MMWAATTAMELE MULUKU
Muthipeleleke ‘Oveka, Munovahiwa’
“Pwiya, munixuttihe olompa”. (Luka 11:1) Yooveka eyo yaapakiwe ni mmosa mwa awiixutti a Yesu. Okathi aakhula awe, Yesu aahihimya malikanyiho manli anniixuttiha moota woovekela wira Muluku oniiwe. Akhala wira munniphavela osuwela Muluku aiwaka tthiri mavekelo anyu, vanimoosivelani osuwela moota Yesu aakhunle awe.—Mmusome Luka 11:5-13.
Nlikanyiheryo noopacerya nimmuhimya mutthu mmosa onivekela. (Luka 11:5-8) Yesu onihimya sa mulopwana mmosa aamwaakhenle muletto ohiyu eriyari, masi khaarina yoolya yonvaha. Onvaha yoolya muletto, yaari etthu yootthuneya. Nnaamwi vaari ohiyu eriyari mulopwana ole onnirowa wa mpatthani awe, khuveka woolihiwa ephau. Wanipacerya mpatthani ole aavekeliwa, khaaphavela ovenya, maana owo ni emusi awe iira orumpe ene khalai. Masi mwaha wohuuleliwa muru ni othipelela oveka, mulopwana ole aawakhenle aletto, aahivikaniha oveka mpakha mpatthani awe ole ovinya khunvaha yoolya.a
Ntakiheryo nla ninniixuttiha exeeni? Yesu onniixuttiha othipelela, oveka, waavya, ni omana mukhora. (Luka 11:9, 10) Mwaha wa xeeni? Niireke Yesu onihimya wira okathi onivekela ahu, vanikhala ntoko niri va mukhora wa Muluku ohimphavela waakhula? Nnaari. Mwaha muulupale tuula, moovirikana ni mpatthani oninyoonyiwa, Muluku onniphavelexa waakhula mavekelo, a atthu yaale anivekela yaaminiki. Nto othipelela oveka ti etthu enooniherya waamini wahu. Othipelela oveka, onooniherya wira ele eniveka ahu ninniphavela tthiri, ni wira ninnikupali wira onoowerya onivaha, akhala wira ennivarihana ni otthuna wawe.—Marko 11:24; 1 Yohani 5:14.
Ntakiheryo na nenli nimmuhimya Muluku ‘Oniwa mavekelo’, Yehova. (Esalimo 65:3) Yesu onikoha so: ‘Ti pani a nyuwo, onìra mwan’awe anvekelaka ehopa, ananvaha enowa? Walá anvekelaka noje, khunvaha eyalala?’ Waakhuliwa waya okhweya, khuuvo tiithi oophenta oninvaha mwanawe itthu soohiloka. Nuumala vo, Yesu onnitthokiherya oriki: akhala wira pinaatamu oohimalela onnaavaha anaawe “itthu sorera” vaatepexa ‘Tithi ori wirimu, onotepaka wavaha [munepa wotteela]’— yoovaha yootepexa oreera, wa anaawe aninvekela valaponi!b—Luka 11:11-13; Matheyo 7:11.
Nlikanyiho nla ninniixuttiha exeeni voohimya sa Yehova, Muluku ‘oniwa mavekelo’? Yesu oniphavela wira nimooneke Yehova okhala ntoko Tiithi oophenta, oniphavela tthiri waavaha anaawe itthu sinitthuneya. Tivonto, ale animukokhorela Yehova ahooveke etthu omwaattamela avekaka etthu eri vamurimani vaya. Asuwelaka wira Yehova oniphavela waavaha etthu yooloka paahi, ni wira ori oolikaneene wira aakhule sooveka saya, hata ohirowaka waavaha etthu enilipelela aya.c
Malakiheryo a omusoma Biibiliya Abril
[Inoota]
a Nlikanyiho na Yesu ninnilikanela ni itthu siiraneya tthiri. Ayuda yoona wira owaakhela aletto waari muteko wootepexa otthuneya. Khuta emusi yaalokiherya ephau ya nihiku nimosa paahi, tivonto yaari etthu yoolema orowa oveka akhala wira yaahimala. Nave-tho, akhala wira yaari etthoko yohaawa, ootheene yaarupa vathi, esaala emosa.
b Yesu aamakela orumeela moolumo oowi ‘vootepexa’, ophavelaka wooniherya wira Muluku tootepexa owerya waavikana apinaatamu. Musomi mmosa onihimya so, akhala wira masu oopacerya annikupaleya, nto masu ookiserya tootepexa okupaleya waya.
c Wira musuwele moota woolompa wira Muluku aakhule, nwehe muru 17 wa eliivuru Biibiilya Oniixuttiha Exeeni Tthiri? ekumiheriwe ni Anamoona a Yehova.
[Eponto yuulupale ya epaaxina 11]
Muluku onniphavela waakhula mavekelo ookhalela wa ale anilompa yaaminiki