyo nihiivahererya wa Yehova wira nimutthareke saana Yesu. —1 Ped. 4:2
9 Nihooniherya wiivahererya wahu orweela mwa obatiziwa mmaasini.—1 Ped. 3:21