MUWIIXUTTIHE ANIINYU
Exeeni Eniixutta Ahu Voohimya sa Nakrime?
Nakrime onimuhimya ahu tuula muninweha anyu valataratoni-va, yoowo Yesu onilavulana awe. Nakrime ola onnixanka mwaha wa ikrime sipanke awe. Owo onninvekela Yesu wira: “Mukùpuwele miyo, mwaphiyá momweneni mwanyu!” Vano, ntoko muninweha anyu va, Yesu onilavula ni nakrime ola. Nyuwo munnisuwela ele onimuleela awe mulopwana ola?—a Yesu onimuleiherya mulopwana ola wira: ‘Veekeekhai, kinoohimeeryani olelo-va wira: Nyuwo munookhala ni miyo oParayiisu’.
Munoonela sai, eParayiisu eyo enrowa okhala woowi?— Wira niphwanye waakhuliwa wekeekhai, nrowe nilavule sa eParayiisu yeeyo Muluku aapanke awe wira okhaleke Mulopwana ni muthiyana oopacerya, Adamu ni Eva. Nto eParayiisu eyo yaari woowi? Niireke yaari wiirimu, wala elapo ya vathi?—
Eyo ekeekhai akhala wira muhimyale wira yaari elapo ya vathi. Nto vaavo ninlavula ahu sa nakrime ola okhala ‘oParayiisu’, nihaana wuupuwelaka wira owo onirowa okhala mulaponi-mu okathi enirowa aya okhala eparayiisu. Nto eParayiisu enrowa okhala sai?— Nrowe niwehe.
Nuumala Yehova ompattuxa mulopwana ni muthiyana oopacerya, Adamu ni Eva, Biibiliya onihimya wira owo aahaapweha oparayiisu valaponi. Eparayiisu eyo yaitthaniwa ematta ya wEdeni. Nyuwo munniwerya wuupuwela moota yahaareere aya oreera ejardim ya wEdeni?— Eyo ekeekhai. Tthiri waari opuro wooreera okhala ovikana mapuro otheene anikhaliwa olelo-va!
Nyuwo munoona sai? Niireke Yesu onirowa okhala valaponi-va hoothe ni nakrime yoole aaxankale mwaha wa soottheka sawe?— Nnaari, maana Yesu onrowa okhalaka wiirimu olamulelaka eparayiisu ya valaponi ntoko Mwene. Nto Yesu okhala ni nakrime ole, onitaphulela wira onirowa omuhihimuxa wira onwehe akhala wira onookhala oparayiisu ya mulaponi. Masi exeeni enirowa omwiiriha Yesu omuhiya mulopwana ole ootakhala wira okhale oparayiisu?— Nrowe nilavule mwaha ola.
Ekeekhai wira mulopwana ola aahipaka itthu sootepa otakhala. Nave, ahaavo atthu anceene ootakhala atonko okhala mulaponi muumu. Masi anamunceene, yaanipaka itthu sootakhala mwaha woohitoko wiixuttihiwa voohimya sa Yehova, ni ele aaphavela awe wira avareke.
Nto atthu awo vamosa ni nakrime ole Yesu aalavulana awe vamwirini aakhomeliwe awe, anirowa ohihimuxiwa wira akhale mparayiisu elapo ya vathi. Atthu awo anirowa wiixuttihiwa yootthuna ya Muluku. Nuumala-vo, awo anrowa wooniherya omphenta waya Yehova.
Nyuwo munnisuwela moota atthu awo anrowa aya wooniherya omphenta waya Muluku?— Orweela mwa omwiiwelela. Tthiri, enrowa okhala etthu yoohakalaliha okhala mParayiisu, nto okathi wotheene okhala ni atthu animphenta Yehova, ni ophentana mukina ni mukhwaawe!
Musome Mbiibiliyani Mwanyu
[Enoota]
a Akhala wira munisoma muri ene ni mwaana, trasu oniwuupuxeryani wira muhaana weemela, nto khiyanvekela mwaana owo wira ohimye etthu enisuwela awe.
[Elatarato epaaxina 14]
[Elatarato epaaxina 15]